ܕܨܰܦܪܳܐ

ܥܶܢܝܳܢܳܐ ܕܪܰܚܶܡܥܠܰܝ
ܩܳܠܳܐ ܒܩ̄: ܠܳܐ ܬܶܥܽܘܠ ܠܕܺܝܢܳܐ

ܡܫܺܝܚܳܐ ܕܰܒܝܰܠܕܶܗ. ܚܰܪܰܪ ܒܶܪ̈ܝܳܬܳܐ܆ ܩܰܒܶܠ ܬܶܫܡܶܫܬܰܢ܆ ܘܶܐܬܪܰܚܰܡ ܥܠܰܝܢ܀

ܡܫܺܝܚܳܐ ܕܰܒܝܰܠܕܶܗ. ܐܰܦܨܰܚ ܒܶܪ̈ܝܳܬܳܐ܆ ܚܰܕܳܢ ܒܰܓܢܽܘܢܳܟ܆ ܒܝܰܘܡܳܐ ܕܡܶܐܬܺܝܬܳܟ܀

ܒܗܳܢ ܝܰܘܡܳܐ ܫܒܺܝܚܳܐ. ܕܝܰܠܕܳܟ ܡܰܚܶܐ ܟܽܠ܆ ܫܰܝܶܢ ܒܛܰܝܒܽܘܬܳܟ܆ ܠܥܺܕܬܳܟ ܕܛܶܦܣܰܬ ܒܳܟ܀

ܫܽܘܒܚܳܐ ܠܡܰܘܠܳܕܳܟ. ܟܰܣܝܳܐ ܕܡܶܢ ܐܰܒܳܐ܆ ܘܬܰܘܕܺܝܬܳܐ ܠܝܰܠܕܳܟ܆ ܓܰܠܝܳܐ ܕܡܶܢ ܡܰܪܝܰܡ܀

ܐܰܠܳܗܝ ܐܰܠܳܗܝ
ܩܳܠܳܐ ܒܩ̄: ܫܠܳܡܠܶܟܝ ܡܰܠܝܰܬ ܛܰܝܒܽܘܬܳܐ

ܒܗܳܢܳܐ ܝܰܘܡܳܐ ܐܶܬܺܝܠܶܕ܆ ܡܰܠܟܳܐ ܡܫܺܝܚܳܐ ܒܒܶܝܬ ܠܚܶܡ ܕܺܝܗܽܘܕܳܐ܆ ܘܰܡܓܽܘ̈ܫܶܐ ܘܪ̈ܳܥܰܘܳܬܳܐ܆ ܒܩܽܘܪ̈ܒܳܢܰܝܗܽܘܢ ܣܓܶܕܘ ܗ̱ܘܰܘ ܠܺܐܝܩܳܪܶܗ܀

ܟܰܘܟܒܳܐ ܥܰܙܺܝܙ ܙܰܠܺܝ̈ܩܶܐ܆ ܐܰܙܺܝܥ ܠܦܳܪܶܣ ܡܕܺܝܢܰܬ ܚܰܟܺܝ̈ܡܶܐ܆ ܘܡܰܠ̈ܟܶܐ ܘܰܒ̈ܢܰܝ ܪ̈ܺܝܫܳܢܶܐ܆ ܐܶܬܰܘ ܕܢܶܚܙܽܘܢ ܠܡܰܠܟܳܐ ܕܶܐܬܺܝܠܶܕ܀

ܡܫܺܝܚܳܐ ܡܰܠܟܳܐ ܕܬܶܫܒܽܘܚܬܳܐ܆ ܗܰܘ ܕܶܐܬܺܝܠܶܕ ܠܥܶܠ ܡܶܢ ܡܶܠܬܳܐ܆ ܡܶܢ ܐܰܒܳܐ ܕܠܳܐ ܫܽܘܪܳܝܳܐ܆ ܘܡܶܢ ܒܬܽܘܠܬܳܐ ܡܰܪܝܰܡ ܕܠܳܐ ܙܽܘܘܳܓܳܐ܀

ܐܰܒܳܐ ܕܺܐܝܬܰܘܗ̱ܝ ܕܠܳܐ ܫܽܘܪܳܝ܆ ܘܰܒܪܳܐ ܕܡܶܢܶܗ ܗܰܘ ܠܳܐ ܙܰܒܢܳܝܳܐ܆ ܘܪܽܘܚ ܩܽܘܕܫܳܐ ܦܰܪܰܩܠܺܝܛܳܐ܆ ܫܘܶܐ ܠܰܐܒܳܐ ܘܠܰܒܪܳܐ ܒܽܐܘܣܺܝܰܐ܀

ܫܡܰܝ̈ܳܐ ܡܶܫܬܰܥܶܝܢ
ܩܳܠܳܐ ܒܩ̄: ܙܳܥ ܗ̱ܘܳܐ ܝܰܘܣܶܦ

ܒܶܪܟܰܬ ܡܰܪܝܰܡ ܘܺܝܠܶܕܬܶܗ܆ ܠܗܰܘ ܡܳܪܝܳܐ ܓܰܢ̱ܒܳܪܳܐ܆ ܕܰܥܠܰܘܗ̱ܝ ܐܶܡܰܪ ܐܶܫܰܥܝܳܐ܆ ܩܕܳܡ ܕܳܪ̈ܶܐ ܒܰܢܒܺܝܽܘܬܶܗ܆ ܕܗܳܐ ܒܬܽܘܠܬܳܐ ܒܳܛܢܳܐ ܘܝܳܠܕܳܐ܆ ܝܰܠܕܳܐ ܕܺܐܝܬܰܘܗ̱ܝ ܕܽܘܡܳܪܳܐ܆ ܘܢܶܩܪܽܘܢ ܫܡܶܗ ܥܰܡܰܢܽܘܐܶܝܠ܆ ܕܺܐܝܬܰܘܗ̱ܝ ܥܰܡܰܢ ܐܰܠܳܗܰܢ܀

