ܕܨܰܦܪܳܐ

ܥܶܢܝܳܢܳܐ ܕܪܰܚܶܡܥܠܰܝ
ܩܳܠܳܐ ܒܩ̄: ܒܕܽܘܟܪܳܢ ܝܳܠܶܕܬܳܟ

ܗܰܘ ܕܡܶܢ ܡܓܽܘ̈ܫܶܐ ܩܽܘܪ̈ܒܳܢܶܐ ܩܰܒܶܠ܆ ܟܰܕ ܗܽܘ ܐܺܝܬܰܘܗ̱ܝ ܐܰܠܳܗܳܐ ܕܥܰܠ ܟܽܠ܆ ܕܡܰܡܠܶܟ ܫܽܘܠܛܳܢܶܗ ܥܰܠ ܟܽܠ܆ ܒܶܪ̈ܝܳܬܳܐ ܠܥܳܠܰܡ ܥܳܠܡܺܝܢ܀

ܥܰܬܺܝܩ ܝܰܘ̈ܡܶܐ ܕܕܳܢܺܝܐܶܝܠ ܚܙܳܝܗ̱ܝ ܗ̱ܘܳܐ܆ ܗܽܘܝܽܘ ܕܰܕܢܰܚ ܡܶܢ ܒܬܽܘܠܬܳܐ ܡܰܪܝܰܡ܆ ܛܽܘܪܳܐ ܩܰܕܺܝܫܳܐ ܕܡܶܢܶܗ܆ ܐܶܬܓܰܙܪܰܬ ܟܺܐܦܳܐ ܒܚܺܝܪܬܳܐ܀

ܗܰܘ ܕܡܶܢ ܡܓܽܘ̈ܫܶܐ ܒܩܽܘܪ̈ܒܳܢܶܐ ܐܶܣܬܓܶܕ܆ ܘܪ̈ܳܥܰܘܳܬܳܐ ܒܰܡܥܰܪܬܳܐ ܫܰܒܚܽܘܗ̱ܝ܆ ܟܰܕ ܡܶܢ ܡܰܠܰܐܟ̈ܶܐ ܒܪܰܘܡܳܐ܆ ܡܶܫܬܰܒܰܚ ܐܰܠܳܗܳܐܺܝܬ܀

ܝܰܘܡܳܢ ܝܺܠܺܝܕ ܝܰܠܕܳܐ ܕܕܽܘܡܳܪܳܐ܆ ܒܒܶܝܬ ܠܚܶܡ ܕܺܝܗܽܘܕܳܐ ܐܰܝܟ ܕܰܢܒܺܝ̈ܶܐ ܙܡܰܪܘ܆ ܘܰܒܝܰܕ ܡܰܘܠܳܕܶܗ ܦܰܫܶܩ܆ ܐ̱ܪ̈ܳܙܰܝܗܽܘܢ ܐܳܦ ܦ̈ܶܠܳܐܬܗܽܘܢ܀

ܗܰܘ ܕܡܶܢ ܥܺܝܪ̈ܶܐ ܒܪܰܘܡܳܐ ܡܶܫܬܰܒܰܚ܆ ܘܪ̈ܳܥܰܘܳܬܳܐ ܒܰܡܥܰܪܬܳܐ ܫܰܒܚܽܘܗ̱ܝ܆ ܘܡܰܠܰܐܟ̈ܶܐ ܢܚܶܬܘ ܗ̱ܘܰܘ ܘܣܰܒܰܪܘ܆ ܡܰܘܠܳܕܶܗ ܕܡܶܢ ܒܰܪ̱ܬ ܕܰܘܺܝܕ܀

ܗܰܘ ܕܶܐܬܺܝܠܶܕ ܡܶܢ ܒܬܽܘܠܬܳܐ ܡܰܪܝܰܡ܆ ܘܥܽܘܠܳܐ ܗܘܳܐ ܗ̱ܘܳܐ ܒܒܶܝܬ ܠܚܶܡ ܕܺܝܗܘܕܳܐ܆ ܘܥܰܡ ܫܰܒܪ̈ܶܐ ܫܰܦܶܦ ܨܶܡܚܳܐ܆ ܡܬܽܘܡܳܝܳܐ ܠܶܗ ܬܶܫܒܽܘܚܬܳܐ܀

ܐܰܠܳܗܝ ܐܰܠܳܗܝ
ܩܳܠܳܐ ܒܩ̄: ܗܰܘ ܕܩܳܡ ܡܶܢ ܒܶܝܬ

ܗܰܘ ܕܶܐܬܳܐ ܠܡܰܘܠܳܕܳܐ: ܘܰܗܘܳܐ ܥܽܘܠܳܐ ܒܨܶܒܝܳܢܶܗ: ܘܥܰܡ ܫܰܒܪ̈ܶܐ ܕܨܶܗܝܽܘܢ ܫܰܦܶܦ: ܥܰܡ̱̈ܡܶܐ ܡܗܰܝ̈ܡܢܶܐ ܫܰܒܚܽܘܗ̱ܝ ܐܰܟܚܕܳܐ ܠܥܳܠܰܡ ܥܳܠܡܺܝܢ܀

ܗܰܘ ܕܺܝܠܶܕܬܶܗ ܡܰܪܝܰܡ: ܒܓܰܘ ܒܶܝܬ ܠܚܶܡ ܕܺܝܗܽܘܕܳܐ: ܡܰܠܰܐܟ̈ܶܐ ܢܚܶܬܘ ܠܺܐܝܩܳܪܶܗ: ܘܰܙܡܰܪܘ ܠܶܗ ܫܽܘܒܚܳܐ ܚܕܰܬܳܐ ܐܰܟܚܕܳܐ ܠܥܳܠܰܡ ܥܳܠܡܺܝܢ܀

