ܕܝܳܠܕܰܬ ܐܰܠܳܗܳܐ:

ܫܠܳܡܠܶܟܝ̱ ܡܶܢ ܟܽܠ ܩܰܕܺܝܫܬܳܐ ܝܳܠܕܰܬ ܐܰܠܳܗܳܐ ܡܰܪܝܰܡ. ܓܰܙܳܐ ܫܒܺܝܚܳܐ ܘܝܰܩܺܝܪܳܐ ܕܟܽܠܳܗ̇ ܡܶܬܥܰܡܪܳܢܺܝܬܳܐ. ܠܰܡܦܺܐܕܳܐ ܢܰܨܺܝܚ ܕܶܠܩܳܐ ܘܰܐܘܳܢܳܐ ܕܗܰܘ ܠܳܐ ܡܶܬܥܰܪܝܳܢܳܐ. ܢܰܘܣܳܐ ܕܰܟܝܳܐ ܕܒܳܪܽܘܝܳܐ ܕܟܽܠܳܗ̇ ܒܪܺܝܬܳܐ. ܫܠܳܡܠܶܟܝ̱ ܕܒܺܐܕܰܝ̈ܟܝ̱ ܐܶܡܪܳܐ ܐܶܫܬܰܡܰܗ. ܗܰܘ ܕܫܳܩܶܠ ܠܰܚܛܺܝܬܶܗ ܕܥܳܠܡܳܐ ܕܦܳܪܶܩ ܠܶܗ܀

ܕܣܳܗ̈ܕܶܐ:

ܣܓܽܘ̈ܠܶܐ ܡ̈ܰܠܳܠܶܐ ܣܳܗ̈ܕܶܐ ܒܪ̈ܺܝܟܶܐ ܐܶܬܚܙܺܝܬܽܘܢ. ܕܡܶܢ ܚܰܡܪܳܐ ܕܺܝܠܟܽܘܢ ܥܺܕܬܳܐ ܗܳܐ ܡܶܬܒܰܣܡܳܐ. ܐܳܘ ܢܰܗܺܝܪ̈ܶܐ ܫܒܺܝ̈ܚܶܐ ܘܰܐܠܳܗܳܝ̈ܶܐ. ܥܰܠ ܚܰܫ̈ܶܐ ܘܫܶܢ̈ܕܶܐ ܘܟܽܠ ܐܽܘܠ̈ܨܳܢܺܝܢ ܚܘܺܝܚܳܐܺܝܬ ܩܪ̈ܳܒܶܐ ܚܰܘܺܝܬܽܘܢ. ܘܠܰܛܪ̈ܽܘܢܶܐ ܚܰܪ̈ܡܶܐ ܒܝܰܕ ܐܰܬܠܺܝܛܽܘܬܟܽܘܢ ܐܰܒܗܶܬܬܽܘܢ. ܫܽܘܒܚܳܐ ܠܚܰܝܠܳܐ ܕܚܰܝܶܠܟܽܘܢ ܒܰܐܓܽܘܢܰܝ̈ܟܽܘܢ ܐܰܠܳܗܳܐ ܕܶܐܬܳܐ ܘܟܰܠܶܠ ܠܪ̈ܳܚܡܰܘܗܝ ܪܰܚܶܡܥܠܰܝܢ܀

ܕܰܬܝܳܒܽܘܬܳܐ:

