ܬܶܫܡܶܫܬܳܐ ܕܰܢܝܳܚܬܳܐ ܕܓܰܒܪ̈ܶܐ ܘܕܰܥܠܰܝ̈ܡܶܐ ܘܕܰܛܠܳܝ̈ܶܐ ܕܝܰܘܡܳܐ ܬܠܺܝܬܳܝܳܐ ܘܕܰܐܪܒܥܺܝܢ ܝܰܘ̈ܡܺܝܢ ܘܰܕܫܰܢ̱ܬܳܐ

ܨܠܽܘܬܳܐ ܕܫܽܘܪܳܝܳܐ

ܟܳܗܢܳܐ: ܫܽܘܒܚܳܐ ܠܰܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ܀

ܡܫܰܡ̈ܫܳܢܶܐ: ܘܰܥܠܰܝܢ ܡܚܺܝ̈ܠܶܐ ܘܚܰܛܳܝ̈ܶܐ ܪ̈ܰܚܡܶܐ ܘܰܚܢܳܢܳܐ ܢܶܫܬܰܦܥܽܘܢ ܒܰܬܪ̈ܰܝܗܽܘܢ ܥܳܠ̈ܡܶܐ ܠܥܳܠܰܡ ܥܳܠܡܺܝܢ ܐܰܡܺܝܢ܀

ܟܳܗܢܳܐ: ܒܰܐܘܳܢ̈ܶܐ ܕܟܺܐܢ̈ܶܐ ܘܡܰܫ̈ܟܢܶܐ ܕܙܰܕܺܝ̈ܩܶܐ: ܘܚܰܓܳܐ ܕܰܓܒܰܝ̈ܳܐ ܗܳܢܽܘܢ ܕܡܶܢ ܥܳܠܰܡ ܫܦܰܪܘ ܠܳܟ. ܐܰܫܪܳܐ ܡܳܪܝ ܘܰܐܢܺܝܚ ܒܰܡܪܰܚܡܳܢܽܘܬܳܟ: ܠܥܰܒܕܳܟ (ܦܠܢ) ܕܰܥܢܰܕ ܘܫܰܢܺܝ ܠܘܳܬܳܟ ܒܰܐܘܳܢ̈ܶܐ ܕܰܢܝܳܚܳܐ ܐܰܝܟܳܐ ܕܩܰܕܺܝ̈ܫܶܐ ܚܳܕܶܝܢ. ܘܥܰܡܗܽܘܢ ܘܒܰܝܢܳܬܗܽܘܢ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ. ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

ܡܫܰܡ̈ܫܳܢܶܐ: ܐܰܡܺܝܢ܀

ܡܙܡܘܪܐ܆ ܩܳܠܳܐ: ܩܽܘܩܰܠܝܽܘܢ ܬܠܺܝܬܳܝܳܐ

ܒܰܪܶܟܝ ܢܰܦܫܝ ܠܡܳܪܝܳܐ ܗ̄ ܘܟܽܠܗܽܘܢ ܓܰܪ̈ܡܰܝ ܠܰܫܡܶܗ ܩܰܕܺܝܫܳܐ܀

ܒܰܪܶܟܝ ܢܰܦܫܝ ܠܡܳܪܝܳܐ ܗ̄ ܘܠܳܐ ܬܶܛܥܶܝܢ ܟܽܠܗܽܘܢ ܦܽܘܪ̈ܥܳܢܰܘܗܝ܀

ܕܫܳܒܶܩ ܠܶܟܝ ܟܽܠܶܗ ܥܰܘܠܶܟܝ ܗ̄ ܘܡܰܐܣܶܐ ܟܽܠܗܽܘܢ ܟܺܐܒܰܝ̈ܟܝ܀

ܦܳܪܶܩ ܠܶܟܝ ܡܶܢ ܚܒܳܠܳܐ ܗ̄ ܡܣܰܡܶܟ ܠܶܟܝ ܒܛܰܝܒܽܘܬܳܐ ܘܰܒܪ̈ܰܚܡܶܐ܀

ܡܫܰܡ̈ܫܳܢܶܐ: ܒܰܪܶܟܡܳܪܝ.

ܟܳܗܢܳܐ: ܫܽܘܒܚܳܐ ܠܰܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ܀

ܡܫܰܡ̈ܫܳܢܶܐ: ܡܶܢ ܥܳܠܰܡ ܘܰܥܕܰܡܳܐ ܠܥܳܠܰܡ ܥܳܠܡܺܝܢ ܐܰܡܺܝܢ.

ܥܶܩܒܳܐ

ܪܰܗܒܽܘܢܳܐ ܕܚܰܝ̈ܶܐ ܚܰܕ̈ܬܶܐ: ܝܰܗܒ ܦܳܪܽܘܩܰܢ ܠܰܡܗܰܝ̈ܡܢܶܐ. ܕܡܶܢ ܡܰܘܬܳܐ ܠܚܰܝ̈ܶܐ ܢܫܰܢܽܘܢ: ܒܝܰܕ ܦܰܓܪܶܗ ܘܰܕܡܶܗ ܕܰܢܣܰܒܘ. ܛܽܘܒܳܐ ܠܥܰܢܺܝ̈ܕܶܐ ܕܰܐܟܠܽܘܗܝ: ܕܗܽܘܝܽܘ ܡܢܰܚܶܡ ܠܗܽܘܢ܀

ܡܫܰܡ̈ܫܳܢܶܐ: ܣܛܳܘܡܶܢ ܩܰܐܠܳܘܣ ܩܽܘܪܝܶܐܠܶܝܣܳܘܢ.

