ܕܨܰܦܪܳܐ

ܥܶܢܝܳܢܳܐ ܕܪܰܚܶܡܥܠܰܝ
ܩܳܠܳܐ ܒܩ̄: ܐܶܡܳܐ ܕܟܺܝܬܳܐ

ܐܳܘ ܪܺܝܫ ܟܳܗ̈ܢܶܐ. ܕܰܫܪܳܪܳܐ ܡܫܺܝܚܳܐ܆ ܥܰܡܳܟ ܢܶܚܕܽܘܢ ܟܳܗ̈ܢܶܐ ܒܡܰܠܟܽܘܬܳܟ܆ ܪܰܚܶܡ ܥܠܰܝܢ ܐܰܠܳܗܳܐ܀

ܟܶܢ̈ܫܶܐ ܕܶܐܬܰܘ. ܕܢܶܙܡܪܽܘܢ ܬܶܫܒܽܘܚܬܳܐ܆ ܒܕܽܘܟܪܳܢ ܥܰܒ̈ܕܰܝܟ܆ ܢܶܣܬܰܬܪܽܘܢ ܒܟܶܢܦܰܳܝ̈ܟ܆ ܪܰܚܶܡ ܥܠܰܝܢ ܐܰܠܳܗܳܐ܀

ܒܟܶܢ̈ܦܶܐ ܕܪ̈ܰܚܡܰܝܟ. ܣܰܬܰܪ ܡܳܪܝ ܠܟܳܗܢܰܝ̈ܟ܆ ܡܳܐ ܕܡܶܬܓܰܠ̈ܝܳܢ ܟܰܣ̈ܝܳܬܳܐ ܟܽܠܗܶܝܢ܆ ܪܰܚܶܡ ܥܠܰܝܢ ܐܰܠܳܗܳܐ܀

ܦܰܓܪ̈ܶܐ ܕܠܰܒܫܽܘܟ. ܡܳܪܰܢ ܒܰܥܡܳܕܳܐ܆ ܠܳܐ ܡܳܪܝ ܬܶܣܥܶܐ ܥܠܰܝܗܽܘܢ ܓܺܗܰܢܳܐ܆ ܪܰܚܶܡ ܥܠܰܝܢ ܐܰܠܳܗܳܐ܀

ܚܽܘܣ ܥܰܠ ܨܰܠܡܳܐ. ܗܰܘ ܕܰܓܒܰܠ̈ܝ ܐܺܝܕܰܝ̈ܟ܆ ܕܠܳܐ ܢܰܗܶܠ ܒܶܗ ܡܰܘܬܳܐ ܒܓܰܘ ܩܰܒܪ̈ܶܐ܆ ܪܰܚܶܡ ܥܠܰܝܢ ܐܰܠܳܗܳܐ܀

ܐܰܠܳܗܝ ܐܰܠܳܗܝ
ܩܳܠܳܐ ܒܩ̄: ܒܬܽܘܠܬܳܐ ܝܶܠܕܰܬ ܕܽܘܡܳܪܳܐ

ܢܚܶܬ ܐܰܠܳܗܳܐ ܠܒܶܝܬ ܡܺܝ̈ܬܶܐ܆ ܘܰܒܕܰܩ ܗ̱ܘܳܐ ܨܰܠܡܶܗ ܕܰܐܫܚܶܬ ܒܰܚܒܳܠܳܐ܆ ܘܚܰܕܬܶܗ ܡܶܢ ܥܓܳܢܳܗ̇ ܕܰܫܝܽܘܠ܆ ܘܰܐܩܺܝܡܶܗ ܡܶܢ ܡܰܦܽܘܠܬܶܗ܆ ܘܝܰܗ̱ܒܠܶܗ ܦܰܓܪܶܗ ܘܰܕܡܶܗ܆ ܪܰܗܒܽܘܢܳܐ ܕܚܰܝ̈ܶܐ ܚܰܕ̱̈ܬܶܐ܀

ܠܟܳܗ̈ܢܶܐ ܥܰܒܕܰܝ̈ܟ ܕܰܫܟܶܒܘ ܒܳܟ܆ ܝܶܫܽܘܥ ܦܳܪܽܘܩܰܢ ܣܰܒܪܳܐ ܫܰܪܺܝܪܳܐ܆ ܐܰܢܺܝܚ ܐܶܢܽܘܢ ܒܰܓܢܽܘܢܳܟ܆ ܒܝܰܘܡܳܐ ܪܰܒܳܐ ܕܡܶܐܬܺܝܬܳܟ܆ ܘܰܒܡܰܠܟܽܘܬܳܟ ܢܶܬܒܰܣܡܽܘܢ܆ ܥܰܡ ܟܺܐܢ̈ܶܐ ܘܙܰܕܺܝ̈ܩܶܐ ܕܪܰܚܡܽܘܟ܀

