ܕܰܐܪܒܥܳܐ ܒܫܰܒܳܐ

ܕܨܰܦܪܳܐ

ܥܶܢܝܳܢܳܐ ܕܪܰܚܶܡܥܠܰܝ
ܩܳܠܳܐ ܒܩ̄: ܒܪܺܝܟ ܕܚܰܕܺܝ ܠܰܫ̈ܡܰܝܳܢܶܐ

ܡܳܪܳܐ ܛܳܒܳܐ ܕܡܶܢ ܢܺܝܢܘܶܐ. ܒܰܛܶܠ ܓܙܳܪ ܕܺܝܢܳܐ܆ ܒܰܛܶܠ ܡܳܪܝ ܐܳܦ ܡܶܢ ܥܺܕܬܳܟ. ܣܶܕ̈ܩܶܐ ܘܚܶܪ̈ܝܳܢܶܐ܀

ܚܰܢܳܢܳܐ ܘܰܡܪܰܚܡܳܢܳܐ. ܐܺܝܬܰܝܟ ܐܰܠܳܗܳܐ܆ ܐܶܬܪܰܚܰܡ ܥܰܠ ܡܰܪܥܺܝܬܳܟ. ܕܪܰܡܝܳܐ ܒܽܐܘܠ̈ܨܳܢܶܐ܀

ܠܰܐܝܟܳܐ ܡܳܪܝ ܢܶܥܪܽܘܩ ܡܶܢܳܟ. ܐܰܝܢܳܐ ܕܚܳܛܶܐ ܠܳܟ܆ ܐܶܠܳܐ ܨܶܝܕ ܪ̈ܰܚܡܰܝܟ ܫܦܺܝ̈ܥܶܐ. ܕܰܒܗܽܘܢ ܢܶܬܓܰܘܰܣ܀

ܬܗܽܘܡܳܐ ܕܚܰܘ̈ܒܶܐ ܘܕܰܚ̈ܛܳܗܶܐ. ܚܰܕܪܰܢܝ ܐܳܦ ܚܰܦܝܰܢܝ܆ ܫܰܘܙܶܒ ܠܚܰܝܰܝ̈ ܡܨܶܐ ܚܺܝܠ ܟܽܠ܆ ܐܰܠܳܗܳܐ ܦܳܪܽܘܩܝ܀

ܐܰܠܳܗܝ ܐܰܠܳܗܝ
ܩܳܠܳܐ ܒܩ̄: ܥܰܕܠܳܐ ܢܺܐܙܽܠ̱ܘܢ ܚܰܘ̈ܒܰܝ

ܡܳܪܳܐ ܛܳܒܳܐ ܕܰܥܒܰܕ ܪ̈ܰܚܡܶܐ ܥܰܠ ܢܺܝܢ̈ܘܳܝܶܐ܆ ܐܰܫܦܰܥ ܪ̈ܰܚܡܰܝܟ ܥܰܠ ܡܰܪܥܺܝܬܳܟ ܕܰܡܦܺܝܣܳܐ ܠܳܟ܆ ܐܶܬܪܰܚܰܡ ܥܠܰܝܢ ܐܰܠܳܗܳܐ܀

ܒܕܺܝܪ ܗ̱ܘܳܐ ܩܶܛܡܳܐ ܠܰܥܠܰܝ̈ܡܳܬܳܐ ܥܰܠ ܪ̈ܺܝܫܰܝܗܶܝܢ܆ ܘܕܶܡ̈ܥܶܐ ܘܥܰܦܪܳܐ ܙܠܰܚܘ ܓܰܕܽܘ̈ܕܶܐ ܒܦܰܪ̈ܨܽܘܦܰܝܗܽܘܢ܆ ܐܶܬܪܰܚܰܡ ܥܠܰܝܢ ܐܰܠܳܗܳܐ܀

ܒܡܰܠܟܳܐ ܚܳܪܘ ܗ̱ܘܰܘ ܕܰܫܕܳܐ ܬܳܓܶܗ ܒܚܰܫܳܐ ܪܰܒܳܐ܆ ܘܰܫܕܰܘ ܚܰܬܢ̈ܶܐ ܠܰܟܠܺܝ̈ܠܰܝܗܽܘܢ ܘܰܒܟܰܘ ܥܰܡܶܗ܆ ܐܶܬܪܰܚܰܡ ܥܠܰܝܢ ܐܰܠܳܗܳܐ܀

