ܐ H

ܠܗܰܘ ܕܶܐܬܺܝܠܶܕ ܓܰܠܝܳܐܺܝܬ ܡܶܢ ܒܬܽܘܠܬܳܐ ܕܠܳܐ ܙܽܘܘܳܓܳܐ ܬܰܘ ܢܫܰܒܰܚ. ܠܗܰܘ ܫܶܡܫܳܐ ܕܙܰܕܺܝܩܽܘܬܳܐ ܕܰܨܡܰܚ ܡܶܢ ܥܽܘܒܳܗ̇ ܒܬܽܘܠܳܐ ܟܽܠܰܢ ܢܶܤܓܽܘܕ. ܘܰܕܠܳܐ ܫܶܠܝܳܐ ܢܫܰܒܚܺܝܘܗܝ ܠܥܳܠܰܡ ܥܳܠܡܺܝܢ܀

ܠܗܰܘ ܕܡܶܢ ܡܰܪܝܰܡ ܐܶܬܺܝܠܶܕ ܒܰܡܥܰܪܬܳܐ ܒܓܰܘ ܒܶܝܬܠܚܶܡ ܬܰܘ ܢܫܰܒܰܚ. ܘܺܝܢܶܩ ܚܰܠܒܳܐ ܐܰܝܟ ܫܰܒܪܳܐ ܗܰܘ ܕܤܰܒܰܥ ܐܰܠ̈ܦܶܐ ܒܕܰܒܪܳܐ ܟܽܠܰܢ ܢܶܤܓܽܘܕ. ܘܰܕܠܳܐ ܫܶܠܝܳܐ ܢܫܰܒܚܺܝܘܗܝ ܠܥܳܠܰܡ ܥܳܠܡܺܝܢ܀

ܠܗܰܘ ܕܚܰܝܶܠ ܗ̱ܘܳܐ ܠܰܐܬܠܺܝ̈ܛܰܘܗܝ ܒܰܐܓܽܘܢܳܐ ܕܠܽܘܩܒܰܠ ܒܺܝܫܳܐ ܬܰܘ ܢܫܰܒܰܚ. ܘܰܐܩܪܶܒܘ ܘܰܙܟܰܘ ܘܶܐܬܢܰܨܰܚܘ ܘܰܐܥܕܺܝܘ ܟܠܺܝ̈ܠܶܐ ܕܙܳܟܽܘܬܳܐ ܟܽܠܰܢ ܢܶܤܓܽܘܕ. ܘܰܕܠܳܐ ܫܶܠܝܳܐ ܢܫܰܒܚܺܝܘܗܝ ܠܥܳܠܰܡ ܥܳܠܡܺܝܢ܀

ܠܗܰܘ ܕܰܠܪܳܚܡܶܗ ܠܳܥܳܙܳܪ ܡܶܢ ܩܰܒܪܳܐ ܩܪܳܝܗܝ ܘܰܐܩܺܝܡܶܗ ܬܰܘ ܢܫܰܒܰܚ. ܘܠܰܥܠܰܝܡܳܐ ܒܪܳܗ̇ ܕܰܐܪܡܰܠܬܳܐ ܡܶܢ ܦܟܳܪܶܗ ܕܡܰܘܬܳܐ ܐܰܥܕܺܝ ܟܽܠܰܢ ܢܶܤܓܽܘܕ. ܘܰܕܠܳܐ ܫܶܠܝܳܐ ܢܫܰܒܚܺܝܘܗܝ ܠܥܳܠܰܡ ܥܳܠܡܺܝܢ܀

ܫܽܘܒܚܳܐ: ܫܽܘܒܚܳܐ ܢܰܤܶܩ ܠܶܗ ܠܰܐܒܳܐ ܘܬܰܘܕܺܝܬܳܐ ܠܰܒܪܳܐ ܕܡܶܢܶܗ ܬܰܘ ܢܫܰܒܰܚ. ܘܰܠܪܽܘܚܩܽܘܕܫܳܐ ܗܽܘܠܳܠܳܐ ܐ̱ܪܳܙܳܐ ܕܰܬܠܺܝܬܳܝܽܘܬܳܐ ܟܽܠܰܢ ܢܶܤܓܽܘܕ. ܘܰܕܠܳܐ ܫܶܠܝܳܐ ܢܫܰܒܚܺܝܘܗܝ ܠܥܳܠܰܡ ܥܳܠܡܺܝܢ܀

ܒ H

ܕܶܐܬܦܢܺܝ ܒܪ̈ܰܚܡܰܘܗ̱ܝ ܥܰܠ ܡܽܘܟܳܟܳܐ ܕܰܐܡܬܶܗ. ܗܽܘ ܡܰܘܪܶܒ ܠܝܳܠܶܕܬܶܗ ܩܰܕܺܝܫܳܐ ܐܰܠܳܗܳܐ܀

ܕܰܗܘܳܐ ܒܚܽܘܒܶܗ ܒܰܪܢܳܫܳܐ ܡܶܛܽܠܳܬܰܢ. ܗܰܘ ܕܰܦܪܰܩ ܘܫܰܘܙܶܒ ܠܰܢ ܩܰܕܺܝܫܳܐ ܐܰܠܳܗܳܐ܀

ܕܰܨܒܳܐ ܒܪ̈ܰܚܡܰܘܗ̱ܝ ܘܰܠܩܰܕܺܝ̈ܫܰܘܗ̱ܝ ܢܰܨܰܚ. ܒܰܐܓܽܘܢܳܐ ܕܠܽܘܩܒܰܠ ܒܺܝܫܳܐ. ܩܰܕܺܝܫܳܐ ܐܰܠܳܗܳܐ܀

