ܕܪܰܡܫܳܐ

ܥܶܢܝܳܢܳܐ ܕܪܰܚܶܡܥܠܰܝ
ܩܳܠܳܐ ܒܩ̄: ܚܛܺܝܬ ܠܳܟ ܚܳܐܶܢ

ܫܽܘܒܚܳܐ ܠܪ̈ܰܚܡܰܝܟ ܐܰܠܳܗܳܐ܆ ܘܰܠܛܰܝܒܽܘܬܳܟ ܦܳܪܽܘܩܳܐ ܕܺܝܠܰܢ܆ ܡܳܪܝܳܐ ܡܳܪܶܐ ܟܽܠ ܪܰܚܶܡ ܥܠܰܝܢ܀

ܥܺܝܪ̈ܶܐ ܒܪܰܘܡܳܐ ܡܫܰܒܚܺܝܢ ܠܳܟ܆ ܘܪ̈ܳܥܰܘܳܬܳܐ ܟܰܕ ܒܽܐܘܪܝܳܐ ܪܡܶܐ ܗ̱ܘܰܝܬ܆ ܡܳܪܝܳܐ ܡܳܪܶܐ ܟܽܠ ܪܰܚܶܡ ܥܠܰܝܢ܀

ܟܪ̈ܽܘܒܶܐ ܒܪܰܘܡܳܐ ܛܥܺܝܢܺܝܢ ܠܶܗ܆ ܘܡܰܪܝܰܡ ܛܥܶܢܬܶܗ ܒܰܡܥܰܪܬܳܐ ܕܒܶܝܬ ܠܚܶܡ܆ ܡܳܪܝܳܐ ܡܳܪܶܐ ܟܽܠ ܪܰܚܶܡ ܥܠܰܝܢ܀

ܒܪܺܝܟ ܕܶܐܬܺܝܠܶܕ ܒܒܶܝܬ ܠܚܶܡ܆ ܘܰܒܢܰܝ̈ ܦܳܪܶܣ ܕܳܫ̈ܢܶܐ ܩܰܪܶܒܘ ܠܶܗ܆ ܡܳܪܝܳܐ ܡܳܪܶܐ ܟܽܠ ܪܰܚܶܡ ܥܠܰܝܢ܀

ܗܰܘ ܕܰܫܡܰܝܳܐ ܙܥܽܘܪܺܝܢ ܠܶܗ܆ ܘܽܐܘܪܝܳܐ ܣܦܰܩ ܠܶܗ ܒܝܰܘܡܳܐ ܕܶܐܬܺܝܠܶܕ܆ ܡܳܪܝܳܐ ܡܳܪܶܐ ܟܽܠ ܪܰܚܶܡ ܥܠܰܝܢ܀

ܫܽܘܒܚܳܐ

ܗܰܘ ܕܰܡܬܰܪܣܶܐ ܠܟܽܠ ܒܶܪ̈ܝܳܢ܆ ܝܺܢܶܩ ܚܰܠܒܳܐ ܡܪܰܒܶܐ ܟܽܠ ܥܽܘ̈ܠܺܝܢ܆ ܡܳܪܝܳܐ ܡܳܪܶܐ ܟܽܠ ܪܰܚܶܡ ܥܠܰܝܢ܀

ܡܳܪܝܳܐ ܩܪܺܝܬܳܟ
ܩܳܠܳܐ ܒܩ̄: ܢܽܘܗܪܳܐ ܕܡܶܢ ܢܽܘܗܪܳܐ

ܝܰܘܡܳܢ ܐܶܬܺܝܠܶܕ. ܡܰܠܟܳܐ ܡܫܺܝܚܳܐ ܒܒܶܝܬ ܠܚܶܡ. ܘܰܐܓܶܣ ܒܽܐܘܪܝܳܐ ܕܚܰܝ̈ܘܳܬܳܐ܆ ܘܺܝܢܶܩ ܚܰܠܒܳܐ ܐܰܝܟ ܫܰܒܪܳܐ܆ ܬܰܘ ܟܽܠ ܥܰܡ̱̈ܡܺܝܢ ܢܶܒܪܽܘܟ ܘܢܶܣܓܽܘܕ ܠܶܗ܀

