ܕܝܳܠܕܰܬ ܐܰܠܳܗܳܐ:

ܡܰܪܝܰܡ ܐܶܡܳܐ ܗܘܳܬ ܠܳܟ ܡܳܪܝ̱. ܘܰܒܬܽܘܠܳܐܺܝܬ ܝܺܠܶܕܬܳܟ ܠܥܶܠ ܡܶܢ ܡܶܠܬܳܐ ܘܰܒܬܽܘܠܶܝ̈ܗ̇ ܠܳܐ ܫܪܰܝܬ. ܐܰܢ̱ܬ ܕܺܐܝܬܰܝܟ ܡܰܠܟܳܐ ܕܡܰܠ̈ܟܶܐ. ܒܟܰܪܣܳܐ ܕܒܶܣܪܳܐ ܕܰܒܬܽܘܠܬܳܐ ܫܪܳܬ ܪܰܒܽܘܬܳܟ. ܝܰܠܕܶܗ ܕܥܶܠܳܝܳܐ. ܡܶܠܬܳܐ ܠܳܐ ܗܽܘܠܳܢܳܝܳܐ. ܡܪܰܝܡܳܐ ܕܥܰܒܕܰܢ ܠܶܗ ܒܢܰܝ̈ܳܐ ܠܰܐܒܳܐ ܫܡܰܝܳܢܳܐ. ܕܠܳܐ ܢܶܬܬܚܶܕ ܓܶܢܣܰܢ. ܒܥܰܡܛܳܢܳܐ ܕܛܽܘܥܝܰܝ. ܐܰܠܳܗܳܐ ܒܰܨ̈ܠܰܘܳܬܶܗ ܐܶܬܪܰܚܰܡ ܥܠܰܝܢ܀

ܕܣܳܗ̈ܕܶܐ ܒܗ:

ܡܳܐ ܦܐܶܐ ܘܰܪܓܺܝܓ ܐܳܦ ܒܰܣܺܝܡ. ܘܕܳܡܶܐ ܠܘܰܪܕܳܐ ܡܳܐ ܕܦܳܐܰܚ ܒܝܰܘ̈ܡܰܝ ܢܺܝܣܳܢ. ܪܺܝܚܳܐ ܕܩܶܛܠܰܝ̈ܗܽܘܢ ܕܣܳܗ̈ܕܶܐ ܩܰܕܺܝ̈ܫܶܐ. ܢܚܶܬܘ ܘܩܳܡܘ ܒܶܗ ܒܰܐܓܽܘܢܳܐ. ܬܠܰܘ ܥܰܝ̈ܢܰܝܗܽܘܢ ܠܰܫܡܰܝܳܐ ܘܗܳܟܰܢ ܐܳܡܪܺܝܢ: ܒܰܪܘܳܙܳܐ ܪܰܒܳܐ. ܕܠܳܐ ܣܳܓܕܺܝܢܰܢ ܠܰܦܬܰܟܪ̈ܶܐ. ܥܰܠ ܕܺܐܝܬܰܝܗܽܘܢ ܨܰܠ̈ܡܶܐ ܚܰܪ̈ܫܶܐ ܘܕܰܓ̈ܳܠܶܐ ܥܒܺܝ̈ܕܰܝ ܒܺܐܝ̈ܕܰܝܳܐ. ܓܠܺܝ̈ܦܰܝ ܠܽܐܘ̈ܡܳܢܶܐ. ܚܢܰܢ ܠܰܡܫܺܝܚܳܐ ܣܳܓܕܺܝܢܰܢ. ܕܗܽܘܝܽܘ ܣܰܒܪܰܢ ܘܒܶܝܬ ܓܰܘܣܰܐ ܗ̱ܘ ܕܟܽܠ ܕܩܳܪܶܝܢ ܠܶܗ. ܘܗܽܘܝܽܘ ܡܰܘܪܶܬ ܠܰܢ. ܡܰܠܟܽܘܬܳܐ ܕܪܰܘܡܳܐ. ܐܰܠܳܗܳܐ ܒܰܨܠܽܘܬ ܣܳܗ̈ܕܰܝܟ ܚܰܣܳܐ ܠܰܢ ܚܰܘܒܰܝ̈ܢ܀

ܕܚܰܕ ܩܢܽܘܡܳܐ ܒܗ:

