ܕܪܰܡܫܳܐ

ܥܶܢܝܳܢܳܐ ܕܪܰܚܶܡܥܠܰܝ
ܩܳܠܳܐ ܒܩ̄: ܗܰܘ ܕܰܒܫܽܘܒܚܳܐ

ܗܰܘ ܕܶܐܬܳܐ ܗ̱ܘܳܐ ܘܰܥܡܰܕ ܐܰܝܟ ܣܢܺܝܩܳܐ܆ ܘܠܰܢ ܚܰܕܶܬ ܗ̱ܘܳܐ ܒܫܽܘ̈ܟܳܢܶܐ ܕܪܽܘܚܳܐ܆ ܪܰܚܶܡ ܥܠܰܝܢ ܐܰܠܳܗܳܐ܀

ܗܰܘ ܕܰܥܡܰܕ ܗ̱ܘܳܐ ܡܶܢ ܐܺܝ̈ܕܰܝ ܥܰܒܕܶܗ܆ ܡܶܢ ܐܰܒܳܐ ܐܶܣܬܗܶܕ ܕܗܳܢܰܘ ܒܶܪܝ ܚܰܒܺܝܒܝ܆ ܪܰܚܶܡ ܥܠܰܝܢ ܐܰܠܳܗܳܐ܀

ܗܰܘ ܕܰܪܩܰܥ ܗ̱ܘܳܐ ܐܰܪܥܳܐ ܥܰܠ ܡܰܝ̈ܳܐ܆ ܘܚܳܠܳܐ ܪܰܦܝܳܐ ܬܚܽܘܡܳܐ ܠܝܰܡܳܐ ܣܳܡ܆ ܪܰܚܶܡ ܥܠܰܝܢ ܐܰܠܳܗܳܐ܀

ܪܽܘܚܳܐ ܕܩܽܘܕܫܳܐ ܒܰܕܡܽܘܬܳܐ ܕܝܰܘܢܳܐ܆ ܒܗܳܢܳܐ ܝܰܘܡܳܐ ܥܰܠ ܝܽܘܪܕܢܳܢ ܢܰܗܪܳܐ܆ ܪܰܚܶܡ ܥܠܰܝܢ ܐܰܠܳܗܳܐ܀

ܗܰܘ ܕܡܶܢ ܐܰܒܳܐ ܐܶܣܬܗܶܕ ܕܗܰܢܰܘ ܒܶܪܝ܆ ܘܡܶܢ ܝܽܘܚܰܢܳܢ ܥܡܰܕ ܗ̱ܘܳܐ ܒܓܰܘ ܝܽܘܪܕܢܳܢ܆ ܪܰܚܶܡ ܥܠܰܝܢ ܐܰܠܳܗܳܐ܀

ܐܰܒܳܐ ܐܰܙܥܶܩ ܕܗܳܢܰܘ ܒܶܪܝ ܚܰܒܺܝܒܝ܆ ܪܽܘܚܳܐ ܕܩܽܘܕܫܳܐ ܫܶܟܢܰܬ ܥܰܠ ܪܺܝܫܶܗ܆ ܪܰܚܶܡ ܥܠܰܝܢ ܐܰܠܳܗܳܐ܀

ܡܳܪܝܳܐ ܩܪܺܝܬܳܟ
ܩܳܠܳܐ ܒܩ̄: ܠܢܳܨܪܰܬ ܡܕܺܝܢ̱ܬܳܐ

ܡܰܢ ܠܳܐ ܢܶܬܗܰܪ܆ ܒܰܡܫܺܝܚܳܐ ܟܰܕ ܐܳܡܰܪ ܠܶܗ܆ ܠܝܽܘܚܰܢܳܢ ܩܪܽܘܒ ܐܰܥܡܶܕܰܝܢܝ܆ ܘܶܐܡܰܪ ܠܶܗ ܕܕܳܚܶܠ ܐ̱ܢܳܐ ܡܳܪܝ܆ ܐܶܩܪܽܘܒ ܨܶܐܕܰܝܟ ܡܶܢ ܓܰܘܙܰܠܬܳܟ܆ ܥܰܒܕܳܐ ܐ̱ܢܳܐ ܘܠܳܐ ܡܰܡܪܰܚ ܐ̱ܢܳܐ܆ ܐܰܠܳܗܳܐ ܕܟܽܠ ܪܰܚܶܡ ܥܠܰܝܢ܀

ܩܳܝܡܺܝܢ ܟܶܢ̈ܫܶܐ܆ ܥܰܠ ܢܰܗܪܳܐ ܘܡܶܬܝܰܐܒܺܝܢ ܗ̱ܘܰܘ܆ ܕܢܶܚܙܽܘܢܳܝܗ̱ܝ ܠܰܒܪܳܐ ܕܥܳܡܶܕ܆ ܩܪܳܬ ܠܶܗ ܥܺܕܬܳܐ ܠܝܽܘܚܰܢܳܢ܆ ܘܰܡܫܰܐܠܳܐ ܠܶܗ ܕܰܐܝܢܰܘ ܚܰܬܢܳܐ܆ ܘܶܐܡܰܪ ܠܳܗ̇ ܕܒܳܬܰܪܝ ܐܳܬܶܐ܆ ܐܰܠܳܗܳܐ ܕܟܽܠ ܪܰܚܶܡ ܥܠܰܝܢ܀

ܫܽܘܒܚܳܐ

ܡܳܪܳܐ ܕܝܰܡ̱̈ܡܶܐ܆ ܘܡܰܒܽܘ̈ܥܶܐ ܥܰܠ ܦܽܘܡ ܒܺܐܪܳܐ܆ ܡܰܝ̈ܳܐ ܫܶܐܠ ܡܶܢ ܫܳܡܪܳܝܬܳܐ܆ ܘܶܐܡܰܪ ܠܳܗ̇ ܗܰܒܠܺܝ ܕܶܐܫܬܶܐ܆ ܘܝܳܗܶܒ ܐ̱ܢܳܐ ܠܶܟܝ ܡܰܝ̈ܳܐ ܚܰܝ̈ܶܐ܆ ܘܕܰܒܪܳܗ̇ ܘܰܐܥܠܳܗ̇ ܠܰܓܢܽܘܢܶܗ܆ ܐܰܠܳܗܳܐ ܕܟܽܠ ܪܰܚܶܡ ܥܠܰܝܢ܀