ܚܽܘܣܳܝܳܐ

ܟܳܗܢܳܐ: ܢܨܰܠܶܐ ܟܽܠܰܢ ܪ̈ܰܚܡܶܐ ܘܰܚܢܳܢܳܐ ܡܶܢ ܡܳܪܝܳܐ ܢܶܒܥܶܐ ܡܳܪܝܳܐ ܡܪܰܚܡܳܢܳܐ ܘܪܰܚܶܡܥܠܰܝܢ ܘܥܰܕܰܪܰܝܢ. ܬܶܫܒܽܘܚܬܳܐ ܘܬܰܘܕܺܝܬܳܐ ܘܗܶܕܪܳܐ ܘܩܽܘܠܳـܣܳܐ ܘܪܽܘܡܪܳܡܳܐ ܛܳܒܳܐ ܕܠܳܐ ܒܳܛܶܠ܇ ܐܰܡܺܝܢܳܐܺܝܬ ܒܟܽܠܙܒܰܢ ܘܰܒܟܽܠܥܶܕܳܢ ܢܶܫܬܘܶܐ ܕܢܰܣܶܩ܀

ܦܪܽܘܡܝܽܘܢ

ܬܶܫܒܽܘܚܬܳܐ ܠܗܰܘ ܚܰܝܳܐ ܕܡܺܝܬ ܒܰܒܣܰܪ ܘܰܒܡܰܘܬܶܗ ܐܰܚܺܝ ܠܟܽܠܗܽܘܢ ܫܟܺܝ̈ܒܶܐ. ܗܰܘ ܕܰܡܡܺܝܬ ܘܡܰܚܶܐ ܘܡܰܚܶܬ ܠܰܫܝܽܘܠ ܘܡܰܣܶܩ: ܠܗܰܘ ܕܒܺܐܝ̈ܕܰܘܗܝ ܐܶܢܶܝܢ ܢܰܦ̈ܫܳܬܳܐ ܘܪ̈ܽܘܚܳܬܳܐ ܕܟܽܠ ܒܣܰܪ. ܕܠܶܗ ܝܳܐܶܐ ܫܽܘܒܚܳܐ ܘܺܐܝܩܳܪܳܐ ܒܗܳܢܳܐ ܥܶܕܳܢܳܐ ܕܰܢܝܳܚܬܳܐ ܕܥܰܒܕܶܗ: ܘܰܒܟܽܠܗܽܘܢ ܥܺܐܕ̈ܶܐ ܘܥܶܕܳܢ̈ܶܐ ܘܫܳܥ̈ܶܐ ܘܙܰܒ̈ܢܶܐ ܘܟܽܠܗܽܘܢ ܝܰܘ̈ܡܳܬܳܐ ܕܚܰܝܰܝ̈ܢ ܠܥܳܠܡܺܝܢ܀

ܡܫܰܡ̈ܫܳܢܶܐ: ܐܰܡܺܝܢ܀

ܣܶܕܪܳܐ

ܡܫܺܝܚܳܐ ܐܰܠܳܗܳܐ ܕܺܝܠܰܢ ܒܫܳܥܬܳܐ ܡܳܪܝ ܕܕܳܢܰܚ ܐܰܢ̱ܬ ܥܰܠ ܥܢܳܢܰܝ̈ ܫܡܰܝܳܐ: ܘܫܳܩܠܺܝܢ ܓܰܒܪܺܐܶܝܠ ܘܡܺܝܟܳܐܶܝܠ ܩܰܪ̈ܢܳܬܳܐ ܩܕܳܡܰܝܟ. ܘܦܳܩܥܺܝܢ ܫܽܘ̈ܥܶܐ: ܘܡܶܨܛܰܪܶܝܢ ܩܰܒܪ̈ܶܐ: ܘܩܳܝܡܺܝܢ ܡܺܝ̈ܬܶܐ: ܘܚܳܫܶܟ ܫܶܡܫܳܐ: ܘܛܳܫܶܐ ܣܰܗܪܳܐ: ܘܥܳܡܛܺܝܢ ܟܰܘܟ̈ܒܶܐ: ܘܡܶܬܓܕܶܕ ܢܰܘܠܶܗ ܕܥܳܠܡܳܐ: ܘܡܶܬܦܰܣܩܳܐ ܡܶܫܬܺܝܬܳܐ ܕܒܶܪ̈ܝܳܬܳܐ: ܘܡܶܬܟܰܪܟܳܐ ܫܡܰܝܳܐ ܐܰܝܟ ܡܓܰܠܬܳܐ ܘܗܳܘܝܳܐ ܐܰܪܥܳܐ ܬܽܘܗ ܘܒܽܘܗ. ܐܺܝܢ ܡܪܰܚܡܳܢܳܐ ܡܳܪܰܢ ܝܶܫܽܘܥ ܡܫܺܝܚܳܐ ܒܗܰܘ ܥܶܕܳܢܳܐ ܕܚܺܝܠܳܐ ܘܰܒܗܳܝ ܫܳܥܬܳܐ ܕܦܳܣܺܝ̈ܩܳܬܳܐ: ܚܽܘܣ ܥܰܠ ܥܰܒܕܳܐ ܕܺܝܠܳܟ (ܦܠܢ): ܘܠܳܐ ܬܶܥܽܘܠ ܠܕܺܝܢܳܐ ܥܰܡܶܗ ܡܶܛܽܠ ܕܛܳܒܳܐ ܐܺܝܬܰܝܟ ܘܪܳܚܶܡ ܐ̱ܢܳܫ̈ܳܐ. ܘܠܳܟ ܫܽܘܒܚܳܐ ܘܬܰܘܕܺܝܬܳܐ ܡܰܣܩܺܝܢܰܢ: ܘܠܰܐܒܽܘܟ ܘܰܠܪܽܘܚܳܟ ܩܰܕܺܝܫܳܐ. ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ. ܒܰܪܶܟܡܳܪܝ܀

