ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܡܢܰܚܡܳܢܳܐ ܕܡܝ̣̈ܬܶܐ: ܘܰܡܩܝ̣ܡܳܢܳܐ ܕܰܫܟܝ̣̈ܒܰܝ ܥܰܦܪܳܐ: ܠܗܰܘ̇ ܒܳܪܘ̣ܝܳܐ ܘܰܡܬܰܩܢܳܢܳܐ ܕܟܽܠܗܶܝܢ ܒܶܪ̈ܝܳܬܳܐ: ܘܣܳܥܘ̣ܪܳܐ ܕܬܶܕܡܪ̈ܳܬܳܐ ܫܒܝ̣̈ܚܳܬܳܐ ܠܗܰܘ̇ ܕܰܩ̣ܪܳܐ ܒܩܳܠܶܗ ܥܰܙܝ̣ܙܳܐ ܘܰܠܠܳܥܳܙܳܪ ܪܳܚܡܶܗ ܐܰܩܝ̣ܡ: ܠܗܰܘ̇ ܕܰܐܒ̣ܗܶܬ ܠܝܘ̣̈ܕܳܝܶܐ ܚܰܪ̈ܡܶܐ ܘܰܐܟ̣ܶܣ ܠܛܳܠܘ̣ܡܘ̣ܬܗܽܘܢ: ܘܚ̣ܰܕܝ̣ ܘܰܐܦ̣ܨܰܚ ܠܡܳܪܬܳܐ ܘܰܠܡܰܪܝܰܡ ܒܢܘ̣ܚܳܡܳܐ ܕܰܐܚܘܗܶܝܢ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܚܘ̣ܣܳܝܳܐ ܩܰܘܡܳܐ ܩܰܕܡܳܝܳܐ ܕܠܶܠܝܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒ̈ܢܶܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܫܺܝ̣ܚܳܐ ܐܰܠܳܗܳܐ ܕܝ̣ܠܰܢ: ܘܡܳܪܳܐ ܫܰܪܝ̣ܪܳܐ ܘܥܳܒܘ̣ܕܳܐ ܕܟܽܠܗܶܝܢ ܒܶܪ̈ܝܳܬܳܐ: ܗܰܘ̇ ܕܰܒܛܰܝܒܘ̣ܬܳܟ ܠܘܳܬ ܣܘ̣ܪܳܩܳܐ ܨܶܒܝܳܢܳܝܳܐ ܐܶܬ̣ܬܰܚܬܝ̣ܬ ܕܬ̣ܶܦܪܘ̣ܩ ܘܰܬ̣ܚܰܕܶܬ ܠܨܰܠܡܳܟ ܗܰܘ̇ ܕܒܺܐܝ̈ܕܰܝܟ ܩܰܕܝ̣̈ܫܳܬܳܐ ܐܶܬ̣ܓܒܶܠ ܘܶܐܬ̣ܬܰܩܰܢ ܒܝܰܕ ܥܒܳܪ ܦܘ̣ܩܕܳܢܳܐ ܐܶܫ̣ܬܠܶܡ ܒܺܐܝ̈ܕܰܝ ܒܝ̣ܫܳܐ ܢܳܟܘ̣ܠܶܗ ܘܥܰܓ̣ܢܶܗ ܒܨܳܡܰܪܬܳܐ ܕܰܐܒܕܳܢܳܐ: ܘܟܰܕ ܝܺܠܝ̣ܕ ܐܰܢ̱ܬ ܡ̣ܶܢ ܐܰܒܳܐ ܠܗܰܠ ܡ̣ܶܢ ܛܰܘܪ̈ܶܐ ܘܙܰܒ̈ܢܶܐ ܘܥܶܕܳܢ̈ܶܐ ܩܰܒܶܠ̣ܬ ܥܠܰܝܟ ܕܬܶܬܝ̣ܠܶܕ ܡܰܘܠܳܕܳܐ ܬܪܰܝܳܢܳܐ ܡ̣ܶܢ ܒܬܘ̣ܠܬܳܐ ܕܟܝ̣ܬܳܐ ܘܡܰܠܝܰܬ݀ ܛܰܝܒܘ̣ܬܳܐ ܝܳܠܕܰܬ ܐܰܠܳܗܳܐ ܡܰܪܝܰܡ: ܘܶܐܬܚ̣ܙܰܝܬ ܒܥܳܠܡܳܐ ܐܰܝܟ ܒܰܪܢܳܫܳܐ: ܟܰܕ ܠܳܐ ܐܶܫܬܰܚܠ̣ܰܦܬ ܡ̣ܶܢ ܗܳܝ ܕܺܐܝܬܰܝܟ ܐܰܠܳܗܳܐ ܘܟܽܠܗܶܝܢ ܐ̱ܢܳܫܳܝ̈ܳܬܳܐ ܫܰܡܠܝ̣ܬ ܣܛܰܪ ܡ̣ܶܢ ܚܛܝ̣ܬܳܐ: ܘܟܰܕ ܚܘ̣ܪܳܪܳܐ ܡܫܰܡܠܝܳܐ ܨܒ̣ܰܝܬ ܕܬ̣ܶܥܒܶܕ ܠܰܢ ܒܚܰܝ̈ܠܶܐ ܘܬܶܕܡܪ̈ܳܬܳܐ ܚܰܘܝ̣ܬ ܕܰܐܰܠܳܗܳܐ ܐܝ̣ܬܰܝܟ: ܘܟܰܕ ܡܦܰܬܰܚ ܐܰܢ̱ܬ ܠܰܣ̈ܡܰܝܳܐ: ܟܰܕ ܡܕܰܟܶܐ ܐܰܢ̱ܬ ܠܓܰܪ̈ܒܶܐ: ܟܰܕ ܡܚܰܝܶܨ ܐܰܢ̱ܬ ܠܰܡܫܰܪ̈ܰܝܳܐ: ܟܰܕ ܬܳܪܶܨ ܐܰܢ̱ܬ ܠܰܟܦܝ̣̈ܦܶܐ: ܟܰܕ ܛܳܪܶܕ ܐܰܢ̱ܬ ܠܫܺܐܕ̈ܶܐ: ܟܰܕ ܡܰܚܠܶܡ ܐܰܢ̱ܬ ܠܰܟܪ̈ܝ̣ܗܶܐ: ܟܰܕ ܝܳܗܶܒ ܐܰܢ̱ܬ ܐܳܣܝܘ̣ܬܳܐ ܠܟܽܠ ܟܺܐܒܺܝ̈ܢ: ܟܰܕ ܐܰܝܟ ܡܰܒܘ̣ܥܳܐ ܪܳܕܶܝܢ ܡܶܢܳܟ ܟܽܠ ܚܘ̣ܠ̈ܡܳܢܝ̣ܢ: ܟܰܕ ܟܽܠ ܕܰܒܥ̣ܳܐ ܢܣ̣ܰܒ ܫܶܐܠܬܶܗ: ܘܟܽܠ ܕܫ̣ܶܐܠ ܡܰܠܝ̣ܬ ܣܢܝ̣ܩܘ̣ܬܶܗ: ܘܟܽܠ ܕܰܛܦ̣ܰܣ ܒܳܟ ܐܰܝܟ ܛܳܒܳܐ ܫܰܟܶܢ̣ܬ ܠܶܗ ܥܘ̣ܕܪ̈ܳܢܰܝܟ: ܘܟܰܕ ܩ̣ܪܶܒ ܙܰܒܢܳܐ ܕܚܰܫܳܟ ܦܳܪܘ̣ܩܳܝܳܐ ܠܘܳܬ ܓܘ̣ܕܳܐ ܕܬܰܠܡܝ̣̈ܕܰܝܟ ܫܦܰܝ̈ܳܐ ܐܶܡ̣ܰܪܬ ܕܠܳܥܳܙܳܪ ܪܳܚܡܰܢ ܫܟ̣ܶܒ ܠܶܗ ܘܨܳܒܶܐ ܐ̱ܢܳܐ ܕܺܐܙܰܠ ܐܰܥܝ̣ܪܝ̣ܘܗ̱ܝ: ܘܟܰܕ ܡܰܟܝ̣ܟܳܐܝ̣ܬ ܠܒܶܝܬ ܥܰܢܝܳܐ ܐܶܬ̣ܰܝܬ ܥܰܡ ܫܠܝ̣̈ܚܰܝܟ ܩܰܕܝ̣̈ܫܶܐ: ܘܰܦܓ̣̈ܰܥܝ̱ ܒܳܟ ܐܰܚ̈ܘܳܬܶܗ ܕܡܝ̣ܬܳܐ ܟܰܕ ܒܳܟ̈ܝܳܢ: ܝܘ̣̈ܕܳܝܶܐ ܕܰܟܡܝ̣ܪܝ̣ܢ: ܟܶܢ̈ܫܶܐ ܕܰܐܒܝ̣ܠܝ̣ܢ ܢܶܫ̈ܶܐ ܕܡܰܪ̈ܩܕܳܢ ܪ̈ܳܚܡܶܐ ܕܰܡܥܳܩܝ̣ܢ: ܐ̱ܚ̈ܝܳܢܶܐ ܕܚܰܫܝ̣ܫܝ̣ܢ: ܗܳܝ ܕܶܝܢ ܐ̱ܢܳܫܳܝ̈ܳܬܳܐ ܣܰܓ̈ܺܝܳܐܬܳܐ ܚܰܘܝ̣ܬ ܒܪܶܚܡܰܬ݀ ܐ̱ܢܳܫܘ̣ܬܳܟ ܒܕܶܡ̈ܥܶܐ ܕܡ̣ܶܢ ܥܰܝܢܰܝ̈ܟ: ܒܫܘ̣ܐܳܠܳܐ ܕܥܰܠ ܩܰܒܪܳܐ ܒܒܳܥܘ̣ܬܳܐ ܕܰܠܘܳܬ ܐܰܒܘ̣ܟ: ܟܰܕ ܒܝܰܕ ܗܳܠܶܝܢ ܚܰܘܝ̣ܬ ܕܰܒܨܶܒܝܳܢܳܟ ܘܕܰܐܒܘ̣ܟ ܘܰܕܪܘ̣ܚܳܟ ܩܰܕܝ̣ܫܳܐ: ܠܗܳܕܶܐ ܕܶܝܢ ܟܽܠܳܗ̇ ܡܶܬܢܰܚܬܳܢܘ̣ܬܳܐ ܦܰܐܝܰܬ݀ ܠܐܰܠܳܗܳܐ ܐܶܬ̣ܰܝܬ: ܘܟܰܕ ܦܳܩܘ̣ܕܳܐܝ̣ܬ ܐܰܙܥܶܩ̣ܬ ܒܩܳܠܳܐ ܪܳܡܳܐ ܠܳܥܳܙܳܪ ܬܳܐ ܠܒܰܪ: ܢܦ̣ܰܩ ܗܰܘ̇ ܡܝ̣ܬܳܐ ܡ̣ܶܢ ܒܳܬܰܪ ܕܰܣ̣ܪܝ̣ ܐܰܪܒܥܳܐ ܝܰܘ̈ܡܝ̣ܢ ܘܶܐܬܗܰܝܡܰܢ̣ܬ ܕܡܳܪܳܐ ܕܚܰܝ̈ܶܐ ܘܰܕܡܝ̣̈ܬܶܐ ܐܰܢ̱ܬ ܐܝ̣ܬܰܝܟ ܘܐܰܠܳܗܳܐ ܫܰܪܝ̣ܪܳܐ ܕܡ̣ܶܢ ܐܰܠܳܗܳܐ ܫܰܪܝ̣ܪܳܐ: ܬܰܠܡܝ̣̈ܕܶܐ ܕܰܡܗܰܝܡܢܝ̣ܢ ܘܚܳܕܶܝܢ: ܡܰܪܝܰܡ ܘܡܳܪܬܳܐ ܕܰܦܨܝ̣̈ܚܳܢ: ܟܡܝ̣ܪ̈ܶܐ ܟܰܕ ܪܳܘܙܝ̣ܢ: ܐܰܒܝ̣̈ܠܶܐ ܘܰܡ̈ܥܳܩܶܐ ܕܶܡܬܒܰܐܝ̣ܢ: ܥܰܡ̱̈ܡܶܐ ܕܰܡܫܰܒܚܝ̣ܢ: ܟܶܢ̈ܫܶܐ ܕܰܡܩܰܠܣܝ̣ܢ ܡܰܘܬܳܐ ܕܰܡܒܰܠܗܰܝ: ܣܳܛܳܢܳܐ ܟܰܕ ܬܰܘܝ̣ܪ: ܣܳܦܪ̈ܶܐ ܕܰܟܡܝ̣ܪܝ̣ܢ: ܪ̈ܝ̣ܫܰܝ ܟܳܗ̈ܢܶܐ ܕܡܶܬܚܰܬܡܝ̣ܢ: ܘܟܽܠܶܗ ܥܰܡܳܐ ܚܰܕ ܠܚܰܕ ܡܠܰܚܫܝ̣ܢ ܗ̱ܘܰܘ: ܕܗܳܢܰܘ ܗܰܘ̇ ܕܡܶܣܬܰܟܶܐ ܕܐܳ݀ܬܶܐ: ܗܳܢܰܘ ܕܰܢܒܺܝ̈ܶܐ ܐܰܟ̣ܪܶܙܘ̱ ܡܶܛܠܬܶܗ: ܗܳܢܰܘ ܗܰܘ̇ ܕܚܰܙܳܝ̈ܶܐ ܚܰܘܝ̣ܘ ܕܶܡ̈ܘܳܬܳܐ ܕܝ̣ܠܶܗ: ܬܶܗܪܳܐ ܘܕܘ̣ܡܳܪܳܐ ܐܶܬ̣ܡܠܝ̣ܘ ܚܰܝ̈ܠܰܘܳܬܳܐ ܥܶܠܳܝ̈ܶܐ ܥܰܡ ܒܢܰܝ̈ܢܳܫܳܐ ܕܰܠܬܰܚܬ: ܕܚܳܙܶܝܢ ܗ̱ܘܰܘ ܠܡܝ̣ܬܳܐ ܕܰܡܗܰܠܶܟ ܟܰܕ ܐܰܣܝܪ̈ܳܢ ܐܝ̣̈ܕܰܘܗ̱ܝ ܘܪ̈ܶܓܠܰܘܗ̱ܝ ܘܰܡܩܰܛܪ̈ܳܢ ܐܰܦ̈ܰܘܗ̱ܝ ܒܣܘ̣ܪܳܕܳܐ: ܗܳܝܕܶܝܢ ܦܰܩ̣ܶܕܬ ܠܝܘ̣̈ܕܳܝܶܐ ܛܳܠܘ̣̈ܡܶܐ ܕܢ̣ܶܫܪܘ̣ܢܳܝܗ̱ܝ ܕܠܳܐ ܢܕܰܓܠܘ̣ܢܳܗ̇ ܠܗܳܝ ܬܶܕܡܘ̣ܪܬܳܐ ܦܰܐܝܰܬ݀ ܠܐܰܠܳܗܳܐ: ܘܒܰܕܓܽܘܢ ܐܳܦ ܚܢܰܢ ܡܶܬܟܰܫܦܝ̣ܢܰܢ ܠܳܟ ܡܳܪܝܳܐ ܪܳܚܶܡ ܐ̱ܢܳܫ̈ܳܐ ܐܰܩܝ̣ܡ ܐܳܦ ܠܰܢ ܡ̣ܶܢ ܡܝ̣ܬܘ̣ܬܳܐ ܕܰܚܛܝ̣ܬܳܐ: ܫܪܝ̣ ܠܰܢ ܡ̣ܶܢ ܟܽܠܗܽܘܢ ܥܘ̣ܪ̈ܙܳܠܶܐ ܗܳܠܶܝܢ ܕܠܳܐ ܢܳܡܘ̣ܣܳܝ̈ܘܳܬܳܐ ܕܝ̣ܠܰܢ: ܢܰܚܶܡ ܠܢܰܦ̈ܫܳܬܰܢ ܡ̣ܶܢ ܣܰܪܝܘ̣ܬܳܐ ܕܟܽܠܗܶܝܢ ܡܶܬܥܰܒܪ̈ܳܢܘܳܬܰܢ: ܘܰܐܫܘܳܐ ܠܰܢ ܕܥܰܡ ܡܰܪܝܰܡ ܘܡܳܪܬܳܐ ܒܳܟ ܢ̇ܶܬܦܨܰܚ ܒܫܘ̣ܒܩܳܢܳܐ ܕܰܚ̈ܛܳܗܰܝܢ: ܘܰܠܘܳܬ ܪ̈ܶܓܠܰܝܟ ܐܰܠܳܗܳܝ̈ܳܬܳܐ ܐܰܘܬܶܒ ܠܰܢ: ܘܰܠܡܶܠ̈ܰܝܟ ܚܰܝ̈ܳܬܳܐ ܩܒܘ̣ܥ ܘܣܰܬܶܬ ܒܢܰܦ̈ܫܳܬܰܢ: ܘܒܰܚܫܳܡܝ̣ܬܳܐ ܗܳܝ ܕܠܳܐ ܡܶܫܬܰܪܝܳܐ ܥܰܡ ܠܳܥܳܙܳܪ ܪܳܚܡܳܟ ܐܰܣܡܶܟ ܠܰܢ: ܘܥܰܡ ܚܰܕܘ̣̈ܓܰܝܟ ܒܰܣܶܡ ܠܰܢ: ܘܥܰܡ ܙܡܝ̣̈ܢܶܐ ܚܰܕܳܐ ܠܰܢ: ܘܥܰܡ ܩܰܕܝ̣̈ܫܰܝܟ ܚܰܠܶܛ ܠܰܢ: ܘܥܰܡ ܓܒܱ̈ܝܳܐ ܕܝ̣ܠܳܟ ܡܢܝ̣ ܠܰܢ: ܘܠܰܢ ܘܰܠܥܰܢܝ̣̈ܕܰܝܢ ܡܗܰܝ̈ܡܢܶܐ ܕܒܰܬܪܝ̣ܨܘ̣ܬ ܫܘ̣ܒܚܳܐ ܫܰܢܝ̣ܘ ܠܘܳܬܳܟ ܐܰܢܝ̣ܚ ܐܶܢܽܘܢ ܒܰܡ̈ܛܰܠ̱ܠܶܐ ܕܢܘ̣ܗܪܳܐ: ܘܰܫܒܘ̣ܩ ܒܪ̈ܰܚܡܰܝܟ ܠܫܳܪ̈ܥܳܬܳܐ ܘܒܘ̣ܨܳܪ̈ܶܐ ܕܝ̣ܠܗܽܘܢ: ܘܰܚܢܰܢ ܘܗܶܢܽܘܢ ܢ̇ܰܣܶܩ ܫܘ̣ܒܚܳܐ ܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