ܕܪܰܡܫܳܐ

ܥܶܢܝܳܢܳܐ ܕܪܰܚܶܡܥܠܰܝ
ܩܳܠܳܐ ܒܩ̄: ܚܰܘ̈ܒܰܝ ܘܰܚ̈ܛܳܗܰܝ

ܗܰܘ ܕܬܶܓ̈ܡܶܐ ܟܽܠܗܽܘܢ܆ ܕܢܽܘܪܳܐ ܣܳܓܕܺܝܢ ܠܶܗ܆ ܐܰܝܟ ܣܢܺܝܩܳܐ ܐܶܬܳܐ܆ ܘܰܥܡܰܕ ܒܓܰܘ ܝܽܘܪܕܢܳܢ܀

ܗܰܘ ܓܶܝܪ ܠܳܐ ܣܢܺܝܩܳܐ܆ ܥܡܰܕ ܒܝܽܘܪܕܢܳܢ ܢܰܗܪܳܐ܆ ܕܠܰܢ ܣܢܺܝ̈ܩܶܐ ܢܰܥܬܰܪ܆ ܒܫܽܘ̈ܟܳܢܶܐ ܕܪܽܘܚܳܐ܀

ܡܫܺܝܚܳܐ ܐܰܠܳܗܳܐ܆ ܢܚܶܬ ܘܰܥܡܰܕ ܒܝܽܘܪܕܢܳܢ܆ ܡܶܢ ܐܺܝ̈ܕܰܝ ܥܰܒܕܶܗ܆ ܘܝܰܗ̱ܒܠܰܢ ܪܰܗܒܽܘܢܳܐ܀

ܒܪܳܐ ܕܡܶܛܽܠ ܪ̈ܰܚܡܰܘܗ̱ܝ܆ ܪܟܶܢ ܘܶܐܬܳܐ ܠܘܳܬܰܢ܆ ܚܰܣܳܢ ܒܝܰܕ ܪ̈ܰܚܡܰܝܟ܆ ܕܢܶܙܡܰܪ ܠܳܟ ܫܽܘܒܚܳܐ܀

ܫܽܘܒܚܳܐ ܠܳܟ ܡܫܺܝܚܳܐ܆ ܐܰܠܳܗܳܐ ܕܥܰܠ ܟܽܠ܆ ܕܡܶܛܽܠ ܪ̈ܰܚܡܰܝܟ ܥܡܰܕܬ܆ ܘܠܰܢ ܛܰܡ̈ܐܶܐ ܩܰܕܶܫܬ܀

ܡܳܪܝܳܐ ܩܪܺܝܬܳܟ
ܩܳܠܳܐ ܒܩ̄: ܗܰܘ ܕܰܛܥܺܝܢ ܟܽܠ ܒܶܪ̈ܝܳܬܳܐ

ܢܒܺܝܳܐ ܩܕܳܡ ܙܰܒܢܳܐ ܐܶܡܰܪ܆ ܕܝܳܬܶܒ ܡܳܪܝܳܐ ܥܰܠ ܐܰܪܥܳܐ܆ ܘܥܰܠ ܒܺܐܪܳܐ ܕܰܚܦܰܪ ܝܰܥܩܽܘܒ܆ ܝܳܬܶܒ ܡܳܪܗܶܝܢ ܕܒܶܪ̈ܝܳܬܳܐ܆ ܘܡܰܝ̈ܳܐ ܫܶܐܠ ܡܶܢ ܫܳܡܪܳܝܬܳܐ܆ ܗܰܘ ܕܣܳܡ ܫܶܬܶܐܣܶܝ̈ܗ̇ ܕܰܐܪܥܳܐ܆ ܠܶܗ ܬܶܫܒܽܘܚܬܳܐ ܕܶܐܬܳܐ ܠܰܥܡܳܕܳܐ܆ ܡܶܛܽܠ ܦܽܘܪܩܳܢܶܗ ܕܳܐܕܳܡ܀