ܡܰܠܶܠ ܗ̱ܘܳܐ ܒܳܗ̇ ܪܰܥܡܳܐ ܕܒܶܟܝܳܐ ܪܰܥܽܘܡܳܐܺܝܬ܆ ܕܰܚܠܳܦ ܡܶܛܪܳܐ ܕܶܡ̈ܥܶܐ ܙܶܠܚܰܬ ܥܰܠ ܐܰܪ̈ܥܳܬܳܐ܆ ܐܶܬܪܰܚܰܡ ܥܠܰܝܢ ܐܰܠܳܗܳܐ܀

ܐܶܫܬܰܦܰܥ ܗ̱ܘܳܐ ܚܰܠܒܳܐ ܘܕܶܡ̈ܥܶܐ ܡܶܢ ܐܶܡ̈ܗܳܬܳܐ܆ ܟܰܕ ܚܳܙ̈ܝܳܢ ܗ̱̈ܘܰܝ ܫܰܒܪ̈ܶܐ ܕܓܳܥܶܝܢ ܡܶܢ ܛܽܘܪܳܦܳܐ܆ ܐܶܬܪܰܚܰܡ ܥܠܰܝܢ ܐܰܠܳܗܳܐ܀

ܒܳܥܝܳܐ ܐ̱ܢܳܐ ܡܳܪܝ ܟܠܺܝ ܥܳܩܽܘܪ̈ܰܝ ܕܰܠܚܺܝܡܺܝܢ ܠܺܝ܆ ܘܰܕܠܳܐ ܙܰܘܥܳܐ ܢܰܛܰܪ ܫܽܘܪ̈ܰܝ ܕܰܟܪܺܝܟܺܝܢ ܠܺܝ܆ ܐܶܬܪܰܚܰܡ ܥܠܰܝܢ ܐܰܠܳܗܳܐ܀

ܫܡܰܝ̈ܳܐ ܡܶܫܬܰܥܶܝܢ
ܩܳܠܳܐ ܒܩ̄: ܠܶܟܝ ܢܶܬܟܰܫܰܦ

ܥܨܳܐ ܗ̱ܘܳܐ ܝܰܘܢܳܢ܆ ܠܦܽܘܩܕܳܢ ܡܳܪܶܗ ܘܰܠܝܰܡܳܐ ܢܚܶܬ ܗ̱ܘܳܐ ܕܢܶܥܪܽܘܩ܆ ܘܒܰܡ̈ܥܰܝ ܩܺܝܛܽܘܣ. ܐܶܬܚܒܶܫ ܕܐ̱ܪܳܙܳܐ ܢܶܪܫܽܘܡ ܠܡܳܪܶܗ ܕܶܐܬܳܐ܆ ܨܰܠܺܝ ܘܰܥܢܳܝܗ̱ܝ ܡܳܪܶܗ܆ ܢܦܰܩ ܘܫܰܡܠܺܝ ܦܽܘܩܕܳܢܶܗ܆ ܘܚܰܘܺܝ ܢܽܘܚܳܡܶܗ܀

ܫܡܰܥ ܗ̱ܘܳܐ ܡܰܠܟܳܐ܆ ܟܳܪܽܘܙܽܘܬܶܗ ܕܰܢܒܺܝܳܐ ܕܡܰܠܝܳܐ ܚܰܪܒܳܐ܆ ܘܙܳܥ ܘܶܐܣܬܰܪܰܕ܆ ܘܰܩܪܳܐ ܠܚܺܐܪ̈ܶܐ ܘܪ̈ܺܝܫܳܢܶܐ ܘܗܳܟܰܢ ܐܶܡܰܪ ܠܗܽܘܢ܆ ܕܰܒܡܳܪܝܳܐ ܢܶܬܓܰܘܰܣ܆ ܘܠܶܗ ܢܶܒܥܶܐ ܘܢܶܬܟܰܫܰܦ܆ ܕܰܡܨܶܐ ܦܳܪܶܩ ܠܰܢ܀

ܒܟܰܐܽܘܗ̱ܝ ܚܺܐܪ̈ܶܐ܆ ܘܪ̈ܺܝܫܳܢܶܐ ܘܟܽܠܶܗ ܥܰܡܳܐ ܠܡܰܠܟܳܐ ܡܫܰܒܚܳܐ܆ ܕܰܠܒܶܫ ܣܰܩܳܐ܆ ܘܰܥܛܺܝܦ ܐܶܒܠܳܐ ܘܟܰܪܝܽܘܬܳܐ ܘܒܳܟܶܐ ܒܚܰܫܳܐ܆ ܘܒܰܚܢܰܓܬܳܐ ܐܰܙܥܶܩܘ ܗ̱ܘܰܘ܆ ܕܚܽܘܪ ܡܳܪܝܳܐ ܒܡܽܘܟܳܟܶܗ܆ ܕܥܰܒܕܳܟ ܘܰܦܪܽܘܩ ܠܰܢ܀