ܙܳܚܘ ܘܰܢܚܶܬܘ ܥܺܝܪ̈ܰܝ ܪܰܘܡܳܐ܆ ܕܰܢܝܰܩܪܽܘܢ ܡܰܘܠܳܕܶܗ܆ ܕܒܰܪ ܐܰܠܳܗܳܐ ܒܰܡܥܰܪܬܳܐ܆ ܚܳܙܶܝܢ ܗ̱ܘܰܘ ܠܗܰܘ ܕܰܫܡܰܝܳܐ܆ ܡܠܶܝܢ ܡܶܢܶܗ ܘܰܙܥܽܘܪܺܝܢ ܠܶܗ܆ ܘܒܰܡܥܰܪܬܳܐ ܟܪܺܝܟ ܥܰܙܪܽܘܪ̈ܶܐ܆ ܘܡܰܓܰܣ ܒܽܐܘܪܝܳܐ ܕܚܰܝ̈ܘܳܬܳܐ܆ ܘܰܒܬܶܗܪܳܐ ܙܡܰܪܘ ܠܶܗ ܫܽܘܒܚܳܐ܀

ܫܽܘܒܚܳܐ ܠܶܗ ܠܡܰܠܟܳܐ ܡܫܺܝܚܳܐ܆ ܕܶܐܬܬܰܚܬܺܝ ܒܛܰܝܒܽܘܬܶܗ܆ ܘܰܗܘܳܐ ܐ̱ܢܳܫܳܐ ܒܨܶܒܝܳܢܶܗ܆ ܘܰܡܓܽܘ̈ܫܶܐ ܘܪ̈ܳܥܰܘܳܬܳܐ܆ ܒܩܽܘܪ̈ܒܳܢܰܝܗܽܘܢ ܣܳܓܕܺܝܢ ܠܶܗ܆ ܘܥܺܝܪ̈ܶܐ ܘܐ̱ܢܳܫ̈ܳܐ ܩܳܥܶܝܢ ܠܶܗ܆ ܫܽܘܒܚܳܐ ܠܰܐܠܳܗܳܐ ܒܪܰܘܡܳܐ܆ ܘܣܰܒܪܳܐ ܛܳܒܳܐ ܠܐ̱ܢܳܫܽܘܬܳܐ܀

ܒܪܺܝܫܺܝܬ ܐܺܝܬܰܘܗ̱ܝ ܗ̱ܘܳܐ ܡܶܠܬܳܐ܆ ܐܰܝܟ ܕܰܐܟܬܶܒ ܝܽܘܚܰܢܳܢ܆ ܘܗܽܘ ܡܶܠܬܳܐ ܠܘܳܬ ܐܰܠܳܗܳܐ܆ ܘܰܐܠܳܗܳܐ ܗ̱ܘܳܐ ܗܽܘ ܡܶܠܬܳܐ܆ ܕܰܢܚܶܬ ܘܰܫܪܳܐ ܒܓܰܘ ܟܰܪܣܳܐ܆ ܘܰܗܘܳܐ ܒܶܣܪܳܐ ܘܰܐܓܶܢ ܒܰܢ܆ ܘܰܚܙܰܝܢ ܫܽܘܒܚܶܗ ܒܰܡܥܰܪܬܳܐ܆ ܐܰܝܟ ܕܺܝܚܺܝܕܳܐ ܕܡܶܢ ܐܰܒܳܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܗܰܘ ܕܰܛܥܺܝܢ ܟܽܠ ܒܶܪ̈ܝܳܬܳܐ

ܪܳܥܶܡ ܩܳܠܶܗ ܒܰܫܡܰܝܳܐ: ܘܙܳܝܥܺܝܢ ܡܶܢܶܗ ܢܽܘܪ̈ܳܢܶܐ: ܕܰܫܡܰܥܘ ܩܳܠܶܗ ܟܰܕ ܒܳܟܶܐ: ܐܰܝܟ ܫܰܒܪܳܐ ܒܓܰܘ ܒܶܝܬ ܠܚܶܡ: ܐܳܘ ܠܬܶܗܪܳܐ ܕܠܳܐ ܡܶܬܡܰܠܰܠ: ܐܰܠܳܗܳܐ ܕܰܗܘܳܐ ܐ̱ܢܳܫܳܐ: ܠܶܗ ܬܶܫܒܽܘܚܬܳܐ ܕܶܐܬܳܐ ܠܡܰܘܠܳܕܳܐ: ܡܶܛܽܠ ܦܽܘܪܩܳܢܶܗ ܕܳܐܕܳܡ܀

ܓܢܺܝܙ ܘܰܡܥܰܠܰܝ ܒܺܐܝܬܽܘܬܶܗ: ܘܠܳܐ ܡܶܬܕܰܪܟܳܐ ܪܰܒܽܘܬܶܗ: ܕܶܐܬܳܐ ܠܒܰܛܢܳܐ ܘܰܠܝܰܠܕܳܐ: ܘܠܳܐ ܡܶܬܥܰܩܰܒ ܡܰܘܠܳܕܶܗ: ܠܥܶܠ ܒܰܫܡܰܝܳܐ ܥܛܺܝܦ ܢܽܘܗܪܳܐ: ܘܒܰܡܥܰܪܬܳܐ ܟܪܺܝܟ: ܥܰܙܪܽܘܪ̈ܶܐ: ܠܶܗ ܬܶܫܒܽܘܚܬܳܐ ܕܶܐܬܳܐ ܠܡܰܘܠܳܕܳܐ: ܡܶܛܽܠ ܦܽܘܪܩܳܢܶܗ ܕܳܐܕܳܡ܀

