ܛܟܣܐ ܕܫܘܒܩܢܐ
ܩܰܕܡܳܝܰܬ݂
ܟܳܗܢܳܐ: ܫܽܘܒܚܳܐ ܠܰܐܒܳܐ ܘܠܰܒܪܳܐ ܘܰܠܪܽܘܚܳܐ ܩܰܕܺܝܫܳܐ܀
ܡܫܰܡ̈ܫܳܢܶܐ: ܘܰܥܠܰܝܢ ܡܚܺܝ̈ܠܶܐ ܘܚܰܛܳܝ̈ܶܐ ܪ̈ܰܚܡܶܐ ܘܰܚܢܳܢܳܐ ܢܶܫܬܰܦܥܽܘܢ ܒܰܬܪ̈ܰܝܗܽܘ̇ܢ ܥܳܠ̈ܡܶܐ ܠܥܳܠܰܡ ܥܳܠܡܺܝܢ ܐܰܡܺܝܢ܀
ܨܠܽܘܬܳܐ ܕܫܽܘܪܳܝܳܐ
ܟܳܗܢܳܐ: ܐܰܫܘܳܐ ܠܰܢ ܡܳܪܝܳܐ ܐܰܠܳܗܳܐ ܒܛܰܝܒܽܘ̣ܬܳܟ ܠܚܽܘ̣ܣܳܝܳܐ ܕܚܰܘ̈ܒܶܐ ܘܫܽܘܒܩܳܢܳܐ ܕܰܚ̈ܛܳܗܶܐ ܒܝܰܘܡܳܐ ܗܳܢܳܐ ܕܫܽܘܠܳܡ ܨܰܘܡܳܟ ܩܰܕܺܝܫܳܐ ܘܡܳܪܳܢܳܝܳܐ ܘܚܰܫܝ̈ܰܝܟ ܦܳܪܽܘܩܳܝ̈ܶܐ. ܘܗܰܒ ܠܰܢ ܕܰܒܕܰܟܝܳܘܬܳܐ ܕܠܶܒܳܐ ܢܶܫܰܐܠ ܚܽܘܣܳܝܳܐ ܘܫܽܘܒܩܳܢܳܐ ܡ̣ܶܢ ܚܕ̈ܳܕܶܐ ܐܰܝܟ ܝܽܘ̣ܠܦܳܢܳܐ ܕܺܝܠܳܟ ܐܶܘܰܢܓܶܠܳܝܳܐ. ܐܰܝܟܰܢܳܐ ܕܕܰܟܝܳܐܺܝܬ ܢܶܫܬܰܘܬܰܦ ܒܐ̱ܪ̈ܳܙܰܝܟ ܩܰܕܺܝ̣̈ܫܶܐ. ܘܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܰܐܒܽܘܟ ܘܰܠܪܽܘܚܳܟ ܩܰܕܺܝܫܳܐ܆ ܗܳܫܳܐ܀
ܥܶܢܝܳܢܳܐ ܕܪܰܚܶܡܥܠܰܝ
ܩܠܐ: ܒܩ̄ ܚܛܺܝܬ ܠܳܟ
ܚ̈ܛܳܗܶܐ ܕܰܩܢܽܘܡܝ̱ ܡܣܰܪܕܺܝܢ ܠܺܝ܆ ܘܪܶܢܝܳܐ ܕܕܺܝܢܳܐ܆ ܒܙܰܘܥܳܐ ܡܒܰܠܗܶܐ ܠܺܝ܆ ܡܳܪܝܳܐ ܡܳܪܶܐ ܟܽܠ ܪܰܚܶܡܥܠܰܝ܀
ܐܰܝܟ ܚܰܛܳܝܬܳܐ ܓܳܥܶܐ ܐ̱ܢܳܐ܆ ܘܰܐܝܟ ܗܰܘ ܡܳܟܣܳܐ ܡܶܬܟܰܫܰܦ ܐ̱ܢܳܐ܆ ܡܳܪܝܳܐ ܡܳܪܶܐ ܟܽܠ ܪܰܚܶܡܥܠܰܝ܀
ܕܚܽܘܩ ܡܳܪܝܳܐ ܡܶܢ ܒܰܝܢܳܬܰܢ܆ ܚܣܳܡܳܐ ܘܢܶܟܠܳܐ ܐܳܦ ܡܶܐܟܰܠܩܰܪܨܳܐ܆ ܡܳܪܝܳܐ ܡܳܪܶܐ ܟܽܠ ܪܰܚܶܡܥܠܰܝ܀
