ܕܰܐܪܒܥܳܐ ܒܫܰܒܳܐ

ܕܪܰܡܫܳܐ

ܥܶܢܝܳܢܳܐ ܕܪܰܚܶܡܥܠܰܝ
ܩܳܠܳܐ ܒܩ̄: ܐܶܡܳܐ ܕܟܺܝܬܳܐ

ܐܰܢ̱ܬ ܡܳܪܝ ܐܶܡܰܪܬ܆ ܕܡܶܛܽܠ ܚܰܛܳܝ̈ܶܐ܆ ܐܶܬܺܝܬ ܠܥܳܠܡܳܐ ܕܢܶܗܘܽܘܢ ܬܰܝܳܒ̈ܶܐ܆ ܪܰܚܶܡ ܥܠܰܝܢ ܐܰܠܳܗܳܐ܀

ܐܰܟܡܳܐ ܕܰܥܢܰܝܬ. ܠܰܢܒܺܝܳܐ ܝܰܘܢܳܢ܆ ܕܰܩܪܳܟ ܒܝܰܡܳܐ ܥܢܺܝ ܠܰܢ ܦܳܪܽܘܩܰܢ܆ ܪܰܚܶܡ ܥܠܰܝܢ ܐܰܠܳܗܳܐ܀

ܛܳܒܳܐ ܕܰܐܠܶܦ. ܨܰܘܡܳܐ ܠܢܺܝܢ̈ܘܳܝܶܐ܆ ܐܰܠܶܦ ܐܳܦܠܰܢ ܐܽܘܪܚܳܐ ܕܦܽܘ̈ܩܕܳܢܰܝܟ܆ ܪܰܚܶܡ ܥܠܰܝܢ ܐܰܠܳܗܳܐ܀

ܡܳܪܳܐ ܕܩܰܒܶܠ. ܒܳܥܽܘܬܳܗ̇ ܕܢܺܝܢܘܶܐ܆ ܫܡܰܥ ܒܳܥܽܘܬܰܢ ܘܶܐܬܪܰܥܳܐ ܒܨܰܘܡܰܢ܆ ܪܰܚܶܡ ܥܠܰܝܢ ܐܰܠܳܗܳܐ܀

ܡܳܪܝܳܐ ܩܪܺܝܬܳܟ
ܩܳܠܳܐ ܒܩ̄: ܨܠܺܝ ܡܳܪܝܳܐ ܒܪ̈ܰܚܡܶܐ

ܒܫܰܪܒܳܗ̇ ܕܢܺܝܢܘܶܐ ܬܳܗܰܪ ܐ̱ܢܳܐ܆ ܕܰܟܡܳܐ ܚܢܺܝܓ ܥܰܠ ܫܳܡܽܘ̈ܥܶܐ܆ ܘܰܒܡܰܓܪܰܬ ܪܽܘܚܳܟ ܛܳܒܳܐ܆ ܬܳܗܰܪ ܐ̱ܢܳܐ ܕܠܳܐ ܡܶܬܡܰܫܚܳܐ܀

ܥܰܠ ܕܰܠܦܽܘ̈ܩܕܳܢܰܝܟ ܠܳܐ ܢܛܰܪ܆ ܢܒܺܝܳܐ ܝܰܘܢܳܢ ܒܰܪ ܡܰܬܰܝ܆ ܨܶܝܕ ܝܰܡܳܐ ܐܶܙܰܠ ܘܰܥܪܰܩ܆ ܟܰܕ ܣܳܒܰܪ ܕܡܶܢܳܟ ܦܳܠܶܛ܀

ܘܟܰܕ ܨܰܠܺܝ ܩܕܳܡܰܝܟ ܛܳܒܳܐ܆ ܡܶܢ ܡܥܰܝ̈ܳܐ ܕܢܽܘܢܳܐ ܒܝܰܡܳܐ܆ ܫܡܰܥܬ ܐܶܢܶܝܢ ܠܰܨ̈ܠܰܘܳܬܶܗ܆ ܘܫܰܘܙܶܒܬܳܝܗ̱ܝ ܡܶܢ ܛܽܘܒܳܥܳܐ܀

ܦܩܰܕܬ ܠܶܗ ܡܳܪܝ ܠܢܽܘܢܳܐ ܘܦܰܠܛܶܗ܆ ܠܰܢܒܺܝܳܐ ܟܰܕ ܠܳܐ ܡܚܰܒܰܠ܆ ܘܚܰܘܺܝܬ ܠܶܗ ܕܰܐܢ̱ܬܽ ܗ̱ܘ ܛܳܒܳܐ܆ ܘܡܳܪܳܐ ܕܪܰܘܡܳܐ ܘܰܕܥܽܘܡܩܳܐ܀

ܘܒܳܬܰܪ ܗܳܠܶܝܢ ܫܰܕܰܪܬܳܝܗ̱ܝ܆ ܨܶܝܕ ܢܺܝܢ̈ܘܳܝܶܐ ܠܡܰܟܪܳܙܽܘ܆ ܕܡܶܟܳܐ ܠܰܐܪܒܥܺܝܢ ܝܰܘ̈ܡܳܬܳܐ܆ ܢܺܝܢܘܶܐ ܒܪܽܘܓܙܳܐ ܡܶܬܗܰܦܟܳܐ܀

ܫܽܘܒܚܳܐ

ܐܰܟܪܶܙ ܗ̱ܘܳܐ ܡܰܠܟܳܐ ܒܫܽܘ̈ܩܶܐ܆ ܒܦܽܘܩܕܳܢܳܐ ܕܰܬܪܺܝܨܽܘܬܳܐ܆ ܨܰܘܡܳܐ ܠܟܽܠܗܽܘܢ ܒܢܰܝ̈ܢܳܫܳܐ܆ ܣܳܒ̈ܶܐ ܥܠܰܝ̈ܡܶܐ ܘܰܛܠܳܝ̈ܶܐ܀

ܩܳܠܳܐ ܕܪܰܡܫܳܐ

ܩܳܠܳܐ ܒܩ̄: ܡܫܺܝܚܳܐ ܢܰܛܰܪܶܝܗ̇ ܠܥܺܕܬܳܟ
ܒܡ̈ܰܬܠܶܐ ܡܰܠܶܠ ܦܳܪܽܘܩܰܢ

ܬܶܗܪܰܐ ܗ̱ܘ ܓܶܝܪ ܫܰܪܒܶܗ ܕܟܺܐܢܳܐ܆ ܢܒܺܝܳܐ ܝܰܘܢܳܢ ܒܰܪ ܡܰܬܰܝ܆ ܕܰܠܦܽܘܩܕܳܢ ܡܳܪܶܗ ܫܳܛ ܗ̱ܘܳܐ܆ ܘܰܠܝܰܡܳܐ ܥܪܰܩ ܡܶܢ ܩܽܘܕܡܰܘܗ̱ܝ܆ ܫܰܚܩܽܘܗ̱ܝ ܡܰܚ̈ܫܽܘܠܶܐ ܬܰܡܳܢ ܘܓܰܠ̱̈ܠܶܐ ܫܓܺܝ̈ܫܶܐ܆ ܘܪ̈ܽܘܚܶܐ ܥܰܣ̈ܩܳܬܳܐ܆ ܒܺܝܕܰܥܬܳܐ ܕܡܳܪܶܗ ܐܶܫܬܪܺܝ܆ ܘܗܽܘ ܛܰܝܶܒ ܢܽܘܢܳܐ ܘܒܰܠܥܶܗ܆ ܫܽܘ݉ܒܚܳܐ ܠܛܰܝܒܽܘܬܶܗ܆ ܕܩܰܒܶܠ ܨܠܽܘܬܶܗ ܡܶܢ ܡܥܰܝ̈ܳܐ܆ ܘܰܦܩܰܕ ܗ̱ܘܳܐ ܠܢܽܘܢܳܐ ܘܦܰܠܛܶܗ܆ ܠܝܰܒܫܳܐ ܟܰܕ ܚܰܝ ܘܶܐܫܬܰܘܙܰܒ ܡܶܢ ܐܽܘܠܨܳܢܳܐ܀