ܟܳܗܢܳܐ: ܡܶܢ ܐܰܠܳܗܳܐ ܢܩܰܒܶܠ ܚܽܘܣܳܝܳܐ ܕܚܰܘ̈ܒܶܐ ܘܫܽܘܒܩܳܢܳܐ ܕܰܚ̈ܛܳܗܶܐ ܒܰܬܪ̈ܰܝܗܽܘܢ ܥܳܠ̈ܡܶܐ ܠܥܳܠܰܡ ܥܳܠ̈ܡܺܝܢ ܐܰܡܺܝܢ܀

ܩܳܠܳܐ: ܠܳܟ ܡܳܪܝܳܐ ܩܳܪܶܝܢܰܢ

ܒܪܶܗ ܕܰܐܠܳܗܳܐ ܚܽܘܣ ܥܠܰܝ ܐܰܝܟ ܛܰܝܒܽܘܬܳܟ: ܡܳܐ ܕܡܶܬܓܰܠ̈ܝܳܢ ܟܰܣ̈ܝܳܬܳܐ ܕܟܽܠܗܽܘܢ ܒܢܰܝ̈ܢܳܫܳܐ. ܚܛܳܗ̈ܶܐ ܕܣܶܥܪܶܬ ܡܶܢ ܛܰܠܝܽܘܬܝ ܠܳܐ ܬܶܬܕܟܰܪ ܠܺܝ: ܐܶܠܳܐ ܐܰܝܟ ܣܽܘܓܳܐܐ ܕܪ̈ܰܚܡܰܝܟ ܡܳܪܰܢ ܐܶܬܕܰܟܪܰܝܢܝ. ܠܳܐ ܬܶܡܢܶܝܢܝ ܥܰܡ ܥܳܒ̈ܕܰܝ ܥܰܘܠܳܐ ܐܶܠܳܐ ܥܰܡ ܥܳܒ̈ܕܰܝ ܨܶܒܝܳܢܳܟ: ܘܶܐܣܰܒ ܫܽܘܒܩܳܢܳܐ ܘܶܐܩܥܶܐ ܠܳܟ ܫܽܘܒܚܳܐ ܡܳܪܝܳܐ܀

ܫܽܘܒܚܳܐ: ܥܝܳܕܳܐ ܐܺܝܬ ܗܘܳܐ ܠܟܺܐܢ̈ܶܐ ܡܶܢ ܫܽܘܪܳܝܳܐ: ܕܠܰܬܠܳܬܳܐ ܝܰܘܡܺܝ̈ܢ ܢܣܺܝܡܽܘܢ ܒܶܣ̈ܡܶܐ ܠܥܰܢܺܝܕܳܐ. ܘܟܰܕ ܡܺܝܬ ܡܳܪܰܢ ܝܶܫܽܘܥ ܘܶܐܬܬܣܺܝܡ ܒܩܰܒܪܳܐ: ܘܶܐܬܥܰܦܺܝ ܒܪܽܘܚܳܐ ܕܩܽܘܕܫܳܐ ܘܡܶܢ ܥܺܝܪ̈ܶܐ ܘܐ̱ܢܳܫ̈ܳܐ. ܣܳܡܘ ܗܘܰܘ ܠܶܗ ܒܶܣ̈ܡܶܐ ܠܗܰܘ ܚܰܝܳܐ: ܕܗܽܘ ܓܰܒܠܶܗ ܠܳܐܕܳܡ ܡܶܢ ܥܰܦܪܳܐ: ܘܰܠܥܰܒܕܳܟ ܕܣܳܡܢܰܢ ܒܶܣ̈ܡܶܐ ܐܰܢܺܝܚ ܒܛܰܝܒܽܘܬܳܟ܀

ܙܽܘܡܳܪܳܐ:

ܐܳܘ ܟܡܳܐ ܡܰܪܺܝܪ ܟܳܣܳܐ ܕܡܰܘܬܳܐ ܕܰܡܙܰܓ ܐܳܕܳܡ ܠܟܽܠܗܽܘܢ ܝܰܠܕܰܘ̈ܗܝ ܗ̄܀

ܩܕܳܡ ܫܠܺܝܚܳܐ
ܒܩ̄: ܛܽܘܒܰܝܟܝ ܥܺܕܬܳܐ

ܦܰܘܠܳܘܣ ܫܠܺܝܚܳܐ ܛܽܘܒܳܢܳܐ ܫܶܡܥܶܬ̣ ܕܳܐܡܰܪ: ܥܰܠ ܐܰܝܠܶܝܢ ܕܕܳܡܟܺܝܢ ܐܰܚܰܝ̈: ܨܳܒܶܐ ܐܢܳܐ ܕܠܳܐ ܬܶܟܪܶܐ ܠܟܽܘܢ: ܕܰܒܩܳܠ ܩܰܪܢܳܐ ܡܶܢ ܪܰܘܡܳܐ: ܩܳܝܡܺܝܢ ܟܽܠܗܽܘܢ ܥܰܢܺܝ̈ܕܶܐ: ܠܳܒܶܫ ܗܳܢܳܐ ܕܡܶܬܚܰܒܰܠ: ܠܰܕܠܳܐ ܒܳܠܳܐ ܘܡܶܬܚܰܒܰܠ: ܕܪܰܗܒܽܘܢܳܐ ܕܚܰܝ̈ܶܐ ܩܰܒܶܠ: ܦܰܓܪܶܗ ܘܰܕܡܶܗ ܕܰܡܫܺܝܚܳܐ܀

ܩܶܪ̈ܝܳܢܶܐ
ܡܶܢ ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܩܳܘܪ̈ܺܝܢܬܳܝܶܐ ܐ
ܝܗ: ܢܢ ـ ܢܚ 1Corinthians 15:50-58