ܚܰܢܳܢܳܐ ܘܪܳܚܶܡ ܐ̱ܢܳܫ̈ܳܐ܆ ܡܰܠܟܳܐ ܫܡܰܝܳܢܳܐ ܘܒܳܪܽܘܝܳܐ ܕܥܳܠ̈ܡܶܐ܆ ܚܽܘܣ ܥܰܠ ܥܰܒܕܰܝ̈ܟ ܕܒܶܝܬ ܩܽܘܕܫܳܐ܆ ܫܰܡܶܫܘ ܘܪܰܚܦܽܘܟ ܥܰܠ ܡܰܕܒܚܳܐ܆ ܘܰܐܫܘܳܐ ܐܶܢܽܘܢ ܡܳܪܰܢ܆ ܕܒܰܡ̈ܛܰܠ̱ܠܶܐ ܕܢܽܘܗܪܳܐ ܢܶܬܬܢܺܝܚܽܘܢ܀

ܡܳܐ ܕܩܳܪܝܳܐ ܩܰܪܢܳܐ ܒܪܰܘܡܳܐ܆ ܘܥܳܐܠܳــ̈ܢ ܟܽܠ ܫܰܪ̈ܒܳܢ ܩܕܳܡ ܒܺܐܡܰܐ ܕܚܺܝܠܬܳܐ܆ ܚܽܘܣ ܥܰܠ ܦܰܓܪ̈ܶܐ ܘܢܰܦ̈ܫܳܬܳܐ܆ ܕܥܰܒܕܰܝ̈ܟ ܕܰܫܟܶܒܘ ܥܰܠ ܣܰܒܪܳܟ܆ ܘܰܐܫܘܳܐ ܐܶܢܽܘܢ ܕܢܶܩܥܽܘܢ܆ ܒܪܺܝܟܳܐ ܗ̱ܝ ܡܶܐܬܺܝܬܳܟ ܡܳܪܝܳܐ܀

ܫܡܰܝ̈ܳܐ ܡܶܫܬܰܥܶܝܢ
ܩܳܠܳܐ ܒܩ̄: ܗܰܘ ܕܩܳܡ ܡܶܢ ܒܶܝܬ ܡܺܝ̈ܬܶܐ

ܡܳܐ ܕܬܳܩܶܢ ܟܽܘܪܣܰܝ ܕܺܝܢܳܐ܆ ܘܝܳܬܶܒ ܕܰܝܳܢܳܐ ܕܥܳܠ̈ܡܶܐ܆ ܘܥܳܐܠܺܝܢ ܥܰܡ̱̈ܡܶܐ ܠܒܽܘܚܪܳܢܳܐ܆ ܚܽܘܣ ܡܳܪܝ ܥܰܠ ܫܩܺܝܠܰܝ̈ ܦܰܓܪܳܟ܆ ܐܰܟܚܕܳܐ ܫܰܒܚܽܘܗ̱ܝ ܘܪܰܡܪܡܽܘܗ̱ܝ ܠܥܳܠܰܡ ܥܳܠܡܺܝܢ܀

ܡܳܐ ܕܕܰܝܳܢܳܐ ܡܶܬܠܰܚܰܡ܆ ܘܓܳܥܰܪ ܒܥܳܒ̈ܕܰܝ ܒܺܝ̈ܫܳܬܳܐ܆ ܚܢܳܢܳܟ ܢܶܚܙܽܘܢ ܒܒܶܝܬ ܕܺܝܢܳܐ܆ ܟܳܗ̈ܢܶܐ ܕܙܰܝܚܽܘܟ ܥܰܠ ܡܰܕܒܚܳܐ܆ ܐܰܟܚܕܳܐ ܫܰܒܚܽܘܗ̱ܝ ܘܪܰܡܪܡܽܘܗ̱ܝ ܠܥܳܠܰܡ ܥܳܠܡܺܝܢ܀

ܐܳܘ ܓܳܒܽܘܠܶܗ ܕܰܟܝܳܢܰܢ܆ ܕܰܓܒܰܠܬܳܝܗ̱ܝ ܠܳܐܕܳܡ ܒܨܰܠܡܳܟ܆ ܘܡܶܢ ܕܰܚܛܳܐ ܘܰܫܪܰܥ ܘܰܢܦܰܠ܆ ܗܦܰܟܬ ܘܰܐܚܺܝܬܳܝܗ̱ܝ ܒܝܰܕ ܩܶܛܠܳܟ܆ ܐܰܟܚܕܳܐ ܫܰܒܚܽܘܗ̱ܝ ܘܪܰܡܪܡܽܘܗ̱ܝ ܠܥܳܠܰܡ ܥܳܠܡܺܝܢ܀