ܫܽܘܒܚܳܐ
ܠܰܟܠܺܝܠ ܫܰܢ̱ܬܳܐ ܦܳܪܽܘܩܰܢ܆ ܒܰܪܶܟ ܘܰܐܣܓܳܐ ܥܽܘܬܪܳܐ ܕܒܶܪ̈ܝܳܬܳܐ܆ ܡܳܪܝܳܐ ܡܳܪܶܐ ܟܽܠ ܪܰܚܶܡܥܠܰܝ܀
ܡܫܰܡܫܳܢܳܐ: ܣܛܳܘܡܶܢ ܩܰܐܠܳܘ̣ܣ ܩܽܘܪܝܶܐܠܰܝܣܳܘܢ܀
ܦܪܽܘ̣ܡܝܽܘܢ
ܬܶܫܒܽܘܚܬܳܐ ܠܗܰܘ ܬܳܪܥܳܐ ܕܪ̈ܰܚܡܶܐ ܕܰܦܬܺܝܚ ܠܚܰܛܳܝ̈ܶܐ ܕܢܳܩܫܺܝܢ ܒܶܗ. ܠܗܰܘ ܣܰܒܪܳܐ ܓܡܺܝܪܳܐ ܕܣܳܘܰܚ ܠܬܰܝܳܒ̈ܶܐ ܘܦܽܘܪܩܳܢܳܐ ܡܫܰܡܠܝܳܐ ܕܩܰܪܺܝܒ ܠܒܰܥܳܝ̈ܰܘܗ̱ܝ܆ ܕܠܶܗ ܝܳܐܶܐ ܫܽܘܒܚܳܐ܀
ܣܶܕܪܳܐ
ܡܶܬܟܰܫܦܺܝܢܰܢ ܠܳܟ ܡܳܪܝܳܐ ܕܰܐܝܟ ܕܰܦܪܰܩܬ ܠܰܢ ܒܚܰܫܰܝ̈ܟ ܡܰܥܒ̈ܕܰܝ ܚܰܝ̈ܶܐ ܡܶܢ ܫܽܘܥܒܳܕܶܗ ܕܳܐܟܶܠܩܰܪܨܳܐ ܘܰܐܚܺܝܬܳܢ ܒܰܩܝܳܡܬܳܟ܆ ܬܰܫܘܶܐ ܠܰܢ ܒܛܰܝܒܽܘܬܳܟ ܕܢܶܬܚܰܕܰܬ ܠܶܒܰܢ ܡܶܢ ܥܰܬܺܝܩܽܘܬܳܐ ܕܰܚܛܺܝܬܳܐ܆ ܘܰܪܕܽܘܦ ܡܶܢܰܢ ܠܥܳܩܬܳܐ ܕܰܐܚܫܟܰܬ ܠܠܶܒܰܘ̈ܳܬܰܢ܆ ܘܟܰܦܰܪ ܠܕܶܡܥܬܳܐ ܡܶܢ ܥܰܝ̈ܢܰܝܢ ܒܣܰܒܪܳܐ ܕܒܽܘܝܳܐܰܝ̈ܟ܆ ܘܰܐܠܒܶܫ ܠܓܽܘܫ̈ܡܶܐ ܕܺܝܠܰܢ ܠܳܐ ܡܶܬܚܰܒܠܳܢܽܘܬܳܐ܆ ܘܰܐܦܪܰܓ ܠܟܽܠܰܢ ܒܶܐܣܛܰܠ ܬܶܫܒܽܘܚܬܳܐ܆ ܐܰܝܟܰܢܳܐ ܕܠܳܟ ܚܰܬܢܳܐ ܕܰܫܪܳܪܳܐ ܢܰܗܺܝܪܳܐܺܝܬ ܢܶܚܙܶܐ܆ ܘܰܐܫܘܳܐ ܠܰܢ ܛܰܝܒܽܘܬܳܟ ܘܠܰܐܒܳܗ̈ܰܝܢ ܘܰܐܚܝ̈ܰܢ ܘܪ̈ܰܒܳܢܰܝܢ ܘܰܠܟܽܠܗܽܘܢ ܥܰܢܺܝ̈ܕܶܐ ܡܗܰܝ̈ܡܢܶܐ ܠܒܽܘܣܳܡܳܐ ܕܒܰܩܝܳܡܬܳܟ܆ ܕܰܚܢܰܢ ܘܗܶܢܽܘܢ ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ܀
