ܩܝܢܬܐ ܕ

ܦܬܓܡܐ:

ܗܳܢܰܘ ܝܰܘܡܳܐ ܕܰܥܒܰܕ ܡܳܪܝܳܐ: ܬܰܘ ܢܕܽܘܨ ܘܢܶܚܕܶܐ ܒܶܗ ܗ̄܀

ܬܒܪܬ‌ܐ:

ܒܪܳܐ ܕܒܰܩܝܳܡܬܶܗ ܦܰܪܩܳܗ̇ ܠܥܺܕܬܶܗ ܡܶܢ ܛܳܥܝܽܘܬܳܐ: ܗܰܒ ܒܳܗ̇ ܫܰܝܢܳܐ ܘܢܰܛܰܪ ܝܰܠ̈ܕܶܝܗ̇ ܒܰܩܝܳܡܬܳܟ ܡܳܪܝ܀

ܫܰܝܢܳܐ ܕܫܰܝܶܢ ܠܰܫ̈ܡܰܝܳܢܶܐ ܘܠܰܐܪ̈ܥܳܢܳܝܶܐ: ܫܰܝܶܢ ܠܥܺܕܬܳܟ ܘܢܰܛܰܪ ܝܰܠ̈ܕܶܝܗ̇ ܒܰܩܝܳܡܬܳܟ ܡܳܪܝ܀

ܒܬܪ ܐܘܢܓܠܝܘܢ ܒܩ̄: ܡܳܪܝܳܐ ܡܳܪܰܢ

ܒܝܽܘܡ ܚܰܕ ܒܫܰܒܳܐ: ܕܺܐܝܬܰܘܗܝ ܒܽܘܟ̣ܪܳܐ ܕܝܰܘ̈ܡܳܬ̣ܳܐ ܩܳܡ ܡܶܢ ܩܰܒܪܳܐ: ܒܽܘܟ̣ܪܶܗ ܕܥܶܠܳܝܳܐ: ܘܠܳܐܕܳܡ ܕܺܐܝܬ̣ܰܘܗܝ: ܒܽܘܟ̣ܪܳܐ ܕܟܽܠܳܗ̇ ܐ̱ܢܳܫܽܘܬ̣ܳܐ ܐܰܩܺܝܡ ܥܰܡܶܗ: ܘܰܐܣܩܶܗ ܠܘܳܬ̣ ܐܰܒܽܘܗܝ: ܗ̄ ܒܢܰܘ̈ܗܝ ܕܳܐܕܳܡ ܗܰܒܘ̱ ܬܶܫܒܽܘܚܬܳܐ ܠܡܳܪܶܗ ܕܳܐܕܳܡ: ܕܶܐܬ̣ܳܐ ܘܚܰܪܰܪܟ̣ܽܘܢ܀

ܒܬܪ ܐܘܢܓܠܝܘܢ ܒܩ̄: ܛܽܘܒܰܝܟܝ ܥܺܕܬܳܐ

ܒܝܽܘܡ ܚܰܕ ܒܫܰܒܳܐ: ܐ̱ܪܳܙܳܐ ܪܰܒܳܐ ܕܢܽܘܚܳܡܳܐ. ܐܶܙܰܠ̱ܬ݀ ܡܰܪܝܰܡ ܨܶܝܕ ܩܰܒܪܳܐ: ܘܰܚܼܙܳܬܶܗ ܠܰܒܪܳܐ ܕܩܳܐܶܡ. ܘܶܐܡܪܰܬ݀ ܠܶܗ ܕܶܐܢ ܐܰܢ̱ܬ ܫܩܰܠܬܳܝܗ̱ܝ: ܠܺܝܚܺܝܕܝ ܐܶܡܰܪ ܠܺܝ ܐܰܝܟܰܘ: ܘܶܐܡܰܪ ܠܳܗ̇ ܕܠܳܐ ܬܶܬܪܰܗܒܺܝܢ: ܕܶܐܢܳܐ ܐܺܝܬܰܝ ܕܩܳܡܶܬ ܠܺܝ. ܙܶܠܝ ܣܰܒܰܪܝ ܠܗܽܘܢ ܠܰܫܠܺܝ̈ܚܶܐ: ܕܗܳܐ ܩܳܕܶܡ ܠܟܽܘܢ ܠܰܓܠܺܝܠܳܐ܀

