ܛܟܣܐ ܕܝܠܕܐ ܦܪܘܩܝܐ
ܢܽܘܗܳܪܳܐ
ܒܰܙܒܰܢ ܩܽܘܪܳܒܳܐ ܘܰܒܫܽܘܠܳܡ ܬܶܫܡܶܫܬܳܐ ܕܝܳܠܕܰܬ ܐܰܠܳܗܳܐ ܘܰܕܩܰܕܺܝ̣̈ܫܶܐ. ܢܳܦܩܺܝ̣ܢ ܟܽܠܗܽܘܢ ܩܰܫܺܝ̣̈ܫܶܐ ܘܰܡܫܰܡ̈ܫܳܢܶܐ ܒܬܰܪܬܶܝܢ ܓܽܘ̣̈ܕܺܝܢ ܒܬܰܪܥܳܐ ܓܰܪܒܝ݂ܳܝ݂ܳܐ ܕܡܰܕܒܚܳܐ܆ ܟܰܕ ܠܒܺܝܫܺܝ̣ܢ ܛܶܟܣܰܝ̈ܗܽܘ̇ܢ܆ ܘܰܛܥܺܝܢܺܝܢ ܦܺܝܪܡܳܐ ܘܡܰܪ̈ܘܚܳܬܳܐ ܘܰܐܚܺܝܕ ܟܽܠ ܚܰܕ ܡܶܢܗܽܘ̇ܢ ܩܶܪܝܽܘܢܳܐ ܒܺܐܝ̣ܕܶܗ. ܘܶܐܢ ܫܟܺܝ̣ܚ ܡܺܝܛܪܳܦܳܘܠܺܝܛܳܐ ܗ̣ܽܘ ܢܶܬܪܰܫܰܢ ܟܰܕ ܠܒܺܝܫ ܛܶܟܣܶܗ ܘܰܛܥܺܝ̣ܢ ܨܠܺܝܒܳܐ ܒܝܰܡܝ̣ܢܶܗ ܘܡܽܘ̣ܪܳܢܺܝ̣ܬܳܐ ܒܣܶܡܳܠܶܗ. ܘܶܐܢ ܠܳܐ܆ ܚܰܕ ܡܶܢ ܩܰܫܺܝ̣̈ܫܶܐ ܢܶܬܪܰܫܰܢ ܘܢܶܛܥܰܢ ܨܠܺܝܒܳܐ ܒܬܰܪ̈ܬܰܝܗܶܝܢ ܐܺܝ̣ܕܰܘ̈ܗ̱ܝ. ܘܥܳܒܕܺܝ̣ܢ ܟܪܽܘܟܝܳܐ܆ ܘܳܐܬܶܝܢ ܠܰܡܨܰܥܬܳܐ ܕܥܺܕ̱ܬܳܐ ܐܰܘ ܠܕܳܪܬܳܐ܆ ܐܶܢ ܐܺܝ̣ܬ ܥܶܕܳܢܳܐ ܘܙܰܒܢܳܐ ܝܳܗܶܒ ܐܺܝ̣ܕܳܐ. ܘܳܐܡܪܺܝܢ ܩܽܘܩܰܠܝܽܘܢ ܘܥܶܩܒܳܐ ܘܚܽܘܣܳܝܳܐ ܘܩܳܠܳܐ ܘܒܳܥܽܘ̣ܬܳܐ ܕܡܳܪܝ̱ ܝܰܥܩܽܘ̣ܒ. ܘܣܳܠܩܺܝ̣ܢ ܠܒܺܐܡܰܐ ܘܳܐܡܪܺܝ̣ܢ ܙܽܘܡܳܪܳܐ ܘܩܳܪܶܝܢ ܚܰܕ ܡܶܢ ܩܶܪ̈ܝܳܢܶܐ ܕܥܰܬܺܝ̣ܩܬܳܐ. ܟܶܢ ܢܳܚܬܺܝ̣ܢ ܐܳܬܶܝܢ ܠܬܰܝܡܢܳܐ ܘܥܳܐܠܺܝܢ ܠܡܰܕܒܚܳܐ܆ ܘܳܐܡܪܺܝܢ ܙܽܘܡܳܪܳܐ ܘܩܳܪܶܝܢ ܫܠܺܝܚܳܐ܆ ܘܳܐܡܪܺܝܢ ܗܽܘܠܳܠܳܐ ܘܦܶܬܓܳܡܳܐ܆ ܘܩܳܪܶܝܢ ܐܶܘܰܢܓܶܠܝܽܘܢ ܗܰܘ ܕܰܒܠܽܘܩܳܘܣ܆ ܘܒܰܡܨܰܥܬܶܗ ܐܳܡܪܺܝ̣ܢ ܨܠܽܘ̣ܬܳܐ «ܕܬܶܫܒܽܘܚܬܳܐ ܠܰܐܠܳܗܳܐ ܒܰܡܪ̈ܰܘܡܶܐ» ܘܥܰܡ ܫܽܘܪܳܝܳܗ̇ ܥܳܒܕܺܝ̣ܢ ܓܽܘ̣ܘܙܳܠܳܐ ܕܢܽܘ̣ܪܳܐ܆ ܘܟܳܪܟܺܝ̣ܢ ܚܕܳܪ̈ܰܘܗ̱ܝ܆ ܘܰܒܫܽܘ̣ܠܳܡܳܗ̇ ܚܳܬܡܺܝܢ ܠܶܐܘܰܢܓܶܠܝܽܘܢ ܘܡܰܩܦܺܝ̣ܢ «ܡܳܪܰܢ ܝܶܫܽܘܥ ܡܫܺܝܚܳܐ ܬܰܪܥܳܐ ܕܪ̈ܰܚܡܰܝܟ»܆ ܒܳܬܰܪܟܶܢ ܡܙܰܝܚܺܝ̣ܢ ܠܰܨܠܺܝܒܳܐ ܨܠܺܝܒܳܐܺܝܬ ܠܰܐܪܒܰܥ ܦܶܢ̈ܝܳܢ܀
ܩܠܐ: ܒܩ̄ ܒܟܽܠܡܶܕܶܡ ܐܶܬܒܰܩܺܝ̣ܬ
ܒܬܽܘ̣ܠܬܳܐ ܝܶܠܕܰܬ݂ ܕܽܘ̣ܡܳܪܳܐ܆ ܬܰܘ ܢܺܐܙܰܠ ܢܶܬܒܰܩܶܐ ܒܶܗ܆ ܒܩܰܫܺܝ̣ܫ ܡܶܢ ܕܳܪ̈ܶܐ ܕܰܒܥܰܙܪ̈ܽܘ̣ܪܶܐ ܟܪܺܝܟ܆ ܣܳܒܳܐ ܥܰܬܺܝ̣ܩ ܝܰܘ̈ܡܳܬܳܐ ܕܺܝܠܶܕܬܶܗ ܒܬܽܘ̣ܠܬܳܐ܆ ܓܰܢ̱ܒܳܪܳܐ ܕܰܬܩܰܠ ܛܽܘ̣ܪ̈ܶܐ ܕܙܰܝܰܚܬܶܗ ܥܠܰܝܡܬܳܐ܆ ܗܽܘ ܝܳܗܶܒ ܠܰܚܡܳܐ ܠܟܰܦ̈ܢܶܐ܆ ܝܢܶܩ ܚܰܠܒܳܐ ܐܰܝܟ ܫܰܒܪܳܐ܆ ܒܪܳܐ ܕܠܰܝܬ ܗ̱ܘܳܐ ܠܶܗ ܫܽܘܪܳܝܳܐ܆ ܨܒܳܐ ܘܰܗܘܳܐ ܠܶܗ ܫܽܘ̣ܪܳܝܳܐ܆ ܘܶܐܬܳܐ ܠܡܰܘܠܳܕܳܐ. ܘܫܽܘ̣ܠܳܡܳܐ ܠܰܝܬ ܠܶܗ܀
ܫܡܳܗ̈ܶܐ ܪ̈ܓܺܝ̣ܓܶܐ ܘܫܰܦܺܝ̣ܪ̈ܶܐ܆ ܩܪܰܐܘܽܘܗ̇ ܟܺܐܢ̈ܶܐ ܩܰܕܡܳܝ̈ܶܐ܆ ܠܡܰܪܝܰܡ ܒܰܪ̱ܬ ܕܰܘܺܝ̣ܕ ܒܬܽܘ̣ܠܬܳܐ ܩܰܕܺܝ̣ܫܬܳܐ܆ ܚܰܙܩܺܝ̣ܐܶܝܠ ܒܰܪ ܓܳܠܽܘ̣ܬܳܐ ܬܰܪܥܳܐ ܕܰܐܚܺܝ̣ܕ ܩܪܳܗ̇܆ ܫܠܶܝܡܽܘܢ ܓܰܢܬܳܐ ܐܰܚܺܝ̣ܕܬܳܐ ܘܰܡܥܺܝ̣ܢܳܐ ܚܬܺܝ̣ܡܬܳܐ܆ ܕܰܘܺܝ̣ܕ ܡܕܺܝܢ̱ܬܳܐ ܫܰܡܗܳܗ̇ ܗ̱ܘܳܐ܆ ܘܰܡܫܺܝ̣ܚܳܐ ܥܶܣܒܳܐ ܒܓܰܘܳܗ̇܆ ܕܰܕܠܳܐ ܙܰܪܥܳܐ ܫܘܰܚ ܡܶܢܳܗ̇܆ ܘܰܗܘܳܐ ܬܽܘ̣ܪܣܳܝܳܐ ܠܥܰܡ̱̈ܡܶܐ܆ ܘܪܰܡܪܶܡ ܕܽܘ̣ܟܪܳܢܳܗ̇ ܒܰܫܡܰܝܳܐ ܘܒܰܐܪܥܳܐ܀
ܒܕܽܘ̣ܟܪܳܢܳܗ̇ ܕܰܡܒܰܪܰܟܬܳܐ܆ ܒܬܽܘ̣ܠܬܳܐ ܝܳܠܕܰܬ ܐܰܠܳܗܳܐ܆ ܚܳܕ̈ܝܳܢ ܒܶܪ̈ܝܳܬܳܐ ܘܬܶܫܒܽܘܚܬܳܐ ܙܳܡܪ̈ܳܢ܆ ܠܒܰܪ ܛܳܒܳܐ ܕܰܕܢܰܚ ܡܶܢܳܗ̇ ܘܚܰܪܪܰܢ ܡܶܢ ܠܰܘܛܬܳܐ܆ ܘܰܒܠܰܥ ܦܰܟܳܐ ܒܶܝܬ ܕܺܝ̣ܢܳܐ ܘܠܰܓܙܳܪ ܕܺܝ̣ܢܳܐ ܫܪܳܐ܆ ܘܰܐܦܢܺܝ ܠܳܐܕܳܡ ܘܰܠܝ̈ܰܠܕܰܘܗ̱ܝ܆ ܠܦܰܪܕܰܝܣܳܐ ܕܰܢܦܰܩܘ ܡܶܢܶܗ܆ ܘܗܳܐ ܦܪܺܝ̣ܩܺܝ̣ܢ ܥܰܡ̱̈ܡܶܐ ܒܰܕܡܶܗ܆ ܘܥܺܕܬܳܐ ܡܟܺܝ̣ܪܬܶܗ ܚܳܕܝܳܐ ܒܶܗ܆ ܘܶܐܡܳܐ ܕܺܝܠܶܕܬܶܗ ܫܽܘܒܚܳܐ ܠܶܗ ܙܳܡܪܳܐ܀
