ܩܝܢܬܐ ܚ

ܦܬܓܡܐ:

ܗܳܐ ܠܡܺܝ̈ܬܶܐ ܥܳܒܶܕ ܐܰܢ̱ܬ ܬܶܕܡܪ̈ܳܬܳܐ: ܘܓܰܢ̱ܒܳܪ̈ܶܐ ܢܩܽܘܡܽܘܢ ܘܢܰܘܕܽܘܢ ܠܳܟ ܗ̄܀

ܬܒܪܬ‌ܐ:

ܠܥܰܒ̈ܕܰܝܟ ܐܰܢܺܝܚ ܒܰܝܢܳܬ ܟܺܐܢ̈ܶܐ ܒܪܳܐ ܕܰܐܠܳܗܳܐ: ܒܗܳܝ ܡܰܠܟܽܘܬܳܐ ܕܠܳܐ ܡܶܫܬܰܪܝܳܐ ܥܰܡ ܩܰܕܺܝ̈ܫܰܝܟ܀

ܠܳܟ ܬܶܫܒܽܘܚܬܳܐ ܡܢܰܚܶܡ ܡܺܝ̈ܬܶܐ ܡܶܢ ܩܰܒܪ̈ܰܝܗܽܘܢ: ܘܡܰܠܒܶܫ ܠܗܽܘܢ ܐܰܣܛܰܠ ܫܽܘܒܚܳܐ ܒܝܽܘܡ ܢܽܘܚܳܡܳܐ܀

ܒܬܪ ܐܘܢܓܠܝܘܢ ܒܩ̄: ܩܽܘܩܳܝܳܐ

ܒܥܺܕܬܳܐ ܕܒܽܘܟܪ̈ܶܐ ܕܒܰܫܡܰܝܳܐ ܪܫܽܘܡ ܒܰܪ ܚܰܝܳܐ. ܫܡܳܗ̈ܶܐ ܕܥܰܢܝ̣̈ܕܶܐ ܕܰܦܪܰܫܘ ܡܶܢ ܝܰܠ̈ܕܶܝܗ̇ ܕܥܺܕܬܳܐ: ܥܰܠ ܕܰܛܡܺܝܪ ܒܗܽܘܢ ܦܰܓܪܳܟ ܡܳܪܝ ܘܰܕܡܳܟ. ܬܶܕܥܰܟ ܢܽܘܪܳܐ ܡܶܢ ܗܰܕܳܡܰܝ̈ܗܽܘܢ: ܐܰܢܬ ܕܶܐܫܬܰܘܕܺܝܬ ܕܡܰܢ ܕܳܐܟܶܠ ܦܰܓܪܝ ܐܳܦ ܕܶܡܝ ܫܳܬܶܐ. ܗܽܘ ܒܺܝ ܡܩܰܘܶܐ ܘܶܐܢܳܐ ܒܶܗ. ܘܰܠܚܰܪܬܳܐ ܒܺܝ ܢܩܽܘܡ ܗ̄ܘܗ̄܀

ܒܬܪ ܐܘܢܓܠܝܘܢ ܐܚܪܢܐ ܒܩ̄: ܩܽܘܩܳܝܳܐ

ܡܽܘܢ ܡܳܛܶܐ ܠܺܝ ܡܶܢ ܥܳܠܡܳܐ ܘܡܶܢ ܩܶܢܝܳܢܰܘ̈ܗ̱ܝ: ܐܳܡܪܳܐ ܠܶܗ ܢܰܦܫܳܐ ܠܦܰܓ̣ܪܳܐ ܡܳܐ ܕܡܶܢܶܗ ܦܳܪܫܳܐ: ܪܳܓ̣ܳܐ ܗ̱ܘܳܬ̣݀ ܠܺܝ، ܕܶܐܫܰܕܰܪ ܩܽܘܕܡܰܝ: ܥܒܳܕ̈ܶܐ ܛܳܒ̈ܶܐ ܕܡܶܬ̣ܶܒܥܶܝܢ ܠܒܶܝܬ̣ ܕܺܝܢܳܐ: ܗܳܐ ܫܒܺܝܩ ܥܽܘܡܪܳܐ ܠܥܳܡܽܘܪ̈ܰܘܗ̱ܝ: ܘܩܶܢܝܳܢܳܐ ܠܪ̈ܳܚܡܰܘܗ̱ܝ. ܘܳܐܙ̈ܳܠ̱ܢ ܕܶܐܥܒܶܕ ܚܽܘܫܒܳܢܳܐ ܥܰܠ ܡܽܘܢ ܕܰܣܥܺܝܪ ܠܺܝ ܗ̄ ܚܰܣܳܐ ܡܳܪܝ̱ ܚܰܘ̈ܒܰܝ܀

