ܐ H

ܠܗܰܘ ܝܰܠܕܳܐ ܓܢܺܝܙܳܐ ܕܶܐܬܒܰܕܰܩ ܗ̱ܘܳܐ ܥܰܠ ܛܽܘܪ̈ܰܝ ܚܽܘܪܺܝܒ. ܒܓܰܘ ܤܰܢܝܳܐ ܒܢܽܘܪܳܐ ܕܡܶܬܓܰܘܙܠܳܐ. ܨܳܪ ܛܽܘܦܤܶܟܝ ܡܰܠܝܰܬ ܬܶܗܪܳܐ. ܠܦܽܘܪܩܳܢܳܐ ܘܫܽܘܘܙܳܒܳܐ ܕܺܝܠܰܢ ܡܗܰܝ̈ܡܢܶܐ. ܒܝܰܕ ܗܳܕܶܐ ܕܠܳܐ ܫܶܠܝܳܐ ܟܽܠܰܢ ܡܰܘܪܒܺܝܢܰܢ܀

ܤܰܢܝܳܐ ܗܰܘ ܕܰܚܙܳܐ ܗ̱ܘܳܐ ܡܽܘܫܶܐ. ܕܡܶܬܓܰܘܙܰܠ ܗ̱ܘܳܐ ܘܠܳܐ ܝܳܩܶܕ. ܒܬܽܘܠܬܳܐ ܕܟܺܝܬܳܐ ܠܶܟܝ ܗ̱ܽܘ ܨܳܐܰܪ ܗ̱ܘܳܐ. ܕܰܕܠܳܐ ܙܰܪܥܳܐ ܝܺܠܶܕܬܺܝܘܗܝ. ܠܰܐܠܳܗܳܐ ܒܳܪܽܘܝܳܐ ܕܟܽܠܳܗ̇ ܒܪܺܝܬܳܐ. ܒܝܰܕ ܗܳܕܶܐ ܕܠܳܐ ܫܶܠܝܳܐ ܟܽܠܰܢ ܡܰܘܪܒܺܝܢܰܢ܀

ܫܠܺܝ̈ܚܶܐ ܓܒܰܝ̈ܳܐ ܕܫܰܠܚܽܘܗܝ ܠܥܳܠܡܳܐ. ܘܫܳܛܘ ܠܰܐܝܠܶܝܢ ܕܰܒܥܳܠܡܳܐ ܐܶܢܶܝܢ. ܘܠܰܒܫܽܘܗܝ ܠܰܡܫܺܝܚܳܐ ܐܰܠܳܗܳܐ ܙܰܝܢܳܐ ܠܳܐ ܡܶܙܕܰܟܝܳܢܳܐ. ܠܦܽܘܪܩܳܢܳܐ ܘܫܽܘܘܙܳܒܳܐ ܕܺܝܠܰܢ ܡܗܰܝ̈ܡܢܶܐ. ܒܝܰܕ ܗܳܕܶܐ ܕܠܳܐ ܫܶܠܝܳܐ ܟܽܠܰܢ ܡܩܰܠܤܺܝܢܰܢ܀

ܒܒܶܝܬ ܡܰܥܡܪܳܐ ܕܩܰܕܺܝ̈ܫܶܐ ܗܳܢܽܘܢ. ܕܚܳܕܶܝܢ ܐܳܦ ܪܳܘܙܺܝܢ ܕܠܳܐ ܫܶܠܝܳܐ. ܘܒܰܡ̈ܛܰܠ̱ܠܶܐ ܕܢܽܘܗܪܳܐ ܡܳܪܰܢ. ܘܒܰܐܬܪ̈ܰܘܳܬܳܐ ܕܩܰܕܺܝܫܰܝ̈ܟ. ܬܰܡܳܢ ܐܰܢ̱ܬ ܐܰܠܳܗܳܐ ܡܪܰܚܡܳܢܳܐ. ܐܰܢܺܝܚ ܐܶܢܶܝܢ ܠܢܰܦ̈ܫܳܬܳܐ ܕܥܰܒܕܰܝ̈ܟ ܕܰܫܟܶܒܘ ܥܰܠ ܤܰܒܪܳܟ܀

