ܕܨܰܦܪܳܐ

ܥܶܢܝܳܢܳܐ ܕܪܰܚܶܡܥܠܰܝ
ܩܳܠܳܐ ܒܩ̄: ܠܳܐ ܬܶܥܽܘܠ ܠܕܺܝܢܳܐ

ܡܫܺܝܚܳܐ ܕܗܽܘ ܩܰܕܶܫ܆ ܡܰܝ̈ܳܐ ܒܰܥܡܳܕܶܗ܆ ܩܰܕܶܫ ܢܰܦ̈ܫܳܬܰܢ܆ ܕܢܶܙܡܪ̈ܳܢ ܠܳܟ ܫܽܘܒܚܳܐ܀

ܡܶܛܽܠ ܦܽܘܪܩܳܢܳܐ܆ ܕܓܶܢܣܰܢ ܡܳܝܽܘܬܳܐ܆ ܡܫܺܝܚܳܐ ܒܢܰܗܪܳܐ ܥܡܰܕ܆ ܘܩܰܕܶܫ ܡܰܒܽܘ̈ܥܶܐ܀

ܝܰܘܡܳܢܳܐ ܐܰܙܥܶܩ܆ ܝܽܘܚܰܢܳܢ ܓܰܒܝܳܐ. ܕܗܳܢܰܘ ܕܶܐܡܪܶܬ ܠܟܽܘܢ܆ ܕܒܰܝܢܳܬܟܽܘܢ ܩܳܐܶܡ܀

ܐܰܒܳܐ ܐܰܙܥܶܩ ܗ̱ܘܳܐ܆ ܕܗܳܢܰܘ ܒܶܪܝ ܚܰܒܺܝܒܝ܆ ܘܪܽܘܚܳܐ ܐܰܝܟ ܝܰܘܢܳܐ܆ ܢܶܚܬܰܬ ܥܰܠ ܪܺܝܫܶܗ܀

ܐ̱ܚܪܺܢܳܐ

ܩܳܠܳܐ ܒܩ̄: ܫܠܳܡܠܶܟܝ ܡܰܠܝܰܬ ܛܰܝܒܽܘܬܳܐ

ܒܗܳܢܳܐ ܝܰܘܡܳܐ ܕܰܥܡܳܕܶܗ: ܕܺܝܚܺܝܕܳܝܳܐ ܡܫܺܝܚܳܐ ܕܡܶܢ ܐܰܒܳܐ: ܚܳܕܝܳܐ ܬܺܒܶܝܠ ܡܶܢ ܣܳܟܳܗ̇: ܘܙܳܡܪܳܐ ܫܽܘܒܚܳܐ ܒܝܰܘܡܳܐ ܕܰܥܡܳܕܶܗ܀

ܒܗܳܢܳܐ ܝܰܘܡܳܐ ܐܶܬܩܰܕܫܰܬ: ܡܰܥܡܽܘܕܺܝܬܳܐ ܥܰܠ ܝܽܘܪܕܢܳܢ ܢܰܗܪܳܐ: ܒܰܥܡܳܕܶܗ ܕܒܰܪ ܐܰܠܳܗܳܐ: ܕܡܶܢ ܝܽܘܚܰܢܳܢ ܟܳܪܽܘܙܳܐ ܕܩܽܘܫܬܳܐ܀

ܒܗܳܢܳܐ ܝܰܘܡܳܐ ܐܶܬܚܰܙܝܰܬ: ܬܠܺܝܬܳܝܽܘܬܳܐ ܥܰܠ ܝܽܘܪܕܢܳܢ ܢܰܗܪܳܐ: ܐܰܒܳܐ ܕܩܳܥܶܐ ܕܗܳܢܰܘ ܒܶܪܝ: ܘܰܒܪܳܐ ܕܥܳܡܶܕ ܘܪܽܘܚܳܐ ܕܰܡܪܰܚܶܦ܀

ܐܰܠܳܗܝ ܐܰܠܳܗܝ
ܩܳܠܳܐ ܒܩ̄: ܗܰܘ ܕܥܽܘܗܕܳܢܳܐ

ܐܰܠܳܗܳܐ ܕܰܥܡܰܕ ܡܶܢ ܝܽܘܚܰܢܳܢ܆ ܐܰܝܟ ܣܢܺܝܩܳܐ ܒܝܽܘܪܕܢܳܢ ܢܰܗܪܳܐ܆ ܘܩܰܕܶܫ ܠܰܟܝܳܢܳܐ ܕܡܰܝ̈ܳܐ܆ ܠܘܳܬܳܟ ܩܰܕܡܶܬ ܪܰܚܶܡ ܥܠܰܝ܀

