ܕܰܬܠܳܬܫܳܥܺܝ̈ܢ

ܩܳܠܳܐ ܒܩ̄: ܩܽܘܩܳܝܳܐ
ܟܽܠܳܗ̇ ܐܰܪܥܳܐ ܕܶܐܦܶܣܳܘܣ ܛܰܠܳܐ

ܝܽܘܚܰܢܳܢ ܒܰܝܢܳܬ ܟܶܢ̈ܫܶܐ ܐܰܙܥܶܩ ܘܶܐܡܰܪ܆ ܕܗܳܢܰܘ ܐܶܡܪܶܗ ܕܰܐܠܳܗܳܐ ܕܶܐܬܳܐ ܒܛܰܝܒܽܘܬܶܗ܆ ܕܢܶܫܩܽܘܠ ܚܛܺܝܬܶܗ܆ ܕܥܳܠܡܳܐ ܘܦܳܪܶܩ ܠܶܗ܆ ܒܰܕܒܺܝܚܽܘܬܶܗ܆ ܟܰܕ ܗܳܘܶܐ ܐܽܘܟܠܳܐ܆ ܦܰܓܪܶܗ ܝܳܗܶܒ ܚܽܘܣܳܝܳܐ ܠܰܕܢܳܣܒܺܝܢ ܠܶܗ܆ ܘܰܕܡܶܗ ܟܳܣܳܐ ܕܦܽܘܪܩܳܢܳܐ ܠܰܐܝܠܶܝܢ ܕܫܳܬܶܝܢ ܠܶܗ܆ ܗ̄ܘܗ̄܀

ܫܽܘܒܚܳܐ

ܐܳܘ ܐܶܡܪ̈ܶܐ ܪ̈ܽܘܚܳܢܶܐ ܕܡܶܢ ܡܰܝ̈ܳܐ ܗܳܐ ܣܠܶܩܘ܆ ܬܰܘ ܐܶܬܒܰܣܰܡܘ ܘܶܐܬܦܰܛܰܡܘ ܒܦܳܬܽܘܪܳܐ ܕܛܽܘ̈ܒܶܐ܆ ܕܰܥܠܰܘܗ̱ܝ ܣܺܝܡܺܝܢ܆ ܡܶܐܟܽܘܠܬܳܐ ܘܫܶܩܝܳܐ܆ ܘܠܳܐ ܐܳܟܽܘܠܰܘ̈ܗ̱ܝ܆ ܟܳܦܢܺܝܢ ܘܰܠܥܳܠܰܡ܆ ܘܰܕܫܳܬܶܐ ܠܶܗ ܠܗܰܘ ܫܶܩܝܳܐ ܕܚܰܝ̈ܶܐ ܐܺܝܬ ܒܶܗ܆ ܠܥܳܠܰܡ ܥܳܠܡܺܝܢ ܠܳܐ ܨܳܗܶܐ ܐܰܝܟܰܢܳܐ ܕܰܟܬܺܝܒ܆ ܗ̄ܘܗ̄܀

ܒܳܥܽܘܬܳܐ ܕܡܳܪܝ ܐܰܦܪܶܝܡ
ܟܺܐܦܳܐ ܕܰܚܙܳܐ ܕܳܢܺܝܐܶܝܠ ܕܶܐܬܓܰܙܪܰܬ

ܡܳܪܰܢ ܐܶܬܪܰܚܰܡ ܥܠܰܝܢ ܒܪܳܐ ܕܒܰܥܡܳܕܶܗ ܚܰܪܰܪ ܠܰܢ܆

ܡܫܺܝܚܳܐ ܕܒܰܥܡܳܕܶܗ ܦܰܪܩܰܢ ܚܰܣܳܐ ܠܰܢ ܘܰܠܥܰܢܺܝ̈ܕܰܝܢ܀

ܒܺܐܝ̈ܕܰܝ ܒܶܣܪܳܐ ܐܰܝܟܰܢܳܐ܆ ܐܳܚܶܕ ܐ̱ܢܳܐ ܫܰܠܗܶܒܺܝܬܳܐ܆ ܕܢܽܘܪ̈ܳܢܶܐ ܐܶܢ ܩܳܪܒܺܝܢ ܠܳܟ܆ ܡܶܚܕܳܐ ܝܳܩܕܺܝܢ ܡܶܢ ܢܽܘܪܳܟ܆ ܥܰܦܪܳܐ ܐ̱ܢܳܐ ܘܠܳܐ ܡܰܡܪܰܚ ܐ̱ܢܳܐ܆ ܐܶܣܺܝܡ ܐܺܝܕܝ ܥܰܠ ܡܳܡܽܘܠܳܐ܀

ܝܽܘܚܰܢܳܢ ܩܪܽܘܒ ܐܰܥܡܶܕܰܝܢܝ܆ ܕܰܠܗܳܕܶܐ ܓܒܺܝܬܳܟ ܕܬܶܗܘܶܐ܆ ܗܳܟܰܢ ܝܳܐܶܐ ܕܶܐܫܰܡܠܶܐ܆ ܟܺܐܢܽܘܬܳܐ ܒܽܐܘܪܚܳܐ ܕܶܐܬܺܝܬ܆ ܫܒܽܘܩ ܗܳܫܳܐ ܬܳܐ ܐܰܥܡܶܕܰܝܢܝ܆ ܘܺܐܝܕܳܟ ܣܺܝܡ ܥܰܠ ܪܺܝܫܝ ܘܰܫܠܺܝ܀

ܡܳܪܰܢ ܐܶܬܪܰܚܰܡ ܥܠܰܝܢ ܒܪܳܐ ܕܒܰܥܡܳܕܶܗ ܚܰܪܰܪ ܠܰܢ܆

ܡܫܺܝܚܳܐ ܕܒܰܥܡܳܕܶܗ ܦܰܪܩܰܢ ܚܰܣܳܐ ܠܰܢ ܘܰܠܥܰܢܺܝ̈ܕܰܝܢ܀

ܫܠܶܡ ܛܶܟܣܳܐ ܕܚܰܕ ܒܫܰܒܳܐ ܕܰܬܪܶܝܢ ܕܒܳܬܰܪ ܕܶܢܚܳܐ