ܐ̱ܚܪܺܢܳܐ

ܩܳܠܳܐ ܒܩ̄: ܩܪܺܝܬܳܟ ܡܳܪܝܳܐ ܡܶܢ ܟܽܠܶܗ ܠܶܒܝ

ܠܳܟ ܬܶܫܒܽܘܚܬܳܐ ܒܪܳܐ ܕܰܐܠܳܗܳܐ: ܕܰܥܡܰܕܬ ܒܝܽܘܪܕܢܳܢ: ܡܶܢ ܝܽܘܚܰܢܳܢ ܟܳܪܽܘܙܳܟ܀

ܗܰܘ ܥܳܒܽܘܕܳܐ ܕܟܽܠ ܒܶܪ̈ܝܳܬܳܐ: ܡܰܥܡܽܘܕܺܝܬܳܐ: ܩܰܒܶܠ ܗ̱ܘܳܐ ܐܰܝܟ ܚܰܣܺܝܪܳܐ܀

ܫܽܘܒܚܳܐ

ܗܰܘ ܒܳܪܽܘܝܳܐ ܕܢܰܗܪ̈ܰܘܳܬܳܐ: ܥܡܰܕ ܗ̱ܘܳܐ ܒܝܽܘܪܕܢܳܢ: ܘܩܰܕܶܫ ܠܰܟܝܳܢܳܐ ܕܡܰܝ̈ܳܐ܀

ܩܳܠܳܐ ܕܪܰܡܫܳܐ

ܩܳܠܳܐ ܒܩ̄: ܡܫܺܝܚܳܐ ܢܰܛܰܪܶܝܗ̇ ܠܥܺܕܬܳܟ
ܬܰܘ ܢܥܰܕܥܶܕ ܕܽܘܟܪ̈ܳܢܰܝܗܽܘܢ

ܒܕܶܢܚܳܟ ܡܳܪܰܢ ܐܶܬܢܰܗܪܰܬ. ܟܽܠܳܗ̇ ܒܪܺܝܬܳܐ ܘܶܐܬܦܰܨܚܰܬ܆ ܕܚܶܫܽܘܟܳܐ ܗ̱ܘܳܬ ܒܰܚܛܺܝܬܳܐ܆ ܘܰܒܛܳܥܝܽܘܬܳܐ ܕܰܦܬܰܟܪ̈ܶܐ܆ ܘܟܰܕ ܐܰܙܠܶܓ ܢܽܘܗܪܳܐ ܪܰܒܳܐ܆ ܘܕܶܢܚܳܐ ܫܒܺܝܚܳܐ ܕܰܬܠܺܝܬܳܝܽܘܬܳܐ܆ ܒܪܳܐ ܕܥܳܡܶܕ ܡܶܢ ܝܽܘܚܰܢܳܢ܆ ܘܰܐܒܳܐ ܕܡܰܙܥܶܩ ܟܰܕ ܐܳܡܰܪ܆ ܕܗܳܢܰܘ݉ ܒܶܪܝ ܚܰܒܺܝܒܝ܆ ܝܺܚܺܝܕܳܝܳܐ ܕܒܶܗ ܐܶܨܛܒܺܝܬ܆ ܪܽܘܚ ܩܽܘܕܫܳܐ ܒܰܕܡܽܘܬ ܝܰܘܢܳܐ ܦܶܪܚܰܬ ܢܶܚܬܰܬ܆ ܘܥܰܠ ܪܺܝܫܶܗ ܕܰܒܪܳܐ ܫܶܟܢܰܬ܀

ܫܽܘܒܚܳܐ

ܐܶܬܳܐ ܠܰܥܡܳܕܳܐ ܡܳܪܰܢ܆ ܨܶܝܕ ܝܽܘܚܰܢܳܢ ܒܰܪ ܥܰܩܪ̈ܶܐ܆ ܘܶܐܡܰܪ ܠܶܗ ܩܪܽܘܒ ܐܰܥܡܶܕܰܝܢܝ܆ ܘܬܳܐ ܣܺܝܡ ܝܰܡܺܝܢܳܟ ܥܰܠ ܪܺܝܫܝ܆ ܘܙܳܥ ܟܳܪܽܘܙܳܐ ܡܶܢ ܕܰܫܡܰܥ܆ ܘܫܰܪܺܝ ܡܦܺܝܣ ܠܶܗ ܘܗܳܟܰܢܳܐ ܐܶܡܰܪ܆ ܕܶܐܢܳܐ ܣܢܺܝܩ ܐ̱ܢܳܐ ܦܳܪܽܘܩܰܢ܆ ܕܡܶܢܳܟ ܐܶܥܡܰܕ ܘܶܐܬܕܰܟܶܐ܆ ܘܰܐܢ̱݉ܬ ܡܳܪܝ ܕܓܰܘܙܰܠܬܳܐ܆ ܘܫܰܠܗܶܒܺܝܬܳܐ ܡܥܰܛܰܦ ܐܰܢ̱ܬ܆ ܝܳܩܶܕ ܐ̱ܢܳܐ ܐܶܢ ܐܶܩܪܽܘܒ ܠܳܟ܆ ܫܒܽܘܩ ܠܺܝ ܡܳܕܶܝܢ܆ ܕܕܳܚܶܠ ܐ̱ܢܳܐ ܡܶܢ ܓܰܘܙܰܠܬܳܟ܀

ܡܶܢ ܥܳܠܰܡ

ܪܳܥܶܡ ܩܳܠܶܗ ܕܫܺܝܦܽܘܪܳܐ܆ ܘܫܳܪܶܐ ܠܗܶܝܢ ܠܶܐܣܰܝ̈ ܬܺܒܶܝܠ. ܘܰܫܡܰܝ̈ܳܐ ܕܰܠܥܶܠ ܡܶܢܰܢ܆ ܒܰܕܡܽܘܬ ܡܓܰܠܬܳܐ ܡܶܬܟܰܪܟܳܐ. ܘܢܰܗܺܝܪ̈ܶܐ ܕܰܣܕܺܝܪܺܝܢ ܒܳܗ̇ ܢܳܬܪܺܝܢ ܟܽܠܗܽܘܢ: ܒܰܕܡܽܘܬ ܗܰܒ̈ܳܒܶܐ. ܘܙܳܥܶܩ ܒܳܗ̇ ܒܰܪ ܐܰ‌ܠܳܗܳܐ: ܒܓܰܘ ܫܝܽܘܠ ܘܰܡܣܰܚܶܦ ܠܳܗ̇. ܘܓܳܣܝܳܐ ܠܰܫ̈ܠܰܕܶܐ܆ ܕܶܐܬܬܣܺܝ̈ܡܝ ܒܳܗ̇ ܡ̣ܶܢ ܫܽܘܪܳܝܳܐ܆ ܘܢܳܫܒܳܐ ܒܗܽܘܢ ܪܽܘܚ ܢܽܘܚܳܡܳܐ. ܘܬܽܘܒ ܘܰܠܥܳܠܰܡ܆ ܡܰܘܬܳܐ ܒܗܽܘܢ ܠܳܐ ܡܶܫܬܰܠܰܛ܀

