ܕܨܰܦܪܳܐ

ܥܶܢܝܳܢܳܐ ܕܪܰܚܶܡܥܠܰܝ
ܩܳܠܳܐ ܒܩ̄: ܒܪܺܝܟ ܕܚܰܕܺܝ ܠܰܫ̈ܡܰܝܳܢܶܐ

ܗܰܘ ܕܰܡܥܰܛܰܦ ܓܰܘܙܰܠܬܳܐ܆ ܒܪܰܘܡܳܐ ܨܶܝܕ ܐܰܒܽܘܗ̱ܝ܆ ܒܗܳܢܳܐ ܝܰܘܡܳܐ ܐܶܬܓܠܺܝ ܗ̱ܘܳܐ܆ ܠܥܺܝܢ ܟܶܢ̈ܫܶܐ ܟܽܠܗܽܘܢ܀

ܒܪܺܝܟ ܝܰܠܕܳܟ ܘܰܒܪܺܝܟ ܕܶܢܚܳܟ܆ ܝܶܫܽܘܥ ܦܳܪܽܘܩܰܢ܆ ܫܽܘܒܚܳܐ ܠܰܥܡܳܕܳܟ ܚܰܣܝܳܐ܆ ܕܦܰܪܩܰܢ ܡܶܢ ܛܽܘܥܝܰܝ܀

ܡܠܶܟ ܡܰܠ̈ܟܶܐ ܘܩܳܛܰܪ ܬܳܓ̈ܶܐ܆ ܕܶܐܬܳܐ ܠܰܥܡܳܕܳܐ܆ ܐܰܫܪܳܐ ܫܰܝܢܳܟ ܘܰܫܠܳܡܳܟ܆ ܒܥܰܡܳܟ ܘܰܒܥܺܕܬܳܟ܀

ܕܢܰܚ ܐܰܝܟ ܢܽܘܗܪܳܐ ܥܰܙܺܝܙܳܐ܆ ܨܶܡܚܳܐ ܕܡܶܢ ܐܰܒܳܐ܆ ܘܰܢܚܶܬ ܘܰܥܡܰܕ ܐܰܝܟ ܕܰܨܒܳܐ܆ ܒܓܰܘ ܝܽܘܪܕܢܳܢ ܢܰܗܪܳܐ܀

ܫܽܘܒܚܳܐ ܠܳܟ ܚܰܝܠܶܗ ܕܰܐܒܳܐ܆ ܕܶܐܬܰܝܬ ܠܰܥܡܳܕܳܐ܆ ܘܡܶܢ ܝܽܘܚܰܢܳܢ ܐܶܬܥܡܰܕܬ܆ ܒܓܰܘ ܝܽܘܪܕܢܳܢ ܢܰܗܪܳܐ܀

ܐܰܠܳܗܝ ܐܰܠܳܗܝ
ܩܳܠܳܐ ܒܩ̄: ܠܘܳܬܳܟ ܡܩܰܕܶܡ ܐ̱ܢܳܐ

ܒܪܺܝܟܽ ܗ̱ܘ ܕܰܐܠܒܶܫ ܙܰܝܢܳܐ: ܕܪܽܘܚ ܩܽܘܕܫܳܐ ܦܰܪܰܩܠܺܝܛܳܐ: ܡܶܢ ܡܰܥܡܽܘܕܺܝܬܳܐ: ܠܝܰܠ̈ܕܰܘܗ̱ܝ ܕܳܐܕܳܡ ܥܰܦܪܳܢܳܐ: ܘܰܥܒܰܕ ܗ̱ܘܳܐ ܐܶܢܽܘܢ ܒܢܰܝ̈ܳܐ ܠܰܐܒܽܘܗ̱ܝ܀