ܗܳܕܶܐ ܕܶܝܢ ܐܳܡܰܪ ܐ̱ܢܳܐ ܐܰܚܰܝ̈܆ ܕܒܶܣܪܳܐ ܘܰܕܡܳܐ ܡܰܠܟܽܘܬܳܐ ܕܰܫܡܰܝܳܐ ܠܡܺܐܪܰܬ ܠܳܐ ܡܶܫܟܚܺܝܢ. ܘܠܳܐ ܚܒܳܠܳܐ ܝܳܪܶܬ ܠܳܐ ܡܶܬܚܰܒܠܳܢܽܘܬܳܐ܀ ܗܳܐ ܐܳܡܰܪ ܐ̱ܢܳܐ ܠܟܽܘܢ ܐ̱ܪܳܙܳܐ. ܠܰܘ ܟܽܠܰܢ ܢܶܕܡܰܟ܆ ܟܽܠܰܢ ܕܶܝܢ ܢܶܬܚܰܠܰܦ܇ ܚܰܪܺܝܦܳܐܺܝܬ ܐܰܝܟ ܪܦܳܦ ܥܰܝܢܳܐ ܒܩܰܪܢܳܐ ܐ̱ܚܪܳܝܬܳܐ ܟܰܕ ܬܶܩܪܶܐ܆ ܘܰܢܩܽܘܡܽܘܢ ܡܺܝ̈ܬܶܐ ܕܠܳܐ ܚܒܳܠܳܐ. ܘܰܚܢܰܢ ܢܶܬܚܰܠܰܦ .ܥܬܺܝܕ ܗ̱ܘ ܓܶܝܪ ܗܳܢܳܐ ܕܡܶܬܚܰܒܰܠ܁ ܕܢܶܠܒܰܫ ܠܳܐ ܡܶܬܚܰܒܠܳܢܽܘܬܳܐ܇ ܘܗܳܢܳܐ ܕܡܳܐܶܬ܁ ܕܢܶܠܒܰܫ ܠܳܐ ܡܳܝܽܘܬܽܘܬܳܐ .ܡܳܐ ܕܠܳܒܶܫ ܕܶܝܢ ܗܳܢܳܐ ܕܡܶܬܚܰܒܰܠ ܠܳܐ ܡܶܬܚܰܒܠܳܢܽܘܬܳܐ܇ ܘܗܳܢܳܐ ܕܡܳܐܶܬ ܠܳܐ ܡܳܝܽܘܬܽܘܬܳܐ܆ ܗܳܝܕܶܝܢ ܬܶܗܘܶܐ ܡܶܠܬܳܐ ܗܳܝ ܕܰܟܬܺܝܒܳܐ܇ ܕܶܐܬܒܠܰܥ ܡܰܘܬܳܐ ܒܙܳܟܽܘܬܳܐ .ܐܰܝܟܰܘ ܥܽܘܩܣܳܟ܁ ܡܰܘܬܳܐ؟ ܐܰܘ ܐܰܝܟܳܐ ܗ̱ܝ ܙܳܟܽܘܬܶܟܝ ܫܝܽܘܠ؟ ܥܽܘܩܣܶܗ ܕܶܝܢ ܕܡܰܘܬܳܐ ܚܛܺܝܬܳܐ ܗ̱ܝ. ܘܚܰܝܠܳܐ ܕܰܚܛܺܝܬܳܐ ܢܳܡܽܘܣܰܐ ܗ̱ܘ .ܛܰܝܒܽܘ ܕܶܝܢ ܠܰܐܠܳܗܳܐ܆ ܕܝܰܗ̱ܒ ܠܰܢ ܙܳܟܽܘܬܳܐ ܒܝܰܕ ܡܳܪܰܢ ܝܶܫܽܘܥ ܡܫܺܝܚܳܐ܀ ܡܶܟܺܝܠ ܐܰܚܰܝ̈ ܘܚܰܒܺܝ̈ܒܰܝ܆ ܗܘܰܘ ܡܫܰܪܪܺܝܢ. ܘܠܳܐ ܬܶܗܘܽܘܢ ܡܶܬܬܙܺܝܥܺܝܢ܇ ܐܶܠܳܐ ܗܘܰܘ ܡܶܬܝܰܬܪܺܝܢ ܒܟܽܠܙܒܰܢ ܒܰܥܒܳܕܶܗ ܕܡܳܪܝܳܐ. ܟܰܕ ܝܳܕܥܺܝܢ ܐܢ̱ܬܽܘܢ܆ ܕܥܰܡܠܟܽܘܢ ܠܳܐ ܗ̱ܘܳܐ ܣܪܺܝܩ ܒܡܳܪܝܳܐ. ܒܰܪܶܟܡܳܪܝ܀

ܗܽܘܠܳܠܳܐ:

ܐܰܢܗܰܪ ܐܰܦܰܝ̈ܟ ܥܰܠ ܥܰܒܕܳܟ. ܘܰܦܪܽܘܩܳܝܗܝ ܒܝܰܕ ܛܰܝܒܽܘܬܳܟ ܗ̄܀

ܡܫܰܡܫܳܢܳܐ: ܒܰܪܶܟܡܳܪܝ. ܥܰܡ ܫܶܠܝܳܐ ܘܕܶܚܠܬܳܐ ܘܢܰܟܦܽܘܬܳܐ ܢܨܽܘܬ ܘܢܶܫܡܰܥ ܠܰܣܒܰܪܬܳܐ ܕܡ̈ܶܠܶܐ ܚܰܝ̈ܳܬܳܐ ܕܶܐܘܰܢܓܶܠܺـܝܳܘܢ ܩܰܕܺܝܫܳܐ ܕܡܳܪܰܢ ܝܶܫܽܘܥ ܡܫܺܝܚܳܐ ܕܡܶܬܩܪܶܐ ܥܠܰܝܢ܀