ܚܰܕܳܐ ܐܶܢܽܘܢ ܒܰܓܢܽܘܢܳܟ܆ ܘܢܶܬܬܢܺܝܚܽܘܢ ܥܰܡ ܩܰܕܺܝܫܰܝ̈ܟ܆ ܘܰܢܝܰܒܒܽܘܢ ܠܳܟ ܬܶܫܒܽܘܚܬܳܐ܆ ܥܰܡ ܥܺܝܪ̈ܶܐ ܘܥܰܡ ܡܰܠܰܐܟ̈ܶܐ܆ ܐܰܟܚܕܳܐ ܫܰܒܚܽܘܗ̱ܝ ܘܪܰܡܪܡܽܘܗ̱ܝ ܠܥܳܠܰܡ ܥܳܠܡܺܝܢ܀

ܫܽܘܒܚܳܐ ܠܳܟ ܡܳܪܳܐ ܛܳܒܳܐ܆ ܕܰܐܓܥܶܠܬ ܬܶܫܡܶܫܬܳܐ ܙܗܺܝܬܳܐ܆ ܠܟܳܗ̈ܢܶܐ ܘܝܰܗ̱ܒܬ ܠܗܽܘܢ ܫܽܘܠܛܳܢܳܐ܆ ܕܰܢܫܰܡܫܽܘܢܳܟ ܒܕܰܟܝܽܘܬܳܐ܆ ܐܰܟܚܕܳܐ ܫܰܒܚܽܘܗ̱ܝ܀

ܬܶܫܒܽܘܚܬܳܐ ܚܕܰܬܳܐ
ܩܳܠܳܐ ܒܩ̄: ܐܰܢ̱ܬ ܕܰܒܪܺܝܫܺܝܬ

ܐܰܢ̱ܬ ܡܳܪܝ ܒܪ̈ܰܚܡܰܝܟ܆ ܡܶܢ ܥܰܦܪܳܐ ܓܒܰܠܬܳܝܗ̱ܝ ܠܳܐܕܳܡ܆ ܘܨܰܠܡܳܟ ܚܰܝܳܐ܆ ܐܰܠܒܶܫܬܳܝܗ̱ܝ ܐܰܝܟ ܐܰܠܳܗܳܐ܆ ܡܒܰܪܟܳܐ ܓܶܝܪ ܐܺܝܬܰܝܟ܀

ܐܰܢ̱ܬ ܡܳܪܝ ܕܟܶܢ̈ܫܶܐ܆ ܕܢܽܘܪܳܐ ܘܪܽܘܚܳܐ ܡܫܰܡܫܺܝܢ ܠܳܟ܆ ܘܡܶܢ ܥܰܦܪ̈ܳܢܶܐ܆ ܨܒܰܝܬ ܕܬܶܫܬܰܡܰܫ ܕܰܫܦܰܪ ܠܳܟ܆ ܡܒܰܪܟܳܐ ܓܶܝܪ ܐܺܝܬܰܝܟ܀

ܡܳܐ ܕܓܽܘܥܠܳܢܳܐ܆ ܘܚܽܘܫܒܳܢܳܐ ܕܟܰܟܪ̈ܶܐ ܬܳܒܥܰܬ܆ ܡܶܢ ܒܢܰܝ̈ ܒܰܝܬܳܟ܆ ܚܽܘܣ ܥܠܰܝ ܕܟܰܟܪܳܐ ܩܰܒܠܶܬ܆ ܡܒܰܪܟܳܐ ܓܶܝܪ ܐܺܝܬܰܝܟ܀

ܒܥܽܘܒܶܗ ܕܰܐܒܪܳܗܳܡ܆ ܘܕܺܐܝܣܚܳܩ ܘܰܕܟܺܐܢܳܐ ܝܰܥܩܽܘܒ܆ ܐܰܫܪܳܐ ܘܰܐܢܺܝܚ܆ ܠܢܰܦ̈ܫܳܬܳܐ ܕܥܰܒ̈ܕܶܐ ܕܺܝܠܳܟ܆ ܡܒܰܪܟܳܐ ܓܶܝܪ ܐܺܝܬܰܝܟ܀

ܫܰܒܰܚܘ ܥܰܒ̈ܕܰܘܗ̱ܝ ܕܡܳܪܝܳܐ
ܩܳܠܳܐ ܒܩ̄: ܒܥܶܕܳܢ ܨܰܦܪܳܐ

ܟܳܗ̈ܢܶܐ ܕܫܰܡܫܽܘܟ. ܙܰܗܝܳܐܺܝܬ ܒܥܺܕܬܳܐ ܕܰܐܪ̈ܥܳܢܶܐ܆ ܒܥܺܕܬܳܐ ܕܒܽܘܟܪ̈ܶܐ ܕܒܰܫܡܰܝܳܐ ܢܟܰܗܢܽܘܢ ܠܳܟ܆ ܫܽܘܒܚܳܐ ܠܳܟ ܐܰܠܳܗܳܐ܀