ܗܰܘ ܕܚܰܕܺܝ ܗ̱ܘܳܐ ܒܡܰܘܠܳܕܶܗ: ܠܥܶܠܳܝ̈ܶܐ ܘܰܠ̈ܬܰܚܬܳܝܶܐ: ܘܚܰܝܶܕ ܗ̱ܘܳܐ ܠܓܰܒ̈ܶܐ ܬܪ̈ܰܝܗܽܘܢ: ܘܡܰܠܺܝ ܠܟܽܠ ܫܰܝܢܳܐ ܘܰܫܠܳܡܳܐ ܐܰܟܚܕܳܐ ܠܥܳܠܰܡ ܥܳܠܡܺܝܢ܀

ܗܰܘ ܝܰܠܕܳܐ ܡܬܽܘܡܳܝܳܐ: ܘܒܰܪ ܐܺܝܬܽܘܬܳܐ ܕܝܳܠܽܘܕܶܗ: ܢܰܨܰܪܬܶܗ ܒܬܽܘܠܬܳܐ ܡܰܪܝܰܡ: ܘܣܶܓܕܰܬ ܠܶܗ ܟܰܕ ܡܶܫܬܰܒܰܚ ܐܰܟܚܕܳܐ ܠܥܳܠܰܡ ܥܳܠܡܺܝܢ܀

ܐ̱ܚܪܺܢܳܐ

ܩܳܠܳܐ ܒܩ̄: ܠܰܝܬ ܕܩܰܕܺܝܫ ܐܰܟܘܳܬܳܟ

ܟܰܕ ܟܣܶܦ ܪܺܝܫܳܐ ܠܒܶܝܬ ܩܶܣܰܪ܆ ܝܳܗܒܺܝܢ ܗ̱ܘܰܘ ܥܶܒܪ̈ܳܝܶܐ܆ ܐܰܝܟ ܢܳܡܽܘܣܳܐ ܕܺܐܝܬ ܗ̱ܘܳܐ ܠܗܽܘܢ܆ ܣܠܶܩ ܝܰܘܣܶܦ ܪܺܝܫ ܢܰܓܳܪ̈ܶܐ܆ ܠܰܡܕܺܝܢ̱ܬܳܐ ܕܕܰܘܺܝܕ ܐܰܒܽܘܗ̱ܝ܆ ܘܰܒܬܽܘܠܬܳܐ ܡܰܪܝܰܡ ܥܰܡܶܗ܆ ܘܰܡܚܰܐܽܘܗ̇ ܚܶܒ̈ܠܶܐ ܕܝܰܠܕܳܐ܀

ܡܢܰܨܪܳܐ ܗ̱ܘܳܬ ܗܺܝ ܒܰܪ̱ܬ ܕܰܘܺܝܕ܆ ܠܰܒܪܳܗ̇ ܟܰܕ ܐܳܡܪܳܐ ܠܶܗ܆ ܛܽܘܒܰܝ ܡܳܪܝ ܕܰܗܘܺܝܬ ܐܶܡܳܟ܆ ܛܽܘܒܰܝ ܕܰܐܝܢܶܩܬܳܟ ܚܰܠܒܳܐ܆ ܘܛܽܘܒܰܝ ܕܥܰܦܩܶܬ ܒܰܕܪ̈ܳܥܰܝ܆ ܠܗܰܘ ܕܰܫܡܰܝ̈ܳܐ ܙܥܽܘܪܺܝܢ ܠܶܗ܆ ܘܝܰܡ̱̈ܡܶܐ ܚܒܺܝܫܺܝܢ ܒܰܙܘܳܪܶܗ܀

ܫܡܰܝ̈ܳܐ ܡܶܫܬܰܥܶܝܢ
ܩܳܠܳܐ ܒܩ̄: ܫܡܰܝ̈ܳܐ ܡܕܺܝܢ̱ܬܳܐ ܕܡܰܠܰܐܟ̈ܶܐ

ܒܡܰܘܠܳܕܶܗ ܕܡܰܠܟܳܐ ܡܫܺܝܚܳܐ܆ ܚܳܕܶܝܢ ܥܺܝܪ̈ܶܐ ܘܡܰܠܰܐܟ̈ܶܐ܆ ܘܪܳܘܙܺܝܢ ܒܰܐܪܥܳܐ ܐܰܪ̈ܥܳܢܶܐ܆ ܕܰܒܝܰܠܕܶܗ ܐܰܦܨܰܚ ܐܶܢܽܘܢ܀

ܟܶܢ̈ܫܶܐ ܕܥܺܝܪ̈ܶܐ ܛܳܣܘ ܘܰܢܚܶܬܘ܆ ܒܚܰܕܘܳܐ ܪܰܒܳܐ ܡܶܢ ܪܰܘܡܳܐ܆ ܘܰܣܒܰܪܬܳܐ ܛܳܒܬܳܐ ܐܰܟܪܶܙܘ܆ ܕܰܕܢܰܚ ܡܳܪܰܢ ܒܒܶܝܬ ܠܚܶܡ܀

