ܒܫܶܡ ܐܰܒܳܐ ܘܰܒܪܳܐ ܘܪܽܘܚܳܐ ܚܰܝܳܐ ܩܰܕܺܝܫܳܐ ܚܰܕ ܐܰܠܳܗܳܐ ܫܰܪܺܝܪܳܐ܆ ܡܫܰܪܶܝܢܰܢ ܕܢܶܟܬܽܘܒ ܦܶܢܩܺܝܬܳܐ ܕܩܽܘܕܳܫ ܥܺܕܬܳܐ. ܡܶܢ ܚܰܕ ܒܫܰܒܳܐ ܕܩܽܘܕܳܫ ܥܺܕܬܳܐ ܥܕܰܡܳܐ ܠܨܰܘܡܳܐ ܩܰܕܺܝܫܳܐ ܕܰܐܪܒܥܺܝܢ ܥܰܡ ܥܶܢ̈ܝܳܢܶܐ ܘܩ̈ܳܠܶܐ ܘܡܰܕܪ̈ܳܫܶܐ ܘܣܽܘ̈ܓܝܳܬܳܐ܀

ܕܪܰܡܫܳܐ

ܥܶܢܝܳܢܳܐ ܕܪܰܚܶܡܥܠܰܝ
ܩܳܠܳܐ ܒܩ̄: ܐܰܢ̱ܬ ܕܠܰܒܬܽܘܠܬܳܐ ܡܰܪܝܰܡ

ܫܰܪܰܪ ܡܳܪܝ ܫܶܬܶܐܣܶܝ̈ܗ̇܆ ܥܰܠ ܐܺܝܕܰܝ̈ܟ ܩܰܕܺܝ̈ܫܳܬܳܐ܆ ܘܪܰܡܪܶܡ ܩܰܪܢܳܗ̇܆ ܘܢܰܛܰܪ ܝܰܠ̈ܕܶܝܗ̇ ܒܰܨܠܺܝܒܳܟ܆ ܐܰܠܳܗܳܐ ܐܶܬܪܰܚܰܡ ܥܠܰܝܢ܀

ܡܫܺܝܚܳܐ ܕܰܚܠܳܦ ܥܺܕܬܶܗ܆ ܐܰܫܠܶܡ ܢܰܦܫܶܗ ܠܰܙܩܺܝܦܳܐ܆ ܫܰܪܰܪܶܝܗ̇ ܡܳܪܝ܆ ܥܰܠ ܫܽܘܥܳܐ ܕܗܰܝܡܳܢܽܘܬܳܐ܆ ܐܰܠܳܗܳܐ ܐܶܬܪܰܚܰܡ ܥܠܰܝܢ܀

ܢܽܘܚ ܪܰܫܡܳܗ̇ ܒܟܶܐܘܶܠܳܐ܆ ܘܡܽܘܫܶܐ ܚܙܳܗ̇ ܗ̱ܘܳܐ ܒܰܥ̈ܢܳܢܶܐ܆ ܘܝܰܥܩܽܘܒ ܒܟܺܐܦܳܐ܆ ܗܳܝ ܕܰܡܫܰܚ ܥܰܠ ܛܽܘܪ ܒܶܝܬ ܐܺܝܠ܆ ܐܰܠܳܗܳܐ ܐܶܬܪܰܚܰܡ ܥܠܰܝܢ܀

ܒܪܺܝܟ ܕܶܐܬܬܰܚܬܺܝ ܒܪ̈ܰܚܡܰܘܗ̱ܝ܆ ܡܶܢ ܡܶܕܝܳܪ̈ܰܘܗ̱ܝ ܥܶܠܳܝ̈ܶܐ܆ ܘܰܡܟܰܪ ܥܺܕܬܶܗ܆ ܘܰܦܪܰܩ ܝܰܠ̈ܕܶܝܗ̇ ܡܶܢ ܛܽܘܥܝܰܝ܆ ܐܰܠܳܗܳܐ ܐܶܬܪܰܚܰܡ ܥܠܰܝܢ܀

