ܦܪܽܘ̣ܡܝܽܘܢ

ܠܳܟ ܫܽܘ̣ܒܚܳܐ ܘܠܳܟ ܬܰܘܕܝ̣ܬܳܐ ܐ̱ܪܳܙܳܐ ܕܚܰܝ̈ܶܐ: ܕܐ̱ܪ̈ܳܙܶܐ ܕܚܝ̣̈ܠܶܐ ܐܰܫܠܶܡ̣ܬ ܠܡܰܪܥܝ̣ܬܳܟ: ܘܕܺܝܰܬܝ̣ܩܝ̣ ܚ̇ܕܰܬܳܐ ܟܬܰܒ̣ܬ ܒܰܕܡܳܟ ܘܐܰܓܥܶܠ̣ܬ ܠܥܺܕܬܳܐ ܡܟܝ̣ܪܬܳܟ: ܦܰܓܪܳܟ ܡܰܥܒܶܕ ܚܰܝ̈ܶܐ ܝܰܗ̣ܒܬ ܐܘ̣ܟܠܳܐ ܠܥܳܢ̈ܳܟ: ܘܰܕܡܳܟ ܡܰܚܝܳܢܳܐ ܥܒ̣ܰܕܬ ܫܶܩܝܳܐ ܠܰܓܙܳܪܳܟ: ܘܛܘ̣ܦܣܳܐ ܕܡܘ̣ܟܳܟܳܐ ܨܶܒܝܳܢܳܝܳܐ ܚܰܘܝ̣ܬ ܠܓܘ̣ܕܳܐ ܪܚܝ̣ܡܬܳܐ ܕܰܬܪܶܥܣܰܪܬܳܟ: ܘܫܰܡܠܝ̣ܬ ܠܥܰܬܝ̣̈ܩܳܬܳܐ ܒܝܰܕ ܐܶܡܪܳܐ ܗܰܘ̇ ܕܠܳܟ ܡܽܘ̣ܫܶܐ ܪܳܫܶܡ ܗ̣ܘܳܐ: ܫܰܪܝ̣ܬ ܒܚܰܕ̈ܬܳܬܳܐ ܒܝܰܕ ܩܨܳܝܳܐ ܕܦܰܓܪܳܟ ܩܰܕܝ̣ܫܳܐ ܐܰܝܟܰܢܳܐ ܕܐܳܦ ܚܢܰܢ ܟܰܕ ܡܶܬܒܰܣܡܝ̣ܢܰܢ ܒܐ̱ܪܳܙܳܟ ܗܰܘ̇ ܫܡܰܝܳܢܳܐ: ܘܚܳܕܶܝܢܰܢ ܒܦܶܨܚܳܟ ܗܰܘ̇ ܦܨܝ̣ܚܳܐ: ܘܢ̇ܰܣܶܩ ܠܳܟ ܫܘ̣ܒܚܳܐ ܘܬܰܘܕܝ̣ܬܳܐ: ܒܗܳܢܳܐ ܥܶܕܳܢܳܐ ܕܰܬܫܰܥܫܳܥܝ̣̈ܢ ܘܰܒܟܽܠܗܽܘܢ ܥܺܐܕ̈ܶܐ ܘܥܶܕ̈ܳܢܶܐ ܘܫܳܥ̈ܶܐ ܘܙܰܒܢ̈ܶܐ ܘܟܽܠܗܽܘܢ ܝܰܘ̈ܡܳܬܳܐ ܕܚܰܝܰܝ̈ܢ ܠܥܳܠܡܝ̣ܢ܀

ܣܶܕܪܳܐ

ܡܫܺܝ̣ܚܳܐ ܐܰܠܳܗܳܐ ܕܝ̣ܠܰܢ ܗܰܘ̇ ܦܶܨܚܳܐ ܦܨܝ̣ܚܳܐ ܕܡܰܥܒܪܳܢܳܐ ܕܥܳܩ̈ܳܬܳܐ: ܗܰܘ̇ ܐ̱ܪܳܙܳܐ ܕܚܰܝ̈ܶܐ ܘܕܰܫܪܳܪܳܐ: ܗܰܘ̇ ܕܰܒܝܰܕ ܡܽܘ̣ܫܶܐ ܢܒܺܝܳܐ ܒܡܶܨܪܶܝܢ ܐܶܬ̣ܬܨܝ̣ܪ ܘܐܶܬܛܰܦ̣ܰܣ ܒܶܐܡܪܳܐ ܗܰܘ̇ ܕܒܶܝܬ ܪ̈ܰܡܫܶܐ ܡܶܬܢܟܶܣ ܗ̱ܘܳܐ ܘܰܕܡܶܗ ܥܰܠ ܬܰܪܥܳܐ ܡܶܬ̣ܪܣܶܣ ܗ̱ܘܳܐ: ܘܒܶܗ ܥܰܡܳܐ ܡ̣ܶܢ ܡܚܰܒܠܳܢܳܐ ܡܶܬ̣ܦܰܨܶܐ ܗ̱ܘܳܐ ܘܡ̣ܶܢ ܡܰܘܬܳܢܳܐ ܡܶܫ̣ܬܰܘܙܰܒ ܗ̱ܘܳܐ: ܠܳܐ ܓܶܝܪ ܡܶܫܟܰܚ ܗ̱ܘܳܐ ܐܶܡܪܳܐ ܗܰܘ̇ ܕܰܒܝܰܕ ܡܽܘܫܶܐ ܕܢܶܗ̣ܘܶܐ ܒܶܗ ܦܘ̣ܪܩܳܢܳܐ ܠܥܰܡܳܐ: ܐܶܠܘ̣ܠܳܐ ܕܒܳܟ ܕܐܝ̣ܬܰܝܟ ܐܶܡܪܶܗ ܚܰܝܳܐ ܕܐܰܠܳܗܳܐ ܗܰܘ̇ ܕܫܳܩܶܠ ܚܛܝ̣ܬܶܗ ܕܥܳܠܡܳܐ ܩܰܕܶܡ ܨܳܪ ܗ̱ܘܳܐ: ܐܰܢ̱ܬ ܕܶܝܢ ܟܰܕ ܠܛܘ̣ܦܣܳܐ ܗܳܢܳܐ ܫܰܡܠܝ̣ܬ ܘܰܠܛܶܠܳܠܳܐ ܕܥܰܬܝ̣̈ܩܳܬܳܐ ܐܰܥܒ̣ܰܪܬ: ܘܰܠܢܳܡܘ̣ܣܳܐ ܐܝ̣ܠܳܢܳܐ ܕܠܳܐ ܦܺܐܪ̈ܶܐ ܒܰܛܶܠ̣ܬ: ܟܰܕ ܐܰܢ̱ܬ ܕܐܝ̣ܬܰܝܟ ܦܺܐܪܳܐ ܚܰܝܳܐ ܘܡܰܚܝܳܢܳܐ ܡܶܢܶܗ ܫܘܰܚ̣ܬ: ܟܰܕ ܠܶܐܡܪܳܐ ܐܶܟܰܠ̣ܬ ܥܰܡ ܬܰܠܡܝ̣̈ܕܰܝܟ ܩܰܕܝ̣̈ܫܶܐ ܡܰܟ̣ܶܟ݂ܬ ܢܰܦܫܳܟ ܘܰܠܪ̈ܶܓܠܰܝܗܽܘܢ ܐܰܫܝ̣ܓܬ: ܟܰܕ ܚܰܘܝ̣ܬ ܕܰܒܝܰܕ ܡܶܐܟܘ̣ܠܬܳܐ ܕܐܶܡܪܳܐ ܘܰܫܝܳܓܬܳܐ ܕܪ̈ܶܓܠܶܐ ܕܥܰܬܝ̣̈ܩܳܬܳܐ ܒܛܶܠ̣̈ܝ̱ ܘܐܶܬܬ̣ܫܝ̣̈ܓܝ̱: ܘܛܶܠܳܠܳܐ ܥܒ̣ܰܪ ܠܶܗ ܘܰܫܪܳܪܳܐ ܚܠܳܦܰܘܗ̱ܝ ܥ̣ܰܠ: ܬܰܚܘܝ̣ܬܳܐ ܕܡܘ̣ܟܳܟܳܟ ܐܰܠܶܦ̣ܬ ܠܬܰܠܡܝ̣̈ܕܰܝܟ: ܘܒܶܗ ܫܰܘܕܰܥ̣ܬ ܠܗܽܘܢ ܐ̱ܪܳܙܳܐ ܕܩܶܛܠܳܟ: ܕܐ̱ܪܳܙܳܐ ܗ̣ܘܳܬ݀ ܓܶܝܪ ܚܫܳܡܝ̣ܬܳܐ ܕܒܳܗ̇ ܐ̱ܪܳܙܳܐ ܚ̣ܰܕܬܳܐ ܐܰܫܠܶܡ̣ܬ ܠܬܰܠܡܝ̣̈ܕܰܝܟ: ܒܶܗ ܬܰܠܡܝ̣ܕܳܐ ܢܟܝ̣ܠܳܐ ܐܶܬܦܰܪܣܝ̣ ܘܪܝ̣ܫܳܐ ܕܬܰܠܡܝ̣̈ܕܶܐ ܠܰܟܦܘ̣ܪܝܳܐ ܘܰܠܡܰܘ̈ܡܳܬܳܐ ܕܠܳܐ ܝܳܕܰܥ ܠܳܟ ܐܶܬܥ̣ܰܬܰܕ: ܠܰܚܡܳܐ ܢܣܰܒ̣ܬ ܥܰܠ ܐܝ̣ܕܰܝ̈ܟ ܩܰܕܝ̣̈ܫܳܬܳܐ ܘܦܰܠ̣ܶܓܬ ܠܗܽܘܢ ܘܚܰܘܝ̣ܬ ܕܰܚܠܳܦ ܚܰܝܰܘ̈ܗ̱ܝ ܕܥܳܠܡܳܐ ܨܝ̣ܪ ܕܶܒܚܳܟ ܒܓܳܓܘ̣ܠܬܳܐ: ܘܟܳܣܳܐ ܡܰܙܶܓ̣ܬ ܡ̣ܶܢ ܚܰܡܪܳܐ ܘܡ̣ܶܢ ܡܰܝ̈ܳܐ: ܘܫܰܘܕܰܥ̣ܬ ܒܝܰܕ ܫܘ̣ܦܳܥ ܕܡܳܐ ܘܡܰܝ̈ܳܐ ܡ̣ܶܢ ܣܶܛܪܳܟ ܩܰܕܝ̣ܫܬܳܐ ܢܶܗ̣ܘܶܐ ܕܘ̣ܟܳܝܳܐ ܕܰܚ̈ܛܳܗܶܐ ܠܥܳܠܡܳܐ: ܘܗܳܕܶܐ ܗ̣ܘܰܝܬܽܘܢ ܥܳܒ̇ܕܝ̣ܢ ܠܕܘ̣ܟܪܳܢܳܐ ܕܡܰܘܬܳܐ ܕܝ̣ܠܝ̱: ܫܘ̣ܒܚܳܐ ܠܳܟ ܕܦܰܓܪܳܟ ܚܰܝܳܐ ܝܰܗ̣ܒܬ ܠܰܢ ܐܘ̣ܟܠܳܐ: ܫܘ̣ܒܚܳܐ ܠܳܟ ܕܰܕܡܳܟ ܙܰܟܳܝܳܐ ܝܰܗ̣ܒܬ ܠܰܢ ܫܶܩܝܳܐ: ܫܘ̣ܒܚܳܐ ܠܳܟ ܕܰܒܨܶܒܝܳܢܳܟ ܐܶܬ̣ܰܝܬ ܠܡܰܘܬܳܐ: ܫܘ̣ܒܚܳܐ ܠܳܟ ܕܰܚܠܳܦܰܝܢ ܐܶܬ̣ܬܠܝ̣ܬ ܒܰܨܠܝ̣ܒܳܐ: ܘܡܶܛܽܠ ܗܳܕܶܐ ܡܦܝ̣ܣܝ̣ܢܰܢ ܠܳܟ ܕܬܰܫ̣ܘܶܐ ܠܰܢ ܕܰܒܕܰܟܝܘ̣ܬܳܐ ܘܩܰܕܝ̣ܫܘ̣ܬܳܐ ܢܶܫ̇ܬܘܶܐ ܠܫܰܘܬܳܦܘ̣ܬܳܐ ܕܐ̱ܪ̈ܳܙܰܝܟ: ܘܰܒܥܝ̣ܪܘ̣ܬܳܐ ܘܙܰܗܝܘ̣ܬܳܐ ܢ̇ܶܚܰܫ ܘܢܶܫ̇ܗܰܪ ܒܠܶܠܝܳܐ ܗܳܢܳܐ ܕܒܶܗ ܚܰܫ̣ܬ ܘܰܫܗ̣ܰܪܬ: ܘܢ̣ܶܬܬܫܝ̣ܓ ܠܶܒܰܢ ܡ̣ܶܢ ܥܰܘܠܳܐ: ܘܢ̣ܶܬܕܰܟܶܐ ܒܰܪܢܳܫܰܢ ܓܰܘܳܝܳܐ ܡ̣ܶܢ ܨܳܐܬܳܐ ܕܰܚܛܝ̣ܬܳܐ ܢ̣ܶܬܡܰܪܩܽܘܢ ܪ̈ܶܥܝܳܢܰܝܢ ܡ̣ܶܢ ܟܽܠ ܛܘ̣ܠܫܳܐ ܘܟܘ̣ܬܡܳܐ: ܘܢܶܗ̇ܘܶܐ ܒܢܰܝ̈ ܐ̱ܪܳܙܳܐ ܘܢܳܛܪ̈ܰܝ ܓܘ̣ܥܠܳܢܳܐ ܕܐ̱ܪ̈ܳܙܶܐ ܠܳܐ ܢܶܗ̣ܘܶܐ ܒܰܢ ܒܰܪ ܐ̱ܪܳܙܳܐ ܕܝܘ̣̈ܕܳܝܶܐ ܐܰܝܟ ܝ̣ܗܘ̣ܕܳܐ: ܕܰܠܐ̱ܪܳܙܳܐ ܕܚܝ̣ܠܳܐ ܐܶܬ̣ܩܰܪܰܒ ܒܡܰܪܳܚܘ̣ܬܳܐ ܘܠܳܟ ܐܰܫܠ̣ܶܡ ܒܢܘ̣ܫܰܩܬܳܐ ܕܢܶܟܠܳܐ: ܠܳܐ ܢܶܗ̣ܘܶܐ ܒܰܢ ܕܠܳܐ ܫܳܘܶܐ ܠܗܳܕܶܐ ܛܰܝܒܘ̣ܬܳܐ ܐܶܠܳܐ ܒܰܚܕܳܐ ܐܰܘܝܘ̣ܬܳܐ ܢܶܫ̇ܬܘܶܐ ܕܩܘ̣ܒܳܠܛܰܝܒܘ̣ܬܳܐ ܘܬܰܘܕܝ̣ܬܳܐ ܢ̇ܩܰܪܶܒ ܠܳܟ ܘܠܰܐܒܘ̣ܟ ܘܰܠܪܘ̣ܚܳܟ ܩܰܕܝ̣ܫܳܐ: ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܬܰܘܪܳܐ ܕܦܶܛܡܳܐ ܕܰܒܢܶܟܣܬܳܐ ܕܰܕܒܝ̣ܚܘ̣ܬܶܗ ܒ̣ܰܛܶܠ ܟܽܠ ܕܶܒܚܝ̣̈ܢ ܘܢܘ̣̈ܩܳܝܺܝ̣ܢ ܕܰܦܬܰܟܪ̈ܶܐ ܡ̣ܶܢ ܐܰܪܥܳܐ: ܘܰܒܚܰܫܶܗ ܐܰܡܝ̣ܬ ܠܚܰܫ̈ܶܐ ܡ̣ܶܢ ܓܶܢܣܳܐ ܕܰܒܢܰܝ̈ ܐ̱ܢ̈ܫܳܐ: ܘܒܰܙܩܝ̣ܦܳܐ ܕܝ̣ܠܶܗ ܩܰܛܠ̣ܶܗ ܠܗܰܘ̇ ܕܩܰܛܠ̣ܶܗ ܠܰܐܒܽܘܢ ܐܳܕܳܡ ܒܦܰܪܕܰܝܣܳܐ: ܘܒܰܩܝܳܡܬܶܗ ܐܰܩܝ̣ܡ ܠܰܢ ܡ̣ܶܢ ܡܰܦܘ̣ܠܬܳܐ ܕܰܚܛܝ̣ܬܳܐ: ܩܰܒܶܠ ܠܥܶܛܪܳܐ ܗܳܢܳܐ ܕܒܶܣ̈ܡܶܐ ܕܡ̣ܶܢ ܒܨܝ̣ܪܘ̣ܬܰܢ ܐܶܬ̣ܩܰܪܰܒ ܠܡܳܪܘ̣ܬܳܟ: ܘܒܰܛܶܠ ܡܶܢܰܢ ܒܥܶܠܕܒܳܒܘ̣ܬܳܐ ܘܐܰܟܬܳܐ ܘܚܶܪܝܳܢܳܐ: ܘܐܰܡܠܶܟ ܥܠܰܝܢ ܫܰܝܢܳܟ ܘܰܫܠܳܡܳܟ ܗܰܘ̇ ܕܰܒܟܽܠܙܒܰܢ ܐܝ̣ܬܰܘܗ̱ܝ ܫܰܝܢܳܐ ܠܳܐ ܡܶܣ̣ܬܰܕܩܳܢܳܐ ܡܫܝ̣ܚܳܐ ܐܰܠܳܗܰܢ ܠܥܳܠܡܝ̣ܢ܀