ܕܪܰܡܫܳܐ

ܥܶܢܝܳܢܳܐ ܕܪܰܚܶܡܥܠܰܝ
ܩܳܠܳܐ ܒܩ̄: ܚܛܺܝܬ ܠܳܟ ܚܳܐܶܢ

ܒܗܳܢܳܐ ܥܺܐܕܳܐ ܩܰܕܺܝܫܳܐ܆ ܚܰܘܳܐ ܬܶܚܕܶܐ: ܝܰܬܺܝܪ ܡܶܢ ܐܳܕܳܡ܆ ܡܳܪܝܳܐ ܡܳܪܶܐ ܟܽܠ ܪܰܚܶܡ ܥܠܰܝܢ܀

ܢܶܚܕܽܘܢ ܥܰܡ̱̈ܡܶܐ ܘܰܢܫܰܒܚܽܘܢ܆ ܒܗܳܢܳܐ ܝܰܘܡܳܐ: ܫܒܺܝܚܳܐ ܕܡܰܘܠܳܕܳܟ܆ ܡܳܪܝܳܐ ܡܳܪܶܐ ܟܽܠ ܪܰܚܶܡ ܥܠܰܝܢ܀

ܡܓܽܘ̈ܫܶܐ ܕܳܫ̈ܢܶܐ ܩܰܪܶܒܘ ܠܳܟ ܕܰܗܒܳܐ ܘܡܽܘܪܳܐ܆ ܘܰܠܒܽܘܢܬܳܐ ܕܟܺܝܬܳܐ܆ ܡܳܪܝܳܐ ܡܳܪܶܐ ܟܽܠ ܪܰܚܶܡ ܥܠܰܝܢ܀

ܡܰܬܠܳܟ ܫܠܶܝܡܽܘܢ ܐܶܬܦܰܫܰܩ܆ ܕܗܳܐ ܐܶܬܠܰܒܟܰܬ ܪܽܘܚܳܐ ܒܓܰܘ ܚܽܘ̈ܦܢܶܐ܆ ܡܳܪܝܳܐ ܡܳܪܶܐ ܟܽܠ ܪܰܚܶܡ ܥܠܰܝܢ܀

ܐܶܫܰܥܝܳܐ ܚܙܺܝ ܒܰܡܥܰܪܬܳܐ܆ ܠܥܰܡܰܢܽܘܐܶܝܠ ܕܰܟܪܺܝܟ ܥܰܙܪ̈ܽܘܪܶܐ܆ ܡܳܪܝܳܐ ܡܳܪܶܐ ܟܽܠ ܪܰܚܶܡ ܥܠܰܝܢ܀

ܒܪܺܝܟܽ ܗ̱ܘ ܕܚܰܕܺܝ ܒܝܽܘܡ ܝܰܠܕܶܗ܆ ܠܰܫܡܰܝ̈ܳܢܶܐ ܐܳܦ ܠܰܐܪ̈ܥܳܢܳܝܶܐ܆ ܡܳܪܝܳܐ ܡܳܪܶܐ ܟܽܠ ܪܰܚܶܡ ܥܠܰܝܢ܀

ܚܳܕܶܝܢ ܥܺܝܪ̈ܶܐ ܘܡܰܠܰܐܟ̈ܶܐ ܘܰܒܢܰܝ̈ܢܳܫܳܐ܆ ܒܝܰܘܡܳܐ ܕܡܰܘܠܳܕܳܟ܆ ܡܳܪܝܳܐ ܡܳܪܶܐ ܟܽܠ ܪܰܚܶܡ ܥܠܰܝܢ܀

ܒܪܺܝܟܽ ܗ̱ܘ ܐܰܒܳܐ ܕܝܰܗܒܳܟ ܠܰܢ܆ ܫܽܘܒܚܳܐ ܠܪ̈ܰܚܡܰܝܟ ܕܒܰܚܢܳܢܳܟ ܣܥܰܪܬܳܢ܆ ܡܳܪܝܳܐ ܡܳܪܶܐ ܟܽܠ ܪܰܚܶܡ ܥܠܰܝܢ܀

