ܩܝܢܬܐ ܙ

ܦܬܓܡܐ:

ܟܳܗܢܰܝ̈ܟ ܢܶܠܒܫܽܘܢ ܙܰܕܺܝܩܽܘܬܳܐ ܘܙܰܕܺܝ̈ܩܰܝܟ ܫܽܘܒܚܳܐ: ܡܶܛܽܠ ܕܰܘܺܘܕ ܥܰܒܕܳܟ ܠܳܐ ܬܰܗܦܶܟ ܐܰܦܰܘ̈ܗܝ ܕܰܡܫܺܝܚܳܟ ܗ̄܀

ܬܒܪܬ‌ܐ:

ܠܟܳܗܢܰܝ̈ܟ ܐܰܢܺܝܚ ܒܰܝܢܳܬ ܟܺܐܢ̈ܶܐ ܒܪܳܐ ܕܰܐܠܳܗܳܐ: ܒܗܳܝ ܡܰܠܟܽܘܬܳܐ ܕܠܳܐ ܡܶܫܬܰܪܝܳܐ ܥܰܡ ܩܰܕܺܝ̈ܫܶܐ܀

ܡܫܺܝܚܳܐ ܕܺܐܝܬܰܝܟ ܡܳܪܳܐ ܕܟܽܘܡܪ̈ܶܐ ܘܪܰܒܳܐ ܕܟܳܗ̈ܢܶܐ: ܚܰܣܳܐ ܠܟܳܗܢܰܝ̈ܟ ܕܫܰܡܶܫܘ ܐܪ̈ܳܙܰܝܟ ܘܠܳܟ ܬܶܫܒܽܘܚܬܳܐ܀

ܒܬܪ ܐܘܢܓܠܝܘܢ ܒܩ̄: ܩܽܘܩܳܝܳܐ

ܟܳܗ̈ܢܶܐ ܕܫܰܡܫܽܘܟ ܙܰܗܝܳܐܝܬ̣ ܒܰܪ ܐܰܠܳܗܳܐ: ܘܦܰܠܶܓ̣ܘ ܦܰܓ̣ܪܳܟ ܠܡܰܪܥܺܝܬ̣ܳܟ ܘܒܰܕܡܳܟ ܐܶܫܬܰܘܬܰܦܘ̱. ܐܰܫܘܳܐ ܐܶܢܽܘܢ ܒܝܰܘܡܳܐ ܕܡܶܐܬ̣ܺܝܬ̣ܳܟ: ܕܢܶܥܠܽܘܢ ܥܰܡܳܟ ܠܰܓ̣ܢܽܘܢܳܐ ܕܢܽܘܪܳܐ: ܘܰܢܫܰܡܫܽܘܢ ܥܰܡ ܡ̈ܰܠܰܐܟ̣ܶܐ ܒܥܺܕ̱ܬܳܐ ܕܒܰܫܡܰܝܳܐ: ܘܬܰܡܳܢ ܢܶܚܕܽܘܢ ܥܰܡ ܟܺܐܢ̈ܶܐ ܘܙܰܕܝ̈ܩܶܐ ܕܪܰܚܡܽܘܟ ܗ̄ ܘܢܰܣܩܽܘܢ ܠܳܟ ܫܽܘܒܚܳܐ܀

ܒܬܪ ܐܘܢܓܠܝܘܢ ܒܩ̄: ܩܽܘܩܳܝܳܐ

ܒܰܕܡܽܘܬ̣ ܕܰܝܳܢܳܐ ܕܝܳܬ̣ܶܒ: ܘܕܳܐܶܢ ܠܶܗ ܠܥܳܠܡܳܐ: ܗܳܟ̣ܰܢ ܝܳܬ̣ܒܳܐ ܟܳܗܢܽܘܬ̣ܳܐ: ܘܕܳܝܢܳܐ ܠܶܗ ܠܟܳܗܢܳܐ: ܕܶܐܢ ܠܳܐ ܒܥܰܝܬܳܢܝ̱: ܠܡܳܢܳܐ ܩܰܒܶܠܬܳܢܝ̱: ܘܶܐܢ ܠܳܐ ܪܚܶܡܬܳܢܝ̱: ܠܡܳܢܳܐ ܩܪܶܒܬ ܨܶܐܕܰܝ: ܘܶܐܢ ܠܳܐ ܬܩܰܕܶܡ ܘܰܬܪܰܡܶܫ: ܒܒܰܝܬܶܗ ܕܰܐܠܳܗܳܐ: ܠܡܽܘܢ ܐܰܚܶܬܬܳܢܝ̱ ܡܶܢ ܪܰܘܡܳܐ: ܘܒܰܛܺܝܠܬܳܐ ܥܒܰܕܬܳܢܝ̱ ܗ̄ ܢܝܳܚܳܐ ܡܳܪܝ̱ ܠܥܰܒ̈ܕܰܝܟ܀

