ܬܶܫܡܶܫܬܳܐ ܕܰܢܝܳܚܬܳܐ ܕܢܶܫ̈ܶܐ ܘܕܰܥܠܰܝ̈ܡܳܬܳܐ ܘܕܰܛܠܳܝ̈ܳܬܳܐ ܕܝܰܘܡܳܐ ܬܠܺܝܬܳܝܳܐ ܘܕܰܐܪܒܥܺܝܢ ܝܰܘ̈ܡܺܝܢ ܘܰܕܫܰܢ̱ܬܳܐ

ܨܠܽܘܬܳܐ ܕܫܽܘܪܳܝܳܐ

ܟܳܗܢܳܐ: ܫܽܘܒܚܳܐ ܠܰܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ܀

ܡܫܰܡ̈ܫܳܢܶܐ: ܘܰܥܠܰܝܢ ܡܚܺܝ̈ܠܶܐ ܘܚܰܛܳܝ̈ܶܐ ܪ̈ܰܚܡܶܐ ܘܰܚܢܳܢܳܐ ܢܶܫܬܰܦܥܽܘܢ ܒܰܬܪ̈ܰܝܗܽܘܢ ܥܳܠ̈ܡܶܐ ܠܥܳܠܰܡ ܥܳܠܡܺܝܢ ܐܰܡܺܝܢ܀

ܟܳܗܢܳܐ: ܠܰܢܝܳܚܬܳܐ ܡܰܠܝܰܬ ܚܰܕܘ̈ܳܬܳܐ: ܘܠܰـܠܡܺܐܢܳܐ ܗܰܘ ܕܰܢܝܳܚܳܐ ܘܰܠܣܶܕܪ̈ܶܐ ܕܰܪ̈ܚܽܘܡܰܝܟ: ܘܰܠܓܽܘܕܰܝ̈ܗܽܘܢ ܕܢܰܨܺܝܚܰܝ̈ܟ: ܘܰܠܟܶܢܫܰܝ̈ܗܽܘܢ ܕܩܰܕܺܝ̈ܫܰܝܟ: ܬܶܫܬܘܶܐ ܚܳܬܰܢ (ܦܠܢܝܬ) ܕܦܶܪܫܰܬ ܡܶܢ ܒܰܝܢܳܬܰܢ. ܟܰܕ ܙܳܡܰܪ ܦܽܘܡܳܗ̇ ܫܽܘܒܚܳܐ ܘܠܶܫܳܢܳܗ̇ ܬܰܘܕܺܝܬܳܐ ܥܰܡ ܟܽܠܗܽܘܢ ܩܰܕܺܝ̈ܫܰܝܟ: ܡܳܪܰܢ ܘܰܐܠܳܗܰܢ ܠܥܳܠܡܺܝܢ܀

ܡܫܰܡ̈ܫܳܢܶܐ: ܐܰܡܺܝܢ܀

ܡܙܡܘܪܐ܆ ܩܳܠܳܐ: ܩܽܘܩܰܠܝܽܘܢ ܬܠܺܝܬܳܝܳܐ

ܒܰܪܶܟܝ ܢܰܦܫܝ ܠܡܳܪܝܳܐ ܗ̄ ܘܟܽܠܗܽܘܢ ܓܰܪ̈ܡܰܝ ܠܰܫܡܶܗ ܩܰܕܺܝܫܳܐ܀

ܒܰܪܶܟܝ ܢܰܦܫܝ ܠܡܳܪܝܳܐ ܗ̄ ܘܠܳܐ ܬܶܛܥܶܝܢ ܟܽܠܗܽܘܢ ܦܽܘܪ̈ܥܳܢܰܘܗܝ܀

ܕܫܳܒܶܩ ܠܶܟܝ ܟܽܠܶܗ ܥܰܘܠܶܟܝ ܗ̄ ܘܡܰܐܣܶܐ ܟܽܠܗܽܘܢ ܟܺܐܒܰܝ̈ܟܝ܀

ܦܳܪܶܩ ܠܶܟܝ ܡܶܢ ܚܒܳܠܳܐ ܗ̄ ܡܣܰܡܶܟ ܠܶܟܝ ܒܛܰܝܒܽܘܬܳܐ ܘܰܒܪ̈ܰܚܡܶܐ܀

ܡܫܰܡ̈ܫܳܢܶܐ: ܒܰܪܶܟܡܳܪܝ.

ܟܳܗܢܳܐ: ܫܽܘܒܚܳܐ ܠܰܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ܀

ܡܫܰܡ̈ܫܳܢܶܐ: ܡܶܢ ܥܳܠܰܡ ܘܰܥܕܰܡܳܐ ܠܥܳܠܰܡ ܥܳܠܡܺܝܢ ܐܰܡܺܝܢ.

ܥܶܩܒܳܐ ܒܩ̄: ܪܰܗܒܽܘܢܳܐ ܕܚܰܝ̈ܶܐ ܚܰܕ̈ܬܶܐ

ܠܰܙܒܺܝܢܰܝ̈ ܒܰܕܡܳܟ ܚܰܝܳܐ: ܘܰܠܒܺܝ̈ܫܰܝ ܡܰܥܡܽܘܕܺܝܬܳܐ. ܐܳܟ̣ܠܰܝ̈ ܦܰܓܪܳܟ ܩܰܕܺܝܫܳܐ: ܘܫܳܬܝܰܝ̈ ܠܰܕܡܳܟ ܡܚܰܣܝܳܢܳܐ. ܘܰܠܕܰܫܟܺܝܒܺܝܢ ܥܰܠ ܣܰܒܪܳܟ: ܗܘܺܝ ܠܗܽܘܢ ܡܚܰܣܝܳܢܳܐ܀

ܡܫܰܡ̈ܫܳܢܶܐ: ܣܛܳܘܡܶܢ ܩܰܐܠܳܘܣ ܩܽܘܪܝܶܐܠܶܝܣܳܘܢ.