ܫܠܳܡ ܠܳܟ ܟܰܘܟܒܳܐ ܗܕܺܝܪ ܨܶܡ̈ܚܶܐ. ܫܠܳܡ ܠܳܟ ܦܺܝܪܡܳܐ ܕܰܡܠܶܐ ܪܺܝܚܳܐ ܒܰܣܺܝܡܳܐ. ܓܰܒܝܳܐ ܡܳܪܝ ܐܰܦܪܶܝܡ. ܕܗܳܐ ܥܰܡ̱̈ܡܶܐ ܡܶܢ ܟܽܠ ܦܶܢ̈ܝܳܢ. ܨܳܝܒܺܝܢ ܘܳܐܬܶܝܢ ܠܕܽܘܟܪܳܢܳܟ ܐܳܘ ܢܰܨܺܝܚܳܐ. ܘܰܡܠܶܐ ܟܽܠ ܫܽܘܦܪ̈ܺܝܢ. ܕܢܶܣܒܽܘܢ ܡܶܢܳܟ ܥܽܘܕܪ̈ܳܢܶܐ. ܘܟܽܠ ܐܳܣ̈ܘܳܬܳܐ ܡܶܢ ܚܰܝܠܳܐ ܕܰܫܪܶܐ ܒܓܰܪ̈ܡܰܝܟ. ܫܶܐܠ ܠܰܢ ܡܶܢ ܡܳܪܳܟ. ܪ̈ܰܚܡܶܐ ܘܰܚܢܳܢܳܐ. ܐܰܠܳܗܳܐ ܒܰܨ̈ܠܰܘܳܬܶܗ ܐܶܬܪܰܚܰܡ ܥܠܰܝܢ܀

ܕܰܬܝܳܒܽܘܬܳܐ ܒܗ:

ܠܒܰܝܬܳܟ ܐܶܬܰܝܢܰܢ ܡܳܪܝܳܐ. ܘܶܐܬܛܰܝܰܒܢܰܢ ܕܰܢܩܰܪܶܒ ܠܳܟ ܬܰܟܫܶܦܬܳܐ. ܒܡܰܥܪ̈ܳܒܰܝ ܫܶܡܫܳܐ. ܐܰܕܢܰܚ ܢܽܘܗܪܳܐ ܕܦܽܘܩܕܳܢܰܝ̈ܟ. ܒܠܶܒܰܘ̈ܳܬܰܢ ܕܢܶܬܢܰܗܪ̈ܳܢ ܒܳܟ ܢܰܦ̈ܫܳܬܰܢ. ܝܳܗܽܘܒܳܐ ܕܚܰܝ̈ܶܐ ܦܰܣܶܩ ܢܶܫܒܰܘ̈ܗܝ ܕܰܢܟܺܝܠܳܐ. ܒܥܶܠܕܒܳܒܳܐ ܕܰܠܗܺܝܩܽ ܗ̱ܘ ܠܡܰܘܒܳܕܽܘܬܰܢ. ܒܪܽܘܫܡܶܗ ܕܰܨܠܺܝܒܳܟ. ܡܰܟܶܟ ܫܽܘܥܠܳܝܶܗ. ܐܰܠܳܗܳܐ ܕܰܐܢ̱ܬܽ ܗ̱ܘ ܐܺܝܬܰܝܟ ܠܡܺܐܢܳܐ ܕܰܡܛܰܪ̈ܦܶܐ܀

ܐܚܪܢܐ ܕܥܰܢܺܝ̈ܕܶܐ:

ܢܶܬܕܟܰܪ ܟܽܠܰܢ ܠܡܰܘܬܳܐ. ܗܰܘ ܕܰܓܙܺܝܪ ܥܰܠ ܓܶܢܣܰܢ. ܘܰܠܣܳܣܳܐ ܕܰܡܚܰܒܶܠ ܘܰܠܬܰܘܠܥܳܐ ܕܠܳܐ ܡܳܝܬܳܐ. ܢܶܬܕܟܰܪ ܠܗܰܘ ܫܽܘܢܳܩܳܐ. ܡܰܪܺܝܪܳܐ ܘܰܕܠܳܐ ܪ̈ܰܚܡܶܐ. ܐܰܝܟܳܐ ܕܒܶܟܝܳܐ ܡܰܡܠܶܟ. ܪܰܒܳܐ ܘܚܽܘܪܳܩ ܫܶܢ̈ܶܐ. ܚܶܫܽܘܟܳܐ ܓܙܺܝܡ ܘܰܠܚܺܝܡ. ܘܚܰܪܒܳܐ ܕܢܽܘܪܳܐ ܠܛܺܝܫܳܐ. ܘܘܳܝܳܐ ܪܰܒܳܐ ܬܰܡܳܢ. ܠܚܰܛܳܝ̈ܶܐ ܕܕܳܡܶܝܢ ܠܺܝ. ܠܳܐ ܡܳܪܝ. ܬܶܫܕܶܝܢܝ̱ ܡܶܢ ܒܶܝܬ ܓܢܽܘܢܳܟ ܡܶܛܽܠ ܥܒܳܕܰܝ̈ ܒܺܝ̈ܫܶܐ ܕܣܶܥܪܶܬ. ܐܶܠܳܐ ܒܝܰܕ ܦܰܓܪܳܟ ܘܰܕܡܳܟ. ܬܶܟܪܶܐ ܠܳܟ ܥܰܠ ܫܰܦܠܽܘܬܝ. ܘܠܰܓܢܽܘܢܳܟ ܗܰܘ ܕܰܠܥܳܠܰܡ. ܐܰܫܘܳܢܝ̱ ܐܳܘ ܛܳܒܳܐ ܐܳܦ ܪܳܚܶܡ ܐ̱ܢܳܫܳܐ܀