ܡܶܫܬܰܡܠܶܐ ܒܥܶܣܪܺܝܢ ܘܚܰܡܫܳܐ ܕܟܳܢܽܘܢ ܩܕܺܝܡ

ܩܝܢܬܐ ܐ

ܦܬܓܡܐ:

ܡܳܪܝܳܐ ܐܶܡܰܪ ܠܺܝ ܕܒܶܪܝ̱ ܐܰܢܬ: ܘܶܐܢܳܐ ܝܰܘܡܳܢܳܐ ܝܺܠܶܕܬܳܟ ܗ̄܀

ܦܬܓܡܐ ܐܚܪܢܐ:

ܘܰܠܨܶܗܝܽܘܢ ܐܶܬܶܐܡܰܪ: ܕܓܰܒܪܳܐ ܓܰܢ̱ܒܳܪܳܐ ܐܶܬܺܝ̣ܠܶܕ ܒܳܗ̇ ܘܗܽܘ ܐܰܬܩܢܳܗ̇ ܗ̄܀

ܬܒܪܬ‌ܐ:

ܗܰܠܶܠܘ ܗܰܠܶܠܘ ܗܰܠܶܠܘ ܘܶܐܡܰܪܘ ܗܰܠܶܠܽܘܝܰܗ: ܐܰܟܡܳܐ ܕܗܰܠܠܽܘܗܝ ܪ̈ܳܥܰܘܳܬܳܐ ܒܓܰܘ ܒܶܝܬ ܠܚܶܡ܀

ܙܰܡܰܪܘ ܙܰܡܰܪܘ ܙܰܡܰܪܘ ܘܶܐܡܰܪܘ ܗܰܠܶܠܽܘܝܰܗ: ܐܰܟܡܳܐ ܕܙܰܡܪܽܘܗܝ ܪ̈ܳܥܰܘܳܬܳܐ ܒܓܰܘ ܒܶܝܬ ܠܚܶܡ܀

ܩܕܡ ܐܘܢܓܠܝܘܢ - H

ܬܶܫܒܽܘܚܬܳܐ ܘܗܶܕܪܳܐ ܘܪܽܘܡܪܳܡܳܐ ܡܕܰܫܢܺܝܢܰܢ ܠܓܰܐܝܳܐ ܘܓܰܢ̱ܒܳܪܳܐ ܘܬܰܩܺܝܦ ܥܽܘܫܢܳܐ. ܥܰܠ ܦܽܘܪܩܳܢܳܐ ܘܙܳܟ̣ܽܘܬ̣ܳܐ ܕܥܰܡܳܟ ܝܺܣܪܳܐܶܝܠ܀