ܢܦܰܠ ܬܶܡܗܳܐ ܥܰܠ ܢܽܘܪ̈ܳܢܶܐ܆ ܘܶܐܚܰܕ ܬܶܗܪܳܐ ܠܰܟܪ̈ܽܘܒܶܐ܆ ܟܰܕ ܐܶܡܰܪ ܠܶܗ ܦܳܪܽܘܩܰܢ܆ ܠܝܽܘܚܰܢܳܢ ܩܪܽܘܒ ܐܰܥܡܶܕܰܝܢܝ܆ ܣܳܡ ܝܰܡܺܝܢܶܗ ܥܰܠ ܪܺܝܫܶܗ܆ ܘܡܶܢ ܓܰܘܙܰܠܬܳܐ ܠܳܐ ܝܺܩܶܕ܆ ܗܳܢܰܘ ܬܶܗܪܳܐ ܕܰܐܠܳܗܳܐ ܕܥܰܠ ܟܽܠ܆ ܢܶܥܡܰܕ ܡܶܢ ܐܺܝ̈ܕܰܝ ܥܰܒܕܶܗ܀

ܥܡܰܕ ܘܰܣܠܶܩ ܡܶܢ ܓܰܘ ܡܰܝ̈ܳܐ܆ ܒܪܳܐ ܕܰܐܬܩܶܢ ܟܽܠ ܒܶܪ̈ܝܳܬܳܐ܆ ܝܽܘܚܰܢܳܢ ܩܪܳܐ ܠܳܗ̇ ܠܥܺܕܬܳܐ܆ ܘܶܐܡܰܪ ܠܳܗ̇ ܕܗܳܢܰܘ ܚܰܬܢܳܐ܆ ܪܶܗܛܰܬ ܘܒܶܪܟܰܬ ܣܶܓܕܰܬ ܠܶܗ܆ ܦܶܪܣܰܬ ܟܶܢ̈ܦܶܝܗ̇ ܘܩܰܒܶܠܬܶܗ܆ ܗܰܘ ܕܗܽܘܝܽܘ ܒܰܠܚܽܘܕܰܘܗ̱ܝ܆ ܡܰܠܟܳܐ ܪܰܒܳܐ ܕܬܶܫܒܽܘܚܬܳܐ܀

ܫܽܘܒܚܳܐ

ܕܳܠ ܘܰܢܚܶܬ ܡܶܢ ܨܶܝܕ ܐܰܒܽܘܗ̱ܝ܆ ܒܪܳܐ ܕܰܐܬܩܶܢ ܟܽܠ ܒܶܪ̈ܝܳܬܳܐ܆ ܘܰܥܡܰܕ ܒܓܰܘ ܝܽܘܪܕܢܳܢ ܢܰܗܪܳܐ܆ ܘܶܐܬܩܰܕܫܰܬ ܡܰܥܡܽܘܕܺܝܬܳܐ܆ ܩܪܶܒ ܝܽܘܚܰܢܳܢ ܟܰܕ ܕܳܚܶܠ܆ ܘܣܳܡ ܝܰܡܺܝܢܶܗ ܥܰܠ ܪܺܝܫܶܗ܆ ܗܳܢܰܘ ܬܶܗܪܳܐ ܕܠܳܐ ܐܶܬܚܰܪܰܟ ܗ̱ܘܳܐ܆ ܟܰܕ ܣܳܡ ܐܺܝܕܶܗ ܥܰܠ ܪܺܝܫܶܗ܀