ܚܽܘܣܳܝܳܐ

ܟܳܗܢܳܐ: ܢܨܰܠܶܐ ܟܽܠܰܢ ܪ̈ܰܚܡܶܐ ܘܰܚܢܳܢܳܐ ܡܶܢ ܡܳܪܝܳܐ ܢܶܒܥܶܐ ܡܳܪܝܳܐ ܡܪܰܚܡܳܢܳܐ ܘܪܰܚܶܡܥܠܰܝܢ ܘܥܰܕܰܪܰܝܢ. ܬܶܫܒܽܘܚܬܳܐ ܘܬܰܘܕܺܝܬܳܐ ܘܗܶܕܪܳܐ ܘܩܽܘܠܳـܣܳܐ ܘܪܽܘܡܪܳܡܳܐ ܛܳܒܳܐ ܕܠܳܐ ܒܳܛܶܠ܇ ܐܰܡܺܝܢܳܐܺܝܬ ܒܟܽܠܙܒܰܢ ܘܰܒܟܽܠܥܶܕܳܢ ܢܶܫܬܘܶܐ ܕܢܰܣܶܩ܀

ܦܪܽܘܡܝܽܘܢ

ܬܶܫܒܽܘܚܬܳܐ ܠܗܰܘ ܡܢܰܚܡܳܢܳܐ ܕܰܫܟܺܝ̈ܒܰܝ ܥܰܦܪܳܐ: ܘܰܡܟܰܢܶܫ ܐܶܢܽܘܢ ܡܶܢ ܐܰܪܒܰܥ ܦܶܢܝ̈ܳܬܶܗ ܕܥܳܠܡܳܐ. ܒܝܰܕ ܡܰܠܰܐܟܰܘ̈ܗܝ ܩܰܕܺܝ̈ܫܶܐ ܘܰܒܩܳܠܳܐ ܕܩܰܪܢܳܐ ܕܡܰܙܥܶܩ ܘܩܳܪܶܐ ܠܗܽܘܢ: ܕܬܰܘ ܠܕܺܝܢܳܐ ܘܰܠܚܽܘܫܒܳܢܳܐ. ܛܳܒܳܐ ܕܠܶܗ ܢܶܬܕܟܰܪ ܘܠܶܗ ܢܫܰܒܰܚ: ܒܗܳܢܳܐ ܥܶܕܳܢܳܐ ܕܰܢܝܳܚܬܳܐ ܕܰܐܡܬܶܗ: ܘܰܒܟܽܠܗܽܘܢ ܥܺܐܕ̈ܶܐ ܘܥܶܕܳܢ̈ܶܐ ܘܫܳܥ̈ܶܐ ܘܙܰܒ̈ܢܶܐ ܘܟܽܠܗܽܘܢ ܝܰܘ̈ܡܳܬܳܐ ܕܚܰܝܰܝ̈ܢ ܠܥܳܠܡܺܝܢ܀

ܡܫܰܡ̈ܫܳܢܶܐ: ܐܰܡܺܝܢ܀

ܣܶܕܪܳܐ

ܡܦܺܝܣܺܝܢܰܢ ܠܳܟ ܡܳܪܝܳܐ ܐܰܠܳܗܳܐ ܡܳܐ ܕܳܐܬܶܐ ܐܰܢ̱ܬ ܕܰܬܕܽܘܢ ܠܥܳܠܡܳܐ. ܡܳܐ ܕܰܢܒܺܝ̈ܶܐ ܚܳܕܶܝܢ ܘܰܫܠܺܝ̈ܚܶܐ ܕܳܝܨܺܝܢ ܘܣܳܗ̈ܕܶܐ ܡܶܬܟܰܠـܠܺܝܢ. ܡܳܐ ܕܪ̈ܰܫܝܺܥܶܐ ܒܳܗܬܺܝܢ ܘܳܐܟܶܠܩܰܪܨܳܐ ܘܚܰܝ̈ܠܰܘܳܬܶܗ ܡܶܫܬܰܢܩܺܝܢ. ܒܗܰܘ ܥܶܕܳܢܳܐ ܡܳܪܝܳܐ ܚܽܘܪ ܒܰܐܡܬܳܟ (ܦܠܢܝܬ) ܒܥܰܝܢܳܐ ܡܪܰܚܡܳܢܺܝܬܳܐ: ܡܶܛܽܠ ܕܶܐܬܥܰܡܕܰܬ ܒܰܫܡܳܟ ܩܰܕܺܝܫܳܐ: ܘܫܶܩܠܰܬ ܦܰܓܪܳܟ ܘܰܕܡܳܟ ܙܘ̈ܳܕܶܐ ܕܚܰܝ̈ܶܐ. ܘܰܐܫܘܳܗ̇ ܠܩܰܘܡܳܐ ܕܡܶܢ ܝܰܡܺܝܢܳܟ: ܘܰܐܫܡܰܥܶܝܗ̇ ܒܰܪܬ ܩܳܠܳܐ ܛܽܘܒܬܳܢܺܝܬܳܐ ܕܳܐܡܪܳܐ: ܬܰܘ ܒܪ̈ܺܝܟܰܘܗܝ ܕܳܐܒܝ ܘܺܝܪܰܬܘ ܡܰܠܟܽܘܬܳܐ ܕܰܡܛܰܝܒܳܐ ܠܟܽܘܢ ܡܶܢ ܩܕܳܡ ܬܰܪ̈ܡܝܳܬܶܗ ܕܥܳܠܡܳܐ. ܐܰܫܘܳܐ ܠܰܢ ܡܳܪܝ ܘܠܰܐܡܬܳܟ ܕܥܰܡܗܽܘܢ ܢܶܬܒܰܣܰܡ: ܘܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܥܰܡ ܐܰܒܽܘܟ ܘܪܽܘܚܳܟ ܩܰܕܝܫܳܐ ܠܥܳܠܡܺܝܢ. ܒܰܪܶܟܡܳܪܝ܀

ܟܳܗܢܳܐ: ܡܶܢ ܐܰܠܳܗܳܐ ܢܩܰܒܶܠ ܚܽܘܣܳܝܳܐ ܕܚܰܘ̈ܒܶܐ ܘܫܽܘܒܩܳܢܳܐ ܕܰܚ̈ܛܳܗܶܐ ܒܰܬܪ̈ܰܝܗܽܘܢ ܥܳܠ̈ܡܶܐ ܠܥܳܠܰܡ ܥܳܠ̈ܡܺܝܢ ܐܰܡܺܝܢ܀

