ܒܫܽܘܠܳܡ ܨܠܰܘ̈ܳܬܳܐ

ܬܶܫܡܶܫܬܳܐ ܕܩܰܕܺܝ̈ܫܶܐ
ܒܫܽܘܠܳܡ ܨܠܰܘ̈ܳܬܳܐ

ܚ

ܩܽܘܩܠܺܝܳܘܢ

ܙܰܕܺܝܩܳܐ ܐܰܝܟ ܕܶܩܠܳܐ ܢܰܦܪܰܥ ܗ̄ ܘܰܐܝܟ ܐܰܪ̈ܙܶܐ ܕܠܶܒܢܳܢ ܢܶܫܘܰܚ܀

ܢܰܦܪܥܽܘܢ ܬܽܘܒ ܢܶܬ̣ܪܰܒܽܘܢ ܒܣܰܝܒܽܘܬ̣ܳܐ ܗ̄ ܫܰܡܺܝ̣̈ܢܶܐ ܘܒܰܣܺܝ̈ܡܶܐ ܢܶܗܘܽܘܢ܀

ܐ̱ܚܪܺܢܳܐ

ܕܰܢܨܺܝܒܺܝܢ ܒܒܰܝܬܶܗ ܕܡܳܪܝܳܐ ܗ̄ ܘܰܒܕܳܪ̈ܰܘܗܝ ܕܰܐܠܳܗܰܢ܀

ܘܰܢܚܰܘܽܘܢ ܕܰܬܪܺܝܨ ܗ̱ܽܘ ܡܳܪܝܳܐ ܗ̄ ܥܰܫܺܝܢ ܗ̱ܽܘ ܘܠܰܝܬ ܒܶܗ ܥܰܘܠܳܐ܀

ܫܽܘܒܚܳܐ: ܡܶܢܥܳܠܰܡ ܘܰܥܕܰܡܳܐ ܠܥܳܠܰܡ ܥܳܠܡܺܝܢ ܐܰܡܺܝܢ:

ܥܶܩܒܳܐ

ܕܽܘܟܪܳܢܳܟ (ܐܳܘ) ܡܳܪܝ ܦܠܢ܇ (ܕܽܘܟܪܳܢܟܽܘܢ ܟܽܠ ܩܰܕܺܝ̈ܫܶܐ) ܗܳܪܟܳܐ ܘܰܠܥܶܠ ܒܰܫܡܰܝܳܐ܇ ܘܰܐܝܠܶܝܢ ܕܝܰܩܰܪܘ ܕܽܘܟܪܳܢܳܟ (ܕܽܘܟܪܳܢܟܽܘܢ)܇ ܢܶܬܥܰܕܪܽܘܢ ܒܰܨ̈ܠܰܘܳܬ̣ܳܟ (ܒܰܨ̈ܠܰܘܳܬܟܽܘܢ)܀

ܣܛܳܘܡܶܢ ܩܰܐܠܳܘܣ ܩܽܘܪܶܝܐܠܰܝܣܳܘܢ

ܩܳܠܳܐ ܒܩ̄: ܥܰܠ ܥܶܛܪܳܐ ܕܒܶܣ̈ܡܶܐ

ܛܽܘܒܳܐ ܠܰܢ̈ܒܺܝܶܐ܇ ܛܽܘܒܳܐ ܠܰܫܠܺܝ̈ܚܶܐ܇ ܘܛܽܘܒܰܝܗܽܘܢ ܠܣܳܗ̈ܕܶܐ ܒܝܰܘܡܶܗ ܕܢܽܘܚܳܡܳܐ܀

ܫܽܘܒܚܳܐ: ܡܶܢ ܣܳܗ̈ܕܶܐ ܢܶܒܥܶܐ܇ ܘܰܠܗܽܘܢ ܢܶܬܟܰܫܰܦ܇ ܕܗܶܢܽܘܢ ܢܶܗܘܽܘܢ ܠܳܟ܇ ܡܦܺܝ̈ܣܳܢܶܐ ܚܠܳܦܰܝܢ܀

ܐ̱ܚܪܺܢܳܐ

ܒܗܳܝ ܓܰܢܬܳܐ ܕܰܥܕܶܢ܇ ܙܳܡܪܺܝܢ ܩܰܕܺܝ̈ܫܶܐ. ܛܽܘܒܳܐ ܠܗܳܝ ܐܶܕܢܳܐ܇ ܕܨܳܝܬܳܐ ܠܩܳܠܰܝ̈ܗܽܘܢ܀

ܫܽܘܒܚܳܐ: ܩܳܠ ܣܳܗ̈ܕܶܐ ܫܶܡܥܶܬ܇ ܚܕܳܪ̈ܰܝ ܦܰܪܕܰܝܣܳܐ. ܟܰܕ ܙܳܡܪܺܝܢ ܫܽܘܒܚܳܐ܇ ܒܟܶܢܳܪܶܗ ܕܕܰܘܺܝܕ܀