ܒܗܰܘ ܥܶܕܳܢܳܐ. ܕܝܳܬܶܒ ܐܰܢ̱ܬ ܕܰܬܕܽܘܢ ܫܰܪ̈ܒܳܬܳܐ܆ ܚܽܘܢ ܠܥܰܒܕܰܝ̈ܟ ܟܳܗ̈ܢܶܐ ܒܛܰܝܒܽܘܬܳܟ ܕܢܶܩܥܽܘܢ ܠܳܟ܆ ܫܽܘܒܚܳܐ ܠܳܟ ܐܰܠܳܗܳܐ܀

ܠܳܐ ܡܳܪܝ ܬܶܡܢܶܐ܆ ܠܟܳܗ̈ܢܶܐ ܕܫܰܡܫܽܘܟ ܒܒܶܝܬ ܩܽܘܕܫܳܐ܆ ܥܰܡ ܗܰܘ ܥܰܒܕܳܐ ܒܰܛܺܝܠܳܐ ܕܛܰܫܺܝ ܟܰܟܪܶܗ܆ ܫܽܘܒܚܳܐ ܠܳܟ ܐܰܠܳܗܳܐ܀

ܬܰܘ ܚܰܒܺܝܒܰܝ̈. ܢܶܬܟܰܢܰܫ ܒܰܚܕܳܐ ܐܰܘܝܽܘܬܳܐ܆ ܘܢܶܥܒܶܕ ܕܽܘܟܪܳܢܳܐ ܠܟܳܗ̈ܢܶܐ ܘܰܢܫܰܒܰܚ܆ ܫܽܘܒܚܳܐ ܠܳܟ ܐܰܠܳܗܳܐ܀

ܟܺܐܢ̈ܶܐ ܕܰܥܢܰܕܘ܆ ܡܶܢ ܚܰܝ̈ܶܐ ܕܥܳܠܡܳܐ ܥܳܒܽܘܪܳܐ܆ ܥܰܠ ܦܳܬܽܘܪܳܟ ܢܶܬܒܰܣܡܽܘܢ ܘܰܢܫܰܒܚܽܘܢ܆ ܫܽܘܒܚܳܐ ܠܳܟ ܐܰܠܳܗܳܐ܀

ܚܠܳܦ ܕܰܗܘܰܘ ܠܳܟ܆ ܐܰܚ̈ܶܐ ܡܶܢ ܡܰܥܡܽܘܕܺܝܬܳܐ܆ ܗܘܺܝ ܠܗܽܘܢ ܪܳܚܡܳܐ ܘܩܰܪܺܝܒܳܐ ܒܰܓܢܽܘܢ ܢܽܘܗܪܳܐ܆ ܫܽܘܒܚܳܐ ܠܳܟ ܐܰܠܳܗܳܐ܀

ܛܽܘܒܰܝܗܽܘܢ ܠܡܶܣ̈ܟܺܢܶܐ
ܩܳܠܳܐ ܒܩ̄: ܒܪܳܐ ܕܰܒܚܽܘܒܶܗ

ܒܪܺܝܟ ܕܰܓܒܳܐ ܠܶܗ܆ ܥܰܦܪ̈ܳܢܶܐ ܒܢܰܝ̈ ܕܰܚܺܝܚܳܐ܆ ܘܰܥܒܰܕ ܐܶܢܽܘܢ ܪ̈ܽܘܚܳܢܶܐ ܘܝܰܗ̱ܒ ܠܗܽܘܢ ܫܽܘܠܛܳܢܳܐ܆ ܘܗܳܐ ܡܫܰܒܚܺܝܢ ܠܶܗ ܕܠܳܐ ܫܶܠܝܳܐ܆ ܒܰܓܢܽܘܢ ܢܽܘܗܪܳܐ ܕܚܰܕ̈ܘܳܬܳܐ܆ ܐܶܬܕܰܟܪܰܝܢ ܡܳܐ ܕܳܐܬܶܐ ܐܰܢ̱ܬ܀

ܡܳܐ ܕܝܳܬܶܒ ܐܰܢ̱ܬ܆ ܥܰܠ ܒܺܐܡܰܐ ܕܫܰܠܗܶܒܺܝܬܳܐ܆ ܘܰܟܪܺܝܟܺܝܢ ܠܳܟ ܡܫܰܡ̈ܫܳܢܶܐ ܕܢܽܘܪܳܐ ܘܪܽܘܚܳܐ܆ ܠܳܐ ܡܳܪܝ ܬܶܫܕܶܐ ܠܥܰܒܕܰܝ̈ܟ ܕܫܰܡܫܽܘܟ ܒܒܶܝܬ ܩܽܘܕܫܳܐ܆ ܐܶܬܕܰܟܪܰܝܢ ܡܳܐ ܕܳܐܬܶܐ ܐܰܢ̱ܬ܀

