ܕܰܐܪܒܥܳܐ ܒܫܰܒܳܐ

ܕܠܺܠܝܳܐ

ܨܠܽܘܬܳܐ ܡܥܺܝܪܳܢܳܐ ܕܠܺܠܝܳܐ

ܟܳܗܢܳܐ: ܐܰܥܺܝܪ ܡܳܪܝ̱ ܠܕܰܡܟܽܘܬܰܢ ܡܶܢ ܛܽܘܒܳܥܳܐ ܕܰܚܛܺܝܬܳܐ ܕܢܰܘܕܶܐ ܠܥܺܝܪܽܘܬܳܟ܆ ܥܺܝܪܳܐ ܕܠܳܐ ܕܳܡܶܟ. ܘܰܐܚܳܐ ܠܡܺܝܬܽܘܬܰܢ ܡܶܢ ܫܶܢܬܳܐ ܡܛܰܒܥܳܢܺܝܬܳܐ ܕܡܰܘܬܳܐ ܘܕܰܚܒܳܠܳܐ ܕܢܶܣܓܽܘܕ ܠܰܚܢܳܢܳܟ܆ ܚܰܝܳܐ ܕܠܳܐ ܡܳܐܶܬ. ܘܰܐܫܘܳܐ ܠܰܢ ܕܥܰܡ ܟܶܢ̈ܫܶܐ ܕܰܡܫܰܒ̈ܚܳܢܰܝܟ ܢܫܰܒܚܳܟ. ܡܫܰܒܚܳܐ ܓܶܝܪ ܘܰܡܒܰܪܟܳܐ ܐܺܝܬܰܝܟ܆ ܐܰܒܳܐ ܘܰܒܪܳܐ ܘܪܽܘܚܳܐ ܩܰܕܺܝܫܳܐ. ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

ܩܳܠܳܐ ܒܩ̄: ܐܰܥܺܝܪ ܘܰܐܩܺܝܡܰܝܢܝ

ܒܬܰܪܥܳܟ ܢܳܩܶܫ ܐ̱ܢܳܐ܆ ܘܡܶܢ ܒܶܝܬ ܓܰܙܳܟ ܥܰܬܺܝܪܳܐ܆ ܚܢܳܢܳܐ ܘܪ̈ܰܚܡܶܐ ܫܳܐܶܠ ܐ̱ܢܳܐ܆ ܡܳܪܝܳܐ ܐܰܠܳܗܳܐ܀

ܫܳܡܰܥ ܘܠܳܐ ܡܰܗܡܶܐ܆ ܥܳܢܶܐ ܘܦܳܪܶܩ ܘܰܡܫܰܘܙܶܒ܆ ܫܡܰܥ ܡܳܪܝ ܒܳܥܽܘܬܰܢ܆ ܘܰܦܬܰܚ ܬܰܪܥܳܟ ܠܰܨܠܽܘܬܰܢ܀

ܩܪܰܝܢܳܟ ܐܰܝܟ ܕܰܐܠܶܦܬ܆ ܥܢܺܝ ܠܰܢ ܐܰܝܟ ܡܳܐ ܕܶܐܫܬܰܘܕܺܝܬ܆ ܘܩܰܒܶܠ ܬܶܫܡܶܫܬܰܢ܆ ܒܪ̈ܰܚܡܰܝܟ ܦܰܢܳܐ ܫܶܐܠܳــ̈ـܬܰܢ܀

ܫܽܘܒܚܳܐ

ܫܽܘܒܚܳܐ ܘܬܰܘܕܺܝܬܳܐ܆ ܠܚܰܕ ܟܝܳܢܳܐ ܡܥܰܠܝܳܐ ܣܓܺܝܕܳܐ܆ ܐܰܒܳܐ ܘܰܒܪܳܐ ܘܪܽܘܚܩܽܘܕܫܳܐ܆ ܐ̱ܪܳܙܳܐ ܬܠܺܝܬܳܝܳܐ܀