ܐܰܠܳܗܳܐ ܕܰܥܡܰܕ ܐܰܝܟ ܒܰܪܢܳܫܳܐ܆ ܘܩܰܕܶܫ ܠܰܢ ܐܰܝܟ ܐܰܠܳܗܳܐ܆ ܒܪܽܘܚܳܐ ܕܩܽܘܕܫܳܐ ܘܰܒܢܽܘܪܳܐ܆ ܠܘܳܬܳܟ ܩܰܕܡܶܬ ܪܰܚܶܡ ܥܠܰܝ܀

ܡܫܺܝܚܳܐ ܐܰܠܳܗܳܐ ܗܰܘ ܠܳܐ ܣܢܺܝܩܳܐ܆ ܥܡܰܕ ܗ̱ܘܳܐ ܒܓܰܘ ܒܝܽܘܪܕܢܳܢ ܢܰܗܪܳܐ܆ ܡܶܢ ܝܽܘܚܰܢܳܢ ܟܳܪܽܘܙܶܗ܆ ܠܘܳܬܳܟ ܩܰܕܡܶܬ ܪܰܚܶܡ ܥܠܰܝ܀

ܗܰܘ ܕܺܐܝܬܰܘܗ̱ܝ ܗ̱ܘܳܐ ܒܪܺܝܫܺܝܬ ܒܰܡܪ̈ܰܘܡܶܐ܆ ܗܽܘܝܽܘ ܕܶܐܬܬܰܚܬܺܝ ܒܚܽܘܒܶܗ. ܠܡܽܘ̈ܫܚܳܬܳܐ ܐ̱ܢܳܫܳܝ̈ܳܬܳܐ܆ ܠܘܳܬܳܟ ܩܰܕܡܶܬ ܪܰܚܶܡ ܥܠܰܝ܀

ܬܠܺܝܬܳܝܽܘܬܳܐ ܝܰܘܡܳܢ ܐܶܬܚܰܙܝܰܬ܆ ܒܪܳܐ ܕܥܳܡܶܕ ܘܰܐܒܳܐ ܕܩܳܥܶܐ܆ ܪܽܘܚܳܐ ܕܩܽܘܕܫܳܐ ܕܰܡܪܰܚܶܦ܆ ܠܘܳܬܳܟ ܩܰܕܡܶܬ ܪܰܚܶܡ ܥܠܰܝ܀

ܡܫܺܝܚܳܐ ܐܰܠܳܗܳܐ: ܗܰܘ ܕܰܐܝܟ ܥܰܒܕܳܐ: ܐܶܬܥܡܶܕ ܡܶܢ ܝܽܘܚܰܢܳܢ: ܒܓܰܘ ܡܰܝ̈ܳܐ ܕܝܽܘܪܕܢܳܢ ܢܰܗܪܳܐ: ܠܘܳܬܳܟ ܩܰܕܡܶܬ ܪܰܚܶܡ ܥܠܰܝ܀

ܫܡܰܝ̈ܳܐ ܡܶܫܬܰܥܶܝܢ
ܩܳܠܳܐ ܒܩ̄: ܙܳܥ ܗ̱ܘܳܐ ܝܰܘܣܶܦ

ܬܶܗܪܳܐ ܕܰܡܠܶܐ ܕܽܘܡܳܪܳܐ܆ ܣܥܰܪ ܐܶܠܺܝܫܳܥ ܢܒܺܝܳܐ܆ ܒܩܰܝܣܳܐ ܕܰܐܪܡܺܝ ܒܓܰܘ ܡܰܝ̈ܳܐ܆ ܛܒܰܥ ܗ̱ܘܳܐ ܩܰܝܣܳܐ ܩܰܠܺܝܠܳܐ܆ ܘܛܰܦ ܗ̱ܘܳܐ ܦܰܪܙܠܳܐ ܝܰܩܺܝܪܳܐ܆ ܛܽܘܦܣܶܗ ܕܡܳܪܰܢ ܨܳܐܰܪ ܗ̱ܘܳܐ܆ ܕܰܐܛܒܰܥ ܪܺܝܫܶܗ ܒܓܰܘ ܡܰܝ̈ܳܐ܆ ܘܕܰܠܝܶܗ ܠܳܐܕܳܡ ܕܰܐܒܺܝܕ ܗ̱ܘܳܐ܀

