ܩܝܢܬܐ ܐ

ܦܬܓܡܐ:

ܢܶܚܕܽܘܢ ܫܡܰܝ̈ܳܐ ܘܰܬܕܽܘܨ ܐܰܪܥܳܐ܇ ܒܰܩܝܳܡܬܶܗ ܕܡܰܠܟܳܐ ܡܫܺܝܚܳܐ ܗ̄܀

ܬܒܪܬ‌ܐ:

ܒܪܳܐ ܕܒܰܩܝܳܡܬܶܗ ܦܰܪܩܳܗ̇ ܠܥܺܕܬܶܗ ܡܶܢ ܛܳܥܝܽܘܬܳܐ: ܗܰܒ ܒܳܗ̇ ܫܰܝܢܳܐ ܘܢܰܛܰܪ ܝܰܠ̈ܕܶܝܗ̇ ܒܰܩܝܳܡܬܳܟ ܡܳܪܝ܀

ܫܰܝܢܳܐ ܕܫܰܝܶܢ ܠܰܫ̈ܡܰܝܳܢܶܐ ܘܠܰܐܪ̈ܥܳܢܳܝܶܐ: ܫܰܝܶܢ ܠܥܺܕܬܳܟ ܘܢܰܛܰܪ ܝܰܠ̈ܕܶܝܗ̇ ܒܰܩܝܳܡܬܳܟ ܡܳܪܝ܀

ܒܬܪ ܐܘܢܓܠܝܘܢ ܒܩ̄: ܩܽܘܩܳܝܳܐ - H

ܒܫܰܒܬܳܐ ܕܢܳܓܰܗ ܚܰܕ ܒܫܰܒܳܐ ܒܢܺܝܣܳܢ ܝܰܪܚܳܐ. ܡܰܠܰܐܟ̈ܶܐ ܢܚܶܬܘ̱ ܡܶܢ ܪܰܘܡܳܐ ܠܺܐܝܩܳܪܶܗ ܕܡܳܪܗܽܘܢ. ܘܥܰܓܶܠܘ̱ ܟܺܐܦܳܐ ܕܰܛܒܰܥܘ̱ ܝܽܘ̈ܕܳܝܶܐ. ܘܥܰܠܘ̱ ܘܰܣܓܶܕܘ̱ ܠܶܗ ܠܚܰܝܳܐ ܒܶܝܬ ܡܺܝ̈ܬܶܐ. ܒܚܰܕ ܒܫܰܒܳܐ ܝܰܘܡܳܐ ܪܰܒܳܐ ܩܳܡ ܘܶܐܬܢܰܚܰܡ. ܘܰܗܘܳܐ ܪܺܝܫܺܝܬܳܐ ܕܕܰܡ̈ܟܶܐ ܠܳܟ ܫܽܘܒܚܳܐ ܡܳܪܝܳܐ. ܗ̄ ܡܶܟܺܝܠ ܘܰܠܥܳܠܰܡ܀

ܒܬܪ ܐܘܢܓܠܝܘܢ ܒܩ̄: ܛܽܘܒܰܝܟܝ ܥܺܕܬܳܐ - H

ܨܶܡܚܶܗ ܕܰܐܒܳܐ: ܕܰܐܢܗܰܪ ܠܰܐܪܥܳܐ ܒܝܽܘܠ̈ܦܳܢܰܘܗ̱ܝ. ܘܰܓܒܳܐ ܠܥܺܕܬܳܐ ܒܰܪ̱ܬ ܥܰܡ̱̈ܡܶܐ: ܘܡܰܟ̣ܪܳܗ̇ ܒܰܕܡܳܐ ܕܰܩܢܽܘܡܶܗ. ܐܰܩܺܝܡ ܒܳܗ̇ ܖ̈ܳܥܰܘܳܬܳܐ: ܘܰܖ̈ܒܰܝ ܒ̈ܳܬܶܐ ܫܰܪܺܝܖ̈ܶܐ: ܕܰܙܗܺܝܪܳܐܝܺܬ ܢܶܛܪܽܘܢܳܗ̇: ܡܶܢ ܚܽܘ̈ܒܳܠܶܐ ܕܛܳܥܝܽܘܬܳܐ. ܘܫܰܪܰܪ ܒܳܗ̇ ܚܽܘܒܳܟ ܪܰܒܳܐ܆ ܕܠܳܟ ܬܶܗܘܶܐ ܥܕܰܡܳܐ ܠܥܳܠܰܡ܀