ܨܠܽܘܬܳܐ ܕܒܳܬܰܪ ܕܰܡܥܺܝܪܳܢܳܐ

ܟܳܗܢܳܐ: ܠܺܐܝܩܳܪܳܐ ܘܰܠܬܶܫܒܽܘܚܬܳܐ ܕܰܡܪܰܚܡܳܢܽܘܬܳܟ ܢܶܗܘܶܐ ܩܰܘܡܰܢ ܕܰܩܕܳܡ ܪܰܒܽܘܬܳܟ ܡܳܪܝܳܐ ܐܰܠܳܗܳܐ. ܘܢܶܬܥܗܰܕ ܒܠܺܠܝܳܐ ܘܒܺܐܝܡܳܡܳܐ ܠܰܫܡܳܟ ܩܰܕܺܝܫܳܐ ܘܰܠܦܽܘܩܕ̈ܳܢܰܝܟ ܐܰܠܳܗ̈ܳܝܶܐ. ܘܥܰܡ ܕܰܘܺܝܕ ܡܙܰܡܪܳܢܳܐ ܐܰܠܳܗܳܝܳܐ ܢܰܙܥܶܩ ܘܢܺܐܡܰܪ: ܕܰܒܦܶܠܓܶܗ ܕܠܺܠܝܳܐ ܩܳܡܶܬ ܕܰܐܘܕܶܐ ܠܳܟ ܥܰܠ ܕܺܝܢܰܝ̈ܟ ܫܰܦܺܝܪ̈ܶܐ ܘܠܳܐ ܡܶܬܕܰܪ̈ܟܳܢܶܐ ܕܰܠܘܳܬܰܢ. ܡܳܪܰܢ ܘܰܐܠܳܗܰܢ ܠܥܳܠܡܺܝܢ܀

ܩܰܘܡܳܐ ܩܰܕܡܳܝܳܐ ܕܠܺܠܝܳܐ

ܥܶܩܒܳܐ
ܩܳܠܳܐ ܒܩ̄: ܗܳܢܰܘ ܝܰܪܚܳܐ

ܝܰܡܳܐ ܪܰܒܳܐ ܕܰܡܠܶܐ ܚܢܳܢܳܐ ܒܳܟ ܐܶܬܕܰܠܶܐ܆ ܡܶܢ ܛܽܘܒܳܥܶܗ ܕܥܳܠܡܳܐ ܗܳܢܳܐ܆ ܒܰܕܡܽܘܬ ܦܶܛܪܳܘܣ ܒܶܝܬ ܡܰܚ̈ܫܽܘܠܶܐ܆ ܕܰܐܢ̱ܬܽ ܗ̱ܘ ܠܡܺܐܢܳܐ ܕܟܽܠܗܽܘܢ ܐܰܝܠܶܝܢ ܕܰܡܣܰܒܪܺܝܢ ܒܳܟ܀

ܩܳܠܳܐ ܒܩ̄: ܒܪܰܡܫܳܐ ܠܒܰܝܬܳܟ ܐܶܬܰܝܢܰܢ
ܡܒܰܪܰܟܬܳܐ ܕܰܗܘܳܬ ܐܶܡܳܐ (ܣܳܠܶܩ: ܒܡܰܪܝܰܡ ܝܳܠܕܰܬ ܐܰ‌ܠܳܗܳܐ)

ܩܪܳܟ ܝܰܘܢܳܢ ܡܶܢ ܓܰܘ ܝܰܡܳܐ ܘܰܥܢܰܝܬܳܝܗ̱ܝ܆ ܒܶܝܬ ܚܰܢܰܢܝܳܐ ܒܰܐܬܽܘܢܳܐ ܘܦܰܨܺܝܬ ܐܶܢܽܘܢ܆ ܟܽܠܳܗ̇ ܒܪܺܝܬܳܐ ܩܳܪܝܳܐ ܠܳܟ ܚܰܢܳܢܳܐ܆ ܚܽܘܣ ܥܠܶܝܗ̇ ܪܳܚܶܡ ܐ̱ܢܳܫܳܐ ܐܰܝܟ ܕܰܡܥܳܕ ܐܰܢ̱ܬ܀

