ܩܝܢܬܐ ܐ

ܦܬܓܡܐ:

ܡܶܟܺܝܠ ܐܶܩܽܘܡ ܐܳܡܰܪ ܡܳܪܝܳܐ: ܘܶܥܒܶܕ ܦܽܘܪܩܳܢܳܐ ܓܰܠܝܳܐܺܝܬ ܗ̄܀

ܬܒܪܬ‌ܐ:

ܒܪܳܐ ܕܒܰܩܝܳܡܬܶܗ ܦܰܪܩܳܗ̇ ܠܥܺܕܬܶܗ ܡܶܢ ܛܳܥܝܽܘܬܳܐ: ܗܰܒ ܒܳܗ̇ ܫܰܝܢܳܐ ܘܢܰܛܰܪ ܝܰܠܕܶܝ̈ܗ̇ ܒܰܩܝܳܡܬܳܟ ܡܳܪܝ܀

ܫܰܝܢܳܐ ܕܫܰܝܶܢ ܠܰܫܡܰܝܴ̈ܢܶܐ ܘܠܐܰܪ̈ܥܳܢܳܝܶܐ: ܫܰܝܶܢ ܠܥܺܕܬܳܟ ܘܢܰܛܰܪ ܝܰܠܕܶܝ̈ܗ̇ ܒܰܩܝܳܡܬܳܟ ܡܳܪܝ܀

ܒܬܪ ܐܘܢܓܠܝܘܢ ܒܩ̄: ܠܳܟ ܡܳܪܝܳܐ ܩܳܪܶܝܢܰܢ

ܫܽܘܒܚܳܐ ܠܶܗ ܠܰܐܠܳܗܳܐ ܕܩܳܡ ܡ݂ܶܢ ܩܰܒܪܳܐ: ܘܥܰܩܪܳܗ̇ ܠܨܶܗܝܽܘܢ ܨܳܠܽܘܒܬܳܐ ܘܰܡܟ̣ܰܪ ܠܶܗ ܥܺܕ̱ܬܳܐ: ܘܰܐܬ̣ܩܶܢ ܒܳܗ̇ ܦܳܬ̣ܽܘܪܳܐ ܕܦܰܓ̣ܪܶܗ ܚܰܝܳܐ: ܘܰܡܙܰܓ̣ ܒܳܗ̇ ܕܡܶܗ ܝܰܩܺܝܪܳܐ ܟܳܣܳܐ ܕܦܽܘܪܩܳܢܳܐ: ܫܽܘܒܚܳܐ ܠܶܗ ܕܦܰܪܩܳܗ̇ ܒܰܨܠܺܝܒܶܗ: ܫܽܘܒܚܳܐ ܠܶܗ ܕܰܒܡܰܘܬܶܗ ܐܰܚܝܳܗ̇: ܫܽܘܒܚܳܐ ܠܶܗ ܕܝܰܗ̱ܒ ܠܳܗ̇ ܦܰܓ̣ܪܶܗ ܘܰܕܡܶܗ ܠܚܽܘܣܳܝܳܐ܀

ܒܬܪ ܐܘܢܓܠܝܘܢ ܒܩ̄: ܩܽܘܩܳܝܳܐ

ܫܽܘܒܚܳܐ ܠܶܗ ܠܒܽܘܟܪܶܗ ܕܰܐܒܳܐ ܕܰܗܘܳܐ ܒܽܘܟܪܳܐ: ܡܶܢ ܥܽܘܒܳܗ̇ ܕܰܡܒܰܪܰܟܬܳܐ ܒܬܽܘܠܬܳܐ ܩܰܕܺܝܫܬܳܐ. ܘܥܰܠ ܪܺܝܫ ܩܰܝܣܳܐ ܕܒܰܚ ܢܰܦܫܶܗ ܚܠܳܦܰܝܢ: ܘܥܰܠ ܠܳܗ̇ ܠܰܫܝܽܘܠ: ܘܰܐܓܶܣ ܒܶܝܬ ܡܺܝ̈ܬܶܐ. ܫܽܘܒܚܳܐ ܠܶܗ ܕܰܗܘܳܐ ܒܽܘܟܪܳܐ ܕܟܽܠܗܽܘܢ ܕܰܡ̈ܟܶܐ: ܘܺܐܝܬܰܘܗܝ ܪܺܝܫ ܒܽܘܟܪ̈ܶܐ ܕܥܺܕܬܳܐ ܕܒܰܫܡܰܝܳܐ ܟܬܺܝܒܺܝܢ ܗ̄ ܫܽܘܒܚܳܐ ܠܫܳܠܽܘܚܶܗ܀