ܡܶܠܬܶܗ ܕܰܢܒܺܝܳܐ. ܝܰܘܡܳܢܳܐ ܗܘܳܐ ܦܽܘܫܳܩܳܗ̇. ܕܰܕܢܰܚ ܟܰܘܟܒܳܐ ܡܶܢ ܝܰܥܩܽܘܒ܆ ܘܩܳܡ ܪܺܝܫܳܐ ܡܶܢ ܝܺܣܪܳܐܶܝܠ܆ ܬܰܘ ܟܽܠ ܥܰܡ̱̈ܡܺܝܢ ܢܶܒܪܽܘܟ ܘܢܶܣܓܽܘܕ ܠܶܗ܀

ܝܰܘܡܳܢ ܡܰܠܰܐܟ̈ܶܐ. ܘܣܶܕܪ̈ܶܐ ܕܢܽܘܪܳܐ ܘܰܕܪܽܘܚܳܐ. ܟܪܺܝܟܺܝܢ ܠܽܐܘܪܝܳܐ ܒܒܶܝܬ ܠܚܶܡ܆ ܘܰܣܪ̈ܳܦܶܐ ܕܶܐܫܬܳܐ ܓܶܦܺܝ̈ܢ܆ ܬܰܘ ܟܽܠ ܥܰܡ̱̈ܡܺܝܢ ܢܶܒܪܽܘܟ ܘܢܶܣܓܽܘܕ ܠܶܗ܀

ܝܰܘܡܳܢ ܐܶܬܺܝܠܶܕ܆ ܝܰܠܕܳܐ ܘܰܫܡܶܗ ܕܽܘܡܳܪܳܐ܆ ܕܽܘܡܳܪܰܐ ܗ̱ܘ ܓܶܝܪ ܒܰܫܪܳܪܳܐ܆ ܕܰܐܝܟ ܥܽܘܠܳܐ ܚܰܘܺܝ ܢܰܦܫܶܗ܆ ܬܰܘ ܟܽܠ ܥܰܡ̱̈ܡܺܝܢ ܢܶܒܪܽܘܟ ܘܢܶܣܓܽܘܕ ܠܶܗ܀

ܡܫܺܝܚܳܐ ܐܰܠܳܗܳܐ܆ ܗܰܘ ܫܶܡܫܳܐ ܕܙܰܕܺܝܩܽܘܬܳܐ. ܕܰܨܡܰܚ ܡܶܢ ܐܰܒܳܐ ܕܢܽܘܗܪ̈ܶܐ܆ ܘܰܕܢܰܚ ܝܰܘܡܳܢ ܒܒܶܝܬ ܠܚܶܡ܆ ܬܰܘ ܟܽܠ ܥܰܡ̱̈ܡܺܝܢ ܢܶܒܪܽܘܟ ܘܢܶܣܓܽܘܕ ܠܶܗ܀

ܡܫܺܝܚܳܐ ܐܰܠܳܗܳܐ܆ ܗܰܘ ܕܶܐܬܺܝܠܶܕ ܡܶܢ ܡܰܪܝܰܡ܆ ܘܰܨܒܳܐ ܘܰܗܘܳܐ ܒܰܪܢܳܫܳܐ܆ ܘܶܐܬܳܐ ܘܦܰܪܩܰܢ ܡܶܢ ܛܽܘܥܝܰܝ܆ ܬܰܘ ܟܽܠ ܥܰܡ̱̈ܡܺܝܢ ܢܶܒܪܽܘܟ ܘܢܶܣܓܽܘܕ ܠܶܗ܀