ܫܽܘܒܚܳܐ

ܫܽܘܒܚܳܐ ܠܳܟ ܝܰܡܳܐ ܕܪ̈ܰܚܡܶܐ ܐܰܠܳܗܳܐ܆ ܕܰܚܢܳܢܳܟ ܠܢܺܝܢܘܶܐ ܫܰܕܰܪܬ ܒܝܰܕ ܟܳܪܽܘܙܳܟ܆ ܘܢܺܝܢ̈ܘܳܝܶܐ ܕܰܫܡܰܥܘ ܡܶܠܬܶܗ ܕܰܢܒܺܝܳܐ܆ ܩܰܒܶܠܘ ܨܰܘܡܳܐ ܘܰܨܠܽܘܬܳܐ ܘܰܦܢܰܘ ܨܶܐܕܰܝܟ܀

ܡܰܕܪܳܫܳܐ

ܩܳܠܳܐ ܒܩ̄: ܣܠܶܩ ܠܰܨܠܺܝܒܳܐ

ܥܽܘܢܺܝܬܳܐ: ܒܪܺܝܟ ܕܰܒܪ̈ܰܚܡܰܘܗ̱ܝ ܡܶܬܦܰܪܰܣ ܠܦܽܘܪܩܳܢܰܢ܆ ܒܪܺܝܟ ܕܰܒܚܽܘܒܶܗ ܫܳܒܶܩ ܠܰܢ ܚܰܘ̈ܒܳܬܰܢ.

ܕܺܝܢܳܐ ܟܺܐܢܳܐ ܗܘܳܐ ܒܶܐܠܦܶܗ ܕܒܰܪ ܡܰܬܰܝ܆ ܕܰܐܟܘܳܬܶܗ ܬܽܘܒ ܒܟܽܠܕܳܪ̈ܺܝܢ ܠܳܐ ܗܘܳܐ ܡܬܽܘܡ܆ ܦܶܣܬܳܐ ܕܶܝܢ ܗܘܳܬ ܠܶܗ ܩܛܺܝܓܪܳܢܳܐ܆ ܘܚܰܝܶܒܬܶܗ ܩܽܘܕܡܰܬ ܡܰܠܳܚ̈ܶܐ܆ ܠܰܢܒܺܝܳܐ ܕܶܐܬܚܰܒܰܫ܆ ܕܢܶܥܪܽܘܩ ܡܶܢ ܩܕܳܡ ܡܳܪܶܗ܀

ܒܽܐܘܪܚܳܐ ܕܝܰܘܢܳܢ ܟܰܕ ܐܳܙܶܠ ܠܓܰܘ ܢܺܝܢܘܶܐ܆ ܗܰܦ̈ܟܳܝܳܬܳܐ ܐܶܫܬܰܡܰܫܝ̈ ܒܣܽܘܥܪ̈ܳܢܰܘܗ̱ܝ܆ ܢܽܘܢܳܐ ܒܪܶܐ ܠܡܶܐܟܽܘܠܬܳܐ ܕܐ̱ܢܳܫ̈ܳܐ܆ ܠܳܐܟܽܘܠܶܗ ܗܦܰܟ ܒܠܰܥ ܕܠܳܐ ܒܰܥܝܳܕ܆ ܬܪܰܨ ܡܳܪܝܳܐ ܒܣܽܘܥܪ̈ܳܢܰܘܗ̱ܝ܆ ܕܰܢܒܺܝܳܐ ܕܗܰܦܟܳܝܺܝܢ܀

ܥܪܰܩ ܗ̱ܘܳܐ ܢܒܺܝܳܐ ܕܠܳܐ ܢܺܐܙܰܠ ܢܰܟܪܶܙ ܗ̱ܘܳܐ܆ ܡܺܐܡܰܪ ܡܳܪܶܗ ܠܚܰܛܳܝ̈ܶܐ ܕܰܢܬܽܘܒܽܘܢ܆ ܡܰܠܟܳܐ ܕܶܝܢ ܚܰܢܦܳܐ ܘܗܶܕܝܽܘܛܳܐ܆ ܗܘܳܐ ܣܳܦܪܳܐ ܡܗܺܝܪܳܐ ܘܚܰܟܺܝܡܳܐ܆ ܘܡܰܠܶܦ ܗ̱ܘܳܐ ܬܝܳܒܽܘܬܳܐ܆ ܠܐܢܳܫ̈ܳܐ ܬܽܘܒ ܘܠܰܒܥܺܝܪܳܐ܀