ܣܳܓܕܳܐ ܠܳܟ ܡܳܪܝ ܥܺܕܬܳܟ܆ ܘܝܰܠ̈ܕܶܝܗ̇ ܙܳܡܪܺܝܢ ܬܶܫܒܽܘܚܬܳܐ܆ ܕܚܰܪܰܪܬ ܐܶܢܽܘܢ܆ ܡܶܢ ܛܳܥܝܽܘܬܳܐ ܕܰܦܬܰܟܪ̈ܶܐ܆ ܐܰܠܳܗܳܐ ܐܶܬܪܰܚܰܡܥܠܰܝܢ܀

ܒܪܺܝܟܽ ܗ̱ܘ ܕܟܰܠܠܳܗ̇ ܠܥܺܕܬܶܗ܆ ܒܕܽܘܡ̈ܣܶܐ ܘܥܰܪ̈ܩܶܐ ܕܰܢܒܺܝ̈ܶܐ܆ ܫܠܺܝ̈ܚܶܐ ܘܣܳܗ̈ܕܶܐ܆ ܘܰܐܒ̈ܳܗܳܬܳܐ ܩܰܕܺܝ̈ܫܶܐ܆ ܐܰܠܳܗܳܐ ܐܶܬܪܰܚܰܡ ܥܠܰܝܢ܀

ܡܳܪܝܳܐ ܩܪܺܝܬܳܟ
ܩܳܠܳܐ ܒܩ̄: ܡܫܺܝܚܳܐ ܐܶܬܺܝܠܶܕ

ܥܺܕܬܳܐ ܡܗܰܝܡܰܢܬܳܐ܆ ܙܡܰܪܝ ܠܶܗ ܬܶܫܒܽܘܚܬܳܐ܆ ܠܚܰܬܢܳܐ ܕܡܰܟܪܶܟܝ܆ ܘܨܰܒܬܶܟܝ ܒܨܶܒ̈ܬܶܐ ܪ̈ܽܘܚܳܢܶܐ܆ ܗܳܐ ܒܪ̈ܺܝܫܰܝ ܟܳܗ̈ܢܶܐ܆ ܘܰܒܟܳܗ̈ܢܶܐ ܚܣܰܝ̈ܳܐ܆ ܟܽܠܗܽܘܢ ܝܰܠ̈ܕܰܝܟܝ܆ ܒܓܰܘܶܟܝ ܙܳܡܪܺܝܢ ܠܶܗ ܫܽܘܒܚܳܐ܀

ܐܰܘܕܳܝ ܠܶܗ ܥܺܕܬܳܐ܆ ܠܰܡܫܺܝܚܳܐ ܕܡܰܟܪܶܟܝ܆ ܘܙܰܡܶܢ ܠܰܚܠܽܘܠܶܟܝ܆ ܪܰܘܡܳܐ ܘܥܽܘܡܩܳܐ ܘܟܽܠ ܕܰܒܗܽܘܢ܆ ܚܕܺܝܘ ܥܺܝܪ̈ܶܐ ܒܪܰܘܡܳܐ܆ ܒܝܰܘܡܳܐ ܕܩܽܘܕܳܫܶܟܝ܆ ܘܰܙܡܰܪܘ ܫܽܘܒܚܳܐ܆ ܒܢܰܝ̈ܢܳܫܳܐ ܟܽܠܗܽܘܢ ܕܒܰܐܪܥܳܐ܀

ܠܳܐ ܬܙܽܘܥܺܝܢ ܥܺܕܬܳܐ܆ ܡܶܢ ܣܶܕ̈ܩܶܐ ܒܺܝ̈ܫܶܐ܆ ܕܥܰܠ ܦܰܣܰܬ ܐܺܝ̈ܕܰܘܗ̱ܝ܆ ܪܰܫܡܶܟܝ ܦܳܪܽܘܩܰܢ܆ ܘܦܰܓܪܶܗ ܩܨܳܐ ܘܝܰܗ̱ܒ ܠܶܟܝ܆ ܒܰܪ ܡܰܠܟܳܐ ܕܦܰܪܩܶܟܝ܆ ܘܰܕܡܶܗ ܡܚܰܣܝܳܢܳܐ܆ ܠܚܽܘܣܳܝܳܐ ܕܝܰܠ̈ܕܰܝܟܝ܀

