ܩܰܕܡܳܝܰܬ݀ ܨܠܽܘ̣ܬܳܐ ܕܫܘ̣ܪܳܝܳܐ

ܚܰܢܳܢܳܐ ܘܣܰܓܝ̣ ܪ̈ܰܚܡܶܐ ܡܳܪܝܳܐ: ܕܰܒܝܰܕ ܒܶܟܝܳܟ ܕܥܰܠ ܠܳܥܳܙܳܪ ܫܰܘܕܰܥ̣ܬ ܠܰܢ ܥܰܠ ܟܽܠܶܗ ܟܝܳܢܳܐ ܐ̱ܢܳܫܳܝܳܐ ܕܰܡܰܥ̣ܬ ܡܪܰܚܡܳܢܳܐܝ̣ܬ: ܥܰܠ ܕܰܚܙ̣ܰܝܬܳܝܗ̱ܝ ܕܰܕܒܝ̣ܪ ܡ̣ܶܢ ܣܳܛܳܢܳܐ ܘܰܥܓܝ̣ܢ ܒܰܫܝܘ̣ܠ ܡܳܪܘ̣ܕܳܐܝ̣ܬ: ܘܰܒܝܰܕ ܩܝܳܡܬܶܗ ܕܪܳܚܡܳܟ ܕܡ̣ܶܢ ܩܰܒܪܳܐ ܚܰܘܝ̣ܬ ܠܟܽܠ ܐ̱ܢܳܫ ܕܗܳܟܰܢܳܐ ܥܬܝ̣ܕ ܐܰܢ̱ܬ ܕܰܬ̣ܩܝ̣ܡ ܠܟܽܠܗܽܘܢ ܥܰܢܝ̣̈ܕܶܐ ܒܢܘ̣ܚܳܡܳܐ ܓܰܘܳܢܳܐܝ̣ܬ: ܘܚܰܪܰܪ ܡܳܪܝ̱ ܠܢܰܦ̈ܫܳܬܰܢ ܡ̣ܶܢ ܐܰܣܘ̣ܪ̈ܶܐ ܕܰܚܛܝ̣ܬܳܐ ܘܰܕܣܳܛܳܢܳܐ ܚܰܝܘ̣ܣܬܳܢܳܐܝ̣ܬ: ܘܰܐܩܝ̣ܡ ܠܰܢ ܡ̣ܶܢ ܡܰܦܘ̣ܠܬܰܢ ܕܒܰܚ̈ܛܳܗܶܐ ܘܒܰܪ̈ܓܝ̣ܓܳܬܳܐ ܚܰܫ̈ܳܢܳܝܳܬܳܐ ܘܒܶܣܪ̈ܳܢܳܝܳܬܳܐ ܓܰܢ̱ܒܳܪܳܐܝ̣ܬ: ܘܰܐܫܘܳܐ ܠܟܽܠܰܢ ܠܰܩܝܳܡܬܳܐ ܒܪܝ̣ܟܬܳܐ ܕܡ̣ܶܢ ܝܰܡܝ̣ܢܳܟ ܫܰܘܝܳܐܝ̣ܬ: ܕܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ ܐܰܡܝ̣ܢܳܐܝ̣ܬ ܡܳܪܰܢ ܘܰܐܠܳܗܰܢ ܠܥܳܠܡܝ̣ܢ܀

ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܥܳܒܘ̣ܕܳܐ ܘܒܳܪܘ̣ܝܳܐ ܕܰܟܝܳܢܰܢ: ܠܗܰܘ̇ ܡܚܰܕܬܳܢܳܐ ܕܥܰܬܝ̣ܩܘ̣ܬܰܢ ܘܡܰܚܝܳܢܳܐ ܕܡܝ̣ܬܘ̣ܬܰܢ: ܠܗܰܘ̇ ܕܶܐܡ̣ܰܪ ܠܡܳܪܬܳܐ ܕܶܐܢܳܐ ܐ̱ܢܳܐ ܢܘ̣ܚܳܡܳܐ ܘܚܰܝ̈ܶܐ ܘܡܰܢ ܕܰܡܗܰܝܡ̣ܶܢ ܒܝ̣ ܐܳܦܶܢ ܢ̣ܡܘ̣ܬ ܢ̣ܺܚܶܐ ܘܟܽܠ ܕܚܰܝ ܘܰܡܗܰܝܡ̣ܶܢ ܒܝ̣ ܠܥܳܠܰܡ ܠܳܐ ܢ̣ܡܘ̣ܬ: ܠܗܰܘ̇ ܕܰܩܥ̣ܳܐ ܒܶܗ ܒܡܰܘܬܳܐ ܘܰܢܦ̣ܰܠ: ܗܰܘ̇ ܕܰܒܡܶܠܬܶܗ ܐܰܚܝ̣ ܠܰܒܪܳܗ̇ ܕܰܐܪܡܰܬܳܐ: ܘܰܒܦܘ̣ܩܕܳܢܶܗ ܐܰܩܝ̣ܡ ܠܒܰܪ̱ܬ ܝܘ̣ܐܳܪܳܫ: ܘܰܒܩܳܠܶܗ ܥܰܙܝ̣ܙܳܐ ܩ̣ܪܳܐ ܠܠܳܥܳܙܳܪ ܬܳܐ ܠܒܰܪ ܘܰܢܦ̣ܰܩ ܒܳܬܰܪ ܐܰܪܒܥܳܐ ܝܰܘܡܝ̣̈ܢ ܕܥܽܘܢܕܳܢܶܗ: ܘܡ̣ܶܢ ܒܳܬܰܪ ܕܰܣ̣ܪܝ̣ ܗܰܘ̇ ܡܝ̣ܬܳܐ ܟܰܕ ܚܰܝ: ܘܟܰܕ ܐܰܣܝ̣ܪ ܘܰܡܚܰܙܰܩ ܘܰܡܗܰܠܶܟ: ܘܰܡܒܰܕܶܩ ܬܰܩܝ̣ܦܘ̣ܬ ܚܰܝܠܶܗ ܐܳܦ ܡܰܥܒܕܳܢܘ̣ܬܶܗ ܕܗܰܘ̇ ܕܰܩ̣ܪܳܝܗ̱ܝ ܛܳܒܳܐ ܕܠܶܗ ܢ̇ܶܬܕܟܰܪ ܘܠܶܗ ܢ̇ܫܰܒܰܚ: ܒܗܳܢܳܐ ܥܶܕܳܢܳܐ ܕܚܘ̣ܣܳܝܳܐ ܕܨܰܦܪܳܐ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕܳܢ̈ܶܐ ܘܫܳܥ̈ܶܐ ܘܙܰܒ̈ܢܶܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܫܝ̣ܚܳܐ ܐܰܠܳܗܳܐ ܕܝ̣ܠܰܢ: ܗܰܘ̇ ܥܳܒܘ̣ܕܳܐ ܘܰܡܬܰܩܢܳܢܳܐ ܕܓܶܢܣܳܐ ܕܝ̣ܠܰܢ ܐ̱ܢܳܫܳܝܳܐ: ܗܰܘ̇ ܕܟܰܕ ܡ̣ܶܢ ܐܰܪܥܳܐ ܓܒܰܠ̣ܬܳܝܗ̱ܝ ܠܒܰܪܢܳܫܳܐ ܩܰܕܡܳܝܳܐ: ܒܢܰܦܫܳܐ ܕܶܝܢ ܚܰܝܬܳܐ ܘܰܡܠܝ̣ܠܬܺܐ ܐܳܦ ܝܰܕܘ̣ܥܬܳܢܝ̣ܬܳܐ: ܘܰܗ̣ܕܰܪܬܳܝܗ̱ܝ ܒܨܰܠܡܳܐ ܕܝ̣ܠܳܟ ܐܰܠܳܗܳܝܳܐ: ܘܒܰܕܡܘ̣ܬܳܐ ܕܝ̣ܠܳܟ ܬܰܩܶܢ̣ܬܳܝܗ̱ܝ ܘܡܶܛܽܠ ܕܰܛܥ̣ܳܐ ܒܝܰܕ ܪ̈ܓܝ̣ܓܳܬܳܐ ܒܶܣܪ̈ܳܢܳܝܳܬܳܐ ܒܰܐܪܥܳܐ ܠܰܕܡܘ̣ܬܳܐ ܐܰܠܳܗܳܝܬܳܐ ܠܗܰܘܢܳܐ ܛܡ̣ܰܪ: ܐܰܢ̱ܬ ܕܶܝܢ ܥܳܒܘ̣ܕܶܗ ܘܰܒܪܳܐ ܘܡܶܠܬܶܗ ܕܰܐܒܳܐ ܡܶܛܽܠ ܦܘ̣ܪܩܳܢܶܗ ܠܳܐ ܡܶܫܬܰܚܠܦܳܢܳܐܝ̣ܬ ܦܰܓܪܳܐ ܐܶܬܥܰܛܰܦ̣ܬ ܘܥܰܡ ܒܢܰܝ̈ ܐ̱ܢܳܫ̈ܳܐ ܐܶܬܗܰܦܰܟ̣ܬ: ܘܣܰܒܪܳܐ ܕܚܰܝܰܬ݀ ܡܝ̣̈ܬܶܐ ܒܥܳܠܡܳܐ ܙܪܰܥ̣ܬ ܘܡܰܚܒܳܢܘ̣ܬܳܐ ܥܰܡ ܓܶܢܣܳܐ ܐ̱ܢܳܫܳܝܳܐ ܟܰܕ ܠܳܐ ܫܳܘܶܐ ܗ̱ܘܳܐ ܥܒ̣ܰܕܬ: ܘܰܒܫܘ̣ܠܳܡ ܡܕܰܒܪܳܢܘ̣ܬܳܟ ܕܰܒܥܳܠܡܳܐ ܫܰܘܕܰܥ̣ܬ ܕܪܳܚܶܡ ܐܰܢ̱ܬ ܠܠܳܥܳܙܳܪ ܘܰܠܡܰܪܝܡ ܘܰܠܡܳܪܬܳܐ ܫܘ̣ܘܕܳܥܳܐ ܕܗܳܝ ܕܰܠܓܶܢܣܳܐ ܡܶܬܥܰܕܪܳܢܳܐ ܕܰܒܢܰܝ̈ܢܳܫܳܐ ܡܰܚܶܒ ܐܰܢ̱ܬ: ܘܕܰܒܝܰܕ ܠܳܥܳܙܳܪ ܘܡܰܪܝܰܡ ܘܡܳܪܬܳܐ ܠܳܐܕܳܡ ܘܰܠܚܰܘܳܐ ܘܰܠܐ̱ܢܳܫܘ̣ܬܳܐ ܕܶܐܙ̣ܕܟܝ̣ܘ ܡ̣ܶܢ ܒܝ̣ܫܳܐ ܐܶܬ̣ܝܬ ܠܰܡܣܰܝܳܥܘ̣: ܡܶܛܽܠ ܕܰܚܢܰܓܬܳܐ ܥܶܠ̣ܰܬ݀ ܩܕܳܡ ܡܪܰܚܡܳܢܘ̣ܬܳܟ: ܘܟܰܕ ܫܠ̣ܰܚܶܝ̈ܢ ܠܳܟ ܐܰܚ̈ܘܳܬܶܗ ܛܥܝ̣̈ܢܳܬ݀ ܕܘ̣ܡܝܳܐ ܕܚܰܘܳܐ ܘܐ̱ܢܳܫܘ̣ܬܳܐ ܕܒܰܥܒܳܪ ܦܘ̣ܩܕܳܢܳܐ: ܟܰܕ ܟܰܪܝܳܐ ܠܗܶܝܢ ܐܳܡ̇ܪ̈ܳܢ ܗ̈ܘܰܝ: ܕܗܳܐ ܗܰܘ̇ ܕܪܳܚܶܡ ܐܰܢ̱ܬ ܟܪܝ̣ܗ: ܐܰܢ̱ܬ ܕܶܝܢ ܐܳܘ ܡܪܰܚܡܳܢܳܐ ܦܽܘܢܳܝܳܐ ܡ̇ܠܶܐ̣ ܠܘ̣ܒܳܒܳܐ ܦܰܢܝ̣ܬ ܟܰܕ ܐܶܡ̣ܰܪܬ ܕܗܳܢܳܐ ܟܘܽܪܗܳܢܳܐ ܠܳܐ ܗ̱ܘܳܐ ܕܡܰܘܬܳܐ ܐܶܠܳܐ ܕܢ̣ܶܫܬܰܒܰܚ ܒܪܶܗ ܕܐ̱ܢܳܫܳܐ ܡܶܛܽܠܳܬܶܗ: ܘܟܰܕ ܨܒ̣ܰܝܬ ܕܰܬ̣ܫܰܪܰܪ ܠܬܰܠ̈ܡܝ̣ܕܰܝܟ ܐܶܡ̣ܰܪܬ: ܬܰܘ ܢ̇ܺܐܙܰܠ ܠܝ̣ܗܘ̣ܕ: ܗܶܢܽܘܢ ܕܶܝܢ ܓܠ̣ܰܘ ܠܩܶܢܛܳܐ ܕܰܒܠܶܒܰܘ̈ܳܬܗܽܘܢ ܟܰܕ ܐܳܡ̇ܪܝ̣ܢ: ܗܳܫܳܐ ܝܘ̣̈ܕܳܝܶܐ ܒܳܥܶܝܢ ܗ̱ܘܰܘ ܠܡܶܪܓܡܳܟ ܘܬܘ̣ܒ ܠܬܰܡܳܢ ܐܳܙܶܠ ܐܰܢ̱ܬ: ܐܰܢ̱ܬ ܕܶܝܢ ܦܰܢܝ̣ܬ ܕܠܳܥܳܙܳܪ ܫܟ̣ܶܒ ܠܶܗ ܐܶܠܳܐ ܐܳܙܶܠ ܐ̱ܢܳܐ ܐܰܥܝ̣ܪܝ̣ܘܗ̱ܝ: ܘܟܰܕ ܠܡܰܘܬܳܐ ܫܟܝ̣ܒܘ̣ܬܳܐ ܚܫܰܒ̣ܬ ܗܶܢܽܘܢ ܦܰܢܝ̣ܘ: ܕܶܐܢ ܕܰܡܝ̣ܟ ܡܶܬܚܠܶܡ: ܐܰܢ̱ܬ ܕܶܝܢ ܐܶܡ̣ܰܪܬ ܥܰܠ ܡܰܘܬܳܐ ܗܶܢܽܘܢ ܣܒ̣ܰܪܘ̱ ܕܥܰܠ ܡܰܕܡܟܳܐ ܕܫܶܢܬܳܐ ܐܶܡ̣ܰܪܬ: ܘܟܰܕ ܠܡܰܘܬܳܐ ܟܘܽܪܗܳܢܳܐ ܘܰܫܟܝ̣ܒܘ̣ܬܳܐ ܘܕܰܡܟܘܽܬܳܐ ܚܰܘܝ̣ܬ: ܘܗܶܢܽܘܢ ܡ̣ܶܢ ܙܰܘܥܰܬܗܽܘܢ ܠܳܐ ܐܶܬ̣ܒܰܝܰܢܘ̱: ܘܟܰܕ ܫܰܪܝ̣ܬ ܒܒܘ̣ܛܳܠܶܗ ܕܡܰܘܬܳܐ ܓܰܠܝܳܐܝ̣ܬ ܓܠ̣ܰܝܬ: ܕܠܳܥܳܙܳܪ ܡܝ̣ܬ ܠܶܗ ܘܚܳܕܶܐ ܐ̱ܢܳܐ ܕܠܳܐ ܗ̱ܘܺܝ̇ܬ ܬܰܡܳܢ ܡܶܛܽܠܳܬܟܽܘܢ ܕܰܬ̣ܗܰܝܡܢܽܘܢ: ܐܶܠܳܐ ܗܰܠܶܟܘ̱ ܠܬܰܡܳܢ ܘܡܶܛܽܠ ܕܠܰܝܬ ܗ̱ܘܳܐ ܣܰܒܪܳܐ ܕܚܰܝܰܬ ܡܝ̣̈ܬܶܐ ܐܳܦ ܠܳܐ ܐܰܦܝ̣ܣܘ̱ ܐܰܝܟ ܕܰܬ̣ܩܝ̣ܡܝ̣ܘܗ̱ܝ: ܥܰܠ ܗܳܝ ܟܰܕ ܦܶܓܥ̣ܰܬ݀ ܒܳܟ ܡܳܪܬܳܐ ܐܰܝܟ ܕܠܳܐܣܝܳܐ ܕܰܒܣܰܡ̱̈ܡܳܢܶܐ ܡܰܐܣܶܐ ܟܰܕ ܒܳܟ̇ܝܳܐ ܐܶܡ̣ܪܰܬ݀ : ܐܶܠܘ̣ ܬܢܳܢ ܗ̱ܘܰܝܬ ܚܰܢܳܢܳܐ ܐܳܚܝ̱ ܠܳܐ ܡܳܐܶܬ ܗ̱ܘܳܐ: ܒܰܝܰܐܬܳܗ̇ ܕܶܝܢ ܘܶܐܡ̣ܰܪܬ ܠܳܗ̇ ܕܩܳܐܶܡ ܐܰܚܘ̣ܟܝ̱: ܠܳܐ ܗ̱ܘܳܐ ܕܐܰܢ̱ܬ ܡܩܝ̣ܡ ܐܰܢ̱ܬ ܠܶܗ ܐܶܬ̣ܚܰܫܒܰܬ݀ ܐܶܠܳܐ ܕܰܒܢܘ̣ܚܳܡܳܐ ܩܳܐܶܡ ܒܝܰܘܡܳܐ ܐ̱ܚܪܳܝܳܐ: ܓܠ̣ܰܝܬ ܕܶܝܢ ܬܘ̣ܩܦܳܐ ܕܰܐܠܳܗܘ̣ܬܳܟ: ܘܚܰܘܝ̣ܬ ܐܳܦ ܐ̱ܢܳܫܳܝ̈ܳܬܳܟ ܗܳܢܶܝܢ ܕܨܶܒܝܳܢܳܐ ܡܕܰܒܪܳܢܳܐܝ̣ܬ ܫܰܡܠܝ̣ܬ ܚܠܳܦ ܦܘ̣ܪܩܳܢܰܢ: ܘܡܶܛܽܠ ܗܳܕܶܐ ܟܽܠܶܗ ܟܝܳܢܳܐ ܕܐܢܳܫܘ̣ܬܰܢ ܣܳܓܶܕ ܘܡܰܘܕܶܐ ܠܪܶܚܡܰܬ݀ ܐ̱ܢܳܫܘ̣ܬܳܟ: ܘܰܡܫܰܒܰܚ ܘܰܡܪܰܡܪܶܡ ܠܰܐܠܳܗܘ̣ܬܳܟ: ܟܰܕ ܡܶܬܥ̱ܰܗܰܕ ܠܛܰܝ̈ܒܘܳܬܳܟ ܕܰܣܥ̣ܰܪܬ ܥܰܡܰܢ: ܘܰܒܙܘܽܡܳܪ̈ܶܐ ܘܬܶܫ̈ܒܚܳܬܳܐ ܡܰܟܪܶܙ ܠܫܘ̣ܠܛܳܢܳܐ ܠܳܐ ܡܶܬܚܰܣܢܳܢܳܐ ܕܰܐܠܳܗܘ̣ܬܳܟ ܘܬܳܢܶܐ ܣܳܥܘ̣ܪ̈ܘܳܬܳܐ ܕܪ̈ܰܚܡܰܝܟ ܕܰܠܘܳܬܰܢ ܟܰܕ ܐܳܡܰܪ: ܝܰܘܡܳܢܳܐ ܡܳܪܝܳܐ ܚܰܘܝ̣ܬ ܦܘ̣ܪܩܳܢܳܐ ܕܝ̣ܠܳܟ ܘܰܠܥܝ̣ܢ ܥܰܡ̱̈ܡܶܐ ܐܰܕܢܰܚ̣ܬ ܙܰܕܝ̣ܩܘ̣ܬܳܟ: ܝܰܘܡܳܢܳܐ ܐܶܬܥ̣ܰܙܰܙܬ ܒܪܘ̣ܚܳܟ ܐܰܢ̱ܬ ܕܰܡܥܰܠܰܝ ܡ̣ܶܢ ܚܰܫ̈ܶܐ ܥܳܪ̈ܨܳܝܶܐ ܘܟܰܪܝܘ̣ܬܳܐ ܘܥܳܩܬܳܐ: ܟܰܕ ܚ̣ܙܰܝܬ ܠܓܶܢܣܳܐ ܐ̱ܢܳܫܳܝܳܐ ܕܒܰܦܣܳܩܣܰܒܪܳܐ ܐܶܬ̣ܥܰܒܕܰܕ ܠܡܰܘܬܳܐ ܛܪܽܘܢܳܐ: ܝܰܘܡܳܢܳܐ ܡܕܰܒܪܳܢܳܐܝ̣ܬ ܐܰܝܟ ܠܳܐ ܝܳܕܘ̣ܥܳܐ ܫܰܐܶܠ̣ܬ ܕܰܐܝܟܳܐ ܣܳܡ̣ܬܽܘܢܳܝܗ̱ܝ ܐܰܝܟܰܢܳܐ ܕܗ̣ܶܢܽܘܢ ܢ̣ܶܫܬܰܘܕܥܽܘܢ ܘܢ̣ܺܐܡܪܽܘܢ ܕܰܐܪܒܥܳܐ ܠܶܗ ܓܶܝܪ ܝܰܘ̈ܡܝ̣ܢ ܘܰܕܡ̣ܶܢ ܟܰܕܘ̣ ܣܪܝ̣ ܠܶܗ: ܘܕܰܡܢܰܚܡܳܢܳܐ ܐܝ̣ܬܰܝܟ ܝܰܘܡܳܢܳܐ ܡܕܰܒܪܳܢܳܐܝ̣ܬ: ܐܳܬܝ̈ܳܢ ܗ̱ܘܰܝ̈ ܕܶܡ̈ܥܰܝܟ ܥܰܠ ܦܣܳܩܣܰܒܪܳܐ ܕܰܐܚܝ̣ܕܳܐ ܗ̱ܘܳܬ݀ ܒܶܗ ܟܽܠܳܗ̇ ܐ̱ܢܳܫܘ̣ܬܳܐ: ܘܰܕܠܰܝܬ ܗ̱ܘܳܐ ܠܶܗ ܒܘ̣ܝܳܐܳܐ ܕܥܰܠ ܚܰܝܰܬ݀ ܡܝ̣̈ܬܶܐ ܘܰܕܠܳܐ ܝܳܕܥܳܐ ܗ̱ܘܳܬ݀ ܠܳܗ̇: ܝܰܘܡܳܢܳܐ ܝܘ̣̈ܕܳܝܶܐ ܒܥܶܠ̈ܕܒܳܒܰܘܗ̱ܝ ܕܰܐܠܳܗܳܐ ܥܰܡ ܐܰܒܘ̣ܗܽܘܢ ܐܳܟܶܠܩܰܪܨܳܐ ܡ̈ܶܠܶܐ ܕܰܪܛܘܽܢܝܳܐ ܡܰܫܡܥܝ̣ܢ ܗ̱ܘܰܘ: ܕܠܳܐ ܡܶܫܟܰܚ ܗܳܢܳܐ ܕܦ̣ܰܬܰܚ ܥܰܝ̈ܢܰܘܗ̱ܝ ܕܗܰܘ̇ ܣܰܡܝܳܐ ܕܢ̣ܶܥܒܶܕ ܕܠܳܐ ܢ̣ܡܘ̣ܬ ܗܳܢܳܐ: ܝܰܘܡܳܢܳܐ ܩܰܒܪܳܐ ܕܡܳܝ̈ܘ̣ܬܶܐ ܕܰܒܫܘ̣ܥܳܐ ܐܰܛܝ̣ܡܳܐ ܡܚܰܣܰܢ ܗ̱ܘܳܐ: ܘܳܐܦ ܬܰܪܥܶܗ ܒܟܺܐܦܳܐ ܝܰܩܝ̣ܪܬܳܐ ܒܓܝ̣ܪ ܗ̱ܘܳܐ: ܫܘ̣ܘܕܳܥܳܐ ܠܰܡ ܕܰܦܣܳܩ ܣܰܒܪܳܐ ܕܠܳܐ ܣܳܟ ܢܳܦܩܝ̣ܢ ܡܶܢܶܗ: ܝܰܘܡܳܢܳܐ ܦܰܩ̣ܶܕܬ ܠܰܙܡܝ̣̈ܢܰܝ ܫܝܘ̣ܠ ܕܗܶܢܽܘܢ ܒܺܐܝ̈ܕܰܝܗܽܘܢ ܢ̣ܶܦܬܚܽܘܢ ܬܰܪܥܳܐ ܐܰܚܝ̣ܕܳܐ ܕܰܐܒܕܳܢܳܐ: ܘܣܘ̣ܟܪ̈ܶܐ ܘܡܘ̣ܟ̈ܠܶܐ ܠܳܐ ܡܶܬܚܰܣ̈ܢܳܢܶܐ ܕܗܰܘܬܳܐ ܕܰܩܒܝ̣ܪ̈ܶܐ ܫܝܘ̣ܠ ܒܳܠܰܥܬܳܐ ܢܓܰܕܡܽܘܢ: ܝܰܘܡܳܢܳܐ ܫܘ̣ܥܳܐ ܠܳܐ ܡܶܬܥܰܓܠܳܢܳܐ ܘܬܰܪ̈ܥܶܐ ܘܣܘ̣ܟܪ̈ܶܐ ܐܰܚܝ̣̈ܕܶܐ ܕܡ̣ܶܢ ܥܳܠܰܡ ܐܶܬ̣ܦܰܬܰܚܘ̱ ܘܫܘ̣ܠܛܳܢܶܗ ܕܡܰܘܬܳܐ ܐܶܬ̣ܒܰܛܰܠ: ܝܰܘܡܳܢܳܐ ܐܰܙܥܶܩ̣ܬ ܒܩܳܠܳܐ ܪܳܡܳܐ ܘܶܐܡ̣ܰܪܬ: ܠܳܥܳܙܳܪ ܬܳܐ ܠܒܰܪ ܘܰܢܦ̣ܰܩ ܗܰܘ̇ ܡܝ̣ܬܳܐ ܟܰܕ ܐܰܣܝ̣ܪ̈ܳܢ ܐܝ̣̈ܕܰܘܗ̱ܝ ܘܪ̈ܶܓܠܰܘܗ̱ܝ: ܘܰܡܚܰܙܰܩ ܒܦܳܣܶܩ̈ܝܳܬܳܐ ܘܰܡܟܰܪܰܟ ܒܰܟܪ̈ܳܟܶܐ ܘܰܚ̈ܝܳܨܶܐ ܘܰܡܗܰܠܶܟ: ܝܰܘܡܳܢܳܐ ܢܶܦ̣ܠܰܬ݀ ܪܗܳܒܬܳܐ ܒܰܫܝܘ̣ܠ ܘܰܪܥ̣ܶܠ ܡܰܘܬܳܐ ܘܙ̣ܳܥ ܐܰܒܕܳܢܳܐ: ܘܟܽܠܗܽܘܢ ܡܝ̣̈ܬܶܐ ܐܶܠܘ̣ ܚܰܝܠܶܗ ܕܰܐܠܳܗܳܐ ܠܳܐ ܬܰܗܝ̣ ܐܶܢܽܘܢ: ܥܰܕ ܩܰܠܝ̣ܠ ܟܽܠܗܽܘܢ ܣܳܘܚܝ̣ܢ ܗ̱ܘܰܘ ܠܩܳܠܳܐ: ܝܰܘܡܳܢܳܐ ܐܳܕܳܡ ܘܚܰܘܳܐ ܣܰܒܪܳܐ ܘܚܰܕܘ̣ܬܳܐ ܐܶܬ̣ܡܠܝ̣ܘ: ܟܰܕ ܫܡ̣ܰܥܘ̱ ܚܠܳܦ ܗܰܘ̇ ܩܳܠܳܐ ܕܰܓ̣ܙܰܪ ܥܠܰܝܗܽܘܢ ܡܰܘܬܳܐ: ܩܳܠܳܐ ܕܩܳܪܶܐ ܠܡܝ̣̈ܬܶܐ ܕܰܥܓܝ̣ܢܝ̣ܢ ܒܩܰܒܪ̈ܶܐ ܘܩܳܝܡܝ̣ܢ: ܝܰܘܡܳܢܳܐ ܥܺܕܬܳܟ ܡܗܰܝܡܰܢܬܳܐ ܦܪܝ̣ܩܰܬ݀ ܒܰܨܠܝ̣ܒܳܟ ܡܰܘܕܝܳܐ ܠܰܚܢܳܢܳܟ ܘܣܳܓ̇ܕܳܐ ܠܡܳܪܘ̣ܬܳܟ ܕܰܫ̣ܪܰܝܬ ܡ̣ܶܢ ܝܰܠ̈ܕܶܝܗ̇ ܓܙܳܪ ܕܝ̣ܢܳܐ ܕܡܰܘܬܳܐ ܘܕܰܦܣܳܩ ܣܰܒܪܳܐ: ܕܒܰܥܒܳܪ ܦܘ̣ܩܕܳܢܶܗ ܕܳܐܕܳܡ ܐܰܡܠ̣ܶܟ ܥܠܰܝܗܽܘܢ: ܘܰܠܒܝ̣ܒܘ̣ܬܳܐ ܡܠ̣ܰܝܬ ܐܶܢܽܘܢ ܒܣܰܒܪܳܐ ܕܰܕܢܰܚ̣ ܠܗܽܘܢ ܕܚܰܘܝ̣ܬܳܝܗ̱ܝ ܠܡܰܘܬܳܐ ܫܶܢܬܳܐ: ܘܫܳܐܠܳܐ ܡ̣ܶܢ ܡܪܰܚܡܳܢܘ̣ܬܳܟ ܫܰܝܢܳܐ ܐܰܡܝ̣ܢܳܐ ܘܰܫܠܳܡܳܐ ܟܰܗܝ̣ܢܳܐ ܠܰܒ̈ܢܶܝܗ̇: ܥܝ̣ܪܘ̣ܬܳܐ ܘܰܙܗܝ̣ܪܘ̣ܬܳܐ ܠܥܰܠ̈ܠܳܢܶܝܗ̇: ܚܕܳܝܘ̣ܬܳܐ ܘܰܐܘܝܘ̣ܬܳܐ ܠܟܶܢ̈ܫܶܝܗ: ܡܫܰܪܬܚܘ̣ܬܳܐ ܘܣܰܒܥܘ̣ܬܳܐ ܠܡܶܣ̈ܟܺܢܶܝܗ̇: ܪܘܳܚܬܳܐ ܠܰܐܠܝ̣̈ܨܶܐ: ܒܘ̣ܝܳܐܳܐ ܠܰܡ̈ܥܳܩܶܝܗ̇ ܠܘ̣ܒܳܒܳܐ ܠܰܡܛܰܪ̈ܦܶܐ: ܫܪܳܝܳܐ ܠܰܐܣܝ̣ܪ̈ܶܐ: ܦܽܘܢܳܝܳܐ ܠܪ̈ܰܚܝ̣ܩܶܐ: ܢܘ̣ܛܳܪܳܐ ܠܩܰܪ̈ܝ̣ܒܶܐ: ܘܫܘ̣ܒܩܳܢܳܐ ܕܰܚ̈ܛܳܗܶܐ ܠܚܰܛܳܝ̈ܶܐ: ܥ̱ܘ̣ܗܕܳܢܳܐ ܛܳܒܳܐ ܘܰܢܝܳܚܬܳܐ ܠܥܰܢܝ̣̈ܕܶܐ: ܐܰܝܟܰܢܳܐ ܕܰܕܠܳܐ ܫܶܠܝܳܐ ܬ̣ܫܰܒܰܚ ܠܰܡܪܰܚܡܳܢܘ̣ܬܳܟ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܐܰܠܳܗܳܐ ܗܰܘ̇ ܕܨܳܒܶܐ ܒܪ̈ܰܚܡܶܐ ܘܪܶܚܡܰܬ݀ ܐ̱ܢܳܫܘ̣ܬܳܐ: ܘܰܒܛܝ̣ܠ ܠܶܗ ܐܰܡܝ̣ܢܳܐܝ̣ܬ ܥܰܠ ܦܘ̣ܪܩܳܢܳܐ ܕܰܓܒܝ̣ܠܬܶܗ ܩܰܒܶܠܳܝܗ̱ܝ ܠܦܝ̣ܪܡܳܐ ܗܳܢܳܐ ܕܩܰܪܶܒ̣ܢܰܢ ܩܕܳܡܰܝܟ ܒܝܰܘܡܳܐ ܗܳܢܳܐ ܕܢܘ̣ܚܳܡܶܗ ܕܠܳܥܳܙܳܪ: ܘܶܐܬܪܰܥܳܐ ܒܶܗ ܥܰܠ ܥܰܡܳܟ ܕܰܡܣܰܟܶܐ ܠܰܚܢܳܢܳܟ: ܘܰܐܢܝ̣ܚ ܒܶܗ ܠܟܽܠܗܽܘܢ ܥܰܢܝ̣̈ܕܶܐ ܡܗܰܝ̈ܡܢܶܐ ܕܰܫܟ̣ܶܒܘ̱ ܘܶܐܬ̣ܬܢܝ̣ܚܘ̱ ܥܰܠ ܣܰܒܪܳܟ ܡܳܪܰܢ ܘܰܐܳܠܗܰܢ ܠܥܳܠܡܝ̣ܢ܀