ܩܳܠܳܐ: ܩܽܘܩܳܝܳܐ

ܩܽܘܪ̈ܒܳܢܶܐ ܩܰܪܶܒܽܘܢ ܠܺܝ ܐܳܡܪܳܐ ܢܰܦܫܳܐ. ܕܠܳܐ ܐܺܝܬ ܡܶܕܶܡ ܕܡܰܘܬܰܪ ܠܺܝ ܐܰܝܟ ܦܰܓܪܶܗ ܕܡܳܪܝܳܐ. ܠܳܐ ܡܰܘܬܰܪ ܠܺܝ ܒܶܟܝܳܐ ܘܬܶܢܚ̈ܳܬܳܐ. ܐܰܝܟ ܕܡܰܘܬܰܪ ܠܺܝ ܦܰܓܪܶܗ ܕܰܡܫܺܝܚܳܐ. ܘܡܳܐ ܕܩܳܝܡܺܝܬܽܘܢ ܒܰܨܠܽܘܬܳܐ ܟܳܗ̈ܢܶܐ ܨܰܠܰܘ ܥܠܰܝ. ܕܳܐܙܳܠ̱ܐ ܐ̱ܢܳܐ ܘܡܶܬܩܰܒܠܳܐ ܐ̱ܢܳܐ ܩܕܳܡ ܡܳܪܳܐ ܕܥܳܠ̈ܡܶܐ ܗ̄ ܩܕܳܡ ܒܺܐܡ ܕܰܡܫܺܝܚܳܐ܀

ܫܽܘܒܚܳܐ: ܐܶܬܕܰܟܪ ܡܳܪܝܳܐ ܠܥܰܢܺܝ̈ܕܰܝܢ ܘܰܢܝܳܚܳܐ ܥܒܶܕ ܠܗܽܘܢ. ܕܠܰܒܫܽܘܟ ܡܶܢ ܡܰܥܡܽܘܕܺܝܬܳܐ ܘܫܰܩܠܽܘܟ ܡܶܢ ܡܰܕܒܚܳܐ. ܗܳܢܽܘܢ ܕܶܐܟܰܠܘ ܦܰܓܪܳܟ ܩܰܕܺܝܫܳܐ. ܘܶܐܫܬܺܝܘ ܠܰܕܡܳܟ ܟܳܣܳܐ ܕܦܽܘܪܩܳܢܳܐ. ܥܰܡ ܐܰܒܪܳܗܳܡ ܢܶܬܒܰܣܡܽܘܢ ܒܶܝܬ ܡܰܠܟܽܘܬܳܐ. ܘܡܶܢ ܝܰܡܺܝܢܳܟ ܢܶܩܥܽܘܢ ܠܳܟ ܕܠܳܟ ܫܽܘܒܚܳܐ ܡܳܪܝܳܐ ܗ̄ ܢܝܳܚܳܐ ܡܳܪܝ ܠܥܰܒܕܰܝ̈ܟ܀

ܙܽܘܡܳܪܳܐ:

ܐܳܘ ܟܡܳܐ ܡܰܪܺܝܪ ܟܳܣܳܐ ܕܡܰܘܬܳܐ ܕܰܡܙܰܓ ܐܳܕܳܡ ܠܟܽܠܗܽܘܢ ܝܰܠܕܰܘ̈ܗܝ ܗ̄܀

ܩܕܳܡ ܫܠܺܝܚܳܐ
ܒܩ̄: ܛܽܘܒܰܝܟܝ ܥܺܕܬܳܐ

ܦܰܘܠܳܘܣ ܫܠܺܝܚܳܐ ܛܽܘܒܳܢܳܐ ܫܶܡܥܶܬ̣ ܕܳܐܡܰܪ: ܥܰܠ ܐܰܝܠܶܝܢ ܕܕܳܡܟܺܝܢ ܐܰܚܰܝ̈: ܨܳܒܶܐ ܐܢܳܐ ܕܠܳܐ ܬܶܟܪܶܐ ܠܟܽܘܢ: ܕܰܒܩܳܠ ܩܰܪܢܳܐ ܡܶܢ ܪܰܘܡܳܐ: ܩܳܝܡܺܝܢ ܟܽܠܗܽܘܢ ܥܰܢܺܝ̈ܕܶܐ: ܠܳܒܶܫ ܗܳܢܳܐ ܕܡܶܬܚܰܒܰܠ: ܠܰܕܠܳܐ ܒܳܠܳܐ ܘܡܶܬܚܰܒܰܠ: ܕܪܰܗܒܽܘܢܳܐ ܕܚܰܝ̈ܶܐ ܩܰܒܶܠ: ܦܰܓܪܶܗ ܘܰܕܡܶܗ ܕܰܡܫܺܝܚܳܐ܀

ܩܶܪ̈ܝܳܢܶܐ
ܡܶܢ ܐܶܓܰܪܬܳܐ ܕܦܰܘܠܳܘܣ ܫܠܺܝܚܳܐ ܕܰܠܘܳܬ ܩܳܘܪ̈ܺܝܢܬܳܝܶܐ ܐ
ܝܗ: ܢܢ ـ ܢܚ 1Corinthians 15:50-58