ܫܽܘܒܚܳܐ

ܒܰܡܛܰܠܬܳܐ ܝܺܬܶܒ ܝܰܘܢܳܢ܆ ܠܒܰܪ ܡܶܢ ܫܽܘܪܳܐ ܕܰܡܕܺܝܢ̱ܬܳܐ܆ ܘܟܽܠܶܗ ܝܰܘܡܳܐ ܡܰܟܪܶܙ ܗ̱ܘܳܐ܆ ܒܫܽܘ̈ܩܰܝ ܢܺܝܢܘܶܐ ܣܽܘܪܳܕܳܐ܆ ܕܡܶܟܳܐ ܠܰܐܪܒܥܺܝܢ ܝܰܘ̈ܡܳܬܳܐ ܡܶܬܗܰܦܟܳܐ ܠܳܗ̇܆ ܡܕܺܝܢ̱ܬܳܐ ܘܥܳܡܽܘܪ̈ܶܝܗ̇܆ ܡܰܠ̈ܟܶܐ ܘܚܺܐܪ̈ܶܐ ܘܪ̈ܺܝܫܳܢܶܐ܆ ܘܟܽܠܶܗ ܥܰܡܳܐ ܘܰܒܥܺܝܪܳܐ܆ ܨܰܘ݉ܡܳܐ ܩܰܒܶܠܘ ܗ̱ܘܰܘ܆ ܘܰܐܝܠܶܠܘ ܘܰܒܟܰܘ ܘܶܐܬܟܰܫܰܦܘ܆ ܚܰܢܳܢܳܐ ܚܙܳܐ ܕܶܡ̈ܥܰܝܗܽܘܢ܆ ܘܰܐܥܒܰܪ ܪܽܘܓܙܳܐ ܕܰܠܚܺܝܡ ܗ̱ܘܳܐ܆ ܕܢܰܘܒܶܕ ܐܶܢܽܘܢ܀

ܡܶܢ ܥܳܠܰܡ

ܒܡ̈ܰܬܠܶܐ ܡܰܠܶܠ ܦܳܪܽܘܩܰܢ. ܘܰܒܦ̈ܶܠܳܐܬܳܐ ܘܽܐܘܚ̈ܕܳܬܳܐ. ܘܶܐܡ̣ܰܪ ܕܕܳܡܝܳܐ ܡܰܠܟܽܘܬܳܐ. ܕܰܫܡܰܝܳܐ ܠܰܒܬܽܘ̈ܠܳܬܳܐ. ܗܳܠܶܝܢ ܕܰܢܣܰܒ̈ܝ ܠܰܡܦܺܐܕ̈ܶܐ ܘܰܢܦܰܩ̈ܝ ܠܽܐܘܪܥܶܗ: ܕܚܰܬܢܳܐ ܘܰܕܟܰܠܬܳܐ. ܘܢܳܡ̈ܝ ܟܽܠܗܶܝܢ ܘܰܕܡܶܟ̈ܝ ܐܰܟܚܕܳܐ: ܘܰܗܘܳܬ ܩܥܳܬܳܐ ܣܰܓܺܝܐܬܳܐ. ܕܗܳܐ ܚܰـ݉ܬܢܳܐ ܐܳܬܶܐ: ܘܚܰܟܺܝ̈ܡܳܬܳܐ ܥܰܠܝ̈ ܥܰܡܶܗ. ܘܣܰܟ̈ܠܳܬܳܐ ܦܳܫܝ̈ ܥܰܠ ܬܰܪܥܳܐ. ܒܒܶܟܝܳܐ ܪܰܒܳܐ ܘܬܶܢܚ̈ܳܬܳܐ: ܕܠܳܐ ܡܶܬܡ̈ܰܠܠܳܢ܀

