ܩܝܢܬܐ ܘ

ܦܬܓܡܐ:

ܚܽܘܪܘ ܠܘܳܬܶܗ ܘܣܰܒܰܪܘ ܒܶܗ: ܘܰܐܦܰܝ̈ܟܽܘܢ ܠܳܐ ܢܰܚܦܪ̈ܳܢ ܗ̄܀

ܬܒܪܬ‌ܐ:

ܫܰܘܬܶܦ ܠܰܢ ܡܳܪܝ ܒܕܽܘܟܪܳܢ ܐܶܡܳܟ ܘܰܕܩܰܕܺܝ̈ܫܰܝܟ. ܒܰܨܠܰܘ̈ܳܬܗܽܘܢ ܚܰܣܳܐ ܠܰܢ ܡܳܪܝ ܘܰܠܥܰܢܺܝ̈ܕܰܝܢ܀

ܐܰܘܪܶܒ ܡܳܪܰܢ ܕܽܘܟܪܳܢ ܐܶܡܳܟ ܘܰܕܩܰܕܺܝ̈ܫܰܝܟ. ܒܰܨܠܰܘ̈ܳܬܗܽܘܢ ܚܰܣܳܐ ܠܰܢ ܡܳܪܝ ܘܰܠܥܰܢܺܝ̈ܕܰܝܢ܀

ܒܬܪ ܐܘܢܓܠܝܘܢ ܒܩ̄: ܩܽܘܩܳܝܳܐ

ܬܠܳܬ̣ܳܐ ܩܽܘܪ̈ܒܳܢܶܐ ܫܶܩܠܰܬ̣݀: ܥܰܡܳܗ̇ ܚܰܛܳܝܬܳܐ: ܘܰܠܒܰܝܬܶܗ ܕܫܶܡܥܽܘܢ ܥܶܠܰܬ̣݀: ܕܰܬܪܰܥܶܐ ܠܡܳܪܝܳܐ: ܫܶܩܠܰܬ̣݀ ܥܰܡܳܗ̇: ܡܶܫܚܳܐ ܪܺܝܫܳܝܳܐ: ܘܗܰܝܡܳܢܽܘܬ̣ܳܐ: ܘܕܶܡ̈ܥܶܐ ܕܒܳܒ̈ܳܬ̣ܳܗ̇: ܐܰܠܳܗܳܐ ܕܩܰܒܶܠ ܡܶܢܳܗ̇: ܩܽܘܪ̈ܒܳܢܶܐ ܕܩܰܪܒܰܬ̣݀: ܩܰܒܶܠ ܩܽܘܪܒܳܢܳܐ ܕܥܰܒ̈ܕܰܝܟ: ܕܗܳܐ ܣܺܝܡ ܥܰܠ ܡܰܕܒܚܳܐ: ܗ̄ܘܗ̄܀

ܠܘܛܢܝܐ ܒܩ̄: ܚ : ܚ ܠܟܽܘܢ ܛܽܘܒܰܝܟܽܘܢ

ܒܰܪ ܐܰܠܳܗܳܐ ܢܚܶܬ ܡܶܢ ܪܰܘܡܳܐ: ܘܶܐܫܰܕ ܠܰܕܡܶܗ ܡܶܛܽܠܳܬ̣ܰܢ: ܐܶܬܬܥܺܝܪܝ̱ ܐܳܘ ܢܰܦܫܝ̱ ܘܶܐܬ̣ܓܰܘܰܣܝ ܒܶܗ: ܕܰܡܪܰܚܡܳܢ ܗ̱ܽܘ ܘܫܳܡܰܥ ܗ̱ܽܘ ܠܶܟ̣ܝ̱܀

ܝܰܘܡܳܢ ܐܰܘ ܠܰܡܚܳܪ ܡܳܝܬܺܝܢܰܢ: ܚܽܘܫܒܳܢܳܐ ܠܡܶܬܰܠ ܥܬܺܝܕܺܝܢܰܢ: ܐܰܝܠܶܠܝ̱ ܡܶܟܺܝܠ ܘܰܒܥܳܝ ܡܶܢܶܗ: ܕܰܡܪܰܚܡܳܢ ܗ̱ܽܘ ܘܫܳܡܰܥ ܗ̱ܽܘ ܠܶܟ̣ܝ̱܀

ܠܳܐ ܬܶܬܥܰܪܙܠܺܝܢ ܒܦܰܓ̣ܪ̈ܳܢܝܳܬ̣ܳܐ: ܕܣܳܢܶܐ ܠܰܐܝܢܳܐ ܕܡܶܬ̣ܥܰܪܙܰܠ ܒܗܶܝܢ: ܘܰܐܣܽܘܪܝ̱ ܠܶܒܶܟ̣ܝ̱ ܒܚܽܘܒܳܐ ܕܺܝܠܶܗ: ܕܰܢܩܽܘܡ ܒܰܐܦܰܝ̈ܟܝ̱ ܘܰܢܥܰܕܰܪ ܠܶܟ̣ܝ̱܀

ܚܘܬܡܐ ܒܩ̄: ܐܳܐܰܪ ܢܽܘܚܳܡܳܐ

ܡܳܐ ܕܥܳܐܶܠ ܟܳܗܢܳܐ ܠܒܶܝܬ ܩܽܘܕܫܳܐ: ܕܰܢܩܰܪܶܒ ܬܰܡܳܢ ܩܽܘܪܒܳܢܳܐ: ܨܳܝ̈ܒܳܢ ܘܡܶܬ̣ܟܰܢ̈ܫܳܢ ܪ̈ܽܘܚܳܬ̣ܳܐ: ܘܥ̈ܳܐܠܳܢ ܘܡܶܬܒܰܣ̈ܡܳܢ ܒܗܰܘ ܕܶܒܚܳܐ: ܘܗܳܝܕܶܝܢ ܡܶܫܬܰܕܪ̈ܳܢ ܠܰܐܘܳܢܗܶܝܢ܀