ܠܘܛܢܝܐ ܒܩ̄: ܙ : ܙ ܢܶܩܝܳܐ ܗܘܺܝܬ - H

ܫܰܪܰܪ ܡܳܪܝ ܐܶܣܶܝ̈ܗ̇ ܕܥܺܕܬܳܐ: ܕܡܶܢ ܫܽܘܪܳܝܳܐ ܠܳܟ ܢܶܩܦܰܬ: ܘܢܰܛܰܪ ܠܟܽܠܳܗ̇ ܡܰܪܥܺܝܬܳܐ: ܕܰܠܚܽܘܒܳܟ ܩܢܽܘܡܳܗ̇ ܙܶܩܦܰܬ܀

ܕܝܶܠܕܰܬ ܟܶܢܫܳܐ ܕܠܳܟ ܐܶܚܰܕ: ܘܰܠܩܽܘܫܬܳܟ ܒܥܳܠܡܳܐ ܣܰܒܰܪ: ܘܡܶܛܽܠ ܚܽܘܒܳܟ ܕܡܶܗ ܐܶܫܰܕ: ܘܥܰܠ ܟܽܠ ܚܰܝ̈ܠܺܝܢ ܐܶܬܓܰܢ̱ܒܰܪ܀

ܨܠܺܝܒܳܟ ܢܩܽܘܡ ܥܰܠ ܡܰܛܪ̈ܳܬܳܗ̇: ܘܢܰܡܶܟ ܚܰܝܠܳܐ ܕܣܳܪ̈ܽܘܚܶܐ: ܘܩܽܘܫܬܳܟ ܢܰܚܕܰܪ ܣܳܚܪ̈ܳܬܳܗ̇: ܘܢܶܕܚܽܘܩ ܫܽܘܩܪܳܐ ܕܕܳܠܽܘ̈ܚܶܐ܀

ܘܗܰܒ ܚܽܘܒܳܟ ܒܟܶܢܫܳܐ ܕܥܺܕܬܳܐ: ܕܕܶܒ̈ܚܰܝ ܫܽܘܒܚܳܐ ܠܳܟ ܢܕܰܒܰܚ: ܘܫܰܪܰܪ ܫܰܝܢܳܟ ܒܰܒܪܺܝܬܳܐ: ܕܰܫܡܳܟ ܡܶܢ ܟܽܠ ܢܶܫܬܰܒܰܚ܀

ܠܘܛܢܝܐ ܒܩ̄: ܙ : ܙ ܩܰܕܡܳܝܬܳܐ - H

ܒܬܰܪܥܳܐ ܕܺܝܠܳܟ ܚܰܢܳܢܳܐ: ܢܳܩܶܫ ܩܳܠܳܐ ܕܒܳܥܽܘܬܰܢ. ܠܳܐ ܬܶܟܠܶܐ ܡܶܢ ܣܳܓܽܘ̈ܕܰܝܟ: ܫ̈ܶܐܠܳܬܳܐ ܕܣܽܘܢܩܳܢܰܝ̈ܗܽܘܢ܀

ܨܠܽܘܬܳܐ ܕܣܶܠܩܰܬ ܡܶܢ ܝܰܡܳܐ: ܘܡܶܢ ܓܽܘܒܳܐ ܘܡܶܢ ܐܰܬܽܘܢܳܐ. ܗܺܝ ܬܶܦܬܰܚ ܬܰܪܥܳܐ ܕܖ̈ܰܚܡܶܐ: ܠܰܨܠܽܘܬܰܢ ܘܰܠܒܳܥܽܘܬܰܢ܀