ܪܳܡܺܝܢ ܒܶܢ̈ܝܳܢܰܝܟܝ܆ ܗܕܺܝܪ̈ܺܝܢ ܬܽܘܩܳܢܰܝ̈ܟܝ܆ ܘܟ̈ܺܐܦܶܐ ܕܰܐܕܰܡܳܘܣ܆ ܢܒܺܝ̈ܶܐ ܫܶܬܶܐܣܰܝ̈ܟܝ܆ ܘܰܫܠܺܝܚ̈ܶܐ ܕܽܘܡܣܰܝ̈ܟܝ܆ ܘܣܳܗ̈ܕܶܐ ܥܰܡܽܘܕܰܝ̈ܟܝ܆ ܘܡܰܠ̈ܦܳܢܶܐ ܕܩܽܘܫܬܳܐ܆ ܬܰܛܠܺܝܠܰܝ̈ܟܝ ܘܰܡܣܰܬܪ̈ܳܢܰܝ̈ܟܝ܀

ܫܽܘܒܚܳܐ ܠܰܡܟܺܝܪܶܟܝ܆ ܒܝܰܘܡܳܐ ܕܩܽܘܕܳܫܶܟܝ܆ ܠܣܳܩܽܘܪ̈ܰܝܟܝ ܘܳܝܳܐ܆ ܘܛܽܘܒܳܐ ܪܰܒܳܐ ܠܡܳܟܽܘܪ̈ܰܝܟܝ܆ ܕܰܠܚܰܬܢܳܐ ܕܡܰܟܪܶܟܝ܆ ܠܰܝܬ ܠܶܗ ܫܽܘܠܳܡܳܐ܆ ܙܡܰܪܝ ܠܶܗ ܒܰܪ̱ܬ ܥܰܡ̱̈ܡܶܐ܆ ܒܰܙܡܺܝܪ̈ܳܬܳܐ ܚܰܕ̱̈ܬܳܬܳܐ܀

ܫܽܘܒܚܳܐ

ܫܽܘܒܚܳܐ ܠܗܰܘ ܕܰܐܘܪܶܒ܆ ܝܰܘܡܳܐ ܕܩܽܘܕܳܫܶܟܝ ܒܰܫܡܰܝܳܐ ܘܒܰܐܪܥܳܐ܆ ܘܒܰܐܪܒܰܥ ܦܶܢ̈ܝܳܬܳܐ܆ ܫܽܘܒܚܳܐ ܠܗܰܘ ܕܢܰܨܰܚ܆ ܥܺܐܕܶܟܝ ܒܟܽܠ ܥܰܡ̱̈ܡܺܝܢ܆ ܘܡܶܢ ܟܽܠ ܠܶܫܳܢܺܝ̈ܢ܆ ܬܶܫܒܽܘܚܬܳܐ ܠܰܫܡܶܗ܀

ܩܳܠܳܐ ܕܪܰܡܫܳܐ

ܩܳܠܳܐ ܒܩ̄: ܡܫܺܝܚܳܐ ܢܰܛܰܪܶܝܗ̇ ܠܥܺܕܬܳܟ
ܛܽܘܒܰܝܟܝ ܐܶܡܳܐ ܕܢܰܟܦܽܘܬܳܐ

ܩܽܘܡܝ ܐܰܢܗܰܪܝ ܕܰܡܛܳܐ ܢܽܘܗܪܶܟܝ܆ ܥܺܕܰܬ ܩܽܘܕܫܳܐ ܡܗܰܝܡܰܢܬܳܐ܆ ܕܡܳܪܝܳܐ ܡܪܰܝܡܳܐ ܘܰܕܚܺܝܠܳܐ܆ ܕܳܢܰܚ ܫܳܪܶܐ ܒܣܳܚܪ̈ܳܬܶܟܝ܆ ܘܟܽܠܗܽܘܢ ܥܰܡ̱̈ܡܶܐ ܘܶܐܡ̈ܘܳܬܳܐ܆ ܠܶܟܝ ܡܶܬܟܰܢܫܺܝܢ܆ ܡܶܢ ܣܰܘ̈ܦܶܐ ܠܣܰܘ̈ܦܶܐ܆ ܘܶܐܣܬܰܒܰܪ ܘܺܝܕܰܥ ܟܽܠ ܐ̱ܢܳܫ܆ ܕܗܽܘܝܽܘ ܡܶܟܺܝܠ ܘܰܠܥܳܠܰܡ܆ ܫܽܘܒܚܳܐ ܕܠܳܐ ܫܶܠܝܳܐ܆ ܠܗܰܘ ܕܰܓܒܳܟܝ ܡܶܢ ܫܽܘܪܳܝܳܐ܆ ܘܰܐܬܩܶܢ ܒܶܟܝ ܡܰܕܒܰܚ ܩܽܘܕܫܳܐ܆ ܘܣܳܡ ܒܶܟܝ ܦܰܓܪܶܗ ܠܚܽܘܣܳܝ܆ ܚܰܘ̈ܒܶܐ ܘܰܚ̈ܛܳܗܶܐ܀