ܠܘܛܢܝܐ ܒܩ̄: ܝܒ:ܝܒ ܐܳܘ ܚܰܟܺܝܡܳܐ

ܩܳܡ ܒܰܪ ܚܰܝܳܐ ܡܶܢ ܒܶܝܬ̣ ܡܺܝ̈ܬ̣ܶܐ ܒܚܰܝܠܳܐ ܪܰܒܳܐ: ܘܰܐܩܺܝܡ ܥܰܡܶܗ ܠܟܽܠܗܽܘܢ ܡܺܝ̈ܬ̣ܶܐ ܕܰܫܟ̣ܺܝܒܺܝܢ ܗ̱ܘܰܘ܀

ܢܗܰܡ ܒܳܗ̇ ܒܰܫܝܽܘܠ ܐܰܝܟ ܓܰܢ̱ܒܳܪܳܐ ܡܳܪܶܗ ܕܳܐܕܳܡ: ܘܰܐܩܺܝܡ ܥܰܡܶܗ ܠܗܰܘ ܥܰܦܪܳܢܳܐ ܕܡܺܝܬ̣ ܥܰܠ ܐܰܦܰܘ̈ܗ̱ܝ܀

ܒܗܳܢܳܐ ܝܰܘܡܳܐ ܗܘܳܬ̣݀ ܙܳܟ̣ܽܘܬܳܐ ܠܟܽܠܗܽܘܢ ܥܰܡ̈ܡܶܐ: ܘܗܳܐ ܦܨܺܝܚܺܝܢ ܒܶܗ ܒܗܰܘ ܒܰܪ ܚܰܝܳܐ ܕܫܰܝܶܢ ܐܶܢܽܘܢ܀

ܩܳܡ ܘܰܐܩܺܝܡܶܗ ܠܳܐܕܳܡ ܕܰܥܒܰܪ ܥܰܠ ܦܽܘܩܕܳܢܳܐ: ܒܪܺܝܟ ܕܰܥܒܰܕ ܠܰܢ ܣܰܒܪܳܐ ܪܰܒܳܐ ܒܝܽܘܡ ܢܽܘܚܳܡܶܗ܀

ܚܘܬܡܐ ܒܩ̄: ܛܽܘܒܰܝܟܝ ܐܳܦܪܰܬ

ܒܗܳܢܳܐ ܝܰܘܡܳܐ ܫܶܡܥܽܘܢ ܟܺܐܦܳܐ ܥܰܡ ܝܽܘܚܰܢܳܢ ܪܗܶܛܘ̱ ܨܶܝܕ ܩܰܒܪܳܐ: ܘܰܚܙܰܘ ܕܠܰܝܬܰܘܗ̱ܝ ܚܰܝܳܐ ܒܩܰܒܪܳܐ: ܘܶܐܫܬܰܪܰܪܘ̱ ܗ̱ܘܰܘ ܥܰܠ ܢܽܘܚܳܡܶܗ: ܘܰܚܙܰܐܽܘܗ̱ܝ ܠܣܽܘܕܳܪܳܐ ܕܰܟܪܺܝܟ: ܘܟܶܬܳܢ̈ܶܐ ܟܰܕ ܣܺܝܡܺܝܢ ܠܰܣܛܰܪ: ܕܢܰܚ̈ܬܶܐ ܕܫܽܘܒܚܳܐ ܐܶܬܥܰܛܰܦ ܡܰܠܟܳܐ: ܘܩܳܡ ܠܶܗ ܒܬܶܫܒܽܘܚܬܳܐ܀