ܐ H

ܠܶܟܝ ܢܶܬܟܰܫܰܦ. ܕܥܰܡܰܢ ܘܰܚܠܳܦܰܝܢ ܬܶܗܘܶܝܢ ܡܦܺܝܤܳܢܺܝܬܳܐ. ܠܰܡܠܶܟ ܡܰܠ̈ܟܶܐ ܕܢܶܫܪܶܐ ܫܰܝܢܶܗ ܘܰܫܠܳܡܶܗ ܒܥܳܠܡܳܐ ܟܽܠܶܗ. ܘܢܰܥܒܰܪ ܫܰܒ̈ܛܶܐ ܕܪܽܘܓܙܳܐ. ܡܶܢ ܟܽܠܳܗ̇ ܥܳܡܰܪܬܳܐ ܒܰܡܪܰܚܡܳܢܽܘܬܶܗ܀

ܠܶܟܝ ܨܳܝܪܺܝܢ ܗ̱ܘܰܘ. ܢܒܺܝ̈ܶܐ ܟܽܠܗܽܘܢ ܒܐ̱ܪ̈ܳܙܰܝܗܽܘܢ ܒܬܽܘܠܬܳܐ ܡܰܪܝܰܡ. ܡܽܘܫܶܐ ܒܤܰܢܝܳܐ ܘܚܰܙܩܺܝܐܝܶܠ ܒܰܪ ܓܳܠܽܘܬܳܐ ܬܰܪܥܳܐ ܕܰܐܚܺܝܕ ܩܪܳܟܝ. ܘܶܐܫܰܥܝܳܐ ܕܽܘܡܳܪܳܐ. ܘܶܐܠܺܝܫܰܥ ܩܽܘܩܬܳܐ ܚܕܰܬܳܐ ܐܳܦ ܓܶܕܥܽܘܢ ܓܶܙܬܳܐ܀

ܫܠܺܝ̈ܚܶܐ ܓܒܰܝ̈ܳܐ. ܕܶܐܫܬܰܕܰܪܘ ܡܶܢ ܐܰܠܳܗܳܐ ܠܥܳܠܡܳܐ ܟܽܠܶܗ. ܘܰܢܦܰܩܘ ܐܰܟܪܶܙܘ ܤܒܰܪܬܶܗ ܕܰܒܪܳܐ ܒܶܝܬ ܥܰܡ̱̈ܡܶܐ ܘܥܶܒܪ̈ܶܝܗ̇ ܕܰܐܪܥܳܐ. ܤܰܒܰܪܘ ܗ̱ܘܰܘ ܡܰܠܟܽܘܬܳܐ. ܕܰܫܡܰܝܳܐ ܟܰܕ ܐܳܡܪܺܝܢ ܛܽܘܒܳܐ ܠܰܡܗܰܝ̈ܡܢܶܐ܀

ܒܰܠܡܺܐܢ ܚܰܝ̈ܶܐ. ܘܒܰܐܘ̈ܳܢܶܐ ܡܰܠ̈ܝܰܝ ܪܘܳܙܳܐ ܐܰܢܺܝܚ ܐܶܢܶܝܢ. ܡܰܠܟܳܐ ܡܫܺܝܚܳܐ ܠܢܰܦ̈ܫܳܬܳܐ ܕܥܰܒ̈ܕܶܐ ܕܺܝܠܳܟ. ܕܰܫܟܶܒܘ ܥܰܠ ܤܰܒܪܳܟ. ܘܡܳܐ ܕܳܐܬܶܐ ܐܰܢ̱ܬ ܒܫܽܘܒܚܳܐ. ܕܬܶܬܶܠ ܐܰܓܪܳܐ ܠܦܳܠ̈ܚܰܝܟ ܥܰܡܳܟ ܢܶܬܒܰܤܡܽܘܢ܀