ܗܳܕܶܐ ܕܶܝܢ ܐܳܡܰܪ ܐ̱ܢܳܐ ܐܰܚܰܝ̈܆ ܕܒܶܣܪܳܐ ܘܰܕܡܳܐ ܡܰܠܟܽܘܬܳܐ ܕܰܫܡܰܝܳܐ ܠܡܺܐܪܰܬ ܠܳܐ ܡܶܫܟܚܺܝܢ. ܘܠܳܐ ܚܒܳܠܳܐ ܝܳܪܶܬ ܠܳܐ ܡܶܬܚܰܒܠܳܢܽܘܬܳܐ܀ ܗܳܐ ܐܳܡܰܪ ܐ̱ܢܳܐ ܠܟܽܘܢ ܐ̱ܪܳܙܳܐ. ܠܰܘ ܟܽܠܰܢ ܢܶܕܡܰܟ܆ ܟܽܠܰܢ ܕܶܝܢ ܢܶܬܚܰܠܰܦ܇ ܚܰܪܺܝܦܳܐܺܝܬ ܐܰܝܟ ܪܦܳܦ ܥܰܝܢܳܐ ܒܩܰܪܢܳܐ ܐ̱ܚܪܳܝܬܳܐ ܟܰܕ ܬܶܩܪܶܐ܆ ܘܰܢܩܽܘܡܽܘܢ ܡܺܝ̈ܬܶܐ ܕܠܳܐ ܚܒܳܠܳܐ. ܘܰܚܢܰܢ ܢܶܬܚܰܠܰܦ .ܥܬܺܝܕ ܗ̱ܘ ܓܶܝܪ ܗܳܢܳܐ ܕܡܶܬܚܰܒܰܠ܁ ܕܢܶܠܒܰܫ ܠܳܐ ܡܶܬܚܰܒܠܳܢܽܘܬܳܐ܇ ܘܗܳܢܳܐ ܕܡܳܐܶܬ܁ ܕܢܶܠܒܰܫ ܠܳܐ ܡܳܝܽܘܬܽܘܬܳܐ .ܡܳܐ ܕܠܳܒܶܫ ܕܶܝܢ ܗܳܢܳܐ ܕܡܶܬܚܰܒܰܠ ܠܳܐ ܡܶܬܚܰܒܠܳܢܽܘܬܳܐ܇ ܘܗܳܢܳܐ ܕܡܳܐܶܬ ܠܳܐ ܡܳܝܽܘܬܽܘܬܳܐ܆ ܗܳܝܕܶܝܢ ܬܶܗܘܶܐ ܡܶܠܬܳܐ ܗܳܝ ܕܰܟܬܺܝܒܳܐ܇ ܕܶܐܬܒܠܰܥ ܡܰܘܬܳܐ ܒܙܳܟܽܘܬܳܐ .ܐܰܝܟܰܘ ܥܽܘܩܣܳܟ܁ ܡܰܘܬܳܐ؟ ܐܰܘ ܐܰܝܟܳܐ ܗ̱ܝ ܙܳܟܽܘܬܶܟܝ ܫܝܽܘܠ؟ ܥܽܘܩܣܶܗ ܕܶܝܢ ܕܡܰܘܬܳܐ ܚܛܺܝܬܳܐ ܗ̱ܝ. ܘܚܰܝܠܳܐ ܕܰܚܛܺܝܬܳܐ ܢܳܡܽܘܣܰܐ ܗ̱ܘ .ܛܰܝܒܽܘ ܕܶܝܢ ܠܰܐܠܳܗܳܐ܆ ܕܝܰܗ̱ܒ ܠܰܢ ܙܳܟܽܘܬܳܐ ܒܝܰܕ ܡܳܪܰܢ ܝܶܫܽܘܥ ܡܫܺܝܚܳܐ܀ ܡܶܟܺܝܠ ܐܰܚܰܝ̈ ܘܚܰܒܺܝ̈ܒܰܝ܆ ܗܘܰܘ ܡܫܰܪܪܺܝܢ. ܘܠܳܐ ܬܶܗܘܽܘܢ ܡܶܬܬܙܺܝܥܺܝܢ܇ ܐܶܠܳܐ ܗܘܰܘ ܡܶܬܝܰܬܪܺܝܢ ܒܟܽܠܙܒܰܢ ܒܰܥܒܳܕܶܗ ܕܡܳܪܝܳܐ. ܟܰܕ ܝܳܕܥܺܝܢ ܐܢ̱ܬܽܘܢ܆ ܕܥܰܡܠܟܽܘܢ ܠܳܐ ܗ̱ܘܳܐ ܣܪܺܝܩ ܒܡܳܪܝܳܐ. ܒܰܪܶܟܡܳܪܝ܀

ܗܽܘܠܳܠܳܐ:

ܐܰܢܗܰܪ ܐܰܦܰܝ̈ܟ ܥܰܠ ܐܰܡܬܳܟ. ܘܰܦܪܽܘܩܶܝܗ̇ ܒܝܰܕ ܛܰܝܒܽܘܬܳܟ ܗ̄܀

ܡܫܰܡܫܳܢܳܐ: ܒܰܪܶܟܡܳܪܝ. ܥܰܡ ܫܶܠܝܳܐ ܘܕܶܚܠܬܳܐ ܘܢܰܟܦܽܘܬܳܐ ܢܨܽܘܬ ܘܢܶܫܡܰܥ ܠܰܣܒܰܪܬܳܐ ܕܡ̈ܶܠܶܐ ܚܰܝ̈ܳܬܳܐ ܕܶܐܘܰܢܓܶܠܺـܝܳܘܢ ܩܰܕܺܝܫܳܐ ܕܡܳܪܰܢ ܝܶܫܽܘܥ ܡܫܺܝܚܳܐ ܕܡܶܬܩܪܶܐ ܥܠܰܝܢ܀

ܟܳܗܢܳܐ: ܫܠܳـܡܳܐ ܠܟܽܠܟܽܘܢ܀

ܡܫܰܡܫܳܢܳܐ: ܐܰܫܘܳܐ ܠܰܢ ܡܳܪܝܳܐ ܐܰܠܳܗܳܐ ܘܥܰܡ ܪܽܘܚܳܐ ܕܺܝܠܳܟ܀

ܟܳܗܢܳܐ: ܐܶܘܰܢܓܶܠܺـܝܳܘܢ ܩܰܕܺܝܫܳܐ ܕܡܳܪܰܢ ܝܶܫܽܘܥ ܡܫܺܝܚܳܐ܆ ܣܒܰܪܬܳܐ ܡܰܚܝܳܢܺܝܬܳܐ ܡܶܢ ܠܽܘܩܳܐ ܡܣܰܒܪܳܢܳܐ ܕܰܡܣܰܒܰܪ ܚܰܝ̈ܳܐ ܘܦܽܘܪܩܳܢܳܐ ܠܥܳܠܡܳܐ܀

ܡܫܰܡܫܳܢܳܐ: ܒܪܺܝܟ ܕܶܐܬܳܐ ܘܰܥܬܺܝܕ ܕܢܺܐܬܶܐ. ܬܶܫܒ̈ܚܳܢ ܠܫܳܠܽܘܚܶܗ ܕܫܰܠܚܶܗ ܠܦܽܘܪܩܳܢܰܢ. ܘܥܰܠ ܟܽܠܰܢ ܪ̈ܰܚܡܰܘܗ̱ܝ ܠܥܳܠܡܺܝܢ܀