ܡܳܪܝܳܐ ܩܪܺܝܬܳܟ
ܩܳܠܳܐ ܒܩ̄: ܢܽܘܗܪܳܐ ܡܶܢ ܢܽܘܗܪܳܐ

ܝܰܘܡܳܢ ܡܰܠܰܐܟ̈ܶܐ܆ ܘܰܣܪ̈ܳܦܶܐ ܕܢܽܘܪܳܐ ܘܪܽܘܚܳܐ. ܟܪܺܝܟܺܝܢ ܠܽܐܘܪܝܳܐ ܒܒܶܝܬ ܠܚܶܡ܆ ܘܙܳܡܪܺܝܢ ܫܽܘܒܚܳܐ ܠܝܰܠܽܘܕܳܐ܆ ܬܰܘ ܟܽܠ ܥܰܡ̱̈ܡܺܝܢ܆ ܢܶܒܪܽܘܟ ܘܢܶܣܓܽܘܕ ܠܶܗ܀

ܟܺܐܦܳܐ ܗܳܝ ܕܰܚܙܳܐ܆ ܕܳܢܺܝܐܶܝܠ ܕܶܐܬܓܰܙܪܰܬ ܗ̱ܘܳܬ. ܡܶܢ ܛܽܘܪܳܐ ܕܠܳܐ ܒܺܐܝ̈ܕܰܝܳܐ܆ ܘܰܗܘܳܬ ܠܥܰܡܳܐ ܣܰܓܺܝܳܐܐ܆ ܬܰܘ ܟܽܠ ܥܰܡ̱̈ܡܺܝܢ܆ ܢܶܒܪܽܘܟ ܘܢܶܣܓܽܘܕ ܠܶܗ܀

ܝܰܘܡܳܢ ܐܶܬܺܝܠܶܕ܆ ܝܰܠܕܳܐ ܕܶܐܬܩܪܺܝ ܕܽܘܡܳܪܳܐ܆ ܕܽܘܡܳܪܰܐ ܗ̱ܘ ܓܶܝܪ ܒܰܫܪܳܪܳܐ܆ ܕܰܐܝܟ ܥܽܘܠܳܐ ܚܰܘܺܝ ܢܰܦܫܶܗ܆ ܬܰܘ ܟܽܠ ܥܰܡ̱̈ܡܺܝܢ܆ ܢܶܒܪܽܘܟ ܘܢܶܣܓܽܘܕ ܠܶܗ܀

ܡܫܺܝܚܳܐ ܐܰܠܳܗܳܐ܆ ܗܰܘ ܕܶܐܬܺܝܠܶܕ ܡܶܢ ܡܰܪܝܰܡ܆ ܘܰܗܘܳܐ ܥܽܘܠܳܐ ܐܰܝܟ ܕܰܨܒܳܐ܆ ܘܶܐܬܳܐ ܘܦܰܪܩܰܢ ܒܛܰܝܒܽܘܬܶܗ܆ ܬܰܘ ܟܽܠ ܥܰܡ̱̈ܡܺܝܢ܆ ܢܶܒܪܽܘܟ ܘܢܶܣܓܽܘܕ ܠܶܗ܀

ܫܽܘܒܚܳܐ

ܐܶܫܰܥܝܳܐ ܐܰܟܪܶܙ܆ ܕܗܳܐ ܒܬܽܘܠܬܳܐ ܒܳܛܢܳܐ ܘܝܳܠܕܳܐ܆ ܝܰܠܕܳܐ ܕܺܐܝܬܰܘܗ̱ܝ ܕܽܘܡܳܪܳܐ܆ ܘܡܶܬܩܪܶܐ ܫܡܶܗ ܥܰܡܰܢܽܘܐܶܝܠ܆ ܬܰܘ ܟܽܠ ܥܰܡ̱̈ܡܺܝܢ. ܢܶܒܪܽܘܟ ܘܢܶܣܓܽܘܕ ܠܶܗ܀

ܐ̱ܚܪܺܢܳܐ

ܩܳܠܳܐ ܒܩ̄: ܟܽܠܗܶܝܢ ܢܒܺܝܰܘ̈ܳܬܳܐ

ܒܗܳܢܳܐ ܝܰܘܡܳܐ ܫܶܠܡܰܬ ܡܶܠܬܶܗ ܕܡܺܝܟܳܐ܆ ܕܶܐܬܢܰܒܺܝ ܘܶܐܡܰܪ܆ ܕܡܶܢ ܐܳܦܰܪܬܳܐ ܢܶܦܽܘܩ ܫܰܠܺܝܛܳܐ܆ ܬܰܘ ܢܶܒܪܽܘܟ ܘܢܶܣܓܽܘܕ ܠܶܗ܀

