ܕܰܬܠܳܬܫܳܥܺܝ̈ܢ

ܩܳܠܳܐ ܒܩ̄: ܠܳܟ ܡܳܪܝܳܐ ܩܳܪܶܝܢܰܢ
ܠܳܟ ܡܳܪܝܳܐ ܩܳܪܶܝܢܰܢ ܬܳܐ ܠܥܽܘܕܪܳܢܰܢ

ܝܽܘܚܰܢܳܢ ܩܳܐܶܡ ܗ̱ܘܳܐ ܠܥܶܠ ܡܶܢ ܢܰܗܪܳܐ܆ ܘܰܡܫܺܝܚܳܐ ܐܶܬܳܐ ܠܘܳܬܶܗ ܕܢܶܥܡܰܕ ܒܓܰܘ ܡܰܝ̈ܳܐ܆ ܚܙܳܝܗ̱ܝ ܕܶܐܬܳܐ ܡܶܢ ܪܽܘܚܩܳܐ ܘܰܩܥܳܐ ܘܶܐܡܰܪ܆ ܕܗܳܢܰܘ ܕܠܳܐ ܫܳܘܶܝܢܝ ܐܶܫܪܶܐ ܥܰܪ̈ܩܶܐ ܕܰܡܣܳܐܢܰܘ̈ܗ̱ܝ܆ ܐܶܢܳܐ ܠܚܽܘܕ ܒܡܰܝ̈ܳܐ ܡܰܥܡܶܕ ܐ̱ܢܳܐ܆ ܘܗܽܘ ܡܰܥܡܶܕ ܒܢܽܘܪܳܐ ܘܰܒܪܽܘܚܳܐ܆ ܒܪܺܝܟ ܕܝܰܗ̱ܒ ܠܰܢ ܡܰܥܡܽܘܕܺܝܬܳܐ܆ ܠܚܽܘܣܳܝܳܐ ܕܚܰܘ̈ܒܶܐ܀

ܫܽܘܒܚܳܐ

ܡܫܺܝܚܳܐ ܦܬܰܚ ܡܰܥܡܽܘܕܺܝܬܳܐ ܠܚܽܘܣܳܝ ܚܰܘ̈ܒܶܐ܆ ܘܒܰܥܡܳܕܶܗ ܩܰܕܶܫ ܡܰܝ̈ܳܐ ܘܝܰܗ̱ܒ ܛܽܘܦܣܳܐ ܠܥܺܕܬܶܗ܆ ܣܳܗ̈ܕܶܐ ܬܠܳܬܳܐ ܗܘܰܘ ܬܰܡܳܢ ܥܰܠ ܝܽܘܪܕܢܳܢ܆ ܕܒܰܫ̈ܡܳܗܶܐ ܬܠܳܬܳܐ ܢܶܩܪܶܐ ܟܳܗܢܳܐ ܒܒܶܝܬ ܩܽܘܕܫܳܐ܆ ܝܽܘܚܰܢܳܢ ܐܺܝܕܶܗ ܣܳܐܶܡ ܗ̱ܘܳܐ܆ ܘܪܽܘܚ ܩܽܘܕܫܳܐ ܥܰܠ ܒܪܳܐ ܢܳܚܶܬ ܗ̱ܘܳܐ܆ ܘܰܐܒܳܐ ܕܩܳܥܶܐ ܡܶܢ ܪܰܘܡܳܐ܆ ܕܗܳܢܰܘ ܒܶܪܝ ܚܰܒܺܝܒܝ܀

ܒܳܥܽܘܬܳܐ ܕܡܳܪܝ ܝܰܥܩܽܘܒ
ܢܦܰܩܘ ܡܶܢ ܝܺܗܽܘܕ ܒܢܰܝ̈ ܝܺܣܪܳܐܶܝܠ

ܒܪܳܐ ܕܒܰܥܡܳܕܶܗ ܦܰܪܩܳܗ̇ ܠܥܺܕܬܶܗ ܡܶܢ ܛܳܥܝܽܘܬܳܐ܆

ܗܰܒ ܒܳܗ̇ ܫܰܝܢܳܐ ܘܢܰܛܰܪ ܠܝܰܠ̈ܕܶܝܗ̇ ܒܰܥܡܳܕܳܟ ܡܳܪܝ܀

ܩܪܶܒ ܝܽܘܚܰܢܳܢ ܘܰܐܪܟܶܢ ܐܺܝܕܶܗ ܥܰܠ ܓܰܘܙܰܠܬܳܐ܆ ܘܣܶܕܪ̈ܶܐ ܕܥܺܝܪ̈ܶܐ ܛܦܰܣܘ ܒܰܚ̈ܕܳܕܶܐ ܡܶܢ ܣܽܘܪܳܕܳܐ܆ ܘܶܐܬܕܰܡܰܪܘ ܗ̱ܘܰܘ ܚܰܝܠܰܘ̈ܳܬܳܐ ܒܬܶܗܪܳܐ ܪܰܒܳܐ܆ ܟܰܕ ܚܰܒܽܘܒܳܐ ܥܪܶܐ ܠܓܰܘܙܰܠܬܳܐ ܘܠܳܐ ܡܶܬܚܰܪܰܟ܀

ܐܳܡܰܪ ܡܳܪܰܢ ܠܳܐ ܚܰܣܺܝܪ ܐ̱ܢܳܐ ܐܶܠܳܐ ܒܰܚܕܳܐ܆ ܫܟܺܝܢܬܶܗ ܕܳܐܕܳܡ ܕܰܐܒܺܝܕܳܐ ܗ̱ܘܳܬ ܡܶܬܒܰܥܝܳܐ ܠܺܝ܆ ܐܰܪܦܶܝܢܝ ܐܶܚܽܘܬ ܐܶܒܥܶܐ ܠܳܐܕܳܡ ܨܰܠܡܳܐ ܦܰܐܝܳܐ܆ ܘܡܳܐ ܕܶܐܫܟܰܚܬܶܗ ܨܶܒܝܳܢܝ ܟܽܠܶܗ ܐܶܫܬܰܡܠܺܝ ܠܶܗ܀

ܫܰܝܢܳܐ ܕܫܰܝܶܢ ܠܰܫ̈ܡܰܝܳܢܶܐ ܘܠܰܐܪ̈ܥܳܢܳܝܶܐ܆

ܫܰܝܶܢ ܠܥܺܕܬܳܟ ܘܢܰܛܰܪ ܠܝܰܠ̈ܕܶܝܗ̇ ܒܰܥܡܳܕܳܟ ܡܳܪܝ܀

ܫܠܶܡ ܛܶܟܣܳܐ ܕܚܰܕ ܒܫܰܒܳܐ ܚܡܺܝܫܳܝܳܐ ܕܒܳܬܰܪ ܕܶܢܚܳܐ