ܫܽܘܒܚܳܐ

ܝܰܘܡܳܢ ܡܰܠܰܐܟ̈ܶܐ܆ ܬܶܫܒܽܘܚܬܳܐ ܚܕܰܬܳܐ ܫܰܒܰܚܘ. ܠܰܒܪܳܐ ܕܺܝܠܺܝܕ ܒܰܡܥܰܪܬܳܐ܆ ܫܽܘܒܚܳܐ ܠܰܐܠܳܗܳܐ ܒܪܰܘܡܳܐ܆ ܘܥܰܠ ܐܰܪܥܳܐ ܫܠܳܡܳܐ܆ ܘܣܰܒܪܳܐ ܛܳܒܳܐ ܠܐ̱ܢܳܫܽܘܬܳܐ܀

ܩܳܠܳܐ ܕܪܰܡܫܳܐ

ܩܳܠܳܐ ܒܩ̄: ܙܳܕܶܩ ܕܢܶܗܘܶܐ
ܬܳܐ ܐܰܒܪܳܗܳܡ ܒܰܕܶܩ ܠܰܢ

ܢܚܶܬ ܗ̱ܘܳܐ ܥܺܝܪܳܐ܆ ܡܶܢ ܪܰܘܡܳܐ ܨܶܝܕ ܒܰܪ ܕܰܘܺܝܕ ܒܠܺܠܝܳܐ ܘܚܰܘܝܶܗ܆ ܕܩܽܘܡ ܠܳܟ ܝܰܘܣܶܦ܆ ܘܰܫܩܽܘܠ ܠܛܰܠܝܳܐ ܥܰܡ ܐܶܡܶܗ ܘܙܶܠ ܠܳܟ ܠܡܶܨܪܶܝܢ܆ ܘܰܗܘܺܝ ܬܰܡܳܢ ܥܕܰܡܳܐ ܕܳܐܡܰܪ ܐ̱ܢܳܐ܆ ܘܳܐܬܶܐ ܐ̱ܢܳܐ ܬܽܘܒ ܘܰܐܘܕܥܳܟ ܥܰܠܗܳܕܶܐ܆ ܘܩܳܡ ܗ̱ܘܳܐ ܟܺܐܢܳܐ܆ ܘܰܠܨܰܦܪܶܗ ܕܝܰܘܡܳܐ ܗܰܠܶܟ܆ ܘܶܐܙܰܠ ܠܰܐܪܥܳܐ ܪܰܚܺܝܩܬܳܐ܆ ܐܰܟܡܳܐ ܕܶܐܡܰܪ ܡܰܠܰܐܟܳܐ܆ ܒܪܺܝܟܽ ܗ̱ܘ ܡܫܺܝܚܳܐ܆ ܕܰܢܚܶܬ ܘܰܣܥܰܪ ܠܰܓܒܺܝܠܬܶܗ܆ ܗ̄ ܘܰܐܦܢܺܝ ܐܶܢܽܘܢ܀

