ܒܝܘܡ 3 ܬܡܘܙ

ܩܝܢܬܐ ܚ

ܦܬܓܡܐ:

ܒܟܽܠܳܗ̇ ܐܰܪܥܳܐ ܢܶܦܩܰܬ ܣܒܰܪܬܗܽܘܢ ܘܰܒܣܰܘܦܶܝ̈ܗ̇ ܕܬܺܒܶܝܠ ܡܶܠܰܝ̈ܗܽܘܢ ܗ̄܀

ܬܒܪܬ‌ܐ:

ܨܠܽܘܬܳܟ ܥܰܡܰܢ ܬܳܐܘܡܰܐ ܫܠܺܝ̣ܚܳܐ ܨܠܽܘܬܳܟ ܥܰܡܰܢ: ܠܰܨܠܰܘ̈ܬܳܟ ܢܶܫܡܰܥ ܡܳܪܝܳܐ ܘܰܢܚܰܣܶܐ ܠܰܢ܀

ܒܰܨܠܰܘ̈ܳܬܳܟ ܡܳܪܝܳܐ ܢܒܰܛܶܠ ܫܰܒ̈ܛܶܐ ܕܪܽܘܓܙܳܐ: ܡܶܢ ܟܽܠ ܐܰܝܢܳܐ ܕܡܶܬܓܰܘܰܣ ܒܳܟ ܒܗܰܝܡܳܢܽܘܬܳܐ܀

ܒܬܪ ܐܘܢܓܠܝܘܢ ܒܩ̄: ܡܫܺܝܚܳܐ ܢܰܛܰܪܝܗ̇

ܠܳܟ ܛܽܘܒܰܝܟ ܬܳܐܘܡܰܐ ܫܠܺܝ̣ܚܳܐ. ܠܰܐܝܢܳܐ ܢܶܨܚܳܢܳܐ ܡܰܛܺܝ̣ܬ. ܕܒܺܐܝܕܳܟ ܠܒܰܟܬ ܠܗܰܘ ܢܰܗܺܝܪܳܐ. ܕܰܐܢܗܰܪ ܠܰܐܪܥܳܐ ܒܙܰܠܺܝ̣̈ܩܰܘܗܝ. ܘܨܶܒܥܳܟ ܣܳܡܬ ܒܢܶܒܥܳܐ ܒܪܺܝܟܳܐ. ܕܰܐܪܕܺܝ ܠܥܳܠܡܳܐ ܚܰܝ̈ܶܐ ܘܦܽܘܪܩܳܢܳܐ. ܘܰܐܘܕܺܝܬ ܕܗܽܘܝܽܘ ܐܰܠܳܗܳܐ. ܘܰܒܪܳܐ ܐܺܝ̣ܬܝܳܐ ܕܡܶܢ ܐܰܒܳܐ. ܘܰܪܥܶܡ ܒܟܽܠ ܦܶܢ̈ܝܳܢ ܨܰܘܬܳܐ ܕܩܳܠ ܗܰܝܡܳܢܽܘܬܳܟ. ܘܗܳܐ ܥܺܕܬܳܐ ܒܦܽܘܡܳܐ ܕܝܰܠܕܶܝ̈ܗ̇ ܥܰܡܳܟ ܩܳܥܝܳܐ: ܡܳܪܝ ܘܰܐܠܳܗܝ ܕܠܳܐ ܦܽܘܠܳܓܳܐ܀

ܠܘܛܢܝܐ ܒܩ̄: ܠܡܕܝܚ ܐܠܪܒ

ܛܽܘܒܰܝܟ ܐܰܒܳܐ ܬܳܐܘܡܰܐ ܕܰܗܘܰܝܬ: ܠܡܰܕܢܚܳܐ ܪܳܥܝܳܐ ܘܰܫܠܺܝ̣ܚܳܐ. ܪܰܒ ܐܺܝܩܳܪܳܟ ܓܰܒܝܳܐ ܕܰܫܘܰܝܬ: ܠܡܶܓܰܫ ܕܰܦܢܶܗ ܕܰܡܫܺܝܚܳܐ܀

