ܩܝܢܬܐ ܗ

ܦܬܓܡܐ:

ܡܶܛܽܠܳܬܳܟ ܐܶܬܩܰܛܰܠܢ ܟܽܠ ܝܽܘܡ: ܘܶܐܬܚܫܶܒܢ ܐܰܝܟ ܐܶܡܪ̈ܶܐ ܠܢܶܟܣܬܳܐ ܗ̄܀

ܬܒܪܬ‌ܐ:

ܫܰܘܬܶܦ ܠܰܢ ܡܳܪܝ ܒܕܽܘܟܪܳܢ ܐܶܡܳܟ ܘܰܕܩܰܕܺܝ̈ܫܰܝܟ. ܒܰܨܠܰܘ̈ܳܬܗܽܘܢ ܚܰܣܳܐ ܠܰܢ ܡܳܪܝ ܘܰܠܥܰܢܺܝ̈ܕܰܝܢ܀

ܐܰܘܪܶܒ ܡܳܪܰܢ ܕܽܘܟܪܳܢ ܐܶܡܳܟ ܘܰܕܩܰܕܺܝ̈ܫܰܝܟ. ܒܰܨܠܰܘ̈ܳܬܗܽܘܢ ܚܰܣܳܐ ܠܰܢ ܡܳܪܝ ܘܰܠܥܰܢܺܝ̈ܕܰܝܢ܀

ܒܬܪ ܐܘܢܓܠܝܘܢ ܒܩ̄: ܛܽܘܒܰܝܟܝ ܥܺܕܬܳܐ

ܢܶܩܽܘܡ ܫܰܦܺܝܪ: ܒܥܺܕ̱ܬܳܐ ܒܥܶܕܳܢ ܩܽܘܪܒܳܢܳܐ: ܕܟܳܗܢܳܐ ܩܳܐܶܡ ܥܰܠ ܡܰܕ̣ܒܚܳܐ: ܘܣܳܐܶܡ ܒܶܣ̈ܡܶܐ ܠܰܐܠܳܗܳܐ: ܘܰܡܩܰܪܶܒ ܠܶܐܡܪܳܐ ܚܰܝܳܐ: ܗܰܘ ܕܫܳܩܶܠ ܚܛܺܝܬ̣ܶܗ ܕܥܳܠܡܳܐ: ܘܩܳܪܶܐ ܠܪܽܘܚܳܐ ܩܰܕܺܝܫܳܐ: ܘܢܳܚܬܳܐ ܨܶܐܕܰܘܗ̱ܝ ܟܰܣܝܳܐܺܝܬ̣: ܘܰܡܪܰܚܦܳܐ ܥܰܠ ܩܽܘܪܒܳܢܶܗ: ܘܝܳܗܒܳܐ ܠܰܢ ܚܰܝ̈ܶܐ ܚܰܕ̱̈ܬܶܐ܀

ܠܘܛܢܝܐ ܒܩ̄: ܝܒ:ܝܒ ܐܳܘ ܚܰܟܺܝܡܳܐ

ܡܳܐ ܪܰܒ ܐ̱ܪܳܙܳܐ ܕܝܰܗ̱ܒ ܠܚܽܘܣܳܝܰܢ ܡܳܪܶܐ ܫܡܰܝ̈ܳܐ: ܩܽܘܕ̈ܫܶܐ ܕܣܺܝܡܺܝܢ ܫܪܳܪܳܐ ܦܰܓ̣ܪܶܗ ܘܰܕܡܶܗ ܚܰܝܳܐ܀

ܠܕܰܕܟ̣ܶܝܢ ܒܰܠܚܽܘܕ ܢܶܬܠܽܘܢ ܙܰܗܰܪ ܠܟܳܗ̈ܢܶܐ ܓ̣ܒܰܝ̈ܳܐ: ܕܠܳܐ ܓܶܝܪ ܫܳܘܶܝܢ ܠܩܽܘܕ̈ܫܶܐ ܐܶܠܳܐ ܢܰܟ̣̈ܦܶܐ ܕܟ̣ܰܝ̈ܳܐ܀

ܢܶܩܪܽܘܒ ܗܳܟ̣ܺܝܠ ܟܰܕ ܕܟ̣ܶܝܢ ܡܶܢ ܟܽܠ ܡܽܘ̈ܡܶܐ ܣܢܰܝ̈ܳܐ: ܠܦܳܬ̣ܽܘܪ ܚܰܝ̈ܶܐ ܕܰܥܠܰܘܗ̱ܝ ܙܠܺܝܚ ܕܶܡ ܐܶܡܪܳܐ ܚܰܝܳܐ܀

ܒܪܺܝܟ ܕܰܒܕܶܒܚܶܗ ܫܰܟܶܢ ܠܓ̣ܶܢܣܰܢ ܚܰܝ̈ܶܐ ܦܰܐܝ̈ܳܐ: ܘܰܒܝܰܕ ܥܡܳܕܶܗ ܝܰܗ̱ܒ ܠܰܢ ܛܰܝܒܽܘ ܕܣܺܝܡܰܬ̣ ܒܢܰܝ̈ܳܐ܀

ܚܘܬܡܐ ܒܩ̄: ܠܗܰܘ ܕܰܛܥܺܝܢܳܐ ܡܰܪܟܰܒܬܳܐ

ܥܒܶܕ ܡܳܪܝ ܕܽܘܟ̣ܪܳܢܳܐ ܛܳܒܳܐ܆ ܠܡܰܪܝܰܡ ܐܶܡܳܐ ܕܺܝܠܶܕܬ̣ܳܟ: ܘܠܰܢܒܺܝ̈ܶܐ ܫܠܺܝ̈ܚܶܐ ܘܣܳܗ̈ܕܶܐ: ܘܫܰܘܬܶܦ ܥܰܡܗܽܘܢ ܠܥܰܢܺܝ̈ܕܶܐ ܗ̄ܘܗ̄܀