ܒܝܽܘܡ 15 ܐܝܳܪ

ܩܝܢܬܐ ܐ

ܦܬܓܡܐ:

ܟܽܠܳܗ̇ ܫܽܘܒܚܳܐ ܕܒܰܪܬ ܡܰܠܟܳܐ ܡܶܢ ܠܓܰܘ. ܘܰܡܨܰܒܰܬ ܠܒܽܘܫܳܗ̇ ܒܕܰܗܒܳܐ ܛܳܒܳܐ ܗ̄܀

ܬܒܪܬ‌ܐ:

ܨܠܽܘܬܶܟܝ̱ ܥܰܡܰܢ ܐܳܘ ܡܒܰܪܰܟܬܳܐ ܨܠܽܘܬܶܟܝ̱ ܥܰܡܰܢ: ܠܰܨܠܰܘ̈ܬܶܟܝ̱ ܢܶܫܡܰܥ ܡܳܪܝܳܐ ܘܰܢܚܰܣܶܐ ܠܰܢ܀

ܒܰܨܠܰܘ̈ܬܳܟ ܡܳܪܝܳܐ ܢܒܰܛܶܠ ܫܰܒܛܳܐ ܕܪܽܘܓܙܳܐ: ܡܶܢ ܟܽܠ ܐܰܝܢܳܐ ܕܩܰܠܶܣ ܥܺܐܕܶܟܝ̱ ܒܗܰܝܡܳܢܽܘܬܳܐ܀

ܩܕܡ ܐܘܢܓܠܝܘܢ

ܐܶܬܢܶܐ ܫܽܘܦܪ̈ܰܝܟܝ̱ ܬܳܗܰܪ ܐ̱ܢܳܐ܇ ܡܰܪܝܰܡ ܒܰܪܬ̣ ܕܰܘܺܝܕ܇ ܘܕܺܐܡܰܪ ܫܰܪܒܶܟ̣ܝ̱ ܠܳܐ ܡܨܶܐ ܐ̱ܢܳܐ܇ ܒܬ̣ܽܘܠܬܳܐ ܩܰܕܺܝܫܬܳܐ܀

ܒܪܺܝܟ̣ܬܳܐ ܒܢܶܫ̈ܶܐ ܐܰܢ̱ܬܝ ܐܺܝܬ̣ܰܝܟܝ̱܇ ܡܰܪܝܰܡ ܒܰܪܬ̣ ܕܰܘܺܝܕ܇ ܘܰܒܪܺܝܟ ܦܺܐܪܳܐ ܕܰܒܟܰܪܣܶܟ̣ܝ̱܇ ܐܶܡܪܰܬ̣ ܐܶܠܺܝܫܒܰܥ܀

ܛܽܘܒܰܝܟܝ̱ ܐܳܦ ܠܶܟ̣ܝ̱ ܘܠܰܐܒܳܗܰܝ̈ܟܝ̱܇ ܡܰܪܝܰܡ ܒܰܪܬ̣ ܕܰܘܺܝܕ܇ ܘܛܽܘܒܰܘܗܝ ܠܰܐܝܢܳܐ ܕܰܒܟܽܠ ܫܳܥ܇ ܛܽܘܒܳܐ ܝܳܗܶܒ ܠܶܟ̣ܝ̱܀

ܫܡܰܝ̈ܳܢܶܐ ܥܰܡ ܐܰܪ̈ܥܳܢܶܐ܇ ܡܰܪܝܰܡ ܒܰܪܬ̣ ܕܰܘܺܝܕ܇ ܚܳܕܶܝܢ ܒܝܰܘܡܳܐ ܕܕܽܘܟ̣ܪܳܢܶܟ̣ܝ̱܇ ܨܠܽܘܬ̣ܶܟ̣ܝ̱ ܬܥܰܕܰܪ ܠܰܢ܀

