ܕܪܰܡܫܳܐ

ܥܶܢܝܳܢܳܐ ܕܪܰܚܶܡܥܠܰܝ
ܩܳܠܳܐ ܒܩ̄: ܐܰܢ̱ܬ ܕܠܰܒܬܽܘܠܬܳܐ ܡܰܪܝܰܡ

ܛܳܣ ܓܰܒܪܺܐܶܝܠ ܘܰܢܚܶܬ܆ ܡܶܢ ܣܶܕܪ̈ܶܐ ܕܰܫܡܰܝ̈ܳܢܶܐ܆ ܘܣܰܒܪܶܗ ܠܟܳܗܢܳܐ܆ ܥܰܠ ܒܰܛܢܶܗ ܕܟܳܪܽܘܙ ܩܽܘܫܬܳܐ܆ ܐܰܠܳܗܳܐ ܐܶܬܪܰܚܰܡܥܠܰܝܢ܀

ܟܰܕ ܣܰܒܪܶܗ ܗ̱ܘܳܐ ܥܺܝܪܳܐ܆ ܠܰܙܟܰܪܝܳܐ ܒܗܰܝܟܰܠ ܩܽܘܕܫܳܐ܆ ܬܗܰܪ ܘܶܐܬܦܰܠܰܓ܆ ܡܶܛܽܠ ܒܰܛܢܳܗ̇ ܕܰܥܩܰܪܬܳܐ܆ ܐܰܠܳܗܳܐ ܐܶܬܪܰܚܰܡ ܥܠܰܝܢ܀

ܗܰܘ ܕܠܰܙܟܰܪܝܳܐ ܟܳܗܢܳܐ܆ ܕܶܐܬܦܰܠܰܓ ܥܰܠ ܢܽܘܪܳܢܳܐ܆ ܒܫܶܬܩܳܐ ܦܰܟܪܶܗ܆ ܥܕܰܡܳܐ ܕܡܶܠܰܘ̈ܗ̱ܝ ܐܶܫܬܰܡ̈ܠܺܝ܆ ܐܰܠܳܗܳܐ ܐܶܬܪܰܚܰܡ ܥܠܰܝܢ܀

ܐܶܢܳܐ ܐܺܝܬܰܝ ܣܳܒܳܐ܆ ܘܰܐܢ̱ܬܰܬܝ ܩܰܫܺܝܫܰܬ ܝܰܘ̈ܡܶܐ܆ ܘܰܐܝܟܰܢ ܡܰܨܝܳܐ܆ ܕܰܐܫܰܪ ܡܶܕܶܡ ܕܳܐܡܰܪ ܐܰܢ̱ܬ܆ ܐܰܠܳܗܳܐ ܐܶܬܪܰܚܰܡ ܥܠܰܝܢ܀

ܕܠܳܐ ܗܰܝܡܶܢ ܗ̱ܘܳܐ ܙܟܰܪܝܳܐ܆ ܠܡܶܕܶܡ ܕܶܐܡܰܪ ܡܰܠܰܐܟܳܐ܆ ܒܫܶܬܩܳܐ ܦܰܟܪܶܗ܆ ܥܕܰܡܳܐ ܕܰܕܢܰܚ ܝܽܘܚܰܢܳܢ܆ ܐܰܠܳܗܳܐ ܐܶܬܪܰܚܰܡ ܥܠܰܝܢ܀

ܡܶܢ ܟܽܠܰܢ ܫܽܘܒܚܳܐ ܦܰܐܝܳܐ܆ ܢܶܣܰܩ ܠܰܐܒܳܐ ܡܪܰܚܡܳܢܳܐ܆ ܕܫܰܕܰܪ ܠܰܒܪܶܗ܆ ܘܶܐܬܬܰܚܬܺܝ ܕܢܶܦܪܽܘܩ ܨܰܠܡܶܗ܆ ܐܰܠܳܗܳܐ ܐܶܬܪܰܚܰܡ ܥܠܰܝܢ܀

