ܬܶܫܡܶܫܬܳܐ ܕܝܳܠܕܰܬ ܐܰܠܳܗܳܐ

ܐ

ܩܽܘܩܠܺܝܳܘܢ

ܒܰܪ̱ܬ ܡܰܠܟܳܐ ܒܫܽܘܒܚܳܐ ܩܳܡܰܬ ܗ̄ܘܗ̄ ܘܡܰܠܟܬܳܐ ܡܶܢ ܝܰܡܺܝܢܳܟ܀

ܘܰܛܥܳܝ ܥܰܡܶܟ̣ܝ ܘܒܶܝܬ ܐܰܒܽܘܟܝ ܗ̄ܘܗ̄ ܕܢܶܬܪܰܓܪܰܓ ܡܰܠܟܳܐ ܠܫܽܘܦܪܶܟ̣ܝ܀

ܐ̱ܚܪܺܢܳܐ

ܒܰܠܒܽܘܫܳܐ ܕܕܰܗܒܳܐ ܕܰܐܘܦܺܝܪ ܗ̄ܘܗ̄ ܫܡܰܥܝ ܒܪܰܬܝ ܘܰܚܙܳܝ ܘܰܨܠܳܝ ܐܶܕܢܶܟܝ܀

ܡܶܛܽܠ ܕܗܽܘܝܽܘ ܡܳܪܶܟܝ ܣܓܽܘܕܝ ܠܶܗ ܗ̄ܘܗ̄ ܘܒܰܪ̱ܬ ܨܽܘܪ ܬܶܣܓܽܘܕܝ ܠܶܗ܀

ܫܽܘܒܚܳܐ: ܡܶܢܥܳܠܰܡ ܘܰܥܕܰܡܳܐ ܠܥܳܠܰܡ ܥܳܠܡܺܝܢ ܐܰܡܺܝܢ:

ܥܶܩܒܳܐ

ܩܰܪܶܒܝ ܒܳܥܽܘܬ̣ܳܐ ܚܠܳܦܰܝܢ܇ ܐܳܘ ܫܽܘܒܗܳܪܳܐ ܕܰܡܗܰܝ̈ܡܢܶܐ܇ ܠܺܝܚܺܝܕܳܐ ܕܰܕܢܰܚ ܡܶܢܶܟ̣ܝ܇ ܕܢܶܥܒܶܕ ܪ̈ܰܚܡܶܐ ܥܰܠ ܟܽܠܰܢ܀

ܐ̱ܚܪܺܢܳܐ

ܒܰܪ̱ܬ ܕܰܘܺܝܕ ܒܰܪ̱ܬ ܐܰܒܪܳܗܳܡ܇ ܕܶܐܬܓܰܒܝܰܬ ܡܶܢ ܫܽܘܪܳܝܳܐ܇ ܦܝܳܣܳܐ ܩܰܪܶܒܝ ܠܺܝܚܺܝܕܶܟܝ܇ ܕܢܶܥܒܶܕ ܪ̈ܰܚܡܶܐ ܥܰܠ ܟܽܠܰܢ܀

ܐ̱ܚܪܺܢܳܐ

ܠܳܐ ܬܶܫܠܶܝܢ ܐܳܘ ܩܰܕܺܝܫܬܳܐ ܡܶܢ ܒܳܥܽܘܬܳܐ ܕܰܚܠܳܦܰܝܢ. ܦܝܳܣܳܐ ܩܰܪܶܒܝ ܠܺܝܚܺܝܕܶܟܝ ܕܢܶܥܒܶܕ ܪ̈ܰܚܡܶܐ ܥܰܠ ܟܽܠܰܢ܀

ܐ̱ܚܪܺܢܳܐ

ܒܬܽܘܠܬܳܐ ܕܰܗܘܳܬ ܪܺܝܫܺܝܬܳܐ܇ ܘܶܐܬܝܰܒܰܠܘ ܚܰܝ̈ܶܐ ܡܶܢܶܟ̣ܝ. ܨܠܽܘܬܶܟܝ ܬܶܗܘܶܐ ܣܶܬܳܪܳܐ܇ ܠܢܰܦ̈ܫܳܬܳܐ ܕܰܡܦܺܝ̈ܣܳܢ ܠܶܟ̣ܝ܀

ܣܛܳܘܡܶܢ ܩܰܐܠܳܘܣ ܩܽܘܪܶܝܐܠܰܝܣܳܘܢ

ܩܳܠܳܐ ܒܩ̄: ܗܰܒܠܳܗ̇ ܠܥܺܕܬܳܟ

ܒܬܽܘܠܬܳܐ ܕܶܐܬܓܰܒܝܰܬ܇ ܘܰܗܘܳܬ ܐܶܡܳܐ ܠܰܐܠܳܗܳܐ ܘܒܳܗ̇ ܐܶܬܥܰܩܪܰܬ݀ ܠܰܘܛܬܳܐ ܡ̣ܶܢ ܐܰܪܥܳܐ. ܐܰܦܺܝܣܝ̱ ܠܺܝܚܺܝܕܶܟܝ̱ ܕܢܰܫܪܶܐ ܫܰܝܢܶܗ ܘܰܫܠܳܡܶܗ ܒܥܺܕܬܶܗ ܘܥܰܡܶܗ: ܘܒܰܐܪܒܰܥ ܦܶܢܝ̈ܳܬܳܐ܀

ܫܽܘܒܚܳܐ: ܫܽܘܒܚܳܐ ܠܗܰܘ ܚܰܝܠܳܐ: ܕܰܐܪܦܺܝ ܟܪ̈ܽܘܒܶܐ ܘܰܣܪ̈ܳܦܶܐ ܘܰܢܚܶܬ ܘܰܫܪܳܐ ܒܥܽܘܒܳܗ̇ ܕܰܒܬܽܘܠܬܳܐ. ܘܶܐܬܓܰܫܰܡ ܡܶܢܳܗ̇: ܕܢܶܦܪܽܘܩ ܠܳܐܕܳܡ ܘܰܠܝܰܠ̈ܕܰܘܗ̱ܝ ܡ̣ܶܢ ܫܽܘܥܒܳܕܳܐ: ܕܡܰܘܬܳܐ ܘܣܳ‍ܛܳܢܳܐ܀

ܐ̱ܚܪܺܢܳܐ ܩܳܠܳܐ ܒܩ̄: ܠܡܰܪܝܰܡ ܝܳܠܕܰܬ ܐܰܠܳܗܳܐ

ܠܡܰܪܝܰܡ ܝܳܠܕܰܬ ܐܰ‌ܠܳܗܳܐ: ܢܗܶܐ ܕܽܘܟܪܳܢܳܐ. ܘܰܠܟܽܠܗܽܘܢ ܢܒܺܝ̈ܶܐ ܫܠܺܝ̈ܚܶܐ ܘܣܳܗ̈ܕܶܐ ܒܪ̈ܺܝܟܶܐ. ܘܰܠܟܽܠܗܽܘܢ ܝܰܠ̈ܕܶܝܗ̇ ܕܥܺܕܬܳܐ ܡ̣ܶܢ ܕܳܪ ܠܕܳܪ܇ ܢܶܗܘܶܐ ܕܽܘܟܪܳܢܳܐ ܛܳܒܳܐ ܥܕܰܡܳܐ ܠܥܳܠܰܡ܀

ܫܽܘܒܚܳܐ: ܫܽܘܒܚܳܐ ܠܶܗ ܠܒܰܪ ܐܰ‌ܠܳܗܳܐ: ܕܰܨܒܳܐ ܘܰܕܢܰܚ: ܡ̣ܶܢ ܥܽܘܒܳܗ̇ ܕܰܡܒܰܪܰܟܬܳܐ܇ ܒܬܽܘܠܬܳܐ ܡܰܪܝܰܡ. ܘܰܦܪܰܩ ܥܰܡ̱̈ܡܶܐ ܒܡܰܘܠܳܕܶܗ. ܡ̣ܶܢ ܛܳܥܝܽܘܬܳܐ: ܘܗܳܐ ܡܰܣܩܺܝܢ ܠܶܗ ܬܶܫܒܽܘܚܬܳܐ ܒܟܽܠ̈ܥܶܕܳܢܺܝܢ܀