ܫܽܘܒܚܳܐ

ܥܰܠ ܠܰܡܕܺܝܢ̱ܬܳܐ܆ ܕܥܰܠܘ ܠܳܗ̇ ܐܰܒܪܳܗܳܡ ܘܺܐܝܣܚܳܩ ܘܟܺܐܢܳܐ ܝܰܥܩܽܘܒ܆ ܘܗܳܠܶܝܢ ܟܺܐܢ̈ܶܐ܆ ܠܳܐ ܐܶܫܟܰܚܘ ܕܢܺܐܪܥܽܘܢ ܕܰܪܳܐ ܥܰܡ ܣܳܛܳܢܳܐ܆ ܥܕܰܡܳܐ ܕܰܐܕܺܝܩ ܓܽܘܪܝܳܐ ܕܰܐܪܝܳܐ܆ ܕܰܐܟܬܶܒ ܝܰܥܩܽܘܒ ܟܺܐܢܳܐ ܒܒܽܘܪ̈ܟܳܬܶܗ܆ ܫܡܰܥܘ ܗ̱ܘܰܘ ܩܳܠܶܗ܆ ܨܰܠܡܶܝ̈ܗ̇ ܕܰܐܪܥܳܐ ܘܰܦܬܰܟܪ̈ܶܝܗ̇܆ ܡܶܚܕܳܐ ܢܦܰܠܘ ܥܰܠ ܐܰܦܰܝ̈ܗܽܘܢ܆ ܘܰܗܘܰܘ ܥܰܦܪܳܐ ܘܕܰܚܺܝܚܳܐ܆ ܘܫ̈ܺܐܕܶܐ ܕܰܒܗܽܘܢ ܐܶܙܰܠܘ ܠܚܶܫܟܳܐ ܒܰܪܳܝܳܐ܆ ܗ̄ ܘܶܐܬܛܰܠܰܩܘ ܗ̱ܘܰܘ܀

ܡܶܢ ܥܳܠܰܡ

ܙܳܕܶܩ ܕܢܶܗܘܶܐ: ܕܽܘܟܪܳܢܳܐ ܠܟܺܐܢ̈ܶܐ ܕܰܫܟܶܒܘ ܒܗܰܝܡܳܢܽܘܬܳܐ. ܕܡ̣ܶܢ ܫܽܘܪܳܝܳܐ: ܠܫܽܘܠܳܡܳܐ ܫܦܰܪܘ ܠܰܐܠܳܗܳܐ ܒܕܽܘܒܳܪ̈ܰܝܗܽܘܢ. ܗܳܢܽܘܢ ܕܰܗܘܰܘ: ܗܰܝܟ̈ܠܶܐ ܪ̈ܽܘܚܳܢܶܐ: ܘܰܒܗܽܘܢ ܥܶܡܪܰܬ݀: ܪܽܘܚܶܗ ܕܰܡܫܺܝܚܳܐ. ܗܳܢܽܘܢ ܕܳܐܬܶܐ ܡܳܪܗܽܘܢ ܒܝܰܘܡܶܗ ܕܢܽܘܚܳܡܳܐ ܘܰܡܢܰܚܶܡ ܘܰܡܚܰܕܶܬ: ܘܡܰܠܒܶܫ ܫܽܘܒܚܳܐ ܠܦܰܓܪ̈ܰܝܗܽܘܢ: ܘܥܳܐܠܺܝܢ ܥܰܡܶܗ: ܠܰܓܢܽܘܢܳܐ ܡܠܶܐ ܚܰܕ̈ܘܳܬܳܐ ܗ̄ ܘܝܳܪܬܺܝܢ ܚܰܝ̈ܶܐ܀