ܠܘܛܢܝܐ ܒܩ̄: ܚ : ܙ ܠܬܶܫܒܽܘܚܬܶܗ ܕܡܳܪܝܳܐ

ܐܶܡܪܳܐ ܚܰܝܳܐ ܕܰܐܠܳܗܽܘܬ̣ܳܐ: ܚܽܘܒܶܗ ܐܰܚܬܶܗ ܠܘܳܬ̣ ܫܶܦܠܰܢ: ܘܶܐܬܥܰܛܰܦ ܦܰܓ̣ܪܳܐ ܕܐ̱ܢܳܫܽܘܬ̣ܳܐ: ܕܢܰܓܗܶܝܢ ܡܶܢ ܒܺܝܫܳܐ ܕܰܐܦܠܰܢ܀

ܫܒܶܝܢ ܗ̱ܘܰܝܢ ܘܰܡܟܰܬܡܺܝܢ ܒܰܣܝܳܢܳܐ: ܕܥܰܘ̈ܠܶܐ ܘܪ̈ܽܘܫܥܶܐ ܘܒܺܝ̈ܫܳܬ̣ܳܐ: ܡܶܬ̣ܢܰܘܠܺܝܢ ܒܘܳܝ̈ܶܐ ܕܢܶܣܝܽܘ̈ܢܶܐ: ܘܰܓܠܺܝܙܺܝܢ ܡܶܢ ܛܳܒ̈ܳܬ̣ܳܐ܀

ܐܰܛܶܦ ܡܶܢ ܕܡܶܗ ܗܰܘ ܙܰܟܳܝܳܐ: ܘܕܰܟܺܝ ܠܰܐܪܥܳܐ ܕܠܺܝܛܳܐ ܗ̱ܘܳܬ: ܘܚܰܪܰܪ ܠܓ̣ܶܢܣܰܢ ܡܶܢ ܫܰܒܳܝܳܐ: ܒܝܰܕ ܡܶܠܬ̣ܶܗ ܕܫܰܠܺܝܛܳܐ ܗ̱ܘܳܬ܀

ܫܽܘܒܚܳܐ ܠܳܟ ܐܳܣܝܳܐ ܚܰܟܺܝܡܳܐ: ܕܡܶܢ ܡܰܚ̈ܘܳܬ̣ܳܐ ܐܰܣܺܝܬܳܢ: ܫܽܘܒܚܳܐ ܠܳܟ ܛܳܒܳܐ ܘܒܰܣܺܝܡܳܐ: ܕܒܰܕܡܳܟ̣ ܚܰܝܳܐ ܚܰܣܺܝܬܳܢ܀

ܚܘܬܡܐ ܒܩ̄: ܠܗܰܘ ܕܰܛܥܺܝܢܳܐ ܡܰܪܟܰܒܬܳܐ

ܩܳܡ ܒܽܘܟ̣ܪܳܐ ܡܶܢ ܒܶܝܬ̣ ܡܺܝ̈ܬ̣ܶܐ: ܘܰܗܘܳܐ ܪܺܝܫܺܝܬ̣ܳܐ ܕܕܰܡ̈ܟܶܐ: ܟܰܕ ܒܽܘܟ̣ܪܰܐ ܗ̱ܘ ܕܰܐܠܳܗܽܘܬ̣ܳܐ: ܘܒܽܘܟ̣ܪܳܐ ܕܰܒܬ̣ܽܘܠܬܳܐ ܡܰܪܝܰܡ ܗ̄ܘܗ̄܀
ܫܽܘܒܚܳܐ ܠܶܗ ܠܡܰܠܟܳܐ ܡܫܺܝܚܳܐ: ܕܰܛܥܶܡ ܡܰܘܬܳܐ ܒܨܶܒܝܳܢܶܗ: ܘܶܐܬ̣ܢܰܚܰܡ ܡܶܢ ܓ̣ܰܘ ܩܰܒܪܳܐ: ܘܰܒܫܽܘܒܚܳܐ ܣܠܶܩ ܠܰܫܡܰܝܳܐ ܗ̄ܘܗ̄܀