ܐܰܢܺܝܚ ܒܪ̈ܰܚܡܰܝܟ ܠܢܰܦ̈ܫܳܬܳܐ ܕܤܳܓܽܘܕܰܝ̈ܟ. ܕܰܐܘܕܺܝܘ ܒܳܟ ܘܗܰܝܡܶܢܘ ܒܳܟ ܘܰܫܟܶܒܘ ܘܶܐܬܬܢܺܝܚܘ ܥܰܠ ܤܰܒܪܳܟ܀

ܫܽܘܒܚܳܐ: ܩܰܒܶܠ ܒܪ̈ܰܚܡܰܝܟ ܠܬܶܫܡܶܫܬܳܐ ܕܤܳܓܽܘܕܰܝ̈ܟ. ܕܰܡܫܰܡܫܺܝܢ ܠܰܐܠܳܗܽܘܬܳܟ ܩܰܕܺܝܫܳܐ ܐܰܠܳܗܳܐ܀

ܓ H

ܝܳܠܕܰܬ ܐܰܠܳܗܳܐ ܫܽܘܒܗܳܪܶܗ ܕܥܳܠܡܳܐ ܠܰܐܝܠܶܝܢ ܕܡܰܘܪܒܺܝܢ ܠܶܟܝ. ܥܠܰܝܟܝ ܗ̱ܽܘ ܬܟܺܝܠܺܝܢܰܢ. ܘܒܶܟܝ ܡܶܬܓܰܘܤܺܝܢܰܢ. ܐܶܬܟܰܫܰܦܝ ܘܰܒܥܳܝ ܠܗܰܘ ܕܡܶܢܶܟܝ ܐܶܬܺܝܠܶܕ ܕܢܶܥܒܶܕ ܥܠܰܝܢ ܪ̈ܰܚܡܶܐ܀

ܒܬܽܘܠܬܳܐ ܕܒܰܒܬܽܘܠܶܝ̈ܗ̇ ܠܰܐܠܳܗܳܐ ܝܶܠܕܰܬ. ܦܳܪܽܘܩܶܗ ܕܥܳܠܡܳܐ. ܒܝܰܘܡܳܐ ܕܕܽܘܟܪܳܢܶܟܝ. ܐܰܦܺܝܤܝ ܠܺܝܚܺܝܕܶܟܝ. ܕܰܒܝܰܕ ܨܠܰܘ̈ܳܬܶܟܝ ܪ̈ܰܚܡܶܐ ܢܶܗܘܽܘܢ ܥܠܰܝܢ ܒܰܬܪ̈ܰܝܗܽܘܢ ܥܳܠ̈ܡܶܐ܀

ܤܳܗ̈ܕܶܐ ܒܒܶܝܬ ܩܽܘܕܫܳܐ ܤܺܝ̈ܡܺܝܢ ܓܰܪ̈ܡܰܝܟܽܘܢ ܠܺܐܝܩܳܪܶܗ ܕܡܳܪܟܽܘܢ. ܐܰܦܺܝܤܘ ܠܰܡܫܺܝܚܳܐ. ܕܢܰܫܦܰܥ ܒܽܘܪ̈ܟܳܬܶܗ. ܥܰܠ ܥܺܕܬܳܐ ܘܝܰܠ̈ܕܶܝܗ̇ ܕܓܰܪ̈ܡܰܝܟܽܘܢ ܝܰܩܪܰܬ ܕܫܰܝܢܳܐ ܢܰܡܠܶܟ ܒܳܗ̇܀

ܦܰܘܠܳܘܣ ܐܰܟܬܶܒ ܠܰܢ ܕܡܺܝ̈ܬܶܐ ܕܒܰܡܫܺܝܚܳܐ ܡܰܘܬܳܐ ܠܳܐ ܛܳܥܡܺܝܢ. ܫܰܦܺܝܪ ܐܶܬܟܰܪܙܰܬ. ܡܶܢ ܤܳܦܪܳܐ ܡܗܺܝܪܳܐ. ܕܫܳܟ̈ܒܰܝ ܒܰܡܫܺܝܚܳܐ. ܡܰܘܬܳܐ ܬܶܢܝܳܢܳܐ ܠܥܳܠܰܡ ܠܳܐ ܛܳܥܡܺܝܢ܀

ܫܽܘܒܚܳܐ: ܫܽܘܒܚܳܐ ܠܺܐܝܬܽܘܬܳܟ ܘܤܶܓܕܬܳܐ ܠܡܳܪܽܘܬܳܟ. ܦܳܪܽܘܩܶܗ ܕܥܳܠܡܳܐ. ܠܰܐܒܽܘܟ ܐܺܝܩܳܪܳܐ ܠܪܽܘܚܳܟ ܪܽܘܡܪܳܡܳܐ. ܘܰܥܠܰܝܢ ܚܰܛܳܝ̈ܶܐ ܪ̈ܰܚܡܶܐ ܘܰܚܢܳܢܳܐ ܒܰܬܪ̈ܰܝܗܽܘܢ ܥܳܠ̈ܡܶܐ܀