ܒܬܽܘܠܳܐ ܙܰܗܝܳܐ ܝܽܘܚܰܢܳܢ܆ ܥܰܠ ܢܰܗܪܳܐ ܩܳܐܶܡ ܗ̱ܘܳܐ܆ ܘܒܰܝܢܳܬ ܟܶܢ̈ܫܶܐ ܡܰܙܥܶܩ ܗ̱ܘܳܐ܆ ܕܗܳܢܰܘ ܐܶܡܪܶܗ ܕܰܐܠܳܗܳܐ܆ ܕܠܰܚܛܺܝܬܶܗ ܕܥܳܠܡܳܐ ܫܳܩܶܠ܆ ܐܶܢܳܐ ܒܡܰܝ̈ܳܐ ܡܰܥܡܶܕ ܐ̱ܢܳܐ܆ ܘܗܽܘ ܢܰܥܡܶܕ ܒܢܽܘܪܳܐ ܘܪܽܘܚܳܐ܆ ܫܽܘܒܚܳܐ ܠܶܗ ܘܰܠܫܳܠܽܘܚܶܗ܀

ܒܗܳܢܳܐ ܝܰܘܡܳܐ ܕܰܥܡܳܕܳܟ܆ ܟܶܢ̈ܫܶܐ ܕܰܫܡܰܝ̈ܳܢܶܐ܆ ܢܶܬܠܽܘܢ ܫܽܘܒܚܳܐ ܠܪܰܒܽܘܬܳܟ܆ ܕܶܐܬܬܰܚܬܺܝܬ ܡܶܛܽܠܳܬܰܢ܆ ܘܶܐܬܰܝܬ ܠܝܰܠܕܳܐ ܘܠܰܥܡܳܕܳܐ܆ ܘܪܽܘܚܳܐ ܘܰܐܒܳܐ ܚܰܘܺܝܬ ܠܰܢ܆ ܘܰܥܒܰܕܬܳܢ ܒܢܰܝ̈ܳܐ ܠܰܐܒܳܐ܆ ܘܫܰܘ̈ܬܳܦܶܐ ܠܪܽܘܚܳܐ ܕܩܽܘܕܫܳܐ܀

ܬܶܗܪܳܐ ܪܰܒܳܐ ܘܬܶܕܡܽܘܪܬܳܐ܆ ܚܙܳܐ ܝܽܘܚܰܢܳܢ ܓܰܒܝܳܐ܆ ܒܰܥܡܳܕܶܗ ܕܒܰܪ ܐܰܠܳܗܳܐ܆ ܬܠܺܝܬܳܝܽܘܬܳܐ ܡܬܽܘܡܳܝܬܳܐ܆ ܐܺܝܬܝܳܝܬܳܐ ܘܰܠܚܽܘܕܳܝܬܳܐ܆ ܒܪܳܐ ܕܥܳܡܶܕ ܘܰܐܒܳܐ ܕܩܳܥܶܐ܆ ܘܪܽܘܚ ܩܽܘܕܫܳܐ ܦܰܪܰܩܠܺܝܛܳܐ܆ ܕܰܐܝܟ ܝܰܘܢܳܐ ܫܟܶܢ ܥܰܠ ܪܺܝܫܶܗ܀

ܬܶܫܒܽܘܚܬܳܐ ܚܕܰܬܳܐ
ܩܳܠܳܐ ܒܩ̄: ܡܫܺܝܚܳܐ ܕܰܡܠܰܟ ܢܽܘܚܳܡܳܐ

ܙܰܘܓܳܐ ܕܟܳܪ̈ܽܘܙܶܐ ܐܰܣܪܰܚܘ܆ ܛܥܳܡ̈ܳܬܶܗ ܕܺܝܚܺܝܕܳܝܳܐ܆ ܟܰܘܟܰܒ ܢܽܘܗܪܳܐ ܘܝܽܘܚܰܢܳܢ܆ ܚܰܕ ܕܶܢܚܳܐ ܐ̱ܚܪܺܢܳܐ ܩܳܠܳܐ܀

ܒܗܳܢܳܐ ܝܰܘܡܳܐ ܚܳܕܶܝܢ ܒܶܗ܆ ܡܰܒܽܘ̈ܥܶܐ ܘܢܰܗܪ̈ܰܘܳܬܳܐ܆ ܕܰܥܡܰܕ ܒܗܽܘܢ ܒܰܪ ܐܰܠܳܗܳܐ܆ ܘܩܰܕܶܫ ܐܶܢܽܘܢ ܒܰܥܡܳܕܶܗ܀

ܡܫܺܝܚܳܐ ܕܩܰܕܶܫ ܒܰܥܡܳܕܶܗ܆ ܡܰܒܽܘ̈ܥܶܐ ܘܢܰܗܪ̈ܰܘܳܬܳܐ܆ ܩܰܕܶܫ ܢܰܦ̈ܫܳܬܳܐ ܕܟܽܠܰܢ܆ ܕܢܶܙܡܪ̈ܳܢ ܫܽܘܒܚܳܐ ܠܺܐܝܩܳܪܳܟ܀

ܐܰܒܳܐ ܒܪܰܘܡܳܐ ܩܳܥܶܐ ܗ̱ܘܳܐ܆ ܘܰܡܫܺܝܚܳܐ ܒܰܐܪܥܳܐ ܥܳܡܶܕ܆ ܘܪܽܘܚ ܩܽܘܕܫܳܐ ܒܰܕܡܽܘܬ ܝܰܘܢܳܐ܆ ܢܶܚܬܰܬ ܩܰܘܝܰܬ ܥܰܠ ܪܺܝܫܶܗ܀

ܫܽܘܒܚܳܐ ܠܪ̈ܰܚܡܰܝܟ ܐܰܠܳܗܳܐ܆ ܕܒܰܥܡܳܕܳܟ ܡܰܥܒܶܕ ܚܰܝ̈ܶܐ܆ ܩܰܕܶܫܬ ܠܰܢ ܡܰܥܡܽܘܕܺܝܬܳܐ܆ ܘܰܒܢܰܝ̈ܳܐ ܠܰܐܒܽܘܟ ܥܒܰܕܬ ܠܰܢ܀

ܫܰܒܰܚܘ ܥܰܒ̈ܕܰܘܗ̱ܝ ܕܡܳܪܝܳܐ
ܩܳܠܳܐ ܒܩ̄: ܠܗܰܘ ܕܰܛܥܺܝܢܳܐ ܡܰܪܟܰܒܬܳܐ

ܪܰܒ ܘܰܫܒܺܝܚ ܥܺܐܕܳܐ ܕܝܰܘܡܳܢ܆ ܒܰܐܪܒܰܥ ܦܶܢ̈ܝܳܢ ܕܰܒܪܺܝܬܳܐ܆ ܕܒܶܗ ܐܶܫܬܰܝܰܢܘ ܥܶܠܳܝ̈ܶܐ. ܘܬܰܚ̈ܬܳܝܶܐ ܕܰܪܓܺܝܙܺܝܢ ܗ̱ܘܰܘ܆ ܗ̄ܘܗ̄܀

ܗܳܐ ܓܰܒܪܳܐ ܘܰܫܡܶܗ ܕܶܢܚܳܐ܆ ܙܟܰܪܝܳܐ ܢܒܺܝܳܐ ܐܶܬܢܰܒܺܝ܆ ܒܪܺܝܟܽ ܗ̱ܘ ܡܫܺܝܚܳܐ ܕܰܕܢܰܚ ܠܰܢ. ܘܫܰܡܠܺܝ ܐ̱ܪ̈ܳܙܶܐ ܕܰܢܒܺܝ̈ܶܐ܆ ܗ̄ܘܗ̄ ܀

ܩܽܘܡܝ ܥܺܕܬܳܐ ܘܰܙܡܰܪܝ ܫܽܘܒܚܳܐ܆ ܠܰܐܠܳܗܳܐ ܒܗܳܢܳܐ ܝܰܘܡܳܐ܆ ܕܰܢܚܶܬ ܘܰܥܡܰܕ ܒܓܰܘ ܝܽܘܪܕܢܳܢ. ܘܰܐܥܡܶܕ ܝܰܠ̈ܕܰܝܟܝ ܒܪܽܘܚ ܩܽܘܕܫܳܐ ܗ̄ܘܗ̄܀

ܝܰܘܡܳܢ ܚܳܕܶܝܢ ܥܶܠܳܝ̈ܶܐ܆ ܘܰܦܨܺܝܚܺܝܢ ܐܳܦ ܬܰܚܬܳܝ̈ܶܐ܆ ܘܙܳܡܪܺܝܢ ܫܽܘܒܚܳܐ ܘܬܰܘܕܺܝܬܳܐ. ܠܰܒܪܳܐ ܕܦܰܪܩܰܢ ܒܰܥܡܳܕܶܗ܆ ܗ̄ܘܗ̄܀

ܒܰܥܡܳܕܳܟ ܒܰܪ ܐܰܠܳܗܳܐ܆ ܚܳܕܝܳܐ ܥܺܕܬܳܐ ܥܰܡ ܝܰܠ̈ܕܶܝܗ̇܆ ܘܙܳܡܪܺܝܢ ܫܽܘܒܚܳܐ ܘܠܳܐ ܫܳܠܶܝܢ. ܕܰܚܙܰܘ ܢܽܘܗܪܳܐ ܒܰܥܡܳܕܳܟ܆ ܗ̄ܘܗ̄܀

ܡܫܺܝܚܳܐ ܕܚܰܣܺܝ ܗ̱ܘܳܐ ܠܫܶܡܥܽܘܢ܆ ܘܰܠܓܰܝܳܣܳܐ ܒܰܙܩܺܝܦܳܐ܆ ܚܰܣܳܐ ܠܥܰܒ̈ܕܰܝܟ ܒܛܰܝܒܽܘܬܳܟ. ܕܚܳܕܶܝܢ ܒܝܰܘܡܳܐ ܕܰܥܡܳܕܳܟ܆ ܗ̄ܘܗ̄܀

