ܩܝܢܬܐ ܓ

ܦܬܓܡܐ:

ܡܳܪܝܳܐ ܐܰܡܠܶܟ ܘܓܰܐܝܽܘܬܳܐ ܠܒܶܫ: ܠܒܶܫ ܡܳܪܝܳܐ ܥܽܘܫܢܳܐ ܘܶܐܬܼܥܰܫܰܢ ܗ̄܀

ܬܒܪܬ‌ܐ:

ܒܪܳܐ ܕܒܰܩܝܳܡܬܶܗ ܦܰܪܩܳܗ̇ ܠܥܺܕܬܶܗ ܡܶܢ ܛܳܥܝܽܘܬܳܐ: ܗܰܒ ܒܳܗ̇ ܫܰܝܢܳܐ ܘܢܰܛܰܪ ܝܰܠ̈ܕܶܝܗ̇ ܒܰܩܝܳܡܬܳܟ ܡܳܪܝ܀

ܫܰܝܢܳܐ ܕܫܰܝܶܢ ܠܰܫ̈ܡܰܝܳܢܶܐ ܘܠܰܐܪ̈ܥܳܢܳܝܶܐ: ܫܰܝܶܢ ܠܥܺܕܬܳܟ ܘܢܰܛܰܪ ܝܰܠ̈ܕܶܝܗ̇ ܒܰܩܝܳܡܬܳܟ ܡܳܪܝ܀

ܒܬܪ ܐܘܢܓܠܝܘܢ ܒܩ̄: ܐܶܢܳܐ ܐ̱ܢܳܐ ܢܽܘܗܪܳܐ - H

ܗܳܐ ܩܳܡ ܠܶܗ ܩܛܺܝܠܳܐ ܡܶܢ ܩܰܒܪܳܐ: ܘܶܐܬܢܰܚܰܡ ܒܪܳܐ ܕܰܐܠܳܗܳܐ: ܗܳܐ ܒܰܗܺܝܬ ܥܰܡܳܐ ܕܝܽܘ̈ܕܳܝܶܐ: ܘܡܰܪܟܰܢ ܪܺܝܫܳܐ ܕܨܳܠܽܘ̈ܒܶܐ: ܘܪܳܡ ܩܳܠܳܗ̇ ܕܥܺܕܰܬ ܩܽܘܕܫܳܐ: ܕܰܡܙܰܝܚܳܐ ܠܶܗ ܟܰܕ ܐܳܡܪܳܐ: ܐܶܬܬܥܺܝܪ ܡܳܪܝܳܐ ܐܰܝܟ ܕܰܡܟܳܐ: ܘܰܐܝܟ ܓܰܒܪܳܐ ܕܢܰܦܨܶܗ ܚܰܡܪܶܗ: ܘܚܰܕܺܝ ܠܰܐܪܥܳܐ ܘܠܰܫܡܰܝܳܐ܀

ܠܘܛܢܝܐ ܒܩ̄: ܚ: ܚ ܠܟܽܘܢ ܛܽܘܒܰܝܟܽܘܢ - H

ܝܶܫܽܘܥ ܚܰܕܽܘܬ̣ܳܐ ܕܢܰܦ̈ܫܳܬ̣ܳܐ: ܥܽܘܗܕܳܢܶܗ ܕܳܚܶܩ ܒܺܝ̈ܫܳܬ̣ܳܐ: ܘܚܽܘܒܶܗ ܡܛܰܠܶܩ ܠܰܬܥܺܝ̈ܫܳܬ̣ܳܐ: ܛܽܘܒܰܘܗ̱ܝ ܠܰܐܝܢܳܐ ܕܒܶܗ ܡܣܰܒܰܪ܀

ܒܰܙܒܰܢ ܢܶܣܝܽܘܢܳܐ ܡܰܪܺܝܪܳܐ: ܡܰܢ ܐܺܝܬ̣ ܠܰܢ ܪܳܚܡܳܐ ܫܰܪܺܝܪܳܐ: ܐܶܠܳܐ ܐܶܢ ܝܶܫܽܘܥ ܫܰܦܺܝܪܳܐ: ܕܟܽܠ ܥܳܩ̈ܳܢ ܡܶܢܰܢ ܡܰܥܒܰܪ܀

ܟܰܕ ܚܽܘܫܳܒܰܢ ܢܶܗܘܶܐ ܕܠܺܝܚܳܐ: ܢܶܫܬܕܶܐ ܩܕܳܡ ܪ̈ܶܓܠܰܘܗܝ ܕܰܡܫܺܝܚܳܐ: ܗܽܘ ܝܳܗܶܒ ܠܰܢ ܠܶܒܳܐ ܢܺܝܚܳܐ: ܘܰܒܟܽܠ ܫܰܝܢܳܐ ܠܰܢ ܡܕܰܒܰܪ܀

ܡܳܕܶܝܢ ܐܳܘ ܦܪ̈ܺܝܩܰܘܗ̱ܝ ܕܰܨܠܺܝܒܳܐ: ܛܦܽܘܣܘ̱ ܒܓܶܢܰܘ̈ܗ̱ܝ ܕܝܶܫܽܘܥ ܚܰܒܺܝܒܳܐ: ܟܽܠ ܡܰܢ ܕܠܶܗ ܢܶܗܘܶܐ ܩܰܪܺܝܒܳܐ: ܒܫܰܝܢܳܐ ܚܳܝܶܐ ܡܶܢ ܠܳܐ ܟܒܰܪ܀

ܚܘܬܡܐ ܒܩ̄: ܣܠܶܩ ܠܰܨܠܺܝܒܳܐ - H

ܣܠܶܩ ܡܶܢ ܩܰܒܪܳܐ: ܘܒܽܘܟܪܳܐ ܗܘܳܐ ܠܣܰܓܺܝ̈ܐܶܐ. ܟܰܕ ܗܽܘ ܒܽܘܟܪܰܐܗ̱̇ܘ: ܕܡܰܪܝܰܡ ܘܕܰܐܠܳܗܽܘܬܳܐ. ܒܰܩܝܳܡܬܶܗ ܐܰܩܺܝܡ ܠܰܩܒܺܝܖ̈ܶܐ: ܒܢܽܘܚܳܡܶܗ ܚܰܕܺܝ ܠܰܟܡܺܝܖ̈ܶܐ. ܠܬܰܠ̈ܡܺܝܕܶܐ ܐܰܦܨܰܚ ܗ̱ܘܳܐ: ܠܙܳܩܽܘ̈ܦܶܐ ܐܰܒܗܶܬ ܗ̱ܘܳܐ܀

ܚܘܬܡܐ ܒܩ̄: ܗܳܐ ܩܛܺܝܠ ܗܘ ܒܡܶܨܪܶܝܢ - H

ܝܶܫܽܘܥ ܦܳܪܽܘܩܰܢ: ܕܶܐܬܚܙܺܝ ܠܢܶܫ̈ܶܐ: ܒܝܰܘܡܳܐ ܕܢܽܘܚܳܡܶܗ: ܘܒܰܝܰܐ ܐܶܢܶܝܢ: ܗܽܘ ܢܒܰܝܰܐ ܒܪ̈ܰܚܡܰܘܗܝ ܠܠܶܒܰܘ̈ܳܬܰܢ: ܘܢܰܫܘܶܝܢ ܠܰܚܙܳܬܶܗ ܐܰܠܳܗܳܝܬܳܐ܀