ܫܽܘܒܚܳܐ

ܕܽܘܨܝ ܘܰܚܕܳܝ ܥܺܕܰܬ ܩܽܘܕܫܳܐ܆ ܘܰܐܪܺܝܡܝ ܩܳܠܶܟܝ ܒܰܩܥܳܬܳܐ܆ ܘܰܙܡܰܪܝ ܫܽܘܒܚܳܐ ܘܬܰܘܕܺܝܬܳܐ܆ ܠܺܝܚܺܝܕܳܐ ܕܚܰܫ ܥܰܠ ܐܰܦܰܝ̈ܟܝ܆ ܘܰܦܪܰܩ ܝܰܠ̈ܕܰܝܟܝ ܡܶܢ ܛܽܘܥܝܰܝ܆ ܘܰܚܡܰܠ ܐܶܢܽܘܢ ܒܰܛܝܳܪܳܐ ܕܚܰܝ̈ܶܐ܆ ܘܣܳܡ ܦܰܓܪܶܗ ܘܰܕܡܶܗ ܩܽܘܕܡܰܝܟܝ܆ ܕܬܶܬܚܰܣܶܝܢ ܡܶܢ ܚܰܘ̈ܒܳܬܶܟܝ܆ ܕܬܶܥܠܺܝܢ ܠܰܓܢܽܘܢܶܗ܆ ܘܬܶܬܒܰܣܡܺܝܢ ܒܪܰܘܡܳܐ ܥܰܡܶܗ܆ ܘܬܺܐܪܬܺܝܢ ܚܰܝ̈ܶܐ ܕܰܠܥܳܠܰܡ܆ ܒܥܳܠܡܳܐ ܚܰܕ̱ܬܳܐ ܕܡܰܘܬܳܐ܆ ܒܶܗ ܠܳܐ ܡܶܫܬܰܠܰܛ܀

ܡܶܢ ܥܳܠܰܡ

ܪܳܥܶܡ ܩܳܠܶܗ ܕܫܺܝܦܽܘܪܳܐ܆ ܘܫܳܪܶܐ ܠܗܶܝܢ ܠܶܐܣܰܝ̈ ܬܺܒܶܝܠ. ܘܰܫܡܰܝ̈ܳܐ ܕܰܠܥܶܠ ܡܶܢܰܢ܆ ܒܰܕܡܽܘܬ ܡܓܰܠܬܳܐ ܡܶܬܟܰܪܟܳܐ. ܘܢܰܗܺܝܪ̈ܶܐ ܕܰܣܕܺܝܪܺܝܢ ܒܳܗ̇ ܢܳܬܪܺܝܢ ܟܽܠܗܽܘܢ: ܒܰܕܡܽܘܬ ܗܰܒ̈ܳܒܶܐ. ܘܙܳܥܶܩ ܒܳܗ̇ ܒܰܪ ܐܰ‌ܠܳܗܳܐ: ܒܓܰܘ ܫܝܽܘܠ ܘܰܡܣܰܚܶܦ ܠܳܗ̇. ܘܓܳܣܝܳܐ ܠܰܫ̈ܠܰܕܶܐ܆ ܕܶܐܬܬܣܺܝ̈ܡܝ ܒܳܗ̇ ܡ̣ܶܢ ܫܽܘܪܳܝܳܐ܆ ܘܢܳܫܒܳܐ ܒܗܽܘܢ ܪܽܘܚ ܢܽܘܚܳܡܳܐ. ܘܬܽܘܒ ܘܰܠܥܳܠܰܡ܆ ܡܰܘܬܳܐ ܒܗܽܘܢ ܠܳܐ ܡܶܫܬܰܠܰܛ܀