ܐܶܬܳܐ ܠܝܽܘܪܕܢܳܢ܆ ܝܺܚܺܝܕܳܝܳܐ ܐܰܠܳܗܳܐ܆ ܕܢܶܥܡܰܕ ܐܰܝܟ ܫܚܺܝܡܳܐ܆ ܘܰܚܙܳܝܗ̱ܝ ܝܽܘܚܰܢܳܢ ܘܶܐܡܰܪ܆ ܕܗܳܢ ܐܺܝܬܰܘܗ̱ܝ ܐܶܡܪܶܗ ܕܰܐܠܳܗܳܐ܀

ܩܪܶܒ ܡܳܪܰܢ ܕܢܶܥܡܰܕ܆ ܘܝܽܘܚܰܢܳܢ ܟܳܠܶܐ ܗ̱ܘܳܐ ܠܶܗ܆ ܟܰܕ ܐܳܡܰܪ ܠܘܳܬܶܗ܆ ܕܰܐܢ̱ܬ ܦܳܪܽܘܩܰܢ ܐܰܥܡܶܕܰܝܢܝ܆ ܕܰܐܢ̱ܬܽ ܗ̱ܘ ܡܚܰܣܝܳܢܳܐ ܕܟܽܠ ܚܰܛܳܝ̈ܶܐ܀

ܥܢܳܐ ܡܳܪܰܢ ܘܶܐܡܰܪ܆ ܠܝܽܘܚܰܢܳܢ ܒܪܶܗ ܕܰܙܟܰܪܝܳܐ܆ ܕܰܫܒܽܘܩ ܠܰܡ ܗܳܫܳܐ܆ ܟܰܠܬܳܐ ܕܡܰܟܪܶܬ ܚܳܝܪܳܐ ܠܺܝ܆ ܕܡܶܢ ܡܰܥܡܽܘܕܺܝܬܳܐ ܬܶܬܚܰܬܰܢ ܠܺܝ܀

ܢܚܶܬ ܘܰܥܡܰܕ ܒܓܰܘ ܡܰܝ̈ܳܐ܆ ܡܚܰܣܶܐ ܚܰܘ̈ܒܶܐ ܘܰܚ̈ܛܳܗܶܐ܆ ܕܟܽܠܗܽܘܢ ܚܰܛܳܝ̈ܶܐ܆ ܐܰܒܳܐ ܩܥܳܐ ܕܗܳܢܰܘ ܚܰܒܺܝܒܝ܆ ܘܪܽܘܚܳܐ ܐܰܝܟ ܝܰܘܢܳܐ ܢܶܚܬܰܬ ܥܠܰܘܗ̱ܝ܀

ܝܰܘܡܳܢܳܐ ܐܶܬܚܰܙܝܰܬ܆ ܬܠܺܝܬܳܝܽܘܬܳܐ ܡܫܰܒܰܚܬܳܐ܆ ܥܰܠ ܝܽܘܪܕܢܳܢ ܢܰܗܪܳܐ܆ ܐܰܒܳܐ ܘܰܒܪܳܐ ܘܪܽܘܚ ܩܽܘܕܫܳܐ܆ ܢܶܒܗܰܬ ܕܒܳܨܶܐ ܠܶܗ ܥܕܰܡܳܐ ܠܥܳܠܰܡ܀

ܫܡܰܝ̈ܳܐ ܡܶܫܬܰܥܶܝܢ
ܩܳܠܳܐ ܒܩ̄: ܫܡܰܝܳܢ̈ܶܐ ܫܽܘܒܚܳܐ ܙܳܡܪܺܝܢ

ܗܳܐ ܦܬܺܝܚܳܐ ܡܰܥܡܽܘܕܺܝܬܳܐ܆ ܘܰܫܓܺܝܪܳܐ ܒܢܽܘܪܳܐ ܘܪܽܘܚܳܐ܆ ܚܰܛܳܝ̈ܶܐ ܬܽܘܒܽܘܢ ܘܰܚܝܰܘ܆ ܘܶܐܬܕܰܟܰܘ ܡܶܢ ܚܰܘ̈ܒܰܝܟܽܘܢ܀