ܡܳܪܰܢ ܝܶܫܽܘܥ܆ ܡܳܐ ܕܥܳܐܠܺܝܢ ܟܳܗ̈ܢܶܐ ܩܕܳܡܰܝܟ܆ ܕܰܢܩܰܪܒܽܘܢ ܠܳܟ ܓܽܘ̈ܥܠܳܢܶܐ ܕܟܰܟܪ̈ܶܐ ܕܰܢܣܰܒܘ܆ ܬܶܟܪܶܐ ܠܳܟ ܡܳܪܝ ܒܗܳܝ ܫܳܥܬܳܐ ܘܰܬܚܽܘܢ ܐܶܢܽܘܢ ܛܰܝܒܽܘܬܳܟ܆ ܐܶܬܕܰܟܪܰܝܢ ܡܳܐ ܕܳܐܬܶܐ ܐܰܢ̱ܬ܀

ܡܳܐ ܕܫܺܝܦܽܘܪܳܐ܆ ܡܰܙܥܶܩ ܒܰܐܪܒܰܥ ܦܶܢ̈ܝܳܬܳܐ܆ ܘܡܶܬܬܥܺܝܪܺܝܢ ܟܽܠܗܽܘܢ ܕܰܡ̈ܟܶܐ ܡܶܢ ܫܶܢܬܳܐ ܕܡܰܘܬܳܐ܆ ܠܳܐ ܡܳܪܝ ܬܶܓܠܽܘܙ ܡܶܢ ܪ̈ܰܚܡܶܐ. ܠܟܳܗ̈ܢܶܐ ܕܰܓܒܰܝܬ ܠܬܶܫܡܶܫܬܳܟ܆ ܐܶܬܕܰܟܪܰܝܢ ܡܳܐ ܕܳܐܬܶܐ ܐܰܢ̱ܬ܀

ܫܽܘܒܚܳܐ

ܡܳܪܰܢ ܝܶܫܽܘܥ܆ ܕܪܳܥܶܗ ܐܳܦ ܬܽܘܩܦܶܗ ܕܰܐܒܳܐ܆ ܢܰܚܶܡ ܒܚܰܝܠܳܟ ܥܰܫܺܝܢܳܐ ܠܡܺܝ̈ܬܶܐ ܕܰܒܩܰܒܪ̈ܶܐ܆ ܘܰܐܠܒܶܫ ܐܶܢܽܘܢ ܬܶܫܒܽܘܚܬܳܐ܆ ܘܡܶܢ ܝܰܡܺܝܢܳܟ ܢܶܬܒܰܣܡܽܘܢ܆ ܐܶܬܕܰܟܪܰܝܢ ܡܳܐ ܕܳܐܬܶܐ ܐܰܢ̱ܬ܀

ܩܳܠܳܐ ܕܨܰܦܪܳܐ
ܩܳܠܳܐ ܒܩ̄: ܦܬܰܚ ܠܺܝ ܬܰܪܥܶܗ ܕܰܚܢܳܢܳܟ
ܒܪܺܝܟܽ ܗ̱ܘ ܕܰܐܘܪܶܒܗ ܠܢܽܘܚܳܡܰܢ (ܣܳܠܶܩ: ܒܶܐܢܳܐ ܐ̱ܢܳܐ ܢܽܘܗܪܳܐ ܫܰܪܺܝܪܳܐ)

ܒܢܰܝ̈ ܬܶܫܡܶܫܬܰܢ ܕܩܰܒܶܠܘ ܡܳܪܝ܆ ܢܺܝܪܳܟ ܚܰܝܳܐ ܘܠܰܫܪܳܪܳܟ ܪܚܶܡܘ܆ ܘܟܽܠܶܗ ܙܰܒܢܳܐ ܕܚܰܝܰܝ̈ܗܽܘܢ܆ ܦܠܰܚܘ ܘܰܠܐܺܝܘ ܒܓܰܘ ܒܶܝܬ ܩܽܘܕܫܳܐ܆ ܢܶܚܙܽܘܢܳܟ ܒܓܰܠܝܽܘܬ ܐܰܦ̈ܶܐ܆ ܒܝܰܘܡܳܐ ܪܰܒܳܐ ܕܡܶܐܬܺܝܬܳܟ܆ ܘܢܶܚܕܽܘܢ ܒܰܓܢܽܘܢܳܟ܆ ܡܳܐ ܕܡܶܬܢܰܚܡܺܝܢ ܡܶܢ ܥܰܦܪܳܐ܀