ܐܶܘܰܢܓܶܠܺـܝܳܘܢ ܡܶܢ ܠܽܘܩܳܐ ܡܣܰܒܪܳܢܳܐ
ܟ:ܟܙ - ܠܚ Luke 20:27-38

ܩܪܶܒܘ ܕܶܝܢ ܐ̱ܢܳܫܺܝ̈ܢ ܡܶܢ ܙܰܕܽܘ̈ܩܳܝܶܐ܇ ܗܳܢܽܘܢ ܕܳܐܡܪܺܝܢ ܕܰܩܝܳܡܬܳܐ ܠܰܝܬ. ܘܫܰܐܠܽܘܗ̱ܝ. ܘܳܐܡܪܺܝܢ ܠܶܗ. ܡܰܠܦܳܢܳܐ܆ ܡܽܘܫܶܐ ܟܬܰܒ ܠܰܢ܆ ܕܶܐܢ ܐ̱ܢܳܫ ܢܡܽܘܬ ܐܰܚܽܘܗ̱ܝ ܕܺܐܝܬ ܠܶܗ ܐܰܢ̱ܬܬܳܐ ܕܠܳܐ ܒܢܰܝ̈ܳܐ܆ ܢܶܣܰܒ ܐܰܚܽܘܗ̱ܝ ܐܰܢ̱ܬܬܶܗ. ܘܰܢܩܺܝܡ ܙܰܪܥܳܐ ܠܰܐܚܽܘܗ̱ܝ. ܫܰܒܥܳܐ ܕܶܝܢ ܐܰܚܺܝ̈ܢ ܐܺܝܬ ܗ̱ܘܰܘ. ܩܰܕܡܳܝܳܐ ܢܣܰܒ ܐܰܢ̱ܬܬܳܐ. ܘܡܺܝܬ ܕܠܳܐ ܒܢܰܝ̈ܳܐ. ܘܢܰܣܒܳܗ̇ ܕܰܬܪܶܝܢ ܠܰܐܢ̱ܬܬܶܗ. ܘܗܳܢܳܐ ܡܺܝܬ ܕܠܳܐ ܒܢܰܝ̈ܳܐ. ܘܕܰܬܠܳܬܳܐ ܬܽܘܒ ܢܰܣܒܳܗ̇. ܘܗܳܟܘܳܬ ܘܳܐܦ ܫܰܒ̈ܥܳܬܰܝܗܽܘܢ. ܘܡܺܝܬܘ. ܘܠܳܐ ܫܒܰܩܘ ܒܢܰܝ̈ܳܐ. ܘܡܺܝܬܰܬ ܒܚܰܪܬܳܐ ܐܳܦ ܐܰܢ̱ܬܬܳܐ. ܒܰܩܝܳܡܬܳܐ ܗܳܟܺܝܠ. ܕܰܐܝܢܳܐ ܡܶܢܗܽܘܢ ܬܶܗܘܶܐ ܐܰܢ̱ܬܬܳܐ؟ ܫܰܒ̈ܥܳܬܰܝܗܽܘܢ ܓܶܝܪ ܢܰܣܒܽܘܗ̇܀ ܐܳܡܰܪ ܠܗܽܘܢ ܝܶܫܽܘܥ. ܒܢ̈ܰܘܗ̱ܝ ܕܥܳܠܡܳܐ ܗܳܢܳܐ. ܢܳܣܒܺܝܢ ܢܶܫ̈ܶܐ. ܘܢܶܫ̈ܶܐ ܗܳܘ̈ܝܳܢ ܠܓܰܒܪ̈ܶܐ. ܗܳܢܽܘܢ ܕܶܝܢ ܕܰܠܗܰܘ ܥܳܠܡܳܐ ܫܘܰܘ܁ ܘܠܰܩܝܳܡܬܳܐ ܕܡܶܢ ܒܶܝܬ ܡܺܝ̈ܬܶܐ܆ ܠܳܐ ܢܳܣܒܺܝܢ ܢܶܫ̈ܶܐ. ܘܳܐܦ ܠܳܐ ܢܶܫ̈ܶܐ ܗܳܘ̈ܝܳܢ ܠܓܰܒܪ̈ܶܐ. ܐܳܦܠܳܐ ܓܶܝܪ ܬܽܘܒ ܠܰܡܡܳܬ ܡܶܫܟܚܺܝܢ. ܐܰܝܟ ܡ̈ܰܠܰܐܟܶܐ ܐܶܢܽܘܢ ܓܶܝܪ. ܘܰܒܢܰܝ̈ܳܐ ܐܺܝܬܰܝܗܽܘܢ ܕܰܐܠܳܗܳܐ. ܡܶܛܽܠ ܕܰܗܘܰܘ ܒܢܰܝ̈ܳܐ ܕܰܩܝܳܡܬܳܐ. ܕܩܳܝܡܺܝܢ ܕܶܝܢ ܡܺܝ̈ܬܶܐ܁ ܐܳܦ ܡܽܘܫܶܐ ܒܰܕܶܩ. ܐܶܬܕܟܰܪ ܓܶܝܪ ܒܣܰܢܝܳܐ ܟܰܕ ܐܶܡܰܪ. ܡܳܪܝܳܐ ܐܰܠܳܗܶܗ ܕܰܐܒܪܳܗܳܡ܁ ܘܰܐܠܳܗܶܗ ܕܺܐܝܣܚܳܩ. ܘܰܐܠܳܗܶܗ ܕܝܰܥܩܽܘܒ. ܐܰܠܳܗܳܐ ܕܶܝܢ ܠܳܐ ܗ̱ܘܳܐ ܕܡܺܝ̈ܬܶܐ܁ ܐܶܠܳܐ ܕܚܰܝ̈ܶܐ. ܟܽܠܗܽܘܢ ܓܶܝܪ ܚܰܝܺܝܢ ܐܶܢܽܘܢ ܠܶܗ. ܒܰܪܶܟܡܳܪܝ܀