ܣܳܦܪ̈ܶܐ ܩܳܪܶܝܢ ܗ̱ܘܰܘ ܟܽܠ ܝܽܘܡ܆ ܕܡܶܢ ܝܰܥܩܽܘܒ ܕܳܢܰܚ ܟܰܘܟܒܳܐ܆ ܠܥܰܡܳܐ ܩܳܠܳܐ ܘܩܶܪܝܳܢܳܐ܆ ܠܥܰܡ̱̈ܡܶܐ ܕܶܢܚܳܐ ܘܦܽܘܫܳܩܳܐ܀

ܕܰܗܒܳܐ ܘܡܽܘܪܳܐ ܘܰܠܒܽܘܢܬܳܐ܆ ܐܰܝܬܺܝܘ ܡܓܽܘܫܶܐ ܡܶܢ ܦܳܪܶܣ܆ ܘܥܰܠܘ ܘܰܣܓܶܕܘ ܠܶܗ ܒܰܡܥܰܪܬܳܐ܆ ܠܰܐܠܳܗܳܐ ܕܝܶܠܕܰܬ ܡܰܪܝܰܡ܀

ܝܰܘܡܳܢ ܒܽܐܘܪܝܳܐ ܓܢܶܐ ܡܰܠܟܳܐ܆ ܒܓܰܘ ܒܶܝܬ ܠܚܶܡ ܕܺܝܗܽܘܕܳܐ܆ ܘܰܡܓܽܘ̈ܫܶܐ ܒܩܽܘܪ̈ܒܳܢܰܝܗܽܘܢ܆ ܣܶܓܕܬܳܐ ܩܰܪܶܒܘ ܠܺܐܝܩܳܪܶܗ܀

ܒܗܳܢܳܐ ܝܰܘܡܳܐ ܚܳܕ̈ܝܳܢ ܒܶܗ܆ ܥܺܕ̈ܳܬܳܐ ܥܰܡ ܕܰܝܪ̈ܳܬܳܐ܆ ܘܙܳܡܪ̈ܳܢ ܫܽܘܒܚܳܐ ܘܬܰܘܕܺܝܬܳܐ܆ ܠܗܰܘ ܦܳܪܩܳܐ ܕܰܦܪܰܩ ܐܶܢܶܝܢ܀

ܒܪܺܝܟܽ ܗ̱ܘ ܕܰܓܢܺܝܙ ܘܰܡܥܰܠܰܝ܆ ܒܺܐܝܬܽܘܬܶܗ ܐܰܠܳܗܳܝܬܳܐ܆ ܫܽܘܒܚܳܐ ܠܶܗ ܕܡܶܛܽܠܳܬܰܢ܆ ܐܶܬܺܝܠܶܕ ܡܶܢ ܒܰܪ̱ܬ ܕܰܘܺܝܕ܀

ܬܒܰܪܟܳܟ ܢܰܦܫܝ ܥܰܕܠܳܐ ܬܡܽܘܬ܆ ܒܗܳܢܳܐ ܥܺܐܕܳܐ ܕܡܰܘܠܳܕܳܟ܆ ܘܥܰܡ ܥܺܝܪ̈ܶܐ ܐܶܩܥܶܐ ܘܺܐܡܰܪ܆ ܫܽܘܒܚܳܐ ܠܰܐܠܳܗܳܐ ܒܪܰܘܡܳܐ܀

ܬܶܫܒܽܘܚܬܳܐ ܚܕܰܬܳܐ
ܩܳܠܳܐ ܒܩ̄: ܐܰܢ̱ܬ ܕܰܒܪܺܝܫܺܝܬ ܠܰܫܡܰܝܳܐ

ܡܰܠܟܳܐ ܡܫܺܝܚܳܐ: ܐܶܬܺܝܠܶܕ ܡܶܢ ܒܰܪ̱ܬ ܕܰܘܺܝܕ: ܘܶܐܬܬܣܺܝܡ ܒܽܐܘܪܝܳܐ: ܘܺܝܢܶܩ ܚܰܠܒܳܐ ܐܰܝܟ ܫܰܒܪܳܐ: ܡܒܰܪܟܳܐ ܓܶܝܪ ܐܺܝܬܰܝܟ: ܡܳܪܝܳܐ ܐܰܠܳܗܳܐ ܡܩܺܝܡܳܢܳܐ ܕܡܰܦܽܘܠܬܰܢ܀

ܒܬܽܘܠܬܳܐ ܡܰܪܝܰܡ: ܝܶܠܕܰܬ ܝܰܠܕܳܐ ܕܕܽܘܡܳܪܳܐ: ܐܰܝܟ ܕܰܐܟܪܶܙ ܠܰܢ: ܐܶܫܰܥܝܳܐ ܒܰܢܒܺܝܽܘܬܶܗ: ܡܒܰܪܟܳܐ ܓܶܝܪ ܐܺܝܬܰܝܟ: ܡܳܪܝܳܐ ܐܰܠܳܗܳܐ ܡܩܺܝܡܳܢܳܐ ܕܡܰܦܽܘܠܬܰܢ܀

ܗܰܘ ܕܶܐܬܺܝܠܶܕ: ܡܶܢ ܐܰܒܳܐ ܕܠܳܐ ܫܽܘܪܳܝܳܐ: ܗܽܘ ܡܶܢ ܡܰܪܝܰܡ: ܐܶܬܺܝܠܶܕ ܦܰܓܪܳܢܳܐܺܝܬ: ܡܒܰܪܟܳܐ ܓܶܝܪ ܐܺܝܬܰܝܟ: ܡܳܪܝܳܐ ܐܰܠܳܗܳܐ ܡܩܺܝܡܳܢܳܐ ܕܡܰܦܽܘܠܬܰܢ܀