ܐܺܝܠܳܢܳܐ ܕܶܐܡܰܪ ܕܰܘܺܝܕ܆ ܕܰܢܨܺܝܒ ܥܰܠ ܬܰܦܳܐ ܕܡܰܝ̈ܳܐ܆ ܗܽܘܝܽܘ ܡܫܺܝܚܳܐ ܒܰܫܪܳܪܳܐ܆ ܕܰܢܨܺܝܒ ܥܰܠ ܡܰܥܡܽܘܕܺܝܬܳܐ܀

ܒܗܳܢܳܐ ܝܰܘܡܳܐ ܐܶܬܚܰܙܝܰܬ܆ ܬܠܺܝܬܳܝܽܘܬܳܐ ܥܰܠ ܢܰܗܪܳܐ܆ ܒܪܳܐ ܕܥܳܡܶܕ ܘܪܽܘܚܳܐ ܕܢܳܚܶܬ܆ ܘܰܐܒܳܐ ܕܩܳܥܶܐ ܕܗܳܢܰܘ ܒܶܪܝ܀

ܒܕܶܢܚܳܟ ܡܳܪܝ ܢܶܗܪܰܬ ܬܺܒܶܝܠ܆ ܘܰܦܢܰܘ ܥܰܡ̱̈ܡܶܐ ܡܶܢ ܛܽܘܥܝܰܝ܆ ܘܶܐܬܩܰܕܫܰܬ ܡܰܥܡܽܘܕܺܝܬܳܐ܆ ܚܽܘܣܳܝܳܐ ܠܝܰܠ̈ܕܰܘܗ̱ܝ ܕܳܐܕܳܡ܀

ܡܰܥܡܽܘܕܺܝܬܳܐ ܗܘܳܬ ܐܶܡܳܐ܆ ܕܝܳܠܕܳܐ ܟܽܠܝܽܘܡ ܪ̈ܽܘܚܳܢܶܐ܆ ܒܢܰܝ̈ܳܐ ܚܰܕ̱̈ܬܶܐ ܘܪ̈ܽܘܚܳܢܶܐ܆ ܒܪܺܝܟ ܕܰܐܘܠܶܕ ܠܰܢ ܬܶܢܝܳܢܽܘܬ܀

ܬܶܫܒܽܘܚܬܳܐ ܚܕܰܬܳܐ
ܩܳܠܳܐ ܒܩ̄: ܥܒܶܕ ܡܳܪܝ ܕܽܘܟܪܳܢܳܐ ܛܳܒܳܐ

ܒܪܺܝܟܽ ܗ̱ܘ ܕܰܐܪܟܶܢ ܪܰܒܽܘܬܶܗ܆ ܘܰܥܡܰܕ ܡܶܢ ܐܺܝ̈ܕܰܝ ܥܰܒܕܶܗ܆ ܕܰܠܓܶܢܣܳܐ ܕܰܒܢܰܝ̈ܢܳܫܳܐ܆ ܢܕܰܠܶܐ ܘܢܰܣܶܩ ܠܰܫܡܰܝܳܐ܀

ܐܰܙܥܶܩ ܐܰܒܳܐ ܡܶܢ ܪܰܘܡܳܐ܆ ܕܗܳܢܰܘ ܒܶܪܝ ܗܳܢܰܘ ܚܰܒܺܝܒܝ܆ ܕܒܶܗ ܐܶܨܛܒܺܝܬ ܕܢܶܦܪܽܘܩ ܠܳܐܕܳܡ܆ ܘܢܰܦܢܶܝܘܗ̱ܝ ܠܰܥܕܶܢ ܝܳܪܬܽܘܬܶܗ܀