ܐ̱ܚܪܺܢܳܐ: ܐܶܘܰܢܓܶܠܺـܝܳܘܢ ܡܶܢ ܠܽܘܩܳܐ ܡܣܰܒܪܳܢܳܐ
ܝܙ:ܟܒ - ܠܙ Luke 17:22-37

ܘܶܐܡܰܪ ܠܬܰܠܡܺܝ̈ܕܰܘܗ̱ܝ. ܢܺܐܬܽܘܢ ܝܰܘ̈ܡܳܬܳܐ܆ ܕܬܶܬܪܰܓܪܓܽܘܢ ܠܡܶܚܙܳܐ ܚܰܕ ܡܶܢ ܝܰܘ̈ܡܳܬܳܐ ܕܰܒܪܶܗ ܕܐ̱ܢܳܫܳܐ. ܘܠܳܐ ܬܶܚܙܽܘܢ. ܘܶܐܢ ܢܺܐܡܪܽܘܢ ܠܟܽܘܢ. ܗܳܐ ܗܳܪܟܰܐ ܗ̱ܘ ܘܗܳܐ ܗܳܪ ܬܰܡܳܢܽ ܗ̱ܘ. ܠܳܐ ܬܺܐܙܽܠ̱ܘܢ. ܐܰܝܟܰܢܳܐ ܓܶܝܪ ܕܒܰܪܩܳܐ ܒܳܪܶܩ ܡܶܢ ܫܡܰܝܳܐ: ܘܟܽܠܶܗ ܬܚܶܝܬ ܫܡܰܝܳܐ ܡܰܢܗܰܪ܆ ܗܳܟܰܢܳܐ ܢܶܗܘܶܐ ܒܪܶܗ ܕܐ̱ܢܳܫܳܐ ܒܝܰܘܡܶܗ. ܠܽܘܩܕܰܡ ܕܶܝܢ ܥܬܺܝܕ ܗ̱ܘ ܕܢܶܚܰܫ ܣܰܓܺܝ̈ܳܐܬܳܐ܆ ܘܢܶܣܬܠܶܐ ܡܶܢ ܫܰܪܒܬܳܐ ܗܳܕܶܐ. ܘܰܐܝܟܰܢܳܐ ܕܰܗܘܳܐ ܒܝܰܘ̈ܡܳܬܶܗ ܕܢܽܘܚ܆ ܗܳܟܰܢܳܐ ܢܶܗܘܶܐ ܒܝܰܘ̈ܡܳܬܶܗ ܕܰܒܪܶܗ ܕܐ̱ܢܳܫܳܐ. ܕܳܐܟܠܺܝܢ ܗ̱ܘܰܘ ܘܫܳܬܶܝܢ܇ ܘܢܳܣܒܺܝܢ ܢܶܫ̈ܶܐ ܘܝܳܗܒܺܝܢ ܠܓܰܒܪ̈ܶܐ܇ ܥܕܰܡܳܐ ܠܝܰܘܡܳܐ ܕܥܰܠ ܢܽܘܚ ܠܟܶܐܘܶܠܳܐ܆ ܘܶܐܬܳܐ ܛܰܘܦܳܢܳܐ. ܘܰܐܘܒܶܕ ܠܟܽܠ ܐ̱ܢܳܫ. ܘܰܐܝܟܰܢܳܐ ܬܽܘܒ ܕܰܗܘܳܐ ܒܝܰܘ̈ܡܳܬܶܗ ܕܠܽܘܛ: ܕܳܐܟܠܺܝܢ ܗ̱ܘܰܘ ܘܫܳܬܶܝܢ: ܘܙܳܒܢܺܝܢ ܘܰܡܙܰܒܢܺܝܢ: ܘܢܳܨܒܺܝܢ ܗ̱ܘܰܘ ܘܒܳܢܶܝܢ: ܒܝܰܘܡܳܐ ܕܶܝܢ ܕܰܢܦܰܩ ܠܽܘܛ ܡܶܢ ܣܕܽܘܡ܆ ܐܰܡܛܰܪ ܡܳܪܝܳܐ ܢܽܘܪܳܐ ܘܟܶܒܪܺܝܬܳܐ ܡܶܢ ܫܡܰܝܳܐ܆ ܘܰܐܘܒܶܕ ܠܟܽܠܗܽܘܢ. ܗܳܟܰܢܳܐ ܢܶܗܘܶܐ ܒܝܰܘܡܳܐ ܕܡܶܬܓܠܶܐ ܒܪܶܗ ܕܐ̱ܢܳܫܳܐ. ܒܗܰܘ ܝܰܘܡܳܐ ܡܰܢ ܕܒܶܐܓܳܪܰܐ ܗ̱ܘ ܘܡܳܐܢ̈ܰܘܗ̱ܝ ܒܒܰܝܬܳܐ܆ ܠܳܐ ܢܶܚܽܘܬ ܕܢܶܫܩܽܘܠ ܐܶܢܽܘܢ. ܘܡܰܢ ܕܰܒܚܰܩܠܰܐ ܗ̱ܘ܆ ܠܳܐ ܢܶܬܗܦܶܟ ܠܒܶܣܬܪܶܗ. ܐܶܬܕܰܟِܪܘ ܠܰܐܢ̱ܬܬܶܗ ܕܠܽܘܛ. ܡܰܢ ܕܨܳܒܶܐ ܕܢܰܚܶܐ ܢܰܦܫܶܗ. ܢܰܘܒܕܺܝܗ̇. ܘܡܰܢ ܕܢܰܘܒܶܕ ܢܰܦܫܶܗ ܢܰܚܶܝܗ̇. ܐܳܡܰܪ ܐ̱ܢܳܐ ܠܟܽܘܢ ܕܰܒܗܰܘ ܠܺܠܝܳܐ܆ ܬܪܶܝܢ ܢܶܗܘܽܘܢ ܒܰܚܕܳܐ ܥܰܪܣܳܐ. ܚܰܕ ܢܶܬܕܒܰܪ. ܘܰܐ̱ܚܪܺܢܳܐ ܢܶܫܬܒܶܩ. ܬܰܪܬܶܝܢ ܢܶܗܘ̈ܝܳܢ ܛܳܚ̈ܢܳܢ ܐܰܟܚܕܳܐ. ܚܕܳܐ ܬܶܬܕܒܰܪ. ܘܰܐ̱ܚܪܺܬܳܐ ܬܶܫܬܒܶܩ. ܬܪܶܝܢ ܢܶܗܘܽܘܢ ܒܚܰܩܠܳܐ. ܚܰܕ ܢܶܬܕܒܰܪ. ܘܰܐ̱ܚܪܺܢܳܐ ܢܶܫܬܒܶܩ. ܥܢܰܘ. ܘܳܐܡܪܺܝܢ ܠܶܗ. ܠܰܐܝܟܳܐ ܡܳܪܰܢ؟ ܐܳܡܰܪ ܠܗܽܘܢ. ܐܰܝܟܳܐ ܕܦܰܓܪܳܐ. ܬܰܡܳܢ ܢܶܬܟܰܢܫܽܘܢ ܢܶܫܪ̈ܶܐ. ܒܰܪܶܟܡܳܪܝ܀