ܟܡܳܐ ܡܰܪܺܝܪ ܗ̱ܘܳܐ܆ ܩܳܠܳܐ ܕܰܐܙܥܶܩ ܗ̱ܘܳܐ ܝܰܘܢܳܢ ܒܢܺܝܢܘܶܐ ܡܕܺܝܢ̱ܬܳܐ܆ ܘܰܟܡܳܐ ܚܢܺܝܓ ܗ̱ܘܳܐ܆ ܒܶܟܝܳܐ ܕܰܣܠܶܩ ܡܶܢ ܓܰܘܳܗ̇ ܪܰܥܽܘܡܳܐܺܝܬ܆ ܘܰܟܡܳܐ ܫܦܺܝܥܺܝܢ ܪ̈ܰܚܡܶܐ܆ ܕܫܰܕܰܪ ܡܳܪܝܳܐ ܥܠܰܝܗܽܘܢ܆ ܘܚܰܣܺܝ ܚܰܘ̈ܒܰܝܗܽܘܢ܀

ܐܰܝܠܶܝܢ ܡܰܠ̈ܟܶܐ܆ ܘܪ̈ܺܝܫܳܢܶܐ ܘܫܰܠܺܝ̈ܛܳܢܶܐ ܕܥܳܠܡܳܐ ܗܳܢܳܐ܆ ܢܩܽܘܡܽܘܢ ܢܦܺܝܣܽܘܢ܆ ܐܰܝܟ ܕܰܐܦܺܝܣ ܡܰܠܟܳܐ ܕܢܺܝܢܘܶܐ ܚܠܳܦ ܢܺܝܢ̈ܘܳܝܶܐ܆ ܘܰܒܝܰܕ ܨܰܘܡܳܐ ܘܕܶܡ̈ܥܶܐ܆ ܥܢܳܐ ܐܶܢܽܘܢ ܚܰܢܳܢܳܐ܆ ܘܶܐܬܪܰܚܰܡ ܥܠܰܝܗܽܘܢ܀

ܬܶܫܒܽܘܚܬܳܐ ܚܕܰܬܳܐ
ܩܳܠܳܐ ܒܩ̄: ܒܬܽܘܠܬܳܐ ܝܶܠܕܰܬ ܕܽܘܡܳܪܳܐ

ܛܳܒܳܐ ܕܩܰܒܶܠ ܠܰܨܠܽܘܬܶܗ܆ ܕܰܢܒܺܝܳܐ ܝܰܘܢܳܢ ܒܶܐܫܬܶܗ ܕܰܬܗܽܘܡܳܐ܆ ܩܰܒܶܠ ܨܠܰܘ̈ܳܬܳܐ ܕܟܽܠܰܢ܆ ܘܶܐܬܪܰܥܳܐ ܠܰܢ ܒܰܚܢܳܢܳܟ܆ ܕܰܐܢ̱ܬܽ ܗ̱ܘ ܐܺܝܬܰܝܟ ܦܳܪܽܘܩܳܐ܆ ܕܓܶܢܣܳܐ ܕܺܝܠܰܢ ܚܰܠܳܫܳܐ܀

ܡܪܰܚܡܳܢܳܐ ܕܡܶܢ ܢܺܝܢ̈ܘܳܝܶܐ܆ ܓܙܳܪ ܕܺܝܢܳܐ ܕܚܺܝܠܳܐ ܒܰܛܶܠ ܥܰܠ ܕܶܐܬܦܢܺܝܘ܆ ܒܰܛܶܠ ܪܽܘܓܙܳܐ ܡܶܢ ܥܰܒܕܰܝ̈ܟ܆ ܕܰܦܪܰܩܬ ܒܰܕܡܳܟ ܝܰܩܺܝܪܳܐ܆ ܕܗܳܐ ܩܳܥܶܝܢ ܠܳܟ ܐܰܝܟ ܢܺܝܢ̈ܘܳܝܶܐ܆ ܘܳܐܡܪܺܝܢ ܐܶܬܪܰܚܰܡ ܥܠܰܝܢ܀