ܡܶܢ ܡܰܝ̈ܳܐ ܓܒܳܐ ܠܶܗ ܓܶܕܥܽܘܢ܆ ܓܰܒܪ̈ܶܐ ܘܰܢܦܰܩ ܠܰܩܪܳܒܳܐ܆ ܘܡܶܢ ܡܰܝ̈ܳܐ ܕܡܰܥܡܽܘܕܺܝܬܳܐ܆ ܓܒܳܐ ܠܶܗ ܡܫܺܝܚܳܐ ܣܳܓܽܘ̈ܕܶܐ܀

ܗܳܐ ܓܰܒܪܳܐ ܘܰܫܡܶܗ ܕܶܢܚܳܐ: ܙܟܰܪܝܳܐ ܢܒܺܝܳܐ ܐܶܬܢܰܒܺܝ: ܒܪܺܝܟܽ ܗ̱ܘ ܡܫܺܝܚܳܐ ܕܰܕܢܰܚ ܠܰܢ: ܘܫܰܡܠܺܝ ܐ̱ܪ̈ܳܙܶܐ ܕܰܢܒܺܝ̈ܶܐ܀

ܒܝܽܘܡ ܕܶܢܚܳܟ ܚܳܕܝܳܐ ܬܺܒܶܝܠ܆ ܘܰܦܨܺܝܚܳܐ ܥܺܕܰܬ ܩܽܘܕܫܳܐ܆ ܘܙܳܡܪܳܐ ܫܽܘܒܚܳܐ ܗܺܝ ܘܝܰܠ̈ܕܶܝܗ̇܆ ܕܰܚܙܰܘ ܢܽܘܗܪܳܐ ܫܰܪܺܝܪܳܐ܀

ܫܰܒܰܚܘ ܥܰܒ̈ܕܰܘܗ̱ܝ ܕܡܳܪܝܳܐ
ܩܳܠܳܐ ܒܩ̄: ܐܶܬܬܥܺܝܪ ܕܰܡ̈ܟܶܐ

ܝܰܘܡܳܢܳܐ ܥܡܰܕ ܦܳܪܽܘܩܰܢ ܡܶܢ ܝܽܘܚܰܢܳܢ܆ ܘܰܐܒܳܐ ܐܰܙܥܶܩ ܡܶܢ ܪܰܘܡܳܐ܆ ܕܗܳܢܰܘ ܒܶܪܝ ܗܳܢܰܘ ܚܰܒܺܝܒܝ܆ ܠܳܟ ܝܳܐܶܐ ܫܽܘܒܚܳܐ ܐܰܠܳܗܳܐ܀

ܛܳܣܰܬ ܪܽܘܚܳܐ ܡܶܢ ܪܰܘܡܳܐ ܒܰܕܡܽܘܬ ܝܰܘܢܳܐ܆ ܘܥܰܠ ܪܺܝܫܶܗ ܕܰܒܪܳܐ ܫܶܟܢܰܬ܆ ܘܝܰܒܶܒܘ ܟܶܢ̈ܫܶܐ ܕܡܰܠܰܐܟ̈ܶܐ܆ ܠܳܟ ܝܳܐܶܐ ܫܽܘܒܚܳܐ ܐܰܠܳܗܳܐ܀

ܝܰܘܡܳܢ ܚܳܕܶܝܢ ܡܰܠܰܐܟ̈ܶܐ ܘܰܒܢܰܝ̈ܢܳܫܳܐ܆ ܕܰܥܡܰܕ ܡܳܪܰܢ ܒܓܰܘ ܝܽܘܪܕܢܳܢ܆ ܘܒܰܥܡܳܕܶܗ ܢܶܗܪܰܬ ܬܺܒܶܝܠ܆ ܠܳܟ ܝܳܐܶܐ ܫܽܘܒܚܳܐ ܐܰܠܳܗܳܐ܀

ܝܰܘܡܳܢ ܚܳܕܶܝܢ ܡܰܒܽܘ̈ܥܶܐ ܘܢܰܗܪ̈ܰܘܳܬܳܐ܆ ܕܰܥܡܰܕ ܒܗܽܘܢ ܒܪܳܐ ܕܰܐܠܳܗܳܐ܆ ܘܩܰܕܶܫ ܐܶܢܽܘܢ ܒܰܥܡܳܕܶܗ܆ ܠܳܟ ܝܳܐܶܐ ܫܽܘܒܚܳܐ ܐܰܠܳܗܳܐ܀