ܗܳܐ ܡܶܬܢܰܨܰܪ ܐܰܝܟ ܫܰܒܪܳܐ: ܥܽܘܠܳܐ ܕܩܰܫܺܝܫ ܡܶܢ ܕܳܪ̈ܶܐ: ܘܗܳܐ ܕܳܐܶܨ ܐܰܝܟ ܝܰܠܽܘܕܳܐ: ܗܰܘ ܕܕܳܨ ܠܽܐܘܪܥܶܗ ܝܽܘܚܰܢܳܢ: ܗܳܐ ܡܶܙܕܰܝܰܚ ܥܰܠ ܕܪ̈ܳܥܶܐ: ܗܰܘ ܒܰܪ ܥܰܬܺܝܩ ܝܰܘ̈ܡܳܬܳܐ: ܠܶܗ ܬܶܫܒܽܘܚܬܳܐ ܕܶܐܬܳܐ ܠܡܰܘܠܳܕܳܐ: ܡܶܛܽܠ ܦܽܘܪܩܳܢܶܗ ܕܳܐܕܳܡ܀

ܬܶܫܒܽܘܚܬܳܐ ܚܕܰܬܳܐ
ܩܳܠܳܐ ܒܩ̄: ܢܚܶܬ ܡܰܠܰܐܟܳܐ ܡܶܢ ܪܰܘܡܳܐ

ܢܚܶܬ ܡܰܠܰܐܟܳܐ ܡܶܢ ܪܰܘܡܳܐ܆ ܘܰܐܝܬܺܝ ܗ̱ܘܳܐ ܣܒܰܪܬܳܐ ܠܥܳܠܡܳܐ܆ ܘܝܰܒܶܒܘ ܘܰܩܥܰܘ ܟܽܠ ܥܰܡ̱̈ܡܺܝܢ܆ ܡܶܢ ܣܰܘ̈ܦܶܝܗ̇ ܠܣܰܘ̈ܦܶܐ ܕܰܐܪܥܳܐ܆ ܕܡܰܠܟܰܢ ܝܶܫܽܘܥ ܐܰܠܳܗܳܐ܆ ܐܶܬܚܙܺܝ ܒܬܺܒܶܝܠ ܐܰܝܟ ܫܰܒܪܳܐ܆ ܘܰܦܪܰܩ ܥܰܡ̱̈ܡܶܐ ܡܶܢ ܛܽܘܥܝܰܝ܀

ܪ̈ܳܥܰܘܳܬܳܐ ܘܰܡܓܽܘ̈ܫܶܐ܆ ܛܥܶܢܘ ܩܽܘܪ̈ܒܳܢܶܐ ܘܰܣܓܶܕܘ ܠܶܗ܆ ܠܝܰܠܕܳܐ ܕܰܕܢܰܚ ܡܶܢ ܡܰܪܝܰܡ܆ ܒܰܡܥܰܪܬܳܐ ܒܓܰܘ ܒܶܝܬ ܠܚܶܡ܆ ܥܰܡ̱̈ܡܶܐ ܒܪ̈ܺܝܟܶܐ ܙܡܰܪܘ ܫܽܘܒܚܳܐ܆ ܒܝܰܘܡܳܐ ܪܰܒܳܐ ܕܡܰܘܠܳܕܶܗ܆ ܕܬܶܣܒܽܘܢ ܡܶܢܶܗ ܥܽܘܕܪ̈ܳܢܶܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܠܰܐܠܳܗܳܐ ܕܒܰܐܬܽܘܢܳܐ

ܝܰܘܡܳܢ ܐܶܬܺܝܠܶܕ ܒܺܝܗܽܘܕ: ܡܰܠܟܳܐ ܕܰܐܟܬܶܒ ܠܰܢ ܝܰܥܩܽܘܒ ܒܰܢܒܺܝܽܘܬܶܗ: ܕܺܐܝܬܰܘܗ̱ܝ ܪܺܝܫܳܐ ܘܫܰܠܺܝܛܳܐ: ܘܬܰܩܺܝܦܳܐ ܘܓܰܢ̱ܒܳܪ ܥܳܠ̈ܡܶܐ: ܕܠܶܗ ܫܰܒܰܚܘ ܥܒܳܕܰܘ̈ܗ̱ܝ ܘܟܽܠܗܶܝܢ ܒܶܪ̈ܝܳܬܶܗ: ܘܝܰܬܺܝܪ ܢܪܰܡܪܶܡ ܘܢܰܘܪܶܒ ܠܰܫܡܶܗ ܩܰܕܺܝܫܳܐ ܠܥܳܠܡܺܝܢ܀

ܝܰܘܡܳܢܳܐ ܗܰܘ ܕܰܕܠܳܐ ܓܫܽܘܡ: ܒܨܶܒܝܳܢܶܗ ܕܢܰܚ ܡܶܢ ܡܰܪܝܰܡ ܦܰܓܪܳܢܳܐܺܝܬ: ܘܒܳܬܰܪ ܝܰܠܕܳܐ ܒܬܶܕܡܽܘܪܬܳܐ: ܒܰܒܬܽܘܠܽܘܬܳܗ̇ ܢܰܛܪܳܗ̇ ܗ̱ܘܳܐ: ܕܠܶܗ ܫܰܒܰܚܘ ܥܒܳܕܰܘ̈ܗ̱ܝ ܘܟܽܠܗܶܝܢ ܒܶܪ̈ܝܳܬܶܗ: ܘܝܰܬܺܝܪ ܢܪܰܡܪܶܡ ܘܢܰܘܪܶܒ ܠܰܫܡܶܗ ܩܰܕܺܝܫܳܐ ܠܥܳܠܡܺܝܢ܀