ܩܳܠܳܐ ܕܪܰܡܫܳܐ

ܩܳܠܳܐ ܒܩ̄: ܡܫܺܝܚܳܐ ܢܰܛܰܪܶܝܗ̇ ܠܥܺܕܬܳܟ
ܐܶܬܕܰܡܝܰܬ ܡܰܠܟܽܘܬ ܪܰܘܡܳܐ

ܒܕܶܢܚܳܟ ܐܰܡܠܶܟ ܫܽܘܒܩܳܢܳܐ܆ ܥܰܠ ܥܰܡ̱̈ܡܶܐ ܕܟܽܠܳܗ̇ ܒܪܺܝܬܳܐ܆ ܫܠܳܡܳܐ ܘܚܰܝ̈ܶܐ ܝܰܒܶܒܘ ܗ̱ܘܰܘ܆ ܥܺܝܪ̈ܰܝ ܪܰܘܡܳܐ ܠܰܐܪ̈ܥܳܢܶܐ܆ ܠܘܳܬ ܚܰܛܳܝ̈ܶܐ ܕܩܳܪܶܝܢ ܠܳܟ܆ ܢܰܡܠܶܟ ܫܰܝܢܳܐ ܘܫܽܘܒܩܳܢܳܐ ܕܚܰܘ̈ܒܶܐ܆ ܕܶܐܢ ܚ̈ܛܳܗܶܐ ܢܳܛܰܪ ܐܰܢ̱ܬ ܡܳܪܝ܆ ܡܰܢܽܘ ܡܨܶܐ ܕܰܢܩܽܘܡ ܩܽܘܕܡܰܝܟ܆ ܦܰــ݉ـܨܳܢ ܡܶܢ ܕܺܝܢܳܐ܆ ܕܗܳܘܶܐ ܠܚܰܪܬܳܐ ܕܝܰܘ̈ܡܳܬܳܐ܆ ܘܰܬܩܽܘܡ ܛܰܝܒܽܘܬܳܟ ܒܰܐܦܰܝ̈ܢ܆ ܘܒܳܗ̇ ܢܶܬܚܰܣܽܘܢ ܡܽܘ̈ܡܶܐ܆ ܟܣܰܝ̈ܳܐ ܕܢܰܦ̈ܫܳܬܰܢ܀

ܫܽܘܒܚܳܐ

ܡܳܐ ܝܳܐܶܐ ܩܳܠܳܐ ܕܣܳܠܶܩ܆ ܡܶܢ ܓܰܘ ܐܰܪܥܳܐ ܠܰܫܡܰܝ̈ܳܐ܆ ܡܳܐ ܫܰܦܺܝܪ̈ܳܢ ܓܽܘ̈ܕܰܝܗܽܘܢ܆ ܕܰܒ̈ܢܶܝܗ̇ ܕܥܺܕܬܳܐ ܡܗܰܝܡܰܢܬܳܐ܆ ܡܳܐ ܕܰܡܬܺܝܚܺܝܢ ܣܶܕܪ̈ܰܝܗܽܘܢ܆ ܐܰܝܟ ܡܰܠܰܐܟ̈ܶܐ ܘܙܳܡܪܺܝܢ ܬܶܫܒܽܘܚܬܳܐ܆ ܘܝܳܐܶܐ ܠܶܗ ܠܕܰܘܺܝܕ ܡܰܠܟܳܐ܆ ܟܰܕ ܥܳܒܰܪ ܒܶܝܬ ܣܶܕܪ̈ܰܝܗܽܘܢ܆ ܘܶܐܡܰـ݉ـܪ ܒܰܙܡܺܝܪܬܶܗ܆ ܕܟܽܠܟܽܘܢ ܥܰܡ̱̈ܡܶܐ ܩܽܘܫܘ ܟܰܦܳܐ܆ ܘܫܰܒܰܚܘ ܠܰܐܠܳܗܳܐ ܕܪܰܡܪܶܡ܆ ܩܰܪܢܳܐ ܕܥܺܕܬܶܗ ܒܰܥܡܳܕܶܗ ܕܰܒܝܽܘܪܕܢܳܢ܀