ܗܰܘ ܕܰܫܡܰܝ̈ܳܐ ܡܠܶܝܢ ܡܶܢܶܗ ܘܰܙܥܽܘܪܺܝܢ ܠܶܗ܆ ܥܡܰܕ ܒܝܽܘܪܕܢܳܢ ܡܶܢ ܝܽܘܚܰܢܳܢ܆ ܘܰܦܪܰܩ ܥܳܠ̈ܡܶܐ ܡܶܢ ܛܽܘܥܝܰܝ܆ ܠܳܟ ܝܳܐܶܐ ܫܽܘܒܚܳܐ ܐܰܠܳܗܳܐ܀

ܕܽܘܡܳܪܳܐ ܕܰܡܕܰܟܶܐ ܟܽܠ ܠܡܰܝ̈ܳܐ ܢܚܶܬ ܗ̱ܘܳܐ܆ ܘܰܥܡܰܕ ܡܶܢ ܐܺܝ̈ܕܰܝ ܥܰܒܕܶܗ܆ ܘܩܰܕܶܫ ܠܰܢ ܡܰܥܡܽܘܕܺܝܬܳܐ܆ ܠܳܟ ܝܳܐܶܐ ܫܽܘܒܚܳܐ ܐܰܠܳܗܳܐ܀

ܟܽܠܟܽܘܢ ܥܰܡ̱̈ܡܶܐ ܩܽܘܫܘ ܟܰܦܳܐ ܘܰܙܡܰܪܘ ܫܽܘܒܚܳܐ܆ ܠܡܳܪܝܳܐ ܕܰܥܡܰܕ ܒܓܰܘ ܝܽܘܪܕܢܳܢ܆ ܘܩܰܕܶܫ ܠܰܢ ܡܰܥܡܽܘܕܺܝܬܳܐ܀

ܛܽܘܒܰܝܗܽܘܢ ܠܡܶܣ̈ܟܺܢܶܐ
ܩܳܠܳܐ ܒܩ̄: ܫܽܘܒܚܳܐ ܠܳܟ ܡܫܺܝܚܳܐ

ܒܰܥܡܳܕܳܟ ܡܳܪܰܢ܆ ܗܳܐ ܚܳܕܝܳܐ ܥܺܕܬܳܐ܆ ܘܙܳܡܪܳܐ ܬܶܫܒܽܘܚܬܳܐ ܠܗܰܘ ܕܫܰܠܚܳܟ ܨܶܐܕܰܝܢ܆ ܡܫܺܝܚܳܐ ܐܰܠܳܗܳܐ ܕܺܝܠܰܢ܀

ܠܳܟ ܫܽܘܒܚܳܐ ܡܫܺܝܚܳܐ܆ ܕܰܥܡܰܕܬ ܒܓܰܘ ܝܽܘܪܕܢܳܢ܆ ܘܩܰܕܶܫܬ ܠܚܰܛܳܝ̈ܶܐ ܡܰܝ̈ܳܐ ܕܚܽܘܣܳܝܳܐ܆ ܒܰܥܡܳܕܟ ܐܰܠܳܗܳܝܳܐ܀

ܢܚܶܬܬ ܡܳܪܰܢ ܘܰܥܡܰܕܬ܆ ܒܓܰܘ ܝܽܘܪܕܢܳܢ ܢܰܗܪܳܐ܆ ܘܩܰܕܶܫܬ ܠܰܟܝܳܢܳܐ ܕܓܶܢܣܳܐ ܕܒܶܝܬ ܐܳܕܳܡ܆ ܫܽܘܒܚܳܐ ܠܳܟ ܘܰܠܫܳܠܽܘܚܳܟ܀