ܡܳܪܝܳܐ ܩܪܺܝܬܳܟ
ܩܳܠܳܐ ܒܩ̄: ܡܫܺܝܚܳܐ ܐܶܬܺܝܠܶܕ

ܠܓܰܘ ܒܶܝܬ ܩܕܽܘܫ ܩܽܘ̈ܕܫܺܝܢ܆ ܒܥܶܕܳܢܳܐ ܕܒܶܣ̈ܡܶܐ܆ ܙܟܰܪܝܳܐ ܡܟܰܗܶܢ ܗ̱ܘܳܐ ܩܽܘܕܡܰܬ ܡܳܪܶܐ ܟܽܠ܆ ܘܗܳܐ ܪܺܝܫ ܡܰܠܰܐܟ̈ܶܐ܆ ܣܒܰܪܬܳܐ ܐܰܝܬܺܝ ܠܶܗ܆ ܕܰܒܪܳܐ ܗܳܘܶܐ ܠܳܟ܆ ܢܒܺܝܶܗ ܕܰܡܪܰܝܡܳܐ܀

ܗܳܝܕܶܝܢ ܢܽܘܪܳܢܳܐ܆ ܠܰܙܟܰܪܝܳܐ ܦܰܢܺܝ܆ ܕܶܐܢܰܐ ܗ̱ܘ ܓܰܒܪܺܐܶܝܠ ܪܺܝܫ ܚܰܝܠܰܘ̈ܳܬܳܐ܆ ܡܶܛܽܠ ܕܶܐܬܦܰܠܰܓܬ. ܥܰܠ ܡܶܕܶܡ ܕܶܐܡܪܶܬ܆ ܬܶܗܘܶܐ ܟܰܕ ܫܰܬܺܝܩ܆ ܥܕܰܡܳܐ ܕܢܶܫܬܰܡܠܶܐ܀

ܐܰܘܕܺܝ ܗ̱ܘܳܐ ܙܟܰܪܝܳܐ܆ ܘܫܰܒܰܚ ܠܰܐܠܳܗܳܐ܆ ܟܰܕ ܐܶܬܺܝܠܶܕ ܗ̱ܘܳܐ ܝܽܘܚܰܢܳܢ ܡܶܢ ܥܰܩܪܽܘܬܳܐ܆ ܘܕܳܨܰܬ ܐܶܠܺܝܫܒܰܥ܆ ܘܩܰܪܒܰܬ ܬܰܘܕܺܝܬܳܐ܆ ܠܗܰܘ ܕܰܒܚܽܘܒܶܗ܆ ܐܶܬܬܰܚܬܺܝ ܘܰܣܥܰܪ ܥܰܡܶܗ܀

ܚܙܳܝܗ̱ܝ ܗ̱ܘܳܐ ܠܡܰܠܰܐܟܳܐ܆ ܟܳܗܢܳܐ ܒܒܶܝܬ ܩܽܘܕܫܳܐ܆ ܘܙܳܥ ܗ̱ܘܳܐ ܡܶܢ ܚܶܙܘܶܗ܆ ܘܰܗܘܳܐ ܒܕܶܚܠܬܳܐ܆ ܘܰܥܢܳܐ ܘܶܐܡܰܪ ܠܶܗ. ܙܟܰܪܝܳܐ ܠܳܐ ܬܶܕܚܰܠ܆ ܨܠܽܘܬܳܟ ܐܶܫܬܰܡܥܰܬ܆ ܐܶܬܺܝܬ ܕܶܐܣܰܒܪܳܟ܀