ܚܰܢܳܢܳܐ ܘܰܡܠܶܐ ܪ̈ܰܚܡܶܐ܆ ܕܰܦܬܺܝܚܽ ܗ̱ܘ ܬܰܪܥܶܗ ܠܚܰܛܳܝ̈ܶܐ ܕܬܳܝܒܺܝܢ܆ ܐܰܫܘܳܢ ܕܰܢܬܽܘܒ ܡܶܢ ܥܰܘܠܳܐ܆ ܘܚܰܣܳܐ ܠܰܢ ܟܽܠ ܕܰܚܛܰܝܢܰܢ. ܕܰܒܚܰܕܽܘܬܳܐ ܢܶܩܥܶܐ܆ ܐܶܬܪܰܚܰܡ ܥܠܰܝܢ܀

ܠܰܘ ܡܶܛܽܠ ܕܰܚܛܰܝܢܰܢ ܠܳܟ܆ ܬܰܣܠܶܐ ܠܰܢ ܠܥܰܒ̈ܕܰܝܟ ܡܳܪܝܳܐ ܡܪܰܚܡܳܢܳܐ܆ ܚܽܘܣ ܥܠܰܝܢ ܡܶܛܽܠ ܦܰܓܪܳܟ܆ ܘܰܕܡܳܟ ܚܰܝܳܐ ܕܰܡܙܺܝܓ ܒܰܢ܆ ܘܶܐܬܪܰܥܳܐ ܠܰܢ ܘܰܦܪܽܘܩ ܠܰܢ܆ ܐܰܟܡܳܐ ܕܰܦܪܰܩܬ ܠܢܺܝܢ̈ܘܳܝܶܐ܀

ܩܳܠܳܐ ܕܨܰܦܪܳܐ
ܩܳܠܳܐ ܒܩ̄: ܒܟܽܠܡܶܕܶܡ ܐܶܬܒܰܩܺܝܬ
ܒܟܽܠܡܶܕܶܡ ܐܶܬܒܰܩܺܝܬ

ܩܰܒܶܠ ܛܳܒܳܐ ܒܳܥܽܘܬܰܢ܆ ܘܶܐܬܪܰܥܳܐ ܠܰܢ ܒܰܚܢܳܢܳܟ܆ ܘܦܰܢܳܐ ܫ̈ܶܐܠܳܬܰܢ܆ ܒܣܽܘܓܳܐܐ ܕܛܰܝܒܽܘܬܳܟ܆ ܘܰܐܥܒܰܪ ܡܶܢܰܢ ܢܶܟ̈ܝܳܢܶܐ܆ ܘܙܰܒ̈ܢܶܐ ܕܥܳܩ̈ܳܬܳܐ܆ ܫܰܝܢܳܟ ܢܰܡܠܶܟ ܒܰܝܢܳܬܰܢ܆ ܘܰܫܠܳܡܳܟ ܢܕܰܒܪܰܢ܆ ܘܰܐܝܟ ܕܶܐܬܪܰܥܺܝܬ ܥܰܠ ܥܰܡܳܐ܆ ܕܢܺܝܢ̈ܘܳܝܶܐ ܡܳܐ ܕܰܩܪܰܐܽܘܟ܆ ܘܶܐܬܪܰܥܳܐ ܠܰܢ ܒܰܚܢܳܢܳܟ܆ ܘܰܫܠܳܡܳܟ ܢܶܗܘܶܐ ܒܥܺܕܬܳܟ܆ ܘܰܠܝܰܠ̈ܕܶܝܗ̇ ܢܢܰܛܰܪ܆ ܥܕܰܡܳܐ ܠܫܽܘܠܳܡܳܐ܀

ܫܽܘܒܚܳܐ

ܒܰܥܣܰܪ ܡܰܚ̈ܘܳܢ ܡܶܨܪ̈ܳܝܶܐ܆ ܐܶܬܩܰܦܰܚܘ ܡܶܛܽܠ ܕܰܐܡܪܰܚܘ܆ ܕܰܢܫܰܥܒܕܽܘܢ ܠܥܰܡܳܐ܆ ܕܰܫܡܳܟ ܩܪܶܐ ܗ̱ܘܳܐ ܥܠܰܘܗ̱ܝ܆ ܗܳܐ ܡܳܪܝ ܥܰܡܳܟ ܗܰܘ ܕܰܦܪܰܩܬ܆ ܒܰܕܡܳܐ ܕܡܶܢ ܕܰܦܢܳܟ܆ ܣܳܒܶܠ ܐܽܘܠ̈ܨܳܢܶܐ ܩܫܰܝ̈ܳܐ܆ ܘܡܰܚ̈ܘܳܬܳܐ ܕܟܽܠ ܓܢܶܣ܆ ܘܩܰܫܝܳܐܺܝܬ ܗܳܐ ܡܶܬܩܰܦܰܚ܆ ܡܶܢ ܚܰܢ̈ܦܶܐ ܕܣܳܢܶܝܢ ܠܰܫܡܳܟ܆ ܩܽܘܡ ܡܳܪܝܳܐ ܘܰܐܪܺܝܡ ܐܺܝܕܳܟ܆ ܘܠܳܐ ܬܶܛܥܶܐ ܠܥܰܡܳܐ ܕܺܝܠܳܟ܆ ܕܢܶܕܥܽܘܢܳܟ ܕܰܐܢ̱ܬܽ ܗ̱ܘ܆ ܡܳܪܝܳܐ ܬܳܒܽܘܥܳܐ܀