ܐ̱ܚܪܺܢܳܐ

ܩܳܠܳܐ ܒܩ̄: ܬܗܰܪ ܓܰܒܪܺܐܶܝܠ
ܛܽܘܒܰܝܟܝ ܡܰܪܝܰܡ ܕܰܫܘܰܝܬܝ ܕܬܶܗܘܶܝܢ

ܢܒܺܝܳܐ ܓܰܒܝܳܐ. ܚܰܙܩܺܝܐܶܝܠ ܐܶܫܬܰܥܳܐ ܠܰܢ܆ ܥܰܠ ܚܶܙܘܳܐ ܬܡܺܝܗܳܐ ܕܰܚܙܰܝܬ܆ ܥܰܠ ܡܰܪܟܰܒܬܳܐ ܕܰܟܪ̈ܽܘܒܶܐ܆ ܘܰܐܦ̈ܶܐ ܘܓܺܝ̈ܓܠܶܐ ܓܠܺܝ̈ܦܰܝ ܡܶܢ ܢܽܘܪܳܐ܆ ܘܥܰܠ ܘܓܺܝ̈ܓܠܶܐ ܡܰܠܳــ̈ܠܳܬܳܐ܆ ܕܢܽܘܪܳܐ ܚܰܝܬܳܐ ܡܰܠ̈ܝܳܢ ܗ̱ܘܰܝ̈܆ ܘܙܰܗܪܳܐ ܕܰܟܪܺܝܟ ܠܗܶܝܢ܆ ܒܰܕܡܽܘܬ ܩܶܫܬܳܐ ܠܰܥ̈ܢܳܢܶܐ܆ ܘܒܰܪܐ̱ܢܳܫܺܝ̈ܢ ܕܝܳܬܶܒ ܥܠܶܝܗ̇܆ ܒܪܳܐ ܕܫܰܝܶܢ ܪܰܘܡܳܐ ܘܥܽܘܡܩܳܐ܀

ܫܽܘܒܚܳܐ

ܣܰܒܪܳܐ ܛܳܒܳܐ܆ ܐܰܡܠܶܟ ܗ̱ܘܳܐ ܒܰܐܪܒܰܥ ܦܶܢ̈ܝܳܢ܆ ܒܝܽܘܡ ܡܰܘܠܳܕܳܟ ܦܳܪܽܘܩܰܢ܆ ܘܓܶܢܣܳܐ ܟܽܠܶܗ ܕܒܶܝܬ ܐܳܕܳܡ܆ ܕܰܐܒܺܝܕܺܝܢ ܗ̱ܘܰܘ ܒܳܟ ܐܶܬܦܢܺܝܘ܆ ܐܰܢ̱ܬ ܚܠܳܦܰܝܗܽܘܢ ܐܶܬܓܰܫܰܡܬ܆ ܡܶܢ ܡܰܪܝܰܡ ܛܽܘܒܳܢܺܝܬܳܐ܆ ܘܗܳܐ ܟܽܠܗܽܘܢ ܒܳܟ ܚܝܰܘ܆ ܘܗܳܐ ܠܒܺܝܫܺܝܢ ܐܶܣܛܰܠ ܫܽܘܒܚܳܐ܆ ܕܰܐܠܒܶܫ ܐܶܢܽܘܢ ܦܽܘܪܩܳܢܳܟ܆ ܘܙܳܡܪܺܝܢ ܫܽܘܒܚܳܐ ܒܝܽܘܡ ܥܺܐܕܳܟ܀

ܡܶܢ ܥܳܠܰܡ

ܒܗܰܘ ܥܶܕܳܢܳܐ܆ ܕܦܳܩܶܕ ܪܶܡܙܶܗ ܕܰܐ‌ܠܳܗܳܐ܆ ܘܡܶܫܬܰܕܰܪ ܒܶܗ ܡܰܠܰܐܟܳܐ܆ ܘܙܳܐܰܚ ܘܢܳܚܶܬ ܩܰܠܺܝܠܳܐ. ܘܡ̣ܶܢ ܪܺܝܫ ܓܶܦܰܘ̈ܗ̱ܝ ܡܰܘܬܳܐ ܡܶܬܺܝܠܶܕ܆ ܚܳܙܝܳܐ ܠܶܗ ܢܰܦܫܳܐ ܘܕܳܚܠܳܐ: ܘܥܳܪܩܳܐ ܘܛܳܦܣܳܐ ܒܩܰܪ̈ܺܝܒܶܝܗ̇: ܘܣܰܓܺܝ ܡܶܬܰܐܠܨܳܐ܆ ܥܰܠ ܦܽܘܪܫܳܢܳܗ̇ ܕܡ̣ܶܢ ܦܰܓܪܳܐ. ܚܰܢܳܢܳܐ ܚܽܘܢ ܠܰܬܪ̈ܰܝܗܽܘܢ: ܒܝܰܘܡܶܗ ܪܰܒܳܐ ܕܢܽܘܚܳܡܳܐ܀