ܐ̱ܚܪܺܢܳܐ

ܩܳܠܳܐ ܒܩ̄: ܒܰܩܝܳܡܬܶܗ ܕܡܰܠܟܳܐ ܡܫܺܝܚܳܐ

ܡܰܪܝܰܡ ܡܢܰܨܪܳܐ ܠܰܪܚܽܘܡܳܗ̇܆ ܘܣܶܕܪ̈ܶܐ ܥܶܠܳܝ̈ܶܐ ܠܰܫܠܳܡܶܗ ܢܚܶܬܘ ܗ̱ܘܰܘ܆ ܩܳܡܘ ܨܳܝܬܺܝܢ ܠܳܗ̇ ܢܽܘܪ̈ܳܢܶܐ܆ ܕܡܳܢܳܐ ܐܳܡܪܳܐ ܠܚܰܒܺܝܒܳܗ̇܆ ܡܢܰܨܪܳܐ ܠܶܗ ܘܳܐܡܪܳܐ܆ ܫܰܒܚܽܘܗ̱ܝ ܘܪܰܡܪܡܽܘܗ̱ܝ ܠܥܳܠܰܡ ܥܳܠܡܺܝܢ܀

ܠܓܽܘܪܝܳܐ ܕܰܐܪܝܳܐ ܒܒܶܝܬ ܠܚܶܡ܆ ܡܰܪܝܰܡ ܒܓܰܘ ܐܽܘܪܝܳܐ ܒܥܰܙܪܽܘܪ̈ܶܐ ܟܪܰܟܬܶܗ܆ ܐܶܠܳܐ ܗܘܳܐ ܚܝܳܪܶܗ ܠܟܽܠ ܣܰܘ̈ܦܺܝܢ܆ ܘܟܰܢܶܫ ܨܶܐܕܰܘܗ̱ܝ ܣܶܓܕܬܳܐ܆ ܡܓܽܘ̈ܫܶܐ ܘܪ̈ܳܥܰܘܳܬܳܐ܆ ܫܰܒܚܽܘܗ̱ܝ ܘܪܰܡܪܡܽܘܗ̱ܝ ܠܥܳܠܰܡ ܥܳܠܡܺܝܢ܀

ܡܰܢܽܘ ܨܳܪ ܠܳܟ ܕܶܡ̈ܘܳܬܳܐ܆ ܒܓܰܘ ܟܰܪܣܳܐ ܕܒܶܣܪܳܐ ܒܥܽܘܒܳܗ̇ ܕܰܒܬܽܘܠܬܳܐ܆ ܟܰܕ ܐܰܢ̱ܬ ܐܺܝܬܰܝܟ ܨܰܝܳܪܳܐ܆ ܕܥܽܘ̈ܠܶܐ ܚܒܺܝ̈ܫܰܝ ܒܟܰܪ̈ܣܳܬܳܐ܆ ܦܩܽܘܕ ܠܳܗ̇ ܠܝܳܠܶܕܬܳܟ܆ ܕܬܶܬܶܠ ܠܳܟ ܚܰܠܒܳܐ ܘܰܬܫܰܒܚܳܟ܀

ܚܳܐܒ ܠܶܫܳܢܝ ܕܰܢܡܰܠܠܺܝܗ̇܆ ܠܬܶܕܡܽܘܪܬܳܐ ܕܰܗܘܳܬ ܝܰܘܡܳܢ ܒܒܶܝܬ ܠܚܶܡ܆ ܐܶܡܳܐ ܒܬܽܘܠܬܳܐ ܕܰܛܥܺܝܢܳܐ܆ ܠܓܰܢ̱ܒܳܪܳܐ ܘܰܡܢܰܨܪܳܐ ܠܶܗ܆ ܘܣܳܓܕܳܐ ܠܶܗ ܘܳܐܡܪܳܐ܆ ܫܰܒܚܽܘܗ̱ܝ ܘܪܰܡܪܡܽܘܗ̱ܝ ܠܥܳܠܰܡ ܥܳܠܡܺܝܢ܀

ܫܰܒܰܚܘ ܥܰܒ̈ܕܰܘܗ̱ܝ ܕܡܳܪܝܳܐ
ܩܳܠܳܐ ܒܩ̄: ܒܢܰܝ̈ ܢܽܘܗܪܳܐ ܩܽܘܡܘ

ܫܰܒ̈ܚܳܝܗ̱ܝ ܟܽܠܗܶܝܢ ܐܶܡ̈ܘܳܬܳܐ܆ ܘܥܰܡ̱̈ܡܶܐ ܦܪ̈ܺܝܩܰܝ ܒܰܨܠܺܝܒܳܐ܆ ܠܗܰܘ ܕܶܐܬܺܝܠܶܕ܆ ܡܶܢ ܒܬܽܘܠܬܳܐ ܡܰܪܝܰܡ܀

ܝܰܘܡܳܢ ܒܰܡܥܰܪܬܳܐ ܒܓܰܘ ܒܶܝܬ ܠܚܶܡ܆ ܐܶܬܺܝܠܶܕ ܡܳܪܝܳܐ܆ ܘܰܒܡܰܘܠܳܕܶܗ܆ ܚܰܪܰܪ ܒܶܪ̈ܝܳܬܳܐ܀

ܡܓܽܘ̈ܫܶܐ ܐܶܬܰܘ ܡܶܢ ܦܳܪܶܣ܆ ܟܰܕ ܛܥܺܝܢܺܝܢ ܗ̱ܘܰܘ ܩܽܘܪ̈ܒܳܢܶܐ܆ ܘܥܰܠܘ ܘܰܣܓܶܕܘ ܠܶܗ܆ ܠܰܒܪܳܐ ܟܰܕ ܚܳܕܶܝܢ܀