ܫܽܘܒܚܳܐ: ܫܽܘܒܚܳܐ ܠܰܐܒܳܐ. ܕܰܒܪܳܐ ܠܥܳܠ̈ܡܶܐ ܘܒܶܪ̈ܝܳܬܳܐ ܡܶܢ ܠܳܐ ܡܶܕܶܡ. ܘܤܶܓܕܬܳܐ ܠܰܒܪܳܐ ܕܰܨܡܰܚ ܡܶܢ ܥܽܘܒܳܐ ܒܬܽܘܠܳܐ ܕܗܳܝ ܒܰܪ̱ܬ ܕܰܘܺܝܕ. ܤܓܺܝܕ ܪܽܘܚܳܐ ܩܰܕܺܝܫܳܐ. ܕܚܰܟܶܡ ܐܶܢܽܘܢ ܠܰܫܠܺܝ̈ܚܶܐ ܘܫܰܪܰܪ ܡܶܠܰܝ̈ܗܽܘܢ܀

ܒ H

ܠܶܟܝ ܦܰܐܝܳܐ ܕܰܢܩܰܠܶܣ. ܝܳܠܕܰܬ ܐܰܠܳܗܳܐ ܒܬܽܘܠܬܳܐ. ܡܶܛܽܠ ܕܒܺܐܝ̈ܕܰܝܟܝ ܐܶܬܪܰܥܺܝ ܠܓܶܢܤܳܐ ܕܺܝܠܰܢ ܒܢܰܝ̈ܢܳܫܳܐ ܐܰܠܳܗܳܐ ܐܰܒܳܐ܀

ܡܒܰܪܰܟ ܗ̱ܽܘ ܡܳܪܝܳܐ ܐܰܠܳܗܶܗ ܕܺܝܤܪܳܐܝܶܠ. ܡܶܛܽܠ ܕܰܤܥܰܪ ܠܰܢ ܒܪ̈ܰܚܡܰܘܗ̱ܝ ܘܰܥܒܰܕ ܦܽܘܪܩܳܢܳܐ ܘܫܽܘܘܙܳܒܳܐ ܠܥܰܡ̱̈ܡܶܐ ܕܗܰܝܡܶܢܘ ܒܶܗ܀

ܩܰܕܺܝ̈ܫܶܐ ܕܟܽܠ ܚܰܫܺܝ̈ܢ ܘܟܽܠ ܐܽܘܠ̈ܨܳܢܺܝܢ ܤܰܝܒܰܪܘ. ܒܚܽܘܒܳܟ ܡܳܪܶܐ ܟܽܠ ܗܶܢܽܘܢ ܢܶܗܘܽܘܢ ܠܳܟ ܡܦܺܝ̈ܤܳܢܶܐ ܚܠܳܦܰܝܢ ܚܰܛܳܝ̈ܶܐ܀

ܥܰܢܺܝ̈ܕܶܐ ܡܗܰܝ̈ܡܢܶܐ ܠܝܽܘܡ ܡܶܐܬܺܝܬܳܟ ܚܳܝܪܺܝܢ. ܡܫܺܝܚܳܐ ܐܰܠܳܗܳܐ ܕܰܬܒܰܝܰܐ ܐܶܢܽܘܢ ܒܢܽܘܚܳܡܳܐ ܕܢܰܘܕܽܘܢ ܠܛܰܝܒܽܘܬܳܟ܀

ܫܽܘܒܚܳܐ: ܩܰܕܺܝܫܰܬ ܐܰܠܳܗܳܐ ܡܪܰܝܡܳܐ ܕܰܠܥܳܠܰܡ ܥܳܠܡܺܝܢ. ܕܥܳܡܰܪ ܒܰܫܡܰܝܳܐ ܘܰܒܥܺܕܬܶܗ ܐܰܬܩܶܢ ܒܛܰܝܒܽܘܬܶܗ ܡܰܕܒܚܳܐ ܡܚܰܤܝܳܢܳܐ܀