ܒܗܳܢܳܐ ܝܰܘܡܳܐ ܢܚܶܬܘ ܗ̱ܘܰܘ ܥܺܝܪ̈ܰܝ ܪܰܘܡܳܐ܆ ܘܬܶܫܒܽܘܚܬܳܐ ܙܡܰܪܘ ܗ̱ܘܰܘ܆ ܒܰܡܥܰܪܬܳܐ ܘܰܐܙܥܶܩܘ ܘܶܐܡܰܪܘ܆ ܬܰܘ ܢܶܒܪܽܘܟ ܘܢܶܣܓܽܘܕ ܠܶܗ܀

ܫܽܘܒܚܳܐ

ܒܶܝܬ ܠܚܶܡ ܙܡܰܪܝ ܬܶܫܒܽܘܚܬܳܐ ܒܗܳܢܳܐ ܝܰܘܡܳܐ܆ ܐܳܦ ܢܳܨܪܰܬ ܫܰܒܰܚܝ ܘܰܐܘܕܳܝ܆ ܠܰܒܪܶܗ ܕܥܶܠܳܝܳܐ܆ ܕܶܐܬܳܐ ܘܦܰܪܩܰܢ ܡܶܢ ܛܽܘܥܝܰܝ܀

ܩܳܠܳܐ ܕܪܰܡܫܳܐ

ܩܳܠܳܐ ܒܩ̄: ܡܫܺܝܚܳܐ ܢܰܛܰܪܶܝܗ̇ ܠܥܺܕܬܳܟ
ܛܽܘܒܰܝܟܝ ܐܶܡܳܐ ܕܢܰܟܦܽܘܬܳܐ

ܒܪܺܝܟܽ ܗ̱ܘ ܝܰܠܕܳܐ ܕܕܽܘܡܳܪܳܐ܆ ܕܰܐܝܟ ܥܽܘܠܳܐ ܚܰܘܺܝ ܢܰܦܫܶܗ܆ ܘܒܶܐܣܟܺܝܡ ܐ̱ܢܳܫ̈ܳܐ ܐܶܬܚܰܫܰܚ܆ ܟܰܕ ܐܶܬܳܐ ܕܢܶܦܪܽܘܩ ܐ̱ܢܳܫ̈ܳܐ܆ ܘܥܰܡ ܝܰܠܽܘ̈ܕܶܐ ܡܫܰܦܶܦ ܗ̱ܘܳܐ܆ ܗܰܘ ܕܰܒܪܶܡܙܶܗ ܩܳܝ̈ܡܳܢ ܒܶܪ̈ܝܳܬܳܐ܆ ܘܰܫܠܶܐ ܘܫܰܬܺܝܩ ܐܰܝܟ ܫܰܒܪܳܐ܆ ܗܰܘ ܕܰܐܠܶܦ ܩܺܝܢܬܳܐ ܠܐ̱ܢܳܫ̈ܳܐ܆ ܫܽܘ݉ܒܚܳܐ ܠܡܽܘܟܳܟܶܗ ܕܰܟܡܳܐ ܬܰܚܬܺܝ ܪܰܒܽܘܬܶܗ܆ ܕܰܫܒܰܩ ܪܰܘܡܳܐ ܕܰܟܪ̈ܽܘܒܶܐ܆ ܘܰܨܒܳܐ ܒܪ̈ܰܚܡܰܘܗ̱ܝ ܘܰܒܥܰܙܪܽܘܪ̈ܶܐ ܐܶܬܟܰܪܰܟ܀