ܘܕܰܨܒܳܐ ܡܳܪܳܟ ܕܡܶܢ ܠܶܒܳܟ ܢܪܺܝܡ: ܗܳܝ ܡܰܪܢܺܝܬܳܐ ܟܶܫܠܳܝܬܳܐ. ܐܶܡܰܪ ܬܳܐܘܡܰܐ ܬܳܐ ܨܶܒܥܳܟ ܣܺܝܡ: ܕܽܘܟܰܬ ܨܶܨ̈ܶܐ ܘܠܽܘܟܳܝܬܳܐ܀

ܒܗܳܕܶܐ ܓܶܫܬܳܐ ܫܪܳܪܳܐ ܐܰܩܢܺܝܬ: ܠܕܰܪܡܶܝܢ ܒܟܶܫܠܳܐ ܘܰܬܘܳܗܳܐ. ܘܒܳܗ̇ ܠܥܰܡ̈ܡܶܐ ܡܶܢ ܬܰܘܫܳܐ ܐܰܦܢܺܝܬ: ܠܘܳܬ ܝܺܕܰܥܬܳܐ ܕܰܐܠܳܗܳܐ܀

ܥܺܕܬܳܐ ܡܦܺܝܣܳܐ ܠܳܟ ܐܳܘ ܪܳܥܝܳܐ: ܕܰܫܪܳܪܳܟ ܢܗܶܐ ܠܳܗ̇ ܣܝܳܓܳܐ. ܗܳܐ ܥܰܡܳܟ ܒܦܽܘܡ ܝܰܠܕܶܝ̈ܗ̇ ܩܳܥܝܳܐ: ܡܳܪܝ ܘܰܐܠܳܗܝ ܕܠܳܐ ܦܽܘܠܳܓܳܐ܀

ܠܘܛܢܝܐ ܐܚܪܢܐ: ܩܰܐܬܝܺܣܡܰܐ ܥܰܠ ܡܳܪܝ ܬܳܐܘܡܰܐ

ܐܶܡܰܪ ܠܶܗ ܡܳܪܶܗ ܠܬܳܐܘܡܰܐ. ܕܳܐܘ ܫܠܺܝ̣ܚܳܐ ܪܳܚܶܡ ܐܢܳܐ ܠܳܟ. ܘܣܰܓܺܝ ܡܥܺܝܩ ܐ̱ܢܳܐ ܠܳܟ܀ ܘܰܠܗܶܢܕܽܘ ܡܫܰܕܰܪ ܐܢܳܐ ܠܳܟ. ܘܰܐܝܟ ܥܰܒܕܳܐ ܡܙܰܒܶܢ ܐܢܳܐ ܠܳܟ. ܠܰܐܬܪܳܐ ܕܰܐܟܣܶܢܝܳܐ܀

ܘܠܳܐ ܬܶܟܪܳܐ ܠܳܟ ܕܡܶܙܕܰܒܢܰܬ. ܕܝܰܘܣܶܦ ܟܺܐܢܳܐ ܐܶܙܕܰܒܰܢ. ܘܰܐܡܠܶܟ ܥܰܠ ܡܶܨܪܶܝܢ܀ ܢܺܐܬܽܘܢ ܡܰܠ̈ܟܶܐ ܠܺܐܝ̣ܩܳܪܳܟ. ܘܕܰܝܳܢ̈ܶܐ ܠܡܶܣܓܰܕ ܩܽܘܕܡܰܝܟ. ܒܝܰܘܡܳܐ ܕܥܰܕܥܺܐܕܳܟ܀