ܐ̱ܚܪܺܢܳܐ: ܐܶܘܰܢܓܶܠܺـܝܳܘܢ ܡܶܢ ܠܽܘܩܳܐ ܡܣܰܒܪܳܢܳܐ
ܝܘ:ܝܛ - ܠܐ Luke 16:19-31

ܓܰܒܪܳܐ ܕܶܝܢ ܚܰܕ ܥܰܬܺܝܪܳܐ ܐܺܝܬ ܗ̱ܘܳܐ܆ ܘܠܳܒܶܫ ܗ̱ܘܳܐ ܒܽܘܨܳܐ ܘܰܐܪܓܘܳܢܳܐ. ܘܟܽܠܝܽܘܡ ܡܶܬܒܰܣܰܡ ܗ̱ܘܳܐ ܓܰܐܝܳܐܺܝܬ. ܘܡܶܣܟܺܢܳܐ ܚܰܕ ܐܺܝܬ ܗ̱ܘܳܐ ܕܰܫܡܶܗ ܠܳܥܳܙܳܪ. ܘܰܪܡܶܐ ܗ̱ܘܳܐ ܠܘܳܬ ܬܰܪܥܶܗ ܕܗܰܘ ܥܰܬܺܝܪܳܐ. ܟܰܕ ܡܡܰܚܰܝ ܒܫܽܘܚ̈ܢܶܐ. ܘܡܶܬܝܰܐܰܒ ܗ̱ܘܳܐ ܕܢܶܡܠܶܐ ܟܰܪܣܶܗ ܡܶܢ ܦܰܪ̈ܬܽܘܬܶܐ ܕܢܳܦܠܺܝܢ ܡܶܢ ܦܳܬܽܘܪܶܗ ܕܗܰܘ ܥܰܬܺܝܪܳܐ. ܐܶܠܳܐ ܐܳܦ ܟܰܠܒ̈ܶܐ ܐܳܬܶܝܢ ܗ̱ܘܰܘ ܡܠܰܚܟܺܝܢ ܫܽܘܚ̈ܢܰܘܗ̱ܝ܀ ܗܘܳܐ ܕܶܝܢ ܘܡܺܝܬ ܗܰܘ ܡܶܣܟܺܢܳܐ܆ ܘܰܐܘܒܠܽܘܗ̱ܝ ܡ̈ܰܠܰܐܟܶܐ ܠܥܽܘܒܶܗ ܕܰܐܒܪܳܗܳܡ. ܐܳܦ ܗܰܘ ܕܶܝܢ ܥܰܬܺܝܪܳܐ ܡܺܝܬ. ܘܶܐܬܩܒܰܪ. ܘܟܰܕ ܡܶܫܬܰܢܰܩ ܒܰܫܝܽܘܠ܆ ܐܰܪܺܝܡ ܥܰܝ̈ܢܰܘܗ̱ܝ ܡܶܢ ܪܽܘܚܩܳܐ܆ ܘܰܚܙܳܐ ܠܰܐܒܪܳܗܳܡ ܘܰܠܠܳܥܳܙܳܪ ܒܥܽܘܒܶܗ. ܘܰܩܪܳܐ ܒܩܳܠܳܐ ܪܳܡܳܐ ܘܶܐܡܰܪ. ܐܳܒܝ ܐܰܒܪܳܗܳܡ ܐܶܬܪܰܚܰܡ ܥܠܰܝ! ܘܫܰܕܰܪ ܠܠܳܥܳܙܳܪ. ܕܢܶܨܒܽܘܥ ܪܺܝܫ ܨܶܒܥܶܗ ܒܡܰܝ̈ܳܐ ܘܰܢܪܰܛܶܒ ܠܺܝ ܠܶܫܳܢܝ܇ ܕܗܳܐ ܡܶܫܬܰܢܰܩ ܐ̱ܢܳܐ ܒܫܰܠܗܶܒܺܝܬܳܐ ܗܳܕܶܐ. ܐܳܡܰܪ ܠܶܗ ܐܰܒܪܳܗܳܡ. ܒܶܪܝ܆ ܐܶܬܕܰܟِܪ ܕܩܰܒܶܠܬ ܛܳܒ̈ܳܬܳܟ ܒܚܰܝܰܝ̈ܟ. ܘܠܳܥܳܙܳܪ ܒܺܝ̈ܫܳܬܶܗ. ܘܗܳܫܳܐ ܗܳܐ ܡܶܬܬܢܺܝܚ ܗܳܪܟܳܐ. ܘܰܐܢ̱ܬ ܡܶܫܬܰܢܰܩ. ܘܥܰܡ ܗܳܠܶܝܢ ܟܽܠܗܶܝܢ܆ ܗܰܘܬܳܐ ܪܰܒܬܳܐ ܣܺܝܡܳܐ ܒܰܝ̈ܢܰܝܢ ܘܰܠܟܽܘܢ. ܕܰܐܝܠܶܝܢ ܕܨܳܒܶܝܢ ܡܶܟܳܐ ܕܢܶܥܒܪܽܘܢ ܠܘܳܬܟܽܘܢ. ܠܳܐ ܢܶܫܟܚܽܘܢ. ܘܳܐܦܠܳܐ ܕܡܶܢ ܬܰܡܳܢ ܢܶܥܒܪܽܘܢ ܠܘܳܬܰܢ܀ ܐܳܡܰܪ ܠܶܗ. ܡܳܕܶܝܢ ܒܳܥܶܐ ܐ̱ܢܳܐ ܡܶܢܳܟ ܐܳܒܝ܆ ܕܰܬܫܰܕܪܺܝܘܗ̱ܝ ܠܒܶܝܬ ܐܳܒܝ. ܚܰܡܫܳܐ ܓܶܝܪ ܐܰܚܺܝ̈ܢ ܐܺܝܬ ܠܺܝ. ܢܺܐܙܰܠ ܢܣܰܗܶܕ ܐܶܢܽܘܢ܆ ܕܠܳܐ ܐܳܦ ܗܶܢܽܘܢ ܢܺܐܬܽܘܢ ܠܕܽܘܟܬܳܐ ܗܳܕܶܐ ܕܬܰܫܢܺܝܩܳܐ. ܐܳܡܰܪ ܠܶܗ ܐܰܒܪܳܗܳܡ. ܐܺܝܬ ܠܗܽܘܢ ܡܽܘܫܶܐ ܘܰܢܒܺܝ̈ܶܐ܆ ܢܶܫܡܥܽܘܢ ܐܶܢܽܘܢ. ܗܽܘ ܕܶܝܢ ܐܶܡܰܪ ܠܶܗ. ܠܳܐ ܐܳܒܝ ܐܰܒܪܳܗܳܡ. ܐܶܠܳܐ ܐܶܢ ܐ̱ܢܳܫ ܡܶܢ ܡܺܝ̈ܬܶܐ ܢܺܐܙܰܠ ܠܘܳܬܗܽܘܢ. ܬܳܝܒܺܝܢ. ܐܳܡܰܪ ܠܶܗ ܐܰܒܪܳܗܳܡ. ܐܶܢ ܠܡܽܘܫܶܐ ܘܠܰܢܒܺܝ̈ܶܐ ܠܳܐ ܫܳܡܥܺܝܢ܆ ܐܳܦ ܠܳܐ ܐܶܢ ܐ̱ܢܳܫ ܡܶܢ ܡܺܝ̈ܬܶܐ ܢܩܽܘܡ. ܡܗܰܝܡܢܺܝܢ ܠܶܗ. ܒܰܪܶܟܡܳܪܝ܀