ܟܰܕ ܡܥܰܢܝܳܐ ܡܰܪܝܰܡ. ܒܰܦܠܰܓ̈ܶܐ. ܘܒܰܪ̈ܒܺܝܥܶܐ. ܠܝܰܗ ܡܳܪܝܳܐ܀

ܗܰܠܶܠܘ̱ ܗܰܠܶܠܘ̱ ܗܰܠܶܠܽܘܢܳܝܗܝ. ܠܺܐܝܠ ܬܰܩܺܝܦܳܐ. ܕܶܐܬ̣ܳܐ ܠܝܰܠܕܳܐ܀

ܫܰܒܰܚܘ̱ ܫܰܒܰܚܘ̱ ܫܰܒܰܚܽܘܢܳܝܗܝ. ܠܺܐܝܠ ܥܰܫܺܝܢܳܐ. ܕܶܐܬ̣ܳܐ ܠܝܰܠܕܳܐ܀

ܙܰܡܰܪܘ̱ ܙܰܡܰܪܘ̱ ܙܰܡܰܪܽܘܢܳܝܗܝ. ܠܺܐܝܠ ܥܰܙܺܝܙܳܐ. ܕܶܐܬ̣ܳܐ ܠܝܰܠܕܳܐ܀

ܡܶܛܽܠ ܕܰܡܫܰܒܚܳܐ ܐܺܝܬ̣ܰܘܗ̱ܝ܀

ܒܬܪ ܐܘܢܓܠܝܘܢ ܒܩ̄: ܒܟܽܠܡܶܕܶܡ ܐܶܬܒܰܩܺܝܬ - H

ܒܬܽܘܠܬܳܐ ܝܶܠܕܰܬ ܕܽܘܡܳܪܳܐ: ܬܰܘ ܢܺܐܙܰܠ ܢܶܬܒܰܩܶܐ ܒܶܗ ܒܩܰܫܺܝܫ ܡܶܢ ܕܳܪ̈ܶܐ ܕܰܒܥܰܙܪܽܘܪ̈ܶܐ ܟܪܺܝܟ. ܣܳܒܳܐ ܥܰܬܺܝܩ ܝܰܘ̈ܡܳܬܳܐ ܕܺܝܠܶܕܬܶܗ ܒܬܽܘܠܬܳܐ. ܓܰܢ̱ܒܳܪܳܐ ܕܰܬܩܰܠ ܛܽܘܪ̈ܶܐ ܙܰܝܰܚܬܶܗ ܥܠܰܝܡܬܳܐ. ܗܽܘ ܝܳܗܶܒ ܠܰܚܡܳܐ ܠܟܰܦ̈ܢܶܐ. ܘܺܝܢܶܩ ܚܰܠܒܳܐ ܐܰܝܟ ܫܰܒܪܳܐ. ܒܪܳܐ ܕܠܰܝܬ ܗܘܳܐ ܠܶܗ ܫܽܘܪܳܝܳܐ. ܨܒܳܐ ܘܰܗܘܳܐ ܠܶܗ ܫܽܘܪܳܝܳܐ. ܘܶܐܬܳܐ ܠܡܰܘܠܳܕܳܐ ܘܫܽܘܠܳܡܳܐ ܠܰܝܬ ܠܶܗ܀

ܠܘܛܢܝܐ ܒܩ̄: ܠܢܣܒܚ ܘܢܡܓܕ
ܒܡܳܪܝ ܝܰܥܩܽܘܒ - H

ܐܳܘ ܚܰܟܺܝܡܳܐ ܬܳܐ ܚܙܺܝ ܥܽܘܠܳܐ ܒܓ̣ܰܘ ܥܰܙܪܽܘܪ̈ܶܐ܇ ܘܶܐܣܬܰܟܰܠ ܒܶܗ ܕܟܽܠܳܗ̇ ܒܪܺܝܬܳܐ ܒܪܶܡܙܶܗ ܬܰܠܝܳܐ܀

ܘܶܐܬܕܰܡܰܪ ܒܶܗ ܕܟܰܕ ܣܺܝܡ ܒܽܐܘܪܝܳܐ ܒܓ̣ܰܘ ܐܳܦܰܪܬܳܐ܇ ܠܝܰܡܳܐ ܘܝܰܒܫܳܐ ܗܽܘ ܡܕܰܒܰܪ ܗܘܳܐ ܥܰܡ ܝܳܠܽܘܕܶܗ܀

ܣܪ̈ܳܦܶܐ ܙܳܠܚܺܝܢ ܩܽܘܕ̈ܫܶܐ ܩܕܳܡܰܘܗܝ ܡܶܢ ܦܽܘ̈ܡܰܝܗܽܘܢ܇ ܘܐ̱ܢܳܫ̈ܳܐ ܛܥܺܝܢܺܝܢ ܘܰܡܢܰܨܪܺܝܢ ܠܶܗ ܒܠܶܫܳܢܰܝ̈ܗܽܘܢ܀

ܙܥܽܘܪܝܳܐ ܗ̱ܝ ܫܡܰܝܳܐ ܘܠܳܐ ܐܳܚܕܳܐ ܠܶܗ ܐܶܢ ܫܳܪܶܐ ܒܳܗ̇܇ ܘܰܪܘܺܝܚܳܐ ܠܶܗ ܟܶܢܦܳܗ̇ ܕܡܰܪܝܰܡ ܕܢܶܙܕܰܝܰܚ ܒܳܗ̇܀

ܠܘܛܢܝܐ ܐܚܪܢܐ ܒܩ̄: ܠܬܶܫܒܽܘܚܬܳܐ ܕܡܳܪܝܳܐ - H

ܦܳܠ̈ܚܰܝ ܫܡܰܝܳܐ ܒܗܳܢܳܐ ܝܰܘܡܳܐ: ܝܰܒܶܒܘ̱ ܠܡܳܪܳܐ ܕܥܶܠܳܝ̈ܶܐ. ܬܶܫܒܽܘܚܬܳܐ ܠܰܐܠܳܗܳܐ ܒܪܰܘܡܳܐ: ܘܰܫܠܳܡܳܐ ܒܶܝܬ ܬܰܚܬܳܝ̈ܶܐ܀

ܗܳܐ ܡܫܺܝܚܳܐ ܡܰܠܟܳܐ ܐܶܬܺܝܠܶܕ: ܘܰܐܙܠܶܓ ܢܽܘܗܪܳܐ ܕܦܽܘܪܩܳܢܳܐ. ܠܥܰܡܛܳܢܳܐ ܡܶܢ ܐܰܪܥܳܐ ܐܰܒܥܶܕ: ܘܰܠܟܽܠ ܐ̱ܢܳܫ ܕܢܰܚ ܫܽܘܒܩܳܢܳܐ܀

ܗܰܘ ܕܥܺܝܪ̈ܶܐ ܡܶܢ ܙܺܝܘܶܗ ܟܳܘܙܺܝܢ: ܢܚܶܬ ܒܚܽܘܒܶܗ ܠܒܶܝܬ ܐ̱ܢܳܫܽܘܬܳܐ. ܗܳܐ ܟܽܠ ܥܰܡ̱̈ܡܶܐ ܒܚܰܕܘܳܐ ܪܳܘܙܺܝܢ: ܕܶܐܬܚܰܪܰܪܘ ܡܶܢ ܒܺܝܫܽܘܬܳܐ܀

ܡܗܰܝ̈ܡܢܶܐ ܗܰܒܘ̱ ܩܽܘܒܳܠ ܛܰܝܒܽܘܬܳܐ: ܒܪ̈ܶܟܢܶܐ ܚܠܰܝ̈ܳܐ ܕܒܰܣܺܝܡܺܝܢ. ܬܰܘܕܺܝ ܠܳܟ ܝܶܫܽܘܥ ܚܰܕܽܘܬܳܐ: ܕܰܦܪ̈ܺܝܩܰܘܗܝ ܠܥܳܠܰܡ ܥܳܠܡܺܝܢ܀

ܠܘܛܢܝܐ ܐܚܪܢܐ ܒܩ̄: ܪܢ ܨܘܬ ܦܝ ܒܝܬܠܚܡ - H

ܗܳܐ ܪܳܥܶܡ ܒܳܐܦܰܪܬܳܐ: ܩܳܠ ܚܰܕܘܳܐ ܦܨܺܝܚܳܐ. ܕܝܺܠܝܺܕ ܠܰܡ ܒܰܡܥܰܪܬܳܐ: ܡܳܪܝܳܐ ܡܫܺܝܚܳܐ܀

ܗܦܟܬܐ: ܫܽܘܒܚܳܐ ܠܰܐܠܳܗܳܐ ܒܪܰܘܡܳܐ: ܘܠܰܐܪܥܳܐ ܫܰܝܢܳܐ ܘܰܫܠܳܡܳܐ. ܘܚܰܕܽܘܬܳܐ ܠܟܽܠܶܗ ܥܳܠܡܳܐ. ܝܳܢܶܣܩܳܐ ܫܰܦܺܝܪܳܐ. ܫܰܒܪܽܘܢܳܐ ܛܳܒܳܐ: ܐܰܠܳܗܳܐ ܫܰܪܺܝܪܳܐ ܦܳܪܩܳܐ ܪܰܒܳܐ܀