ܗܳܐ ܦܬܺܝܚ ܗ̱ܽܘ ܬܰܪܥܳܐ ܕܪ̈ܰܚܡܶܐ܆ ܘܰܡܙܺܝܓܳܐ ܡܰܥܡܽܘܕܺܝܬܳܐ܆ ܬܰܘ ܚܰܛܳܝ̈ܶܐ ܚܽܘܬܘ ܘܰܥܡܰܕܘ. ܘܶܐܬܚܰܣܰܘ ܡܶܢ ܚܰܘܒܰܝ̈ܟܽܘܢ܆ ܗ̄ܘܗ̄܀

ܡܶܢ ܪܽܘܚܩܳܐ ܚܙܳܝܗ̱ܝ ܝܽܘܚܰܢܳܢ܆ ܝܰܕܥܶܗ ܗ̱ܘܳܐ ܕܡܳܪܶܗ ܐܺܝܬܰܘܗ̱ܝ܆ ܘܒܶܗ ܡܶܬܒܰܛܠܳܐ ܟܳܗܢܽܘܬܳܐ. ܘܟܽܘܡܪܽܘܬܳܐ ܕܰܒ̈ܢܰܝ ܠܶܘܺܝ: ܗ̄ܘܗ̄܀

ܛܽܘܒܰܝܗܽܘܢ ܠܡܶܣ̈ܟܺܢܶܐ
ܩܳܠܳܐ ܒܩ̄: ܠܗܳܝ ܒܰܪ̱ܬ ܩܳܠܳܐ ܫܒܺܝܚܬܳܐ

ܠܗܳܝ ܒܰܪ̱ܬ ܩܳܠܳܐ ܫܒܺܝܚܬܳܐ܆ ܕܰܐܙܥܶܩ ܐܰܒܳܐ ܕܗܳܢܰܘ ܚܰܒܺܝܒܝ܆ ܕܶܐܬܳܐ ܠܰܥܡܳܕܳܐ ܕܢܶܦܪܽܘܩ ܠܳܐܕܳܡ܆ ܘܢܰܦܢܶܝܘܗ̱ܝ ܒܛܰܝܒܽܘܬܶܗ ܠܰܥܕܶܢ ܝܳܪܬܽܘܬܶܗ܀

ܢܚܶܬ ܗ̱ܘܳܐ ܘܰܥܡܰܕ ܒܓܰܘ ܝܽܘܪܕܢܳܢ܆ ܐܶܡܪܳܗ̇ ܚܰܝܳܐ ܕܰܐܠܳܗܽܘܬܳܐ܆ ܕܰܥܠܰܘܗ̱ܝ ܐܰܟܪܶܙ ܝܽܘܚܰܢܳܢ ܘܶܐܡܰܪ܆ ܕܫܳܩܶܠ ܠܰܚܛܺܝܬܶܗ ܕܥܳܠܡܳܐ ܘܦܳܪܶܩ ܠܶܗ܀

ܝܰܘܡܳܢܳܐ ܓܶܝܪ ܐܶܬܚܰܙܝܰܬ܆ ܬܠܺܝܬܳܝܽܘܬܳܐ ܪܳܡܰܬ ܡܶܢ ܟܽܠ܆ ܐܰܒܳܐ ܕܩܳܥܶܐ ܘܰܒܪܳܐ ܕܥܳܡܶܕ܆ ܘܪܽܘܚܳܐ ܐܰܝܟ ܝܰܘܢܳܐ ܢܶܚܬܰܬ ܥܰܠ ܪܺܝܫܶܗ܀

ܡܫܺܝܚܳܐ ܥܡܰܕ ܝܰܘܡܳܢܳܐ܆ ܬܰܘ ܚܰܒܺܝ̈ܒܰܝ ܢܶܥܡܰܕ ܥܰܡܶܗ܆ ܕܢܶܗܘܶܐ ܒܢܰܝ̈ܳܐ ܚܰܕ̱̈ܬܶܐ ܠܝܳܠܽܘܕܶܗ܆ ܘܫܰܘ̈ܬܳܦܶܐ ܠܪܽܘܚܳܐ ܚܰܝܳܐ ܩܰܕܺܝܫܳܐ܀