ܡܰܪܟܰܒܬܳܐ ܗܳܝ ܕܰܚܙܳܐ ܗ̱ܘܳܐ܆ ܢܒܺܝܳܐ ܓܰܒܝܳܐ ܚܰܙܩܺܝ̣ܐܝܶܠ܆ ܠܳܐ ܦܳܚܡܳܐ ܒܫܽܘܦܪ̈ܰܝܟܝ̱ ܒܬܽܘ̣ܠܬܳܐ ܩܰܕܺܝ̣ܫܬܳܐ܆ ܕܰܟܕܺܝ̈ܢܳܢ ܒܳܗ̇ ܚܰܝ̈ܘܳܬܳܐ ܟܪ̈ܽܘܒܶܐ ܕܰܡܒܰܪܟܺܝ̣ܢ܆ ܕܶܡܘ̈ܳܬܳܐ ܕܰܐܪܒܰܥ ܐܰܦܺܝ̈ܢ ܕܡܶܢ ܚܕܳܕ̈ܶܐ ܡܫܰܚ̈ܠܦܳܢ: ܕܡܽܘ̣ܬܳܐ ܕܰܐܪܝܳܐ ܘܰܕܬܰܘܪܳܐ ܘܰܕܢܶܫܪܳܐ ܘܰܕܒܰܪܢܳܫܳܐ܆ ܐܰܢ̱ܬܝ̱ ܕܶܝܢ ܐܶܡܳܐ ܡܒܰܪܰܟܬܳܐ܆ ܒܽܘ̣ܪ̈ܟܰܝܟܝ̱ ܗ̱ܘܰܝ̈ ܠܶܗ ܡܰܪܟܰܒܬܳܐ܆ ܘܰܕܪ̈ܳܥܰܝܟܝ̱ ܓܺܝ̣̈ܓܠܶܐ ܘܦܽܘ̣ܡܶܟܝ̱ ܫܽܘܒܚܳܐ ܙܡܰܪ܀
ܘܟܰܕ ܡܳܛܶܝܢ ܩܕܳܡ ܡܰܕܒܚܳܐ ܡܫܰܪܶܐ ܟܳܗܢܳܐ:
ܨܠܽܘ̣ܬܳܐ ܕܫܽܘ̣ܪܳܝܳܐ
ܐܰܫܘܳܐ ܠܰܢ ܡܳܪܝܳܐ ܐܰܠܳܗܳܐ ܕܥܰܡ ܣܪ̈ܳܦܶܐ ܩܰܕܺܝ̣̈ܫܶܐ ܢܩܰܕܫܳܟ ܕܠܳܐ ܥܽܘܩܳܒ܆ ܘܥܰܡ ܟܪ̈ܽܘܒܶܐ ܒܪ̈ܺܝ̣ܟܶܐ ܢܒܰܪܟܳܟ ܕܠܳܐ ܦܽܘܠܳܓ܆ ܘܥܰܡ ܡܳܪ̈ܰܘܳܬܳܐ ܪ̈ܳܡܶܐ ܢܪܰܡܪܡܳܟ ܕܠܐ ܥܽܘܘܳܟ܆ ܘܥܰܡ ܥܶܠܳܝ̈ܶܐ ܢܥܰܕܥܶܕ ܠܳܟ ܕܠܳܐ ܥܶܕܠܳܝ܆ ܘܥܰܡ ܪ̈ܳܥܰܘܳܬܳܐ ܬܰܡܺܝ̣̈ܡܶܐ ܢܝܰܒܶܒ ܠܳܟ݂ ܕܠܳܐ ܩܽܘܛܳܥ܆ ܘܥܰܡ ܡܓܽܘ̈ܫܶܐ ܦܳܪ̈ܽܘܫܶܐ ܢܶܣܓܽܘܕ ܠܳܟ ܕܠܳܐ ܫܽܘܚܠܳܦ܆ ܘܥܰܡ ܡܰܪܝܰܡ ܕܺܝܠܶܕܬܳܟ ܢܶܚܕܶܐ ܒܳܟ ܕܠܳܐ ܫܽܘܠܳܡ. ܗܳܫܳܐ ܘܰܒܟܽܠܙܒܰܢ ܠܥܳܠܰܡ ܥܳܠܡܺܝܢ܀
ܩܽܘ̣ܩܰܠܝܽܘܢ ܒܩܺܝܢܬܳܐ ܩܰܕܡܳܝܬܳܐ ܡܶܢ ܡܰܙܡܽܘ̣ܪܳܐ ܬܪܰܝܳܢܳܐ
ܡܳܪܝܳܐ ܐܶܡ̣ܰܪ ܠܝ̣ ܕܒܶܪܝ̱ ܐܰܢ̱ܬ ܗ̄ܘܗ̄ ܘܶܐܢܳܐ ܝܰܘܡܳܢܳܐ ܝܺܠܶܕܬܳܟ܀
ܫܰܐܠ ܡܶܢܝ ܘܶܐܬܶܠ ܠܳܟ ܗ̄ܘܗ̄ ܥܰܡ̱̈ܡܶܐ ܠܝܳܪܬܽܘܬܳܟ܀
ܘܽܐܘܚܕ̈ܳܢܰܝܟ ܥܶܒܪ̈ܶܝܗ̇ ܕܰܐܪܥܳܐ. ܗ̄ܘܗ̄ ܬܰܪܥܶܐ ܐܶܢܽܘܢ ܒܫܰܒܛܳܐ ܕܦܰܪܙܠܳܐ܀
ܘܰܐܝܟ ܡܳܐܢܰܝ̈ ܦܰܚܳܪܳܐ ܬܢܰܦܶܨ ܐܶܢܽܘܢ ܗ̄ܘܗ̄ ܗܳܫܳܐ ܡܰܠܟ̈ܶܐ ܐܶܣܬܰܟܰܠܘ̱܀
ܫܽܘܒܚܳܐ ܘܥܶܩܒܳܐ
ܡܫܺܝ̣ܚܳܐ ܐܶܬܺܝ̣ܠܶܕ܆ ܒܓܰܘ ܒܶܝܬ ܠܚܶܡ܆ ܘܡܶܢ ܡܰܕܢܚܳܐ܆ ܡܓܽܘ̈ܫܶܐ ܐܶܬܰܘ ܠܺܐܝ̣ܩܳܪܶܗ܆ ܡܫܰܐܠܺܝ̣ܢ ܗ̱ܘܰܘ ܘܳܐܡܪܺܝ̣ܢ: ܕܰܐܝܟܳܐ ܐܶܬܺܝ̣ܠܶܕ܆ ܡܰܠܟܳܐ ܕܠܰܫܠܳܡܶܗ ܐܶܬܰܝܢ. ܕܢܶܒܪܽܘܟ ܘܢܶܣܓܽܘܕ ܠܶܗ܀
ܡܫܰܡܫܳܢܳܐ: ܣܛܰܘܡܶܢ ܩܰܠܳܘܣ ܩܽܘܪܝܶܠܰܝܣܳܘܢ
ܦܪܽܘ̣ܡܝܽܘܢ
ܬܶܫܒܽܘܚܬܳܐ ܠܗ̇ܰܘ ܝܰܠܕܳܐ ܡܬܽܘ̣ܡܳܝܳܐ ܕܡܶܛܽܠ ܦܽܘ̣ܪܩܳܢܰܢ ܐܶܬܳܐ ܠܡܰܘܠܳܕܳܐ ܦܰܓܪܳܢܳܝܳܐ ܕܡܶܢ ܒܬܽܘ̣ܠܬܳܐ ܡܰܠܝܰܬ݂ ܛܰܝܒܽܘ̣ܬܳܐ܆ ܗܰܘ ܕܰܢܒܺܝ̈ܶܐ ܐܰܟܪܶܙܘ̱ ܡܶܐܬܺܝ̣ܬܶܗ܆ ܗܰܘ ܕܓܰܒܪܺܐܶܝܠ ܣܰܒܪܶܗ ܠܐ̱ܪܳܙܳܐ ܕܒܰܛܢܶܗ ܠܰܒܬܽܘ̣ܠܬܳܐ܆ ܗܰܘ ܕܰܫܠܺܝ̣̈ܚܶܐ ܝܰܒܶܒܘ̱ ܣܒܰܪܬܶܗ܆ ܘܰܡܓܽܘ̈ܫܶܐ ܪܗܶܛܘ̱ ܠܣܶܓܕܬܶܗ܆ ܘܪ̈ܳܥܰܘܳܬܳܐ ܐܶܬܬܰܒܪܰܩܘ̱ ܒܬܶܫܒܽܘ̣ܚܬܶܗ܆ ܘܥܳܠܡܳܐ ܟܽܠܶܗ ܚܝܳܐ ܒܕܶܢܚܶܗ܆ ܕܠܶܗ ܝܳܐܶܐ ܫܽܘܒܚܳܐ ܘܐܺܝ̣ܩܳܪܳܐ ܘܐܽܘܚܕܳܢܳܐ ܒܗܳܢܳܐ܀
ܣܶܕܪܳܐ
ܡܰܢܽܘ̣ ܕܰܐܝܟ ܕܫܳܘܶܐ ܢܫܰܒܰܚ ܠܡܶܬܒܰܣܪܳܢܽܘ̣ܬܳܟ ܦܳܪܽܘ̣ܩܳܝܬܳܐ ܘܡܰܥܒܕܰܬ݂ ܚܰܝ̈ܶܐ ܡܫܺܝܚܳܐ ܐܰܠܳܗܳܐ܆ ܗܰܘ ܕܟܰܕ ܚܙܰܝܬ ܠܓܶܢܣܰܢ ܐ̱ܢܳܫܳܝܳܐ܆ ܕܰܒܚܺܐܦܳܐ ܠܬܰܚܬ ܡܶܬܬܰܝܬܶܐ ܗ̱ܘܳܐ܆ ܘܠܰܐܒܕܳܢܳܐ ܓܡܺܝ̣ܪܳܐ ܘܠܰܚܒܳܠܳܐ ܡܫܰܡܠܝܳܐ ܡܶܫܬܰܪܓܰܠ ܗ̱ܘܳܐ. ܐܰܢ̱ܬ ܒܪܳܐ ܡܬܽܘܡܳܝܳܐ ܕܰܐܒܳܐ ܡܬܽܘ̣ܡܳܝܳܐ܆ ܒܟܰܪܣܳܗ̇ ܕܰܒܬܽܘ̣ܠܬܳܐ ܩܰܕܺܝ̣ܫܬܳܐ ܐܰܓܶܢܬ܆ ܘܡܶܢܝܳܢܳܐ ܕܝܰܪ̈ܚܶܐ ܬܶܫܥܳܐ ܡܰܠܺܝܬ܆ ܘܶܐܬܺܝ̣ܠܶܕܬ ܡܶܢܳܗ̇ ܒܶܣܪܳܢܳܐܺܝܬ ܠܥܶܠ ܡܶܢ ܛܶܟܣܳܐ ܕܰܟܝܳܢܳܐ܆ ܘܰܕܢܰܚܬ ܘܰܢܦܰܩܬ ܡܶܢܳܗ̇ ܒܝܰܠܕܳܐ. ܐܰܠܳܗܳܐ ܡܫܰܡܠܝܳܐ ܘܒܰܪܢܳܫܳܐ ܡܫܰܡܠܝܳܐ܆ ܠܰܘ ܓܶܝܪ ܬܪܶܝܢ ܐܶܬܺܝ̣ܕܰܥܬ ܐܰܘ ܒܰܬܪܶܝܢ܆ ܐܶܠܳܐ ܡܶܢ ܬܪܶܝܢ ܟܝܳܢܺܝ̣̈ܢ ܕܰܠܚܰܕ ܪܗܶܛܘ̱ ܘܶܐܬܚܰܝܰܕܘ܆ ܕܰܐܠܳܗܽܘܬܳܐ ܡܰܢ ܟܺܝܬ ܘܰܕܐ̱ܢܳܫܽܘ̣ܬܳܐ܆ ܚܰܕ ܟܝܳܢܳܐ ܕܠܳܐ ܫܽܘܚܠܳܦܳܐ ܘܰܕܠܳܐ ܡܽܘ̣ܙܳܓܳܐ ܐܶܬܗܰܝܡܰܢܬ. ܘܰܠܝܳܠܶܕܬܳܟ ܕܠܳܐ ܣܽܘ̣ܓܦܳܢܳܐ ܒܬܽܘ̣ܠܳܐܺܝܬ ܫܰܘܙܶܒܬ܆ ܘܡܶܢ ܒܳܬܰܪ ܡܰܘܠܳܕܳܟ ܕܡܶܢܳܗ̇ ܩܰܕܺܝ̣ܫܳܐܺܝܬ܆ ܒܬܽܘ̣ܠܬܳܐ ܕܠܳܐ ܡܽܘ̣ܡ ܢܛܰܪܬܳܗ̇܆ ܘܝܰܠܕܳܐ ܕܰܦ̇ܐ̣ܶܐ ܠܰܐܠܳܗܳܐ ܡܶܢܳܗ̇ ܬܗܺܝ̣ܪܳܐܺܝܬ ܐܶܬܺܝ̣ܠܶܕܬ. ܘܰܒܝܰܘܡܳܐ ܫܒܺܝ̣ܚܳܐ ܕܡܰܘܠܳܕܳܟ܆ ܠܟܽܠܳܗ̇ ܒܪܺܝ̣ܬܳܐ ܚܰܕܽܘ̣ܬܳܐ ܘܰܪܘܳܙܳܐ ܡܠܰܝܬ܆ ܠܰܐܪܥܳܐ ܡܰܢ ܬܽܘܒ ܫܡܰܝܳܐ ܥܒܰܕܬ܆ ܘܡܰܠܰܐܟ̈ܶܐ ܒܰܒܢܰܝ̈ܢܳܫܳܐ ܚܰܠܶܛܬ. ܐܽܘ̣ܪܝܳܐ ܓܶܝܪ ܗܰܘ ܕܒܶܗ ܪܡܷ̇ܐ̣ ܗ̱ܘܰܝܬ܆ ܡܶܢ ܡܰܠܰܐܟ̈ܶܐ ܡܶܬܟܪܶܟ ܗ̱ܘܳܐ܆ ܟܰܕ ܡܝܰܒܒܺܝ̣ܢ ܗ̱ܘܰܘ ܘܳܐܡܪܺܝ̣ܢ: ܫܽܘܒܚܳܐ ܠܰܐܠܳܗܳܐ ܒܰܡܪ̈ܰܘܡܶܐ: ܘܥܰܠ ܐܰܪܥܳܐ ܫܠܳܡܳܐ ܘܫܰܝܢܳܐ ܘܣܰܒܪܳܐ ܛܳܒܳܐ ܠܰܒܢܰܝ̈ܢܳܫܳܐ. ܘܰܣܪ̈ܳܦܶܐ ܢܽܘ̣ܪ̈ܳܢܶܐ ܒܰܛܪܳܦ ܓܶܦܰܝ̈ܗܽܘ̇ܢ ܫܓܺܝ̣ܫܺܝ̣ܢ ܗ̱ܘܰܘ. ܪ̈ܳܥܰܘܳܬܳܐ ܡܰܢ ܬܘ̣ܒ ܟܰܕ ܡܶܢ ܡܰܠܰܐܟ̈ܶܐ ܐܶܬܶܐܪܶܙܘ̱܆ ܥܰܠ ܝܰܠܕܳܟ ܬܗܺܝ̣ܪܳܐ ܡܣܰܒܪܺܝ̣ܢ ܗ̱ܘܰܘ܆ ܘܰܠܫܽܘܪܳܪܳܐ ܕܰܣܒܰܪܬܳܐ ܠܰܡܥܰܪܬܳܐ ܕܒܶܝܬܠܚܶܡ ܪܳܗܛܺܝ̣ܢ ܗ̱ܘܰܘ. ܓܽܘ̣ܕܳܐ ܕܶܝܢ ܗܳܝ ܕܰܢܒܺܝ̈ܶܐ ܒܺܝ̣ܠܺܝ̣ܕܽܘܬܳܟ ܡܰܚܝܳܢܺܝ̣ܬܳܐ ܪܳܘܙܳܐ ܗ̱ܘܳܬ܆ ܕܒܳܗ̇ ܐܶܬܦܰܫܰܩ̈ܝ̱ ܡܶܠܰܝ̈ܗܽܘ̇ܢ. ܡܰܠܰܐܟܳܐ ܒܪܰܘܡܳܐ ܒܰܕܡܽܘ̣ܬ ܟܰܘܟܒܳܐ ܠܰܡܓܽܘ̣̈ܫܶܐ ܡܶܬܚܙܶܐ ܗ̱ܘܳܐ܆ ܐܰܝܟܰܢܳܐ ܕܰܒܩܽܘ̣ܪ̈ܒܳܢܶܐ ܬܠܺܝ̣ܬܳܝ̈ܶܐ ܠܣܶܓܕܬܳܐ ܕܡܰܠܟܳܐ ܪܰܒܳܐ ܘܰܐܠܳܗܳܐ ܕܶܐܬܺܝ̣ܠܶܕ ܓܽܘ̣ܫܡܳܢܳܐܺܝܬ ܡܶܢ ܒܬܽܘ̣ܠܬܳܐ ܢܺܐܬܽܘܢ ܗ̱ܘܰܘ. ܡܰܪܝܰܡ ܕܶܝܢ ܐܶܡܳܐ ܡܒܰܪܰܟܬܳܐ܆ ܬܶܫܒܽܘܚܬܳܐ ܘܣܶܓܕܬܳܐ ܥܰܡ ܢܽܘܨܪ̈ܳܬܳܐ ܪ̈ܚܺܝ̣ܡܳܬܳܐ ܠܳܟ ܡܩܰܪܒܳܐ ܗ̱ܘܳܬ. ܝܰܘܣܶܦ ܬܘ̣ܒ ܗܰܘ ܟܺܐܢܳܐ ܕܡ̣ܶܢ ܢܳܨܪܰܬ܆ ܒܩܰܕܺܝ̣ܫܽܘ̣ܬܳܐ ܘܒܺܐܝܩܳܪܳܐ ܠܳܗ̇ ܠܝܳܠܶܕܬܳܟ ܐܰܚܺܝ̣ܕ ܗ̱ܘܳܐ ܘܰܡܝܰܩܰܪ ܙܗܺܝ̣ܪܳܐܺܝܬ܆ ܐܰܝܟ ܕܠܰܐܝܕܳܐ ܕܠܰܐܠܳܗܳܐ ܝܶܠܕܰܬ݂܆ ܘܒܺܐܝܕܶܝ̈ܗ̇ ܐܶܫܬܘܺܝ ܕܢܶܬܩܪܶܐ ܐܰܒܳܐ ܠܡܶܬܒܰܣܪܳܢܽܘ̣ܬܳܟ ܗܳ̇ܝ ܕܰܕܠܳܐ ܙܽܘܘܳܓܳܐ ܘܰܕܠܳܐ ܢܶܩܦܳܐ ܕܓܰܒܪܳܐ ܗܘܳܬ. ܘܒܰܕܓܽܘ̇ܢ ܐܳܦ ܚܢܰܢ ܚܰܛܳܝ̈ܶܐ ܥܰܒ̈ܕܶܐ ܕܺܝ̣ܠܳܟ ܕܶܐܫܬܘܺܝ̣ܢܰܢ ܕܺܝ̣ܠܺܝܕܽܘܬܳܟ ܕܒܰܒܣܰܪ ܢܝܰܩܰܪ ܘܰܢܥܰܕܥܶܕ܆ ܡܶܬܟܰܫܦܺܝ̣ܢܰܢ ܠܪ̈ܰܚܡܰܝܟ܆ ܕܠܳܐ ܠܥܳܠܰܡ ܬܶܛܰܪ ܠܰܢ ܠܳܐ ܢܳܡܽܘܣܳܝ̈ܘܳܬܳܐ ܕܺܝ̣ܠܰܢ܆ ܐܶܠܳܐ ܟܰܕ ܡܶܬܕܟܰܪ ܐܰܢ̱ܬ ܡܳܪܝܳܐ܆ ܕܝܰܨܪܳܐ ܗ̱ܝ ܒܺܝ̣ܫܳܐ ܡܰܚܫܰܒܬܰܢ. ܠܳܐ ܬܶܥܽܘܠ ܠܕܺܝ̣ܢܳܐ ܥܰܡܰܢ܆ ܡܶܛܽܠ ܗܳܝ ܕܰܒܡܶܬܒܰܪܢܫܳܢܽܘ̣ܬܳܟ ܡ̣ܶܢ ܛܪܽܘܢܽܘ̣ܬܶܗ ܕܳܐܟܶܠܩܰܪܨܳܐ ܐܰܥܕܺܝ̣ܬ ܠܰܢ. ܐܶܠܳܐ ܐܰܫܘܳܐ ܠܰܢ ܒܪܶܚܡܰܬ݂ ܐ̱ܢܳܫܽܘܬܳܐ ܕܺܝ̣ܠܳܟ ܠܥܰܕܥܺܐܕܳܐ ܗܰܘ ܛܽܘ̣ܒܬܳܢܳܐ ܘܥܰܬܺܝ̣ܪ ܒܫܽܘ̣ܦܪ̈ܶܐ ܐܰܠܳܗܳܝ̈ܶܐ܆ ܘܰܠܫܽܘܒܚܳܐ ܗܰܘ ܕܰܢܛܺܝ̣ܪ ܠܰܓܡܺܝܪ̈ܶܐ. ܐܰܝܟܰܢܳܐ ܕܰܒܓܽܘ̈ܕܶܐ ܣܒܺܝ̈ܣܳܬ ܒܛܽܘ̣ܒܬܳܢܽܘ̣ܬܳܐ ܢܶܬܚܰܠܰܛ. ܘܫܽܘܒܚܳܐ ܡܬܽܘ̣ܡܳܝܳܐ ܘܠܳܐ ܙܰܒܢܳܝܳܐ ܠܰܐܒܽܘܟ ܘܰܠܪܽܘ̣ܚܳܟ ܛܽܘܒܬܳܢܳܐ ܘܡܰܥܒܶܕ ܚܰܝ̈ܶܐ ܘܰܫܘܶܐ ܠܳܟ ܒܽܐܘܣܺܝܰܐ ܢܩܰܪܶܒ. ܗܳܫܳܐ ܘܰܒܟܽܠܙܒܰܢ ܠܥܳܠܰܡ ܥܳܠܡܺܝܢ ܐܰܡܺܝܢ܀
ܩܠܐ: ܒܩ̄ ܕܩܽܘ̣ܩܳܝܳܐ