ܫܽܘܒܚܳܐ

ܝܰܘܡܳܢܳܐ ܫܪܶܐ ܒܰܡܥܰܪܬܳܐ܆ ܗܰܘ ܕܰܫܡܰܝܳܐ ܙܥܽܘܪܺܝܢ ܠܶܗ܆ ܘܰܒܥܰܙܪܽܘܪ̈ܶܐ ܐܶܬܟܰܪܰܟ܆ ܗܰܘ ܕܰܥܛܺܝܦ ܙܺܝܘܳܐ ܘܗܶܕܪܳܐ܆ ܘܥܰܠ ܒܽܘܪ̈ܟܶܐ ܗܳܐ ܡܶܙܕܰܝܰܚ܆ ܗܰܘ ܕܰܟܪ̈ܽܘܒܶܐ ܪܳܐܬܶܝܢ ܡܶܢ ܙܺܝܘܶܗ܆ ܘܚܰܠܒܳܐ ܫܺܝܛܳܐ ܝܺܢܶܩ ܗ̱ܘܳܐ܆ ܗܰܘ ܕܰܡܬܰܪܣܶܐ ܠܟܽܠܒܶܪ̈ܝܳܢ܆ ܫܽܘ݉ܒܚܳܐ ܠܪܰܒܽܘܬܶܗ ܕܰܨܒܳܐ ܘܶܐܬܬܰܚܬܺܝ ܨܶܐܕܰܝܢ܆ ܘܡܶܛܽܠ ܕܰܗܘܳܐ ܒܰܪܢܳܫܳܐ܆ ܟܽܠܗܶܝܢ ܕܺܝܠܰܢ ܡܣܰܝܒܰܪ܆ ܗ̱ܘܳܐ ܡܶܛܽܠ ܚܽܘܒܶܗ܀

ܡܶܢ ܥܳܠܰܡ

ܪܳܥܶܡ ܩܳܠܶܗ ܕܫܺܝܦܽܘܪܳܐ܆ ܘܫܳܪܶܐ ܠܗܶܝܢ ܠܶܐܣܰܝ̈ ܬܺܒܶܝܠ. ܘܰܫܡܰܝ̈ܳܐ ܕܰܠܥܶܠ ܡܶܢܰܢ܆ ܒܰܕܡܽܘܬ ܡܓܰܠܬܳܐ ܡܶܬܟܰܪܟܳܐ. ܘܢܰܗܺܝܪ̈ܶܐ ܕܰܣܕܺܝܪܺܝܢ ܒܳܗ̇ ܢܳܬܪܺܝܢ ܟܽܠܗܽܘܢ: ܒܰܕܡܽܘܬ ܗܰܒ̈ܳܒܶܐ. ܘܙܳܥܶܩ ܒܳܗ̇ ܒܰܪ ܐܰ‌ܠܳܗܳܐ: ܒܓܰܘ ܫܝܽܘܠ ܘܰܡܣܰܚܶܦ ܠܳܗ̇. ܘܓܳܣܝܳܐ ܠܰܫ̈ܠܰܕܶܐ܆ ܕܶܐܬܬܣܺܝ̈ܡܝ ܒܳܗ̇ ܡ̣ܶܢ ܫܽܘܪܳܝܳܐ܆ ܘܢܳܫܒܳܐ ܒܗܽܘܢ ܪܽܘܚ ܢܽܘܚܳܡܳܐ. ܘܬܽܘܒ ܘܰܠܥܳܠܰܡ܆ ܡܰܘܬܳܐ ܒܗܽܘܢ ܠܳܐ ܡܶܫܬܰܠܰܛ܀

ܐ̱ܚܪܺܢܳܐ

ܩܳܠܳܐ ܒܩ̄: ܛܽܘܒܰܝܟܝ ܥܺܕܬܳܐ
ܒܪܺܝܟܽ ܗ̱ܘ ܡܫܺܝܚܳܐ ܕܰܓܒܳܟܝ ܡܰܪܝܰܡ ܒܰܪ̱ܬ ܕܰܘܺܝܕ

ܡܰܢ ܠܳܐ ܢܶܬܗܰܪ܆ ܘܢܶܬܶܠ ܫܽܘܒܚܳܐ ܠܰܐܠܳܗܳܐ܆ ܕܟܰܕ ܒܪܰܘܡܳܐ ܫܪܶܐ ܐܺܝܩܳܪܶܗ܆ ܘܡܶܢ ܠܘܳܬ ܐܰܒܽܘܗ̱ܝ ܠܳܐ ܫܰܢܺܝ܆ ܒܬܽܘܠܬܳܐ ܡܰܪܝܰܡ ܒܒܶܝܬ ܠܚܶܡ܆ ܝܺܠܶܕܬܶܗ ܕܠܳܐ ܙܽܘܘܳܓܳܐ܆ ܘܥܶܠܳܝ̈ܶܐ ܕܰܐܪܓܶܫܘ ܗ̱ܘܰܘ ܒܶܗ܆ ܕܨܶܝܕ ܐܰܪ̈ܥܳܢܶܐ ܐܶܬܬܰܚܬܺܝ܆ ܟܢܰܫܘ ܓܽܘ̈ܕܺܝܢ ܓܽܘ̈ܕܺܝܢ ܘܰܙܡܰܪܘ܆ ܫܽܘܒܚܳܐ ܒܪܰܘܡܳܐ ܘܰܒܥܽܘܡܩܳܐ܀

ܫܽܘܒܚܳܐ

ܗܳܢܰܘ ܬܶܗܪܳܐ܆ ܕܟܰܕ ܐܰܠܳܗܰܐ ܗ̱ܘ ܒܰܟܝܳܢܶܗ܆ ܢܚܶܬ ܘܶܐܬܓܰܫܰܡ ܡܶܢ ܡܰܪܝܰܡ܆ ܘܰܗܘܳܐ ܥܽܘܠܳܐ ܒܨܶܒܝܳܢܶܗ܆ ܘܺܝܠܶܕܬܶܗ ܦܰܓܪܳܢܳܐܺܝܬ܆ ܘܰܒܥܰܙܪܽܘܪ̈ܶܐ ܐܶܬܟܰܪܰܟ܆ ܗܰܘ ܕܰܡܥܰܛܰܦ ܙܰܠܺܝ̈ܩܶܐ܆ ܘܠܳܐ ܐܶܣܬܰܝܰܟ ܡܶܢ ܥܺܝܪ̈ܶܐ܆ ܫܽܘܒܚܳܐ ܠܶܗ ܕܰܒܝܽܘܡ ܝܰܠܕܶܗ܆ ܝܰܗ̱ܒ ܠܳܗ̇ ܠܥܺܕܬܶܗ ܪܽܘܡܪܳܡܳܐ܀

ܡܶܢ ܥܳܠܰܡ

ܛܰܠܳܐ ܕܚܰܝ̈ܶܐ܆ ܗܰܘ ܕܶܐܫܬܰܕܰܪ ܡ̣ܶܢ ܐܰܒܳܐ. ܘܪܰܣܶܣ ܐܶܢܽܘܢ ܠܰܛܠܳܝ̈ܶܐ. ܒܓܰܘ ܐܰܬܽܘܢܳܐ ܕܒܳܒܠܳܝ̈ܶܐ. ܗ̣ܽܘ ܢܰܛܶܠ ܥܰܠ ܥܰܢܺܝ̈ܕܶܐ. ܒܬܰܐܘ̈ܳܢܶܐ ܟܡܺܝ̣ܪ̈ܶܐ ܕܰܫܝܽܘܠ. ܘܰܢܚܰܣܶܐ ܒܽܘܨܳܪ̈ܰܝܗܽܘܢ. ܕܥܰܒܕܰܘ̈ܗ̱ܝ ܕܰܫܟܶܒܘ ܥܰܠ ܣܰܒܪܶܗ. ܘܢܰܘܪܶܬ ܐܶܢܽܘܢ ܡܰܠܟܽܘܬܳܐ܆ ܕܠܳܐ ܥܳܒܪܳܐ ܘܠܳܐ ܡܶܫܬܰܪܝܳܐ܀

ܩܕܳܡ ܐܶܘܰܢܓܶܠܝܳܘܢ

ܬܶܫܒܽܘܚܬܳܐ ܘܗܶܕܪܳܐ ܘܪܽܘܡܪܳܡܳܐ ܡܕܰܫܢܺܝܢܰܢ ܠܓܰܐܝܳܐ ܘܓܰܢ̱ܒܳܪܳܐ ܘܬܰܩܺܝܦ ܥܽܘܫܢܳܐ. ܥܰܠ ܦܽܘܪܩܳܢܳܐ ܘܙܳܟ̣ܽܘܬ̣ܳܐ ܕܥܰܡܳܟ ܝܺܣܪܳܐܶܝܠ܀