ܠܰܡܫܺܝܚܳܐ ܐܰܠܳܗܳܐ ܕܥܰܠ ܟܽܠ: ܕܶܐܬܥܰܙܪܰܪ ܘܶܐܬ̣ܬܣܺܝܡ ܒܽܐܘܪܝܳܐ ܐܰܝܟ ܒܰܪܢܳܫܳܐ: ܘܚܰܪܰܪ ܠܰܢ ܡܶܢ ܥܰܒܕܽܘܬܳܐ: ܘܰܫܪܳܢ ܡܶܢ ܦܟܳܪ̈ܶܐ ܕܡܰܘܬܳܐ: : ܕܠܶܗ ܫܰܒܰܚܘ ܥܒܳܕܰܘ̈ܗ̱ܝ ܘܟܽܠܗܶܝܢ ܒܶܪ̈ܝܳܬܶܗ: ܘܝܰܬܺܝܪ ܢܪܰܡܪܶܡ ܘܢܰܘܪܶܒ ܠܰܫܡܶܗ ܩܰܕܺܝܫܳܐ ܠܥܳܠܡܺܝܢ܀

ܠܰܡܫܺܝܚܳܐ ܐܰܠܳܗܳܐ ܕܺܝܠܰܢ: ܕܡܶܛܽܠ ܦܽܘܪܩܳܢܳܐ ܕܺܝܠܰܢ ܡܰܟܶܟ ܢܰܦܫܶܗ: ܘܶܐܬܺܝܠܶܕ ܡܶܢ ܒܰܪ̱ܬ ܕܰܘܺܝܕ: ܕܠܰܢ ܢܰܦܢܶܐ ܠܓܰܘ ܝܳܪܬܽܘܬܰܢ: ܕܠܶܗ ܫܰܒܰܚܘ ܥܒܳܕܰܘ̈ܗ̱ܝ ܘܟܽܠܗܶܝܢ ܒܶܪ̈ܝܳܬܶܗ: ܘܝܰܬܺܝܪ ܢܪܰܡܪܶܡ ܘܢܰܘܪܶܒ ܠܰܫܡܶܗ ܩܰܕܺܝܫܳܐ ܠܥܳܠܡܺܝܢ܀

ܢܶܚܕܽܘܢ ܫܡܰܝܳܐ ܘܰܬܕܽܘܨ ܐܰܪܥܳܐ: ܘܢܶܪܘܰܙ ܝܰܡܳܐ ܘܓܳܙܪ̈ܳܬܳܐ ܘܟܽܠܗܽܘܢ ܣܰܘ̈ܦܶܝܗ̇: ܘܰܢܫܰܒܚܽܘܢ ܘܢܶܙܡܪܽܘܢ ܫܽܘܒܚܳܐ: ܠܰܐܠܳܗܳܐ ܕܶܐܬܓܠܺܝ ܒܰܒܣܰܪ: ܕܠܶܗ ܫܰܒܰܚܘ ܥܒܳܕܰܘ̈ܗ̱ܝ ܘܟܽܠܗܶܝܢ ܒܶܪ̈ܝܳܬܶܗ: ܘܝܰܬܺܝܪ ܢܪܰܡܪܶܡ ܘܢܰܘܪܶܒ ܠܰܫܡܶܗ ܩܰܕܺܝܫܳܐ ܠܥܳܠܡܺܝܢ܀

ܫܰܒܰܚܘ ܥܰܒ̈ܕܰܘܗ̱ܝ ܕܡܳܪܝܳܐ
ܩܳܠܳܐ ܒܩ̄: ܠܗܰܘ ܕܰܛܥܺܝܢܳܐ ܡܰܪܟܰܒܬܳܐ

ܠܗܰܘ ܕܰܛܥܺܝܢܳܐ ܡܰܪܟܰܒܬܳܐ: ܘܡܶܙܕܰܝܰܚ ܡܶܢ ܡܰܠܰܐܟ̈ܶܐ: ܥܶܠܳܝ̈ܶܐ ܩܥܰܘ ܠܶܗ ܩܰܕܺܝܫ: ܘܬܰܚ̈ܬܳܝܶܐ ܒܪܺܝܟ ܡܶܢ ܐܰܬܪܶܗ: ܗ̄ܘܗ̄܀

ܐܰܪܥܳܐ ܒܬܽܘܠܬܳܐ ܝܶܠܕܰܬ ܗ̱ܘܳܬ܆ ܠܗܰܘ ܐܳܕܳܡ ܪܺܝܫܳܐ ܕܛܽܘ̈ܗܡܶܐ܆ ܘܰܒܬܽܘܠܬܳܐ ܡܰܪܝܰܡ ܝܶܠܕܰܬ܆ ܠܳܐܕܳܡ ܪܺܝܫܳܐ ܕܰܫܡܰܝܳܐ: ܗ̄ܘܗ̄܀

ܒܪܺܝܟܽ ܗ̱ܘ ܕܰܫܪܳܐ ܒܓܰܘ ܟܰܪܣܳܐ܆ ܟܰܕ ܪܶܡܙܶܗ ܠܥܶܠ ܦܳܩܶܕ ܗ̱ܘܳܐ܆ ܘܡܰܠ̈ܝܳܢ ܡܶܢܶܗ ܟܽܠܒܶܪ̈ܝܳܢ܆ ܘܗܳܐ ܝܳܬܶܒ ܡܶܢ ܝܰܡܺܝܢܳܐ: ܗ̄ܘܗ̄܀

ܝܰܘܡܳܢܳܐ ܚܕܺܝܘ ܥܶܠܳܝ̈ܶܐ܆ ܘܝܰܒܶܒܘ ܫܽܘܒܚܳܐ ܬܰܚܬܳܝ̈ܶܐ܆ ܘܶܐܬܚܰܠܰܛܘ ܟܶܢ̈ܫܶܐ ܒܟܶܢ̈ܫܶܐ܆ ܒܝܽܘܡ ܝܰܠܕܶܗ ܕܒܰܪ ܐܰܠܳܗܳܐ: ܗ̄ܘܗ̄܀

ܩܰܕܺܝܫ ܗ̱ܽܘ ܝܰܘܡܳܐ ܗܳܢܳܐ܆ ܘܰܫܒܺܝܚ ܣܰܓܺܝ ܘܰܡܝܰܬܰܪ܆ ܕܒܶܗ ܐܶܬܺܝܠܶܕ ܩܰܕܺܝܫܳܐ܆ ܘܦܳܪܽܘܩܳܐ ܘܰܡܚܰܪܰܪ ܟܽܠ: ܗ̄ܘܗ̄܀