ܒܗܳܢܳܐ ܝܰܘܡܳܐ ܕܡܰܘܠܳܕܳܟ ܒܰܪ ܐܰܠܳܗܳܐ܆ ܚܳܕܶܝܢ ܒܶܗ ܫܡܰܝܳܐ ܘܰܐܪܥܳܐ ܘܒܶܪ̈ܝܳܬܳܐ ܟܽܠܗܶܝܢ܆ ܥܺܝܪ̈ܶܐ ܩܳܥܶܝܢ܆ ܬܶܫܒܽܘܚܬܳܐ ܒܪܰܘܡܳܐ܆ ܐܳܦ ܡܰܠܰܐܟ̈ܶܐ܆ ܫܠܳܡܳܐ ܥܰܠ ܐܰܪܥܳܐ. ܘܪ̈ܳܥܰܘܳܬܳܐ ܘܰܡܓܽܘ̣̈ܫܶܐ ܒܩܽܘ̣ܪ̈ܒܳܢܰܝܗܽܘ̇ܢ܆ ܘܥܰܡ̱̈ܡܶܐ ܛܽܘ̣ܗ̈ܡܶܐ ܘܫܰܪ̈ܒܳܬܳܐ ܬܶܫܒܽܘܚܬܳܐ ܙܳܡܪܺܝ̣ܢ ܗ̄ ܠܝܰܠܕܳܟ ܡܰܐܚܶܐ ܟܽܠ܀
ܫܽܘܒܚܳܐ
ܝܳܠܕܰܬ݂ ܐܠܳܗܳܐ ܒܬܽܘ̣ܠܬܳܐ ܕܽܘܟܪܳܢܶܟܝ̱ ܠܒܽܘ̣ܪܟܬܳܐ܆ ܠܪ̈ܰܚܺܝ̣ܩܶܐ ܘܰܠܩܰܪ̈ܺܝ̣ܒܶܐ ܦܰܢܳܝ ܫ̈ܶܐܠܳܬܗܽܘ̇ܢ܆ ܠܰܐܝܢܳܐ ܕܰܟܪܺܝܗ ܗܰܒܝ̱ ܠܶܗ ܚܽܘ̣ܠܡܳܢܳܐ܆ ܘܰܐܝܢܳܐ ܕܰܡܥܳܩ܆ ܒܥܳܝ ܠܶܗ ܠܽܘ̣ܒܳܒܳܐ܆ ܘܰܐܝܢܳܐ ܕܒܺܝ̣ܫܳܐ ܫܳܚܶܩ ܠܶܗ ܛܪܽܘܕܺܝܘܗ̱ܝ ܡܶܢܶܗ܆ ܒܰܨܠܽܘ̣ܬܶܟܝ̱ ܘܰܒܒܳܥܽܘܬܶܟܝ̱ ܪ̈ܰܚܡܶܐ ܢܶܗܘܽܘܢ ܥܠܰܝܢ ܗ̄ ܨܠܽܘܬܶܟܝ̱ ܬܥܰܕܰܪܝ̱ ܠܰܢ܀
ܗܰܠܶܠܘ̱ ܗܰܠܶܠܘ̱ ܗܰܠܶܠܘ̱ ܘܶܐܡܰܪܘ̱ ܗܰܠܶܠܽܘ̣ܝܰܗ܆
ܐܰܟܡܳܐ ܕܗܰܠܠܽܘܗ̱ܝ ܪ̈ܳܥܰܘܳܬܐ ܒܓܰܘ ܒܶܝܬ ܠܚܶܡ܀
ܐܳܘ ܚܰܟܺܝ̣ܡܳܐ ܬܳܐ ܚܙܺܝ̣ ܥܽܘ̣ܠܳܐ ܒܓܰܘ ܥܰܙܪܽܘܪ̈ܶܐ܆ ܘܶܐܬܕܰܡܰܪ ܒܶܗ ܕܟܽܠܳܗ̇ ܒܪܺܝ̣ܬܳܐ ܒܪܶܡܙܶܗ ܬܰܠܝܳܐ܆ ܘܶܐܬܒܰܩܳܐ ܒܶܗ ܟܰܕ ܣܺܝ̣ܡ ܒܽܐܘܪܝܳܐ ܦܰܓܪܳܢܳܐܺܝܬ. ܘܪܰܘܡܳܐ ܘܥܽܘ̣ܡܩܳܐ ܗܽܘܝܽܘ ܡܕܰܒܰܪ ܥܡ ܝܳܠܽܘܕܶܗ܀
ܘܟܰܕ ܝܳܗܒܳܐ ܠܶܗ ܛܠܺܝܬܳܐ ܚܰܠܒܳܐ ܐܰܝܟ ܕܰܠܫܰܒܪܳܐ܆ ܗܽܘܝܽܘ ܝܳܗܶܒ ܡܶܛܪ̈ܶܐ ܘܛܰـ̈ܠܶܐ ܠܙܰܪ̈ܥܶܐ ܕܰܐܪܥܳܐ܆ ܐܶܢܗܽܘ ܕܺܐܝ̣ܬ ܠܳܟ ܢܰܦܫܳܐ ܕܡܰܠܝܳܐ ܗܰܝܡܳܢܽܘ̣ܬܳܐ܆ ܐܰܛܺܝ̣ܪ ܗܰܘܢܳܟ ܘܰܚܙܺܝ ܕܟܽܠܶܗ ܠܥܶܠ ܗ̱ܘ ܘܰܠܬܰܚܬ܀
ܙܰܡܰܪܘ̱ ܙܰܡܰܪܘ̱ ܙܰܡܰܪܘ̱ ܘܶܐܡܰܪܘ̱ ܗܰܠܶܠܽܘ̣ܝܰܗ܆
ܐܰܟܡܳܐ ܕܙܰܡܪܽܘܗ̱ܝ ܪ̈ܳܥܰܘܳܬܐ ܒܓܰܘ ܒܶܝܬܠܚܶܡ܀
ܐܶܓܰܪܬܳܐ ܕܦܰܘܠܳܘ̣ܣ ܫܠܺܝ̣ܚܳܐ ܕܰܠܘܳܬ ܥܶܒܪ̈ܳܝܶܐ
ܐ܆ ܐ ـ ܝܒ Hebrew 1:1-12
ܒ݁ܟ݂ܽܠ ܡܢܰܘ̈ܳܢ ܘܰܒ݂ܟ݂ܽܠ ܕ݁ܶܡ̈ܘܳܢ ܡܰܠܶܠ ܐܰܠܳܗܳܐ ܥܰܡ ܐܰܒ݂ܳܗܰܝ̈ܢ ܒ݁ܰܢ̈ܒ݂ܺܝܶܐ ܡܶܢ ܩܕ݂ܺܝܡ. ܘܰܒ݂ܗܳܠܶܝܢ ܝܰܘ̈ܡܳܬ݂ܳܐ܁ ܐ݈ܚܪ̈ܳܝܶܐ ܡܰܠܶܠ ܥܰܡܰܢ ܒ݁ܰܒ݂ܪܶܗ܂ ܕ݁ܠܶܗ ܣܳܡ ܝܳܪܬ݁ܳܐ ܕ݁ܟ݂ܽܠܡܶܕ݁ܶܡ. ܘܒ݂ܶܗ ܥܒ݂ܰܕ݂ ܠܥܳܠܡ̈ܶܐ. ܕ݁ܗܽܘܝܽܘ ܨܶܡܚܳܐ ܕ݁ܫܽܘܒ݂ܚܶܗ܁ ܘܨܰܠܡܳܐ ܕ݁ܺܐܝܬ݂ܽܘܬ݂ܶܗ܁ ܘܰܐܚܺܝܕ݂ ܟ݁ܽܠ ܒ݁ܚܰܝܠܳܐ ܕ݁ܡܶܠܬ݂ܶܗ. ܘܗܽܘ ܒ݁ܰܩܢܽܘܡܶܗ ܥܒ݂ܰܕ݂ ܕ݁ܽܘܟ݁ܳܝܳܐ ܕ݁ܰܚܛܳܗܰܝ̈ܢ ܘܺܝܬ݂ܶܒ݂ ܥܰܠ ܝܰܡܺܝܢܳܐ ܕ݁ܪܰܒ݁ܽܘܬ݂ܳܐ ܒ݁ܰܡܪ̈ܰܘܡܶܐ. ܘܗܳܢܳܐ ܟ݁ܽܠܶܗ ܝܺܪܶܒ݂ ܡܶܢ ܡܰܠܰܐܟ݂̈ܶܐ܆ ܐܰܝܟ݂ ܡܳܐ ܕ݁ܰܡܝܰܬ݁ܰܪ ܫܡܳܐ ܕ݁ܺܝܪܶܬ݂ ܡܶܢ ܕ݁ܺܝܠܗܽܘܢ. ܠܰܐܝܢܳܐ ܓ݁ܶܝܪ ܡܶܢ ܡܰܠܰܐܟ݂̈ܶܐ ܡܶܡܬ݂ܽܘܡ ܐܶܡܰܪ ܐܰܠܳܗܳܐ: ܕ݁ܒ݂ܶܪܝ ܐܰܢ݈ܬ݁܇ ܐܶܢܳܐ ܝܰܘܡܳܢܳܐ ܝܺܠܶܕ݁ܬ݁ܳܟ݂܆ ܘܬ݂ܽܘܒ݂܁ ܕ݁ܶܐܢܳܐ ܐܶܗܘܶܐ ܠܶܗ ܠܰܐܒ݂ܳܐ܇ ܘܗܽܘ ܢܶܗܘܶܐ ܠܺܝ ܠܰܒ݂ܪܳܐ. ܬ݁ܽܘܒ݂ ܕ݁ܶܝܢ܁ ܐܶܡܰܬ݂ܝ ܕ݁ܡܰܥܶܠ ܒ݁ܽܘܟ݂ܪܳܐ ܠܥܳܠܡܳܐ܆ ܐܶܡܰܪ: ܕ݁ܠܶܗ ܢܶܣܓ݁ܕ݂ܽܘܢ ܟ݁ܽܠܗܽܘܢ ܡܰܠܰܐܟ݂̈ܶܐ ܕ݁ܰܐܠܳܗܳܐ. ܥܰܠ ܡܰܠܰܐܟ݂̈ܶܐ ܕ݁ܶܝܢ ܗܳܟ݂ܰܢܳܐ ܐܶܡܰܪ: ܕ݁ܰܥܒ݂ܰܕ݂ ܡܰܠܰܐܟ݂ܰܘ̈ܗ̱ܝ ܪܽܘܚ܇ ܘܰܡܫܰܡܫܳܢܰܘ̈ܗ݈ܝ ܢܽܘܪ ܝܳܩܕ݁ܳܐ. ܥܰܠ ܒ݁ܪܳܐ ܕ݁ܶܝܢ ܐܶܡܰܪ: ܕ݁ܟ݂ܽܘܪܣܝܳܟ݂ ܕ݁ܺܝܠܳܟ݂ ܠܥܳܠܰܡ ܥܳܠܡܺܝܢ. ܫܰܒ݂ܛܳܐ ܦ݁ܫܺܝܛܳܐ ܫܰܒ݂ܛܳܐ ܕ݁ܡܰܠܟ݁ܽܘܬ݂ܳܟ݂. ܪܚܶܡܬ݁ ܟ݁ܺܐܢܽܘܬ݂ܳܐ ܘܰܣܢܰܝܬ݁ ܥܰܘܠܳܐ܆ ܡܶܛܽܠ ܗܳܢܳܐ ܡܰܫܚܳܟ݂ ܐܰܠܳܗܳܐ ܐܰܠܳܗܳܟ݂܇ ܡܶܫܚܳܐ ܕ݁ܚܰܕ݂ܽܘܬ݂ܳܐ܁ ܝܰܬ݁ܺܝܪ ܡܶܢ ܚܰܒ݂ܪ̈ܰܝܟ݁. ܘܬ݂ܽܘܒ݂܁ ܐܰܢ݈ܬ݁ ܡܶܢ ܒ݁ܪܺܝܫܺܝܬ݂ ܣܳܡܬ݁ ܫܶܬ݂ܶܐܣܶܝ̈ܗ̇ ܕ݁ܰܐܪܥܳܐ. ܘܰܫܡܰܝܳܐ ܥܒ݂ܳܕ݂ ܐܺܝܕ݂ܰܝ̈ܟ݁ ܐܶܢܽܘܢ. ܗܶܢܽܘܢ ܢܶܥܒ݁ܪܽܘܢ ܘܰܐܢ݈ܬ݁ ܩܰܝܳܡ ܐܰܢ݈ܬ݁. ܘܟ݂ܽܠܗܽܘܢ ܐܰܝܟ݂ ܢܰܚܬ݁ܳܐ ܢܶܒ݂ܠܽܘܢ. ܘܰܐܝܟ݂ ܬ݁ܰܟ݂ܣܺܝܬ݂ܳܐ ܬ݁ܥܽܘܦ݂ ܐܶܢܽܘܢ. ܗܶܢܽܘܢ ܢܶܬ݂ܚܰܠܦ݂ܽܘܢ. ܘܰܐܢ݈ܬ݁ ܐܰܝܟ݂ ܕ݁ܺܐܝܬ݂ܰܝܟ݁ ܐܰܢ݈ܬ݁. ܘܰܫܢܰܝ̈ܟ݁ ܠܳܐ ܢܶܓ݂ܡܪ̈ܳܢ܀
