ܩܝܢܬܐ ܙ

ܦܬܓܡܐ:

ܟܽܠܟܽܘܢ ܥܰܡ̱ܡ̈ܶܐ ܩܽܘܫܘ ܟܰܦܳܐ: ܘܫܰܒܰܚܘ ܠܰܐܠܳܗܳܐ ܒܩܳܠܳܐ ܕܫܽܘܒܚܳܐ ܗ̄܀

ܬܒܪܬ‌ܐ:

ܒܪܳܐ ܕܒܰܩܝܳܡܬܶܗ ܦܰܪܩܳܗ̇ ܠܥܺܕܬܶܗ ܡܶܢ ܛܳܥܝܽܘܬܳܐ: ܗܰܒ ܒܳܗ̇ ܫܰܝܢܳܐ ܘܢܰܛܰܪ ܝܰܠܕܶܝ̈ܗ̇ ܒܰܩܝܳܡܬܳܟ ܡܳܪܝ܀

ܫܰܝܢܳܐ ܕܫܰܝܶܢ ܠܰܫܡܰܝܴ̈ܢܶܐ ܘܠܐܰܪ̈ܥܳܢܳܝܶܐ: ܫܰܝܶܢ ܠܥܺܕܬܳܟ ܘܢܰܛܰܪ ܝܰܠܕܶܝ̈ܗ̇ ܒܰܩܝܳܡܬܳܟ ܡܳܪܝ܀

ܒܬܪ ܐܘܢܓܠܝܘܢ ܒܩ̄: ܛܽܘܒܰܝܟܝ ܥܺܕܬܳܐ

ܒܝܽܘܡ ܚܰܕ ܒܫܰܒܳܐ: ܕܺܐܝܬܰܘܗ̱ܝ ܒܽܘܟܪܳܐ ܕܝܰܘ̈ܡܳܬܳܐ. ܪܺܝܫܺܝܬܳܐ ܕܫܽܘܒܚܳܐ ܢܰܣܶܩ: ܥܰܡ ܥܶܛܪܳܐ ܕܒܶܣ̈ܡܶܐ ܛܳܒ̈ܶܐ. ܠܗܰܘ ܒܽܘܟܪܳܐ ܕܰܐܠܳܗܽܘܬܳܐ: ܕܠܳܐ ܫܰܪܺܝ ܐܰܦ ܠܳܐ ܫܰܠܶܡ: ܘܕܰܢܚܶܬ ܕܢܶܦܪܽܘܩ ܠܰܓܒܺܝܠܬܶܗ: ܗܘܳܐ ܒܽܘܟܪܳܐ ܡܶܢ ܒܶܝܬ ܡܺܝ̈ܬܶܐ. ܘܕܰܨܒܳܐ ܗܘܳܐ ܒܽܘܟܪܳܐ ܠܡܰܪܝܰܡ: ܫܽܘܒܚܳܐ ܠܶܗ ܘܰܠܫܳܠܽܘܚܶܗ܀

ܠܘܛܢܝܐ ܒܩ̄: ܙ:ܙ ܢܶܩܝܳܐ ܗܘܺܝܬ

ܡܫܺܝܚܳܐ ܟܽܘܡܪܳܐ ܕܰܫܪܳܪܳܐ: ܕܰܕܒܰܚ ܢܰܦܫܶܗ ܒܰܙܩܺܝܦܳܐ. ܡܶܛܽܠ ܐܳܕܳܡ ܚܰܝܳܒܳܐ: ܐܶܬ̣ܬܰܚܬܺܝ ܠܥܽܘܒܳܗ̇ ܕܰܫܝܽܘܠ܀

ܕܡܶܟ ܒܽܘܟܪܳܐ ܒܠܶܒܳܗ̇ ܕܰܐܪܥܳܐ: ܡܶܛܽܠ ܦܽܘܪܩܳܢܶܗ ܕܳܐܕܳܡ. ܘܛܰܥܢܶܗ ܒܝܰܘܡܳܐ ܕܚܰܕ ܒܫܰܒܳܐ: ܥܰܠ ܟܰܬܦ̈ܳܬܶܗ ܘܶܐܬܥܰܠܺܝ܀

ܒܪܺܝܟ ܪܳܥܝܳܐ ܕܡܶܛܽܠ ܚܽܘܒܶܗ: ܡܺܝܬ ܘܰܚܝܳܐ ܘܩܳܡ ܘܶܐܬܢܰܚܰܡ. ܐܰܫܪܳܐ ܫܰܝܢܳܟ ܒܰܒܪܺܝܬܳܐ: ܘܚܰܕܳܐ ܠܥܺܕܬܳܟ ܘܰܠܝܰܠ̈ܕܶܝܗ̇܀

ܡܫܺܝܚܳܐ ܕܚܰܕܺܝ ܠܰܫܠܺܝ̈ܚܰܘܗܝ: ܘܰܐܦܨܰܚ ܠܢܶܫ̈ܶܐ ܒܢܽܘܚܳܡܶܗ. ܚܰܕܳܐ ܠܰܢ ܡܳܪܝ ܡܳܐ ܕܳܐܬܶܝܬ: ܒܡܶܐܬܺܝܬܳܟ ܬܪܰܝܳܢܺܝܬܳܐ܀

ܚܘܬܡܐ ܒܩ̄: ܗܳܢܰܘ ܝܰܪܚܳܐ

ܒܝܽܘܡ ܚܰܕ ܒܫܰܒܳܐ: ܩܳܡ ܡܶܢ ܩܰܒܪܳܐ ܒܰܪ ܐܰܠܳܗܳܐ. ܘܰܐܩܺܝܡ ܥܰܡܶܗ ܡܶܢ ܓܰܘ ܥܓܳܢܳܐ: ܠܳܐܕܳܡ ܪܰܡܝܳܐ ܘܟܽܠܗܽܘܢ ܝܰܠ̈ܕܰܘܗܝ. ܘܰܐܣܶܩ ܐܶܢܽܘܢ: ܠܰܥܕܶܢ ܪܰܒܬܳܐ ܡܰܠܝܰܬ ܛܽܘ̈ܒܶܐ܀