ܡܶܢ ܥܳܠܰܡ

ܒܟܽܠܡܶܕܶܡ ܐܶܬܒܰܩܺܝܬ. ܘܠܳܐ ܚܙܺܝܬ ܡܶܕܶܡ ܕܰܡܝܰܬܰܪ: ܡ̣ܶܢ ܕܶܚܠܰܬ ܡܳܪܝܳܐ. ܛܽܘܒ ܠܰܐܝܢܳܐ ܕܰܐܚܒܳܗ̇. ܐܰܚܒܳܗ̇ ܗ̱ܘܳܐ ܝܰܘܣܶܦ ܟܺܐܢܳܐ: ܘܡܰܠܟܳܐ ܒܡܶܨܪܶܝܢ ܗܘܳܐ. ܐܰܚܒܳܗ̇ ܗ̱ܘܳܐ ܡܽܘܫܶܐ ܪܰܒܳܐ. ܘܝܰܡܳܐ ܒܚܽܘܛܪܶܗ ܦܠܰܓ. ܐܰܚܒܽܘܗ̇ ܗ̱ܘܰܘ ܕܒܶܝܬ ܚܰܢܰܢܝܳܐ܆ ܘܡܶܢ ܢܽܘܪܳܐ ܦܰܨܝܰܬ ܐܶܢܽܘܢ. ܪܓܺܝܓܳܐ ܗ̱ܝ ܣܰܓܺܝ ܡܶܢ ܕܰܗܒܳܐ: ܘܚܰܠܝܳܐ ܗ̱ܝ ܡܶܢ ܟܰܟܳܪܺܝܬܳܐ. ܕܶܚܠܰܬ ܐܰ‌ܠܳܗܳܐ: ܛܽܘܒ ܠܰܐܝܢܳܐ ܕܰܐܚܒܳܗ̇܀

ܐ̱ܚܪܺܢܳܐ

ܩܳܠܳܐ ܒܩ̄: ܠܳܟ ܡܳܪܝܳܐ ܩܳܪܶܝܢܰܢ
ܠܳܟ ܡܳܪܝܳܐ ܩܳܪܶܝܢܰܢ ܬܳܐ ܠܥܽܘܕܪܳܢܰܢ

ܠܳܟ ܩܳܪܝܳܐ ܡܰܪܥܺܝܬܳܟ ܡܰܠܟܳܐ ܡܫܺܝܚܳܐ܆ ܘܰܒܬܰܟܫܶܦܬܳܐ ܘܒܳܥܽܘܬܳܐ ܫܳܐܠܳܐ ܫܽܘܒܩܳܢܳܐ܆ ܐܰܝܟ ܕܰܥܢܰܝܬ ܐܰܠܳܗܳܐ ܠܢܺܝܢܘܶܐ ܡܕܺܝܢ̱ܬܳܐ܆ ܘܩܰܒܶܠܬ ܨܰܘܡܳܗ̇ ܘܰܨܠܽܘܬܳܗ̇ ܘܰܐܥܒܰܪܬ ܓܙܳܪ ܕܺܝܢܳܗ̇܆ ܐܰܥܒܰܪ ܡܳܪܝ ܪܽܘܓܙܳܐ ܡܶܢ ܥܺܕܬܳܟ܆ ܘܰܠܫܰܒ̈ܛܶܐ ܘܟܽܠܗܶܝܢ ܡܰܚ̈ܘܳܬܳܐ܆ ܕܢܰܘܕܶܐ ܠܳܟ ܥܰܠ ܛܰܝܒܽܘܬܳܟ܆ ܘܢܶܣܓܽܘܕ ܠܰܚܢܳܢܳܟ܀