ܗܽܘ̣ܠܳܠܳܐ ܕܰܩܕܳܡ ܐܶܘܰܢܓܶܠܝܽܘܢ
ܡܳܪܝܳܐ ܐܶܡ̣ܰܪ ܠܝ̣ ܕܒܶܪܝ̱ ܐܰܢ̱ܬ܆ ܘܶܐܢܳܐ ܝܰܘܡܳܢܳܐ ܝܺܠܶܕܬܳܟ ܗ̄܀
ܐܶܘܰܢܓܶܠܝܽܘܢ ܡ̣ܶܢ ܠܽܘܩܳܘܣ
(ܒ܆ ܐ ـ ܟܟ Luke 2. 1-20)
ܗܘܳܐ ܕ݁ܶܝܢ ܒ݁ܝܰܘ̈ܡܳܬ݂ܳܐ ܗܳܢܽܘܢ܆ ܘܰܢܦ݂ܰܩ ܦ݁ܽܘܩܕ݁ܳܢܳܐ ܡܶܢ ܐܰܓ݂ܽܘܣܛܳܘܣ ܩܶܣܰܪ܇ ܕ݁ܢܶܬ݂ܟ݁ܬ݂ܶܒ݂ ܟ݁ܽܠܶܗ ܥܰܡܳܐ ܕ݁ܽܐܘܚܕ݂ܳܢܶܗ. ܗܳܕ݂ܶܐ ܡܰܟ݂ܬ݁ܒ݂ܳܢܽܘܬ݂ܳܐ ܩܰܕ݂ܡܳܝܬ݁ܳܐ ܗܘܳܬ݂܆ ܒ݁ܗܺܓ݂ܡܳܢܽܘܬ݂ܳܐ ܕ݁ܩܽܘܪܺܝܢܳܘܣ ܒ݁ܣܽܘܪܺܝܰܐ. ܘܳܐܙܶܠ ܗ݈ܘܳܐ ܟ݁ܽܠܢܳܫ ܕ݁ܢܶܬ݂ܟ݁ܬ݂ܶܒ݂ ܒ݁ܰܡܕ݂ܺܝܢ݈ܬ݁ܶܗ. ܣܠܶܩ ܗ݈ܘܳܐ ܕ݁ܶܝܢ ܐܳܦ݂ ܝܰܘܣܶܦ݂ ܡܶܢ ܢܳܨܪܰܬ݂ ܡܕ݂ܺܝܢ݈ܬ݁ܳܐ ܕ݁ܰܓ݂ܠܺܝܠܳܐ܂ ܠܺܝܗܽܘܕ݂܆ ܠܰܡܕ݂ܺܝܢ݈ܬ݁ܶܗ ܕ݁ܕ݂ܰܘܺܝܕ݂ ܕ݁ܡܶܬ݂ܩܰܪܝܳܐ ܒ݁ܶܝܬ݂ܠܚܶܡ. ܡܶܛܽܠ ܕ݁ܺܐܝܬ݂ܰܘܗ݈ܝ ܗ݈ܘܳܐ܁ ܡܶܢ ܒ݁ܰܝܬ݁ܶܗ܂ ܘܡܶܢ ܫܰܪܒ݁ܬ݂ܶܗ ܕ݁ܕ݂ܰܘܺܝܕ݂܆ ܥܰܡ ܡܰܪܝܰܡ ܡܟ݂ܺܝܪܬ݁ܶܗ ܟ݁ܰܕ݂ ܒ݁ܰܛܢܳܐ܂ ܕ݁ܬ݂ܰܡܳܢ ܢܶܬ݂ܟ݁ܬ݂ܶܒ݂܀ ܘܰܗܘܳܐ ܕ݁ܟ݂ܰܕ݂ ܬ݁ܰܡܳܢ ܐܶܢܽܘܢ܆ ܐܶܬ݂ܡܰܠܺܝܘ ܝܰܘ̈ܡܳܬ݂ܳܗ̇ ܕ݁ܬ݂ܺܐܠܰܕ݂. ܘܝܶܠܕ݁ܰܬ݂ ܒ݁ܪܳܗ̇ ܒ݁ܽܘܟ݂ܪܳܐ܆ ܘܰܟ݂ܪܰܟ݂ܬ݁ܶܗ ܒ݁ܥܰܙܪܽܘܪ̈ܶܐ ܘܰܐܪܡܝܰܬ݂ܶܗ ܒ݁ܽܐܘܪܝܳܐ܆ ܡܶܛܽܠ ܕ݁ܠܰܝܬ݁ ܗ݈ܘܳܐ ܠܗܽܘܢ ܕ݁ܽܘܟ݁ܬ݂ܳܐ ܐܰܝܟ݁ܳܐ ܕ݁ܰܫܪܶܝܢ ܗ݈ܘܰܘ܀ ܪ̈ܳܥܰܘܳܬ݂ܳܐ ܕ݁ܶܝܢ܁ ܐܺܝܬ݂ ܗ݈ܘܰܘ ܒ݁ܶܗ ܒ݁ܰܐܬ݂ܪܳܐ܇ ܕ݁ܰܫܪܶܝܢ ܗ݈ܘܰܘ ܬ݁ܰܡܳܢ. ܘܢܳܛܪܺܝܢ ܡܰܛܰܪܬ݂ܳܐ ܕ݁ܠܺܠܝܳܐ ܥܰܠ ܡܰܪ̈ܥܝܳܬ݂ܗܽܘܢ. ܘܗܳܐ ܡܰܠܰܐܟ݂ܳܐ ܕ݁ܰܐܠܳܗܳܐ ܐܶܬ݂ܳܐ ܠܘܳܬ݂ܗܽܘܢ. ܘܬ݂ܶܫܒ݁ܽܘܚܬ݁ܶܗ ܕ݁ܡܳܪܝܳܐ ܐܰܢܗܪܰܬ݂ ܥܠܰܝܗܽܘܢ. ܘܰܕ݂ܚܶܠܘ ܕ݁ܶܚܠܬ݂ܳܐ ܪܰܒ݁ܬ݂ܳܐ. ܘܶܐܡܰܪ ܠܗܽܘܢ ܡܰܠܰܐܟ݂ܳܐ: ܠܳܐ ܬ݁ܶܕ݂ܚܠܽܘܢ܆ ܗܳܐ ܓ݁ܶܝܪ ܡܣܰܒ݁ܰܪ ܐ݈ܢܳܐ ܠܟ݂ܽܘܢ ܚܰܕ݂ܽܘܬ݂ܳܐ ܪܰܒ݁ܬ݂ܳܐ ܕ݁ܬ݂ܶܗܘܶܐ ܠܟ݂ܽܠܶܗ ܥܳܠܡܳܐ. ܐܶܬ݂ܺܝܠܶܕ݂ ܠܟ݂ܽܘܢ ܓ݁ܶܝܪ ܝܰܘܡܳܢܳܐ ܦ݁ܳܪܽܘܩܳܐ܆ ܕ݁ܺܐܝܬ݂ܰܘܗ݈ܝ ܡܳܪܝܳܐ ܡܫܺܝܚܳܐ܂ ܒ݁ܰܡܕ݂ܺܝܢ݈ܬ݁ܶܗ ܕ݁ܕ݂ܰܘܺܝܕ݂. ܘܗܳܕ݂ܶܐ ܠܟ݂ܽܘܢ ܐܳܬ݂ܳܐ܆ ܡܶܫܟ݁ܚܺܝܢ ܐܢ݈ܬ݁ܽܘܢ ܥܽܘܠܳܐ܂ ܕ݁ܰܟ݂ܪܺܝܟ݂ ܒ݁ܥܰܙܪܽܘܪ̈ܶܐ܂ ܘܣܺܝܡ ܒ݁ܽܐܘܪܝܳܐ. ܘܡܶܢ ܫܶܠܝ܁ ܐܶܬ݂ܚܙܺܝܘ ܥܰܡ ܡܰܠܰܐܟ݂ܳܐ ܚܰܝ̈ܠܰܘܳܬ݂ܳܐ ܣܰܓ݁ܺܝ̈ܶܐܐ ܕ݁ܰܫܡܰܝܳܐ܆ ܟ݁ܰܕ݂ ܡܫܰܒ݁ܚܺܝܢ ܠܰܐܠܳܗܳܐ ܘܳܐܡܪܺܝܢ: ܬܶܫܒܽܘܚܬܳܐ ܠܰܐܠܳܗܳܐ ܒ݁ܰܡܪ̈ܰܘܡܶܐ. ܘܥܰܠ ܐܰܪܥܳܐ ܫܠܳܡܳܐ܂ ܘܣܰܒ݂ܪܳܐ ܛܳܒ݂ܳܐ ܠܰܒ݂̈ܢܰܝ ܐ݈ܢܳܫܳܐ܀
ܗܳܪܟܳܐ ܢܫܰܪܶܐ ܕܢܰܘܩܶܕ ܢܽܘ̣ܪܳܐ ܕܣܺܝ̣ܡܳܐ ܥܰܠ ܠܰܩܢܳܐ܆ ܘܒܳܬܰܪ ܕܳܐܡܪܺܝ̣ܢ:
ܬܶܫܒܽܘܚܬܳܐ܆ ܟܳܗܢܳܐ ܡܰܩܶܦ ܘܳܐܡܰܪ:
ܘܰܗܘܳܐ ܕ݁ܟ݂ܰܕ݂ ܐܶܙܰܠܘ ܡܶܢ ܠܘܳܬ݂ܗܽܘܢ ܡܰܠܰܐܟ݂̈ܶܐ ܠܰܫܡܰܝܳܐ܆ ܡܰܠܶܠܘ ܪ̈ܳܥܰܘܳܬ݂ܳܐ ܚܰܕ݂ ܥܰܡ ܚܰܕ݂ ܘܳܐܡܪܺܝܢ: ܢܶܪܕ݁ܶܐ ܥܕ݂ܰܡܳܐ ܠܒ݂ܶܝܬ݂ܠܚܶܡ܆ ܘܢܶܚܙܶܐ ܠܡܶܠܬ݂ܳܐ ܗܳܕ݂ܶܐ ܕ݁ܰܗܘܳܬ݂܂ ܐܰܝܟ݂ ܕ݁ܡܳܪܝܳܐ ܐܰܘܕ݁ܰܥ ܠܰܢ. ܘܶܐܬ݂ܰܘ ܡܣܰܪܗܒ݂ܳܐܺܝܬ܆ ܘܶܐܫܟ݁ܰܚܘ ܠܡܰܪܝܰܡ ܘܰܠܝܰܘܣܶܦ݂܂ ܘܰܠܥܽܘܠܳܐ ܕ݁ܣܺܝܡ ܒ݁ܽܐܘܪܝܳܐ. ܘܟ݂ܰܕ݂ ܚܙܰܘ܆ ܐܰܘܕ݁ܰܥܘ ܠܡܶܠܬ݂ܳܐ ܕ݁ܶܐܬ݂ܡܰܠܠܰܬ݂ ܥܰܡܗܽܘܢ ܥܠܰܘܗ݈ܝ ܥܰܠ ܛܰܠܝܳܐ. ܘܟ݂ܽܠܗܽܘܢ ܕ݁ܰܫܡܰܥܘ܆ ܐܶܬ݁ܕ݁ܰܡܰܪܘ ܥܰܠ ܐܰܝܠܶܝܢ ܕ݁ܶܐܬ݂ܡܰܠܶܠ ܠܗܽܘܢ ܡܶܢ ܪ̈ܳܥܰܘܳܬ݂ܳܐ. ܡܰܪܝܰܡ ܕ݁ܶܝܢ ܢܳܛܪܳܐ ܗ݈ܘܳܬ݂ ܟ݁ܽܠܗܶܝܢ ܡ̈ܶܠܶܐ ܗܳܠܶܝܢ܆ ܘܰܡܦ݂ܰܚܡܳܐ ܒ݁ܠܶܒ݁ܳܗ̇. ܘܰܗܦ݂ܰܟ݂ܘ ܪ̈ܳܥܰܘܳܬ݂ܳܐ ܗܳܢܽܘܢ܆ ܟ݁ܰܕ݂ ܡܫܰܒ݁ܚܺܝܢ ܘܰܡܗܰܠܠܺܝܢ ܠܰܐܠܳܗܳܐ܆ ܥܰܠ ܟ݁ܽܠ ܕ݁ܰܚܙܰܘ ܘܰܫܡܰܥܘ܂ ܐܰܝܟ݁ܰܢܳܐ ܕ݁ܶܐܬ݂ܡܰܠܰܠ ܥܰܡܗܽܘܢ܀