ܡܰܢ ܠܳܐ ܢܶܒܟܶܐ ܥܰܠ ܚܰܘ̈ܒܰܘܗܝ. ܘܢܰܒܟܶܐ ܥܰܡܶܗ ܪ̈ܳܡܳܬܳܐ. ܘܡܰܢ ܠܳܐ ܢܰܝܠܶܠ ܥܰܠ ܕܰܚܛܳܐ. ܘܰܢܙܽܘܥܽܘܢ ܛܽܘܪ̈ܶܐ ܒܩܳܠܶܗ. ܥܰܠ ܕܺܝܢܳܐ ܕܗܳܘܶܐ ܠܚܰܪܬܳܐ. ܕܡܶܬܬܕܺܝ̈ܢܳܢ ܒܶܗ ܒܶܪ̈ܝܳܬܳܐ. ܘܳܝ ܡܳܐ ܕܬܳܩܢܳܐ ܗܳܝ ܒܺܐܡܰܐ. ܘܒܽܘܚܪܳܢܳܐ ܩܕܳܡܰܘܗܝ ܗܳܘܶܐ. ܘܳܝ ܡܳܐ ܕܚܺܝܠ ܗܰܘ ܕܰܝܳܢܳܐ. ܕܰܚܕܺܝܪ̈ܺܝܢ ܠܶܗ ܢܽܘܪ̈ܳܢܶܐ. ܘܳܝܠܺܝ ܐܶܢܳܐ ܐܳܘ ܐܰܚܰܝ̈. ܕܰܥܒܳܕܰܝ̈ ܣܰܓܺܝ ܒܺܝܫܺܝ̈ܢ. ܡܳܪܰܢ ܒܚܽܘܒܶܗ ܕܝܳܠܽܘܕܳܟ. ܘܰܒܗܳܝ ܟܰܪܣܳܐ ܕܰܛܥܶܢܬܳܟ. ܘܰܒܗܳܠܶܝܢ ܬܕܰܝ̈ܳܐ ܕܰܐܝܢܩܽܘܟ. ܚܰܠܒܳܐ ܕܰܟܝܳܐ ܕܰܫܦܰܪ ܠܳܟ. ܠܳܐ ܬܶܬܕܟܰܪ ܠܺܝ ܟܽܠ ܕܰܚܛܺܝܬ. ܡܶܛܽܠ ܩܰܝܣܳܐ ܕܰܨܠܺܝܒܳܟ. ܐܶܠܳܐ ܡܳܪܝ ܐܶܬܪܰܚܰܡܥܠܰܝ. ܒܗܳܢ ܥܳܠܡܳܐ ܘܰܒܗܰܘ ܕܰܥܬܺܝܕ. ܚܰܣܳܐ ܠܺܝ ܚܰܘ̈ܒܰܝ܀

ܡܥܒܪܢܐ ܕܥܰܢܺܝ̈ܕܶܐ:

ܡܰܢ ܠܳܐ ܢܰܝܬܶܐ ܥܰܠ ܒܳܠܶܗ. ܚܰܪܬܶܗ ܕܥܳܠܡܳܐ ܥܳܒܽܘܪܳܐ. ܘܡܰܢ ܠܳܐ ܢܶܥܗܰܕ ܝܽܘܡ ܕܺܝܢܳܐ. ܕܰܥܬܺܝܕ ܕܢܶܗܘܶܐ ܠܫܰܪ̈ܒܳܬܳܐ. ܘܡܰܢ ܠܳܐ ܢܶܕܚܰܠ ܡܳܐ ܕܢܳܗܶܡ ܩܳܠܳܐ ܕܰܡܩܺܝܡ ܠܰܩܒܺܝܪ̈ܶܐ. ܩܳܪܝܳܐ ܩܰܪܢܳܐ ܕܡܺܝܟܳܐܶܝܠ ܘܙܳܥܩܳܐ ܠܶܓܝܽܘܢܳܐ ܕܢܽܘܪܳܐ. ܘܡܳܪܝܳܐ ܒܪܽܘܚ ܦܽܘܡܶܗ ܡܰܘܩܶܕ. ܠܪ̈ܰܫܺܝܥܶܐ ܕܠܳܐ ܗܰܝܡܶܢܘ ܒܶܗ. ܛܳܒ̈ܶܐ ܡܰܥܶܠ ܠܰܓܢܽܘܢܳܐ. ܘܒܺܝ̈ܫܶܐ ܣܳܚܶܦ ܠܚܶܫܽܘܟܳܐ. ܡܳܪܰܢ ܝܶܫܽܘܥ ܚܽܘܣ ܥܠܰܝܢ. ܒܗܳܝ ܫܳܥܬܳܐ ܕܦܳܣܺܝ̈ܩܳܬܳܐ ܘܰܐܫܘܳܢ ܕܢܶܥܽܘܠ ܠܰܓܢܽܘܢܳܟ. ܥܰܡ ܙܰܕܺܝ̈ܩܶܐ ܘܶܐܬܪܰܚܰܡܥܠܰܝܢ܀