ܩܠܐ: ܒܩ̄ ܩܽܘ̣ܩܳܝܳܐ
ܡܳܐ ܫܰܦܺܝܪܳܐ ܬܶܫܡܶܫܬܳܐ ܘܥܶܛܪܳܐ ܕܒܶܣܡ̈ܶܐ܆ ܕܰܡܩܰܪܒܺܝܢ ܠܶܗ ܬܰܚܬܳܝ̈ܶܐ. ܘܥܶܠܳܝ̈ܶܐ ܪܳܘܙܺܝܢ܆ ܓܳܕܠܳܐ ܘܣܳܠܩܳܐ ܠܪܰܘܡܳܐ ܕܰܫܡܰܝܳܐ܆ ܘܰܡܩܰܒܶܠ ܠܳܗ̇ ܝܳܕܰܥ ܟܰܣܝ̈ܳܬܳܐ܆ ܘܳܐܡܰܪ ܠܳܗ̇ ܕܬܳܝ ܒܰܫܠܳܡܳܐ܆ ܒܳܥܽܘܬ ܐ̱ܢܳܫ̈ܳܐ: ܕܫܶܐܠܶܬܶܟ̈ܝ̱ ܝܳܗܶܒ ܐ̱ܢܳܐ ܠܶܟܝ̱ ܘܒܰܫܠܳܡܳܐ ܦܳܢܝܰܬܝ̱ ܗ̄ܘܗ̄܀
ܫܽܘܒܚܳܐ
ܠܳܐ ܚܙܶܐ ܠܺܝ ܕܺܝܰܬܺܩܺܐ ܡܶܢ ܕܰܗܘܳܐ ܥܳܠܡܳܐ܆ ܐܰܝܟ ܗܳܝ ܕܰܟܬܰܒ ܗ̱ܘܳܐ ܡܳܪܰܢ ܒܥܺܕܬܳܐ ܩܰܕܺܝܫܬܳܐ܆ ܒܰܕܡܶܗ ܟܰܬܒܳܗ̇ ܘܒܰܨܠܺܝܒܶܗ ܚܰܬܡܳܗ̇ ܘܰܠܝܰܘܡ̈ܳܬܳܐ ܬܠܳܬܳܐ ܐܶܬܩܰܪܝܰܬ܆ ܩܪܳܗ̇ ܐܳܕܳܡ ܘܶܐܫܟܰܚ ܗ̱ܘܳܐ ܒܳܗ̇ ܕܰܟܬܺܝܒ ܗܳܟܰܢܳܐ܆ ܕܚܰܛܳܝܳܐ ܒܝܰܘܡܳܐ ܕܬܳܐܶܒ܆ ܥܳܢܶܐ ܠܶܗ ܡܳܪܝܳܐ ܗ̄ܘܗ̄܀
ܐܳܘ ܬܰܠܡܺܝܕܳܐ ܐܷܠܳܐ ܬܶܪܚܰܡ ܠܰܕܣܳܢܶܐ ܠܳܟ܆ ܒܥܺܝ ܠܳܟ ܪܰܒܳܐ ܕܪܰܒܳܐ ܙܩܺܝܦܳܐ ܠܳܐ ܗܳܘܶܐ ܠܳܟ. ܐܶܢܗܽܘ ܕܝܶܫܽܘܥ ܐܺܝܬܰܘܗ̱ܝ ܪܰܒܳܟ ܗܽܘ ܡܰܠܶܦ ܠܳܟ܆ ܕܠܰܒܥܶܠܕܒܳܒܰܝ̈ܟ ܬܶܗܘܶܐ ܪܳܚܶܡ ܘܰܡܚܰܒܶܒ ܠܗܽܘܢ܀
ܐܰܫܺܝܓ ܡܶܢܳܟ ܚܶܡܬܳܐ ܘܰܐܟܬܳܐ ܘܒܺܝܫܽܘܬ ܠܶܒܳܐ܆ ܘܪܶܚܡܰܬ ܡܳܪܝܳܐ ܬܶܫܪܶܐ ܒܢܰܦܫܳܟ ܐܰܝܟ ܡܰܠܟܽܘܬܳܐ܆ ܐܰܝܢܳܐ ܕܰܪܓܺܝܙ ܥܰܠ ܩܰܪܺܝܒܶܗ ܘܠܳܐ ܪܳܚܶܡ ܠܶܗ܆ ܠܡܳܪܝܰܐ ܗ̱ܘ ܣܳܢܶܐ ܘܢܶܪܚܰܡ ܠܰܐܚܽܘܗ̱ܝ ܦܽܘܪܣܳܐ ܠܳܐ ܐܺܝܬ܀