ܒܬܪ ܐܘܢܓܠܝܘܢ ܐܚܪܢܐ ܒܩ̄: ܩܽܘܩܳܝܳܐ

ܩܽܘܪ̈ܒܳܢܶܐ ܩܰܪܶܒܽܘܢ ܠܺܝ ܐܳܡܪܳܐ ܢܰܦܫܳܐ. ܕܠܳܐ ܐܺܝܬ ܡܶܕܶܡ ܕܡܰܘܬܰܪ ܠܺܝ̣ ܐܰܝܟ ܦܰܓܪܶܗ ܕܡܳܪܝܳܐ. ܠܐ ܡܰܘܬܰܪ ܠܝܺ ܒܶܟܝܳܐ ܘܬܶܢ̈ܚܳܬܳܐ. ܐܰܝܟ ܕܡܰܘܬܰܪ ܠܺܝ̣ ܦܰܓܪܶܗ ܕܰܡܫܺܝܚܳܐ. ܡܳܐ ܕܩܳܝܡܺܝܢ ܐ̱ܢܬܽܘܢ ܒܰܨܠܽܘܬܳܐ ܟܳܗ̈ܢܶܐ ܨܰܠܰܘ ܥܠܰܝ: ܕܳܐܙܳܠ̱ܐ ܐ̱ܢܳܐ ܘܡܶܬܩܰܒܠܳܐ ܐܢܳܐ ܩܕܳܡ ܒܺܐܡ ܕܰܡܫܺܝܚܳܐ ܗ̄ ܘܫܳܒܶܩ ܠܺܝ ܚܰܘܒܰܝ̈܀

ܠܘܛܢܝܐ ܒܩ̄: ܗ : ܗ ܬܡܺܝܢܳܝܬܳܐ

ܡܳܪܰܢ ܪܰܚܶܡ ܥܠܰܝܢ: ܘܩܰܒܶܠ ܩܽܘܪܒܳܢܰܢ: ܠܳܐ ܬܰܗܡܶܐ ܡܶܢܰܢ: ܕܰܐܢ̱ܬܽ ܗ̱ܘ ܓܶܝܪ ܣܰܒܪܰܢ܀

ܥܰܒܕܰܝ̈ܟ ܚܢܰܢ ܡܳܪܰܢ: ܒܬܰܪܥܳܟ ܢܳܩܫܺܝܢܰܢ: ܛܳܒܬ̣ܳܟ ܫܰܟܶܢ ܠܰܢ: ܘܶܐܬ̣ܪܰܚܰܡܥܠܰܝܢ܀

ܡܳܪܝܳܐ ܡܪܰܚܦܳܢܳܐ: ܘܰܐܠܳܗܝ̱ ܡܪܰܚܡܳܢܳܐ: ܚܽܘܢ ܒܒܰܣܺܝܡܽܘܬ̣ܳܟ: ܠܳܗ̇ ܠܡܶܣܟܺܢܽܘܬ̣ܰܢ܀

ܐܰܘܣܶܦ ܛܰܝܒܽܘܬܳܟ: ܘܰܐܣܓܳܐ ܛܳܒܽܘܬܳܟ: ܘܚܰܝܳܐ ܚܰܘܣܳܢܰܝ̈ܟ: ܡܳܪܰܢ ܪܰܚܶܡ ܥܠܰܝܢ܀

ܠܘܛܢܝܐ ܒܩ̄: ܗ : ܗ ܕܰܚܛܳܐ ܠܳܐ ܢܶܚܛܶܐ

ܠܳܐ ܬܶܛܥܶܐ ܐܶܢܽܘܢ: ܘܠܳܐ ܬܰܪܦܶܐ ܐܶܢܽܘܢ: ܡܳܪܝܳܐ ܠܥܰܢܺܝ̈ܕܰܝܢ ܕܠܰܩܝܳܡܬܳܟ ܚܳܝܪܺܝܢ. ܢܰܚܶܡ ܦܰܓܪ̈ܰܝܗܽܘܢ: ܡܫܺܝܚܳܐ ܡܠܶܐ ܪ̈ܰܚܡܶܐ: ܘܰܒܟܽܠܥܶܕܳܢܺܝ̈ܢ: ܢܝܳܚܳܐ ܢܶܗܘܶܐ ܠܗܽܘܢ ܗ̄ܘܗ̄ ܘܢܰܣܩܽܘܢ ܠܳܟ ܫܽܘܒܚܳܐ ܕܰܐܢܬ ܗ̱ܘ ܡܢܰܚܡܳܢܗܽܘܢ܀