ܡܶܢ ܪ̈ܰܘܡܶܐ ܥܶܠܳܝ̈ܶܐ: ܙܡܰܪܘ ܚܰܝ̈ܠܰܘܳܬܳܐ. ܘܡܶܢ ܥܽܘܡ̈ܩܶܐ ܬܰܚܬܳܝ̈ܶܐ: ܪ̈ܳܥܰܘܳܬܳܐ܀

ܗܦܟܬܐ: ܫܽܘܒܚܳܐ ܠܰܐܠܳܗܳܐ ܒܪܰܘܡܳܐ: ܘܠܰܐܪܥܳܐ ܫܰܝܢܳܐ ܘܰܫܠܳܡܳܐ. ܘܚܰܕܽܘܬܳܐ ܠܟܽܠܶܗ ܥܳܠܡܳܐ. ܝܳܢܶܣܩܳܐ ܫܰܦܺܝܪܳܐ. ܫܰܒܪܽܘܢܳܐ ܛܳܒܳܐ: ܐܰܠܳܗܳܐ ܫܰܪܺܝܪܳܐ ܦܳܪܩܳܐ ܪܰܒܳܐ܀

ܠܘܛܢܝܐ ܐܚܪܢܐ: - H

ܡܰܠܰܐܟܳܐ ܡܶܢ ܫܶܠܝܳܐ: ܢܚܶܬ ܗܘܳܐ ܡܶܢ ܪܰܘܡܳܐ. ܘܣܰܒܰܪ ܒܚܶܫܟܳܐ ܕܠܺܠܝܳܐ: ܚܰܕܽܘܬܳܐ ܠܥܳܠܡܳܐ܀

ܗܦܟܬܐ: ܐܶܬܺܝ̣ܠܶܕ ܠܟܽܘܢ ܝܰܘܡܳܢܳܐ: ܦܳܪܽܘܩܳܐ ܘܰܡܕܰܒܪܳܢܳܐ. ܗܳܐ ܬܶܚܙܽܘܢ ܥܽܘܠܳܐ: ܪܡܶܐ ܒܰܡܥܰܪܬܳܐ. ܬܶܫܒܽܘܚܬܳܐ ܠܰܐܠܳܗܳܐ ܒܪܰܘܡܳܐ. ܘܒܰܐܪܥܳܐ ܫܰܝܢܳܐ ܘܰܫܠܳܡܳܐ. ܘܣܰܒܪܳܐ ܠܐܢܳܫܽܘܬܳܐ܀

ܙܳܚܘ ܬܶܓܡ̈ܶܐ ܕܢܽܘܪ̈ܳܢܶܐ. ܡܶܢ ܪ̈ܰܘܡܶܐ ܕܰܠܥܶܠ: ܘܥܰܡ ܟܶܢ̈ܫܶܐ ܥܰܦܪ̈ܳܢܶܐ. ܒܰܪܘܳܙܳܐ ܗܰܠܶܠܘ܀

ܗܦܟܬܐ: ܠܰܡܫܺܝܚܳܐ ܡܶܣܬܰܟܝܳܢܳܐ: ܡܶܠܬܶܗ ܕܰܐܒܳܐ ܫܡܰܝܳܢܳܐ. ܕܰܨܒܳܐ ܘܶܐܬܺܝ̣ܠܶܕ ܒܓܰܘ ܐܳܦܰܪܬܳܐ. ܬܶܫܒܽܘܚܬܳܐ ܠܰܐܠܳܗܳܐ ܒܪܰܘܡܳܐ: ܘܒܰܐܪܥܳܐ ܫܰܝܢܳܐ ܘܰܫܠܳܡܳܐ ܘܣܰܒܪܳܐ ܠܐܢܳܫܽܘܬܳܐ܀