ܓ H

ܐܰܝܟ ܡܶܠܬܳܐ ܕܺܝܠܶܟܝ ܝܳܠܕܰܬ ܐܰܠܳܗܳܐ. ܟܽܠܗܶܝܢ ܫܰܪ̈ܒܳܬܳܐ ܕܰܐܪܥܳܐ ܛܽܘܒܳܐ ܝܳܗ̈ܒܳܢ ܠܶܟܝ. ܡܶܛܽܠ ܕܰܒܥܽܘܒܶܟܝ ܐܰܓܶܢ. ܗܰܘ ܕܒܰܡܪ̈ܰܘܡܶܐ ܥܶܠܳܝ̈ܶܐ ܥܳܡܰܪ ܠܥܳܠܰܡ ܥܳܠܡܺܝܢ܀

ܡܰܪܟܰܒܬܳܐ ܕܚܺܝܠܬܳܐ ܕܰܚܙܳܐ ܚܰܙܩܺܝܐܝܶܠ. ܠܳܐ ܦܳܚܡܳܐ ܒܫܽܘܦܪ̈ܰܝܟܝ ܒܬܽܘܠܬܳܐ ܩܰܕܺܝܫܬܳܐ. ܡܶܛܽܠ ܕܙܰܝܚܰܬܝ ܒܰܕܪ̈ܳܥܰܝܟܝ. ܠܗܰܘ ܕܒܰܡܪ̈ܰܘܡܶܐ ܥܶܠܳܝ̈ܶܐ ܥܳܡܰܪ ܠܥܳܠܰܡ ܥܳܠܡܺܝܢ܀

ܤܳܗ̈ܕܶܐ ܩܰܕܺܝ̈ܫܶܐ ܪ̈ܚܽܘܡܰܘܗ̱ܝ ܕܰܡܫܺܝܚܳܐ. ܩܰܪܶܒܘ ܒܳܥܽܘܬܳܐ ܚܠܳܦ ܥܰܘܠܶܗ ܕܥܳܠܡܳܐ. ܠܰܡܫܺܝܚܳܐ ܕܰܪܚܶܡܬܽܘܢܳܝܗ̱ܝ. ܕܢܶܫܬܘܶܐ ܠܫܽܘܒܩܳܢ ܚܰܘ̈ܒܳܬܰܢ. ܘܥܰܡܟܽܘܢ ܢܶܥܽܘܠ ܠܰܓܢܽܘܢ ܚܰܕ̈ܘܳܬܳܐ܀

ܛܰܠܳܟ ܡܳܪܝ ܡܰܚܝܳܢܳܐ ܢܶܚܽܘܬ ܠܳܗ̇ ܠܰܫܝܽܘܠ. ܘܰܢܪܰܤܶܣ ܥܰܠ ܓܰܪ̈ܡܰܝ̈ܗܽܘܢ ܕܥܰܢܺܝ̈ܕܶܐ ܡܗܰܝ̈ܡܢܶܐ. ܕܶܐܟܰܠܘ ܦܰܓܪܳܟ ܩܰܕܺܝܫܳܐ ܘܶܐܫܬܺܝܘ ܠܰܕܡܳܟ ܡܚܰܤܝܳܢܳܐ ܒܰܓܢܽܘܢ ܢܽܘܗܪܳܐ ܥܰܡܳܟ ܢܶܬܒܰܤܡܽܘܢ܀

ܫܽܘܒܚܳܐ: ܫܽܘܒܚܳܐ ܠܶܗ ܠܰܐܒܳܐ ܘܬܰܘܕܺܝܬܳܐ ܠܰܒܪܳܐ. ܘܰܠܪܽܘܚܳܐ ܕܩܽܘܕܫܳܐ ܐܺܝܩܳܪܳܐ ܘܤܶܓܕܬܳܐ. ܚܰܕ ܐܰܠܳܗܳܐ ܫܰܪܝܪܳܐ ܗܰܘ ܕܒܰܡܪ̈ܰܘܡܶܐ ܥܶܠܳܝ̈ܶܐ ܥܳܡܰܪ ܠܥܳܠܰܡ ܥܰܠܡܺܝܢ܀