ܐ̱ܚܪܺܢܳܐ

ܩܳܠܳܐ ܒܩ̄: ܠܰܬܚܽܘܡܳܐ ܕܗܰܝܡܳܢܽܘܬܳܐ
ܐܰܢ̱ܬ ܡܳܪܰܢ ܚܽܘܪ ܠܰܡܚܺܝܠܽܘܬܝ

ܚܢܺܝܓ ܗ̱ܘܳܐ ܩܳܠܶܗ ܕܒܰܪ ܡܰܬܰܝ܆ ܟܰܕ ܡܰܟܪܶܙ ܗ̱ܘܳܐ ܠܢܺܝܢ̈ܘܳܝܶܐ܆ ܚܰܪܒܳܐ ܘܩܶܛܠܳܐ ܘܰܗܦܽܘܟܝܳܐ ܕܟܽܘܠܳܐ܆ ܕܡܶܟܳܐ ܠܰܐܪܒܥܺܝܢ ܝܰܘ̈ܡܳܬܳܐ܆ ܢܺܝܢܘܶܐ ܡܕܺܝܢ̱ܬܳܐ ܡܶܬܗܰܦܟܳܐ܆ ܘܗܳܘܝܳܐ ܚܶܣܕܳܐ ܘܡܽܘܝܳܩܳܐ ܠܥܳܠܰܡ܆ ܐܳܒܕܺܝܢ ܡܶܢܳܗ̇ ܒܢܰܝ̈ܢܳܫܳܐ܆ ܘܰܒܥܺܝܪܳܐ ܘܟܽܠ ܡܳܐ ܕܺܐܝܬ ܒܳܗ̇܆ ܡܰܫܪܽܘܩܺܝܬܳܐ ܠܕܳܪ̈ܶܐ ܘܰܠܥܳܠܰܡ܆ ܓܰܒܪ̈ܶܐ ܢܺܝܢ̈ܘܳܝܶܐ ܗܰܝܡܶܢܘ܆ ܕܰܠܡܳܐ ܒܪܽܘܓܙܳܐ ܬܶܬܓܰܡܪܽܘܢ܆ ܗ̄ ܨܰܠܰܘ ܕܠܳܐ ܬܺܐܒܕܽܘܢ܀

ܫܽܘܒܚܳܐ

ܩܰܒܶܠ ܟܺܐܢܳܐ ܦܽܘܩܕܳܢܳܐ܆ ܕܰܠܢܺܝܢܘܶܐ ܡܕܺܝܢ̱ܬܳܐ ܢܺܐܙܰܠ܆ ܘܢܰܟܪܶܙ ܬܰܡܳܢ ܩܳܠܰܝ̈ ܬܝܳܒܽܘܬܳܐ܆ ܘܶܐܬܚܰܫܰܒ ܘܺܝܕܰܥ ܒܠܶܒܳܐ܆ ܢܒܺܝܳܐ ܝܳܕܰܥ ܟܰܣ̈ܝܳܬܳܐ܆ ܕܰܡܪܰܚܡܳܢܽ ܗ̱ܘ ܡܳܪܝܳܐ ܐܰܠܳܗܳܐ܆ ܐܶܢ ܐܶܡܛܶܐ ܐܰܟܪܶܙ ܬܰܡܳܢ܆ ܗܦܽܘܟܝܳܐ ܘܚܰܪܒܳܐ ܒܗܰܘ ܐܰܬܪܳܐ܆ ܡܶܚܕܳܐ ܕܬܳܝܒܺܝܢ ܡܪܰܚܶܡ ܐܰܠܳܗܳܐ܆ ܘܡܳܐ ܕܚܳܙܶܝܢ ܠܳܗ̇ ܠܰܡܕܺܝܢ̱ܬܳܐ܆ ܕܠܳܐ ܡܶܬܗܰܦܟܳܐ ܐܰܝܟ ܕܶܐܡܪܶܬ܆ ܗܳܘܶܐ ܐ̱ܢܳܐ ܠܺܝ ܣܰܟܠܳܐ ܘܫܰܪܳܒܳܐ܆ ܐܶܩܽܘܡ ܐܶܥܪܽܘܩ ܡܶܢ ܗܳܕܶܐ܆ ܘܺܐܙܰܠ ܠܺܝ ܠܰܐܬܪܳܐ ܕܬܰܪܫܺܝܫ܆ ܘܠܳܐ ܕܩܳܪܶܝܢ ܠܺܝ ܢܒܺܝܳܐ ܕܰܓܳܠܳܐ܆ ܒܪܺܝܟܽ ܗ̱ܘ ܕܨܳܕܶܗ ܒܓܰܘ ܝܰܡܳܐ܆ ܘܰܒܟܰܪܣܳܐ ܕܢܽܘܢܳܐ ܚܰܒܫܶܗ܆ ܗ݊ ܘܰܠܢܺܝܢܘܶܐ ܫܰܕܪܶܗ܀

