ܣܳܠܶܩ: ܒܶܐܢܳܐ ܐ̱ܢܳܐ ܢܽܘܗܪܳܐ ܫܰܪܺܝܪܳܐ

ܐ: ܒ: ܕܝܳܠܕܰܬ ܐܰܠܳܗܳܐ

ܐܶܢܗܽܘ ܕܫܰܒܛܳܐ ܝܰܒܺܝܫܳܐ. ܝܰܗܒ ܗ̱ܘܳܐ ܦܺܐܪܳܐ ܕܠܳܐ ܒܙܰܒܢܶܗ. ܡܰܢ ܡܶܬܦܰܠܰܓ ܥܰܠ ܡܰܪܝܰܡ ܕܰܒܬܽܘܠܳܐܝܬ ܝܺܠܶܕܬܶܗ. ܠܒܰܪ ܐܰ‌ܠܳܗܳܐ. ܕܶܐܬܓܰܫܰܡ ܘܰܗܘܳܐ ܐ̱ܢܳܫܳܐ܀

ܓ: ܕ: ܕܣܳܗ̈ܕܶܐ

ܣܳܗ̈ܕܶܐ ܕܺܝܩܶܕܘ ܘܒܶܣ̈ܡܶܐ ܗܘܰܘ. ܘܰܐܝܟ ܗܶܪ̈ܽܘܡܶܐ ܒܢܽܘܪܳܐ ܢܦܰܠܘ. ܘܰܡܚܳܐ ܪܺܝܚܳܐ ܕܩܶܛܠܰܝ̈ܗܽܘܢ ܘܰܡܠܳܗ̇ ܗ̱ܘܳܐ ܠܟܽܠܳܗ̇ ܐܰܪܥܳܐ: ܘܗܳܐ ܪܳܕܶܝܢ ܡܶܢܗܽܘܢ ܥܽܘܕܪ̈ܳܢܶܐ ܠܰܒܢܰܝ̈ܢܳܫܳܐ܀

ܗ: ܘ: ܕܰܬܝܳܒܽܘܬܳܐ

ܩܰܒܶܠ ܡܳܪܰܢ ܬܶܫܡܶܫܬܰܢ. ܘܰܦܬܰܚ ܬܰܪܥܳܟ ܠܰܨܠܽܘܬܰܢ. ܘܦܰܢܳܐ ܒܪ̈ܰܚܡܰܝܟ ܫ̈ܶܐܠܳܬܰܢ܆ ܘܰܥܒܶܕ ܣܰܒܪܳܐ ܘܦܽܘܪܩܳܢܳܐ ܠܢܰܦ̈ܫܳܬܳܐ ܟܽܠܗܶܝܢ: ܕܩܳܪ̈ܝܳܢ ܠܳܟ ܒܗܰܝܡܳܢܽܘܬܳܐ܀

ܙ: ܚ: ܕܥܰܢܺܝ̈ܕܶܐ

ܥܰܢܺܝ̈ܕܶܐ ܕܰܫܩܰܠܘ ܦܰܓܪܳܟ. ܘܒܰܕܡܳܟ ܚܰܝܳܐ ܐܶܬܚܰܣܺܝܘ. ܥܒܶܕ ܠܗܽܘܢ ܡܳܪܰܢ ܕܽܘܟܪܳܢܳܐ. ܒܽܐܘܪܺܫܠܶܡ ܗܳܝ ܕܒܰܫܡܰܝܳܐ. ܘܰܐܫܘܳܐ ܠܰܢ ܘܰܠܗܽܘܢ ܠܗܰܘ ܩܰܘܡܳܐ ܕܡܶܢ ܝܰܡܺܝܢܳܟ܀