ܫܽܘܒܚܳܐ

ܒܪܺܝܟ ܚܰܢܳܢܳܐ ܕܫܰܕܰܪ ܠܝܰܘܢܳܢ ܢܒܺܝܳܐ܆ ܘܰܐܦܢܺܝ ܠܥܰܡܳܐ ܕܢܺܝܢ̈ܘܳܝܶܐ ܠܽܐܘܪܚܳܐ ܕܰܫܪܳܪܳܐ܆ ܗܽܘ ܒܪ̈ܰܚܡܰܘܗ̱ܝ ܢܫܰܕܰܪ ܠܰܢ ܘܰܒܛܰܝܒܽܘܬܶܗ܆ ܐܺܝܳܠܳܐ ܕܰܐܠܳܗܽܘܬܶܗ ܘܢܰܝܬܶܐ ܠܰܢ ܚܢܳܢܳܐ܆ ܥܢܺܝܢ ܡܳܪܝܳܐ ܕܗܳܐ ܩܳܪܶܝܢܰܢ ܠܳܟ܆ ܘܦܰܨܳܐ ܠܰܢ ܠܥܰܒ̈ܕܰܝܟ ܘܣܳܓܽܘ̈ܕܰܝܟ܆ ܡܶܢ ܪܽܘܓܙܳܐ ܘܡܶܢ ܐܰܒܕܳܢܳܐ܆ ܘܚܽܘܣ ܘܶܐܬܪܰܚܰܡ ܥܠܰܝܢ܀

ܡܶܢ ܥܳܠܰܡ

ܠܳܟ ܡܳܪܝܳܐ ܩܳܪܶܝܢܰܢ ܬܳܐ ܠܥܽܘܕܪܳܢܰܢ. ܕܗܳܐ ܒܺܝܫܳܐ ܒܰܨܢܺܝܥܽܘܬܶܗ ܫܰܓܫܳܗ̇ ܠܰܒܪܺܝܬܳܐ. ܐܰܪܡܺܝ ܚܰܪܒܳܐ ܒܶܝܬ ܡܰܠ̈ܟܶܐ ܫܓ̣ܰܫ ܠܕܰܝ̈ܳܢܶܐ. ܘܶܐܢ ܡܰܨܝܳܐ ܐܳܦ ܠܰܓ̈ܒܰܝܳܐ ܡܰܛܥܶܐ ܐܰܝܟ ܕܰܟܬܺܝܒ. ܡܶܟܺܝܠ ܡܳܪܝ: ܒܡܰܢܽܘ̣ ܢܶܬܓܰܘܰܣ܆ ܐܶܠܐ ܐܶܢ: ܒܰܡܪܰܚܡܳܢܽܘܬܳܟ. ܒܰܛܶܠܳܝܗ̱ܝ ܠܒܺܝ̣ܫܳܐ ܡܶܢܰܢ: ܒܢܺܝܫܶܗ ܕܰܨܠܺܝܒܳܐ܀

ܒܳܥܽܘܬܳܐ ܕܡܳܪܝ ܝܰܥܩܽܘܒ
ܩܺܝܢܬܳܐ ܕܺܝܠܳܢܳܝܬܳܐ ܕܨܰܘܡܳܐ

ܦܬܰܚ ܠܰܢ ܡܳܪܰܢ ܬܰܪܥܳܟ ܪܰܒܳܐ ܕܰܡܠܶܐ ܖ̈ܰܚܡܶܐ܆

ܫܡܰܥ ܒܳܥܽܘܬܰܢ ܘܰܥܒܶܕ ܖ̈ܰܚܡܶܐ ܥܰܠ ܢܰܦ̈ܫܳܬܰܢ܀

ܝܰܘܢܳܢ ܡܰܟܪܶܙ ܘܣܶܕܪ̈ܰܝ ܡܰܠܟܳܐ ܡܶܬܒܰܠܗܺܝܢ ܗ̱ܘܰܘ܆ ܠܚܺܝܡ ܥܶܒܪܳܝܳܐ ܘܥܰܡ̱̈ܡܶܐ ܢܳܝܕܺܝܢ ܡܶܢ ܙܰܘܥܰܬܗܽܘܢ܆ ܫܓܺܝܪ ܗ̱ܘܳܐ ܢܒܺܝܳܐ ܡܶܢ ܓܶܠܝܳܢܳܐ ܐܰܠܳܗܳܝܳܐ܆ ܐܰܝܟ ܕܰܒܢܽܘܪܳܐ ܒܟܳܪܽܘܙܽܘܬܳܐ ܡܶܬܓܰܘܙܰܠ ܗ̱ܘܳܐ܀