ܟܳܗܢܳܐ: ܫܠܳـܡܳܐ ܠܟܽܠܟܽܘܢ܀

ܡܫܰܡܫܳܢܳܐ: ܐܰܫܘܳܐ ܠܰܢ ܡܳܪܝܳܐ ܐܰܠܳܗܳܐ ܘܥܰܡ ܪܽܘܚܳܐ ܕܺܝܠܳܟ܀

ܟܳܗܢܳܐ: ܐܶܘܰܢܓܶܠܺـܝܳܘܢ ܩܰܕܺܝܫܳܐ ܕܡܳܪܰܢ ܝܶܫܽܘܥ ܡܫܺܝܚܳܐ܆ ܣܒܰܪܬܳܐ (ܟܳܪܽܘܙܽܘܬܳܐ) ܡܰܚܝܳܢܺܝܬܳܐ ܡܶܢ ܠܽܘܩܳܐ ܡܣܰܒܪܳܢܳܐ ܕܰܡܣܰܒܰܪ (ܡܰܬܰܝ ܫܠܺܝܚܳܐ ܕܡܰܟܪܶܙ) ܚܰܝ̈ܳܐ ܘܦܽܘܪܩܳܢܳܐ ܠܥܳܠܡܳܐ܀

ܡܫܰܡܫܳܢܳܐ: ܒܪܺܝܟ ܕܶܐܬܳܐ ܘܰܥܬܺܝܕ ܕܢܺܐܬܶܐ. ܬܶܫܒ̈ܚܳܢ ܠܫܳܠܽܘܚܶܗ ܕܫܰܠܚܶܗ ܠܦܽܘܪܩܳܢܰܢ. ܘܥܰܠ ܟܽܠܰܢ ܪ̈ܰܚܡܰܘܗ̱ܝ ܠܥܳܠܡܺܝܢ܀

ܐܶܘܰܢܓܶܠܺـܝܳܘܢ ܡܶܢ ܠܽܘܩܳܐ ܡܣܰܒܪܳܢܳܐ
ܝܘ:ܝܛ - ܠܐ Luke 16:19-31

ܓܰܒܪܳܐ ܕܶܝܢ ܚܰܕ ܥܰܬܺܝܪܳܐ ܐܺܝܬ ܗ̱ܘܳܐ܆ ܘܠܳܒܶܫ ܗ̱ܘܳܐ ܒܽܘܨܳܐ ܘܰܐܪܓܘܳܢܳܐ. ܘܟܽܠܝܽܘܡ ܡܶܬܒܰܣܰܡ ܗ̱ܘܳܐ ܓܰܐܝܳܐܺܝܬ. ܘܡܶܣܟܺܢܳܐ ܚܰܕ ܐܺܝܬ ܗ̱ܘܳܐ ܕܰܫܡܶܗ ܠܳܥܳܙܳܪ. ܘܰܪܡܶܐ ܗ̱ܘܳܐ ܠܘܳܬ ܬܰܪܥܶܗ ܕܗܰܘ ܥܰܬܺܝܪܳܐ. ܟܰܕ ܡܡܰܚܰܝ ܒܫܽܘܚ̈ܢܶܐ. ܘܡܶܬܝܰܐܰܒ ܗ̱ܘܳܐ ܕܢܶܡܠܶܐ ܟܰܪܣܶܗ ܡܶܢ ܦܰܪ̈ܬܽܘܬܶܐ ܕܢܳܦܠܺܝܢ ܡܶܢ ܦܳܬܽܘܪܶܗ ܕܗܰܘ ܥܰܬܺܝܪܳܐ. ܐܶܠܳܐ ܐܳܦ ܟܰܠܒ̈ܶܐ ܐܳܬܶܝܢ ܗ̱ܘܰܘ ܡܠܰܚܟܺܝܢ ܫܽܘܚ̈ܢܰܘܗ̱ܝ܀ ܗܘܳܐ ܕܶܝܢ ܘܡܺܝܬ ܗܰܘ ܡܶܣܟܺܢܳܐ܆ ܘܰܐܘܒܠܽܘܗ̱ܝ ܡ̈ܰܠܰܐܟܶܐ ܠܥܽܘܒܶܗ ܕܰܐܒܪܳܗܳܡ. ܐܳܦ ܗܰܘ ܕܶܝܢ ܥܰܬܺܝܪܳܐ ܡܺܝܬ. ܘܶܐܬܩܒܰܪ. ܘܟܰܕ ܡܶܫܬܰܢܰܩ ܒܰܫܝܽܘܠ܆ ܐܰܪܺܝܡ ܥܰܝ̈ܢܰܘܗ̱ܝ ܡܶܢ ܪܽܘܚܩܳܐ܆ ܘܰܚܙܳܐ ܠܰܐܒܪܳܗܳܡ ܘܰܠܠܳܥܳܙܳܪ ܒܥܽܘܒܶܗ. ܘܰܩܪܳܐ ܒܩܳܠܳܐ ܪܳܡܳܐ ܘܶܐܡܰܪ. ܐܳܒܝ ܐܰܒܪܳܗܳܡ ܐܶܬܪܰܚܰܡ ܥܠܰܝ! ܘܫܰܕܰܪ ܠܠܳܥܳܙܳܪ. ܕܢܶܨܒܽܘܥ ܪܺܝܫ ܨܶܒܥܶܗ ܒܡܰܝ̈ܳܐ ܘܰܢܪܰܛܶܒ ܠܺܝ ܠܶܫܳܢܝ܇ ܕܗܳܐ ܡܶܫܬܰܢܰܩ ܐ̱ܢܳܐ ܒܫܰܠܗܶܒܺܝܬܳܐ ܗܳܕܶܐ. ܐܳܡܰܪ ܠܶܗ ܐܰܒܪܳܗܳܡ. ܒܶܪܝ܆ ܐܶܬܕܰܟِܪ ܕܩܰܒܶܠܬ ܛܳܒ̈ܳܬܳܟ ܒܚܰܝܰܝ̈ܟ. ܘܠܳܥܳܙܳܪ ܒܺܝ̈ܫܳܬܶܗ. ܘܗܳܫܳܐ ܗܳܐ ܡܶܬܬܢܺܝܚ ܗܳܪܟܳܐ. ܘܰܐܢ̱ܬ ܡܶܫܬܰܢܰܩ. ܘܥܰܡ ܗܳܠܶܝܢ ܟܽܠܗܶܝܢ܆ ܗܰܘܬܳܐ ܪܰܒܬܳܐ ܣܺܝܡܳܐ ܒܰܝ̈ܢܰܝܢ ܘܰܠܟܽܘܢ. ܕܰܐܝܠܶܝܢ ܕܨܳܒܶܝܢ ܡܶܟܳܐ ܕܢܶܥܒܪܽܘܢ ܠܘܳܬܟܽܘܢ. ܠܳܐ ܢܶܫܟܚܽܘܢ. ܘܳܐܦܠܳܐ ܕܡܶܢ ܬܰܡܳܢ ܢܶܥܒܪܽܘܢ ܠܘܳܬܰܢ܀ ܐܳܡܰܪ ܠܶܗ. ܡܳܕܶܝܢ ܒܳܥܶܐ ܐ̱ܢܳܐ ܡܶܢܳܟ ܐܳܒܝ܆ ܕܰܬܫܰܕܪܺܝܘܗ̱ܝ ܠܒܶܝܬ ܐܳܒܝ. ܚܰܡܫܳܐ ܓܶܝܪ ܐܰܚܺܝ̈ܢ ܐܺܝܬ ܠܺܝ. ܢܺܐܙܰܠ ܢܣܰܗܶܕ ܐܶܢܽܘܢ܆ ܕܠܳܐ ܐܳܦ ܗܶܢܽܘܢ ܢܺܐܬܽܘܢ ܠܕܽܘܟܬܳܐ ܗܳܕܶܐ ܕܬܰܫܢܺܝܩܳܐ. ܐܳܡܰܪ ܠܶܗ ܐܰܒܪܳܗܳܡ. ܐܺܝܬ ܠܗܽܘܢ ܡܽܘܫܶܐ ܘܰܢܒܺܝ̈ܶܐ܆ ܢܶܫܡܥܽܘܢ ܐܶܢܽܘܢ. ܗܽܘ ܕܶܝܢ ܐܶܡܰܪ ܠܶܗ. ܠܳܐ ܐܳܒܝ ܐܰܒܪܳܗܳܡ. ܐܶܠܳܐ ܐܶܢ ܐ̱ܢܳܫ ܡܶܢ ܡܺܝ̈ܬܶܐ ܢܺܐܙܰܠ ܠܘܳܬܗܽܘܢ. ܬܳܝܒܺܝܢ. ܐܳܡܰܪ ܠܶܗ ܐܰܒܪܳܗܳܡ. ܐܶܢ ܠܡܽܘܫܶܐ ܘܠܰܢܒܺܝ̈ܶܐ ܠܳܐ ܫܳܡܥܺܝܢ܆ ܐܳܦ ܠܳܐ ܐܶܢ ܐ̱ܢܳܫ ܡܶܢ ܡܺܝ̈ܬܶܐ ܢܩܽܘܡ. ܡܗܰܝܡܢܺܝܢ ܠܶܗ. ܒܰܪܶܟܡܳܪܝ܀

