ܐ H

ܐܶܫܰܥܝܳܐ ܕܽܘܨ ܟܰܕ ܚܳܕܶܝܬ ܕܗܳܐ ܓܶܝܪ ܒܬܽܘܠܬܳܐ ܩܰܒܠܰܬ ܒܰܛܢܳܐ. ܘܺܝܠܶܕܬܶܗ ܠܰܒܪܳܐ ܒܽܘܟܪܳܐ ܠܶܗ ܠܥܰܡܰܢܽܘܐܝܶܠ. ܐܰܠܳܗܳܐ ܕܡܶܢ ܐܰܠܳܗܳܐ ܨܶܡܚܳܐ ܘܕܶܢܚܳܐ ܢܒܺܝܳܐ ܫܰܡܗܶܗ ܗ̱ܘܳܐ. ܗܰܘ ܕܠܶܗ ܗ̱ܽܘ ܡܫܰܒܚܺܝܢܰܢ. ܘܰܠܝܳܠܶܕܬܶܗ ܛܽܘܒܳܐ ܝܳܗܒܺܝܢܰܢ܀

ܫܠܳܡܠܶܟܝ ܡܰܠܝܰܬ ܛܰܝܒܽܘܬܳܐ ܕܓܳܗܪܺܝܢ ܡܶܢܶܟܝ ܚܰܙܳܝ̈ܶܐ ܕܪܽܘܚܳܐ. ܫܠܳܡܠܶܟܝ ܥܢܳܢܳܐ ܩܰܠܺܝܠܬܳܐ ܗܳܝ ܕܶܐܡܰܪ ܐܶܫܰܥܝܳܐ ܡܫܰܒܚܳܐ. ܫܠܳܡܠܶܟܝ ܢܰܘܤܳܐ ܕܰܟܝܳܐ ܕܰܐܠܳܗܽܘܬܳܐ ܘܰܬܪܽܘܢܳܘܣ ܓܰܐܝܳܐ. ܫܠܳܡܠܶܟܝ ܫܰܒܛܶܗ ܕܰܐܗܪܽܘܢ ܗܰܘ ܕܰܐܦܪܰܥ ܗ̱ܘܳܐ ܘܛܰܪ̈ܦܶܐ ܛܥܶܢ ܚܰܕ̈ܬܶܐ܀

ܕܽܘܨܘ ܘܶܐܬܦܰܨܰܚܘ ܓܡܺܝܪܳܐܺܝܬ ܐܰܒܳܗ̈ܳܬܳܐ ܘܡܰܠ̈ܦܳܢܶܐ ܒܚܺܝܪ̈ܶܐ. ܕܗܳܐ ܙܰܪܥܳܐ ܕܡܰܠܦܳܢܽܘܬܟܽܘܢ ܫܘܰܚ ܘܰܪܒܳܐ ܘܰܤܠܶܩ. ܘܝܰܗ̱ܒ ܦܺܐܪ̈ܶܐ ܕܗܰܝܡܳܢܽܘܬܳܐ ܚܰܕ ܒܰܬܠܳܬܺܝܢ ܘܒܶܫܬܺܝܢ ܘܒܰܡܳܐܐ. ܐܰܝܟ ܡܶܠܬܳܐ ܫܰܪܺܝܪܬܳܐ ܕܶܐܡܰܪ ܡܳܪܰܢ ܒܶܐܘܰܢܓܶܠܝܽܘܢ܀

ܢܝܳܚܳܐ ܘܒܽܘܤܳܡܳܐ ܫܰܟܶܢ ܡܫܺܝܚܳܐ ܐܰܠܳܗܳܐ ܠܥܰܒ̈ܕܶܐ ܕܺܝܠܳܟ. ܘܒܰܝܰܐ ܐܶܢܽܘܢ ܒܢܽܘܚܳܡܳܐ ܐܰܟܡܳܐ ܕܶܐܫܬܰܘܕܺܝܬ. ܐܰܢ̱ܬ ܕܶܐܬܡܢܺܝܬ ܥܰܡ ܥܰܢܺܝ̈ܕܶܐ ܘܰܐܟܪܶܙܬ ܠܗܽܘܢ ܤܰܒܪܳܐ ܫܰܪܺܝܪܳܐ. ܘܢܽܘܚܳܡܳܐ ܕܙܰܕܺܝܩܽܘܬܳܐ ܕܡܶܢ ܐܰܒܕܳܢܳܐ ܕܰܫܝܽܘܠ ܬܩܺܝܡ ܐܶܢܽܘܢ܀

