ܕܰܬܠܳܬܫܳܥܺܝ̈ܢ

ܩܳܠܳܐ ܒܩ̄: ܒܓܰܘ ܡܰܫܟܰܢܙܰܒܢܳܐ
ܩܳܠܗܶܝܢ ܕܢܰܦ̈ܫܳܬܳܐ (ܣܳܠܶܩ: ܒܗܰܒܠܳܗ̇ ܠܥܺܕܬܳܟ)

ܐ̱ܡܰܪ ܠܰܢ ܐܶܫܰܥܝܳܐ܆ ܘܒܰܕܶܩ ܠܰܢ ܐܳܘ ܒܰܪ ܐܰܡܽܘܨ܆ ܕܡܳܢܰܘ ܒܰܛܢܳܗ̇ ܕܰܒܬܽܘܠܬܳܐ܆ ܐܺܝܬܰܘܗ̱ܝ ܐܰܠܳܗܳܐ܆ ܕܡܶܢ ܐܰܠܳܗܳܐ ܫܰܪܺܝܪܳܐ ܘܥܰܡܰܢܽܘܐܶܝܠ ܐܺܝܬܰܘܗ̱ܝ ܫܡܶܗ܆ ܗ̄ ܕܺܐܝܬܰܘܗ̱ܝ ܥܰܡܰܢ ܐܰܠܳܗܰܢ ܝܶܫܽܘܥ ܦܳܪܽܘܩܶܗ ܕܥܳܠܡܳܐ܀

ܫܽܘܒܚܳܐ

ܫܽܘܒܚܳܐ ܠܗܰܘ ܚܰܝܠܳܐ܆ ܕܰܫܒܰܩ ܚܰܨܳܐ ܕܰܟܪ̈ܽܘܒܶܐ ܘܰܢܚܶܬ ܘܰܫܪܳܐ ܒܰܒܬܽܘܠܬܳܐ܆ ܥܰܠ ܠܳܗ̇ ܐܰܠܳܗܳܐ܆ ܢܦܰܩ ܡܶܢܳܗ̇ ܐܰܠܳܗ ܒܰܪܢܳܫ ܬܰܘ ܥܰܡ̱̈ܡܶܐ ܙܡܰܪܘ ܠܶܗ ܫܽܘܒܚܳܐ܆ ܗ̄ ܒܪܺܝܟܽ ܗ̱ܘ ܕܰܐܪܟܶܢ ܪܰܒܽܘܬܶܗ ܘܰܗܘܳܐ ܐ̱ܢܳܫܳܐ ܕܰܫܦܰܪ ܠܶܗ܀

ܒܳܥܽܘܬܳܐ ܕܡܳܪܝ ܐܰܦܪܶܝܡ
ܫܽܘܒܚܳܐ ܠܳܟ ܒܽܘܟܪܶܗ ܕܰܐܒܳܐ

ܡܳܪܰܢ ܐܶܬܪܰܚܰܡ ܥܠܰܝܢ ܒܪܳܐ ܕܰܒܝܰܠܕܶܗ ܚܰܪܰܪ ܠܰܢ܆

ܡܫܺܝܚܳܐ ܕܰܒܝܰܠܕܶܗ ܦܰܪܩܰܢ ܚܰܣܳܐ ܠܰܢ ܘܰܠܥܰܢܺܝ̈ܕܰܝܢ܀

ܣܳܒܳܐ ܥܰܬܺܝܩ ܝܰܘ̈ܡܳܬܳܐ܆ ܗܰܘ ܕܰܚܙܳܝܗ̱ܝ ܗ̱ܘܳܐ ܕܳܢܺܝܐܶܝܠ܆ ܗܘܳܐ ܥܽܘܠܳܐ ܘܰܠܒܶܫ ܦܰܓܪܳܐ܆ ܘܶܐܬܺܝܠܶܕ ܕܢܶܦܪܽܘܩ ܠܳܐܕܳܡ܆ ܕܰܣܐܶܒ ܘܰܒܠܺܝ ܒܰܚܛܺܝܬܳܐ܆ ܘܰܐܫܚܶܬ ܒܚܶܙܶܝ̈ܗ̇ ܕܓܺܗܰܢܳܐ܀

ܥܒܰܕ ܡܰܘܠܳܕܶܗ ܒܓܰܘ ܐܽܘܪܝܳܐ܆ ܕܽܐܘܪܝܳܐ ܐܰܪܺܝܟ ܐܰܝܟ ܩܰܒܪܳܐ܆ ܘܰܒܗܳܕܶܐ ܫܰܘܕܰܥ ܕܡܳܐܶܬ܆ ܕܠܰܢ ܢܰܚܶܐ ܡܶܢ ܡܺܝܬܽܘܬܳܐ܆ ܒܪܺܝܟ ܡܰܘܠܳܕܶܗ ܕܰܐܦܨܰܚ ܠܰܢ܆ ܘܰܒܪܺܝܟ ܡܰܘܬܶܗ ܕܰܐܚܺܝ ܠܰܢ܀

ܡܳܪܰܢ ܐܶܬܪܰܚܰܡ ܥܠܰܝܢ ܒܪܳܐ ܕܰܒܝܰܠܕܶܗ ܚܰܪܰܪ ܠܰܢ܆

ܡܫܺܝܚܳܐ ܕܰܒܝܰܠܕܶܗ ܦܰܪܩܰܢ ܚܰܣܳܐ ܠܰܢ ܘܰܠܥܰܢܺܝ̈ܕܰܝܢ܀

ܫܠܶܡ ܛܶܟܣܳܐ ܕܚܰܕ ܒܫܰܒܳܐ ܕܰܩܕܳܡ ܝܰܠܕܳܐ