ܡܶܢ ܥܳܠܰܡ

ܪܳܥܶܡ ܩܳܠܶܗ ܕܫܺܝܦܽܘܪܳܐ܆ ܘܫܳܪܶܐ ܠܗܶܝܢ ܠܶܐܣܰܝ̈ ܬܺܒܶܝܠ. ܘܰܫܡܰܝ̈ܳܐ ܕܰܠܥܶܠ ܡܶܢܰܢ܆ ܒܰܕܡܽܘܬ ܡܓܰܠܬܳܐ ܡܶܬܟܰܪܟܳܐ. ܘܢܰܗܺܝܪ̈ܶܐ ܕܰܣܕܺܝܪܺܝܢ ܒܳܗ̇ ܢܳܬܪܺܝܢ ܟܽܠܗܽܘܢ: ܒܰܕܡܽܘܬ ܗܰܒ̈ܳܒܶܐ. ܘܙܳܥܶܩ ܒܳܗ̇ ܒܰܪ ܐܰ‌ܠܳܗܳܐ: ܒܓܰܘ ܫܝܽܘܠ ܘܰܡܣܰܚܶܦ ܠܳܗ̇. ܘܓܳܣܝܳܐ ܠܰܫ̈ܠܰܕܶܐ܆ ܕܶܐܬܬܣܺܝ̈ܡܝ ܒܳܗ̇ ܡ̣ܶܢ ܫܽܘܪܳܝܳܐ܆ ܘܢܳܫܒܳܐ ܒܗܽܘܢ ܪܽܘܚ ܢܽܘܚܳܡܳܐ. ܘܬܽܘܒ ܘܰܠܥܳܠܰܡ܆ ܡܰܘܬܳܐ ܒܗܽܘܢ ܠܳܐ ܡܶܫܬܰܠܰܛ܀

ܐ̱ܚܪܺܢܳܐ

ܩܳܠܳܐ ܒܩ̄: ܐܺܝܢ ܣܳܗ̈ܕܶܐ ܡܶܛܽܠ ܡܳܢܳܐ
(ܣܳܠܶܩ܆ ܒܡܰܪܝܰܡ ܝܳܠܕܰܬ ܐܰܠܳܗܳܐ)

ܬܰܘ ܐܰܚܰܝ̈ ܢܺܐܙܰܠ ܢܶܚܙܶܝܘܗ̱ܝ ܠܰܒܪܳܐ ܕܥܳܡܶܕ܆ ܘܝܳܗܒܺܝܢ ܐܰܬܪܳܐ ܡܶܢ ܩܽܘܕܡܰܘܗ̱ܝ ܡܰܝ̈ܳܐ ܒܝܽܘܪܕܢܳܢ܆ ܝܰܗ̱ܒܘ ܐܰܬܪܳܐ ܘܚܰܘܺܝ ܙܺܝܘܶܗ ܘܩܰܕܶܫ ܐܶܢܽܘܢ܆ ܘܰܩܪܳܐ ܠܥܰܒܕܶܗ ܥܰܦܪܳܢܳܐ ܕܰܢܣܺܝܡ ܥܠܰܘܗ̱ܝ ܐܺܝ̈ܕܰܘܗ̱ܝ܀

ܫܽܘܒܚܳܐ

ܕܠܳܐ ܢܽܘܪܳܐ ܘܰܕܠܳܐ ܩܰܝ̈ܣܶܐ ܚܰܡܘ ܗ̱ܘܰܘ ܡܰܝ̈ܳܐ܆ ܘܶܐܬܩܰܕܫܰܬ ܡܰܥܡܽܘܕܺܝܬܳܐ ܥܰܠ ܝܽܘܪܕܢܳܢ ܢܰܗܪܳܐ܆ ܓܽܘ̈ܕܺܝܢ ܓܽܘ̈ܕܺܝܢ ܩܳܝܡܺܝܢ ܗ̱ܘܰܘ ܠܥܶܠ ܡܶܢ ܡܰܝ̈ܳܐ܆ ܟܪ̈ܽܘܒܶܐ ܘܰܣܪ̈ܳܦܶܐ ܕܚܺܝ̈ܠܶܐ ܟܰܕ ܩܳܥܶܝܢ ܩܰܕܺܝܫ܀

ܡܶܢ ܥܳܠܰܡ

ܒܥܶܛܪܳܐ ܕܒܶܣ̈ܡܶܐ ܢܶܬܚܰܣܽܘܢ ܥܰܢܺܝ̈ܕܶܐ ܡܗܰܝܡ̈ܢܶܐ: ܕܶܐܟܰܠܘ ܦܰܓܪܳܟ ܩܰܕܺܝܫܳܐ ܘܶܐܫܬܺܝܘ ܕܡܳܟ ܚܰܝܳܐ: ܘܰܢܩܽܘܡܽܘܢ ܡܶܢ ܝܰܡܺܝܢܳܐ ܕܰܐܠܳܗܽܘܬܳܟ: ܘܢܰܣܩܽܘܢ ܠܳܟ ܫܽܘܒܚܳܐ ܡܫܺܝܚܳܐ ܕܰܐܢܬܽ ܗ̱ܘ ܡܢܰܚܡܳܢܗܽܘܢ܀