ܝܳܗܒܺܝܢ ܗ̱ܘܰܘ ܠܶܗ ܫܽܘܚܕܳܐ܆ ܕܢܶܫܠܶܐ ܘܠܳܐ ܫܳܠܶܐ ܗ̱ܘܳܐ܆ ܘܫܳܚܕܺܝܢ ܗ̱ܘܰܘ ܠܶܗ ܡܳܐܢ̈ܶܐ ܪ̈ܓܺܝܓܶܐ ܘܠܳܐ ܡܩܰܒܶܠ ܗ̱ܘܳܐ܆ ܐܰܝܟ ܕܰܒܙܶܒܠܳܐ ܚܳܐܰܪ ܗ̱ܘܳܐ ܒܶܗ ܒܕܰܗܒܳܗ̇ ܕܰܐܪܥܳܐ܆ ܘܰܒܡܳܡܽܘܢܳܐ ܐܰܝܟ ܕܰܠܥܰܦܪܳܐ ܕܠܳܐ ܝܽܘܬܪܳܢܳܐ܀

ܫܳܡܰܥ ܟܽܠܳܐ ܘܰܡܩܰܒܠܳܢܳܐ ܕܰܨ̈ܠܰܘܳܬܳܐ܆

ܫܡܰܥ ܒܳܥܽܘܬܰܢ ܘܰܥܒܶܕ ܖ̈ܰܚܡܶܐ ܥܰܠ ܢܰܦ̈ܫܳܬܰܢ܀

ܦܶܬܓܳܡܳܐ: ܡܳܪܝܳܐ ܒܨܰܦܪܳܐ ܬܶܫܡܰܥ ܩܳܠܝ܆ ܘܰܒܨܰܦܪܳܐ ܐܶܬܛܰܝܰܒ ܘܶܐܬܚܙܶܐ ܠܳܟ ܗܰܠܶܠܽܘܝܰܗ܀

ܒܳܬܰܪ ܐܶܘܰܢܓܶܠܺܝܳܘܢ: ܡܰܥܢܺܝܬܳܐ ܕܡܳܪܝ ܣܶܘܶܝܪܺܝܳܘܣ

ܐܰܫܘܳܐ ܠܰܢ ܒܪ̈ܰܚܡܰܝܟ ܡܳܪܶܐ ܟܽܠ: ܕܰܒܝܰܘܡܳܐ ܗܳܢܳܐ ܕܠܳܐ ܟܽܘ̈ܬܡܳܬܳܐ ܕܰܚܛܺܝܬܳܐ ܒܙܰܕܺܝܩܽܘܬܳܐ ܢܶܬܢܛܰܪ ܡܒܰܪܟܳܐ ܐܺܝܬܰܝܟ܀

ܡܳܪܝܳܐ ܐܰܠܳܗܳܐ ܕܰܐܒܳܗ̈ܳܬܳܐ ܕܺܝܠܰܢ: ܡܪܰܡܪܰܡ ܘܰܡܫܰܒܰܚ ܫܡܳܐ ܕܺܝܠܳܟ ܠܥܳܠܰܡ ܥܳܠܡܺܝܢ܀

ܬܶܗܘܶܐ ܡܳܪܝ ܛܰܝܒܽܘܬܳܟ ܥܠܰܝܢ ܐܳܦ ܪ̈ܰܚܡܰܝܟ: ܐܰܟܡܳܐ ܕܰܥܠܰܝܟܽ ܗ̱ܘ ܣܰܒܪܰܢ ܡܒܰܪܟܳܐ ܐܺܝܬܰܝܟ܀

ܡܳܪܝܳܐ ܐܰܠܶܦܰܝܢ ܐܳܦ ܚܰܘܳܢ ܐܽܘܪܚܳܐ ܕܦܽܘܩ̈ܕܳܢܰܝܟ ܡܒܰܪܟܳܐ ܐܺܝܬܰܝܟ܀

ܡܳܪܝܳܐ ܣܰܟܶܠܰܝܢ ܒܛܰܝܒܽܘܬܳܟ ܐܽܘܪܚܳܐ ܕܢܳܡܽܘ̈ܣܰܝܟ ܡܒܰܪܟܳܐ ܐܽܝܬܰܝܟ܀

ܩܰܕܺܝܫܳܐ ܐܰܢܗܰܪ ܠܰܢ ܒܟܽܠܗܽܘܢ ܙܰܠ̈ܓܶܐ ܕܺܝܠܳܟ: ܡܳܪܝܳܐ ܪ̈ܰܚܡܰܝܟ ܥܠܰܝܢ ܠܥܳܠܰܡ ܥܳܠܡܺܝܢ܀