ܢܶܬܕܟܰܪ ܒܩܽܘܪ̈ܒܳܢܶܐ: ܠܥܰܢܺܝ̈ܕܶܐ ܡܗܰܝ̈ܡܢܶܐ: ܘܠܳܐ ܢܶܛܥܶܐ ܐܶܢܽܘܢ: ܕܡܶܢ ܒܰܝܢܳܬܰܢ ܦܪܰܫܘ. ܥܰܠ ܡܰܕܒܰܚ ܩܽܘܕܫܳܐ: ܫܡܳܗܰܝ̈ܗܽܘܢ ܢܶܬܕܟܰܪ: ܘܰܒܟܽܠ ܥܶܕܳܢܺܝ̈ܢ: ܢܝܳܚܳܐ ܢܶܗܘܶܐ ܠܗܽܘܢ ܗ̄ܘܗ̄ ܘܢܰܣܩܽܘܢ ܠܳܟ ܫܽܘܒܚܳܐ ܕܰܐܢܬ ܗܘ ܡܢܰܚܡܳܢܗܽܘܢ܀

ܚܘܬܡܐ ܒܩ̄: ܐܳܘ ܥܽܘܡܪܳܐ ܕܙܰܒܢܳܐ

ܐܶܢ ܩܰܝܣܳܐ ܦܣܺܝܩܳܐ: ܒܪܺܝܚܳܐ ܕܡܰܝ̈ܳܐ ܘܰܕܥܰܦܪܳܐ. ܡܶܬܥܰܫܰܢ ܘܝܳܗܶܒ: ܛܰܪ̈ܦܶܐ ܘܦܺܐܪ̈ܶܐ ܟܰܕ ܫܳܘܰܚ. ܟܡܳܐ ܟܰܝ ܥܰܢܝ̈ܕܶܐ: ܐܰܝܠܶܝܢ ܕܰܥܢܰܕܘ ܒܰܡܫܺܝܚܳܐ. ܒܪܺܝܚ ܦܰܓ̣ܪܶܗ ܘܰܕܡܶܗ: ܩܳܢܶܝܢ ܚܰܝ̈ܶܐ ܘܡܶܬܢܰܚܡܺܝܢ܀

ܚܘܬܡܐ ܒܩ̄: ܝܰܘܡܳܟ ܠܳܟ ܕܳܡܶܐ

ܡܗܰܝ̈ܡܢܶܐ ܕܰܫܩܰܠܘ̱ ܡܳܪܝ̱: ܦܰܓ̣ܪܳܟ ܘܰܕܡܳܟ: ܘܰܫܟܶܒܘ̱ ܥܰܠ ܣܰܒܪܳܐ ܕܰܐܠܳܗܽܘܬ̣ܳܟ: ܦܪܽܘܥ ܐܶܢܽܘܢ ܒܪ̈ܰܚܡܶܐ: ܒܝܽܘܡ ܓܶܠܝܳܢܳܟ̣: ܕܠܰܐܘܳܢ̈ܶܐ ܢܶܫܬܘܽܘܢ ܕܢܽܘܗܪܳܐ ܕܰܐܦܰܝ̈ܟ܀

ܛܰܠܳܐ ܕܰܚܢܳܢܳܟ: ܪܳܚܶܡ ܐ̱ܢܳܫ̈ܳܐ: ܢܶܚܽܘܬ ܥܰܠ ܓܰܪ̈ܡܶܐ ܕܫܳܟ̣̈ܒܰܝ ܒܰܫܡܳܟ: ܘܢܶܙܗܽܘܢ ܐܰܝܟ ܘܰܪ̈ܕܶܐ: ܒܝܰܘ̈ܡܰܝ ܢܺܝܣܳܢ: ܒܶܐܣܛܠܳܐ ܕܬܶܫܒܽܘܚܬܳܐ ܒܝܽܘܡ ܢܽܘܚܳܡܳܐ܀