ܫܽܘܒܚܳܐ

ܒܰܥܡܳܕܟ ܡܳܪܰܢ܆ ܗܳܐ ܚܳܕܝܳܐ ܬܺܒܶܝܠ܆ ܘܙܳܡܪܳܐ ܬܶܫܒܽܘܚܬܳܐ ܠܰܫܡܳܟ ܩܰܕܺܝܫܳܐ܆ ܕܚܰܪܰܪܬܳܗ̇ ܡܶܢ ܛܳܥܝܽܘܬܳܐ܀

ܩܳܠܳܐ ܕܨܰܦܪܳܐ
ܩܳܠܳܐ ܒܩ̄: ܒܬܰܪܥܳܟ ܡܳܪܰܢ ܢܳܩܶܫ ܐ̱ܢܳܐ
ܒܬܰܪܥܳܟ ܡܳܪܰܢ ܢܳܩܶܫ ܐ̱ܢܳܐ (ܣܳܠܶܩ܆ ܒܡܰܪܝܰܡ ܝܳܠܕܰܬ ܐܰܠܳܗܳܐ)

ܒܰܝܢܳܬ ܟܶܢ̈ܫܶܐ ܩܳܐܶܡ ܗ̱ܘܳܐ ܒܪܶܗ ܕܰܙܟܰܪܝܳܐ܆ ܥܰܠ ܝܽܘܪܕܢܳܢ ܢܰܗܪܳܐ܆ ܟܰܕ ܚܙܳܝܗ̱ܝ ܗ̱ܘܳܐ ܠܒܰܪ ܐܰܠܳܗܳܐ ܕܶܐܬܳܐ ܕܢܶܥܡܰܕ܆ ܐܶܡܰܪ ܠܳܗ̇ ܠܥܺܕܰܬ ܩܽܘܕܫܳܐ܆ ܕܗܳܢܰܘ ܚܰܬܢܳܐ ܕܰܥܠܰܘܗ̱ܝ ܡܰܟܪܶܙ ܗ̱ܘܺܝܬ܀

ܫܽܘܒܚܳܐ

ܐܶܬܟܠܺܝܘ ܡܰܝ̈ܳܐ ܘܠܳܐ ܗܰܠܶܟܘ܆ ܒܗܰܘ ܥܶܕܳܢܳܐ ܕܰܚܙܰܐܽܘܗ̱ܝ ܠܰܒܪܳܐ܆ ܟܰܕ ܐܳܡܰܪ ܠܶܗ ܠܝܽܘܚܰܢܳܢ ܩܪܽܘܒ ܐܰܥܡܶܕܰܝܢܝ܆ ܘܶܐܡܰܪ ܠܶܗ ܕܠܳܐ ܡܰܥܡܶܕ ܐ̱ܢܳܐ ܢܽܘܪܳܐ ܒܡܰܝ̈ܳܐ܆ ܕܠܳܐ ܝܳܩܶܕ ܐ̱ܢܳܐ ܠܺܝ܀

ܡܶܢ ܥܳܠܰܡ

ܩܪܺܝ ܒܩܳܠܳܟ ܦܳܩܽܘܕܳܐܺܝܬ ܒܰܪ ܐܰ‌ܠܳܗܳܐ ܠܡܺܝ̈ܬܶܐ ܕܰܒܩܰܒܪ̈ܶܐ܆ ܘܰܢܩܽܘܡܽܘܢ ܩܰܠܺܝܠܳܐܝܬ ܡ̣ܶܢ ܩܰܒܪ̈ܰܝܗܽܘܢ. ܘܢܶܥܠܽܘܢ ܥܰܡܳܟ ܦܨܺܝܚܳܐܺܝܬ: ܠܰܓܢܽܘܢ ܢܽܘܗܪܳܐ: ܕܟܺܐܢ̈ܶܐ ܚܳܕܝܳܐܺܝܬ܀