ܫܽܘܒܚܳܐ: ܫܽܘܒܚܳܐ ܠܶܗ ܠܰܐܒܳܐ ܩܰܕܺܝܫܳܐ. ܕܫܰܕܰܪ ܠܰܒܪܶܗ ܩܰܕܺܝܫܳܐ. ܘܰܒܥܽܘܒܳܐ ܕܰܟܝܳܐ ܘܩܰܕܺܝܫܳܐ. ܢܚܶܬ ܘܰܫܪܳܐ ܩܰܕܺܝܫܳܐܺܝܬ. ܠܦܽܘܪܩܳܢܳܐ ܘܫܽܘܘܙܳܒܳܐ ܕܺܝܠܰܢ ܡܗܰܝܡ̈ܢܶܐ. ܒܝܰܕ ܗܳܕܶܐ ܕܠܳܐ ܫܶܠܝܳܐ ܟܽܠܰܢ ܡܫܰܒܚܺܝܢܰܢ܀

ܒ H

ܐܶܡܳܐ ܕܟܺܝܬܳܐ ܘܠܳܐ ܡܙܰܘܰܓܬܳܐ ܒܶܝܬ ܡܰܥܡܪܳܐ ܗܘܰܝܬܝ ܠܶܗ ܠܡܰܠܟܳܐ ܡܫܺܝܚܳܐ. ܓܰܘܤܳܐ ܒܶܟܝ ܐܳܚܕܺܝܢܰܢ. ܕܡܶܢ ܢܶܟ̈ܝܳܢܶܐ ܢܶܫܬܰܘܙܰܒ. ܘܠܶܟܝ ܟܽܠܰܢ ܡܰܘܪܒܺܝܢܰܢ܀

ܛܽܘܒܬܳܢܽܘܬܶܟܝ ܚܙܳܐ ܚܰܙܩܺܝܐܝܶܠ ܝܳܠܕܰܬ ܐܰܠܳܗܳܐ. ܘܬܰܪܥܳܐ ܫܰܡܗܶܟܝ ܒܬܽܘܠܬܳܐ ܕܶܐܬܡܰܬܠܰܬ ܒܤܰܢܝܳܐ. ܐܰܢ̱ܬܝ ܗ̱ܺܝ ܝܳܠܕܰܬ ܐܰܠܳܗܳܐ ܘܠܶܟܝ ܟܽܠܰܢ ܡܰܘܪܒܺܝܢܰܢ܀

ܓܰܪ̈ܡܰܘܗ̱ܝ ܕܝܰܘܤܶܦ ܗܰܘ ܢܰܨܺܝܚܳܐ ܤܳܓܘ ܬܽܘܪ̈ܥܳܬܳܐ ܕܺܝܤܰܪ̈ܠܳܝܶܐ. ܘܓܰܪ̈ܡܰܝܟܽܘܢ ܕܺܝܠܟܽܘܢ ܤܳܗ̈ܕܶܐ. ܥܒܺܝܕܺܝܢ ܫܽܘܪ̈ܶܐ ܠܢܰܦ̈ܫܳܬܰܢ ܬܚܶܝܬ ܟܶܢܦܰܝ̈ܟܽܘܢ ܢܶܤܬܰܬܰܪ܀

ܠܳܐ ܡܳܝܽܘܬܳܐ ܕܰܢܚܶܬ ܠܰܫܝܽܘܠ ܘܰܗܘܳܐ ܒܩܰܒܪܳܐ ܝܰܘ̈ܡܶܐ ܬܠܳܬܳܐ. ܢܰܚܶܡ ܘܰܐܚܳܐ ܠܥܰܢܺܝ̈ܕܶܐ. ܙܒܺܝ̈ܢܰܝ ܒܰܕܡܳܟ ܝܰܩܺܝܪܳܐ. ܦܪ̈ܺܝܩܰܝ ܒܰܨܠܺܝܒܳܟ ܚܰܝܳܐ܀