ܐ̱ܚܪܺܢܳܐ

ܩܳܠܳܐ ܒܩ̄: ܩܽܘܩܳܝܳܐ
ܕܟܺܝܪ ܡܽܘܫܶܐ ܪܺܝܫ ܡܰܒܽܘܥܳܐ

ܡܳܐܢ̈ܶܐ ܕܦܰܚܳܪܳܐ ܕܶܐܫܬܓܰܪ ܒܰܐܬܽܘܢܳܐ ܕܢܽܘܪܳܐ܆ ܐܶܢ ܠܳܐ ܡܶܨܛܰܒܥܺܝܢ ܒܡܰܝ̈ܳܐ ܡܡܰܕܪܺܝܢ ܘܡܶܬܦܰܪܟܺܝܢ܆ ܘܰܚܢܰܢ ܐܰܚܰܝ̈܆ ܐܶܢ ܠܳܐ ܥܳܡܕܺܝܢܰܢ܆ ܒܡܰܥܡܽܘܕܺܝܬܳܐ܆ ܘܰܒܡܰܝ̈ܳܐ ܘܢܽܘܪܳܐ܆ ܗܳܦܟܺܝܢܰܢ ܠܥܰܦܪܳܢܽܘܬܳܐ ܕܡܶܪܕܶܗ ܕܳܐܕܳܡ܆ ܘܝܳܒܫܺܝܢܰܢ ܠܰܢ ܡܶܢ ܡܰܝ̈ܳܐ ܐܰܠܳܗܳܝ̈ܶܐ ܕܶܝܢ܆ ܗ̄ܘܗ̄܀

ܫܽܘܒܚܳܐ

ܐܰܝܟܰܢܳܐ ܕܡܰܝ̈ܳܐ ܐܺܝܬ ܠܗܽܘܢ ܒܰܟܝܳܢܳܐ ܕܺܝܠܗܽܘܢ܆ ܕܠܳܚܶܝܢ ܟܬܺܝܒܬܳܐ ܘܶܐܫܛܳܪ̈ܶܐ ܕܰܒܗܽܘܢ ܡܶܬܬܰܪܡܶܝܢ܆ ܗܳܟܰܢܳܐ ܬܽܘܒ܆ ܡܰܝ̈ ܡܰܥܡܽܘܕܺܝܬܳܐ܆ ܠܳܚܶܝܢ ܘܥܳܛܶܝܢ܆ ܚܰܘ̈ܒܶܐ ܘܰܚ̈ܛܳܗܶܐ܆ ܘܶܐܫܛܳܪܳܐ ܕܟܶܬܒܰܬ ܚܰܘܳܐ ܒܡܶܐܟܽܘܠܬܳܐ ܕܦܺܐܪܳܐ܆ ܒܡܰܥܡܽܘܕܺܝܬܳܐ ܩܰܕܺܝܫܬܳܐ ܐܶܬܥܛܺܝ ܘܶܐܬܠܚܺܝ܆ ܗ̄ܘܗ̄܀

ܡܶܢ ܥܳܠܰܡ

ܐܶܬܕܰܟܪ ܡܳܪܝܳܐ ܠܥܰܢܺܝ̈ܕܰܝܢ܆ ܘܰܢܝܳܚܳܐ ܥܒܶܕ ܠܗܽܘܢ. ܕܠܰܒܫܽܘܟ ܡ̣ܶܢ ܡܰܥܡܽܘܕܺܝܬܳܐ. ܘܫܰܩܠܽܘܟ ܡ̣ܶܢ ܡܰܕܒܚܳܐ. ܗܳܢܽܘܢ ܕܶܐܟܰܠܘ: ܦܰܓܪܳܟ ܩܰܕܺܝܫܳܐ. ܘܶܐܫܬܺܝܘ ܠܰܕܡܳܟ. ܟܳܣܳܐ ܕܦܽܘܪܩܳܢܳܐ. ܥܰܡ ܐܰܒܪܳܗܳܡ ܢܶܬܒܰܣܡܽܘܢ܆ ܒܶܝܬ ܡܰܠܟܽܘܬܳܐ: ܘܡ̣ܶܢ ܝܰܡܺܝܢܳܟ ܢܶܩܥܽܘܢ ܠܳܟ܆ ܕܠܳܟ ܫܽܘܒܚܳܐ ܡܳܪܝܳܐ ܗ̄ ܢܝܳܚܳܐ ܡܳܪܝ ܠܥܰܒܕ̈ܰܝܟ܀