ܦܶܬܓܳܡܳܐ: ܡܰܠ̈ܟܶܐ ܕܬܰܪܫܺܝܫ ܘܰܕܓܳܙܪ̈ܳܬܳܐ܆ ܩܽܘܪ̈ܒܳܢܶܐ ܢܰܝܬܽܘܢ ܠܶܗ ܗܰܠܶܠܽܘܝܰܗ܀

ܒܳܬܰܪ ܐܶܘܰܢܓܶܠܺܝܳܘܢ: ܬܶܫܡܶܫܬܳܐ ܕܥܰܢܺܝ̈ܕܶܐ

ܒܳܥܽܘܬܳܐ ܕܡܳܪܝ ܝܰܥܩܽܘܒ
ܬܶܟܪܶܐ ܠܳܟ ܡܳܪܝ ܥܰܠ ܥܺܕ̈ܳܬܳܐ

ܒܪܳܐ ܕܰܒܝܰܠܕܶܗ ܦܰܪܩܳܗ̇ ܠܥܺܕܬܶܗ ܡܶܢ ܛܳܥܝܽܘܬܳܐ܆

ܗܰܒ ܒܳܗ̇ ܫܰܝܢܳܟ ܘܢܰܛܰܪ ܝܰܠ̈ܕܶܝܗ̇ ܒܡܰܘܠܳܕܳܟ ܡܳܪܝ܀

ܡܛܳܐ ܘܥܰܠ ܠܡܶܨܪܶܝܢ ܘܥܰܠ ܠܰܐܪ̈ܥܳܬܳܐ ܕܚܰܪ̈ܺܝܒܳܢ ܗ̱ܘܰܝ̈܆ ܘܫܰܪܺܝ ܣܓܺܝܕܳܐ ܕܰܒܗܰܠ̈ܟܳܬܶܗ ܢܫܰܝܶܢ ܐܶܢܶܝܢ܆ ܢܽܘܗܪܳܐ ܢܦܰܩ ܗ̱ܘܳܐ ܕܰܠܚܶܫܽܘ̈ܟܶܐ ܕܥܳܠܡܳܐ ܢܶܪܕܽܘܦ܆ ܘܡܶܢ ܟܽܠܦܶܢ̈ܝܳܢ ܡܛܰܠܶܩ ܗ̱ܘܳܐ ܠܗܽܘܢ ܚܰܟܺܝܡܳܐܺܝܬ܀

ܠܒܰܪ̱ܬ ܟܰܠ̈ܕܳܝܶܐ ܒܚܽܘܛܪܳܐ ܕܢܽܘܗܪܳܐ ܟܰܕܢܳܗ̇ ܘܶܐܬܳܬ܆ ܘܰܢܚܶܬ ܣܰܥܪܳܗ̇ ܠܡܳܪܰܬ ܚܰܫ̈ܶܐ ܗܽܘ ܒܰܩܢܽܘܡܶܗ܆ ܠܰܡܓܽܘܫܽܘܬܳܐ ܘܚܰܪܳܫܽܘܬܳܐ ܫܰܪܺܝ ܕܢܶܣܥܽܘܪ܆ ܕܟܽܠܗܽܘܢ ܩܶܛܪ̈ܶܐ ܕܥܰܘܠܳܐ ܢܶܫܪܶܐ ܒܝܰܕ ܬܰܪ̈ܬܰܝܗܶܝܢ܀

ܫܰܝܢܳܐ ܕܫܰܝܶܢ ܠܰܫ̈ܡܰܝܳܢܶܐ ܘܠܰܐܪ̈ܥܳܢܳܝܶܐ܆

ܫܰܝܶܢ ܠܥܺܕܬܳܟ ܘܢܰܛܰܪ ܝܰܠ̈ܕܶܝܗ̇ ܒܡܰܘܠܳܕܳܟ ܡܳܪܝ܀