ܠܘܛܢܝܐ ܐܚܪܢܐ ܒܩ̄: ܗܳܐ ܐܶܬܝ̣ܠܶܕ ܠܟܽܘܢ - H

ܥܺܝܪܳܐ ܡܶܢ ܪܰܘܡܳܐ: ܐܰܝܬܺܝ̣ ܠܰܣܒܰܪܬܳܐ. ܥܰܠ ܡܶܠܬܶܗ ܕܰܐܒܳܐ: ܕܺܝܠܺܝ̣ܕ ܒܰܡܥܰܪܬܳܐ܀

ܗܦܟܬܐ: ܒܪܰܘܡܳܐ ܬܶܫܒܽܘܚܬܳܐ: ܘܥܰܠ ܐܰܪܥܳܐ ܫܠܳܡܳܐ. ܐܳܦ ܣܰܒܪܳܐ ܛܳܒܳܐ: ܢܶܣܓܶܐ ܠܐܢܳܫܽܘܬܳܐ܀

ܬܶܓ̈ܡܶܐ ܥܶܠܳܝ̈ܶܐ: ܕܙܺܝ̈ܘܶܐ ܢܽܘܪ̈ܳܢܶܐ. ܒܙܰܘܚܳܐ ܡܗܰܠܠܺܝ̣ܢ ܗܘܰܘ: ܒܰܫ̈ܡܰܝ ܐܳܦܰܪܬܳܐ܀

ܗܦܟܬܐ: ܒܪܰܘܡܳܐ ܬܶܫܒܽܘܚܬܳܐ: ܘܥܰܠ ܐܰܪܥܳܐ ܫܠܳܡܳܐ. ܐܳܦ ܣܰܒܪܳܐ ܛܳܒܳܐ: ܢܶܣܓܶܐ ܠܐܢܳܫܽܘܬܳܐ܀

ܫܽܘܒܚܳܐ ܠܗܰܘ ܥܽܘܠܳܐ: ܕܩܰܫܺܝܫ ܡܶܢ ܕܳܪ̈ܶܐ. ܕܰܨܒܳܐ ܗܘܳܐ ܒܚܽܘܒܶܗ: ܘܰܕܢܰܚ ܡܶܢ ܫܒܰܪܬܳܐ܀

ܗܦܟܬܐ: ܒܪܰܘܡܳܐ ܬܶܫܒܽܘܚܬܳܐ: ܘܥܰܠ ܐܰܪܥܳܐ ܫܠܳܡܳܐ. ܐܳܦ ܣܰܒܪܳܐ ܛܳܒܳܐ: ܢܶܣܓܶܐ ܠܐܢܳܫܽܘܬܳܐ܀

ܠܙܘܝܚܐ: - H

ܕܢܰܚ ܢܽܘܗܪܳܐ ܒܗܳܢܳܐ ܝܰܘܡܳܐ: ܒܰܫܡܰܝܳܐ ܕܒܶܝܬ ܠܚܶܡ. ܘܩܳܠܳܐ ܕܬܶܫܒܽܘܚܬܳܐ ܒܪܰܘܡܳܐ: ܒܟܽܠ ܣܰܘܦܺܝ̈ܢ ܗܳܐ ܪܳܥܶܡ܀

ܒܗܳܢ ܠܺܠܝܳܐ ܒܩܽܘܪܝܰܬ ܕܰܘܺܝܕ: ܫܠܳܡܳܐ ܐܰܟܪܶܙ ܥܺܝܪܳܐ: ܘܣܰܒܰܪ ܥܰܠ ܦܳܪܩܳܐ ܕܺܝܠܺܝ̣ܕ: ܒܓܰܘ ܐܽܘܪܝܳܐ ܕܰܒܥܺܝܪܳܐ܀

ܐܳܦܰܪܬܳܐ ܠܳܐ ܗܘܰܝܬܝ̱ ܡܳܟܳܐ: ܒܰܡܕ̈ܺܝ̣ܢܳܬܳܐ ܕܺܝܗܽܘܕ. ܡܶܢܶܟܝ̱ ܓܶܝܪ ܢܶܦܽܘܩ ܡܰܠܟܳܐ. ܘܡܰܠܟܽܘܬ ܥܳܠ̈ܡܶܐ ܢܶܐܚܽܘܕ܀