ܬܗܰܪܘ ܡܰܠܰܐܟ̈ܶܐ ܕܒܰܫܡܰܝܳܐ܆ ܘܣܶܕܪ̈ܶܐ ܕܺܝܠܗܽܘܢ ܐܶܬܒܰܠܗܺܝܘ ܕܰܚܙܰܘ܆ ܠܗܰܘ ܕܟܰܢܶܫ ܡܰܝ̈ܳܐ ܕܝܰܡ̱̈ܡܶܐ܆ ܕܥܰܪܛܶܠ ܩܳܐܶܡ ܗ̱ܘܳܐ ܘܥܳܡܶܕ ܒܓܰܘ ܝܽܘܪܕܢܳܢ܀

ܫܽܘܒܚܳܐ

ܢܰܘܕܶܐ ܘܢܶܣܓܽܘܕ ܘܰܢܫܰܒܰܚ܆ ܠܗܰܘ ܕܶܐܬܬܰܚܬܺܝ ܒܚܽܘܒܶܗ ܡܶܛܽܠܳܬܰܢ܆ ܘܰܐܪܟܶܢ ܪܺܝܫܶܗ ܚܰܝܳܐ ܠܰܥܡܳܕܳܐ܆ ܕܰܢܪܰܡܪܶܡ ܫܶܦܠܶܗ ܕܳܐܕܳܡ ܪܺܝܫ ܓܶܢܣܰܢ܀

ܩܳܠܳܐ ܕܨܰܦܪܳܐ
ܩܳܠܳܐ ܒܩ̄: ܐܶܢܳܐ ܐ̱ܢܳܐ ܢܽܘܗܪܳܐ ܫܰܪܺܝܪܳܐ
ܕܠܳܐ ܫܶܩܝܳܐ ܕܙܰܒܢܳܐ ܐܰܦܪܰܥ ܗ̱ܘܳܐ

ܕܳܠ ܘܰܢܚܶܬ ܡܶܢ ܥܽܘܒܳܐ ܕܰܐܒܽܘܗ̱ܝ܆ ܝܺܚܺܝܕܳܝܳܐ ܐܰܠܳܗܳܐ܆ ܘܩܰܕܶܫ ܠܰܢ ܡܰܥܡܽܘܕܺܝܬܳܐ܆ ܟܰܕ ܢܚܶܬ ܘܰܥܡܰܕ ܒܓܰܘ ܝܽܘܪܕܢܳܢ܆ ܘܝܽܘܚܰܢܳܢ ܩܪܶܒ ܟܰܕ ܕܳܚܶܠ܆ ܣܳܡ ܝܰܡܺܝܢܶܗ ܥܰܠ ܪܺܝܫܶܗ܆ ܘܥܰܡ ܩܳܠܶܗ ܕܰܐܒܳܐ ܡܶܢ ܠܥܶܠ܆ ܪܽܘܚ ܩܽܘܕܫܳܐ ܒܰܕܡܽܘܬ ܝܰܘܢܳܐ܆ ܢܶܚܬܰܬ ܩܰܘܝܰܬ ܥܰܠ ܪܺܝܫܶܗ܀

ܫܽܘܒܚܳܐ

ܫܽܘܒܚܳܐ ܠܳܟ ܝܰܠܕܶܗ ܕܥܶܠܳܝܳܐ܆ ܕܡܶܛܽܠܳܬܰܢ ܐܶܬܬܰܚܬܺܝܬ܆ ܒܝܽܘܪܕܢܳܢ ܐܰܥܡܶܕ ܝܽܘܚܰܢܳܢ܆ ܠܪܰܒܽܘܬܳܟ ܕܠܳܐ ܡܶܣܬܰܝܟܳܐ܆ ܥܺܝܪ̈ܶܐ ܒܪܰܘܡܳܐ ܡܩܰܕܫܺܝܢ ܠܳܟ܆ ܕܢܶܬܩܰܕܫܽܘܢ ܡܶܢ ܐܺܝܬܽܘܬܳܟ܆ ܘܰܠܝܰܠ̈ܕܰܘܗ̱ܝ ܕܳܐܕܳܡ ܩܰܕܶܫܬ܆ ܡܰܥܡܽܘܕܺܝܬܳܐ ܠܚܽܘܣܳܝܳܐ܆ ܕܢܶܬܩܰܕܫܽܘܢ ܒܪܽܘܚܳܐ ܕܩܽܘܕܫܳܐ܀