ܙܟܰܪܝܳܐ ܒܒܶܝܬ ܩܽܘܕܫܳܐ܆ ܒܶܣ̈ܡܶܐ ܣܳܐܶܡ ܗ̱ܘܳܐ܆ ܢܚܶܬ ܓܰܒܪܺܐܶܝܠ ܡܰܠܰܐܟܳܐ ܘܣܰܒܪܶܗ܆ ܙܟܰܪܝܳܐ ܠܳܐ ܬܶܕܚܰܠ ܨܠܽܘܬܳܟ ܐܶܫܬܰܡܥܰܬ܆ ܘܰܒܪܳܐ ܗܳܘܶܐ ܠܳܟ܆ ܘܝܽܘܚܰܢܳܢ ܢܶܬܩܪܶܐ܀

ܫܽܘܒܚܳܐ

ܐܰܟܡܳܐ ܕܶܐܫܬܰܡܥܰܬ܆ ܨܠܽܘܬܶܗ ܕܰܙܟܰܪܝܳܐ܆ ܟܰܕ ܥܳܐܶܠ ܗ̱ܘܳܐ܆ ܠܰܩܕܽܘܫ ܩܽܘ̈ܕܫܺܝܢ ܕܰܢܟܰܗܶܢ܆ ܩܰܒܶܠ ܬܶܫܡܶܫܬܳܐ܆ ܘܰܨܠܽܘܬܳܐ ܕܥܰܒ̈ܕܰܝܟ܆ ܘܶܐܬܪܰܥܳܐ ܠܰܢ܆ ܘܦܰܢܳܐ ܒܪ̈ܰܚܡܰܝܟ ܫܶܐܠܳـــ̈ـܬܰܢ܀

ܩܳܠܳܐ ܕܪܰܡܫܳܐ

ܩܳܠܳܐ ܒܩ̄: ܡܫܺܝܚܳܐ ܢܰܛܰܪܶܝܗ̇ ܠܥܺܕܬܳܟ
ܬܰܘ ܢܥܰܕܥܶܕ ܕܽܘܟܪ̈ܳܢܰܝܗܽܘܢ

ܙܟܰܪܝܳܐ ܟܳܗܢܳܐ ܕܶܐܬܗܰܝܡܰܢ܆ ܠܬܶܫܡܶܫܬܳܐ ܕܒܶܝܬ ܐܰܠܳܗܳܐ܆ ܥܰܠ ܕܰܢܟܰܗܶܢ ܒܒܶܝܬ ܩܽܘܕܫܳܐ܆ ܒܥܶܕܳܢܳܐ ܕܰܢܣܺܝܡ ܒܶܣ̈ܡܶܐ܆ ܘܰܚܙܳܐ ܥܺܝܪܳܐ ܟܰܕ ܩܳܐܶܡ܆ ܘܶܐܬܬܙܺܝܥ ܡܶܢܶܗ ܘܰܥܢܳܐ ܘܶܐܡܰܪ ܠܶܗ܆ ܟܳܗܢܳܐ ܙܟܰܪܝܳܐ ܠܳܐ ܬܶܕܚܰܠ܆ ܕܶܐܢܳܐ ܐܺܝܬܰܝ ܓܰܒܪܺܐܶܝܠ܆ ܘܶܐܬܺܝܬ ܕܶܐܣܰܒܪܳܟ ܡܶܛܽܠ ܒܰܛܢܳܐ ܕܗܳܘܶܐ ܠܳܟ܆ ܘܬܶܩܪܶܐ ܠܰܫܡܶܗ ܝܽܘܚܰܢܳܢ܆ ܘܢܶܗܘܶܐ ܪܰܒܳܐ ܘܰܢܒܺܝܶܗ ܕܰܒܪܳܐ ܢܶܬܩܪܶܐ܀