ܡܶܠܬܶܗ ܕܰܐܒܳܐ ܡܬܽܘܡܳܝܳܐ: ܗܘܳܐ ܐ̱ܢܳܫܳܐ ܥܰܠ ܕܰܨܒܳܐ. ܫܒܰܩ ܟܽܘܪܣܝܶܗ ܠܳܐ ܐܰܝܢܳܝܳܐ: ܘܟܶܢܦܳܐ ܕܰܒܬܽܘܠܬܳܐ ܓܒܳܐ܀

ܠܙܘܝܚܐ ܐܚܪܢܐ ܒܩ̄: ܒܟܽܠܡܶܕܶܡ ܐܶܬܒܰܩܺܝܬ - H

ܒܗܳܢܳܐ ܝܰܘܡܳܐ ܣܰܒܪ̈ܳܬܳܐ: ܒܗܳܢܳܐ ܝܰܘܡܳܐ ܚܰܕ̈ܘܳܬܳܐ. ܕܝܶܠܕܰܬ ܠܰܢ ܡܰܪܝܰܡ ܦܳܪܽܘܩܶܗ ܕܥܳܠܡܳܐ: ܟܰܘܟܒܳܐ ܣܰܒܰܪ ܠܰܡܓܽܘ̈ܫܶܐ ܘܶܐܬܰܘ ܗܘܰܘ ܠܣܶܓܕܬܶܗ: ܘܡܰܠܰܐܟ̈ܶܐ ܘܪ̈ܳܥܰܘܳܬܳܐ ܩܰܪܶܒܘ ܠܶܗ ܣܶܓܕܬܳܐ. ܣܪ̈ܳܦܶܐ ܩܳܥܶܝܢ ܠܶܗ ܩܰܕܺܝܫ. ܘܰܟܪ̈ܽܘܒܶܐ ܒܪܺܝܟ ܡܶܢ ܐܰܬܪܶܗ: ܡܰܪܝܰܡ ܝܳܗܒܳܐ ܠܶܗ ܚܰܠܒܳܐ. ܘܝܰܘܣܶܦ ܙܳܡܰܪ ܬܶܫܒܽܘܚܬܳܐ: ܠܥܰܬܺܝ̣ܩ ܝܰܘ̈ܡܳܬܳܐ ܕܰܒܥܰܙܪܽܘܪ̈ܶܐ ܟܪܺܝܟ܀

ܬܶܗܪܳܐ ܪܰܒܳܐ ܚܰܒܺܝ̈ܒܰܝ: ܕܰܐܝܟܰܢ ܡܶܠܬܳܐ ܐܰܠܳܗܳܐ: ܫܪܳܐ ܒܟܰܪܣܳܐ ܕܡܰܪܝܰܡ ܘܡܶܢܳܗ̇ ܦܰܓܪܳܐ ܠܒܶܫ. ܥܰܠ ܡܶܢ ܐܶܕܢܳܗ̇ ܘܠܳܐ ܬܰܪܥܳܗ̇ ܕܪܽܘܚܳܢܳܐܺܝ̣ܬ ܥ̣ܰܠ. ܥܒܰܕ ܠܶܗ ܦܰܓܪܳܐ ܒܓܰܘ ܟܰܪܣܳܐ ܘܠܰܒܫܶܗ ܘܒܶܗ ܐܶܬܚܙܺܝ. ܫܦܰܪ ܠܶܗ ܘܶܐܬܺܝܠܶܕ ܡܶܢܳܗ̇. ܘܛܰܒ̈ܥܶܐ ܢܛܺܝ̣ܪܺܝܢ ܕܰܒܬܽܘܠܶܝ̈ܗ̇. ܕܽܘܡܳܪܳܐ ܐܺܝܬܰܘܗܝ ܒܰܛܢܶܗ. ܘܬܶܗܪܳܐ ܪܰܒܳܐ ܡܰܘܠܳܕܶܗ. ܒܪܺܝܟ ܕܶܐܬܳܐ ܘܦܰܪܩܰܢ ܒܦܰܓܪܳܐ ܕܡܶܢܰܢ ܢܣܰܒ܀