ܚܽܘܣ ܥܠܰܝ ܡܳܪܝ ܚܽܘܣ ܥܠܰܝ: ܒܣܽܘܓܳܐ ܕܰܡܪܰܚܡܳܢܽܘܬܳܟ. ܘܒܺܝ̈ܫܳܬ̣ܳܐ ܕܰܣܥܺܝܪ̈ܳܢ ܠܺܝ: ܠܳܐ ܬܶܬ̣ܕܟܰܪ ܠܺܝ ܡܪܰܚܡܳܢܳܐ܀

ܐܰܠܳܗܳܐ ܠܳܟ ܩܳܪܶܝܢܰܢ: ܠܥܽܘܕܪܳܢܳܐ ܕܰܡܚܺܝܠܽܘܬܰܢ. ܫܡܰܥ ܛܳܒܳܐ ܩܳܠ ܒܳܥܽܘܬܰܢ: ܘܦܰܢܳܐ ܒܖ̈ܰܚܡܰܝܟ ܫ̈ܶܐܠܳܬܰܢ܀

ܚܘܬܡܐ ܒܩ̄: ܗܳܐ ܩܛܺܝܠ ܗܘ ܒܡܶܨܪܶܝܢ - H

ܨܒܳܐ ܡܳܪܰܢ ܘܰܫܪܳܐ: ܒܟܰܪܣܳܐ ܕܒܶܣܪܳܐ: ܘܟܰܕ ܚܬܺܝܡܺܝܢ ܒܬܽܘ̈ܠܶܝܗ̇: ܥܰܠ ܗ̱ܘܳܐ ܘܰܢܦܰܩ: ܒܓܰܘ ܩܰܒܪܳܐ ܢܩܺܝܪܳܐ: ܢܳܡ ܗܘܳܐ ܘܰܕܡܶܟ: ܘܟܰܕ ܛܒܺܝܥ ܗܘܳܐ ܬܰܪܥܶܗ: ܩܳܡ ܘܶܐܬܢܰܚܰܡ܀

ܚܘܬܡܐ ܐܚܪܢܐ ܒܩ̄: ܝܰܘܢܳܐ ܛܠܺܝܬܳܐ - H

ܒܗܳܢ ܝܰܘܡܳܐ ܪܗܶܛܘ ܬܰܠܡܺܝ̈ܕܶܐ: ܫܶܡܥܽܘܢ ܟܺܐܦܳܐ ܘܝܽܘܚܰܢܳܢ. ܕܢܶܚܙܽܘܢ ܠܪܰܒܗܽܘܢ ܕܶܐܬ̣ܢܰܚܰܡ: ܘܢܶܫܬܰܪܪܽܘܢ ܥܰܠ ܢܽܘܚܳܡܶܗ. ܘܰܚܙܰܘ ܟܶܬܳܢ̈ܶܐ: ܟܰܕ ܣܺܝܡܺܝܢ ܠܰܣܛܰܪ: ܕܚܰܝܳܐ ܫܒܰܩ ܐܶܢܽܘܢ. ܘܶܐܫܬܰܪܰܪܘ ܕܩܳܡ ܠܶܗ: ܘܰܠܒܶܫ ܬܶܫܒܽܘܚܬܳܐ: ܘܰܗܦܰܟܘ ܗܘܰܘ ܕܢܶܗܘܽܘܢ: ܣܢܺܐܓܖ̈ܶܐ ܠܰܩܝܳܡܬܶܗ. ܘܢܰܟܪܙܽܘܢ ܢܽܘܚܳܡܶܗ ܒܰܐܪܒܰܥ ܦܶܢ̈ܝܳܬܳܐ܀