ܦܶܬܓܳܡܳܐ: ܐܰܢ̱ܬ ܒܥܽܘܫܢܳܟ ܦܪܰܫܬ ܝܰܡܳܐ܆ ܘܪܰܨܶܨܬ ܪ̈ܺܫܰܝܗܽܘܢ ܕܬܰܢܺܝ̈ܢܶܐ ܒܡܰܝ̈ܳܐ܆ ܗܰܠܶܠܽܘܝܰܗ

ܒܳܬܰܪ ܐܶܘܰܢܓܶܠܺܝܳܘܢ: ܬܶܫܡܶܫܬܳܐ ܕܥܰܢܺܝ̈ܕܶܐ

ܒܳܥܽܘܬܳܐ ܕܡܳܪܝ ܝܰܥܩܽܘܒ
ܐܳܙܺܠ̱ܝܢ ܕܳܪ̈ܶܐ ܘܳܐܬܶܝܢ ܕܳܪ̈ܶܐ

ܒܪܳܐ ܕܒܰܥܡܳܕܶܗ ܦܰܪܩܳܗ̇ ܠܥܺܕܬܶܗ ܡܶܢ ܛܳܥܝܽܘܬܳܐ܆

ܗܰܒ ܒܳܗ̇ ܫܰܝܢܳܐ ܘܢܰܛܰܪ ܠܝܰܠ̈ܕܶܝܗ̇ ܒܰܥܡܳܕܳܟ ܡܳܪܝ܀

ܡܰܥܡܽܘܕܺܝܬܳܐ ܟܰܪܣܳܐ ܗ̱ܝ ܕܟܺܝܬܳܐ ܕܡܰܠܝܳܐ ܢܽܘܗܪܳܐ܆ ܘܝܳܠܕܳܐ ܟܽܠ ܝܽܘܡ ܐܰܠܳܗܳܐܺܝܬ ܘܰܒܬܽܘܠܳܐܺܝܬ܆ ܘܠܰܒܢܰܝ̈ܢܳܫܳܐ ܗܳܦܟܳܐ ܘܝܳܠܕܳܐ ܒܢܰܘ̈ܗ̱ܝ ܕܰܐܠܳܗܳܐ܆ ܘܰܠܥܰܦܪ̈ܳܢܶܐ ܡܩܰܒܠܳܐ ܘܥܳܒܕܳܐ ܠܗܽܘܢ ܪ̈ܽܘܚܳܢܶܐ܀

ܪܽܘܚܳܐ ܕܩܽܘܕܫܳܐ ܐܰܫܪܺܝ ܒܡܰܝ̈ܳܐ ܘܰܐܚܶܬ ܐܶܢܽܘܢ܆ ܕܰܒܡܰܘܠܳܕܶܗ ܢܶܗܘܽܘܢ ܐܰܚ̈ܶܐ ܠܺܝܚܺܝܕܳܝܶܗ܆ ܗܘܳܐ ܠܗܽܘܢ ܐܰܒܳܐ ܠܳܐ ܚܳܫܽܘܫܳܐ ܒܡܰܥܡܽܘܕܺܝܬܳܐ܆ ܚܠܳܦ ܗܰܘ ܐܰܒܳܐ ܕܡܶܢ ܚܰܪܡܳܢܳܐ ܐܶܬܢܰܟܰܬ ܗ̱ܘܳܐ܀

ܫܰܝܢܳܐ ܕܫܰܝܶܢ ܠܰܫ̈ܡܰܝܳܢܶܐ ܘܠܰܐܪ̈ܥܳܢܳܝܶܐ܆

ܫܰܝܶܢ ܠܥܺܕܬܳܟ ܘܢܰܛܰܪ ܠܝܰܠ̈ܕܶܝܗ̇ ܒܰܥܡܳܕܳܟ ܡܳܪܝ܀