ܐܶܘܰܢܓܶܠܺـܝܳܘܢ ܡܶܢ ܡܰܬܰܝ ܫܠܺܝܚܳܐ
ܟܗ:ܠܐ - ܡܘ Matthew 25:31-46

ܡܳܐ ܕܳܐܬܶܐ ܕܶܝܢ ܒܪܶܗ ܕܐ̱ܢܳܫܳܐ ܒܫܽܘܒܚܶܗ: ܘܟܽܠܗܽܘܢ ܡܰܠܰܐܟܰܘ̈ܗ̱ܝ ܩܰܕܺܝ̈ܫܶܐ ܥܰܡܶܗ܆ ܗܳܝܕܶܝܢ ܢܶܬܶܒ ܥܰܠ ܬܪܽܘܢܽܘܣ ܕܫܽܘܒܚܶܗ. ܘܢܶܬܟܰܢܫܽܘܢ ܩܕܳܡܰܘܗ̱ܝ ܟܽܠܗܽܘܢ ܥܰܡ̱̈ܡܶܐ. ܘܰܢܦܰܪܶܫ ܐܶܢܽܘܢ ܚܰܕ ܡܶܢ ܚܰܕ. ܐܰܝܟ ܪܳܥܝܳܐ ܕܰܡܦܰܪܶܫ ܥܶܪ̈ܒܶܐ ܡܶܢ ܓܕܰܝ̈ܳܐ. ܘܰܢܩܺܝܡ ܥܶܪ̈ܒܶܐ ܡܶܢ ܝܰܡܺܝܢܶܗ܆ ܘܰܓܕܰܝ̈ܳܐ ܡܶܢ ܣܶܡܳܠܶܗ܀ ܗܳܝܕܶܝܢ ܢܺܐܡܰܪ ܡܰܠܟܳܐ ܠܗܳܢܽܘܢ ܕܡܶܢ ܝܰܡܺܝܢܶܗ. ܬܰܘ ܒܪ̈ܺܝܟܰܘܗ̱ܝ ܕܳܐܒܝ. ܝܺܪܰܬܘ ܡܰܠܟܽܘܬܳܐ܇ ܕܰܥܬܺܝܕܳܐ ܗ̱ܘܳܬ ܠܟܽܘܢ ܡܶܢ ܩܕܳܡ ܬܰܪ̈ܡܝܳܬܶܗ ܕܥܳܠܡܳܐ. ܟܶܦܢܶܬ ܓܶܝܪ. ܘܝܰܗ̱ܒܬܽܘܢ ܠܺܝ ܠܡܶܐܟܰܠ. ܘܰܨܗܺܝܬ. ܘܰܐܫܩܺܝܬܽܘܢܳܢܝ. ܐܰܟܣܢܳܝܳܐ ܗ̱ܘܺܝܬ ܘܟܰܢܶܫܬܽܘܢܳܢܝ. ܥܰܪܛܶܠܳܝܳܐ ܗ̱ܘܺܝܬ. ܘܟܰܣܺܝܬܽܘܢܳܢܝ. ܟܪܺܝܗ ܗ̱ܘܺܝܬ. ܘܰܣܥܰܪܬܽܘܢܳܢܝ. ܘܒܶܝܬ ܐܰܣܺܝܪ̈ܶܐ ܗ̱ܘܺܝܬ. ܘܶܐܬܰܝܬܽܘܢ ܠܘܳܬܝ܀ ܗܳܝܕܶܝܢ ܢܺܐܡܪܽܘܢ ܠܶܗ ܗܳܢܽܘܢ ܙܰܕܺܝ̈ܩܶܐ. ܡܳܪܰܢ ܐܶܡܰܬܝ ܚܙܰܝܢܳܟ ܕܰܟܦܶܢ ܐܰܢ̱ܬ. ܘܬܰܪܣܺܝܢܳܟ؟ ܐܰܘ ܕܰܨܗܶܐ ܐܰܢ̱ܬ. ܘܰܐܫܩܺܝܢܳܟ؟ ܘܶܐܡܰܬܝ ܚܙܰܝܢܳܟ ܕܰܐܟܣܢܳܝܳܐ ܐܰܢ̱ܬ ܘܟܰܢܶܫܢܳܟ؟ ܐܰܘ ܕܥܰܪܛܶܠܳܝ ܐܰܢ̱ܬ ܘܟܰܣܺܝܢܳܟ؟ ܘܶܐܡܰܬܝ ܚܙܰܝܢܳܟ ܟܪܺܝܗܳܐ. ܐܰܘ ܒܶܝܬ ܐܰܣܺܝܪ̈ܶܐ. ܘܶܐܬܰܝܢ ܠܘܳܬܳܟ؟ ܘܰܥܢܳܐ ܡܰܠܟܳܐ. ܘܶܐܡܰܪ ܠܗܽܘܢ. ܐܰܡܺܝܢ ܐܳܡܰܪ ܐ̱ܢܳܐ ܠܟܽܘܢ܆ ܕܰܟܡܳܐ ܕܰܥܒܰܕܬܽܘܢ ܠܚܰܕ ܡܶܢ ܗܳܠܶܝܢ ܐܰܚܰܝ̈ ܙܥܽܘܪ̈ܶܐ ܠܺܝ ܗ̱ܘ ܥܒܰܕܬܽܘܢ! ܗܳܝܕܶܝܢ ܢܺܐܡܰܪ ܐܳܦ ܠܗܳܢܽܘܢ ܕܡܶܢ ܣܶܡܳܠܶܗ. ܙܶܠܘ ܠܟܽܘܢ ܡܶܢܝ ܠܺܝ̈ܛܶܐ ܠܢܽܘܪܳܐ ܕܰܠܥܳܠܰܡ ܗܳܝ ܕܰܡܛܰܝܒܳܐ ܠܳܐܟܶܠܩܰܪܨܳܐ. ܘܰܠܡܰܠܰܐܟܰܘ̈ܗ̱ܝ. ܟܶܦܢܶܬ ܓܶܝܪ ܘܠܳܐ ܝܰܗ̱ܒܬܽܘܢ ܠܺܝ ܠܡܶܐܟܰܠ. ܘܰܨܗܺܝܬ ܘܠܳܐ ܐܰܫܩܺܝܬܽܘܢܳܢܝ. ܘܰܐܟܣܢܳܝܳܐ ܗ̱ܘܺܝܬ ܘܠܳܐ ܟܰܢܶܫܬܽܘܢܳܢܝ. ܘܥܰܪܛܶܠܳܝܳܐ ܗ̱ܘܺܝܬ ܘܠܳܐ ܟܰܣܺܝܬܽܘܢܳܢܝ. ܘܰܟܪܺܝܗܳܐ ܗ̱ܘܺܝܬ ܘܒܶܝܬ ܐܰܣܺܝܪ̈ܶܐ ܗ̱ܘܺܝܬ ܘܠܳܐ ܣܥܰܪܬܽܘܢܳܢܝ. ܗܳܝܕܶܝܢ ܢܶܥܢܽܘܢ ܐܳܦ ܗܶܢܽܘܢ ܘܢܺܐܡܪܽܘܢ. ܡܳܪܰܢ ܐܶܡܰܬܝ ܚܙܰܝܢܳܟ ܟܰܦܢܳܐ ܐܰܘ ܨܰܗܝܳܐ܇ ܐܰܘ ܐܰܟܣܢܳܝܳܐ. ܐܰܘ ܥܰܪܛܶܠܳܝܳܐ܇ ܐܰܘ ܟܪܺܝܗܳܐ. ܐܰܘ ܒܶܝܬ ܐܰܣܺܝܪ̈ܶܐ܇ ܘܠܳܐ ܫܰܡܶܫܢܳܟ؟ ܗܳܝܕܶܝܢ ܢܶܥܢܶܐ. ܘܢܺܐܡܰܪ ܠܗܽܘܢ. ܐܰܡܺܝܢ ܐܳܡܰܪ ܐ̱ܢܳܐ ܠܟܽܘܢ ܕܰܟܡܳܐ ܕܠܳܐ ܥܒܰܕܬܽܘܢ ܠܚܰܕ ܡܶܢ ܗܳܠܶܝܢ ܙܥܽܘܪ̈ܶܐ܆ ܐܳܦ ܠܳܐ ܠܺܝ ܥܒܰܕܬܽܘܢ. ܘܢܺܐܙܽܠ̱ܘܢ ܗܳܠܶܝܢ ܠܬܰܫܢܺܝܩܳܐ ܕܰܠܥܳܠܰܡ. ܘܙܰܕܺܝ̈ܩܶܐ ܠܚܰܝ̈ܶܐ ܕܰܠܥܳܠܰܡ. ܒܰܪܶܟܡܳܪܝ܀