ܐ̱ܚܪܺܢܳܐ

ܩܳܠܳܐ ܒܩ̄: ܛܽܘܒܰܝܟܝ ܥܺܕܬܳܐ
ܒܪܺܝܟܽ ܗ̱ܘ ܡܫܺܝܚܳܐ܆ ܕܰܓܒܳܟܝ

ܡܰܫܟܰܢܙܰܒܢܳܐ܆ ܥܒܰܕ ܡܽܘܫܶܐ ܠܒܶܝܬ ܝܺܣܪܳܐܶܝܠ܆ ܘܣܳܡ ܒܶܗ ܡܰܕܒܚܳܐ ܡܚܰܣܝܳܢܳܐ܆ ܘܰܐܣܶܩ ܥܠܰܘܗ̱ܝ ܝܰܩ̈ܕܶܐ ܫܰܠ̈ܡܶܐ܆ ܘܨܳܪ ܘܰܪܫܰܡ ܥܺܕܬܶܗ ܕܰܒܪܳܐ܆ ܘܐ̱ܪܳܙ ܚܰܝ̈ܶܐ ܕܦܰܓܪܶܗ ܘܰܕܡܶܗ܆ ܗܳܢܳܐ ܕܶܝܢ ܗܰܝܟܰܠ ܩܽܘܕܫܳܐ܆ ܕܺܐܝܬܰܘܗ̱ܝ ܡܰܥܡܪܳܐ ܕܰܐܠܳܗܳܐ܆ ܪܽܘܚܳܐ ܚܰܝܳܐ ܘܩܰܕܺܝܫܳܐ܆ ܢܳܚܶܬ ܠܶܗ ܘܰܡܩܰܕܶܫ ܠܶܗ܀

ܫܽܘܒܚܳܐ

ܠܶܟܝ ܕܶܝܢ ܛܽܘܒܰܝܟܝ܆ ܥܺܕܰܬ ܩܽܘܕܫܳܐ ܡܗܰܝܡܰܢܬܳܐ܆ ܕܗܳܐ ܡܰܬܩܰܢ ܠܰܚܡܳܐ ܕܚܰܝ̈ܶܐ܆ ܕܣܳܡ ܚܰܬܢܳܐ ܡܫܺܝܚܳܐ ܩܽܘܕܡܰܝܟܝ܆ ܘܫܶܩܝܳܐ ܚܰܝܳܐ ܕܠܳܐ ܨܳܗܶܝܢ܆ ܫܳܬܽܘ̈ܝܰܘܗ̱ܝ ܡܙܰܓ ܒܰܚܠܽܘܠܶܟܝ܆ ܣܰܒܝ ܐܰܟܽܘܠܝ ܢܽܘܪܳܐ ܒܠܰܚܡܳܐ܆ ܘܶܐܫܬܳܝ ܬܽܘܒ ܪܽܘܚܳܐ ܒܚܰܡܪܳܐ܆ ܕܰܒܢܰܚ̈ܬܶܐ ܕܪܽܘܚܳܐ ܕܩܽܘܕܫܳܐ܆ ܥܕܰܡܳܐ ܠܥܳܠܰܡ ܬܶܨܛܰܒܬܺܝܢ܀

ܡܶܢ ܥܳܠܰܡ

ܛܰܠܳܐ ܕܚܰܝ̈ܶܐ܆ ܗܰܘ ܕܶܐܫܬܰܕܰܪ ܡ̣ܶܢ ܐܰܒܳܐ. ܘܪܰܣܶܣ ܐܶܢܽܘܢ ܠܰܛܠܳܝ̈ܶܐ. ܒܓܰܘ ܐܰܬܽܘܢܳܐ ܕܒܳܒܠܳܝ̈ܶܐ. ܗ̣ܽܘ ܢܰܛܶܠ ܥܰܠ ܥܰܢܺܝ̈ܕܶܐ. ܒܬܰܐܘ̈ܳܢܶܐ ܟܡܺܝ̣ܪ̈ܶܐ ܕܰܫܝܽܘܠ. ܘܰܢܚܰܣܶܐ ܒܽܘܨܳܪ̈ܰܝܗܽܘܢ. ܕܥܰܒܕܰܘ̈ܗ̱ܝ ܕܰܫܟܶܒܘ ܥܰܠ ܣܰܒܪܶܗ. ܘܢܰܘܪܶܬ ܐܶܢܽܘܢ ܡܰܠܟܽܘܬܳܐ܆ ܕܠܳܐ ܥܳܒܪܳܐ ܘܠܳܐ ܡܶܫܬܰܪܝܳܐ܀