ܫܽܘܒܚܳܐ: ܐܳܠܶܦ ܐܰܠ̈ܦܺܝܢ ܘܪܶܒܽܘ ܪ̈ܶܒܘܳܢ ܫܽܘ̈ܒܚܶܐ ܫܦܰܝ̈ܳܐ ܒ̈ܩܳܠܶܐ ܚܠܰܝ̈ܳܐ. ܡܩܰܪܒܳܐ ܥܺܕܬܳܐ ܥܰܡ ܝܰܠ̈ܕܶܝܗ̇. ܠܰܐܒܳܐ ܘܠܰܒܪܳܐ ܘܪܽܘܚ ܩܽܘܕܫܳܐ ܚܰܕ ܐܰܠܳܗܳܐ ܫܰܪܺܝܪܳܐ܀

ܓ H

ܡܰܘܪܒܺܝܢܰܢ ܟܽܠܰܢ. ܠܶܐܡܳܐ ܡܒܰܪܰܟܬܳܐ. ܗܳܝ ܕܡܶܢ ܥܽܘܒܳܗ̇ ܕܢܰܚ ܠܰܢ ܢܽܘܗܪܳܐ ܠܳܐ ܡܶܬܕܰܪܟܳܢܳܐ. ܘܰܐܢܗܰܪ ܠܢܰܦ̈ܫܳܬܳܐ ܕܟܽܠܰܢ܀

ܡܫܰܒܚܺܝܢܰܢ ܟܽܠܰܢ. ܠܰܐܒܳܐ ܡܬܽܘܡܳܝܳܐ. ܗܰܘ ܕܫܰܕܰܪ ܠܰܒܪܶܗ ܕܰܢܚܶܬ ܦܰܪܩܰܢ ܘܶܐܬܥܰܠܺܝ. ܘܰܐܢܗܰܪ ܠܢܰܦ̈ܫܳܬܳܐ ܕܟܽܠܰܢ܀

ܡܩܰܠܤܺܝܢܰܢ ܟܽܠܰܢ. ܠܰܢܒܺܝ̈ܶܐ ܘܠܰܫܠܺܝ̈ܚܶܐ. ܘܤܳܗ̈ܕܶܐ ܕܰܢܨܰܚܘ ܘܶܐܬܟܰܠܰܠܘ. ܒܰܕܡܳܐ ܕܰܐܪܕܺܝܘ ܨܰܘܪ̈ܰܝܗܽܘܢ. ܨܠܽܘܬܗܽܘܢ ܫܽܘܪܳܐ ܬܶܗܘܶܐ ܠܰܢ܀

ܡܶܬܥܰܗܕܺܝܢܰܢ ܟܽܠܰܢ. ܠܥܰܢܺܝ̈ܕܶܐ ܡܗܰܝ̈ܡܢܶܐ. ܕܶܐܟܰܠܘ ܦܰܓܪܳܟ ܩܰܕܺܝܫܳܐ. ܘܶܐܫܬܺܝܘ ܠܰܕܡܳܟ ܡܚܰܤܝܳܢܳܐ. ܘܰܢܩܽܘܡܽܘܢ ܡܶܢ ܝܰܡܺܝܢܳܟ܀

ܫܽܘܒܚܳܐ: ܡܫܰܒܚܺܝܢܰܢ ܟܽܠܰܢ ܠܰܬܠܺܝܬܳܝܽܘܬܳܐ. ܐܺܝܬܝܳܝܬܳܐ ܘܰܡܬܽܘܡܳܝܬܳܐ. ܤܓܺܝܕܰܬ ܒܰܩܢܽܘ̈ܡܶܐ ܬܠܳܬܳܐ. ܚܰܕ ܐܰܠܳܗܳܐ ܫܰܪܺܝܪܳܐ܀