ܦܪܽܘ̣ܡܝܽܘܢ

ܬܶܫܒܘ̣ܚܬܳܐ ܠܗܰܘ̇ ܡܫܰܟܢܳܢܳܐ ܘܝܳܗܘ̣ܒܳܐ ܕܥܺܐܕ̈ܶܐ: ܕܰܗ̣ܘܳܐ ܣܳܟܳܐ ܘܫܘ̣ܡܠܳܝܳܐ ܕܥܰܕܥܺܐܕ̈ܶܐ: ܠܗܰܘ̇ ܕܰܒܫܝ̣̈ܫܠܳܬܳܐ ܕܰܢܒܺܝܘ̣ܬܳܐ ܠܥܰܕܥ̈ܺܐܕܰܘܗ̱ܝ ܐܳܣܰܪ ܥܕܰܡܳܐ ܠܩܰܪ̈ܢܳܬܳܐ ܕܡܰܕܒܚܶܗ: ܗܰܘ̇ ܕܒܶܗ ܣܳܟܳܐ ܗ̣ܘܳܐ ܠܟܽܠܗܽܘܢ ܥܺܐܕ̈ܶܐ: ܟܰܕ ܨܒ̣ܳܐ ܘܰܗ̣ܘܳܐ ܥܰܕܥܺܐܕܳܐ ܕܥܰܕܥܺܐܕ̈ܶܐ: ܕܠܶܗ ܝܳܐܶܐ ܫܘ̣ܒܚܳܐ ܘܐܝ̣ܩܳܪܳܐ ܒܗܳܢܳܐ ܥܶܕܳܢܳܐ ܕܦܶܠܓܶܗ ܕܝܰܘܡܳܐ: ܘܰܒܟܽܠܗܽܘܢ ܥܺܐܕ̈ܶܐ ܘܥܶܕܳܢܶܐ ܘܫܳܥ̈ܶܐ ܘܙܰܒܢ̈ܶܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܫܺܝ̣ܚܳܐ ܥܶܠܰܬ݀ ܟܽܠ ܥܺܐܕܝ̣̈ܢ ܘܫܘ̣ܟܠܳܠ ܟܽܠ ܥܰܕܥܺܐܕܝ̣̈ܢ: ܘܐܰܠܳܗ ܟܽܠ ܐܰܠܳܗܝ̣̈ܢ: ܘܡܳܪܳܐ ܕܟܽܠ ܡܳܪ̈ܰܘܳܢ: ܗܰܘ̇ ܕܟܰܕ ܠܗܰܘ̇ ܕܡܶܢܳܟ ܐܶܬ̣ܒܪܝ̣ ܗ̱ܘܳܐ ܠܰܡܥܰܕܥܳܕܘ̣ ܠܳܟ ܒܰܥܕܶܝܢ ܣܳܡ̣ܬ: ܕܡܶܢܳܗ̇ ܡ̣ܶܢ ܗܳܕܶܐ ܒܝܰܕ ܚܛܝ̣ܬܳܐ ܐܶܬ̣ܓܠܶܙ ܒܝܰܕ ܫܚܝ̣ܡܘ̣ܬܳܐ ܗܳܝ̇ ܕܡܰܥܒܕܳܐ ܡ̣ܶܢ ܟܽܠ ܡܰܥܒܕܳܢܘ̣ܬܳܐ ܒܝܰܕ ܡܶܠܟܶܗ ܕܚܶܘܝܳܐ ܐܶܬ̣ܬܰܚܬܝ̣: ܐܰܢ̱ܬ ܕܶܝܢ ܛܳܒܳܐ ܟܰܕ ܠܗܳܢܳܐ ܐܰܒܕܳܢܳܐ ܠܳܐ ܣܰܝܒ̣ܰܪܬ ܡܶܬܒܰܪܢܫܳܢܘ̣ܬܳܐ ܐܰܝܟ ܕܠܳܐܣܝܘ̣ܬܳܐ ܦܰܪܢܶܣ̣ܬ: ܘܰܡܕܰܒܪܳܢܘ̣ܬܳܐ ܘܥܰܕܥܺܐܕ̈ܶܐ ܡܰܠ̈ܝܰܝ ܥܘ̣ܕܪ̈ܳܢܶܐ ܣܳܡ̣ܬ ܠܰܢ: ܗܳܢܽܘܢ ܕܟܰܕ ܠܗܽܘܢ ܒܝܰܕ ܛܰܝܒܘ̣ܬܳܐ ܠܰܡܥܰܕܥܳܕܘ̣ ܐܶܫ̣ܬܘܝ̣ܢܰܢ: ܝܰܘܡܳܢܳܐ ܠܥܰܕܥܺܐܕܳܐ ܗܳܢܳܐ ܕܒܶܗ ܬܪܶܝܢ ܦܶܨܚܝ̣̈ܢ ܬܡܝ̣ܗܳܐܝ̣ܬ ܐܶܫ̣ܬܰܡܰܫܘ̱ ܠܰܡ̣ܚܰܓܳܝܘ̣ ܩܰܒܶܠ̣ܢܰܢ: ܗܳܢܳܐ ܕܟܰܕ ܒܐ̱ܪ̈ܳܙܰܘܗ̱ܝ ܐܰܠܳܗ̈ܳܝܶܐ ܠܡܶܬ̣ܒܰܩܳܝܘ̣ ܐܶܬ̣ܝܢܰܢ: ܬܶܗܪܳܐ ܕܶܝܢ ܘܕܘ̣ܡܳܪܳܐ ܐܶܬ̣ܡܠܝ̣ܢܰܢ: ܗܳܢܳܐ ܕܒܶܗ ܥܰܡܳܐ ܒܡܶܨܪܶܝܢ ܡ̣ܶܢ ܥܰܒܕܘ̣ܬܳܐ ܐܶܬ̣ܚܰܪܰܪ ܘܰܠܦܘ̣ܪܩܳܢܳܐ ܕܝ̣ܠܰܢ ܡܰܐܪܶܙ ܗ̣ܘܳܐ: ܗܳܢܳܐ ܕܒܶܗ ܐܶܡܪܳܐ ܡܶܬܶܐܟܶܠ ܗ̣ܘܳܐ ܟܰܕ ܓܰܪܡܳܐ ܠܳܐ ܡܶܬ̣ܬܒܰܪ ܒܶܗ: ܘܰܠܨܰܦܪܳܐ ܡܶܢܶܗ ܠܳܐ ܡܶܫ̣ܬܒܶܩ ܗ̣ܘܳܐ ܘܨܘ̣ܪܬܳܐ ܡܫܰܡܠܰܝܬܳܐ ܕܗܳܢܳܐ ܕܝ̣ܠܰܢ ܨܳܐܰܪ ܗ̣ܘܳܐ: ܗܳܢܳܐ ܕܒܶܗ ܦܪ̈ܘ̣ܣܬܕܶܐ ܒܰܕܡܳܐ ܐܶܡܪܳܝܳܐ ܡܶܬ̣ܡܰܫܚܝ̣ܢ ܗ̱ܘܰܘ ܡܚܰܒܠܳܢܳܐ ܡܶܢܗܽܘܢ ܡܶܙܕܓܰܪ ܗ̱ܘܳܐ: ܗܳܢܳܐ ܕܒܶܗ ܚܰܨ̈ܶܐ ܕܗܳܢܽܘܢ ܡܶܬ̣ܚܰܙܩܝ̣ܢ ܐܰܣܝ̣ܪܝ̣ܢ ܘܚܘ̣ܛܪ̈ܶܐ ܒܐܝ̣ܕܰܝ̈ܗܽܘܢ ܡܶܬ̣ܠܰܒܟܝ̣ܢ: ܗܳܢܳܐ ܕܒܘ̣ܟܪ̈ܶܐ ܕܣܰܩܘ̣̈ܒܠܳܝܶܐ ܒܶܗ ܡܶܬ̣ܩܰܛܠܝ̣ܢ ܘܰܒܢܰܝ̈ ܥܺܕܬܳܐ ܡܶܫ̣ܬܰܘܙܒܝ̣ܢ: ܗܳܢܳܐ ܕܒܶܗ ܡܶܨܪܶܝܢ ܡܶܬ̣ܚܰܠܨܳܐ ܘܰܒܙܝ̣ܙܘ̣ܬܳܐ ܕܛܘ̣ܥܝܰܝ ܡܰܐܪܙܳܐ: ܗܳܢܳܐ ܕܒܶܗ ܝܰܡܳܐ ܡܶܬ̣ܦܠܶܓ ܘܝܰܒܝ̣ܫܘ̣ܬܳܐ ܕܪܰܛܝ̣ܒܘ̣ܬܳܐ ܕܰܪ̈ܓܝ̣ܓܳܬܳܐ ܕܝ̣ܠܰܢ ܡܒܰܕܶܩ: ܗܳܢܳܐ ܕܒܶܗ ܐܝ̣ܣܪܳܐܝܶܠ ܡܶܬ̣ܓܰܝܰܐܐ ܘܥܰܠ ܓܰܐܝܘ̣ܬܳܐ ܕܰܡܗܰܝ̈ܡܢܶܐ ܕܒܰܐܠܳܗܳܐ ܡܰܟ̇ܪܶܙ: ܗܳܢܳܐ ܕܒܶܗ ܡܰܪܝܰܡ ܡܥܰܢܝܳܐ ܟܰܕ ܢܳܩ̇ܫܳܐ ܒܰܦܠ̈ܰܓܶܐ ܘܥܰܠ ܥܺܕܬܳܐ ܡܰܘܕܥܳܐ ܕܰܡܙܰܡܪܳܐ ܪܘ̣ܚܳܢܳܐܝ̣ܬ: ܗܳܢܳܐ ܕܡܶܢܶܗ ܟܰܕ ܠܘܳܬ ܚ̣ܰܕܬܳܐ ܕܰܒܥܶܠܝ̣ܬܳܐ ܥܳܒ̇ܪܝ̣ܢܰܢ ܫܠܝ̣ܚܳܐܝ̣ܬ ܡܫܰܒܚܝ̣ܢܰܢ ܘܥܰܠ ܦܳܬܘ̣ܪ ܚܰܝ̈ܶܐ ܥܰܡܳܟ ܒܛܰܝܒܘ̣ܬܳܐ ܛܳܒܬܳܐ ܡܶܬ̣ܒܰܣܡܝ̣ܢܰܢ: ܟܰܕ ܠܰܘ ܦܰܛܝ̣ܪܳܐ ܐܳܟ̇ܠܝ̣ܢܰܢ ܐܶܠܳܐ ܦܰܓܪܳܟ ܩܰܕܝ̣ܫܳܐ ܘܰܕܡܳܟ ܐܰܠܳܗܳܝܳܐ ܢܳܣ̇ܒܝ̣ܢܰܢ ܘܡܶܬ̣ܒܰܣܡܝ̣ܢܰܢ: ܘܒܰܕܓܽܘܢ ܡܦܝ̣ܣܝ̣ܢܰܢ ܘܡܶܬܟܰܫܦܝ̣ܢܰܢ ܠܳܟ ܡܳܪܝܳܐ ܐܰܠܳܗܳܐ: ܗܰܘ̇ ܕܰܠܥܺܐܕܳܐ ܗܳܢܳܐ ܡܥܰܠܝܳܐ ܘܐܰܠܳܗܳܝܳܐ ܡܰܢܰܥ̣ܬ ܠܰܢ: ܘܠܳܐ ܬܰܣ̣ܠܶܐ ܠܰܨ̈ܠܰܘܳܬܳܐ ܗܳܠܶܝܢ ܕܡܶܢܰܢ ܠܳܟ ܡܶܬ̣ܩܰܪ̈ܒܳܢ ܐܶܠܳܐ ܘܟܰܕ ܡܩܰܒܠܳܢܳܐ ܠܗܶܝܢ ܗܳܘܶܐ ܐܰܢ̱ܬ: ܥܒܶܕ ܕܢܶܗ̣ܘܶܐ ܠܰܢ ܥܰܕܥܺܐܕܳܐ ܗܳܢܳܐ ܡܡܰܠܝܳܢܳܐ ܕܚܰܣܝ̣ܪ̈ܳܬܳܐ: ܥܰܕܥܺܐܕܳܐ ܡܰܢ ܕܰܒܩܰܕܝ̣ܫܘ̣ܬܶܗ ܡܚܰܣܶܐ ܘܰܡܩܰܕܶܫ ܠܚܰܛܳܝ̈ܶܐ: ܥܰܕܥܺܐܕܳܐ ܕܰܡܕܰܟܶܐ ܠܰܡ̈ܟܰܬܡܶܐ: ܥܰܕܥܺܐܕܳܐ ܕܰܡܙܰܕܶܩ ܠܚܰܝ̈ܳܒܶܐ: ܥܰܕܥܺܐܕܳܐ ܕܡܰܚ̇ܠܶܡ ܠܡܰܪ̈ܥܶܐ: ܥܰܕܥܺܐܕܳܐ ܕܡܰܪܘܰܚ ܠܰܡܛܰܪ̈ܦܶܐ: ܥܰܕܥܺܐܕܳܐ ܕܰܡܟܰܢܶܫ ܠܰܡܒܰܕܪ̈ܶܐ: ܥܰܕܥܺܐܕܳܐ ܕܰܡܩܰܪܶܒ ܠܪ̈ܰܚܝ̣ܩܶܐ: ܥܰܕܥܺܐܕܳܐ ܕܰܡܢܰܛܰܪ ܠܩܰܪ̈ܝ̣ܒܶܐ: ܥܰܕܥܺܐܕܳܐ ܕܰܡܪܰܝܰܚ ܠܰܩܪ̈ܳܒܶܐ: ܥܰܕܥܺܐܕܳܐ ܕܡܰܕܥܶܟ ܠܚܶܪ̈ܝܳܢܶܐ: ܥܰܕܥܺܐܕܳܐ ܕܰܡܒܰܛܶܠ ܠܟܶܫ̈ܠܶܐ: ܥܰܕܥܺܐܕܳܐ ܕܰܡܢܝ̣ܚ ܠܬܰܟܬܘ̣̈ܫܶܐ: ܥܰܕܥܺܐܕܳܐ ܕܡܰܥܒܰܪ ܠܡܰܪ̈ܕܘܳܬܳܐ: ܥܰܕܥܺܐܕܳܐ ܕܰܡܬܰܗܶܐ ܠܪܘ̣ܓܙܳܐ: ܥܰܕܥܺܐܕܳܐ ܕܡܰܟ̇ܪܶܙ ܫܰܝܢܳܐ: ܥܰܕܥܺܐܕܳܐ ܕܰܡܣܰܒܰܪ ܫܠܳܡܳܐ: ܥܰܕܥܺܐܕܳܐ ܕܰܛܥܝ̣ܢ ܚܕ̈ܘܳܬܳܐ: ܥܰܕܥܺܐܕܳܐ ܕܰܡܒܰܕܶܩ ܦܨܝ̣ܚܘ̣ܬܳܐ: ܥܰܕܥܺܐܕܳܐ ܕܙܳܪܰܥ ܐܰܘܝܘ̣ܬܳܐ: ܥܰܕܥܺܐܕܳܐ ܕܐܳܣܰܪ ܒܚܘ̣ܒܳܐ: ܥܰܕܥܺܐܕܳܐ ܕܠܰܢ ܘܰܠܥܰܢܝ̣̈ܕܰܝܢ ܡܗܰܝ̈ܡܢܶܐ ܡܙܰܡܶܢ ܠܗܰܘ̇ ܥܺܐܕܳܐ ܠܳܐ ܡܶܫܬܰܪܝܳܢܳܐ ܘܠܳܐ ܡܰܘܦܝܳܢܳܐ ܘܠܳܐ ܡܶܬ̣ܡܰܠܠܳܢܳܐ ܘܠܳܐ ܡܶܬܟܝ̣ܠܳܢܳܐ: ܘܗܳܪܟܳܐ ܘܬܰܡܳܢ ܚܢܰܢ ܘܗ̣ܶܢܽܘܢ ܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܠܐܪܳܙܳܟ ܡܳܪܝ̱ ܛܰܦ̣ܶܣ ܐܝ̣ܣܚܳܩ ܒܰܥܠܳܬܶܗ: ܘܠܶܗ ܣ̣ܘܰܚ ܐܰܒܪܳܗܳܡ ܕܢ̣ܶܚܙܶܐ ܝܰܘܡܶܗ: ܘܠܶܗ ܨܳܪ ܡܽܘ̣ܫܶܐ ܒܶܐܡܪܶܗ: ܘܒܰܕܡܘ̣ܬܶܗ ܐܶܫܰܬ̣ܘܙܰܒ ܥܰܡܳܐ ܡ̣ܶܢ ܡܰܘܬܳܐ ܡܚܰܒܠܳܢܳܐ: ܘܠܶܗ ܐܰܟ̣ܪܶܙ ܐܶܫܰܥܝܳܐ ܟܰܕ ܐܳܡܰܪ ܒܰܢܒܺܝܘ̣ܬܶܗ: ܕܐ̱ܪܳܙ ܠܝ̣ ܐ̱ܪܳܙ ܠܝ̣ ܘܠܰܒܢܰܝ̈ ܒܰܝܬܝ̱: ܘܠܰܢ ܡܳܪܝ̱ ܕܒܰܝ̈ܬܳܝܶܐ ܥܒ̣ܰܕܬ ܠܰܢ ܒܐ̱ܪ̈ܳܙܰܝܟ ܘܫܰܘ̈ܬܳܦܶܐ ܕܦܰܓܪܳܟ ܘܰܕܡܳܟ ܗ̣ܘܰܝܢܰܢ: ܘܰܒܡܰܘܬܳܟ ܡܰܥܒܶܕ ܚ̈ܝܶܐ ܥܡ̣ܰܕܢܰܢ ܘܡܰܠܟܘ̣ܬܳܟ ܐܶܫܰܬ̣ܘܕܝ̣ܬ ܠܰܢ: ܐܰܫܘܳܐ ܠܰܢ ܕܢ̇ܶܛܰܪ ܓܘ̣̈ܥܠܳܢܰܝܟ ܘܢܶܗ̇ܘܶܐ ܫܳܡܘ̣̈ܥܶܐ ܕܦܘ̣̈ܩܕܳܢܰܝܟ: ܘܓܳܡܘ̣ܪ̈ܶܐ ܕܨܶܒܝܳܢܳܟ: ܘܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ: ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