ܕܰܐܪܒܥܳܐ ܒܫܰܒܳܐ

ܩܰܘܡܳܐ ܕܰܬܪܶܝܢ ܕܠܺܠܝܳܐ

ܥܶܩܒܳܐ
ܩܳܠܳܐ ܒܩ̄: ܗܳܢܰܘ ܝܰܪܚܳܐ

ܝܳܕܰܥ ܐ̱ܢܳܐ ܡܳܪܝ ܕܟܽܠܳܟ ܪ̈ܰܚܡܶܐ ܒܪ̈ܰܚܡܶܐ ܫܦܺܝܥ ܐܰܢ̱ܬ܆ ܒܫܳܥܬܳܐ ܕܪ̈ܰܚܡܶܐ ܐܳܘ ܡܠܶܐ ܪ̈ܰܚܡܶܐ܆ ܝܶܫܽܘܥ ܣܰܒܪܳܐ ܕܫܳܐܠܰܝ̈ ܪ̈ܰܚܡܶܐ܆ ܐܰܫܦܰܥ ܪ̈ܰܚܡܰܝܟ ܥܰܠ ܚܰܛܳܝ̈ܶܐ ܕܪ̈ܰܚܡܰܝܟ ܫܳܐܠܺܝܢ܀

ܩܳܠܳܐ ܒܩ̄: ܠܡܰܪܝܰܡ ܝܳܠܕܰܬ ܐܰܠܳܗܳܐ
ܫܽܘܒܚܳܐ ܠܶܗ ܠܒܰܪ ܐܰ‌ܠܳܗܳܐ: ܕܰܨܒܳܐ ܘܰܕܢܰܚ

ܠܒܰܪ ܡܶܢ ܟܰܪܟܳܐ ܩܳܐܶܡ ܗ̱ܘܳܐ ܒܰܪ ܥܶܒܪ̈ܳܝܶܐ܆ ܟܰܕ ܡܣܰܟܶܐ ܠܪܽܘܓܙܳܐ ܕܳܐܬܶܐ ܕܢܶܥܩܽܘܪ ܫܽܘܪ̈ܰܘܗ̱ܝ܆ ܛܰܝܒܽܘܬܳܐ ܝܶܗܒܰܬ ܣܰܒܪܳܐ ܐܳܦ ܣܽܘܟܳܝܳܐ܆ ܠܰܐܝܠܶܝܢ ܕܰܦܣܰܩܘ ܗ̱ܘܰܘ ܣܰܒܪܳܐ ܥܰܠ ܚܰܝܰܝ̈ܗܽܘܢ܀

ܫܽܘܒܚܳܐ

ܫܡܰܥ ܡܳܪܰܢ ܠܰܨ̈ܠܰܘܳܬܰܢ ܘܰܠܒܳܥ̈ܘܳܬܰܢ܆ ܘܦܰܢܳܐ ܒܪ̈ܰܚܡܰܝܟ ܫܶܐܠܳــ̈ـܬܰܢ ܫܰܦܺܝܪ̈ܳܬܳܐ܆ ܘܰܐܝܟ ܕܶܐܬܪܰܥܺܝܬ ܠܢܺܝܢ̈ܘܳܝܶܐ ܕܰܒܥܰܘ ܡܶܢܳܟ܆ ܐܶܬܪܰܥܳܐ ܠܰܢ ܒܰܚܢܳܢܳܟ܆ ܘܶܐܬܪܰܚܰܡ ܥܠܰܝܢ܀

ܡܰܕܪܳܫܳܐ

ܩܳܠܳܐ ܒܩ̄: ܐܶܬܩܰܛܰܠܘ ܗ̱ܘܰܘ

ܥܽܘܢܺܝܬܳܐ: ܠܳܟ ܫܽܘܒܚܳܐ ܡܶܢ ܟܽܠ ܦܽܘ̈ܡܺܝܢ܆ ܒܪܳܐ ܕܚܳܐܶܣ ܥܰܠ ܡܰܪܥܺܝܬܶܗ.