ܫܽܘܒܚܳܐ

ܒܰܫܡܰܝܳܐ ܘܒܰܐܪܥܳܐ ܪܫܺܝܡܺܝܢ܆ ܕܽܘܟܪ̈ܳܢܰܝܗܽܘܢ ܕܰܪ̈ܚܽܘܡܰܝܟ ܡܳܪܝ܆ ܕܰܫܩܰܠܘ ܢܺܝܪܳܟ ܒܰܣܺܝܡܳܐ܆ ܘܒܰܩܝܳܡܰܝ̈ܗܽܘܢ ܐܶܫܬܰܪܰܪܘ܆ ܘܗܳܐ ܥܒܺܝܕܺܝܢ ܫܽܘܪܳܐ ܝܰܘܡܳܢ܆ ܠܰܐܝܢܳܐ ܕܰܒܗܽܘܢ ܡܶܬܓܰܘܰܣ܆ ܘܰܒܗܰܝܡܳܢܽܘܬܳܐ܆ ܡܶܫܬܰܘܬܰܦ ܒܕܽܘܟܪ̈ܳܢܰܝܗܽܘܢ܀

ܡܶܢ ܥܳܠܰܡ

ܥܰܢܺܝ̈ܕܶܐ ܕܰܫܩܰܠܘ̱ ܦܰܓܪܳܟ܆ ܘܒܰܕܡܳܟ ܚܰܝܳܐ ܬܽܘܒ ܐܶܬܚܰܣܺܝܘ. ܥܒܶܕ ܠܗܽܘܢ ܡܳܪܰܢ ܕܽܘܟܪܳܢܳܐ܆ ܒܽܐܘܪܺܫܠܶܝܡ ܗܳܝ ܕܒܰܫܡܰܝܳܐ. ܘܡܳܐ ܕܝܳܬܒܰܬ ܥܰܠ ܒܺܐܡ ܕܺܝܠܳܟ܆ ܘܦܳܪܫܰܬ ܛܳܒ̈ܶܐ ܡܶܢ ܒܺܝ̈ܫܶܐ. ܒܰܐܦ̈ܶܐ ܓܰܠ̈ܝܳܬܳܐ܆ ܢܩܽܘܡܽܘܢ ܡܳܪܝ ܡܶܢ ܝܰܡܺܝܢܳܟ܀

ܐ̱ܚܪܺܢܳܐ

ܩܳܠܳܐ ܒܩ̄: ܥܰܠ ܒܶܝܬ ܠܚܶܡ
ܩܪܳܐ ܠܶܗ ܡܳܪܝܳܐ ܠܡܽܘܫܶܐ ܒܰܪ ܥܰܡܪܰܡ

ܩܪܳܐ ܠܶܗ ܡܳܪܝܳܐ܆ ܠܡܽܘܫܶܐ ܒܰܪ ܥܰܡܪܰܡ܆ ܘܰܐܣܩܶܗ ܗ̱ܘܳܐ ܠܛܽܘܪܳܐ ܕܢܳܒܽܘ܆ ܘܡܰܠܶܠ ܥܰܡܶܗ܆ ܗܳܟܰܢ ܐܶܡܰܪ ܠܶܗ܆ ܬܳܐ ܠܳܟ ܡܽܘܫܶܐ܆ ܘܶܐܬܬܢܺܝܚ ܡܶܢ ܥܰܡܠܰܝ̈ܟ܆ ܘܶܐܫܬܰܥܒܰܕ ܠܰܓܙܳܪ ܕܺܝܢܳܐ ܕܰܐܒܽܘܟ ܐܳܕܳܡ܆ ܬܳܐ ܡܽܘܬ ܐܰܟܘܳܬܶܗ܆ ܡܶܚܕܳܐ ܕܰܫܡܰܥ܆ ܟܺܐܢܳܐ ܕܡܳܐܶܬ ܠܶܗ܆ ܟܶܪܝܰܬ ܠܶܗ ܘܰܫ̈ܦܰܥܝ ܕܶܡܥܰܘ̈ܗ̱ܝ܆ ܘܫܰܪܺܝ ܒܳܟܶܐ ܘܗܳܟܰܢ ܐܳܡܰܪ ܗ̱ܘܳܐ܆ ܐܰܝܟܰܢ ܡܳܪܝܳܐ܆ ܗܳܪܟܳܐ ܡܳܐܶܬ ܐ̱ܢܳܐ܆ ܠܳܐ ܓܶܢܣܳܐ ܐܳܦܠܳܐ ܛܽܘܗܡܳܐ ܘܠܳܐ ܒܰܪܢܳܫܳܐ܆ ܐܺܝܬ ܕܰܡܠܰܘܶܐ ܠܺܝ܆ ܠܰܒܒܶܗ ܡܳܪܝܳܐ܆ ܠܟܺܐܢܳܐ ܘܶܐܡܰܪ ܠܶܗ܆ ܕܗܳܐ ܡܰܠܰܐܟ̈ܰܝ ܡܠܰܘܶܝܢ ܠܳܟ܆ ܘܶܐܢܳܐ ܒܺܐܝ̈ܕܰܝ ܗܳܐ ܡܥܰܦܶܐ ܐ̱ܢܳܐ ܠܳܟ܆ ܐܰܦܶܣ ܪܶܡܙܶܗ܆ ܠܡܰܠܰܐܟܰܝ̈ ܢܽܘܗܪܳܐ܆ ܘܰܟܢܰܫܘ ܓܽܘ̈ܕܶܐ ܕܪ̈ܽܘܚܳܢܶܐ ܥܰܦܝܽܘܗ̱ܝ ܘܣܳܡܽܘܗ̱ܝ܆ ܒܓܰܘ ܛܽܘܪܳܐ ܕܢܳܒܽܘ܆ ܛܰܫܺܝ ܡܳܪܝܳܐ܆ ܠܩܰܒܪܶܗ ܕܰܢܒܺܝܳܐ܆ ܡܶܢ ܥܰܡܳܐ ܐܺܝܣܰܪܠܳܝܳܐ܆ ܗ̄ ܥܕܰܡܳܐ ܠܝܰܘܡܳܢܳܐ܀