ܫܽܘܒܚܳܐ

ܪܡܰܙ ܦܽܘܩܕܳܢܳܐ ܠܓܰܒܪܺܐܶܝܠ܆ ܘܛܳܣ ܘܰܢܚܶܬ ܩܰܠܺܝܠܳܐܺܝܬ܆ ܘܥܰܠ ܠܘܳܬ ܟܳܗܢܳܐ ܠܒܶܝܬ ܩܽܘܕܫܳܐ܆ ܘܡܰܠܶܠ ܥܰܡܶܗ ܘܶܐܡܰܪ ܠܶܗ܆ ܕܰܐܢ̱ܬܬܟ ܬܺܐܠܰܕ ܝܰܠܽܘܕܳܐ܆ ܘܬܶܩܪܶܐ ܠܰܫܡܳܐ ܕܺܝܠܶܗ ܝܽܘܚܰܢܳܢ܆ ܡܶܛܽܠ ܕܠܳܐ ܥܛܶܠ ܠܰܐܠܳܗܳܐ܆ ܕܢܶܣܥܽܘܪ ܟܽܠ ܐܰܝܟ ܨܶܒܝܳܢܶܗ܆ ܘܢܶܚܕܽܘܢ ܒܡܰܘܠܳܕܶܗ ܫܡܰܝܳܐ ܘܰܐܪܥܳܐ ܘܟܽܠ ܕܰܒܗܽܘܢ܆ ܘܢܰܬܩܶܢ ܐܽܘܪܚܳܐ ܩܕܳܡ ܡܳܪܶܗ܆ ܕܳܐܬܶܐ ܠܥܳܠܡܳܐ ܘܕܳܢܰܚ ܡܶܢ ܒܬܽܘܠܬܳܐ ܡܰܪܝܰܡ܀

ܡܶܢ ܥܳܠܰܡ

ܪܳܥܶܡ ܩܳܠܶܗ ܕܫܺܝܦܽܘܪܳܐ܆ ܘܫܳܪܶܐ ܠܗܶܝܢ ܠܶܐܣܰܝ̈ ܬܺܒܶܝܠ. ܘܰܫܡܰܝ̈ܳܐ ܕܰܠܥܶܠ ܡܶܢܰܢ܆ ܒܰܕܡܽܘܬ ܡܓܰܠܬܳܐ ܡܶܬܟܰܪܟܳܐ. ܘܢܰܗܺܝܪ̈ܶܐ ܕܰܣܕܺܝܪܺܝܢ ܒܳܗ̇ ܢܳܬܪܺܝܢ ܟܽܠܗܽܘܢ: ܒܰܕܡܽܘܬ ܗܰܒ̈ܳܒܶܐ. ܘܙܳܥܶܩ ܒܳܗ̇ ܒܰܪ ܐܰ‌ܠܳܗܳܐ: ܒܓܰܘ ܫܝܽܘܠ ܘܰܡܣܰܚܶܦ ܠܳܗ̇. ܘܓܳܣܝܳܐ ܠܰܫ̈ܠܰܕܶܐ܆ ܕܶܐܬܬܣܺܝ̈ܡܝ ܒܳܗ̇ ܡ̣ܶܢ ܫܽܘܪܳܝܳܐ܆ ܘܢܳܫܒܳܐ ܒܗܽܘܢ ܪܽܘܚ ܢܽܘܚܳܡܳܐ. ܘܬܽܘܒ ܘܰܠܥܳܠܰܡ܆ ܡܰܘܬܳܐ ܒܗܽܘܢ ܠܳܐ ܡܶܫܬܰܠܰܛ܀