ܟܽܠܗܽܘܢ ܥܰܡ̱̈ܡܶܐ ܢܒܰܪܟܽܘܢܳܝܗ̱ܝ܆ ܟܽܠܗܽܘܢ ܦܽܘ̈ܡܶܐ ܢܫܰܒܚܽܘܢܳܝܗ̱ܝ܆ ܠܗܰܘ ܕܶܐܬܳܐ ܠܝܰܠܕܳܐ ܒܰܒܣܰܪ܆ ܡܶܛܽܠ ܦܽܘܪܩܳܢܶܗ ܕܳܐܕܳܡ: ܗ̄ܘܗ̄܀

ܗܳܢܳܐ ܐܶܬܺܝܠܶܕ ܬܰܡܳܢ܆ ܘܒܰܟܬܳܒܳܐ ܢܶܡܢܶܐ ܠܥܰܡ̱̈ܡܶܐ܆ ܡܶܠܬܳܐ ܕܡܰܠܶܠ ܗ̱ܘܳܐ ܢܒܺܝܳܐ܆ ܝܰܘܡܳܢܳܐ ܗܘܳܬ ܒܰܥܒܳܕܳܐ: ܗ̄ܘܗ̄܀

ܒܬܽܘܠܬܳܐ ܓܶܝܪ ܝܰܘܡܳܢ ܝܶܠܕܰܬ܆ ܠܥܰܡܰܢܽܘܐܶܝܠ ܐܰܠܳܗܳܐ܆ ܙܡܺܝܪܬܳܐ ܕܙܰܡܰܪ ܐܶܫܰܥܝܳܐ܆ ܝܰܘܡܳܢܳܐ ܗܘܳܐ ܦܽܘܫܳܩܳܗ̇: ܗ̄ܘܗ̄܀

ܠܳܟ ܫܽܘܒܚܳܐ ܘܠܳܟ ܬܰܘܕܺܝܬܳܐ܆ ܝܰܠܕܳܐ ܕܰܕܢܰܚ ܡܶܢ ܡܰܪܝܰܡ܆ ܘܰܢܦܰܩ ܡܶܢܳܗ̇ ܘܰܚܬܺܝܡܳܐ܆ ܘܠܳܐ ܫܪܳܐ ܛܰܒ̈ܥܶܐ ܕܰܒܬܽܘ̈ܠܶܝܗ̇: ܗ̄ܘܗ̄܀

ܛܽܘܒܰܝܗܽܘܢ ܠܡܶܣ̈ܟܺܢܶܐ
ܩܳܠܳܐ ܒܩ̄: ܠܗܳܝ ܒܰܪ̱ܬ ܩܳܠܳܐ ܫܒܺܝܚܬܳܐ

ܐܶܡܰܪܘ ܟܺܝܬ ܪ̈ܳܥܰܘܳܬܳܐ܆ ܠܰܚ̈ܕܳܕܶܐ ܕܢܺܐܙܰܠ ܢܶܚܙܶܐ ܒܚܰܕܽܘܬܳܐ܆ ܠܡܶܠܬܳܐ ܕܡܶܢ ܡܰܠܰܐܟ̈ܶܐ ܐܶܣܬܰܒܪܰܬ܆ ܕܡܳܪܝܳܐ ܐܰܘܕܰܥ ܠܰܢ ܥܰܠ ܝܰܠܕܶܗ ܕܰܒܪܳܐ܀

ܫܽܘܒܚܳܐ ܠܶܗ ܠܗܰܘ ܕܰܒܚܽܘܒܶܗ܆ ܬܰܚܬܺܝ ܝܳܬܶܗ ܚܠܳܦ ܦܽܘܪܩܳܢܰܢ܆ ܘܶܐܬܺܝܠܶܕ ܠܥܶܠ ܡܶܢ ܡܶܠܬܳܐ ܘܗܰܘܢܳܐ܆ ܡܶܢ ܒܬܽܘܠܬܳܐ ܡܰܪܝܰܡ ܘܰܒܬܽܘܠܶܝ̈ܗ̇ ܠܳܐ ܫܪܳܐ܀

ܡܳܐ ܦܰܐܝܳܐ ܗܳܝ ܒܰܪ̱ܬ ܩܳܠܳܐ܆ ܕܥܺܝܪ̈ܰܝ ܪܰܘܡܳܐ ܕܰܡܫܰܒܚܺܝܢ ܗ̱ܘܰܘ܆ ܠܰܐܠܳܗܳܐ ܕܶܐܬܺܝܠܶܕ ܦܰܓܪܳܢܳܐܺܝܬ܆ ܡܶܢ ܒܬܽܘܠܬܳܐ ܡܰܪܝܰܡ ܫܽܘܒܚܳܐ ܠܡܽܘܟܳܟܶܗ܀

ܒܝܰܘܡܳܐ ܪܰܒܳܐ ܕܥܰܕܥܺܐܕܳܟ܆ ܘܰܕܡܰܘܠܳܕܳܟ ܕܰܚܠܳܦܰܝܢ ܒܰܪ ܐܰܠܳܗܳܐ܆ ܢܶܣܰܒ ܡܶܢܳܟ ܫܽܘܒܩܳܢ ܚܰܘ̈ܒܳܬܰܢ܆ ܘܢܶܚܕܶܐ ܒܰܓܢܽܘܢܳܟ ܥܰܡ ܟܺܐܢ̈ܶܐ ܘܥܰܡ ܙܰܕܺܝ̈ܩܶܐ܀