ܡܶܢ ܥܳܠܰܡ

ܥܒܶܕ ܠܗܽܘܢ ܢܝܳܚܳܐ ܘܕܽܘܟܪܳܢܳܐ܆ ܘܠܰܐܒܳܗ̈ܰܝܢ ܘܰܐܚ̈ܰܝܢ ܕܰܫܟܶܒܘ. ܘܰܒܓܽܘ̈ܕܶܐ ܘܣܶܕܪ̈ܶܐ ܕܩܰܕܺܝ̈ܫܰܝܟ܆ ܛܰܟܶܣ ܡܳܪܝܳܐ ܠܣܳܓܽܘܕܰܝ̈ܟ. ܘܡܳܐ ܕܝܳܬܒܰܬ ܥܰܠ ܒܺܐܡ ܕܺܝܠܳܟ܆ ܘܦܳܪܫܰܬ ܛܳܒ̈ܶܐ ܡ̣ܶܢ ܒܺܝ̈ܫܶܐ: ܚܢܳܢܳܟ ܢܶܚܙܽܘܢ ܒܶܝܬ ܕܺܝ̣ܢܳܐ. ܘܰܢܩܽܘܡܽܘܢ ܡ̣ܶܢ ܝܰܡܺܝܢܳܟ܆ ܒܝܰܘܡܳܐ ܕܕܳܢܚܳܐ ܪܰܒܽܘܬܳܟ܀

ܐ̱ܚܪܺܢܳܐ

ܩܳܠܳܐ ܒܩ̄: ܠܳܟ ܡܳܪܝܳܐ ܩܳܪܶܝܢܰܢ
ܝܳܠܕܰܬ ܐܰܠܳܗܳܐ ܒܬܽܘܠܬܳܐ ܣܽܘܓܝ

ܡܫܺܝܚܳܐ ܦܬܰܚ ܡܰܥܡܽܘܕܺܝܬܳܐ ܠܚܽܘܣܳܝ ܚܰܘ̈ܒܶܐ܆ ܘܒܰܥܡܳܕܶܗ ܚܰܣܺܝ ܠܥܰܡܶܗ ܘܝܰܗ̱ܒ ܛܽܘܦܣܳܐ ܠܥܺܕܬܶܗ܆ ܣܳܗ̈ܕܶܐ ܬܠܳܬܳܐ ܬܰܡܳܢ ܗܘܰܘ ܥܰܠ ܝܽܘܪܕܢܳܢ܆ ܕܒܰܫ̈ܡܳܗܶܐ ܬܠܳܬܳܐ ܢܶܩܪܶܐ ܟܳܗܢܳܐ ܒܒܶܝܬ ܩܽܘܕܫܳܐ܆ ܝܽܘܚܰܢܳܢ ܐܺܝܕܶܗ ܣܳܐܶܡ ܗ̱ܘܳܐ܆ ܘܪܽܘܚ ܩܽܘܕܫܳܐ ܥܰܠ ܒܪܳܐ ܫܳܟܶܢ ܗ̱ܘܳܐ܆ ܘܰܐܒܳܐ ܕܩܳܥܶܐ ܡܶܢ ܪܰܘܡܳܐ ܕܗܳܢܰܘ ܒܶܪܝ ܚܰܒܺܝܒܝ܀

ܫܽܘܒܚܳܐ

ܒܕܶܢܚܳܟ ܡܳܪܰܢ ܐܶܬܦܰܨܚܰܬ ܟܽܠܳܗ̇ ܒܪܺܝܬܳܐ܆ ܘܰܚܝܳܐ ܥܳܠܡܳܐ ܡܶܢ ܣܳܟܶܗ ܕܰܐܒܺܝܕ ܗ̱ܘܳܐ ܒܛܽܘܥܝܰܝ܆ ܘܒܰܥܡܳܕܳܟ ܐܶܬܚܰܣܺܝܘ ܟܽܠ ܐܶܡ̈ܘܳܬܳܐ܆ ܘܰܐܘܕܺܝܘ ܠܰܫܡܳܟ ܩܰܕܺܝܫܳܐ ܝܶܫܽܘܥ ܦܳܪܽܘܩܰܢ܆ ܒܪܺܝܟ ܕܶܢܚܳܟ ܕܡܶܛܽܠ ܦܽܘܪܩܳܢܰܢ܆ ܘܰܥܡܳܕܳܟ ܕܡܶܛܽܠ ܚܽܘܣܳܝܰܢ܆ ܒܪܺܝܟ ܐܰܒܳܐ ܕܫܰܠܚܳܟ ܨܶܐܕܰܝܢ ܘܪ̈ܰܚܡܰܝܟ ܥܰܠ ܟܽܠܰܢ܀