ܐ̱ܚܪܺܢܳܐ

ܩܳܠܳܐ ܒܩ̄: ܛܽܘܒܰܝܟܝ ܥܺܕܬܳܐ
ܩܪܳܐ ܠܗܽܘܢ ܡܳܪܰܢ ܠܰܫܠܺܝܚܰܘ̈ܗ̱ܝ

ܢܚܶܬ ܓܰܒܪܺܐܶܝܠ܆ ܪܺܝܫ ܡܰܠܰܐܟ̈ܶܐ ܘܣܰܒܪܶܗ ܗ̱ܘܳܐ܆ ܠܰܙܟܰܪܝܳܐ ܥܰܠ ܡܰܘܠܳܕܶܗ ܕܝܽܘܚܰܢܳܢ ܒܰܪ ܥܰܩܪܽܘܬܳܐ܆ ܘܰܕܠܳܐ ܗܰܝܡܶܢ ܗ̱ܘܳܐ ܙܟܰܪܝܳܐ܆ ܒܫܶܬܩܳܐ ܦܰܟܪܶܗ ܕܠܳܐ ܢܡܰܠܶܠ܆ ܒܪܺܝܟܽ ܗ̱ܘ ܡܳܪܝܳܐ ܡܪܰܚܡܳܢܳܐ܆ ܕܝܰܗ̱ܒ ܦܺܐܪܳܐ ܒܣܰܬܳܐ ܥܩܰܪܬܳܐ܆ ܘܫܰܕܪܶܗ ܩܽܘܕܡܰܘܗ̱ܝ ܕܰܢܛܰܝܶܒ܆ ܐܽܘܪܚܳܐ ܠܥܰܡ̱̈ܡܶܐ ܘܶܐܡ̈ܘܳܬܳܐ܀

ܫܽܘܒܚܳܐ

ܒܫܶܬܩܳܐ ܐܰܠܦܶܗ܆ ܥܺܝܪܳܐ ܠܟܳܗܢܳܐ ܕܰܢܗܰܝܡܶܢ܆ ܕܡܶܬܺܝܠܶܕ ܠܳܟ ܟܳܪܽܘܙܳܐ ܡܶܢ ܥܽܘܒܳܗ̇ ܕܒܰܪ̱ܬ ܠܶܘܳܝ̈ܶܐ܆ ܘܢܰܬܩܶܢ ܐܽܘܪܚܳܐ ܠܒܰܪ ܡܰܠܟܳܐ܆ ܕܰܡܟܰܪ ܠܶܗ ܥܺܕܰܬ ܩܽܘܕܫܳܐ܆ ܒܪܺܝܟܽ ܗ̱ܘ ܚܰܬܢܳܐ ܫܡܰܝܳܢܳܐ܆ ܕܫܰܕܰܪ ܩܽܘܕܡܰܘܗ̱ܝ ܐܺܝܙܓܰܕܳܐ܆ ܕܢܰܟܪܶܙ ܠܰܢ ܥܰܠ ܡܶܐܬܺܝܬܶܗ܆ ܫܽܘܒܚܳܐ ܠܶܗ ܘܰܠܫܳܠܽܘܚܶܗ܀

ܡܶܢ ܥܳܠܰܡ

ܛܰܠܳܐ ܕܚܰܝ̈ܶܐ܆ ܗܰܘ ܕܶܐܫܬܰܕܰܪ ܡ̣ܶܢ ܐܰܒܳܐ. ܘܪܰܣܶܣ ܐܶܢܽܘܢ ܠܰܛܠܳܝ̈ܶܐ. ܒܓܰܘ ܐܰܬܽܘܢܳܐ ܕܒܳܒܠܳܝ̈ܶܐ. ܗ̣ܽܘ ܢܰܛܶܠ ܥܰܠ ܥܰܢܺܝ̈ܕܶܐ. ܒܬܰܐܘ̈ܳܢܶܐ ܟܡܺܝ̣ܪ̈ܶܐ ܕܰܫܝܽܘܠ. ܘܰܢܚܰܣܶܐ ܒܽܘܨܳܪ̈ܰܝܗܽܘܢ. ܕܥܰܒܕܰܘ̈ܗ̱ܝ ܕܰܫܟܶܒܘ ܥܰܠ ܣܰܒܪܶܗ. ܘܢܰܘܪܶܬ ܐܶܢܽܘܢ ܡܰܠܟܽܘܬܳܐ܆ ܕܠܳܐ ܥܳܒܪܳܐ ܘܠܳܐ ܡܶܫܬܰܪܝܳܐ܀