ܗܰܘ ܝܰܠܕܶܗ ܕܰܐܒܳܐ ܓܢܺܝܙܳܐ܆ ܐܶܬܬܰܚܬܺܝ ܡܶܛܽܠ ܪ̈ܰܚܡܰܘܗ̱ܝ܆ ܘܰܗܘܳܐ ܡܶܢܰܢ܆ ܕܰܨܒܳܐ ܕܢܶܦܪܽܘܩ ܠܰܢ܀

ܐܰܫܦܰܥ ܡܳܪܰܢ ܛܰܝܒܽܘܬܳܟ܆ ܘܰܚܢܳܢܳܐ ܕܒܰܣܺܝܡܽܘܬܳܟ܆ ܥܰܠ ܚܰܛܳܝ̈ܶܐ܆ ܕܙܳܡܪܺܝܢ ܬܶܫܒܽܘܚܬܳܟ܀

ܐ̱ܚܪܺܢܳܐ

ܩܳܠܳܐ ܒܩ̄: ܒܥܶܕܳܢ ܨܰܦܪܳܐ

ܗܳܐ ܒܒܶܝܬ ܠܚܶܡ: ܐܶܬܺܝܠܶܕ ܝܰܠܕܳܐ ܕܕܽܘܡܳܪܳܐ: ܘܰܒܝܰܠܕܶܗ ܐܰܦܨܰܚ ܒܶܪ̈ܝܳܬܳܐ ܘܰܡܫܰܒ̈ܚܳܢ: ܫܽܘܒܚܳܐ ܠܳܟ ܐܰܠܳܗܳܐ܀

ܪ̈ܳܥܰܘܳܬܳܐ ܘܰܡܓܽܘ̈ܫܶܐ: ܩܰܪܶܒܘ ܩܽܘܪ̈ܒܳܢܶܐ: ܠܗܰܘ ܡܰܠܟܳܐ ܕܶܐܬܺܝܠܶܕ ܒܺܝܗܽܘܕ ܘܰܡܫܰܒܚܺܝܢ: ܫܽܘܒܚܳܐ ܠܳܟ ܐܰܠܳܗܳܐ܀

ܙܡܺܝܪܬܳܐ ܚܕܰܬܳܐ ܐܶܙܕܰܡܪܰܬ ܝܰܘܡܳܢ ܒܒܶܝܬ ܠܚܶܡ: ܠܝܰܠܕܳܐ ܫܒܺܝܚܳܐ ܕܡܶܢ ܡܰܪܝܰܡ ܟܰܕ ܙܳܡܪܺܝܢ: ܫܽܘܒܚܳܐ ܠܳܟ ܐܰܠܳܗܳܐ܀

ܛܳܣܘ ܡܰܠܰܐܟ̈ܶܐ: ܘܰܢܚܶܬܘ ܣܶܕܪ̈ܶܐ ܕܓܰܘܙܰܠܬܳܐ: ܕܰܢܝܰܒܒܽܘܢ ܩܽܘܕܡܰܘܗ̱ܝ ܒܰܡܥܰܪܬܳܐ ܟܰܕ ܐܳܡܪܺܝܢ: ܫܽܘܒܚܳܐ ܠܳܟ ܐܰܠܳܗܳܐ܀

ܛܽܘܒܰܝܗܽܘܢ ܠܡܶܣ̈ܟܺܢܶܐ
ܩܳܠܳܐ ܒܩ̄: ܡܳܐ ܕܳܐܬܶܐ ܐܰܢ̱ܬ

ܒܪܺܝܟ ܗ̱ܽܘ ܡܫܺܝܚܳܐ: ܕܶܐܬܺܝܠܶܕ ܦܰܓܪܳܢܳܐܺܝܬ: ܡܶܢ ܒܬܽܘܠܬܳܐ ܕܟܺܝܬ ܡܰܪܝܰܡ: ܒܰܡܥܰܪܬܳܐ ܕܒܶܝܬ ܠܚܶܡ: ܐܶܬܕܰܟܪܰܝܢ ܡܳܪܝܳܐ܀

ܣܓܶܕܘ ܠܳܟ ܥܺܝܪ̈ܶܐ: ܘܰܡܓܽܘ̈ܫܶܐ ܘܟܺܐܢܳܐ ܝܰܘܣܶܦ: ܟܰܕ ܣܺܝܡ ܗ̱ܘܰܝܬ ܒܽܐܘܪܝܳܐ ܫܺܝܛܳܐ: ܒܓܰܘܳܗ̇ ܕܒܶܝܬ ܠܚܶܡ: ܐܶܬܕܰܟܪܰܝܢ ܡܳܪܝܳܐ܀

ܫܽܘܒܚܳܐ

ܟܰܘܟܰܒ ܢܽܘܗܪܳܐ: ܐܰܝܬܺܝ ܐܶܢܽܘܢ ܠܰܡܓܽܘ̈ܫܶܐ: ܘܩܰܪܶܒܘ ܠܶܗ ܩܽܘܪ̈ܒܳܢܰܝܗܽܘܢ: ܠܰܡܫܺܝܚܳܐ ܡܰܠܟܳܐ: ܐܶܬܕܰܟܪܰܝܢ ܡܳܪܝܳܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܡܳܐ ܫܰܦܺܝܪ ܗ̱ܘܳܐ