ܟܽܠܶܗ ܟܰܪܟܳܐ ܐܶܙܕܰܡܰܢ܆ ܠܰܚܒܳܠܳܐ ܐܰܝܟ ܚܰܕ ܓܽܘܫܡܳܐ܆ ܠܳܐ ܡܨܶܝܢ ܗ̱ܘܰܘ ܢܰܟ̈ܦܶܐ ܕܰܒܗܽܘܢ܆ ܕܢܺܚܽܘܢ ܒܶܠܥܳܕ ܚܰܛܳܝ̈ܶܐ܆ ܕܰܐܝܟ ܗܰܕܳܡ̈ܶܐ ܐܰܣܺܝܪܺܝܢ ܗ̱ܘܰܘ. ܛܳܒ̈ܶܐ ܘܒܺܝ̈ܫܶܐ ܫܰܘܝܳܐܺܝܬ܆ ܙܰܕܺܝ̈ܩܰܝܗܽܘܢ ܒܳܥܶܝܢ ܗ̱ܘܰܘ. ܚܠܳܦ ܚܰܛܳܝ̈ܶܐ ܕܢܶܬܦܰܪܩܽܘܢ܆ ܘܚܰܛܳܝ̈ܶܐ ܬܽܘܒ ܒܳܥܶܝܢ ܗ̱ܘܰܘ܆ ܚܠܳܦ ܙܰܕܺܝ̈ܩܶܐ ܕܢܶܫܬܰܡܥܽܘܢ܀

ܐܰܪܺܝܡ ܡܰܠܟܳܐ ܠܰܠܒܽܘܫܶܗ܆ ܘܰܠܒܶܫ ܣܰܩܳܐ ܥܰܠ ܓܽܘܫܡܶܗ܆ ܫܕܶܐ ܬܳܓܶܗ ܘܰܪܡܶܐ ܒܰܐܪܥܳܐ܆ ܘܡܳܟ ܠܶܗ ܩܶܛܡܳܐ ܘܺܝܬܶܒ ܥܠܰܘܗ̱ܝ܆ ܘܣܳܒ̈ܶܐ ܘܚܺܐܪ̈ܶܐ ܘܪ̈ܺܝܫܳܢܶܐ܆ ܚܙܰܐܽܘܗ̱ܝ ܘܰܥܒܰܕܘ ܐܰܟܘܳܬܶܗ܆ ܘܶܐܫܰܕܘ ܕܶܡ̈ܥܶܐ ܚܢܺܝ̈ܓܳܬܳܐ܆ ܘܰܚܙܳܐ ܡܳܪܝܳܐ ܡܽܘܟܳܟܗܽܘܢ܆ ܘܩܰܒܶܠ ܡܶܢܗܽܘܢ ܒܳܥܽܘܬܗܽܘܢ܆ ܘܰܐܫܦܰܥ ܗ̱ܘܳܐ ܪ̈ܰܚܡܶܐ ܥܠܰܝܗܽܘܢ܀

ܬܽܘܒ ܐܳܡܪܺܝܢ ܗ̱ܘܰܘ ܢܺܝ̈ܢܘܳܝܶܐ܆ ܠܟܽܠ ܥܰܡ̱̈ܡܶܐ ܕܰܚܕܳܪ̈ܰܝܗܽܘܢ܆ ܒܳܥܶܝܢܰܢ ܡܶܢܟܽܘܢ ܫܒܳܒܰܝ̈ܢ܆ ܬܩܽܘܡܽܘܢ ܥܰܡܰܢ ܒܰܨܠܽܘܬܳܐ܆ ܘܶܐܬܟܰܫܰܦܘ ܠܶܗ ܠܰܐܠܳܗܳܐ. ܕܢܰܥܒܰܪ ܪܽܘܓܙܳܐ ܕܰܠܚܺܝܡ ܠܰܢ܆ ܘܓܳܙܶܡ ܕܢܶܥܩܽܘܪ ܠܰܡܕܺܝܢ̱ܬܰܢ. ܕܰܣܓܺܝ ܥܰܘܠܰܢ ܘܰܚ̈ܛܳܗܰܝܢ܆ ܨܠܽܘܬܟܽܘܢ ܬܗܶܐ ܠܰܢ ܣܶܬܳܪܳܐ܆ ܘܰܬܒܰܛܶܠ ܠܪܽܘܓܙܳܐ ܡܶܢܰܢ܀