ܒܬܪ ܐܘܢܓܠܝܘܢ ܒܩ̄: ܠܳܟ ܡܳܪܝܳܐ ܩܳܪܶܝܢܰܢ

ܡܳܐ ܦܰܐܝܳܐ ܠܳܗ̇ ܠܟܳܗܢܽܘܬ̣ܳܐ ܡܰܟܺܝܟ̣ܽܘܬ̣ܳܐ: ܘܕܰܟ̣ܝܽܘܬ̣ܳܐ ܘܩܰܕܺܝܫܽܘܬ̣ܳܐ ܘܝܽܘܠܦܳܢܳܐ ܓ̣ܡܺܝܪܳܐ: ܗܳܟ̣ܰܢܳܐ ܟܬ̣ܰܒ ܦܰܘܠܳܘܣ ܫܠܺܝܚܳܐ ܓܰܒܝܳܐ: ܠܛܺܝܡܳܬ̣ܶܐܘܳܣ ܬܰܠܡܺܝܕ̣ܶܗ ܘܛܺܝܛܳܘܣ ܚܰܒܺܝܒܶܗ: ܕܢܶܗܘܶܐ ܥܺܝܪ ܟܳܗܢܳܐ ܕܰܐܠܳܗܳܐ: ܒܪܰܡܫܳܐ ܬܽܘܒ ܒܨܰܦܪܳܐ ܘܰܒܛܰܗܪܳܐ: ܘܰܡܕܰܒܰܪ ܒܰܝܬܶܗ ܫܰܦܺܝܪ: ܘܥܺܕ̱ܬܶܗ ܬܰܩܢܳܐܺܝܬ̣܀

ܠܘܛܢܝܐ ܒܩ̄: ܙ : ܙ ܢܶܩܝܳܐ ܗܘܺܝܬ

ܐܶܬ̣ܒܰܩܺܝܬ̣ ܘܰܐܚܕܰܢܝ̱ ܬܶܗܪܳܐ: ܟܡܳܐ ܪܳܡܺܝܢ ܕܰܪ̈ܓܶܐ ܕܟܳܗܢܳܐ. ܟܳܗܢܳܐ ܪܰܒ ܡܶܢ ܡܰܠܰܐܟ̈ܶܐ: ܘܰܡܥܰܠܰܝ ܡܶܢ ܢܽܘܪ̈ܳܢܶܐ܀

ܡܳܐ ܕܥܳܒܰܪ ܒܰܝܢܳܬ̣ ܫܽܘ̈ܩܶܐ: ܡܶܬܬܙܺܝܥܳܐ ܐܰܪܥܳܐ ܡܶܢܶܗ. ܡܢܰܦܶܨ ܚܶܠܳܐ ܡܶܢ ܡܳܐܢܰܘ̈ܗ̱ܝ: ܕܠܳܐ ܢܺܐܒܰܕ ܡܶܢ ܟܳܗܢܽܘܬ̣ܶܗ܀

ܡܳܐ ܕܦܳܬܰܚ ܬܰܪ̈ܥܶܐ ܕܥܺܕܬܳܐ: ܦܬܺܝܚܺܝܢ ܬܰܪ̈ܥܶܐ ܕܰܫܡܰܝ̈ܳܐ. ܘܡܳܐ ܕܩܳܪܶܐ ܠܪܽܘܚܳܐ ܕܩܽܘܕܫܳܐ: ܙܳܝܚܳܐ ܘܢܳܚܬܳܐ ܡܶܢ ܪܰܘܡܳܐ܀

ܥܰܠ ܦܰܓ̣ܪܳܐ ܫܰܪܝܳܐ ܢܽܘܪܳܐ: ܘܥܰܠ ܟܳܣܳܐ ܫܰܠܗܶܒܺܝܬ̣ܳܐ. ܘܒܶܝܬ̣ ܢܽܘܪܳܐ ܠܫܰܠܗܶܒܺܝܬ̣ܳܐ: ܩܳܐܶܡ ܟܳܗܢܳܐ ܘܰܡܚܰܣܶܐ܀

ܚܘܬܡܐ ܒܩ̄: ܗܳܢܰܘ ܝܰܪܚܳܐ

ܟܳܗ̈ܢܶܐ ܕܫܰܡܫܽܘܟ ܒܓ̣ܰܘ ܒܶܝܬ ܩܽܘܕܫܳܐ: ܠܳܟ ܪܰܒ ܟܽܘܡܪ̈ܶܐ. ܗܳܐ ܒܰܥܓܳܢܳܐ ܚܒܺܝܫܺܝܢ ܒܰܫܝܽܘܠ. ܘܒܰܛܺܝܠ ܦܽܘܡܗܽܘܢ ܡܶܢ ܬܶܫܒܽܘܚܬܳܐ. ܒܳܟ ܢܶܬܢܰܚܡܽܘܢ. ܘܥܰܡܳܟ ܢܶܚܕܽܘܢ ܒܶܝܬ ܡܰܠܟܽܘܬܳܐ܀