ܫܽܘܒܚܳܐ

ܣܠܶܩ ܗ̱ܘܳܐ ܠܛܽܘܪܳܐ܆ ܡܽܘܫܶܐ ܒܰܪ ܥܰܡܪܰܡ܆ ܘܰܕܒܰܪ ܗ̱ܘܳܐ ܠܰܐܗܪܽܘܢ ܐܰܚܽܘܗ̱ܝ܆ ܘܠܶܐܠܺܝܥܳܙܳܪ ܘܰܠܛܽܘܪܳܐ ܣܠܶܩ ܗ̱ܘܳܐ܆ ܘܰܫܠܰܚ ܡܽܘܫܶܐ܆ ܡܳܐܢ̈ܶܐ ܕܟܳܗܢܽܘܬܳܐ܆ ܡܶܢ ܐܰܗܪܽܘܢ ܟܽܠܗܽܘܢ ܢܰܚ̈ܬܰܘܗ̱ܝ܆ ܘܥܰܪܛܶܠܳܐܺܝܬ ܩܳܡ ܟܳܗܢܳܐ ܙܰܗܝܳܐ܆ ܘܰܩܪܳܐ ܡܳܪܝܳܐ܆ ܠܡܽܘܫܶܐ ܘܶܐܡܰܪ ܠܶܗ܆ ܩܪܽܘܒ ܗܰܒܠܶܗ ܫܠܳܡܳܐ ܠܰܐܚܽܘܟ܆ ܘܶܐܠܳܐ ܡܰܘܬܳܐ ܠܳܐ ܡܨܶܐ ܩܳܪܶܒ ܠܶܗ܆ ܘܰܩܪܶܒ ܡܽܘܫܶܐ܆ ܘܝܰܗ̱ܒ ܗ̱ܘܳܐ ܠܶܗ ܫܠܳܡܳܐ܆ ܘܶܐܫܬܰܠܰܛ ܗ̱ܘܳܐ ܒܶܗ ܡܰܘܬܳܐ܆ ܘܛܰܥܡܶܗ ܠܟܳܣܳܐ܆ ܗܰܘ ܕܰܡܙܰܓ ܐܳܕܳܡ܆ ܒܪܺܝܟܽ ܗ̱ܘ ܡܳܪܝܳܐ܆ ܕܝܰܩܺܝܪܽ ܗ̱ܘ ܒܥܰܝܢܰܘ̈ܗ̱ܝ܆ ܡܰܘܬܳܐ ܕܟܺܐܢ̈ܶܐ ܘܙܰܕܺܝ̈ܩܶܐ܆ ܗ̄ ܕܰܢܛܰܪܘ ܦܽܘ̈ܩܕܳܢܰܘܗ̱ܝ܀