ܢܶܦܽܘܩ ܛܶܒܳܟ ܒܰܒܪܺܝܬܳܐ. ܐܳܘ ܫܠܺܝ̣ܚܳܐ ܕܪܰܚܡܶܗ ܡܳܪܶܗ. ܕܰܣܒܰܪܬܶܗ ܡܰܟܪܙܰܬ܀ ܥܰܠ ܗܘܳܐ ܬܳܐܘܡܰܐ ܨܶܝܕ ܚܰܒܪ̈ܰܘܗܝ. ܟܰܕ ܒܳܟܶܐ ܘܫܳܦ̈ܥܳܢ ܕܶܡܥܰܘ̈ܗܝ ܘܗܳܟܰܢ ܐܶܡܰܪ ܠܗܽܘܢ܀

ܐܳܘ ܫܠܺܝ̈ܚܶܐ ܨܰܠܰܘ ܥܠܰܝ. ܕܳܐܙܶܠ ܐܢܳܐ ܠܺܝ ܠܰܐܟܣܶܢܝܳܐ. ܕܶܐܦܠܽܘܚ ܥܰܒܕܽܘܬܳܐ܀ ܘܰܩܥܰܘ ܟܽܠܗܽܘܢ ܫܰܘܝܳܐܝ̣ܺܬ. ܘܙܰܘܶܕܘ ܗ̱ܘܰܘ ܠܶܗ ܨܠܰܘ̈ܳܬܳܐ. ܘܗܳܟܰܢ ܐܳܡܪܺܝܢ ܗ̱ܘܰܘ܀

ܐܰܠܳܗܰܢ ܢܺܐܙܰܠ ܥܰܡܳܟ. ܗܰܘ ܕܠܰܘܝܶܗ ܠܝܰܘܣܶܦ ܟܺܐܢܳܐ ܒܰܐܬܪܳܐ ܕܰܐܟܣܶܢܝܳܐ܀ ܐܰܠܳܗܰܢ ܢܺܐܙܰܠ ܥܰܡܳܟ. ܗܰܘ ܕܕܰܠܝܶܗ ܠܝܰܘܢܳܢ ܢܒܺܝܳܐ. ܘܰܐܣܩܶܗ ܡܶܢ ܝܰܡܳܐ܀

ܐܰܠܳܗܰܢ ܢܺܐܙܰܠ ܥܰܡܳܟ. ܗܰܘ ܕܰܗܘܳܐ ܝܰܪ̈ܚܶܐ ܬܶܫܥܳܐ ܒܟܰܪܣܳܗ̇ ܕܰܒܬܽܘܠܬܳܐ܀ ܐܰܠܳܗܰܢ ܢܺܐܙܰܠ ܥܰܡܳܟ. ܗܰܘ ܕܠܶܗ ܟܽܠܰܢ ܩܳܥܶܝܢܰܢ. ܡܳܪܶܐ ܟܽܠ ܫܽܘܒܚܳܐ ܠܳܟ܀

ܚܘܬܡܐ ܒܩ̄: ܛܽܘܒܰܝܟܝ ܐܳܦܪܰܬ

ܛܽܘܒܰܝܟ ܬܳܐܘܡܰܐ ܪܚܺܝܡ ܬܰܠܡܺܝ̈ܕܶܐ: ܘܓܰܙܳܐ ܕܫܽܘܦܪ̈ܶܐ ܘܰܡܠܶܐ ܛܽܘ̈ܒܶܐ: ܕܓܶܫܰܬ ܐܺܝ̣ܕܳܟ ܢܶܒܥܳܐ ܪܰܒܳܐ. ܕܰܐܪܕܺܝ ܚܰܝ̈ܶܐ ܠܥܳܠܡܳܐ ܟܽܠܶܗ. ܐܰܚܨܶܦ ܚܽܘܒܳܟ ܘܰܠܒܰܟ ܠܣܺܝܡܬܳܐ. ܡܰܠܝܰܬ ܥܽܘܬܪܳܐ ܕܒܳܗ̇ ܥܬܰܪܘ ܥܳܠܡ̈ܶܐ. ܪܰܒ ܗܽܘ ܛܽܘܒܳܟ. ܕܫܶܡܫܳܐ ܥܶܠܳܝܳܐ: ܠܒܰܟܬܳܝܗܝ ܒܨܶܒ̈ܥܳܬܳܟ܀