ܡܳܐ ܫܰܦܺܝܪܳܐ ܒܬܽܘܠܬܳܐ܆ ܕܟܺܝܬܳܐ ܡܰܪܝܰܡ ܘܰܒܪܳܐ ܕܝܶܠܕܰܬ܆ ܕܺܝܠܶܕܬܶܗ ܠܰܒܪܳܐ ܒܽܘܟܪܳܐ ܒܓܰܘ ܒܶܝܬ ܠܚܶܡ܆ ܘܰܢܛܺܝܪ ܛܰܒܥܳܐ܆ ܕܰܒܬܽܘ̈ܠܶܝܗ̇ ܥܕܰܡܳܐ ܠܥܳܠܰܡ܀

ܡܳܐ ܦܐܶܐ ܗ̱ܘܳܐ ܘܫܰܦܺܝܪ ܗ̱ܘܳܐ܆ ܠܪ̈ܺܝܫܰܝ ܦܳܪܶܣ ܟܰܕ ܛܥܺܝܢܺܝܢ ܗ̱ܘܰܘ܆ ܩܽܘܪ̈ܒܳܢܰܝܗܽܘܢ ܒܺܐܝܕܰܝ̈ܗܽܘܢ ܘܥܰܠܘ ܘܰܣܓܶܕ ܠܶܗ܆ ܠܰܒܪܳܐ ܒܽܘܟܪܳܐ܆ ܕܶܐܬܺܝܠܶܕ ܚܠܳܦ ܦܽܘܪܩܳܢܰܢ܀

ܫܽܘܒܚܳܐ

ܡܳܐ ܦܐܶܐ ܗ̱ܘܳܐ ܘܫܰܦܺܝܪ ܠܳܗ̇܆ ܠܗܳܝ ܒܰܪ̱ܬ ܕܰܘܺܝܕ ܟܰܕ ܐܳܡܪܳܐ ܠܶܗ܆ ܠܝܰܘܣܶܦ ܟܺܐܢܳܐ ܘܙܰܕܺܝܩܳܐ ܕܚܶܒ̈ܠܶܐ ܕܝܰܠܕܳܐ܆ ܗܳܐ ܡܳܚܶܝܢ ܠܺܝ܆ ܩܽܘܡ ܠܳܟ ܢܺܐܙܰܠ ܠܒܶܝܬ ܠܚܶܡ܀

ܐ̱ܚܪܺܢܳܐ

ܩܳܠܳܐ ܒܩ̄: ܒܪܳܐ ܕܰܒܚܽܘܒܶܗ

ܪ̈ܳܥܰܘܳܬܳܐ܆ ܐܶܣܬܰܒܰܪܘ ܡܶܢ ܡܰܠܰܐܟ̈ܶܐ܆ ܕܶܐܬܺܝܠܶܕ ܠܟܽܘܢ ܡܳܪܝܳܐ ܡܫܺܝܚܳܐ ܒܩܽܘܪܝܰܬ ܕܰܘܺܝܕ܆ ܛܥܶܢܘ ܘܰܐܝܬܺܝܘ ܠܶܗ ܬܰܡܺܝ̈ܡܶܐ܆ ܚܰܠܒܳܐ ܘܶܐܡܪܳܐ ܥܰܡ ܫܽܘܒܚܳܐ܆ ܐܶܬܕܰܟܪܰܝܢ ܡܳܐ ܕܳܐܬܶܐ ܐܰܢ̱ܬ ܪܳܚܶܡ ܐ̱ܢܳܫܳܐ܀

ܫܽܘܒܚܳܐ

ܬܳܐ ܐܶܫܰܥܝܳܐ܆ ܚܙܺܝ ܠܰܒܬܽܘܠܬܳܐ ܕܗܳܐ ܝܶܠܕܰܬ܆ ܠܥܰܡܰܢܽܘܐܶܝܠ ܐܰܝܟ ܕܶܐܡܰܪܬ ܒܰܢܒܺܝܽܘܬܳܟ܆ ܡܰܠܰܐܟ̈ܶܐ ܕܰܡܫܰܒܚܺܝܢ ܠܶܗ܆ ܘܪ̈ܳܥܰܘܳܬܳܐ ܕܰܡܗܰܠܠܺܝܢ܆ ܐܶܬܕܰܟܪܰܝܢ ܡܳܐ ܕܳܐܬܶܐ ܐܰܢ̱ܬ ܪܳܚܶܡܢܳܫܳܐ܀

ܩܳܠܳܐ ܕܨܰܦܪܳܐ
ܩܳܠܳܐ ܒܩ̄: ܬܗܰܪ ܓܰܒܪܺܐܶܝܠ
ܥܰܠ ܒܶܝܬ ܕܺܝܢܳܐ. ܥܳܒܰܪ ܗ̱ܘܺܝܬ ܘܩܳܠܳܐ ܫܶܡܥܰܬ