ܟܽܠܗܽܘܢ ܦܽܘ̈ܡܶܐ ܢܰܘܕܽܘܢ ܠܳܟ܆ ܐܳܦ ܠܶܫܳܢ̈ܶܐ ܕܰܒ̈ܢܰܝ ܐ̱ܢܳܫ̈ܳܐ܆ ܕܶܐܬܰܝܬ ܘܰܒܝܰܠܕܳܟ ܚܰܪܰܪܬ ܐܶܢܽܘܢ܆ ܡܶܢ ܐܺܝ̈ܕܰܝ ܒܺܝܫܳܐ ܒܪܺܝܟܳܐ ܗ̱ܝ ܛܰܝܒܽܘܬܳܟ܀

ܫܽܘܒܚܳܐ

ܫܽܘܒܚܳܐ ܠܶܗ ܠܗܰܘ ܓܶܠܝܳܢܳܐ܆ ܕܰܚܙܳܐ ܡܽܘܫܶܐ ܒܛܽܘܪܳܐ ܕܣܺܝܢܰܝ܆ ܘܶܐܬܳܐ ܝܰܘܡܳܢ ܘܰܕܢܰܚ ܒܰܒܪܺܝܬܳܐ܆ ܘܗܳܐ ܚܳܕܶܝܢ ܟܽܠܗܽܘܢ ܥܰܡ̱̈ܡܶܐ ܒܝܽܘܡ ܝܰܠܕܶܗ܀

ܩܳܠܳܐ ܕܨܰܦܪܳܐ
ܩܳܠܳܐ ܒܩ̄: ܥܰܠ ܒܶܝܬ ܠܚܶܡ
ܥܰܠ ܒܶܝܬ ܠܚܶܡ܆ ܕܺܝܗܽܘܕܳܐ ܥܶܒܪܶܬ

ܥܰܠ ܒܶܝܬ ܠܚܶܡ܆ ܕܺܝܗܽܘܕܳܐ ܥܶܒܪܶܬ܆ ܘܩܳܠܳܐ ܕܢܽܘܨܪ̈ܳܬܳܐ ܫܶܡܥܶܬ܆ ܚܰܒܺܝ̈ܒܳܬܳܐ ܘܰܐܚܕܰܢܝ ܕܽܘܡܳܪܳܐ܆ ܩܳܠܳܗ̇ ܕܡܰܪܝܰܡ܆ ܕܰܡܢܰܨܪܳܐ ܠܰܒܪܳܗ̇܆ ܫܦܰܪ ܠܳܟ ܒܶܪܝ ܘܰܗܘܺܝܬ ܐܶܡܳܟ܆ ܘܰܐܒܽܘܟ ܡܰܢܽܘ ܐܶܡܳܟ ܠܳܐ ܪܓܺܝܫܳܐ܆ ܦܩܽܘܕ ܠܰܣܪ̈ܳܦܶܐ܆ ܕܬܳܠܶܝܢ ܓܶܦܰܝ̈ܗܽܘܢ܆ ܒܓܽܘܕܰܝ̈ܗܽܘܢ ܘܰܒܣܶܕܪ̈ܰܝܗܽܘܢ܆ ܒܗܽܘܠܳܠܰܝ̈ܗܽܘܢ ܘܰܒܩܽܘܕܳܫܰܝ̈ܗܽܘܢ܆ ܦܩܽܘܕ ܠܳܗ̇ ܠܶܐܡܳܟ܆ ܕܬܶܒܪܽܘܟ ܘܬܶܣܓܽܘܕ ܠܳܟ܆ ܘܬܶܬܶܠ ܚܰܠܒܳܐ ܠܗܳܝ ܢܽܘܪܳܐ܆ ܕܰܚܙܳܐ ܡܽܘܫܶܐ ܥܰܠ ܛܽܘܪܳܐ ܕܣܺܝܢܰܝ܆ ܒܪܺܝܟܽ ܗ̱ܘ ܕܰܫܒܰܩ܆ ܡܰܪܟܰܒܬܳܐ ܒܪܰܘܡܳܐ܆ ܘܒܰܡܥܰܪܬܳܐ ܐܽܘܪܝܳܐ ܓܒܳܐ ܠܶܗ܆ ܗ̄ ܘܶܐܬܳܐ ܠܡܰܘܠܳܕܳܐ܀

ܫܽܘܒܚܳܐ

ܒܰܕܡܽܘܬ ܐܶܠܦܳܐ܆ ܕܰܛܥܺܝܢܳܐ ܥܽܘܬܪܳܐ܆ ܛܥܺܝܢܳܐ ܠܶܗ ܒܬܽܘܠܬܳܐ ܡܰܪܝܰܡ܆ ܠܓܽܘܪܝܳܐ ܕܰܐܪܝܳܐ ܗܰܘ ܕܰܐܟܬܶܒ ܝܰܥܩܽܘܒ܆ ܟܰܕ ܪܳܕܶܝܢ ܗ̱ܘܰܘ܆ ܒܽܐܘܪܚܳܐ ܕܒܶܝܬ ܠܚܶܡ܆ ܐܳܡܪܳܐ ܠܶܗ ܒܬܽܘܠܬܳܐ ܠܝܰܘܣܶܦ܆ ܕܚܶܒ̈ܠܶܐ ܕܝܰܠܕܳܐ ܫܰܪܺܝܘ ܡܳܚܶܝܢ ܠܺܝ܆ ܐܳܡܰܪ ܝܰܘܣܶܦ܆ ܡܽܘܢ ܐܺܝܬ ܠܺܝ ܕܶܐܥܒܶܕ܆ ܠܳܐ ܥܰܪܣܳܐ ܘܠܳܐ ܬܰܫܘܺܝܬܳܐ܆ ܐܳܦܠܳܐ ܒܰܝܬܳܐ ܕܢܶܥܽܘܠ ܘܢܶܣܬܰܬܰܪ܆ ܨܰܠܺܝ ܟܺܐܢܳܐ܆ ܒܰܚܢܰܓܬܳܐ ܘܶܐܡܰܪ܆ ܐܰܠܳܗܳܐ ܕܰܒܪܳܐ ܫܡܰܝܳܐ ܘܰܐܪܥܳܐ ܘܳܐܐܰܪ܆ ܘܝܰܡ̱̈ܡܶܐ ܘܟܽܠ ܕܰܒܗܽܘܢ܆ ܚܽܘ̈ܢܶܝܗ̇ ܠܰܐܡܬܳܟ܆ ܒܝܰܘܡܳܐ ܕܡܰܘܠܳܕܳܟ܆ ܕܝܳܕܰܥ ܐܰܢ̱ܬ ܕܰܟܡܳܐ ܚܰܣܕܽܘܗ̇܆ ܘܰܟܡܳܐ ܛܰܠܡܽܘܗ̇ ܥܰܡܳܐ ܕܝܗ̱ܽܘܕܳܝ̈ܶܐ܆ ܒܪܺܝܟܽ ܗ̱ܘ ܕܰܫܒܰܩ܆ ܡܰܪܟܰܒܬܳܐ ܒܪܰܘܡܳܐ܆ ܘܒܰܡܥܰܪܬܳܐ ܐܽܘܪܝܳܐ ܓܒܳܐ ܠܶܗ܆ ܗ̄ ܒܪܺܝܟ ܕܶܐܬܳܐ ܘܦܰܪܩܰܢ܀