ܡܶܢ ܥܳܠܰܡ

ܠܝܰܡܳܐ ܕܪ̈ܰܚܡܰܝܟ ܚܳܐܰܪ ܐ̱ܢܳܐ܇ ܝܺܚܺܝܕܳܝܳܐ ܐܰܠܳܗܳܐ ܕܣܰܓܺܝܘ ܚܰܘ̈ܒܰܝ܇ ܘܰܥܫܶܢܘ̱ ܒܽܘܨܳܪ̈ܰܝ܇ ܪܽܘܣ ܥܠܰܝ ܒܙܽܘܦܳܟ ܕܰܟ̣ܝܳܐ܇ ܘܚܰܠܶܠܰܝܢܝ̱ ܒܕܶܡ̈ܥܶܐ ܕܥܰܝ̈ܢܰܝ܇ ܒܳܥܶܐ ܐ̱ܢܳܐ ܡܳܪܝ̱ ܒܚܽܘܒܶܗ ܕܝܳܠܽܘܕܳܟ. ܠܳܐ ܢܰܗܠܽܘܢ ܒܺܝ ܣܳܩܽܘܪ̈ܰܝ܇ ܐܶܠܳܐ ܢܶܚܕܽܘܢ ܡܰܠܰܐܟ̣̈ܶܐ ܒܚܰܕ ܚܰܛܳܝܳܐ܇ ܕܬܳܐܶܒ ܡܶܢ ܥܰܘܠܶܗ. ܘܢܺܐܡܪܽܘܢ ܕܰܒܪܺܝܟ ܗܽܘ ܡܳܪܝܳܐ܇ ܕܰܦܬܺܝܚ ܬܰܪܥܶܗ ܠܬܰܝ̈ܳܒܶܐ ܗ̄ ܒܠܺܠܝܳܐ ܘܒܺܐܝܡܳܡܳܐ܀

ܦܶܬܓܳܡܳܐ: ܡܳܪܝܳܐ ܠܳܐ ܒܪܽܘܓܙܳܟ ܬܰܟܣܰܢܝ܆ ܐܳܦܠܳܐ ܒܚܶܡܬܳܟ ܬܶܪܕܶܝܢܝ ܗܰܠܶܠܽܘܝܰܗ܀

ܐ̱ܚܪܺܢܳܐ

ܦܶܬܓܳܡܳܐ: ܡܳܪܝܳܐ ܒܨܰܦܪܳܐ ܬܶܫܡܰܥ ܩܳܠܝ܆ ܘܰܒܨܰܦܪܳܐ ܐܶܬܛܰܝܰܒ ܘܶܐܬܚܙܶܐ ܠܳܟ ܗܰܠܶܠܽܘܝܰܗ܀