ܫܽܘܒܚܳܐ: ܬܶܒܪܽܘܟܝ ܘܬܶܤܓܽܘܕܝ ܘܰܬܫܰܒܰܚܝ ܥܺܕܰܬ ܩܽܘܕܫܳܐ ܥܰܡ ܟܽܠܗܽܘܢ ܝܰܠ̈ܕܶܝܗ̇. ܠܰܐܒܳܐ ܘܠܰܒܪܳܐ ܘܪܽܘܚܩܘܕܫܳܐ ܐ̱ܪܳܙܳܐ ܬܠܺܝܬܳܝܳܐ. ܐܰܒܳܐ ܢܽܘܗܪܳܐ ܫܰܪܺܝܪܳܐ ܘܰܒܪܳܐ ܨܶܡܚܳܐ ܫܘܶܐ ܠܶܗ ܒܽܐܘܤܺܝܰܐ. ܘܪܽܘܚܩܽܘܕܫܳܐ ܦܰܪܩܠܺܝܛܳܐ ܐ̱ܪܳܙܳܐ ܫܰܠܡܳܐ ܕܰܬܠܺܝܬܳܝܽܘܬܳܐ܀

ܒ H

ܠܶܟܝ ܕܰܠܥܶܠ ܡܶܢ ܗܰܘܢܳܐ ܘܡܶܠܬܳܐ ܐܶܡܶܗ ܕܰܐܠܳܗܳܐ. ܐܰܢܬܝ ܕܰܒܙܰܒܢܳܐ ܠܗܰܘ ܕܰܡܥܰܠܰܝ ܡܶܢ ܙܰܒ̈ܢܶܐ ܝܺܠܶܕܬܝ ܕܠܳܐ ܦܽܘܫܳܩ. ܝܳܠܕܰܬ ܐܰܠܳܗܳܐ ܒܬܽܘܠܬܳܐ ܟܽܠܰܢ ܡܰܘܪܒܺܝܢܰܢ܀

ܠܶܟܝ ܠܳܐ ܡܢܰܤܝܰܬ ܒܙܽܘܘܳܓܳܐ ܐܶܬܺܝܗܶܒ ܫܠܳܡܳܐ. ܒܝܰܕ ܓܰܒܪܺܐܝܶܠ ܪܺܝܫ ܡܰܠܰܐܟ̈ܶܐ ܕܡܳܪܝ ܥܰܡܶܟܝ ܘܡܶܢܶܟܝ ܕܳܢܰܚ. ܡܚܰܬܡܰܬ ܐ̱ܪ̈ܳܙܶܐ ܢܒܺܝܳܝ̈ܶܐ ܟܽܠܰܢ ܡܰܘܪܒܺܝܢܰܢ܀

ܠܳܟ ܐܰܠܳܗܳܐ ܕܒܰܫܪܳܪܳܟ ܫܠܺܝ̈ܚܶܐ ܐܶܙܕܰܝܰܢܘ. ܘܰܢܦܰܩܘ ܐܰܟܪܶܙܘ ܒܰܐܪܒܰܥ ܦܶܢ̈ܝܳܢ ܗܰܝܡܳܢܽܘܬܳܐ ܕܰܫܪܳܪܳܐ. ܘܗܳܐ ܥܺܕܰܬ ܩܽܘܕܫܳܐ ܘܝܰܠ̈ܕܶܝܗ̇ ܡܙܰܝܚܳܐ ܠܥܺܐܕܰܝ̈ܗܽܘܢ܀

ܥܒܶܕ ܡܳܪܰܢ ܒܰܚܢܳܢܳܟ ܕܽܘܟܪܳܢ ܥܰܢܺܝ̈ܕܰܝܢ. ܕܶܐܟܰܠܘ ܦܰܓܪܳܟ ܘܶܐܫܬܺܝܘ ܠܰܕܡܳܟ ܘܚܰܤܳܐ ܠܗܽܘܢ ܒܽܘܨܳܪ̈ܰܝܗܽܘܢ. ܘܡܶܢ ܝܰܡܺܝܢܳܟ ܢܶܩܥܽܘܢ ܠܳܟ ܫܽܘܒܚܳܐ ܡܳܐ ܕܳܐܬܶܝܬ܀

ܫܽܘܒܚܳܐ: ܠܰܬܠܺܝܬܳܝܽܘܬܳܐ ܤܓܺܝܕܬܳܐ ܘܫܰܘܝܰܬ ܒܽܐܘܤܺܝܰܐ. ܟܽܠܰܢ ܡܗܰܝ̈ܡܢܶܐ ܒܕܶܚܠܳܐ ܢܝܰܩܰܪ ܘܰܢܪܰܡܪܶܡ ܐܰܠܳܗܳܐܺܝܬ. ܟܰܕ ܠܳܐ ܡܶܬܦܰܠܓܳܢܳܐܺܝܬ ܫܽܘܒܚܳܐ ܡܰܤܩܺܝܢܰܢ܀

ܓ H

ܗܳܝ ܕܰܠܡܶܠܬܳܐ ܘܡܳܪܳܐ ܝܶܠܕܰܬ. ܝܳܠܕܰܬ ܐܰܠܳܗܳܐ ܚܢܰܢ ܡܗܰܝ̈ܡܢܶܐ. ܠܶܟܝ ܒܰܠܚܽܘܕܰܝܟܝ ܝܳܕܥܺܝܢܰܢ. ܒܬܽܘܠܬܳܐ ܝܳܠܕܰܬ ܐܰܠܳܗܳܐ܀

ܗܳܝ ܕܰܥܠܶܝܗ̇ ܩܰܕܶܡ ܐܶܬܢܰܒܺܝ. ܐܶܫܰܥܝܳܐ ܢܒܺܝܳܐ ܟܰܕ ܐܳܡܰܪ. ܕܗܳܐ ܒܬܽܘܠܬܳܐ ܒܳܛܢܳܐ ܘܝܳܠܕܳܐ. ܝܰܠܕܳܐ ܕܺܐܝܬܰܘܗ̱ܝ ܕܽܘܡܳܪܳܐ܀

ܠܟܽܘܢ ܛܽܘܒܰܝܟܽܘܢ ܐܳܘ ܩܰܕܺܝ̈ܫܶܐ ܡܳܐܢ̈ܶܐ ܓܒܰܝ̈ܳܐ ܕܪܽܘܚܩܽܘܕܫܳܐ. ܛܽܘܒܰܝܟܽܘܢ ܕܶܐܬܟܰܠܰܠܬܽܘܢ. ܕܗܳܐ ܢܳܨܚܺܝܢ ܕܽܘܟܪ̈ܳܢܰܝܟܽܘܢ܀

ܡܰܠܟܳܐ ܡܫܺܝܚܳܐ ܥܒܶܕ ܒܰܚܢܳܢܳܟ. ܢܝܳܚܳܐ ܘܕܽܘܟܪܳܢܳܐ ܠܥܰܢܺܝ̈ܕܶܐ. ܕܶܐܟܰܠܘ ܦܰܓܪܳܟ ܩܰܕܝܫܳܐ. ܘܶܐܫܬܺܝܘ ܠܰܕܡܳܟ ܡܚܰܣܝܳܢܳܐ܀

ܫܽܘܒܚܳܐ: ܫܽܘܒܚܳܐ ܠܰܐܒܳܐ ܒܺܝܚܺܝܕܶܗ. ܘܤܶܓܕܬܳܐ ܠܰܒܪܳܐ ܒܝܳܠܽܘܕܶܗ. ܘܬܰܘܕܺܝܬܳܐ ܠܪܽܘܚܳܐ ܕܩܽܘܕܫܳܐ. ܫܘܶܐ ܠܰܐܒܳܐ ܘܥܳܡܰܪ ܒܰܒܪܳܐ܀