ܦܶܬܓܳܡܳܐ
ܛܽܘ̣ܒܰܘܗ̱ܝ ܠܡܰܢ ܕܶܐܫܬܒܶܩ ܠܶܗ ܥܰܘܠܶܗ. ܘܶܐܬܟܰܣܺܝ̣ܘ ܠܶܗ ܚܛܳܗܰܘ̈ܗ̱ܝ ܗ̄. (ܡܙܡ̄ 23܆)
ܐܶܘܰܢܓܶܠܝܽܘܢ ܕܡܰܬܰܝ
(ܝܚ: ܝܒ ـ ܟܒ. Mat. 18: 12-22)
ܡܳܢܳܐ ܡܶܬ݂ܚܙܶܐ ܠܟ݂ܽܘܢ܆ ܐܶܢ ܢܶܗܘܽܘܢ ܠܐ݈ܢܳܫ ܡܳܐܐ ܥܶܪܒ݁ܺܝܢ܆ ܘܢܶܛܥܶܐ ܚܰܕ݂ ܡܶܢܗܽܘܢ܆ ܠܳܐ ܫܳܒ݂ܶܩ ܬ݁ܶܫܥܺܝܢ ܘܬ݂ܶܫܥܳܐ ܒ݁ܛܽܘܪܳܐ܆ ܘܳܐܙܶܠ ܒ݁ܳܥܶܐ ܠܗܰܘ ܕ݁ܰܛܥܳܐ܆ ܘܶܐܢ ܢܶܫܟ݁ܚܶܗ܆ ܐܰܡܺܝܢ ܐܳܡܰܪ ܐ̱ܢܳܐ ܠܟ݂ܽܘܢ܆ ܕ݁ܚܳܕ݂ܶܐ ܒ݁ܶܗ ܝܰܬ݁ܺܝܪ ܡܶܢ ܬ݁ܶܫܥܺܝܢ ܘܬ݂ܶܫܥܳܐ ܕ݁ܠܳܐ ܛܥܰܘ܆ ܗܳܟ݂ܰܢܳܐ ܠܰܝܬ݁ ܨܶܒ݂ܝܳܢܳܐ ܩܕ݂ܳܡ ܐܰܒ݂ܽܘܟ݂ܽܘܢ ܕ݁ܒ݂ܰܫܡܰܝܳܐ܆ ܕ݁ܢܺܐܒ݂ܰܕ݂ ܚܰܕ݂ ܡܶܢ ܙܥܽܘܪ̈ܶܐ ܗܳܠܶܝܢ.. ܐܶܢ ܕ݁ܶܝܢ ܐܰܣܟ݁ܶܠ ܒ݁ܳܟ݂ ܐܰܚܽܘܟ݂܆ ܙܶܠ ܐܰܟ݁ܶܣܳܝܗ݈ܝ܁ ܒ݁ܰܝܢܰܝܟ݁ ܘܠܶܗ ܒ݁ܰܠܚܽܘܕ݂܆ ܐܶܢ ܫܰܡܥܳܟ݂܆ ܝܺܬ݂ܰܪܬ݁ ܐܰܚܽܘܟ݂܆ ܘܶܐܠܳܐ ܫܰܡܥܳܟ݂܆ ܕ݁ܒ݂ܰܪ ܥܰܡܳܟ݂܆ ܚܰܕ݂ ܐܰܘ ܬ݁ܪܶܝܢ ܕ݁ܥܰܠ ܦ݁ܽܘܡ ܬ݁ܪܶܝܢ ܐܰܘ ܬ݁ܠܳܬ݂ܳܐ ܣܳܗܕ݁ܺܝܢ܆ ܬ݁ܩܽܘܡ ܟ݁ܽܠ ܡܶܠܳܐ܆ ܐܶܢ ܕ݁ܶܝܢ ܐܳܦ݂ ܠܳܐ ܠܗܳܢܽܘܢ ܢܶܫܡܰܥ܆ ܐܶܡܰܪ ܠܥܺܕ݈݁ܬ݁ܳܐ܆ ܐܶܢ ܕ݁ܶܝܢ ܐܳܦ݂ ܠܳܐ ܠܥܺܕ݈݁ܬ݁ܳܐ ܢܶܫܡܰܥ܆ ܢܶܗܘܶܐ ܠܳܟ݂ ܐܰܝܟ݂ ܡܳܟ݂ܣܳܐ܂ ܘܰܐܝܟ݂ ܚܰܢܦ݂ܳܐ܆ ܘܰܐܡܺܝܢ ܐܳܡܰܪ ܐ݈ܢܳܐ ܠܟ݂ܽܘܢ܆ ܕ݁ܟ݂ܽܠ ܡܳܐ ܕ݁ܬ݂ܶܐܣܪܽܘܢ ܒ݁ܰܐܪܥܳܐ ܢܶܗܘܶܐ ܐܰܣܺܝܪ ܒ݁ܰܫܡܰܝܳܐ܆ ܘܡܶܕ݁ܶܡ ܕ݁ܬ݂ܶܫܪܽܘܢ ܒ݁ܰܐܪܥܳܐ܆ ܢܶܗܘܶܐ ܫܪܶܐ ܒ݁ܰܫܡܰܝܳܐ܀ ܬ݁ܽܘܒ݂ ܐܳܡܰܪ ܐ̱ܢܳܐ ܠܟ݂ܽܘܢ܆ ܕ݁ܶܐܢ ܬ݁ܪܶܝܢ ܡܶܢܟ݂ܽܘܢ ܢܶܫܬ݁ܘܽܘܢ ܒ݁ܰܐܪܥܳܐ ܥܰܠ ܟ݁ܽܠ ܨܒ݂ܽܘ ܕ݁ܢܶܫܶܐܠܽܘܢ܆ ܢܶܗܘܶܐ ܠܗܽܘܢ ܡܶܢ ܠܘܳܬ݂ ܐܳܒ݂ܝ ܕ݁ܒ݂ܰܫܡܰܝܳܐ܆ ܐܰܝܟ݁ܳܐ ܓ݁ܶܝܪ ܕ݁ܰܬ݂ܪܶܝܢ ܐܰܘ ܬ݁ܠܳܬ݂ܳܐ ܟ݁ܢܺܝܫܺܝܢ ܒ݁ܫܶܡܝ܆ ܬ݁ܰܡܳܢ ܐܶܢܳܐ ܒ݁ܰܝܢܳܬ݂ܗܽܘܢ܆ ܗܳܝܕ݁ܶܝܢ ܩܪܶܒ݂ ܠܘܳܬ݂ܶܗ ܟ݁ܺܐܦ݂ܳܐ ܘܶܐܡܰܪ: ܡܳܪܝ ܟ݁ܡܳܐ ܙܰܒ݂ܢܺܝܢ ܐܶܢ ܢܰܣܟ݁ܶܠ ܒ݁ܺܝ ܐܳܚܝ ܐܶܫܒ݁ܽܘܩ ܠܶܗ܆ ܥܕ݂ܰܡܳܐ ܠܰܫܒ݂ܰܥ ܙܰܒ݂ܢܺܝܢ. ܐܳܡܰܪ ܠܶܗ ܝܶܫܽܘܥ: ܠܳܐ ܐܳܡܰܪ ܐ݈ܢܳܐ ܠܳܟ݂ ܥܕ݂ܰܡܳܐ ܠܰܫܒ݂ܰܥ ܐܶܠܳܐ ܥܕ݂ܰܡܳܐ ܠܫܰܒ݂ܥܺܝܢ ܙܰܒ݂ܢܺܝܢ ܫܒ݂ܰܥ ܫܒ݂ܰܥ܀
ܫܰܝܢܳܐ ܘܰܫܠܳܡܳܐ ܠܟܽܠܟܽܘܢ܀
ܘܰܢܫܰܠܡܽܘܢ ܡܚܰܘܝܳܢܽܘܬܳܐ ܕܰܟܬܺܝܒ ܒܛܶܟܣܳܐ ܕܫܽܘܒܩܳܢܳܐ ܕܝܽܘܡ ܬܪܶܝܢ ܕܨܰܘܡܳܐ ܪܰܒܳܐ ܒܳܬܰܪ ܐܶܘܰܢܓܶܠܺܝܽܘܢ ܒܳܪܟܺܝܢ ܘܒܳܥܶܝܢ ܫܽܘܒܩܳܢܳܐ ܡܶܢ ܚܕܳܕ̈ܶܐ ܘܰܡܚܰܬܡܺܝܢ ܘܥܳܐܠܺܝܢ ܡܩܰܪܒܺܝܢ܆ ܘܟܶܢ ܡܨܰܠܶܝܢ ܨܠܽܘܬܳܐ ܕܪܰܡܫܳܐ ܕܚܰܕ ܒܫܰܒܳܐ ܪܰܒܳܐ ܕܰܩܝܳܡܬܳܐ ܡܫܰܒܰܚܬܳܐ ܕܰܡܫܺܝܚܳܐ ܐܰܠܳܗܰܢ ܘܦܳܪܽܘܩܰܢ܀
ܫܠܶܡ ܛܶܟܣܳܐ ܕܫܽܘܒܩܳܢܳܐ ܕܫܰܒܬܳܐ ܕܰܣܒܰܪܬܳܐ