ܒܳܥܽܘܬܳܐ ܕܡܳܪܝ ܐܰܦܪܶܝܡ

ܡܳܪܰܢ ܐܶܬܪܰܚܰܡܥܠܰܝܢ: ܐܰܠܳܗܳܐ ܚܰܣܳܐ ܠܰܐܡܬܳܟ. ܘܰܐܩܺܝܡܶܝܗ̇ ܡܶܢ ܝܰܡܺܝܢܳܟ: ܒܝܰܘܡܳܐ ܕܕܳܢܚܳܐ ܪܰܒܽܘܬܳܟ܀

ܕܰܝܳܢܳܐ ܕܕܺܝܢܶܗ ܩܰܝܳܡ: ܠܳܐ ܬܶܟܦܽܘܪ ܒܺܝ ܒܗܰܘ ܝܰܘܡܳܐ. ܕܡܶܬܓܰܠ̈ܝܳܢ ܒܶܗ ܟܰܣ̈ܝܳܬܳܐ: ܘܩܳܐܶܡ ܟܽܠ ܐ̱ܢܳܫ ܒܰܥܒܳܕܰܘ̈ܗܝ. ܬܚܰܣܶܐ ܡܽܘ̈ܡܰܝ ܒܛܰܝܒܽܘܬܳܟ: ܘܰܐܘܕܶܐ ܠܰܡܪܰܚܡܳܢܽܘܬܳܟ܀

ܙܳܥܩܳܐ ܩܰܪܢܳܐ ܡܶܢ ܪܰܘܡܳܐ: ܘܰܡܝܰܒܶܒ ܩܳܠ ܫܺܝܦܽܘܪܳܐ. ܡܶܬܩܰܦܠܺܝܢ ܫܡܰܝܳܐ ܘܰܐܪܥܳܐ: ܘܡܶܬܬܥܺܝܪܺܝܢ ܫܟܺܝ̈ܒܰܝ ܥܰܦܪܳܐ. ܒܗܳܝ ܫܳܥܬܳܐ ܐܶܚܙܶܐ ܚܢܳܢܳܟ: ܘܰܐܘܕܶܐ ܠܳܟ ܥܰܠ ܛܰܝܒܽܘܬܳܟ܀

ܡܳܪܰܢ ܐܶܬܪܰܚܰܡܥܠܰܝܢ: ܐܰܠܳܗܳܐ ܚܰܣܳܐ ܠܰܐܡܬܳܟ. ܘܰܐܩܺܝܡܶܝܗ̇ ܡܶܢ ܝܰܡܺܝܢܳܟ: ܒܝܰܘܡܳܐ ܕܕܳܢܚܳܐ ܪܰܒܽܘܬܳܟ܀

ܚܽܘܬܳܡܳܐ

ܟܳܗܢܳܐ: ܒܪ̈ܰܚܡܶܐ ܐܽܘܣ̈ܝܳܝܶܐ ܗܳܢܽܘܢ ܕܒܳܟ ܥܙܺܝܠܺܝܢ ܡܳܪܝܳܐ ܐܰܠܳܗܳܐ: ܩܰܒܶܠ ܢܰܦܫܳܗ̇ ܕܰܐܡܬܳܟ (ܦܠܢܝܬ) ܕܫܰܢܝܰܬ ܡܶܢ ܬܰܘܬܳܒܽܘܬܳܐ ܗܳܕܶܐ ܙܰܒܢܳܝܬܳܐ ܘܰܠܘܳܬܳܟ ܚܶܙܩܰܬ. ܘܰܒܝܰܕ ܨܠܰܘ̈ܳܬܳܐ ܘܒܳܥܘ̈ܳܬܳܐ ܕܩܰܪܶܒܢܰܢ ܚܠܳܦܶܝܗ̇. ܢܶܬܚܰܣܽܘܢ ܚܰܘܒܶܝ̈ܗ̇ ܘܢܶܫܬܰܒܩܽܘܢ ܒܽܘܨܳܪ̈ܶܝܗ̇ ܗܳܢܽܘܢ ܕܒܰܡܚܺܝܠܽܘܬܳܐ ܐ̱ܢܳܫܳܝܬܳܐ ܐܶܣܬܥܰܪܘ ܡܶܢܳܗ̇ ܒܥܳܠܡܳܐ ܗܳܢܳܐ ܢܩܶܐ ܠܫܽܘܪ̈ܥܳܬܳܐ. ܘܰܒܝܰܘܡܳܐ ܗܰܘ ܐ̱ܚܪܳܝܳܐ ܘܰܕܚܺܝܠܳܐ ܕܦܳܣܺܝ̈ܩܳܬܳܐ ܒܓܰܒܳܐ ܝܰܡܝܢܳܝܳܐ ܬܶܬܛܰܟܰܣ. ܘܰܒܓܰܠܝܽܘܬ ܐܰܦ̈ܶܐ. ܬܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܰܐܒܽܘܟ ܘܰܠܪܽܘܚܳܟ ܩܰܕܺܝܫܳܐ. ܗܳܫܳܐ ܘܰܒܟܽܠܙܒܰܢ ܠܥܳܠܡܺܝܢ܀

ܡܫܰܡ̈ܫܳܢܶܐ: ܐܰܡܺܝܢ

ܫܶܠܡܰܬ ܬܶܫܡܶܫܬܳܐ ܕܰܢܝܳܚܬܳܐ ܕܢܶܫ̈ܶܐ ܘܕܰܥܠܰܝ̈ܡܳܬܳܐ ܘܕܰܛܠܳܝ̈ܳܬܳܐ ܕܝܰܘܡܳܐ ܬܠܺܝܬܳܝܳܐ ܘܕܰܐܪܒܥܺܝܢ ܝܰܘ̈ܡܺܝܢ ܘܰܕܫܰܢ̱ܬܳܐ