ܡܶܢ ܥܳܠܰܡ

ܥܰܠ ܒܶܝܬ ܥܰܢܝܳܐ. ܩܪܺܝܬܳܐ ܥܳܒܰܪ ܗܘܺܝܿܬ. ܘܩܳܠܳܐ ܕܒܶܟܝܳܐ ܫܳܡܰܥ ܗܘܺܝܿܬ: ܬܰܪܬܶܝܢ ܐܰܚܘ̈ܳܢ܆ ܕܰܠܝܶܫܽܘܥ ܐܳܡܪ̈ܳܢ. ܕܶܐܠܘ ܬܢܳܢ ܗܘܰܝܬ: ܚܰܢܳܢܳܐ ܡܳܪܰܢ. ܠܳܥܳܙܳܪ ܠܳܐ ܡܳܐܶܬ ܗ̱ܘܳܐ. ܐܰܚܳܐ ܕܺܝܠܰܢ. ܐܳܦ ܪܳܚܡܳܐ ܕܺܝܠܳܟ. ܕܰܐܢ̱ܬ ܫܰܕܰܪܬܳܝܗ̱ܝ܆ ܠܗܳܡܳܢ ܕܰܩܒܺܝܪ̈ܶܐ. ܕܢܰܟܪܶܙ ܒܳܗ̇ ܚܰܝܰܬ݀ ܡܺܝ̈ܬܶܐ܆ ܩܝܳܡܬܳܐ ܚܕܰܬܳܐ ܠܟܽܠܗܽܘܢ ܥܰܢܝ̈ܕܶܐ. ܒܪܺܝܟ ܗܽܘ̣ ܡܫܺܝܚܳܐ: ܕܰܩܪܳܝܗ̱ܝ ܘܰܐܩܺܝܡܶܗ܆ ܠ‍ܠܳܥܳܙܳܪ ܡ̣ܶܢ ܓܰܘ ܩܰܒܪܳܐ ܗ̄ ܘܝܰܗܒܶܗ ܠܰܐܚ̈ܘܳܬܶܗ܀

ܐ̱ܚܪܺܢܳܐ

ܩܳܠܳܐ ܒܩ̄: ܠܰܬܚܽܘܡܳܐ ܕܗܰܝܡܳܢܽܘܬܳܐ
ܒܬܽܘܠܬܳܐ ܝܳܠܕܰܬ ܕܽܘܡܳܪܳܐ: ܡܶܨܥܳܝܳܐ ܕܰܐܠܳܗܽܘܬܳܐ

ܐܶܡܰܪ ܠܺܝ ܛܽܘܒܳܢܺܝܬܳܐ܆ ܒܰܐܝܢܳܐ ܐܺܝܩܳܪܳܐ ܩܰܒܶܠܬܺܝܘܗ̱ܝ܆ ܠܗܰܘ ܕܰܫܡܰܝܳܐ ܘܰܐܪܥܳܐ ܡܠܶܝܢ ܡܶܢܶܗ܆ ܥܰܠ ܡܶܢ ܐܶܕܢܳܐ ܘܠܳܐ ܪܶܓܫܶܬ܆ ܫܪܳܐ ܒܟܰܪܣܳܐ ܘܠܳܐ ܐܰܙܺܝܥܰܢܝ܆ ܚܰܝܠܶܗ ܣܰܡܟܰܢܝ ܘܨܶܒܝܳܢܶܗ ܣܰܥܪܰܢܝ܆ ܘܶܐܢܳܐ ܒܶܪܟܶܬ ܘܺܝܠܶܕܬܶܗ܆ ܠܥܽܘܠܳܐ ܕܩܰܫܺܝܫ ܡܶܢ ܕܳܪ̈ܶܐ܆ ܗ̄ ܒܓܰܘܳܗ̇ ܕܒܶܝܬ ܠܚܶܡ܀

ܫܽܘܒܚܳܐ

ܚܶܕܝܰܬ ܡܰܪܝܰܡ ܕܺܝܠܶܕܬܶܗ܆ ܚܶܕܝܰܬ ܡܥܰܪܬܳܐ ܕܩܰܒܶܠܬܶܗ܆ ܘܰܚܕܺܝ ܐܽܘܪܝܳܐ ܕܰܫܘܳܐ ܠܺܐܝܩܳܪܶܗ܆ ܘܰܚܕܺܝܘ ܐܳܦ ܪ̈ܳܥܰܘܳܬܳܐ܆ ܕܰܚܙܰܘ ܫܽܘܒܚܳܐ ܕܡܰܠܰܐܟ̈ܶܐ܆ ܕܰܢܚܶܬܘ ܨܶܐܕܰܘܗ̱ܝ ܡܶܢ ܪܰܘܡܳܐ ܠܥܽܘܡܩܳܐ܆ ܚܶܕܝܰܬ ܒܶܗ ܫܡܰܝܳܐ ܘܰܐܪܥܳܐ܆ ܒܝܰܠܕܳܐ ܕܫܰܝܶܢ ܒܶܪ̈ܝܳܬܳܐ܆ ܗ̄ ܒܪܺܝܟ ܝܰܠܕܶܟܝ ܡܰܪܝܰܡ܀