ܐ̱ܚܪܺܢܳܐ

ܩܳܠܳܐ ܒܩ̄: ܐܶܢܳܐ ܐ̱ܢܳܐ ܢܽܘܗܪܳܐ ܫܰܪܺܝܪܳܐ
ܠܳܐ ܢܚܰܦܽܘܢ ܡܳܪܝ ܡܽܘ̈ܡܰܝ

ܫܽܘܒܚܳܐ ܠܳܟ ܚܰܝܠܶܗ ܕܥܶܠܳܝܳܐ܆ ܕܶܐܬܬܰܚܬܺܝܬ ܠܰܙܥܽܘܪܽܘܬܳܐ܆ ܘܰܒܝܽܘܪܕܢܳܢ ܐܰܥܡܶܕ ܝܽܘܚܰܢܳܢ܆ ܠܪܰܒܽܘܬܳܟ ܕܠܳܐ ܡܶܣܬܰܝܟܳܐ܆ ܥܺܝܪ̈ܶܐ ܒܪܰܘܡܳܐ ܡܩܰܕܫܺܝܢ ܠܳܟ܆ ܕܢܶܬܩܰܕܫܽܘܢ ܡܶܢ ܐܺܝܬܽܘܬܳܟ܆ ܘܰܠܝܰܠ̈ܕܰܘܗ̱ܝ ܕܳܐܕܳܡ ܩܰܕܶܫܬ܆ ܡܰܥܡܽܘܕܺܝܬܳܐ ܒܰܥܡܳܕܳܟ܆ ܕܢܶܬܩܰܕܫܽܘܢ ܒܪܽܘܚܳܐ ܕܩܽܘܕܫܳܐ܀

ܫܽܘܒܚܳܐ

ܢܰܘܕܶܐ ܘܢܶܣܓܽܘܕ ܘܰܢܫܰܒܰܚ܆ ܠܰܐܒܳܐ ܕܫܰܕܰܪ ܠܺܝܚܺܝܕܶܗ܆ ܘܰܢܚܶܬ ܠܰܒܫܰܢ ܘܶܐܬܥܰܠܺܝ܆ ܘܗܳܐ ܝܳܬܶܒ ܡܶܢ ܝܰܡܺܝܢܳܐ܆ ܟܪ̈ܽܘܒܶܐ ܕܚܺܝ̈ܠܶܐ ܡܒܰܪܟܺܝܢ ܠܶܗ܆ ܘܰܣܪ̈ܳܦܶܐ ܕܰܡܩܰܕܫܺܝܢ ܠܶܗ: ܘܡܰܠܰܐܟ̈ܶܐ ܕܙܳܡܪܺܝܢ ܫܽܘܒܚܶܗ܆ ܘܛܳܒ ܡܶܬܕܰܡܪܺܝܢ ܒܡܽܘܟܳܟܶܗ܆ ܕܶܐܬܡܰܟܰܟ ܚܠܳܦ ܦܽܘܪܩܳܢܰܢ܀

ܡܶܢ ܥܳܠܰܡ

ܥܒܶܕ ܠܗܽܘܢ ܢܝܳܚܳܐ ܘܕܽܘܟܪܳܢܳܐ܆ ܘܠܰܐܒܳܗ̈ܰܝܢ ܘܰܐܚ̈ܰܝܢ ܕܰܫܟܶܒܘ. ܘܰܒܓܽܘ̈ܕܶܐ ܘܣܶܕܪ̈ܶܐ ܕܩܰܕܺܝ̈ܫܰܝܟ܆ ܛܰܟܶܣ ܡܳܪܝܳܐ ܠܣܳܓܽܘܕܰܝ̈ܟ. ܘܡܳܐ ܕܝܳܬܒܰܬ ܥܰܠ ܒܺܐܡ ܕܺܝܠܳܟ܆ ܘܦܳܪܫܰܬ ܛܳܒ̈ܶܐ ܡ̣ܶܢ ܒܺܝ̈ܫܶܐ: ܚܢܳܢܳܟ ܢܶܚܙܽܘܢ ܒܶܝܬ ܕܺܝ̣ܢܳܐ. ܘܰܢܩܽܘܡܽܘܢ ܡ̣ܶܢ ܝܰܡܺܝܢܳܟ܆ ܒܝܰܘܡܳܐ ܕܕܳܢܚܳܐ ܪܰܒܽܘܬܳܟ܀