ܒܬܪ ܐܘܢܓܠܝܘܢ ܒܩ̄: ܩܽܘܩܳܝܐ

ܗܳܐ ܫܶܒܰܠ ܚܰܝ̈ܶܐ ܫܶܘܚܰܬ: ܡܶܢ ܚܰܩܠܳܐ ܒܪܺܝܟܬܳܐ. ܩܽܘܡܘ ܟܰܦ̈ܢܶܐ ܩܛܽܘܦܽܘܢ ܡܶܢܳܗ̇: ܬܽܘܪܣܳܝ ܢܰܦ̈ܫܳܬܟܽܘܢ. ܕܟܰܦܢܺܝܢ ܐܢ̱ܬܽܘܢ. ܘܗܳܫܳܐ ܣܳܒܥܺܝܢ ܐܢ̱ܬܽܘܢ. ܘܕܰܨܗܶܝܢ ܗܘܰܝܬܽܘܢ. ܘܗܳܫܳܐ ܪܳܘܶܝܬܽܘܢ. ܐܽܘܟܠܳܗ̇ ܣܰܒܥܰܐ ܗܘ ܕܰܠܥܳܠܰܡ: ܘܚܰܝ̈ܶܐ ܕܠܳܐ ܡܰܘܦܶܝܢ. ܚܨܽܘܕܘ ܡܶܢܳܗ̇ ܟܰܦܳܐ ܘܰܩܢܰܘ: ܛܽܘ̈ܒܶܐ ܕܠܳܐ ܦܳܛܪܺܝܢ ܗ̄ܘܗ̄܀

ܒܬܪ ܐܘܢܓܠܝܘܢ ܐܚܪܢܐ ܒܩ̄: ܩܽܘܩܳܝܳܐ

ܟܽܠܳܗ̇ ܐܰܪܥܳܐ ܕܶܐܦܶܣܳܘܣ܆ ܛܰܠܳܐ ܪܶܣܡܰܬ. ܟܰܕ ܐܰܝܬܺܝ ܡܳܪܝ ܝܽܘܚܰܢܳܢ܆ ܟܬܳܒ̈ܶܐ ܕܰܒܬܽܘܠܬܳܐ: ܕܰܪܫܺܝܡ ܗ̱ܘܳܐ ܒܗܽܘܢ. ܕܢܶܗܘܶܐ ܕܽܘܟܪܳܢܳܐ. ܕܰܡܒܰܪܰܟܬܳܐ. ܬܠܳܬ ܙܰܒܢܺܝ̈ܢ ܒܫܰܢ̱ܬܳܐ. ܒܟܳܢܽܘܢ ܢܶܗܘܶܐ ܥܰܠ ܙܰܪ̈ܥܶܐ. ܘܒܺܐܝܳܪ ܥܰܠ ܫܶܒ̈ܠܶܐ. ܘܒܳܐܒ ܝܰܪܚܳܐ ܡܶܛܽܠ ܓܽܘܦܢ̈ܶܐ. ܕܐ̱ܪܳܙ ܚܰܝ̈ܶܐ ܨܺܝܪ ܒܗܶܝܢ ܗ̄ ܨܠܽܘܬܳܗ̇ ܬܥܰܕܰܪ ܠܰܢ܀

ܠܘܛܢܝܐ ܒܩ̄: ܠܢܣܒܚ ܘܢܡܓܕ

ܫܶܒܰܠ ܚܰܝ̈ܶܐ ܕܢܰܚ ܡܶܢ ܡܰܪܝܰܡ ܘܰܐܚܺܝ ܠܥܳܠܡܳܐ: ܘܬܰܪܣܺܝ ܘܣܰܒܰܥ ܡܶܢ ܟܰܦܢܽܘܬܳܐ ܠܟܽܠܗܽܘܢ ܥܰܡ̈ܡܶܐ܀

ܫܶܒܰܠ ܚܰܝ̈ܶܐ ܣܠܶܩ ܡܶܢ ܡܰܪܝܰܡ ܒܪܺܝܟܰܬ ܒܢܶܫ̈ܶܐ: ܘܚܰܪܰܪ ܠܰܐܪܥܳܐ ܡܶܢ ܫܽܘܥܒܳܕܳܐ ܕܫܺܐܕ̈ܶܐ ܒܺܝ̣̈ܫܶܐ܀

ܛܽܘܒܰܝܟܝ̱ ܡܰܪܝܰܡ ܕܟܰܦܳܐ ܕܫܽܘܒܚܳܐ ܫܘܰܚ ܡܶܢ ܚܰܩܠܶܟܝ̱: ܘܰܗܘܳܐ ܠܰܚܡܳܐ ܠܟܰܦ̈ܢܶܐ ܕܰܐܪܥܳܐ ܘܣܰܒܰܥ ܐܶܢܽܘܢ܀

ܛܽܘܒܰܝܟܝ̱ ܡܰܪܝܰܡ ܡܶܢ ܟܽܠ ܦܽܘ̈ܡܺܝܢ ܐܳܦ ܠܶܫܳܢܺܝ̈ܢ: ܕܒܰܒܪܶܟܝ̱ ܩܢܰܝܢܰܢ: ܫܶܒܰܠ ܚܰܝ̈ܶܐ ܘܥܽܘܬܪܳܐ ܪܰܒܳܐ܀