ܡܶܢ ܥܳܠܰܡ

ܥܰܢܺܝ̈ܕܶܐ ܕܰܒܚܰܝܰܝ̈ܗܽܘܢ. ܙܡܰܪܘ ܫܽܘܒܚܳܐ ܒܠܶܫܳܢܰܝ̈ܗܽܘܢ܆ ܠܥܶܠ ܒܰܫܡܰܝܳܐ: ܢܶܗܘܶܐ ܕܽܘܟܪܳܢܗܽܘܢ: ܒܥܺܕܬܳܐ ܕܒܽܘܟܪ̈ܶܐ ܕܒܰܫܡܰܝܳܐ. ܘܒܰܝܢܳܬ ܪ̈ܽܘܚܳܬܳܐ ܕܟܺܐܢ̈ܶܐ܆ ܕܰܦܠܰܚܘ ܩܽܘܕܡܰܝܟ: ܘܰܥܒܰܕܘ ܨܶܒܝܳܢܳܟ. ܠܳܐ ܬܶܥܽܘܠ ܠܕܺܝ̣ܢܳܐ ܥܰܡܗܽܘܢ. ܕܰܐܢ̱ܬ ܗ̣ܽܘ ܠܚܽܘܕܰܝܟ ܙܰܟܳܝܳܐ: ܘܰܡܢܰܚܡܳܢܳܐ: ܕܟܽܠܗܽܘܢ ܥܰܢܺܝ̈ܕܶܐ. ܦܰܓܪܳܟ ܘܰܕܡܳܟ ܢܶܗܘܶܐ ܠܗܽܘܢ. ܐܽܘܪܚܳܐ ܘܓܺܝܫܪܳܐ ܘܡܰܥܒܰܪܬܳܐ: ܘܒܶܗ ܢܶܬܡܰܢܥܽܘܢ ܠܰܓܢܽܘܢ ܚܰܕܘ̈ܳܬܳܐ܀

ܦܶܬܓܳܡܳܐ: ܡܰܠ̈ܟܶܐ ܕܬܰܪܫܺܝܫ ܘܰܕܓܳܙܪ̈ܳܬܳܐ: ܩܽܘܪ̈ܒܳܢܶܐ ܢܰܝܬܽܘܢ ܠܶܗ ܗܰܠܶܠܽܘܝܰܗ܀

ܒܳܥܽܘܬܳܐ ܕܡܳܪܝ ܝܰܥܩܽܘܒ
ܩܽܘܡ ܝܰܡܠܺܝܟܳܐ ܥܽܘܠ ܠܰܡܕܺܝܢ̱ܬܳܐ

ܒܪܳܐ ܕܰܒܝܰܠܕܶܗ ܦܰܪܩܳܗ̇ ܠܥܺܕܬܶܗ ܡܶܢ ܛܳܥܝܽܘܬܳܐ܆

ܗܰܒ ܒܳܗ̇ ܫܰܝܢܳܟ ܘܢܰܛܰܪ ܝܰܠ̈ܕܶܝܗ̇ ܒܡܰܘܠܳܕܳܟ ܡܳܪܝ܀

ܒܚܰܠܒܳܗ̇ ܕܡܰܪܝܰܡ ܡܶܬܪܰܒܶܐ ܗ̱ܘܰܝܬ ܐܰܝܟ ܝܰܠܽܘܕܳܐ܆ ܕܰܙܥܽܘܪ ܗ̱ܽܘ ܠܶܗ ܦܽܘܡܳܐ ܠܡܶܠܬܳܐ ܕܬܶܬܢܶܐ ܫܰܪܒܳܟ܆ ܚܰܠܒܳܐ ܫܺܐܝܠܳܐ ܛܠܺܝܬܳܐ ܝܶܗܒܰܬ ܠܳܟ ܡܳܪܶܐ ܟܽܠ܆ ܘܰܒܝܰܡܺܝܢܳܐ ܕܛܶܦܚܰܬ ܛܽܘܪ̈ܶܐ ܬܕܳܐ ܠܒܺܝܟ ܗ̱ܘܰܝܬ ܒܳܗ̇܀

ܗܳܐ ܒܒܶܝܬ ܠܚܶܡ ܠܰܚܡܳܐ ܕܚܰܝ̈ܶܐ ܠܰܒܢܰܝ̈ܢܳܫܳܐ܆ ܘܽܐܘܟܠܳܐ ܒܽܐܘܪܝܳܐ ܠܥܰܡ̱̈ܡܶܐ ܕܰܛܥܰܘ ܐܰܝܟ ܚܰܝ̈ܘܳܬܳܐ܆ ܡܥܰܪܬܳܐ ܢܩܺܝܪܬܳܐ ܕܰܗܘܳܬ ܒܰܝܬܳܐ ܠܡܳܪܶܐ ܪܰܘܡܳܐ܆ ܘܢܶܩܥܳܐ ܚܠܺܝܠܳܐ ܕܫܰܪܝܳܐ ܒܓܰܘܶܗ ܐܰܠܳܗܽܘܬܳܐ܀

ܫܰܝܢܳܐ ܕܫܰܝܶܢ ܠܰܫ̈ܡܰܝܳܢܶܐ ܘܠܰܐܪ̈ܥܳܢܳܝܶܐ܆

ܫܰܝܶܢ ܠܥܺܕܬܳܟ ܘܢܰܛܰܪ ܝܰܠ̈ܕܶܝܗ̇ ܒܡܰܘܠܳܕܳܟ ܡܳܪܝ܀