ܐ̱ܚܪܺܢܳܐ ܩܳܠܳܐ ܒܩ̄: ܩܰܒܶܠܳܝܗܝ ܡܳܪܰܢ

ܢܒܺܝ̈ܶܐ ܒܚܰܫܳܐ ܙܪܰܥܘ̱܇ ܘܰܫܠܺܝ̈ܚܶܐ ܒܚܰܕܽܘܬܳܐ ܚܨܰܕܘ̱܇ ܡܰܠ̈ܦܳܢܶܐ ܚܡܰܠܘ̱ ܗ̱ܘܰܘ܇ ܟܰܪܝܳܐ ܕܰܡܠܶܐ ܚܰܕܘ̈ܳܬܳܐ܀

ܫܽܘܒܚܳܐ: ܢܒܺܝ̈ܶܐ ܩܰܕܺܝ̈ܫܶܐ ܘܰܫܠܺܝ̈ܚܶܐ ܒܢܰܝ̈ ܡܰܠܟܽܘܬܳܐ. ܨܰܠܰܘ ܕܠܳܐ ܢܶܛܒܰܥ. ܒܝܰܡܳܐ ܫܓܺܝܫܳܐ ܕܰܚ̈ܛܳܗܶܐ܀

ܐ̱ܚܪܺܢܳܐ

ܣܳܗ̈ܕܶܐ ܩܰܕܺܝ̈ܫܶܐ܇ ܥܰܒܕܰܘ̈ܗܝ ܕܰܐܠܳܗܳܐ ܡܪܰܝܡܳܐ܇ ܨܠܽܘܬܟܽܘܢ ܬܶܗܘܶܐ ܠܰܢ܇ ܫܽܘܪܳܐ ܪܳܡܳܐ ܘܒܶܝܬ ܓܰܘܣܳܐ܀

ܫܽܘܒܚܳܐ: ܣܳܗ̈ܕܶܐ ܚܙܰܘ ܠܰܒܪܳܐ ܕܰܦܫܰܛ ܐܺܝ̈ܕܰܘܗܝ ܒܰܙܩܺܝܦܳܐ. ܘܰܐܫܠܶܡܘ̱ ܨܰܘܪ̈ܰܝܗܽܘܢ ܠܟܽܠ ܫܶܢܕܺܝ̈ܢ ܡܶܛܽܠ ܚܽܘܒܶܗ܀

ܐ̱ܚܪܺܢܳܐ

ܩܳܠ ܣܳܗ̈ܕܶܐ ܫܶܡܥܶܬ܇ ܚܕܳܪ̈ܰܝ ܦܰܪܕܰܝܣܳܐ. ܟܰܕ ܙܳܡܪܺܝܢ ܫܽܘܒܚܳܐ܇ ܒܟܶܢܳܪܶܗ ܕܕܰܘܺܝܕ܀

ܫܽܘܒܚܳܐ: ܣܳܗ̈ܕܶܐ ܕܶܐܬܪܰܓ݂ܪܰܓ̣ܘ܇ ܕܢܶܚܙܽܘܢ ܠܰܡܫܺܝܚܳܐ. ܒܣܰܝܦܳܐ ܩܢܰܘ ܓܶܦ̈ܶܐ܇ ܘܰܦܪܰܚܘ ܠܰܡܪ̈ܰܘܡܶܐ܀

ܚܽܘܬܳܡܳܐ

ܡܳܪܝܳܐ ܪܰܚܶܡܥܠܰܝܢ ܘܥܰܕܰܪܰܝܢ

ܐܰܦܺܝܣܘ̱ ܥܰܡܰܢ ܩܰܕܺܝ̈ܫܶܐ܇ ܠܗܰܘ ܕܰܥܒܰܕܬܽܘܢ ܨܶܒܝܳܢܶܗ܇ ܕܢܰܥܒܰܪ ܘܰܢܒܰܛܶܠ ܡܶܢܰܢ܇ ܡܰܚ̈ܘܳܬܳܐ ܘܫܰܒ̈ܛܶܐ ܕܪܽܘܓ̣ܙܳܐ܀

ܐ̱ܚܪܺܢܳܐ

ܠܰܢ̈ܒܺܝܶܐ ܫܠܺܝ̈ܚܶܐ ܘܣܳܗ̈ܕܶܐ: ܘܰܠ̈ܟܺܐܢܶܐ ܘܰܠܙܰܕܺܝ̈ܩܶܐ. ܥܒܶܕ ܕܽܘܟܪܳܢܗܽܘܢ ܦܳܪܽܘܩܰܢ: ܘܠܰܢ ܥܰܕܰܪ ܒܰܨܠܰܘ̈ܳܬܗܽܘܢ܀

ܐ̱ܚܪܺܢܳܐ

ܥܺܕܬܳܐ ܕܙܰܝܚܰܬ ܕܽܘܟܪܳܢܳܟ܇ ܩܰܕܺܝܫܳܐ (ܐܳܘ) ܡܳܪܝ ܦܠܢ. ܫܰܝܢܶܗ ܕܡܳܪܳܟ ܘܰܫܠܳܡܶܗ܇ ܢܕܰܝܰܪ ܒܳܗ̇ ܥܕܰܡܳܐ ܠܥܳܠܰܡ܀