ܒܳܥܽܘܬܳܐ ܕܡܳܪܝ ܐܰܦܪܶܝܡ

ܡܳܪܰܢ ܐܶܬܪܰܚܰܡܥܠܰܝܢ: ܐܰܠܳܗܳܐ ܚܰܣܳܐ ܠܥܰܒܕܳܟ. ܘܰܐܩܺܝܡܳܝܗܝ ܡܶܢ ܝܰܡܺܝܢܳܟ: ܒܝܰܘܡܳܐ ܕܕܳܢܚܳܐ ܪܰܒܽܘܬܳܟ܀

ܐܳܘ ܪܳܚܡܶܗ ܕܡܺܝܬܳܐ ܕܰܫܟܶܒ: ܒܗܳܕܶܐ ܚܰܘܳܐ ܦܽܘܪܫܳܢܳܟ. ܠܳܐ ܬܶܥܒܶܕ ܐܶܒܠܳܐ ܪܰܒܳܐ: ܕܠܳܐ ܡܶܬܥܰܕܰܪ ܥܰܢܺܝܕܳܐ. ܨܠܽܘܬܳܐ ܩܰܪܶܒ ܠܰܐܠܳܗܳܐ: ܕܚܰܝ̈ܶܐ ܘܡܺܝ̈ܬܶܐ ܢܶܬܥܰܕܪܽܘܢ܀

ܘܡܳܪܝܳܐ ܕܚܳܙܶܐ ܦܽܘܪܫܳܢܳܟ: ܡܚܰܣܶܐ ܠܶܗ ܠܡܺܝܬܳܟ ܕܰܫܟܶܒ. ܣܺܝܡ ܥܽܘܗܕܳܢܶܗ ܒܶܝܬ ܩܽܘܕܫܳܐ: ܥܰܠ ܦܳܬܽܘܪܳܐ ܕܚܽܘܣܳܝܳܐ. ܒܠܰܚܡܳܐ ܘܚܰܡܪܳܐ ܙܰܗܝܳܐܺܝܬ: ܐ̱ܪܳܙܳܐ ܕܦܰܓܪܶܗ ܕܰܐܠܳܗܳܐ܀

ܡܳܪܰܢ ܐܶܬܪܰܚܰܡܥܠܰܝܢ: ܐܰܠܳܗܳܐ ܚܰܣܳܐ ܠܥܰܒܕܳܟ. ܘܰܐܩܺܝܡܳܝܗܝ ܡܶܢ ܝܰܡܺܝܢܳܟ: ܒܝܰܘܡܳܐ ܕܕܳܢܚܳܐ ܪܰܒܽܘܬܳܟ܀

ܚܽܘܬܳܡܳܐ

ܟܳܗܢܳܐ: ܡܳܪܝܳܐ ܐܰܠܳܗܳܐ ܗܰܘ ܕܰܒܦܽܘܩܕܳܢܳܟ ܐܰܝܬܺܝܬܳܢ ܠܚܰܝ̈ܶܐ ܗܳܠܶܝܢ: ܘܒܰܥܒܳܪ ܦܽܘܩܕܳܢܳܐ ܫܪܰܝܬ ܠܪܽܘܟܳܒܰܢ. ܘܗܳܫܳܐ ܡܩܰܪܒܺܝܢܰܢ ܠܳܟ ܨܠܰܘ̈ܳܬܳܐ ܘܒܳܥ̈ܘܳܬܳܐ ܘܬܰܟܫ̈ܦܳܬܳܐ ܚܠܳܦ ܥܰܒܕܳܟ (ܦܠܢ) ܕܰܫܟܶܒ ܥܰܠ ܣܰܒܪܳܟ ܒܗܰܝܡܳܢܽܘܬܳܐ ܕܰܫܪܳܪܳܐ. ܕܬܶܫܒܽܘܩ ܒܽܘܨܳܪ̈ܰܘܗܝ ܒܛܰܝܒܽܘܬܳܟ: ܘܰܬܢܺܝܚܺܝܘܗܝ ܒܰܐܘܳܢ̈ܶܐ ܕܰܢܝܳܚܳܐ: ܘܰܒܝܽܘܡ ܢܽܘܚܳܡܳܐ ܐܰܫܘܳܐ ܠܟܽܠܰܢ ܕܰܢܫܰܒܚܳܟ ܥܰܡ ܩܰܕܺܝ̈ܫܰܝܟ: ܡܫܺܝܚܳܐ ܣܰܒܪܳܐ ܕܢܰܦ̈ܫܳܬܰܢ. ܘܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܰܐܒܽܘܟ ܘܰܠܪܽܘܚܳܟ ܩܰܕܺܝܫܳܐ. ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

ܡܫܰܡ̈ܫܳܢܶܐ: ܐܰܡܺܝܢ

ܫܶܠܡܰܬ ܬܶܫܡܶܫܬܳܐ ܕܰܢܝܳܚܬܳܐ ܕܓܰܒܪ̈ܶܐ ܘܕܰܥܠܰܝ̈ܡܶܐ ܘܕܰܛܠܳܝ̈ܶܐ ܕܝܰܘܡܳܐ ܬܠܺܝܬܳܝܳܐ ܘܕܰܐܪܒܥܺܝܢ ܝܰܘ̈ܡܺܝܢ ܘܰܕܫܰܢ̱ܬܳܐ