ܦܶܬܓܳܡܳܐ: ܝܰܡܳܐ ܚܙܳܝܗ̱ܝ ܘܰܥܪܰܩ܆ ܘܝܽܘܪܕܢܳܢ ܗܦܰܟ ܠܒܶܣܬܪܶܗ܆ ܗܰܠܶܠܽܘܝܰܗ܀

ܒܳܥܽܘܬܳܐ ܕܡܳܪܝ ܝܰܥܩܽܘܒ
ܢܦܰܩܘ ܡܶܢ ܝܺܗܽܘܕ ܒܢܰܝ̈ ܝܺܣܪܳܐܶܝܠ

ܒܪܳܐ ܕܒܰܥܡܳܕܶܗ ܦܰܪܩܳܗ̇ ܠܥܺܕܬܶܗ ܡܶܢ ܛܳܥܝܽܘܬܳܐ܆

ܗܰܒ ܒܳܗ̇ ܫܰܝܢܳܐ ܘܢܰܛܰܪ ܠܝܰܠ̈ܕܶܝܗ̇ ܒܰܥܡܳܕܳܟ ܡܳܪܝ܀

ܩܪܶܒ ܗ̱ܘܳܐ ܡܫܺܝܚܳܐ ܨܶܝܕ ܝܽܘܚܰܢܳܢ ܕܢܶܥܡܰܕ ܡܶܢܶܗ܆ ܚܙܳܐ ܝܽܘܚܰܢܳܢ ܘܰܬܟܰܣ ܐܺܝܕܶܗ ܕܠܳܐ ܢܰܥܡܶܕ ܗ̱ܘܳܐ܆ ܐܰܪܟܶܢ ܪܺܝܫܶܗ ܩܽܘܕܡܰܘܗ̱ܝ ܕܰܒܪܳܐ ܟܰܕ ܐܳܡܰܪ ܠܶܗ܆ ܕܠܺܝ ܘܳܠܶܐ ܠܺܝ ܕܡܶܢܳܟ ܐܶܥܡܰܕ ܕܩܰܕܺܝܫܳܐ ܐܰܢ̱ܬ܀

ܥܒܰܪ ܝܽܘܚܰܢܳܢ ܡܶܢ ܫܽܘ̈ܐܳܠܶܐ ܘܰܗܘܺܝ ܫܰܠܝܳܐ܆ ܒܥܳܬܳܐ ܗܳܪܟܳܐ ܠܳܐ ܬܶܗܘܶܐ ܠܳܟ ܡܶܛܽܠ ܗܳܠܶܝܢ܆ ܠܰܘ ܕܰܬܩܰܕܫܰܢܝ ܡܰܥܡܽܘܕܺܝܬܳܐ ܐܶܬܺܝܬ ܨܶܐܕܰܝܟ܆ ܐܳܦܠܳܐ ܐܳܠܨܳܐ ܕܬܺܐܡܰܪ ܡܶܕܶܡ ܡܳܐ ܕܥܳܡܶܕ ܐ̱ܢܳܐ܀

ܫܰܝܢܳܐ ܕܫܰܝܶܢ ܠܰܫ̈ܡܰܝܳܢܶܐ ܘܠܰܐܪ̈ܥܳܢܳܝܶܐ܆

ܫܰܝܶܢ ܠܥܺܕܬܳܟ ܘܢܰܛܰܪ ܠܝܰܠ̈ܕܶܝܗ̇ ܒܰܥܡܳܕܳܟ ܡܳܪܝ܀