ܫܶܡܥܽܘܢ ܐܰܣܠܺܝ ܠܗܳܝ ܕܰܠܚܰܝ̈ܶܐ ܡܡܺܝܬ ܗ̱ܘܳܐ܆ ܘܰܓܒܳܐ ܣܒܰܪܬܳܐ ܕܰܠܡܺܝ̈ܬܶܐ ܡܰܚܶܐ ܗ̱ܘܳܐ܆ ܝܰܘܢܳܢ ܕܶܝܢ ܓܒܳܐ ܠܶܗ ܕܰܢܡܽܘܬܽܘܢ܆ ܕܠܳܐ ܪ̈ܰܚܡܶܐ ܟܽܠܗܽܘܢ ܚܰܛܳܝ̈ܶܐ܆ ܒܪܺܝܟ ܛܳܒܳܐ ܕܰܒܪ̈ܰܚܡܰܘܗ̱ܝ܆ ܚܰܢ ܠܥܰܒ̈ܕܰܘܗ̱ܝ ܕܠܳܐ ܢܺܐܒܕܽܘܢ܀

ܒܳܥܽܘܬܳܐ ܕܡܳܪܝ ܐܰܦܪܶܝܡ
ܟܺܐܦܳܐ ܕܰܚܙܳܐ ܕܳܢܺܝܐܶܝܠ

ܡܳܪܰܢ ܐܶܬܪܰܚܰܡܥܠܰܝܢ: ܡܳܪܰܢ ܩܰܒܶܠ ܬܶܫܡܶܫܬܰܢ܆

ܫܰܕܰܪ ܠܰܢ ܡܶܢ ܒܶܝܬ ܓܰܙܳܟ: ܚܢܳܢܳܐ ܘܪ̈ܰܚܡܶܐ ܘܫܽܘܒܩܳܢܳܐ܀

ܗܳܐ ܒܢܺܝܢܘܶܐ ܐܰܟܪܶܙ ܝܰܘܢܳܢ܆ ܝܽܘܕܳܝܳܐ ܒܰܝܢܳܬ ܥܽܘܪ̈ܠܶܐ܆ ܠܟܰܪܟܳܐ ܥܰܠ ܗ̱ܘܳܐ ܥܰܙܺܝܙܳܐ܆ ܘܰܒ̈ܩܳܠܶܐ ܕܚܺܝ̈ܠܶܐ ܕܰܠܚܶܗ܆ ܡܕܺܝܢ̱ܬܳܐ ܕܥܰܡ̱̈ܡܶܐ ܐܶܬܟܰܡܪܰܬ܆ ܒܚܰܕ ܟܳܪܽܘܙܳܐ ܥܶܒܪܳܝܳܐ܀

ܬܝܳܒܽܘܬܳܐ ܩܰܪܶܒܘ ܗ̱ܘܰܘ ܠܶܗ܆ ܓܱ̈ܒܶܐ ܬܪ̈ܰܝܗܽܘܢ ܐܶܬܦܰܨܺܝܘ܆ ܒܝܰܡܳܐ ܠܝܰܘܢܳܢ ܢܶܛܪܰܬ ܗ̱ܘܳܬ܆ ܘܰܠܢܺܝܢ̈ܘܳܝܶܐ ܒܓܰܘ ܝܰܒܫܳܐ܆ ܡܶܢܶܗ ܘܒܶܗ ܝܺܠܶܦ ܝܰܘܢܳܢ܆ ܕܘܳܠܶܐ ܕܢܺܚܽܘܢ ܚܰܛܳܝ̈ܶܐ܀

ܫܳܡܽܘܥܳܐ ܕܰܨ̈ܠܰܘܳܬܳܐ܇ ܘܰܡܦܰܢܝܳܢܳܐ ܕܫ̈ܶܐܠܳܬܳܐ܆

ܫܡܰܥ ܨܠܽܘܬܰܢ ܘܶܐܬܪܰܥܳܐ ܠܰܢ܇ ܘܦܰܢܳܐ ܒܪ̈ܰܚܡܰܝܟ ܫ̈ܶܐܠܳܬܰܢ܀