ܩܝܢܬܐ ܐ

ܦܬܓܡܐ:

ܒܳܟ ܢܕܰܩܰܪ ܠܰܒܥܶܠܕܒܳܒܰܝ̈ܢ ܘܡܶܛܽܠ ܫܡܳܟ ܢܕܽܘܫ ܠܣܳܐܢ̈ܰܝܢ ܗ̄܀

ܬܒܪܬ‌ܐ:

ܫܰܘܬܶܦ ܠܰܢ ܡܳܪܝ ܒܕܽܘܟܪܳܢ ܐܶܡܳܟ ܘܰܕܩܰܕܺܝ̈ܫܰܝܟ. ܒܰܨܠܰܘ̈ܳܬܗܽܘܢ ܚܰܣܳܐ ܠܰܢ ܡܳܪܝ ܘܰܠܥܰܢܺܝ̈ܕܰܝܢ܀

ܐܰܘܪܶܒ ܡܳܪܰܢ ܕܽܘܟܪܳܢ ܐܶܡܳܟ ܘܰܕܩܰܕܺܝ̈ܫܰܝܟ. ܒܰܨܠܰܘ̈ܳܬܗܽܘܢ ܚܰܣܳܐ ܠܰܢ ܡܳܪܝ ܘܰܠܥܰܢܺܝ̈ܕܰܝܢ܀

ܒܬܪ ܐܘܢܓܠܝܘܢ ܒܩ̄: ܛܽܘܒܰܝܟܝ ܥܺܕܬܳܐ

ܒܪܺܝܟ ܒܰܪ ܚܰܝܳܐ: ܕܽܐܘܪܚܳܐ ܕܩܽܘܫܬܳܐ ܚܰܘܺܝ ܠܰܢ: ܘܰܐܠܦܰܢ ܕܢܰܘܕܶܐ ܒܚܰܕ ܐܰܒܳܐ: ܕܺܐܝܬ̣ܰܘܗ̱ܝ ܥܳܡܰܪ ܒܰܫܡܰܝܳܐ: ܘܚܰܕ ܡܰܠܦܳܢܳܐ ܒܪܳܐ ܡܶܠܬ̣ܳܐ: ܕܡܶܠܰܘ̈ܗ̱ܝ ܚܰܝ̈ܶܐ ܘܦܽܘܪܩܳܢܳܐ: ܘܚܰܕ ܪܽܘܚܩܽܘܕܫܳܐ ܡܕܰܒܪܳܢܳܐ: ܕܰܒܚܰܝܠܶܗ ܥܳܠܡܳܐ ܩܳܐܶܡ: ܬܠܳܬ̣ܳܐ ܩܢܽܘ̈ܡܶܐ ܩܰܕܺܝ̈ܫܶܐ: ܚܕܳܐ ܡܳܪܽܘܬ̣ܳܐ ܡܰܨܝܰܬ ܟܽܠ܀

ܠܘܛܢܝܐ ܒܩ̄: ܚ:ܙ ܠܬܶܫܒܽܘܚܬܶܗ ܕܡܳܪܝܳܐ

ܡܳܐ ܦܐܶܐ ܘܰܫܒܺܝܚ ܗܰܘ ܫܽܘܘܕܳܝܳܐ: ܕܦܳܪܽܘܩܰܢ ܡܠܰܟ ܒܰܟܬ̣ܳܒܶܗ: ܕܳܐܟ̣ܶܠ ܦܰܓ̣ܪܝ̱ ܘܫܳܬܶܐ ܕܶܡܝ̱ ܚܰܝܳܐ: ܗܽܘ ܒܺܝ ܡܩܰܘܶܐ ܘܶܐܢܳܐ ܒܶܗ܀

ܐܶܡܪܳܐ ܫܳܩܶܠ ܚܛܺܝܬܶܗ ܕܥܳܠܡܳܐ: ܕܥܰܠ ܐܰܦܰܝ̈ܢ ܒܩܰܝܣܳܐ ܐܶܬܬܪܺܝܡ: ܘܩܰܪܶܒ ܗܽܘ ܠܶܗ ܕܶܒܚܳܐ ܫܰܠܡܳܐ: ܘܗܳܐ ܥܰܠ ܦܳܬ̣ܽܘܪ ܚܰܝ̈ܶܐ ܣܺܝܡ܀

ܗܳܢܰܘ ܠܰܡ ܕܶܒܚܳܐ ܡܚܰܣܝܳܢܳܐ: ܠܟܽܠ ܫܽܘܪ̈ܥܳܬܳܐ ܕܚܰܛܳܝ̈ܶܐ: ܕܳܐܟ̣ܶܠ ܠܶܗ ܢܳܣܶܒ ܫܽܘܒܩܳܢܳܐ: ܘܩܳܢܶܐ ܚܰܝ̈ܶܐ ܡܬ̣ܽܘ̈ܡܳܝܶܐ܀

ܫܽܘܒܚܳܐ ܠܛܳܒܳܐ ܕܰܒܝܰܕ ܕܶܒܚܶܗ: ܚܰܣܺܝ ܠܥܳܠܡܳܐ ܡܶܢ ܣܳܟ̣ܶܗ: ܬܰܘܕܺܝ ܠܶܗ ܥܰܡ ܐܰܒܳܐ ܕܫܰܠܚܶܗ: ܡܩܰܪܒܺܝܢܰܢ ܥܰܠ ܡܽܘܟܳܟ̣ܶܗ܀

ܚܘܬܡܐ ܒܩ̄: ܩܽܘܡ ܦܰܘܠܳܘܣ

ܡܳܐ ܕܚܺܝܠܳܐ ܫܳܥܬܳܐ ܕܳܐܬܶܐ ܒܳܗ̇: ܗܰܘ ܡܰܠܟܳܐ ܕܰܢܕܽܘܢ ܫܰܪ̈ܒܳܬ̣ܳܐ: ܘܩܳܪܶܐ ܠܗܽܘܢ ܠܡܺܝ̈ܬ̣ܶܐ ܡܶܢ ܩܰܒܪ̈ܶܐ: ܘܫܳܡܥܺܝܢ ܠܶܗ ܘܩܳܝܡܺܝܢ ܕܠܳܐ ܚܒܳܠܳܐ: ܘܡܶܬ̣ܥܰܛܦܺܝܢ ܫܽܘܒܚܳܐ: ܘܠܳܒܫܺܝܢ ܬܶܫܒܽܘܚܬܳܐ: ܘܥܳܐܠܺܝܢ ܠܰܓ̣ܢܽܘܢܳܐ: ܒܙܰܘܚܳܐ ܕܡܰܠܰܐܟ̣̈ܶܐ: ܐܰܫܘܳܢܝ̱ ܡܳܪܝ̱ ܕܥܰܡܗܽܘܢ ܕܩܰܕܺܝ̈ܫܰܝܟ: ܐܶܙܡܰܪ ܠܳܟ ܫܽܘܒܚܳܐ ܘܬܰܘܕܺܝܬ̣ܳܐ܀