ܘܳܐܡܪܺܝ̣ܢ: ܡܳܪܰܢ ܝܶܫܽܘܥ ܡܫܺܝܚܳܐ ܬܰܪܥܳܐ ܕܪ̈ܰܚܡܰܝܟ. ܘܫܰܪܟܳܐ܀
ܡܰܥܢܺܝ̣ܬܳܐ ܒܩܠܐ: ܒܩ̄ ܕܛܽܘ̣ܒܰܝܟܝ̱ ܐܳܦܪܰܬ
ܛܽܘ̣ܒܰܝܟܝ̱ ܐܳܦܪܰܬ ܐܶܡܳܐ ܕܡܰܠ̈ܟܶܐ܆ ܕܰܕܢܰܚ ܡܶܢܶܟܝ̱ ܡܳܪܶܐ ܡܰܠ̈ܟܶܐ܆ ܡܺܝܟܰܐ ܗ̱ܘ ܣܰܒܪܶܟܝ̱ ܕܡ̣ܶܢ ܥܳܠܰܡ ܗ̱ܘ܆ ܘܡܶܬܚܳܐ ܕܚܰܝܰܘ̈ܗ̱ܝ ܠܳܐ ܡܶܬܕܰܪܟܺܝ̣ܢ܆ ܛܽܘ̣ܒ ܠܥܰܝ̈ܢܰܝܟ ܕܰܩܕܳܡ ܟܽܠ ܐܰܩܒܠܳܝ̈ܗܝ܆ ܘܠܶܟܝ̱ ܐܰܫܘܺܝ ܕܬܶܚܙܝ̣ܢܳܝܗ̱ܝ ܟܰܕ ܕܢܰܚ. ܠܪܺܝܫܳܐ ܕܒܽܘ̣ܪ̈ܟܳܬܳܐ܆ ܘܫܽܘ̣ܪܳܝܳܐ ܕܚܰܕ̈ܘܳܬܳܐ܆ ܫܩܰܠܬܺܝ̣ܘܗ̱ܝ ܩܕܳܡ ܟܽܘ̣ܠܳܐ܀
ܬܳܐ ܐܶܫܰܥܝܳܐ ܚܙܺܝ̣ ܠܰܒܬܽܘ̣ܠܬܳܐ܆ ܕܰܪܫܺܝ̣ܡܺܝ̣ܢ ܒܳܗ̇ ܐ̱ܪ̈ܳܙܰܘܗ̱ܝ ܕܰܒܪܳܐ܆ ܗܳܐ ܫܪܳܐ ܒܥܽܘ̣ܒܳܗ̇ ܥܰܡܰܢܽܘܐܝܶܠ܆ ܝܳܢܶܩ ܚܰܠܒܳܐ ܒܰܕܡܽܘܬ ܫܰܒܪܳܐ܆ ܬܳܐ ܚܽܘܪ ܒܶܗ ܘܰܚܕܺܝ ܘܫܰܒܰܚ܆ ܘܰܩܪܺܝ ܠܰܢܒܺܝ̈ܶܐ ܕܢܶܚܕܽܘܢ ܥܰܡܳܟ܆ ܕܗܳܐ ܐܶܬܳܐ ܠܶܗ ܘܰܓܡܰܪ܆ ܦ̈ܶܠܳܐܬܳܐ ܕܟܽܠܗܽܘܢ ܚܰܙܳܝ̈ܶܐ܀
ܡܰܕܪܳܫܳܐ ܒܩܠܐ: ܒܩ̄ ܕܗܳܐ ܩܛܺܝ̣ܠ ܗ̱ܘ̣ܽ ܒܡܶܨܪܶܝܢ
ܒܪܺܝܟ ܗ̱ܘܽ ܡܳܪܝ̱ ܝܰܠܕܳܟ܆ ܗܰܘ ܩܰܕܡܳܝܳܐ܆ ܕܒܶܗ ܗ̱ܘ̣ܽ ܪܚܺܝ̣ܡ ܗܳܢܳܐ܆ ܝܽܘܡ ܥܰܕܥܺܐܕܳܟ܀
ܒܟܳܢܽܘܢ ܕܰܐܪܺܝܟܺܝ̣ܢ܆ ܠܰܝܠܰܘ̈ܳܬܶܗ. ܕܢܰܚ ܠܰܢ ܐܺܝ̣ܡܳܡܳܐ܆ ܕܠܳܐ ܡܶܣܬܰܝܰܟ܀
ܥܒܰܪܘ ܗ̱ܘܰܘ ܓܶܝܪ ܡܰܠܟ̈ܶܐ܆ ܥܰܡ ܙܰܒܢܰܝ̈ܗܽܘ̇ܢ. ܘܰܒܛܶܠܘ̱ ܥܰܕܥܺܐܕ̈ܶܐ܆ ܘܕܽܘܟܪ̈ܳܢܰܝܗܽܘܢ܀
ܪܰܒ ܗ̱ܘ̣ܽ ܡܳܪܝ̱ ܝܰܘܡܳܟ܆ ܠܳܐ ܢܶܙܥܰܪ ܒܰܢ܆ ܢܶܥܛܶܐ ܒܰܥܝܳܕܶܗ܆ ܣܰܟܠܘ̈ܳܬܰܢ܀
ܪ̈ܺܝ̣ܫܟܳܗܢܶܐ ܐܰܘ ܟܳܗܢܳܐ ܡܙܰܝܰܚ ܠܰܨܠܺܝܒܳܐ ܘܟܰܕ ܐܰܦܰܘ̈ܗ̱ܝ ܠܡܰܕܢܚܳܐ ܐܰܡܰܪ:
ܟܳܗܢܳܐ: ܫܽܘܒܚܳܐ ܠܰܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ܀
ܡܫܰܡ̈ܫܳܢܶܐ: ܘܰܥܠܰܝܢ ܡܚܺܝ̈ܠܶܐ ܘܚܰܛܳܝ̈ܶܐ ܪ̈ܰܚܡܶܐ ܘܰܚܢܳܢܳܐ ܢܶܫܬܰܦܥܽܘ̇ܢ ܒܰܬܪ̈ܰܝܗܽܘ̇ܢ ܥܳܠ̈ܡܶܐ ܠܥܳܠܰܡ ܥܳܠܡܺܝܢ ܐܰܡܺܝܢ܀
ܨܠܽܘ̣ܬܳܐ
ܟܳܗܢܳܐ: ܐܰܫܘܳܐ ܠܰܢ ܡܳܪܝܳܐ ܐܰܠܳܗܳܐ܆ ܕܰܢܝܰܩܰܪ ܡܰܘܠܳܕܳܟ ܕܡ̣ܶܢ ܒܬܽܘ̣ܠܬܳܐ ܡܰܪܝܰܡ܆ ܘܰܢܙܰܝܰܚ ܛܽܘܦܣܳܐ ܕܺܝ̣ܠܺܝ̣ܕܽܘܬܳܟ ܒܢܰܦ̈ܫܳܬܰܢ܂ ܘܰܢܪܰܡܪܶܡ ܠܰܨܠܺܝ̣ܒܳܟ ܡܰܥܒܶܕ ܚܰܝ̈ܶܐ܆ ܟܰܕ ܒܳܥܶܝܢܰܢ ܡܶܢܳܟ ܕܬܰܘܠܕܰܢ ܟܽܠ ܝܽܘ̣ܡ ܪܽܘܚܳܢܳܐܺܝܬ ܒܰܥܒ̈ܳܕܶܐ ܛܳܒ̈ܶܐ ܕܫܳܦܪܺܝ̣ܢ ܠܳܟ܆ ܘܰܬܚܶܝܬ ܟܶܢ̈ܦܰܘܗ̱ܝ ܕܰܨܠܺܝ̣ܒܳܟ ܬܣܰܬܪܰܢ ܡ̣ܶܢ ܟܽܠ ܢܶܟܝܳܢܺܝ̈ܢ ܡܳܪܰܢ ܘܰܐܠܳܗܰܢ ܠܥܳܠܡܺܝܢ܀
ܥܶܩܒܳܐ
ܒܰܡܥܰܪܬܳܐ ܒܒܶܝܬܠܚܶܡ܆ ܬܰܡܳܢ ܐܶܬܺܝ̣ܠܶܕ ܡܰܠܟܳܐ܆ ܕܺܐܝܬܰܘܗ̱ܝ ܡܳܪܳܐ ܕܟܽܠ ܒܶܪ̈ܝܳܬܳܐ. ܘܥܰܠܗܳܝ ܡ̣ܶܢ ܡܰܕܢܚܳܐ ܙܳܚܘ̱ ܘܶܐܬܰܘ ܡܓܽܘ̈ܫܶܐ ܠܐܺܝ̣ܩܳܪܶܗ. ܡܗܰܝܡ̈ܢܶܐ ܠܡܳܪܝܳܐ ܫܰܒܰܚܘ̱܆ ܘܰܐܘܕܰܘ ܠܶܗ ܘܪܰܡܶܪܡܽܘܗ̱ܝ ܘܒܰܪܟܽܘܗ̱ܝ ܠܥܳܠܰܡ ܥܳܠܡܺܝܢ܀
ܡܰܙܥܩܳܢܽܘ̣ܬܳܐ
ܒܗܳܢܳܐ ܝܰܘܡܳܐ ܐܶܬܺܝ̣ܠܶܕ܆ ܒܰܪ ܐܰܠܳܗܳܐ ܒܒܶܝܬ ܠܚܶܡ܆ ܘܚܰܬܶܡ ܛܽܘ̣̈ܦܣܶܐ ܘܦ̈ܶܠܳܐܬܳܐ܆ ܕܰܢܒܺܝ̈ܶܐ ܕܶܐܬܢܰܒܺܝܘ ܥܠܰܘܗ̱ܝ܆ ܚܢܰܢ ܠܡܰܘܠܳܕܶܗ ܡܝܰܩܪܺܝ̣ܢܰܢ܆ ܘܠܰܨܠܺܝ̣ܒܶܗ ܗܳܐ ܣܳܓܕܺܝ̣ܢܰܢ܆ ܡܶܛܽܠ ܗܳܕܶܐ ܡܶܬܟܰܫܦܺܝ̣ܢܰܢ ܟܰܕ ܐܳܡܪܺܝ̣ܢܰܢ ܩܽܘܪܝܶܐܠܰܝܣܳܘܢ܆ ܩܽܘܪܝܶܐܠܰܝܣܳܘܢ܆ ܩܽܘܪܝܶܐܠܰܝܣܳܘܢ܀