ܗܳܐ ܢܽܘܪ̈ܳܢܶܐ܆ ܘܪ̈ܽܘܚܳܢܶܐ ܘܓܽܘ̈ܕܶܐ ܕܰܠܥܶܠ܆ ܒܕܶܚܠܳܐ ܡܫܰܡܫܺܝܢ ܠܺܐܝܩܳܪܶܗ܆ ܘܰܠܬܰܚܬ ܒܰܐܪܥܳܐ ܐܰܪ̈ܥܳܢܶܐ܆ ܗܳܐ ܙܳܡܪܺܝܢ ܠܶܗ ܫܽܘܒܚܳܐ ܒܩܳܠܰܝ̈ܗܽܘܢ܆ ܕܰܒܡܰܘܠܳܕܶܗ ܐܶܫܬܰܝܰܢܘ܆ ܕܰܪܓܺܝܙܺܝܢ ܗ̱ܘܰܘ ܡܶܢ ܢܽܘܓܪܳܐ܆ ܘܬܰܪܥܽܘܬܳܐ ܗܳܐ ܩܢܰܘ܆ ܒܶܗ ܐܶܬܚܰܠܰܛܘ ܙܡܺܝܪ̈ܳܬܳܐ܆ ܕܥܶܠܳܝ̈ܶܐ ܥܰܡ ܬܰܚܬܳܝ̈ܶܐ܆ ܘܒܶܗ ܗܘܳܐ ܫܰܝܢܳܐ ܠܰܪ̈ܓܺܝܙܶܐ܀

ܫܽܘܒܚܳܐ

ܘܳܝ ܠܶܗ ܠܰܐܝܢܳܐ܆ ܕܠܳܐ ܡܰܘܕܶܐ ܒܦܰܓܪܳܢܽܘܬܳܟ܆ ܝܰܠܕܳܐ ܣܓܺܝܕܳܐ ܕܡܶܢ ܡܰܪܝܰܡ܆ ܕܰܒܟܽܠ ܡܶܕܶܡ ܐܶܬܕܰܡܺܝܬ܆ ܣܛܰܪ ܡܶܢ ܚܛܺܝܬܳܐ ܠܓܶܢܣܳܐ ܕܡܳܝܽܘ̈ܬܶܐ܆ ܘܰܕܠܳܐ ܙܽܘܘܳܓ ܐܶܬܺܝܠܶܕܬ܆ ܘܠܳܐ ܫܪܰܝܬ ܛܰܒ̈ܥܶܝܗ̇ ܕܝܳܠܶܕܬܳܟ܆ ܗܳܝ ܕܠܳܐ ܚܰܟܡܳܗ̇ ܓܰܒܪܳܐ܆ ܐܰܢ̱ܬܽ ܗ̱ܘ ܐܺܝܬܝܳܐ ܕܡܶܢ ܐܰܒܳܐ܆ ܕܰܒܦܰܓܪܳܟ ܗܘܰܝܬ ܡܳܝܽܘܬܳܐ܆ ܕܠܰܢ ܬܶܥܒܶܕ ܠܳܐ ܡܳܝܽܘ̈ܬܶܐ܀

ܡܶܢ ܥܳܠܰܡ

ܥܰܠ ܒܶܝܬ ܕܺܝܢܳܐ. ܥܳܒܰܪ ܗܘܺܝܿܬ ܕܩܳܠܳܐ ܫܶܡܥܶܬ. ܢܰܦܫܳܐ ܕܳܐܡܪܳܐ ܠܶܗ ܠܦܰܓܪܳܐ. ܠܘܰܝ ܕܶܝܢ ܦܰܓܪܳܐ ܠܳܐ ܚܙܺܝܬܳܟ. ܐܳܦܠܳܐ ܠܒܶܫܬܳܟ ܐܳܦܠܳܐ ܥܶܡ̇ܪܶܬ ܒܳܟ. ܕܫܰܕܰܠܬܳܢܝ ܒܰܪ̈ܓܺܝܓܳܬܳܟ: ܘܓܳܪܶܬ ܘܓܶܢܒܶܬ ܐܳܦ ܩܶܛܠܶܬ: ܘܕܰܝܳܢܳܐ ܠܚܺܝ̣ܡ ܥܠܰܝ. ܘܶܐܢ ܡܳܪܝܳܐ ܠܳܐ ܡܥܰܕܰܪ ܠܺܝ. ܡܰܢ ܗܳܘܶܐ ܠܺܝ ܥܳܕܽܘܪܳܐ. ܒܗܳܝ ܫܳܥܬܳܐ ܕܦܳܣܺܝ̈ܩܳܬܳܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܣܳܗ̈ܕܶܐ ܐܰܦܺܝܣܽܘܢܳܝܗ̱ܝ
ܫܟܶܒܘ ܟܺܐܢ̈ܶܐ ܒܗܰܝܡܳܢܽܘܬܳܐ

ܐܶܬܺܝܠܶܕ ܠܰܢ ܦܳܪܽܘܩܳܐ܆ ܡܶܢ ܛܽܘܛܺܝܬܳܐ ܕܒܰܪ̱ܬ ܕܰܘܺܝܕ܆ ܘܰܐܦܢܺܝ ܠܥܰܡ̱̈ܡܶܐ ܕܰܛܥܶܝܢ ܗ̱ܘܰܘ ܡܶܢ ܗܰܝܡܳܢܽܘܬܳܐ܆ ܘܰܐܥܶܠ ܐܶܢܽܘܢ ܠܰܛܝܳܪܶܗ܆ ܕܺܐܝܬܶܝܗ̇ ܥܺܕܬܳܐ ܩܰܕܺܝܫܬܳܐ܆ ܘܦܰܓܪܶܗ ܚܰܝܳܐ ܝܰܗ̱ܒ ܠܗܽܘܢ܆ ܘܒܰܕܡܶܗ ܦܪܰܩ ܐܶܢܽܘܢ܀

