ܩܝܢܬܐ ܐ

ܦܬܓܡܐ:

ܡܰܠ̈ܟܶܐ ܕܬܰܪܫܺܝܫ ܘܰܕܓܳܙܪ̈ܳܬܳܐ: ܩܽܘܪ̈ܒܳܢܶܐ ܢܰܝܬܽܘܢ ܠܶܗ ܗ̄܀

ܬܒܪܬ‌ܐ:

ܒܪܳܐ ܕܰܒܝܰܠܕܶܗ ܦܰܪܩܳܗ̇ ܠܥܺܕܬܶܗ ܡܶܢ ܛܳܥܝܽܘܬܳܐ: ܗܰܒ ܒܳܗ̇ ܫܰܝܢܳܟ ܘܢܰܛܰܪ ܝܰܠܕܶܝ̈ܗ̇ ܒܡܰܘܠܳܕܳܟ ܡܳܪܝ܀

ܫܰܝܢܳܐ ܕܫܰܝܶܢ ܠܰܫܡܰܝ̈ܢܶܐ ܘܠܰܐܪ̈ܥܳܢܳܝܶܐ: ܫܰܝܶܢ ܠܥܺܕܬܳܟ ܘܢܰܛܰܪ ܝܰܠܕܶܝ̈ܗ̇ ܒܡܰܘܠܳܕܳܟ ܡܳܪܝ܀

ܒܬܪ ܐܘܢܓܠܝܘܢ ܒܩ̄: ܛܽܘܒܰܝܟܝ ܥܺܕܬܳܐ - H

ܡܰܢܽܘ ܣܳܦܶܩ ܕܢܶܫܬܰܥܶܐ ܥܰܠ ܬܶܕܡܽܘܪܬܳܐ: ܕܰܗܘܳܬ ܝܰܘܡܳܢ ܒܒܶܝܬ ܠܚܶܡ: ܘܰܚܙܰܐܘܗ̇ ܡܓܽܘ̈ܫܶܐ ܘܰܬܗܰܪܘ̱. ܛܰܠܝܳܐ ܕܰܟܪܺܝܟ ܒܥܰܙܪ̈ܽܘܪܶܐ. ܘܰܪܡܶܐ ܒܽܐܘܪܝܳܐ ܕܚܰܝ̈ܘܳܬܳܐ: ܫܺܝܛ ܚܶܙܘܶܗ ܐܰܝܟ ܒܰܪܢܳܫܳܐ. ܘܪܳܬܝܺܢ ܡܶܢܶܗ ܢܽܘܪ̈ܳܢܶܐ. ܕܺܐܝ̣ܬܰܘܗܝ ܒܩܽܘܫܬܳܐ ܘܰܫܪܳܪܳܐ ܒܰܪ ܐܰܠܳܗܳܐ ܕܶܐܬܓܰܫܰܡ܀

ܒܬܪ ܐܘܢܓܠܝܘܢ ܐܚܪܢܐ ܒܩ̄: ܡܫܺܝܚܳܐ ܐܶܬܝܠܶܕ - H

ܡܫܺܝܚܳܐ ܐܶܬܺܝܠܶܕ: ܒܓܰܘ ܒܶܝܬܠܚܶܡ܆ ܘܡ̣ܶܢ ܡܰܕܢܚܳܐ ܡܓܽܘ̈ܫܶܐ ܐܶܬܰܘ ܠܺܐܝܩܳܪܶܗ. ܡܫܰܐܠܺܝܢ ܗ̱ܘܰܘ ܘܳܐܡܪܺܝܢ. ܕܰܐܝܟܳܐ ܐܶܬܺܝܠܶܕ܆ ܡܰܠܟܳܐ ܕܠܰܫܠܳܡܶܗ ܐܶܬܰܝܢ܆ ܕܢܶܒܪܽܘܟ ܘܢܶܣܓܽܘܕ ܠܶܗ܀

ܠܘܛܢܝܐ ܒܩ̄: ܢܶܩܝܳܐ ܗܘܺܝܬ - H

ܗܳܐ ܒܪܺܝܬܳܐ ܬܶܗܪܳܐ ܡܰܠܝܳܐ: ܘܰܬܡܺܝܗ ܥܳܠܡܳܐ ܡܶܢ ܣܳܟܳܐ. ܕܰܐܝܟܰܢ ܗܰܘ ܡܳܪܳܐ ܡܥܰܠܝܳܐ: ܫܦܰܪ ܠܶܗ ܘܰܢܚܶܬ ܠܡܽܘܟܳܟܳܐ܀

ܗܰܘ ܕܰܗܘܰܝ̈ܳܐ ܒܪܶܡܙܶܗ ܬܠܶܝܢ: ܚܰܠܒܳܐ ܝܺܢܶܩ ܡܶܢ ܫܒܰܪܬܳܐ. ܕܪܰܘܡܳܐ ܘܥܽܘܡܩܳܐ ܫܽܘܒܚܶܗ ܡܠܶܝܢ: ܗܳܐ ܟܪܺܝܟ ܘܰܪܡܶܐ ܒܰܡܥܰܪܬܳܐ܀

ܡܰܠܰܐܟ̈ܶܐ ܒܙܰܘܚܳܐ ܡܝܰܒܒܺܝܢ: ܠܡܳܪܝܳܐ ܒܪܰܘܡܳܐ ܬܶܫܒܽܘܚܬܳܐ. ܘܰܡܓܽܘ̈ܫܶܐ ܒܚܰܕܘܳܐ ܡܩܰܪܒܺܝܢ: ܕܰܗܒܳܐ ܘܡܽܘܪܳܐ ܘܰܠܒܽܘܢܬܳܐ܀

ܫܽܘܒܚܳܐ ܠܚܰܝܠܳܐ ܡܬܽܘܡܳܝܳܐ: ܕܥܰܠ ܐܰܦܰܝ̈ܢ ܬܰܚܬܺܝ ܝܳܬܶܗ. ܘܰܠܒܶܫ ܦܰܓܪܳܐ ܐ̱ܢܳܫܳܝܳܐ: ܡܶܛܽܠ ܦܽܘܪܩܳܢ ܒܶܪ̈ܝܳܬܶܗ܀

ܚܘܬܡܐ ܒܩ̄: ܝܰܘܢܳܐ ܛܠܺܝ̣ܬܳܐ - H

ܝܰܘܢܳܐ ܛܠܺܝܬܳܐ ܛܥܺܝܢܳܐ ܠܶܗ ܠܢܶܫܪܳܐ ܥܰܬܺܝܩ ܝܰܘ̈ܡܳܬܳܐ: ܛܥܺܝܢܳܐ ܠܶܗ ܘܙܳܡܪܳܐ ܫܽܘܒܚܳܐ: ܒܢܽܘܨܪ̈ܳܬܳܐ ܚܰܒܺܝ̈ܒܳܬܳܐ: ܐܳܘ ܒܰܪ ܥܰܬܺܝܪܳܐ ܕܰܒܩܶܢܳܐ ܙܥܽܘܪܳܐ ܫܦܰܪ ܠܳܟ ܕܬܶܬܪܰܒܶܐ: ܐܳܘ ܩܺܝܬܳܪ ܩܳــ̈ــܠܶܐ ܕܫܰܬܺܝܩ ܐܰܝܟ ܫܰܒܪܳܐ ܦܩܽܘܕ ܠܺܝ ܕܶܐܙܡܰܪ ܠܳܟ: ܒܟܶܢܳܪܳܐ ܕܰܡܙܺܝܥ ܪܶܬܡܶܗ ܠܰܟܪ̈ܽܘܒܶܐ ܨܒܺܝ ܘܶܐܡܰܠܶܠ ܠܳܟ܀