ܠܙܘܝܚܐ ܐܚܪܢܐ ܒܩ̄: ܚܕܰܘ ܥܰܡ̱̈ܡܶܐ - H

ܚܕܰܘ ܥܰܡ̱̈ܡܶܐ ܚܕܰܘ ܥܰܡ̱̈ܡܶܐ: ܘܰܙܡܰܪܘ ܬܶܫܒܽܘܚܬܳܐ. ܠܰܡܫܺܝܚܳܐ ܕܶܐܬܝܠܶܕ: ܒܓܰܘ ܒܶܝܬ ܠܚܶܡ܀

ܒܢ̈ܳܬ ܨܰܦܪܳܐ ܒܢ̈ܳܬ ܨܰܦܪܳܐ: ܘܰܒܢ̈ܳܬ ܐܺܝܡܳܡܳܐ. ܙܡܰܪ̈ܶܝܢ ܠܶܗ ܬܶܫܒܽܘܚܬܳܐ: ܠܰܒܪܶܗ ܒܡܰܘܠܳܕܶܗ܀

ܡܰܠܰܐܟ̈ܶܐ ܡܰܠܰܐܟ̈ܶܐ: ܘܓܽܘ̈ܕܶܐ ܕܪ̈ܽܘܚܳܢܶܐ. ܙܡܰܪܽܘܢ ܠܶܗ ܬܶܫܒܽܘܚܬܳܐ: ܠܰܒܪܳܐ ܒܡܰܘܠܳܕܶܗ܀

ܚܕܰܘ ܓܰܒ̈ܶܐ ܚܕܰܘ ܓܰܒ̈ܶܐ: ܕܪܰܘܡܳܐ ܘܰܕܥܽܘܡܩܳܐ. ܙܡܰܪܽܘܢ ܠܶܗ ܬܶܫܒܽܘܚܬܳܐ: ܠܰܒܪܳܐ ܒܡܰܘܠܳܕܶܗ܀

ܥܺܕ̈ܳܬܳܐ ܥܺܕ̈ܳܬܳܐ: ܘܟܽܠܗܶܝܢ ܕܰܝܪ̈ܳܬܳܐ: ܙܡܰܪ̈ܶܝܢ ܠܶܗ ܬܶܫܒܽܘܚܬܳܐ: ܠܰܒܪܳܐ ܒܡܰܘܠܳܕܶܗ܀

ܠܳܟ ܫܽܘܒܚܳܐ ܒܟܽܠ ܥܶܕܳܢ: ܡܳܪܝܳܐ ܡܫܺܝܚܳܐ. ܕܰܒܝܰܠܕܳܟ ܐܶܬܦܰܪܩܰܬ: ܥܺܕܰܬ ܩܽܘܕܫܳܐ܀

ܗܫܐ ܚܙܝ ܛܟܣܐ ܕܝܠܕܐ ܦܪܘܩܝܐ

ܚܘܬܡܐ ܒܩ̄: ܗܰܒܠܰܢ ܡܳܪܰܢ - H

ܩܳܠ ܡܰܠܰܐܟ̈ܶܐ ܪܥܶܡ ܒܗܳܢ ܠܺܠܝܳܐ: ܕܰܡܣܰܒܰܪ ܫܠܳܡܳܐ ܠܟܽܠ ܐܶܡ̈ܘܳܬܳܐ: ܕܗܳܐ ܐܶܬܺܝ̣ܠܶܕ ܡܳܪܝܳܐ ܡܫܺܝܚܳܐ: ܕܠܶܗ ܣܰܟܺܝܘ ܟܺܐܢ̈ܶܐ ܒܟܽܠ ܕܳܪ̈ܰܝܗܽܘܢ܀