ܦܶܬܓܳܡܳܐ: ܐܶܬܕܰܟܪ ܠܥܺܕܬܳܐ ܗܳܝ ܕܰܩܢܰܝܬ܆ ܘܰܦܪܰܩܬܳܗ̇ ܒܫܰܒܛܳܐ ܕܝܳܪܬܽܘܬܳܟ ܗܰܠܶܠܽܘܝܰܗ܀

ܒܳܬܰܪ ܐܶܘܰܢܓܶܠܺܝܳܘܢ: ܬܶܫܡܶܫܬܳܐ ܕܥܰܢܺܝ̈ܕܶܐ

ܒܳܥܽܘܬܳܐ ܕܡܳܪܝ ܝܰܥܩܽܘܒ
ܩܽܘܡ ܝܰܡܠܺܝܟܳܐ ܥܽܘܠ ܠܰܡܕܺܝܢ̱ܬܳܐ

ܐܰܘܕܳܝ ܥܺܕܬܳܐ ܒܰܙܡܺܝܪ̈ܳܬܶܟܝ ܫܰܦܺܝܪ̈ܳܬܳܐ܆

ܘܩܰܪܶܒܝ ܠܰܒܪܳܐ ܕܳܫ̈ܢܶܐ ܕܫܽܘܒܚܳܐ ܒܝܽܘܡ ܩܽܘܕܳܫܶܟܝ܀

ܕܽܘܨܝ ܘܶܐܬܪܰܡܪܰܡܝ ܥܺܕܰܬ ܩܽܘܕܫܳܐ ܒܝܽܘܡ ܩܽܘܕܳܫܶܟܝ܆ ܘܝܰܒܶܒܝ ܘܰܩܥܳܝ ܫܽܘܒܚܳܐ ܚܰܕ̱ܬܳܐ ܒܩܳܠܳܐ ܪܳܡܳܐ܆ ܫܰܒܰܚܝ ܘܰܐܘܕܳܝ ܠܚܰܬܢܳܐ ܕܡܰܟܪܶܟܝ ܒܰܙܩܺܝܦܽܘܬܶܗ܆ ܘܰܒܡܶܫܬܽܘܬܶܟܝ ܚܰܕܺܝ ܠܰܐܪܥܳܐ ܐܳܦ ܠܰܫܡܰܝܳܐ܀

ܪܰܒ ܗ̱ܽܘ ܝܰܘܡܳܐ ܗܳܢܳܐ ܕܝܰܘܡܳܢ ܡܶܢ ܟܽܠ ܝܰܘ̈ܡܺܝܢ܆ ܘܰܫܒܺܝܚ ܫܽܘܦܪܶܗ ܕܗܳܢܳܐ ܥܺܐܕܳܐ ܡܶܢ ܟܽܠ ܥܺܐܕܺܝ̈ܢ܆ ܕܳܝܨܳܐ ܥܺܕܬܳܐ ܒܟܶܢܫܳܐ ܕܰܒܢܶܝ̈ܗ̇ ܘܙܳܡܪܳܐ ܫܽܘܒܚܳܐ܆ ܠܚܰܬܢܳܐ ܕܢܳܚܶܬ ܫܳܪܶܐ ܒܓܰܘܳܗ̇ ܘܰܡܩܰܕܶܫ ܠܳܗ̇܀

ܐܰܝܢܳܐ ܕܡܰܩܪܶܒ ܥܰܡܶܟܝ ܥܺܕܬܳܐ ܣܽܘܣܝܶܗ ܢܶܦܶܠ܆

ܘܰܒܗܰܘ ܓܶܐܪܳܐ ܕܡܳܬܚܳܐ ܩܶܫܬܶܗ ܒܣܶܛܪܶܗ ܢܶܒܠܰܥ܀