ܡܶܢ ܥܳܠܰܡ

ܥܰܠ ܒܶܝܬ ܥܰܢܝܳܐ. ܩܪܺܝܬܳܐ ܥܳܒܰܪ ܗܘܺܝܬ. ܘܩܳܠܳܐ ܕܒܶܟܝܳܐ ܫܳܡܰܥ ܗܘܺܝܬ: ܬܰܪܬܶܝܢ ܐܰܚ̈ܘܳܢ܆ ܕܰܠܝܶܫܽܘܥ ܐܳܡܪ̈ܳܢ. ܕܶܐܠܽܘ ܬܢܳܢ ܗܘܰܝܬ: ܚܰܢܳܢܳܐ ܡܳܪܰܢ. ܠܳܥܳܙܳܪ ܠܳܐ ܡܳܐܶܬ ܗ̱ܘܳܐ. ܐܰܚܳܐ ܕܺܝܠܰܢ. ܐܳܦ ܪܳܚܡܳܐ ܕܺܝܠܳܟ. ܕܰܐܢ̱ܬ ܫܰܕܰܪܬܳܝܗ̱ܝ܆ ܠܗܳܡܳܢ ܕܰܩܒܺܝܪ̈ܶܐ. ܕܢܰܟܪܶܙ ܒܳܗ̇ ܚܰܝܰܬ ܡܺܝ̈ܬܶܐ܆ ܩܝܳܡܬܳܐ ܚܕܰܬܳܐ ܠܟܽܠܗܽܘܢ ܥܰܢܝ̈ܕܶܐ. ܒܪܺܝܟܽ ܗܘ ܡܫܺܝܚܳܐ: ܕܰܩܪܳܝܗ̱ܝ ܘܰܐܩܺܝܡܶܗ܆ ܠ‍ܠܳܥܳܙܳܪ ܡܶܢ ܓܰܘ ܩܰܒܪܳܐ ܗ̄ ܘܝܰܗܒܶܗ ܠܰܐܚ̈ܘܳܬܶܗ܀

ܦܶܬܓܳܡܳܐ: ܟܳܗܢܰܝ̈ܟ ܢܶܠܒܫܽܘܢ ܙܰܕܺܝܩܽܘܬܳܐ܆ ܘܙܰܕܺܝܩܰܝ̈ܟ ܫܽܘܒܚܳܐ܆ ܗܰܠܶܠܽܘܝܰܗ܀

ܒܳܥܽܘܬܳܐ ܕܡܳܪܝ ܝܰܥܩܽܘܒ
ܒܪܳܐ ܕܒܰܨܠܺܝܒܶܗ ܦܰܪܩܳܗ̇ ܠܥܺܕܬܶܗ

ܠܟܳܗܢܰܝ̈ܟ ܐܰܢܺܝܚ ܒܰܝܢܳܬ ܟܺܐܢ̈ܶܐ ܒܪܳܐ ܕܰܐܠܳܗܳܐ܆

ܒܗܳܝ ܡܰܠܟܽܘܬܳܐ ܕܠܳܐ ܡܶܫܬܰܪܝܳܐ ܥܰܡ ܩܰܕܺܝܫܰܝ̈ܟ܀

ܪܰܒܽ ܗ̱ܘ ܒܥܰܝܢܰܘ̈ܗ̱ܝ ܕܡܳܐ ܕܚܰܒܺܝܒܰܘ̈ܗ̱ܝ ܕܡܺܝܬܘ ܥܰܠ ܣܰܒܪܶܗ܆ ܘܒܳܬܰܪ ܡܰܘܬܳܐ ܡܚܰܘܶܐ ܚܽܘܒܶܗ ܕܪܰܒ ܨܶܐܕܰܝܗܽܘܢ܆ ܠܶܘܝܰܐ ܗ̱ܘ ܛܳܒܳܐ ܠܰܐܝܢܳܐ ܕܪܰܚܡܶܗ ܘܰܗܘܳܐ ܥܰܡܶܗ܆ ܠܳܐ ܡܰܪܦܶܐ ܠܶܗ ܐܳܦܠܳܐ ܒܡܰܘܬܳܐ ܕܢܶܬܢܰܟܪܶܐ ܠܶܗ܀

ܫܽܘܒܚܳܐ ܠܰܐܒܳܐ ܕܢܰܨܰܚ ܐܶܢܽܘܢ ܠܟܺܐܢ̈ܶܐ ܥܰܒܕܰܘ̈ܗ̱ܝ܆ ܣܶܓܕܬܳܐ ܠܰܒܪܳܐ ܕܰܐܓܥܶܠ ܠܗܽܘܢ ܟܽܠ ܫܽܘ̈ܠܛܳܢܺܝܢ܆ ܬܰܘܕܺܝ ܠܪܽܘܚܳܐ ܕܰܒܝܽܘܡ ܩܝܳܡܬܳܐ ܡܰܥܒܰܪ ܠܗܽܘܢ܆ ܘܒܶܝܬ ܡܰܠܟܽܘܬܳܐ ܡܰܣܡܶܟ ܠܗܽܘܢ ܠܶܗ ܬܶܫܒܽܘܚܬܳܐ܀

ܡܫܺܝܚܳܐ ܕܺܐܝܬܰܝܟ ܡܳܪܳܐ ܕܟܽܘܡܪ̈ܶܐ ܘܪܰܒܳܐ ܕܟܳܗ̈ܢܶܐ܆

ܚܰܣܳܐ ܠܟܳܗܢܰܝ̈ܟ ܕܫܰܡܶܫܘ ܐ̱ܪ̈ܳܙܰܝܟ ܘܠܳܟ ܬܶܫܒܽܘܚܬܳܐ܀