ܣܓܺܝ ܣܰܒܪܳܐ ܘܰܗܘܳܐ ܫܶܠܝܳܐ܆ ܘܶܐܬܢܰܚܰܡ ܟܰܪܟܳܐ ܡܺܝܬܳܐ܆ ܠܒܶܫ ܝܰܘܢܳܢ ܚܰܫܳܐ ܪܰܒܳܐ܆ ܘܢܺܝ̈ܢܘܳܝܶܐ ܓܰܘܢܳܐ ܦܰܐܝܳܐ܆ ܣܒܰܪܬܳܐ ܠܟܽܠܗܽܘܢ ܕܶܢܚܰܬ ܗ̱ܘܳܬ܆ ܕܰܚܙܰܘ ܠܫܶܡܫܳܐ ܒܙܰܠܺܝ̈ܩܶܐ܆ ܘܰܚܙܰܘ ܠܳܐܐܰܪ ܕܰܦܨܺܝܚܽ ܗ̱ܘ܆ ܘܰܠܒܰܪ̈ܩܶܐ ܘܪ̈ܰܥܡܶܐ ܕܰܫܠܶܝܢ܆ ܘܫܰܒ̈ܛܶܐ ܕܪܽܘܓܙܳܐ ܥܒܰܪܘ ܡܶܢܗܽܘܢ܆ ܘܰܕܢܺܝܚܺܝܢ ܪ̈ܰܚܡܶܐ ܥܠܰܝܗܽܘܢ܀

ܒܳܥܽܘܬܳܐ ܕܡܳܪܝ ܐܰܦܪܶܝܡ
ܟܺܐܦܳܐ ܕܰܚܙܳܐ ܕܳܢܺܝܐܶܝܠ

ܡܳܪܰܢ ܐܶܬܪܰܚܰܡܥܠܰܝܢ: ܡܳܪܰܢ ܩܰܒܶܠ ܬܶܫܡܶܫܬܰܢ܆

ܫܰܕܰܪ ܠܰܢ ܡܶܢ ܒܶܝܬ ܓܰܙܳܟ: ܚܢܳܢܳܐ ܘܪ̈ܰܚܡܶܐ ܘܫܽܘܒܩܳܢܳܐ܀

ܡܶܢ ܒܳܬܰܪ ܕܰܢܦܰܩ ܡܰܠܟܳܐ܆ ܘܙܰܝܶܢ ܣܶܕܪ̈ܰܘܗ̱ܝ ܙܰܗܝܳܐܺܝܬ܆ ܦܢܳܐ ܠܶܗ ܕܰܢܙܰܝܶܢ ܟܰܪܟܳܐ܆ ܓܰܒܪ̈ܶܐ ܘܢܶܫ̈ܶܐ ܫܰܘܝܳܐܺܝܬ܆ ܕܟܽܠܶܗ ܥܰܡܳܐ ܡܶܢ ܣܳܟܶܗ܆ ܥܰܠ ܦܽܘܪܩܳܢܳܐ ܢܶܬܟܰܬܰܫ܀

ܠܥܰܡܳܐ ܟܽܠܶܗ ܙܰܗܰܪ ܗ̱ܘܳܐ܆ ܕܰܢܥܺܝܪܺܝܘܗ̱ܝ ܠܰܬܝܳܒܽܘܬܳܐ܆ ܡܰܠܟܳܐ ܒܫܽܘ̈ܩܶܐ ܦܳܗܶܐ ܗ̱ܘܳܐ܆ ܕܰܢܫܺܝܓ ܡܶܢܗܽܘܢ ܛܰܡܽܐܘܬܳܐ܆ ܗܰܠܶܟ ܗ̱ܘܳܐ ܡܰܟܺܝܟܳܐܺܝܬ܆ ܙܪܰܥ ܫܰܝܢܳܐ ܒܰܝܢܳܬ ܫܽܘ̈ܩܶܐ܀

ܫܳܡܽܘܥܳܐ ܕܰܨ̈ܠܰܘܳܬܳܐ܇ ܘܰܡܦܰܢܝܳܢܳܐ ܕܫ̈ܶܐܠܳܬܳܐ܆

ܫܡܰܥ ܨܠܽܘܬܰܢ ܘܶܐܬܪܰܥܳܐ ܠܰܢ܇ ܘܦܰܢܳܐ ܒܪ̈ܰܚܡܰܝܟ ܫ̈ܶܐܠܳܬܰܢ܀