ܫܽܘܒܚܳܐ

ܥܰܠ ܒܶܝܬ ܠܚܶܡ ܥܳܒܰܪ ܗ̱ܘܺܝܬ܆ ܘܩܳܠܳܐ ܫܶܡܥܶܬ ܒܰܡܥܰܪܬܳܐ܆ ܡܰܪܝܰܡ ܕܰܡܢܰܨܪܳܐ ܠܰܒܪܳܗ̇ ܘܗܳܟܰܢ ܐܳܡܪܳܐ ܠܶܗ܆ ܛܽܘܒܰܝ ܒܶܪܝ ܕܰܗܘܺܝܬ ܐܶܡܳܟ܆ ܘܛܽܘܒܰܝ ܕܰܐܝܢܶܩܬܳܟ ܚܰܠܒܳܐ܆ ܘܶܐܢ ܪܶܡܙܳܟ ܠܳܐ ܡܰܦܶܣ ܠܺܝ܆ ܠܳܐ ܩܳܪܒܳܢ ܨܶܐܕܰܝܟ܀

ܡܶܢ ܥܳܠܰܡ

ܫܟܶܒܘ ܟܺܐܢ̈ܶܐ ܒܗܰܝܡܳܢܽܘܬܳܐ. ܘܰܡܣܰܟܶܝܢ ܠܝܽܘܡ ܓܶܠܝܳܢܳܟ. ܘܚܳܝܪܺܝܢ ܕܰܢܩܰܒܠܽܘܢ ܡܶܢܳܟ ܐܰܓܪܳܐ ܕܥܰܡܠܰܝ̈ܗܽܘܢ. ܡܶܕܶܡ ܕܶܐܕܢܳܐ ܠܳܐ ܫܶܡܥܰܬ݀. ܘܥܰܝܢܳܐ ܕܒܶܣܪܳܐ ܠܳܐ ܚܙܳܬܶܗ. ܘܥܰܠ ܠܶܒܳܐ ܕܐ̱ܢܳܫܳܐ ܠܳܐ ܣܠ̣ܶܩ. ܛܽܘܒܳܐ ܕܫܴ̇ܘܶܝܢ ܠܶܗ܀

ܦܶܬܓܳܡܳܐ: ܡܳܪܝܳܐ ܐܶܡܰܪ ܠܺܝ ܕܒܶܪܝ ܐܰܢ̱ܬ: ܘܶܐܢܳܐ ܝܰܘܡܳܢܳܐ ܝܺܠܶܕܬܳܟ ܗܰܠܶܠܽܘܝܰܗ܀

ܒܳܥܽܘܬܳܐ ܕܡܳܪܝ ܝܰܥܩܽܘܒ
ܠܳܟ ܬܶܫܒܽܘܚܬܳܐ ܡܢܰܚܶܡ ܡܺܝ̈ܬܶܐ

ܒܪܳܐ ܕܰܒܝܰܠܕܶܗ ܦܰܪܩܳܗ̇ ܠܥܺܕܬܶܗ ܡܶܢ ܛܳܥܝܽܘܬܳܐ܆

ܗܰܒ ܒܳܗ̇ ܫܰܝܢܳܟ ܘܢܰܛܰܪ ܝܰܠ̈ܕܶܝܗ̇ ܒܡܰܘܠܳܕܳܟ ܡܳܪܝ܀

ܢܚܶܬܘ ܡܰܠܰܐܟ̈ܶܐ ܠܰܡܣܰܒܳܪܽܘ ܠܰܒ̈ܢܰܝܢܳܫܳܐ܆ ܕܡܶܢ ܓܰܘ ܥܽܘܡܩܳܐ ܠܪܰܘܡܳܐ ܣܳܠܩܺܝܢ ܒܰܒܪܳܐ ܕܰܕܢܰܚ܆ ܚܠܰܛܘ ܒܰܚ̈ܕܳܕܶܐ ܓܰܒܳܐ ܒܚܰܒܪܶܗ ܘܰܙܡܰܪܘ ܫܽܘܒܚܳܐ܆ ܘܰܪܥܶܡ ܫܽܘܒܚܳܐ ܕܥܺܝܪ̈ܶܐ ܘܐ̱ܢܳܫ̈ܳܐ ܒܝܰܠܕܶܗ ܕܰܒܪܳܐ܀

ܪܥܶܡܘ ܥܶܠܳܝ̈ܶܐ ܙܡܺܝܪ̈ܳܬ ܩ̈ܳܠܶܐ ܒܟܶܢܳܪ̈ܰܝܗܽܘܢ܆ ܫܽܘܒܚܳܐ ܒܪܰܘܡܳܐ ܘܫܰܝܢܳܐ ܒܰܐܪܥܳܐ ܘܠܳܐܕܳܡ ܣܰܒܪܳܐ܆ ܠܥܶܠ ܒܰܡܪ̈ܰܘܡܶܐ ܟܠܺܝܠ ܬܶܫܒܽܘܚܬܳܐ ܠܡܳܪܶܐ ܪ̈ܰܘܡܶܐ܆ ܘܰܠܬܰܚܬ ܒܰܐܪܥܳܐ ܣܰܒܪܳܐ ܛܳܒܳܐ ܠܰܒ̈ܢܰܝܢܳܫܳܐ܀

ܫܰܝܢܳܐ ܕܫܰܝܶܢ ܠܰܫ̈ܡܰܝܳܢܶܐ ܘܠܰܐܪ̈ܥܳܢܳܝܶܐ܆

ܫܰܝܶܢ ܠܥܺܕܬܳܟ ܘܢܰܛܰܪ ܝܰܠ̈ܕܶܝܗ̇ ܒܡܰܘܠܳܕܳܟ ܡܳܪܝ܀