ܒܳܬܰܪ ܐܶܘܰܢܓܶܠܺܝܳܘܢ: ܬܶܫܡܶܫܬܳܐ ܕܥܰܢܺܝ̈ܕܶܐ

ܒܳܥܽܘܬܳܐ ܕܡܳܪܝ ܝܰܥܩܽܘܒ
ܩܺܝܢܬܳܐ ܕܺܝܠܳܢܳܝܬܳܐ ܕܨܰܘܡܳܐ

ܦܬܰܚ ܠܰܢ ܡܳܪܰܢ ܬܰܪܥܳܟ ܪܰܒܳܐ ܕܰܡܠܶܐ ܖ̈ܰܚܡܶܐ܆

ܫܡܰܥ ܒܳܥܽܘܬܰܢ ܘܰܥܒܶܕ ܖ̈ܰܚܡܶܐ ܥܰܠ ܢܰܦ̈ܫܳܬܰܢ܀

ܚܶܒܨܰܬ ܥܶܠܰܬ ܒܶܝܬ ܡܰܠܰܐܟ̈ܶܐ ܘܠܳܐ ܐܶܬܟܰܠܝܰܬ܆ ܦܓܰܥܘ ܒܳܗ̇ ܣܶܕܪ̈ܶܐ ܕܫܰܠܗܶܒܺܝܬܳܐ ܘܠܳܐ ܐܶܬܬܰܟܣܰܬ܆ ܦܟܺܝܪ̈ܳܢ ܐܺܝ̈ܕܶܝܗ̇ ܘܓܳܥܝܳܐ ܒܚܰܫܳܐ ܩܕܳܡ ܪܰܒܽܘܬܳܐ܆ ܡܰܪܟܰܢ ܪܺܝܫܳܗ̇ ܘܫܳܐܠܳܐ ܪ̈ܰܚܡܶܐ ܡܶܢ ܚܰܢܳܢܳܐ܀

ܫܽܘܒܚܳܐ ܠܰܐܒܳܐ ܕܚܰܝܶܠ ܐܶܢܽܘܢ ܠܰܒܢܰܝ̈ ܢܺܝܢܘܶܐ܆ ܘܫܰܡܠܺܝܘ ܨܰܘܡܳܐ ܕܰܓܙܰܪ ܡܰܠܟܳܐ ܘܨܳܡܘ ܐܰܟܘܳܬܶܗ܆ ܣܶܓܕܬܳܐ ܠܰܒܪܳܐ ܕܫܰܕܪܶܗ ܠܝܰܘܢܳܢ ܕܠܳܐܬܶܗ ܢܶܨܽܘܪ܆ ܘܰܢܚܶܬ ܠܝܰܡܳܐ ܘܩܰܘܺܝ ܬܰܡܳܢ ܬܠܳܬܳܐ ܝܰܘ̈ܡܺܝܢ܆ ܬܰܘܕܺܝ ܠܪܽܘܚܳܐ ܕܟܽܠ ܡܰܚ̈ܘܳܬܳܐ ܒܕܶܡ̈ܥܶܐ ܡܰܥܒܰܪ܆ ܘܰܥܠܰܝܢ ܪ̈ܰܚܡܶܐ ܘܫܽܘܒܩܳܢ ܚܰܘ̈ܒܶܐ ܒܝܰܘܡܳܐ ܕܕܺܝܢܳܐ܀

ܫܳܡܰܥ ܟܽܠܳܐ ܘܰܡܩܰܒܠܳܢܳܐ ܕܰܨ̈ܠܰܘܳܬܳܐ܆

ܫܡܰܥ ܒܳܥܽܘܬܰܢ ܘܰܥܒܶܕ ܖ̈ܰܚܡܶܐ ܥܰܠ ܢܰܦ̈ܫܳܬܰܢ܀