ܐ̱ܚܪܺܢܳܐ ܩܳܠܳܐ ܒܩ̄: ܡܳܐ ܪܚܺܝܡܺܝܢ

ܐܰܝܟ ܥܶܛܪܳܐ ܕܒܶܣ̈ܡܶܐ ܛܳܒ̈ܶܐ ܢܶܒܣܰܡ ܠܳܟ ܡܳܪܝ: ܕܽܘܟܪܳܢ ܝܳܠܶܕܬܳܟ. ܕܺܝܠܶܕܬܳܟ ܒܰܒܬܽܘܠܽܘܬܳܗ̇: ܒܕܰܟܝܽܘܬܳܐ ܘܩܰܕܺܝܫܽܘܬܳܐ. ܥܒܶܕ ܠܳܗ̇ ܡܳܪܰܢ ܕܽܘܟܪܳܢܳܐ. ܗܳܪܟܳܐ ܒܥܺܕܬܳܐ: ܘܰܠܥܶܠ ܒܰܫܡܰܝܳܐ܀

ܫܽܘܒܚܳܐ: ܫܽܘܒܚܳܐ ܠܶܗ ܠܰܐܒܳܐ ܕܰܓܒܳܟܝ܇ ܡ̣ܶܢ ܫܽܘܪܳܝܳܐ: ܒܬܽܘܠܬܳܐ ܩܰܕܺܝܫܬܳܐ. ܘܠܰܒܪܶܗ ܝܶܫܽܘܥ ܬܰܘܕܺܝܬܳܐ: ܕܰܨܒܳܐ ܘܶܐܬܓܰܫܰܡ ܡܶܢܶܟܝ. ܠܪܽܘܚܳܐ ܕܩܽܘܕܫܳܐ ܗܽܘܠܳܠܳܐ ܕܥܰܒܕܶܟܝ ܢܰܘܣܳܐ. ܘܰܢܚܶܬ ܘܰܫܪܳܐ ܒܶܟܝ܀

ܐ̱ܚܪܺܢܳܐ ܩܳܠܳܐ ܒܩ̄: ܡܳܪܶܗ ܕܪܰܡܫܳܐ

ܫܠܳܡܳܐ ܥܰܡܶܟܝ: ܐܶܡ̣ܰܪ ܓܰܒܪܺܐܶܝܠ: ܡܳܪܰܢ ܥܰܡܶܟܝ: ܡܒܰܪܰܟܬܳܐ ܒܢ̈ܶܫܶܐ. ܠܥܶܠ ‌ܐܰܪܦܺܝܬܶܗ܇ ܘܨܶܐܕܰܝܟܝ ܐܶܫܟܰܚܬܶܗ܆ ܘܰܛܥܺܝܢܰܬܝ ܠܶܗ: ܠܰܛܥܺܝܢ ܒܶܪ̈ܝܳܬܳܐ܀

ܫܽܘܒܚܳܐ: ܟܰܕ ܕܶܝܢ ܫܶܡܥܰܬ܇ ܡܰܪܝܰܡ ܠܰܫܠܳܡܳܐ ܕܪܺܝܫ ܡܰܠܰܐܟ̈ܶܐ: ܕܣܰܒܪܳܗ̇ ܥܰܠ ܒܰܛܢܳܐ. ܥܢܳܬ ܘܶܐܡܪܰܬ ܠܶܗ. ܒܬܽܘܠܬܳܐ ܠܡܰܠܰܐܟܳܐ: ܕܰܐܝܟܰܢ ܬܶܗܘܶܐ: ܗܳܕܶܐ ܕܣܰܒܰܪܬܳܢܝ܀