ܘܦܳܢܶܝܢ ܠܡܰܥܪܒܳܐ
ܟܳܗܢܳܐ: ܫܽܘܒܚܳܐ ܠܰܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ܀
ܡܫܰܡ̈ܫܳܢܶܐ: ܘܰܥܠܰܝܢ ܡܚܺܝ̈ܠܶܐ ܘܚܰܛܳܝ̈ܶܐ ܪ̈ܰܚܡܶܐ ܘܰܚܢܳܢܳܐ ܢܶܫܬܰܦܥܽܘ̇ܢ ܒܰܬܪ̈ܰܝܗܽܘ̇ܢ ܥܳܠ̈ܡܶܐ ܠܥܳܠܰܡ ܥܳܠܡܺܝܢ ܐܰܡܺܝܢ܀
ܟܳܗܢܳܐ: ܝܺܚܺܝ̣ܕܳܝܳܐ ܕܺܝ̣ܚܺܝ̣ܕܳܐܺܝܬ ܕܢܰܚ ܡ̣ܶܢ ܒܬܽܘ̣ܠܬܳܐ ܝ̣ܺܚܺܝ̣ܕܳܝܬܳܐ ܘܰܒܬܽܘܠܰܬ݂ ܒܟܽܠܙܒܰܢ܆ ܐܰܕܢܰܚ ܢܽܘ̣ܗܪܳܟ ܒܢܰܦ̈ܫܳܬܰܢ. ܘܰܐܫܘܳܐ ܠܰܢ ܕܥܰܡ ܡܰܠܰܐܟ̈ܶܐ ܢܰܙܥܶܩ ܘܢܺܐܡܰܪ܆ ܬܶܫܒܽܘܚܬܳܐ ܠܰܐܠܳܗܳܐ ܒܰܡܪ̈ܰܘܡܶܐ܆ ܘܥܰܠ ܐܰܪܥܳܐ ܫܠܳܡܳܐ܆ ܘܰܒܢܰܝ̈ܢܳܫܳܐ ܫܰܦܺܝ̣ܪܽܘܬ ܨܶܒܝܳܢܳܐ ܡܳܪܰܢ ܘܰܐܠܳܗܰܢ܀
ܥܶܩܒܳܐ
ܗܰܘ ܕܡ̣ܶܢ ܒܬܽܘ̣ܠܬܳܐ ܡܰܠܝܰܬ݂ ܫܽܘ̣ܦܪ̈ܶܐ. ܐܶܬܒܰܣܰܪ ܕܠܳܐ ܫܽܘ̣ܚܠܳܦܳܐ܆ ܘܒܰܫܡܰܝܳܐ ܒܥܽܘ̣ܒܳܐ ܕܝܳܠܽܘ̣ܕܶܗ܆ ܠܳܐ ܡܫܰܢܝܳܢܳܐܺܝܬ ܟܰܬܰܪ܆ ܒܬܶܫܒ̈ܚܳܬܳܐ ܕܠܳܐ ܫܶܠܝܳܐ܆ ܘܠܶܗ ܒܰܠܚܽܘ̣ܕ ܢܫܰܒܰܚ ܡܶܛܽܠ ܕܰܡܫܰܒܚܳܐ ܐܺܝ̣ܬܰܘܗ̱ܝ܀
ܡܰܙܥܩܳܢܽܘ̣ܬܳܐ
ܒܗܳܢܳܐ ܝܰܘܡܳܐ ܣܰܒܰܪܘ̱ ܗ̱ܘܰܘ܆ ܡܰܠܰܐܟ̈ܶܐ ܠܪ̈ܳܥܰܘܳܬܳܐ܆ ܕܶܐܬܺܝ̣ܠܶܕ ܠܟܽܘ̇ܢ ܦܳܪܽܘ̣ܩܳܐ܆ ܒܰܡܥܰܪܬܳܐ ܗܳܝ ܕܒܶܝܬ ܠܚܶܡ܆ ܘܗܳܐ ܥܰܡ̱̈ܡܶܐ ܚܳܕܶܝܢ ܒܥܺܐܕܶܗ. ܘܣܳܓܕܺܝ̣ܢ ܠܰܨܠܺܝ̣ܒܶܗ ܡܝܰܩܪܳܐ. ܘܡܶܛܽܠ ܗܳܕܶܐ ܡܶܬܟܰܫܦܺܝ̣ܢܰܢ ܘܳܐܡܪܺܝ̣ܢܰܢ: ܩܽܘܪܝܶܐܠܰܝܣܳܘܢ܆ ܩܽܘܪܝܶܐܠܰܝܣܳܘܢ܆ ܩܽܘܪܝܶܐܠܰܝܣܳܘܢ܀
ܘܦܳܢܶܝܢ ܠܓܰܪܒܝܳܐ
ܘܳܐܡܰܪ ܟܳܗܢܳܐ ܨܠܽܘܬܳܐ ܗܳܕܶܐ:
ܟܳܗܢܳܐ: ܫܽܘܒܚܳܐ ܠܰܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ܀
ܡܫܰܡ̈ܫܳܢܶܐ: ܘܰܥܠܰܝܢ ܡܚܺܝ̈ܠܶܐ ܘܚܰܛܳܝ̈ܶܐ ܪ̈ܰܚܡܶܐ ܘܰܚܢܳܢܳܐ ܢܶܫܬܰܦܥܽܘ̇ܢ ܒܰܬܪ̈ܰܝܗܽܘ̇ܢ ܥܳܠ̈ܡܶܐ ܠܥܳܠܰܡ ܥܳܠܡܺܝܢ ܐܰܡܺܝܢ܀
ܟܳܗܢܳܐ: ܚܰܕܽܘ̣ܬܳܐ ܘܰܦܨܺܝ̣ܚܽܘ̣ܬܳܐ ܗܘܳܬ ܠܥܶܠܳܝ̈ܶܐ܆ ܘܰܫܠܳܡܳܐ ܘܫܰܝܢܳܐ ܘܣܰܒܪܳܐ ܐܶܫܬܰܟܰܢ ܠܰܐܪ̈ܥܳܢܶܐ܆ ܒܺܝ̣ܠܺܝ̣ܕܽܘܬܳܟ ܡܫܺܝܚܳܐ ܐܰܠܳܗܳܐ ܕܺܝ̣ܠܰܢ ܕܡ̣ܶܢ ܒܬܽܘ̣ܠܬܳܐ܆ ܘܰܪܓܺܝ̣ܙܽܘ̣ܬܳܐ ܕܒܶܝܬ ܐܰܒܳܐ ܠܳܐܕܳܡ ܐܶܫܬܰܪܝܰܬ݂܆ ܗܰܒ ܠܰܢ ܡܳܪܰܢ ܕܢܶܚܕܶܐ ܒܥܺܐܕܳܟ܆ ܘܡ̣ܶܢ ܪܓܺܝ̣ܙܽܘ̣ܬܳܐ ܢܶܬܚܰܪܰܪ܆ ܡܳܪܰܢ ܘܰܐܠܳܗܰܢ܀
ܥܶܩܒܳܐ
ܝܶܪܒܰܬ݂ ܢܰܦܫܶܟܝ̱ ܐܳܦ ܪܶܘܙܰܬ݂ ܬܰܪܥܺܝܬܶܟܝ̱܆ ܒܡܳܪܝܳܐ ܡܳܪܶܟܝ̱ ܝܳܠܕܰܬ݂ ܐܰܠܳܗܳܐ܆ ܡܶܛܽܠ ܕܡ̣ܶܢ ܒܳܬܰܪ ܝܰܠܕܳܐ ܬܽܘ̣ܒ ܢܰܛܪܶܟܝ̱ ܒܰܒܬܽܘ̣ܠܽܘ̣ܬܳܐ܆ ܡܶܠܬܳܐ ܐܰܠܳܗܳܐ ܕܡܶܢܶܟܝ̱ ܐܶܬܒܰܣܰܪ܀
ܡܰܙܥܩܳܢܽܘ̣ܬܳܐ
ܝܰܘܡܳܢ ܐܶܬܺܝ̣ܠܶܕ ܝܰܠܕܳܐ܆ ܘܰܫܡܶܗ ܐܶܬܩܪܺܝ ܕܽܘ̣ܡܳܪܳܐ. ܕܽܘ̣ܡܳܪܰܐ ܗ̱ܘ ܓܶܝܪ ܐܰܠܳܗܳܐ܆ ܕܰܐܝܟ ܥܽܘ̣ܠܳܐ ܚܰܘܺܝ ܢܰܦܫܶܗ. ܘܗܳܐ ܣܳܓ̈ܕܳܢ ܠܶܗ ܒܶܪ̈ܝܳܬܳܐ܆ ܘܠܰܨܠܺܝ̣ܒܶܗ ܦܳܪܽܘ̣ܩܳܝܳܐ܆ ܘܡܶܛܽܠ ܗܳܕܶܐ ܡܶܬܟܰܫܦܺܝ̣ܢܰܢ ܘܳܐܡܪܺܝ̣ܢܰܢ: ܩܽܘܪܝܶܐܠܰܝܣܳܘܢ܆ ܩܽܘܪܝܶܐܠܰܝܣܳܘܢ܆ ܩܽܘܪܝܶܐܠܰܝܣܳܘܢ܀
ܘܦܳܢܶܝܢ ܠܬܰܝܡܢܳܐ
ܟܳܗܢܳܐ: ܫܽܘܒܚܳܐ ܠܰܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ܀
ܡܫܰܡ̈ܫܳܢܶܐ: ܘܰܥܠܰܝܢ ܡܚܺܝ̈ܠܶܐ ܘܚܰܛܳܝ̈ܶܐ ܪ̈ܰܚܡܶܐ ܘܰܚܢܳܢܳܐ ܢܶܫܬܰܦܥܽܘ̇ܢ ܒܰܬܪ̈ܰܝܗܽܘ̇ܢ ܥܳܠ̈ܡܶܐ ܠܥܳܠܰܡ ܥܳܠܡܺܝܢ ܐܰܡܺܝܢ܀
