ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܡܶܠܬܳܐ ܣܓܝ̣ܕܳܐ ܕܶܐܬ̣ܳܐ ܠܣܘ̣ܪܳܩܳܐ ܨܶܒܝܳܢܳܝܳܐ: ܠܗܰܘ̇ ܬܰܩܝ̣ܦܳܐ ܕܰܒܩܳܠܶܗ ܐܰܠܳܗܳܝܳܐ ܐܰܥܕܝ̣ ܐܠܳܥܳܙܳܪ ܪܳܚܡܶܗ ܡ̣ܶܢ ܦܘ̣ܡܶܗ ܕܡܰܘܬܳܐ ܝܰܥܢܳܐ: ܠܗܰܘ̇ ܕܰܣ̣ܓܝ̣ ܣܰܒܪܳܐ ܠܗܳܢܽܘܢ ܕܰܕܠܳܐ ܣܰܒܪܳܐ ܒܢܘ̣ܚܳܡܶܗ ܕܚܰܒܝ̣ܒܶܗ: ܘܚܰܘܝ̣ ܕܗܳܟܰܢܳܐ ܩܳܝܡܝ̣ܢ ܟܽܠܗܽܘܢ ܝܰܠ̈ܕܰܘܗ̱ܝ ܕܳܐܕܳܡ ܒܢܘ̣ܚܳܡܳܐ ܒܝܰܘܡܳܐ ܐ̱ܚܪܳܝܳܐ: ܠܗܰܘ̇ ܕܗܽܘ̣ ܐܝ̣ܬܰܘܗ̱ܝ ܢܘ̣ܚܳܡܳܐ ܘܚܰܝ̈ܶܐ ܠܟܽܠ ܕܰܡܗܰܝܡ̣ܶܢ ܒܶܗ: ܘܰܩܝܳܡܬܳܐ ܕܠܳܐ ܡܶܬܚܰܒܠܳܢܘ̣ܬܳܐ ܠܟܽܠ ܕܢܳܛܰܪ ܦܘ̣ܩ̈ܕܳܢܰܘܗ̱ܝ: ܗܰܘ̇ ܕܠܶܗ ܡܶܬܬܚܝ̣ܒܳܐ ܣܶܓܕܬܳܐ ܘܩܘ̣ܒܳܠ ܛܰܝܒܘ̣ܬܳܐ ܥܰܡ ܐܰܒܘ̣ܗ̱ܝ ܘܪܘ̣ܚܶܗ ܩܰܕܝ̣ܫܳܐ: ܒܗܳܢܳܐ ܥܶܕܳܢܳܐ ܕܩܰܘܡܳܐ ܕܰܬܪܶܝܢ ܕܠܶܠܝܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܫܝ̣ܚܳܐ ܐܰܠܳܗܳܐ ܕܝ̣ܠܰܢ: ܘܡܳܪܳܐ ܫܰܪܝ̣ܪܳܐ ܘܥܳܒܘ̣ܕܳܐ ܕܟܽܠܗܶܝܢ ܒܶܪ̈ܝܳܬܳܐ: ܗܰܘ̇ ܕܰܒܛܰܝܒܘ̣ܬܳܟ ܠܘܳܬ ܣܘ̣ܪܳܩܳܐ ܨܶܒܝܳܢܳܝܳܐ ܐܶܬ̣ܬܰܚܬܝ̣ܬ: ܕܬܶܦܪܘ̣ܩ ܘܰܬ̣ܚܰܪܰܪ ܘܰܬ̣ܚܰܕܶܬ ܠܨܰܠܡܳܟ ܗܰܘ̇ ܕܒܺܐܝ̈ܕܰܝܟ ܩܰܕܝ̣̈ܫܳܬܳܐ ܐܶܬ̣ܓܒܶܠ ܘܶܐܬ̣ܬܰܩܰܢ: ܘܰܒܝܰܕ ܥܒܳܪ ܦܘ̣ܩܕܳܢܳܐ ܐܶܫ̣ܬܠܶܡ ܒܺܐܝ̈ܕܰܝ ܒܝ̣ܫܳܐ ܢܳܟܘ̣ܠܶܗ ܘܥܰܓ̣ܢܶܗ ܒܨܳܡܰܪܬܳܐ ܕܰܐܒܕܳܢܳܐ: ܟܰܕ ܝܺܠܝ̣ܕ ܐܰܢ̱ܬ ܡ̣ܶܢ ܐܰܒܳܐ ܘܰܠܗܰܠ ܡ̣ܶܢ ܛܰܘܪ̈ܶܐ ܘܢܰܙ̈ܠܶܐ ܘܙܰܒ̈ܢܶܐ ܘܥܶܕܳܢ̈ܶܐ: ܩܰܒ̣ܶܠܬ ܥܠܰܝܟ ܕܬܶܬܝ̣ܠܶܕ ܡܰܘܠܳܕܳܐ ܬܪܰܝܳܢܳܐ: ܡ̣ܶܢ ܒܬܘ̣ܠܬܳܐ ܕܟܝ̣ܬܳܐ ܡܰܠܝܰܬ݀ ܛܰܝܒܘ̣ܬܳܐ: ܘܶܐܬ̣ܚܙܰܝܬ ܒܥܳܠܡܳܐ ܐܰܝܟ ܒܰܪܢܳܫܳܐ: ܟܰܕ ܠܳܐ ܐܶܫܬܰܚܠ̣ܰܦܬ ܡ̣ܶܢ ܗܳܝ ܕܺܐܝܬܰܝܟ ܐܰܠܳܗܳܐ: ܘܟܽܠܗܶܝܢ ܐ̱ܢܳܫ̈ܳܝܳܬܳܐ ܫܰܡ̣ܠܝ̣ܬ ܣܛܰܪ ܡ̣ܶܢ ܚܛܝ̣ܬܳܐ: ܘܟܰܕ ܚܘ̣ܪܳܪܳܐ ܡܫܰܡܠܝܳܐ ܨܒ̣ܰܝܬ ܕܬ̣ܶܥܒܶܕ ܠܰܢ ܒܚܰܝ̈ܠܶܐ ܘܬܶܕܡܪ̈ܳܬܳܐ ܚܰܘܝ̣ܬ ܕܐܰܠܳܗܳܐ ܐܝ̣ܬܰܝܟ: ܟܰܕ ܡܦܰܬܰܚ ܐܰܢ̱ܬ ܠܰܣ̈ܡܰܝܳܐ: ܟܰܕ ܡܕܰܟܶܐ ܐܰܢ̱ܬ ܠܓܰܪ̈ܒܶܐ ܟܰܕ ܡܚܰܝܶܨ ܐܰܢ̱ܬ ܠܰܡܫܰܪ̈ܰܝܳܐ: ܟܰܕ ܬܳܪܶܨ ܐܰܢ̱ܬ ܠܰܟܦܝ̣̈ܦܶܐ: ܟܰܕ ܛܳܪܶܕ ܐܰܢ̱ܬ ܠܫܺܐܕ̈ܶܐ: ܟܰܕ ܡܰܚܠܶܡ ܐܰܢ̱ܬ ܠܰܟܪ̈ܝ̣ܗܶܐ: ܟܰܕ ܥܘ̣ܕܪܳܢܳܐ ܝܳܗܶܒ ܐܰܢ̱ܬ ܠܟܽܠ ܟܺܐܒ̈ܝ̣ܢ: ܟܰܕ ܐܰܝܟ ܡܰܒܘ̣ܥܳܐ ܪܳܕܶܝܢ ܡܶܢܳܟ ܟܽܠ ܚܘ̣ܠ̈ܡܳܢܝ̣ܢ: ܟܰܕ ܟܽܠ ܕܰܒܥ̣ܐ ܢܣ̣ܰܒ ܫܶܐܠܬܶܗ: ܘܟܽܠ ܕܫ̣ܶܐܠ ܡܶܢܳܟ ܡܰܠܝ̣ܬ ܣܢܝ̣ܩܘ̣ܬܶܗ: ܘܢܰܛܰܪ ܠܰܡܗܰܝ̈ܡܢܶܐ ܕܡܰܪܥܝ̣ܬܳܟ: ܢ̣ܶܗܘܶܐ ܨܠܝ̣ܒܳܟ ܢܳܛܘ̣ܪܳܐ ܠܟܽܠܰܢ: ܡܢܝ̣ ܠܰܢ ܒܰܓܙܳܪܳܐ ܕܶܐܡܪ̈ܰܝܟ ܡܰܠܳܐ ܣܢܝ̣ܩܘ̣ܬܳܐ ܕܡܶܣ̈ܟܺܢܶܐ ܕܥܰܡܳܟ ܠܰܚܶܡ ܠܗܰܕܳܡ̈ܶܐ ܣܕ̈ܝ̣ܩܶܐ ܕܥܺܕܬܳܟ: ܠܰܒܶܒ ܠܥܰܝ݂ܺܝ̣̈ܩܰܝ ܪܘ̣ܚܳܐ: ܟܰܠܶܠ ܕܶܝܢ ܠܰܒ̈ܬܘ̣ܠܶܐ ܕܥܰܠ ܫܡܳܟ: ܟܠܝ̣ ܡ̣ܶܢ ܟܶܢܫܳܟ ܠܡܰܪ̈ܕܘܳܬܳܐ ܘܫܰܒ̈ܛܶܐ ܕܪܘ̣ܓܙܳܐ ܘܝܰܡܝ̣ܢܳܟ ܚܰܝܠܬܳܢܝ̣ܬܳܐ ܬ̣ܢܰܛܰܪܝ̱ ܠܰܢ: ܝܘ̣ܠܦܳܢܳܟ ܪܘ̣ܚܳܢܳܝܳܐ ܢ̣ܕܰܒܰܪ ܠܰܢ: ܛܪܘ̣ܕ ܡܶܢܰܢ ܠܰܚܣܳܡܳܐ ܕܡܰܟܶܐ ܠܰܢ: ܛܰܝܒܘ̣ܬܳܟ ܡܪܰܚܡܳܢܝ̣ܬܳܐ ܬ̣ܰܐܓܶܢܝ̱ ܥܠܰܝܢ ܚܰܝܶܠ ܒܥܘ̣ܫܢܳܟ ܠܰܡܚܝ̣ܠܘ̣ܬܰܢ: ܚܰܣܳܐ ܒܰܚܢܳܢܳܟ ܚܰܘ̈ܒܳܬܰܢ: ܚܡܘ̣ܠ ܒܰܛܝܳܪܳܟ ܠܰܐܒܝ̣ܕܘ̣ܬܰܢ ܙܰܝܶܢ ܒܬܘ̣ܩܦܳܟ ܠܰܬܒܝ̣ܪܘ̣ܬܰܢ: ܙܽܘܢ ܒܚܰܘ̈ܣܳܢܰܝܟ ܠܡܶܣܟܺܢܘ̣ܬܰܢ: ܘܺܐܠܳܐ ܕܦܘ̣ܪܩܳܢܳܟ ܐܰܟܪܶܟ ܠܰܢ: ܘܳܝ̈ܶܐ ܕܰܢܛܝ̣ܪܝ̣ܢ ܠܚܰܛܳܝ̈ܶܐ ܘܪ̈ܰܫܝ̣ܥܶܐ ܕܚܘ̣ܩ ܡܶܢܰܢ: ܗܰܕܳܝܳܐ ܘܰܡܣܰܝܥܳܢܳܐ ܗܘܝ̣ ܠܰܢ: ܗܶܪܬܳܐ ܕܫܺܐܕ̈ܶܐ ܒܰܛܶܠ ܡܶܢܰܢ: ܕܽܘܢ ܕܝ̣ܢܰܢ ܡ̣ܶܢ ܒܥܶܠ̈ܕܒܳܒܰܝܢ: ܕܚܝ̣̈ܠܶܐ ܥܒܶܕܰܝܢ ܥܰܠ ܣܳܐܢܰܝ̈ܢ: ܓܰܐܝܘ̣ܬܳܐ ܘܫܘ̣ܒܚܳܐ ܐܰ‌ܠܒܶܫ ܠܥܰܪܛܶܠܳܝܘ̣ܬܰܢ: ܓܢܘ̣ܢܳܐ ܕܚܰܝ̈ܶܐ ܛܰܝܶܒ ܠܰܢ: ܒܰܐܘ̈ܘܳܢܶܐ ܕܡܰܠܟܘ̣ܬܳܟ ܒܰܣܶܡ ܠܰܢ: ܒܡܰܫܪ̈ܝܳܬܳܐ ܕܩܰܕ̈ܝ̣ܫܰܝܟ ܚܰܠܶܛ ܠܰܢ: ܐܰܬܪܳܐ ܕܰܢܝܳܚܳܐ ܠܰܢ ܘܰܠܥܰܢܝ̣̈ܕܰܝܢ ܐܰܘܪܶܬ ܠܰܢ: ܐܰܒܳܐ ܡܪܰܚܡܳܢܳܐ ܚܰܣܳܐ ܠܰܢ: ܒܪܳܐ ܣܓܝ̣ܕܳܐ ܚܛܳܗ̈ܰܝܢ ܫܒܘ̣ܩ ܠܰܢ: ܪܘ̣ܚܳܐ ܡܰܚܝܳܢܳܐ ܚܰܕܶܬ ܒܰܢ: ܐܰܝܟܰܢܳܐ ܕܢ̇ܰܣܶܩ ܫܘ̣ܒܚܳܐ ܘܢ̇ܶܬܶܠ ܬܰܘܕܝ̣ܬܳܐ ܠܰܬܠܝ̣ܬܳܝܘ̣ܬܳܐ ܣܓܝ̣ܕܬܳܐ ܘܰܡܫܰܒܰܚܬܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