ܦܶܬܓܳܡܳܐ: ܗܳܝܕܶܝܢ ܡܡܰܠܶܠ ܒܚܶܙܘܳܢ̈ܶܐ ܥܰܡ ܙܰܕܺܝܩܰܘ̈ܗ̱ܝ܆ ܘܶܐܡܰܪ ܕܣܳܡܶܬ ܥܽܘܗܕܳܢܳܐ ܠܓܰܒܪܳܐ ܗܰܠܶܠܽܘܝܰܗ܀

ܒܳܬܰܪ ܐܶܘܰܢܓܶܠܺܝܳܘܢ: ܬܶܫܡܶܫܬܳܐ ܕܥܰܢܺܝ̈ܕܶܐ

ܒܳܥܽܘܬܳܐ ܕܡܳܪܝ ܝܰܥܩܽܘܒ
ܐܳܙܺܠ̱ܝܢ ܕܳܪ̈ܶܐ ܘܳܐܬܶܝܢ ܕܳܪ̈ܶܐ

ܨܠܽܘܬܳܟ ܥܰܡܰܢ ܟܳܗܢܳܐ ܙܟܰܪܝܳܐ ܨܠܽܘܬܳܟ ܥܰܡܰܢ܆

ܘܠܰܨ̈ܠܰܘܳܬܳܟ ܢܶܫܡܰܥ ܡܳܪܝܳܐ ܘܰܢܚܰܣܶܐ ܠܰܢ܀

ܟܰܕ ܣܳܡ ܐܰܦܰܘ̈ܗ̱ܝ ܕܢܺܐܬܶܐ ܠܥܳܠܡܳܐ ܒܰܪ ܐܰܠܳܗܳܐ܆ ܨܒܳܐ ܕܰܢܫܰܕܰܪ ܩܳܠܳܐ ܩܕܳܡܰܘܗ̱ܝ ܕܢܰܬܩܶܢ ܐܽܘܪܚܳܐ܆ ܟܳܗܢܳܐ ܙܟܰܪܝܳܐ ܐܳܦ ܐܶܠܺܝܫܒܰܥ ܒܰܪ̱ܬ ܠܶܘܳܝ̈ܶܐ܆ ܙܰܕܺܝܩܺܝܢ ܗ̱ܘܰܘ ܘܟܺܐܢܺܝܢ ܘܰܡܠܶܝܢ ܗܰܝܡܳܢܽܘܬܳܐ܀

ܫܽܘܒܚܳܐ ܠܰܐܒܳܐ ܕܰܠܝܽܘܚܰܢܳܢ ܓܒܳܐ ܡܶܢ ܟܰܪܣܳܐ܆ ܘܣܶܓܕܬܳܐ ܠܰܒܪܳܐ ܕܥܰܒܕܶܗ ܩܳܠܳܐ ܘܫܰܕܪܶܗ ܩܕܳܡܰܘܗ̱ܝ܆ ܬܰܘܕܺܝ ܠܪܽܘܚܳܐ ܕܰܒܓܰܘ ܟܰܪܣܳܐ ܕܶܐܡܶܗ ܩܰܕܫܶܗ܆ ܘܰܥܠܰܝܢ ܪ̈ܰܚܡܶܐ ܒܰܨܠܰܘ̈ܳܬܶܗ ܒܟܽܠ ܥܶܕܳܢܺܝ̈ܢ܀

ܒܰܨ̈ܠܰܘܳܬܳܟ ܡܳܪܝܳܐ ܢܒܰܛܶܠ ܫܰܒ̈ܛܶܐ ܕܪܽܘܓܙܳܐ܆

ܡܶܢ ܟܽܠ ܐܰܝܢܳܐ ܕܡܶܬܓܰܘܰܣ ܒܳܟ ܒܗܰܝܡܳܢܽܘܬܳܐ܀