ܟܰܕ ܡܥܰܢܝܳܐ ܡܰܪܝܰܡ. ܒܰܦܠܰܓ̈ܶܐ. ܘܒܰܪ̈ܒܺܝܥܶܐ. ܠܝܰܗ ܡܳܪܝܳܐ܀

ܗܰܠܶܠܘ̱ ܗܰܠܶܠܘ̱ ܗܰܠܶܠܽܘܢܳܝܗܝ. ܠܺܐܝܠ ܬܰܩܺܝܦܳܐ. ܕܶܐܬ̣ܳܐ ܠܝܰܠܕܳܐ܀

ܫܰܒܰܚܘ̱ ܫܰܒܰܚܘ̱ ܫܰܒܰܚܽܘܢܳܝܗܝ. ܠܺܐܝܠ ܥܰܫܺܝܢܳܐ. ܕܶܐܬ̣ܳܐ ܠܝܰܠܕܳܐ܀

ܙܰܡܰܪܘ̱ ܙܰܡܰܪܘ̱ ܙܰܡܰܪܽܘܢܳܝܗܝ. ܠܺܐܝܠ ܥܰܙܺܝܙܳܐ. ܕܶܐܬ̣ܳܐ ܠܝܰܠܕܳܐ܀

ܡܶܛܽܠ ܕܰܡܫܰܒܚܳܐ ܐܺܝܬ̣ܰܘܗ̱ܝ܀

ܦܶܬܓܳܡܳܐ: ܡܳܪܝܳܐ ܐܶܡܰܪ ܠܺܝ ܕܒܶܪܝ ܐܰܢ̱ܬ܆ ܘܶܐܢܳܐ ܝܰܘܡܳܢܳܐ ܝܺܠܶܕܬܳܟ ܗܰܠܶܠܽܘܝܰܗ܀

ܒܳܬܰܪ ܐܶܘܰܢܓܶܠܺܝܳܘܢ: ܬܶܫܡܶܫܬܳܐ ܕܥܰܢܺܝ̈ܕܶܐ

ܒܳܥܽܘܬܳܐ ܕܡܳܪܝ ܝܰܥܩܽܘܒ
ܩܽܘܡ ܝܰܡܠܺܝܟܳܐ ܥܽܘܠ ܠܰܡܕܺܝܢ̱ܬܳܐ

ܗܰܠܶܠܘ ܗܰܠܶܠܘ ܗܰܠܶܠܘ ܘܶܐܡܰܪܘ ܗܰܠܶܠܽܘܝܰܗ܆

ܐܰܟܡܳܐ ܕܗܰܠܠܽܘܗ̱ܝ ܪ̈ܳܥܰܘܳܬܳܐ ܒܓܰܘ ܒܶܝܬ ܠܚܶܡ܀

ܐܳܘ ܚܰܟܺܝܡܳܐ ܬܳܐ ܚܙܺܝ ܥܽܘܠܳܐ ܒܓܰܘ ܥܰܙܪܽܘܪ̈ܶܐ܆ ܘܶܐܬܕܰܡܰܪ ܒܶܗ ܕܟܽܠܳܗ̇ ܒܪܺܝܬܳܐ ܒܪܶܡܙܶܗ ܬܰܠܝܳܐ܆ ܐܶܬܒܰܩܳܐ ܒܶܗ ܟܰܕ ܣܺܝܡ ܒܽܐܘܪܝܳܐ ܒܓܰܘ ܐܳܦܰܪܬܳܐ ܆ ܘܗܽܘܝܽܘ ܡܕܰܒܰܪ ܪܰܘܡܳܐ ܘܥܽܘܡܩܳܐ ܥܰܡ ܝܳܠܽܘܕܶܗ܀

ܟܰܕ ܝܳܗܒܳܐ ܠܶܗ ܛܠܺܝܬܳܐ ܚܰܠܒܳܐ ܐܰܝܟ ܕܰܠܫܰܒܪܳܐ܆ ܕܗܽܘ ܝܳܗܶܒ ܗ̱ܘܳܐ ܡܶܛܪܳܐ ܘܛܰܠܳܐ ܠܙܰܪ̈ܥܶܐ ܕܰܐܪܥܳܐ܆ ܐܶܢܗܽܘ ܕܺܐܝܬ ܒܳܟ ܢܰܦܫܳܐ ܕܡܰܠܝܳܐ ܗܰܝܡܳܢܽܘܬܳܐ܆ ܐܰܛܺܝܪ ܗܰܘܢܳܟ ܘܰܚܙܺܝ ܕܟܽܠܶܗ ܠܥܶܠܽ ܗ̱ܘ ܘܰܠܬܰܚܬ܀

ܙܰܡܰܪܘ ܙܰܡܰܪܘ ܙܰܡܰܪܘ ܘܶܐܡܰܪܘ ܗܰܠܶܠܽܘܝܰܗ܆

ܐܰܟܡܳܐ ܕܙܰܡܪܽܘܗ̱ܝ ܪ̈ܳܥܰܘܳܬܳܐ ܒܓܰܘ ܒܶܝܬ ܠܚܶܡ܀