ܟܳܗܢܳܐ: ܒܪܳܐ ܘܡܶܠܬܳܐ ܕܰܐܒܳܐ ܡܬܽܘ̣ܡܳܝܳܐ܆ ܕܶܐܬܳܐ ܠܡܰܘܠܳܕܳܐ ܨܶܒܝܳܢܳܝܳܐ ܘܠܳܐ ܫܪܳܐ ܛܰܒ̈ܥܶܐ ܘܰܒܬܽܘ̣̈ܠܶܐ ܕܶܐܡܶܗ ܒܬܽܘ̣ܠܬܳܐ ܒܺܝ̣ܠܺܝܕܽܘ̣ܬܶܗ܆ ܗܰܒܠܰܢ ܕܢܶܕܥܳܟ ܕܰܐܢ̱ܬ ܗ̱ܘ ܐܺܝ̣ܬܰܝܟ ܐܰܠܳܗܳܐ ܕܠܳܐ ܦܽܘ̣ܠܳܓܳܐ. ܘܫܰܟܶܢ ܠܰܢ ܫܰܝܢܳܐ ܘܰܫܠܳܡܳܐ ܕܡܶܢܳܟ܆ ܘܰܢܛܺܝ̣ܪܽܘܬܳܐ ܕܡ̣ܶܢ ܟܽܠ ܣܽܘ̈ܓܦܳܢܺܝܢ܆ ܡܳܪܰܢ ܘܰܐܠܳܗܰܢ܀
ܥܶܩܒܳܐ
ܝܰܘܡܳܢܳܐ ܫܰܝܢܳܐ ܘܰܫܠܳܡܳܐ܆ ܥܺܝܪ̈ܰܝ ܪܰܘܡܳܐ ܣܰܒܰܪܘ̱ ܒܰܐܪܥܳܐ. ܘܬܶܫܒܽܘܚܬܳܐ ܠܰܐܠܳܗܳܐ ܒܪܰܘܡܳܐ܆ ܘܣܰܒܪܳܐ ܛܳܒܳܐ ܠܐ̱ܢܳܫܽܘ̣ܬܳܐ ܒܝܽܘܡ ܝܰܠܕܶܗ ܕܰܒܪܳܐ܀
ܡܰܙܥܩܳܢܽܘ̣ܬܳܐ
ܒܰܨܠܺܝ̣ܒܳܟ ܡܳܪܰܢ ܝܶܫܽܘ̣ܥ܆ ܘܒܰܨܠܽܘܬ ܐܶܡܳܐ ܕܺܝ̣ܠܶܕܬܳܟ܆ ܐܰܥܒܰܪ ܐܳܦ ܒܰܛܶܠ ܡܶܢܰܢ܆ ܡܰܚ̈ܘܳܬܳܐ ܘܫܰܒ̈ܛܶܐ ܕܪܽܘܓܙܳܐ܆ ܘܰܐܫܪܳܐ ܫܰܝܢܳܟ ܘܰܫܠܳܡܳܟ ܒܰܐܪܒܰܥ ܦܶܢ̈ܝܳܢ ܕܰܒܪܺܝ̣ܬܳܐ܆ ܘܡܶܛܽܠ ܗܳܕܶܐ ܡܶܬܟܰܫܦܺܝ̣ܢܰܢ ܘܳܐܡܪܺܝ̣ܢܰܢ܆ ܩܽܘܪܝܶܐܠܰܝܣܳܘܢ܆ ܩܽܘܪܝܶܐܠܰܝܣܳܘܢ܆ ܩܽܘܪܝܶܐܠܰܝܣܳܘܢ܀
ܬܽܘ̣ܒ ܦܳܢܶܝܢ ܠܡܰܕܢܚܳܐ܆ ܘܳܐܡܰܪ ܗܰܘ ܕܰܛܥܺܝ̣ܢ ܠܰܨܠܺܝܒܳܐ ܟܰܕ ܐܰܦܰܘ̈ܗ̱ܝ ܠܡܰܕܢܚܳܐ
ܦܳܢܶܝܢ ܠܡܰܕܢܚܳܐ
| ܡܫܰܡ̈ܫܳܢܶܐ | ܟܳܗܢܳܐ |
| ܩܰܕܺܝ̣ܫܬ ܐܰܠܳܗܳܐ܀ | ܗܰܘ ܕܡܰܠܰܐܟ̈ܶܐ ܡܫܰܡܫܺܝ̣ܢ ܠܶܗ. |
| ܩܰܕܺܝ̣ܫܬ ܚܰܝܠܬܳܢܳܐ܀ | ܗܰܘ ܕܰܟܪ̈ܘ̣ܒܶܐ ܡܒܰܪܟܺܝ̣ܢ ܠܶܗ. |
| ܩܰܕܺܝ̣ܫܬ ܠܳܐ ܡܳܝܽܘ̣ܬܳܐ ܚܰܛܳܝ̈ܶܐ ܒܰܬܝܳܒܽܘ̣ܬܳܐ ܡܶܬܟܰܫܦܺܝ̣ܢ ܘܳܐܡܪܺܝܢ ܕܶܐܬܺܝ̣ܠܶܕܬ ܡܶܛܽܠܳܬܰܢ ܐܶܬܪܰܚܰܡܥܠܰܝܢ܀ | ܗܰܘ ܕܰܣܪ̈ܳܦܶܐ ܡܩܰܕܫܺܝ̣ܢ ܠܶܗ. |
ܘܦܳܢܶܝܢ ܠܡܰܥܪܒܳܐ
| ܡܫܰܡ̈ܫܳܢܶܐ | ܟܳܗܢܳܐ |
| ܩܰܕܺܝ̣ܫܬ ܐܰܠܳܗܳܐ܀ | ܗܰܘ ܕܢܽܘ̣ܪ̈ܳܢܶܐ ܡܗܰܠܠܺܝ̣ܢ ܠܶܗ. |
| ܩܰܕܺܝ̣ܫܬ ܚܰܝܠܬܳܢܳܐ܀ | ܗܰܘ ܕܪ̈ܽܘ̣ܚܳܢܶܐ ܡܗܰܕܪܺܝ̣ܢ ܠܶܗ. |
| ܩܰܕܺܝ̣ܫܰܬ ܠܳܐ ܡܳܝܽܘ̣ܬܳܐ܆ ܝܰܠܕܶܝ̈ܗ̇ ܕܥܺܕܬܳܐ ܡܗܰܝܡܰܢܬܳܐ ܡܶܬܟܰܫܦܺܝ̣ܢ ܘܳܐܡܪܺܝܢ܆ ܕܶܐܬܺܝ̣ܠܶܕܬ ܡܶܛܽܠܳܬܰܢ ܐܶܬܪܰܚܰܡܥܠܰܝܢ܀ | ܗܰܘ ܕܥܰܦܪ̈ܳܢܶܐ ܣܳܓܕܺܝ̣ܢ ܠܶܗ. |
ܘܦܳܢܶܝܢ ܠܓܰܪܒܝܳܐ
| ܡܫܰܡ̈ܫܳܢܶܐ | ܟܳܗܢܳܐ |
| ܩܰܕܺܝ̣ܫܬ ܐܰܠܳܗܳܐ܀ | ܗܰܘ ܕܥܶܠܳܝ̈ܶܐ ܡܪܰܡܪܡܺܝܢ ܠܶܗ. |
| ܩܰܕܺܝ̣ܫܬ ܚܰܝܠܬܳܢܳܐ܀ | ܗܰܘ ܕܡܶܨܥܳܝ̈ܶܐ ܡܩܰܠܣܺܝ̣ܢ ܠܶܗ. |
| ܩܰܕܺܝ̣ܫܰܬ ܠܳܐ ܡܳܝܽܘ̣ܬܳܐ܆ ܚܰܛܳܝ̈ܶܐ ܒܰܬܝܳܒܽܘܬܳܐ ܡܶܬܟܰܫܦܺܝ̣ܢ ܘܳܐܡܪܺܝܢ܆ ܕܶܐܬܺܝ̣ܠܶܕܬ ܡܶܛܽܠܳܬܰܢ ܐܶܬܪܰܚܰܡܥܠܰܝܢ܀ | ܗܰܘ ܕܬܰܚܬܳܝ̈ܶܐ ܡܙܰܝܚܺܝ̣ܢ ܠܶܗ. |
ܘܦܳܢܶܝܢ ܠܬܰܝܡܢܳܐ
| ܡܫܰܡ̈ܫܳܢܶܐ | ܟܳܗܢܳܐ |
| ܡܳܪܰܢ ܚܽܘ̣ܣ ܘܪܰܚܶܡܥܠܰܝܢ܀ | ܡܳܪܰܢ ܐܶܬܪܰܚܰܡܥܠܰܝܢ. |
| ܫܽܘܒܚܳܐ ܠܳܟ ܐܰܠܳܗܳܐ܀ | ܡܳܪܰܢ ܩܰܒܶܠ ܬܶܫܡܶܫܬܰܢ ܘܰܨܠܰܘ̈ܳܬܰܢ ܘܶܐܬܪܚܰܡܥܠܰܝܢ. |
| ܫܽܘܒܚܳܐ ܠܳܟ ܡܰܠܟܳܐ ܡܫܺܝܚܳܐ ܕܚܳܐܶܢ ܠܚܰܛܳܝ̈ܶܐ ܥܰܒܕܰܝ̈ܟ܆ ܒܰܪܶܟܡܳܪܝ̱܀ | ܫܽܘܒܚܳܐ ܠܳܟ ܒܳܪܽܘ̣ܝܳܐ. |
ܟܳܗܢܳܐ: ܐܰܒܽܘܢ ܕܒܰܫܡܰܝܳܐ.
ܥܰܡܳܐ: ܢܶܬܩܰܕܰܫ ܫܡܳܟ ܬܺܐܬܶܐ ܡܰܠܟܽܘܬܳܟ ܢܶܗܘܶܐ ܨܶܒܝܳܢܳܟ. ܐܰܝܟܰܢܳܐ ܕܒܰܫܡܰܝܳܐ ܐܳܦ ܒܰܐܪܥܳܐ. ܗܰܒܠܰܢ ܠܰܚܡܳܐ ܕܣܽܘܢܩܳܢܰܢ ܝܰܘܡܳܢܳܐ. ܘܰܫܒܽܘܩ ܠܰܢ ܚܰܘܒܰܝ̈ܢ ܘܰܚܛܳܗܰܝ̈ܢ ܐܰܝܟܰܢܳܐ ܕܳܐܦ ܚܢܰܢ ܫܒܰܩܢ ܠܚܰܝܳܒܰܝ̈ܢ. ܘܠܳܐ ܬܰܥܠܰܢ ܠܢܶܣܝܽܘܢܳܐ ܐܶܠܳܐ ܦܰܨܳܐ ܠܰܢ ܡܶܢ ܒܺܝܫܳܐ. ܡܶܛܽܠ ܕܕܺܝܠܳܟ ܗܺܝ ܡܰܠܟܽܘܬܳܐ ܘܚܰܝܠܳܐ ܘܬܶܫܒܽܘܚܬܳܐ ܠܥܳܠܰܡ ܥܳܠܡܺܝܢ ܐܰܡܺܝܢ܀
ܫܠܶܡ ܛܶܟܣܳܐ ܕܝܰܠܕܳܐ ܦܳܪܽܘܩܳܝܳܐ܀