ܡܶܢ ܥܳܠܰܡ

ܥܰܢܺܝ̈ܕܶܐ ܕܒܰܡܫܺܝܚܳܐ ܠܳܐ ܬܶܟܪܶܐ ܠܟܽܘܢ܆ ܕܗܳܐ ܡܰܛܺܝ ܠܶܗ ܢܽܘܚܳܡܳܐ ܘܝܰܘܡܶܗ ܕܦܽܘܪܥܳܢܳܐ. ܩܳܝܡܺܝܢ ܐܢ̱ܬܽܘܢ ܕܠܳܐ ܚܒܳܠܳܐ ܡ̣ܶܢ ܩܰܒܪ̈ܰܝܟܽܘܢ܆ ܘܢܳܦܩܺܝܢ ܐܢ̱ܬܽܘܢ ܒܰܪܗܺܝܒܽܘܬܳܐ ܠܽܐܘܪܥܶܗ ܕܒܰܪ ܡܰܠܟܳܐ. ܠܳܒܫܺܝܢ ܐܢ̱ܬܽܘܢ: ܐܶܣܛܰܠ ܬܶܫܒܽܘܚܬܳܐ. ܘܰܩܕܳܡܰܘܗ̱ܝ: ܫܽܘܒܚܳܐ ܙܳܡܪܺܝܢ ܐܢ̱ܬܽܘܢ. ܡܢܰܚܡܳܢܳܐ ܕܝܰܠ̈ܕܰܘܗ̱ܝ ܕܳܐܕܳܡ. ܚܽܘܣ ܘܶܐܬܪܰܚܰܡܥܠܰܝܢ܀

ܦܶܬܓܳܡܳܐ: ܚܙܰܐܽܘܟ ܡܰܝ̈ܳܐ ܐܰܠܳܗܳܐ܆ ܚܙܰܐܽܘܟ ܡܳܪܝ ܡܰܝ̈ܳܐ ܘܰܕܚܶܠܘ ܗܰܠܶܠܽܘܝܰܗ܀

ܒܳܥܽܘܬܳܐ ܕܡܳܪܝ ܝܰܥܩܽܘܒ
ܬܶܟܪܶܐ ܠܳܟ ܡܳܪܝ ܥܰܠ ܥܺܕ̈ܳܬܳܐ

ܒܪܳܐ ܕܒܰܥܡܳܕܶܗ ܦܰܪܩܳܗ̇ ܠܥܺܕܬܶܗ ܡܶܢ ܛܳܥܝܽܘܬܳܐ܆

ܗܰܒ ܒܳܗ̇ ܫܰܝܢܳܐ ܘܢܰܛܰܪ ܠܝܰܠ̈ܕܶܝܗ̇ ܒܰܥܡܳܕܳܟ ܡܳܪܝ܀

ܩܶܪܒܰܬ ܩܳܡܰܬ ܟܰܠܰܬ ܡܰܠܟܳܐ ܨܶܝܕ ܫܰܪܺܝܪܳܐ܆ ܕܡܳܐ ܕܚܰܘܺܝ ܠܳܗ̇ ܐܰܝܢܰܘ ܚܰܬܢܳܐ ܬܶܣܓܽܘܕ ܩܽܘܕܡܰܘܗ̱ܝ܆ ܥܰܠ ܟܽܠ ܐܰܝܢܳܐ ܕܡܶܬܝܰܒܰܠ ܗ̱ܘܳܐ ܕܢܶܚܽܘܬ ܢܶܥܡܰܕ܆ ܥܕܰܡܳܐ ܕܰܣܠܶܩ ܥܰܝ̈ܢܶܝܗ̇ ܕܟܰܠܬܳܐ ܥܠܰܘܗ̱ܝ ܫܰܕ̈ܝܳܢ ܗ̱ܘܰܝ̈܀

ܘܟܰܕ ܐܶܬܓܰܡܪܰܬ ܟܰܠܬܳܐ ܒܨܶܒ̈ܬܶܐ ܕܡܰܥܡܽܘܕܺܝܬܳܐ܆ ܣܶܘܚܰܬ ܣܶܠܩܰܬ ܡܶܢ ܓܰܘ ܡܰܝ̈ܳܐ ܒܪܽܘܚܳܐ ܕܩܽܘܕܫܳܐ܆ ܘܟܰܕ ܐܶܬܛܰܝܰܒ ܚܠܽܘܠܳܐ ܪܰܒܳܐ ܥܰܡ ܬܽܘܩܳܢܰܘ̈ܗ̱ܝ܆ ܐܶܫܬܰܪܪܰܬ ܗ̱ܘܳܬ ܕܰܐܝܢܰܘ ܚܰܬܢܳܐ ܕܠܶܗ ܐܶܬܡܰܟܪܰܬ܀

ܫܰܝܢܳܐ ܕܫܰܝܶܢ ܠܰܫ̈ܡܰܝܳܢܶܐ ܘܠܰܐܪ̈ܥܳܢܳܝܶܐ܆

ܫܰܝܶܢ ܠܥܺܕܬܳܟ ܘܢܰܛܰܪ ܠܝܰܠ̈ܕܶܝܗ̇ ܒܰܥܡܳܕܳܟ ܡܳܪܝ܀