ܠܘܛܢܝܐ ܒܩ̄: ܚ : ܙ ܠܬܶܫܒܽܘܚܬܳܐ ܕܡܳܪܝܳܐ

ܫܶܒܠܳܐ ܒܪܺܝܟܬܳܐ ܕܛܰܠܳܐ ܩܰܒܠܰܬ: ܡܶܢ ܥܢܳܢܳܐ ܕܰܐܠܳܗܽܘܬܳܐ. ܘܡܶܢ ܪܽܘܚܩܽܘܕܫܳܐ ܒܶܛܢܰܬ ܘܝܰܒܠܰܬ: ܫܶܒܰܠ ܚܰܝ̈ܶܐ ܠܐܢܳܫܽܘܬܳܐ܀

ܒܗܳܕ ܫܶܒܠܳܐ ܟܳܣܳܐ ܚܡܺܝܪ ܚܰܝ̈ܶܐ: ܕܒܶܗ ܡܽܘܠܳܝ ܟܽܠ ܣܽܘܢܩܳܢܳܐ. ܐܽܘܟܠܶܗ ܦܳܪܶܩ ܡܶܢ ܙܢܰܝ̈ ܘܳܝ̈ܶܐ: ܘܡܰܩܢܶܐ ܚܰܝ̈ܶܐ ܘܦܽܘܪܩܳܢܳܐ܀

ܓܰܙܳܐ ܕܪ̈ܰܚܡܶܐ ܘܝܰܡܺܝܢ ܥܶܕܪܳܐ: ܘܢܶܒܥܳܐ ܕܚܰܝ̈ܶܐ ܘܛܳܒ̈ܳܬܳܐ. ܠܶܟܝ ܗܽܘ ܝܳܐܝܳܐ ܪܰܒܽܘܬ ܗܶܕܪܳܐ: ܘܛܽܘܒܳܐ ܡܶܢ ܟܽܠ ܫܰܪ̈ܒܳܬܳܐ܀

ܒܶܟܝ ܡܶܬܓܰܘܣܳܐ ܥܺܕܬܳܐ ܘܝܰܠ̈ܕܶܝܗ̇: ܐܶܡܳܐ ܡܰܠܝܰܬ ܛܰܝܒܽܘܬܳܐ. ܒܥܳܝ ܡܶܢ ܒܶܪܝ ܕܰܒܚܽܘܒܶܗ ܢܗܰܕܶܝܗ̇: ܠܽܐܘܪܚܳܐ ܕܫܰܝܢܳܐ ܘܰܐܘܝܽܘܬܳܐ܀

ܗܫܐ ܚܙܝ ܛܟܣܐ ܕܙܘܝܚܐ ܕܨܠܝܒܐ ܒܝܘܡ ܥܐܕܝ̈ܗ̇ ܕܒܬܘܠܬܐ ܩܕܝܫܬܐ ܡܪܝܡ

ܚܘܬܡܐ ܒܩ̄: ܗܰܒܠܰܢ ܡܳܪܰܢ

ܐܰܢܬܝ ܗܺܝ ܡܰܪܝܰܡ ܫܶܒܰܠ ܚܰܝ̈ܶܐ: ܕܡܶܢ ܥܽܘܒܶܟܝ̱ ܫܘܰܚ ܠܰܢ ܐܽܘܟܠܳܐ ܕܚܰܝ̈ܶܐ. ܐܰܢܬܝ ܗܺܝ ܐܶܡܳܐ ܩܽܘܒܬܳܐ ܚܕܰܬܳܐ: ܕܡܰܝ̈ܳܐ ܡܰܚ̈ܝܳܢܶܐ ܠܥܳܠܡܳܐ ܝܶܗܒܰܬ܀

ܚܘܬܡܐ ܐܚܪܢܐ ܒܩ̄: ܗܳܐ ܩܛܺܝ̣ܠ ܗܘ

ܛܽܘܒܰܝܟܝ̱ ܒܰܪܬ ܕܰܘܺܝܕ: ܚܰܩܠܳܐ ܒܪܺܝܟܬܳܐ. ܕܡܶܢܶܟܝ̱ ܕܢܰܚ ܫܶܒܰܠ ܚܰܝ̈ܶܐ ܠܥܳܠܡܳܐ. ܕܒܶܗ ܗ̱ܘ ܣܒܰܥܘ ܟܰܦ̈ܢܶܐ ܘܰܪܘܺܝܘ ܨܗܰܝ̈ܳܐ. ܘܶܐܬܚܰܪܰܪܘ ܥܰܡ̈ܡܶܐ ܡܶܢ ܫܽܘܥܒܳܕܳܐ܀