ܦܶܬܓܳܡܳܐ: ܬܰܦ̈ܶܐ ܘܢܰܗܪ̈ܰܘܳܬܳܐ ܢܚܰܕܽܘܢ܆ ܒܰܡܕܺܝܢ̱ܬܶܗ ܕܰܐܠܳܗܰܢ܆ ܗܰܠܶܠܽܘܝܰܗ܀

ܒܳܬܰܪ ܐܶܘܰܢܓܶܠܺܝܳܘܢ: ܬܶܫܡܶܫܬܳܐ ܕܥܰܢܺܝ̈ܕܶܐ

ܒܳܥܽܘܬܳܐ ܕܡܳܪܝ ܝܰܥܩܽܘܒ
ܚܰܛܦܰܢܝ ܪܰܡܫܳܐ ܘܰܒܡܰܛܰܪܬܶܗ

ܒܪܳܐ ܕܒܰܥܡܳܕܶܗ ܦܰܪܩܳܗ̇ ܠܥܺܕܬܶܗ ܡܶܢ ܛܳܥܝܽܘܬܳܐ܆

ܗܰܒ ܒܳܗ̇ ܫܰܝܢܳܐ ܘܢܰܛܰܪ ܠܝܰܠ̈ܕܶܝܗ̇ ܒܰܥܡܳܕܳܟ ܡܳܪܝ܀

ܛܳܣ̈ܝ ܡܶܢ ܣܪ̈ܳܦܶܐ ܥܢܳܢ̈ܶܐ ܕܢܽܘܗܪܳܐ ܘܩܳܡ̈ܝ ܗ̱ܘܰܝ̈ ܬܰܡܳܢ܆ ܕܢܶܗܘܶܐ ܓܢܽܘܢܳܐ ܠܚܰܬܢܳܐ ܫܒܺܝܚܳܐ ܕܰܢܚܶܬ ܢܶܥܡܰܕ܆ ܢܦܰܩܝ̈ ܥܰܪ̈ܦܶܠܶܐ ܐܰܝܟ ܫܽܘ̈ܫܶܦܶܐ ܕܒܶܝܬ ܡܰܠܟܽܘܬܳܐ܆ ܕܡܳܐ ܕܰܣܚܳܐ ܗ̱ܘܳܐ ܗܰܘ ܒܰܪ ܡܰܠܟܳܐ ܒܗܶܝܢ ܢܶܬܩܰܒܰܠ܀

ܟܰܕ ܡܶܫܬܽܘܬܳܐ ܟܽܠܳܗ̇ ܚܳܝܪܳܐ ܠܚܰܬܢܳܐ ܕܰܐܝܟܰܘ܆ ܢܦܰܩ ܒܰܪ ܡܰܠܟܳܐ ܡܶܢ ܓܰܘ ܟܶܢ̈ܫܶܐ ܕܢܺܐܬܶܐ ܠܢܰܗܪܳܐ܆ ܘܟܰܕ ܗܽܘ ܪܰܚܺܝܩ ܡܰܥܡܽܘܕܺܝܬܳܐ ܠܩܽܘܒܠܶܗ ܪܶܬܚܰܬ܆ ܘܰܫܦܰܥ ܢܰܗܪܳܐ ܘܰܐܟܪܶܙ ܥܠܰܘܗ̱ܝ ܫܰܬܺܝܩܳܐܺܝܬ܀

ܫܰܝܢܳܐ ܕܫܰܝܶܢ ܠܰܫ̈ܡܰܝܳܢܶܐ ܘܠܰܐܪ̈ܥܳܢܳܝܶܐ܆

ܫܰܝܶܢ ܠܥܺܕܬܳܟ ܘܢܰܛܰܪ ܠܝܰܠ̈ܕܶܝܗ̇ ܒܰܥܡܳܕܳܟ ܡܳܪܝ܀