ܡܳܪܝܳܐ ܠܰܥܒܳܕܳܐ ܕܺܐܝ̈ܕܰܝܟ ܠܳܐ ܬܰܪܦܶܐ ܘܬܶܫܒܽܘܩ: ܠܳܟ ܝܳܐܶܐ ܫܽܘܒܚܳܐ: ܠܳܟ ܦܰܐܝܳܐ ܬܶܫܒܽܘܚܬܳܐ: ܘܠܳܟ ܦܐܶܐ ܩܽܘܠܳܣܳܐ: ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ ܠܥܳܠܰܡ ܥܳܠܡܺܝܢ ܐܰܡܺܝܢ܀

ܟܶܢ ܐܳܡܪܺܝܢܰܢ ܬܠܳܬ ܙܰܒܢܺܝ̈ܢ

ܛܳܒ ܠܡܰܘܕܳܝܽܘ ܠܡܳܪܝܳܐ ܘܰܠܡܶܙܡܰܪ ܠܰܫܡܳܟ ܡܪܰܝܡܳܐ ܘܠܰܡܚܰܘܳܝܽܘ ܒܨܰܦܪܳܐ ܛܰܝܒܽܘܬܳܟ ܘܗܰܝܡܳܢܽܘܬܳܟ ܒܠܰܝ̈ܠܰܘܳܬܐ܀

ܘܳܐܡܪܺܝܢܰܢ ܬܠܳܬ ܙܰܒܢܺܝ̈ܢ

ܩܰܕܺܝܫܰܬ ܐܰܠܳܗܳܐ. ܩܰܕܺܝܫܰܬ ܚܰܝܶܠܬܳܢܳܐ. ܩܰܕܺܫܰܬ ܠܳܐ ܡܳܝܽܘܬܳܐ ܕܶܐܨܠܶܒܬ ܚܠܳܦܰܝܢ ܐܶܬܪܰܚܰܡܥܠܰܝܢ܀

ܡܳܪܝܳܐ ܚܽܘܢܳܝܗ̱ܝ ܠܥܰܡܳܐ ܕܺܝܠܳܟ: ܡܳܪܝܳܐ ܚܰܣܳܐ ܘܰܫܒܽܘܩ ܚܛܳܗ̈ܶܐ ܕܟܽܠܰܢ: ܩܰܕܺܝܫܳܐ ܐܰܓܶܢ ܥܠܰܝܢ ܝܰܡܺܝܢܳܟ ܘܰܐܣܳܐ ܟܪܺܝܗܽܘܬܰܢ: ܡܶܛܽܠ ܫܡܳܐ ܕܺܝܠܳܟ܀

ܫܽܘܒܚܳܐ ܠܳܟ ܡܳܪܰܢ: ܫܽܘܒܚܳܐ ܠܳܟ ܡܳܪܰܢ: ܫܽܘܒܚܳܐ ܠܳܟ ܣܰܒܪܰܢ ܠܥܳܠܰܡ ܒܰܪܶܟܡܳܪܝ܀

ܨܠܽܘܬܳܐ ܡܳܪܳܢܳܝܬܳܐ

ܐܰܒܽܘܢ ܕܒܰܫܡܰܝܳܐ ܢܶܬܩܰܕܰܫ ܫܡܳܟ ܬܺܐܬܶܐ ܡܰܠܟܽܘܬܳܟ ܢܶܗܘܶܐ ܨܶܒܝܳܢܳܟ. ܐܰܝܟܰܢܳܐ ܕܒܰܫܡܰܝܳܐ ܐܳܦ ܒܰܐܪܥܳܐ. ܗܰܒܠܰܢ ܠܰܚܡܳܐ ܕܣܽܘܢܩܳܢܰܢ ܝܰܘܡܳܢܳܐ. ܘܰܫܒܽܘܩ ܠܰܢ ܚܰܘܒܰܝ̈ܢ ܘܰܚܛܳܗܰܝ̈ܢ ܐܰܝܟܰܢܳܐ ܕܳܐܦ ܚܢܰܢ ܫܒܰܩܢ ܠܚܰܝܳܒܰܝ̈ܢ. ܘܠܳܐ ܬܰܥܠܰܢ ܠܢܶܣܝܽܘܢܳܐ ܐܶܠܳܐ ܦܰܨܳܐ ܠܰܢ ܡܶܢ ܒܺܝܫܳܐ. ܡܶܛܽܠ ܕܕܺܝܠܳܟ ܗܺܝ ܡܰܠܟܽܘܬܳܐ ܘܚܰܝܠܳܐ ܘܬܶܫܒܽܘܚܬܳܐ ܠܥܳܠܰܡ ܥܳܠܡܺܝܢ ܐܰܡܺܝܢ܀